نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

هوه أنا هبلة ولا الناس هيا اللي كدة؟




عادي جداً مصاء الخير  أكن  كل  حاجة ماشية طبيعية
وعادي جداً برضو سلام ليكم جميعا
مليش ف السياسة أنا من زمان بس اعصابي  باظت ف الفترة اللي فاتت ولله الحمد
مش مشكلة
أنا تعبت
مش مشكلة برضو
أنا مش فاهمة
هنا بقة المشكلة
هل أنا شكلي يوحي إني هبلة فالناس بتستهبلني؟؟
ولا الناس هيا اللي بتحب تكدب وتوهم اللي قدامها بحاجة مش فيها؟
يمكن أنا اللي مش بفهم صح؟
بقالي كتير  قوي مكتبتش  عالكي بورد  خواطر ولا  اي   حاجة تيجي ف عقلي
وبقالي كتير مرسمتش
وبقالي كتير مغنتش
ومتمشتش
ومكنتش عايشة أصلاً
كنت ف  فقاعة من الضباب و تقريبا  أنا لسة فيها بس ببصلكو من الشباك
لية بنكدب لو نقدر نكون صادقين
مش   هقول إني عمري ما كدبت
لأ انا مش كدابة
أيواااة  كداب
اسم تفعيل باين بتاع الحاجات الكتيرة دة
طيب  سؤال تاني معلش  برضو
هوه أنا أما ابقى صادقة أبقى وحشة؟؟
يعني أما موهمش اللي  قدامي و مختلقش  اعذار ومبررات مش موجودة أبقى وحشة؟؟
مش عارفة صراحة
آه صح بدأت الامتياز
مبعملش حاجة لسة بس صحابي كلهم شغاليين  
نفسي اشتغل
اعمل حاجة يعني
انهاردة كنت هعيط من كتر الفراغ  الدم كان  بيغلي ف دماغي  من كتر منا  قاعدة عالكرسي مستنية الدكتور  يجي عشان مينفعش يجي وانا مش موجودة
نزلت شوية كتب بي دي اف  عن الطب عالموبايل  بس  اكتشفت اكتشاف  معوق إنه بيكبر  الكلام  قوي  بتبقى  كلمة واحدة تقريبا ف الصفحة  يعني يجيلي شلل  عقبال ما  اخلص  صفحة من الكتاب
مش عارفة بقول دة لية
يمكن عشان كالعادة الأزلية مش لاقية حد اقوله فبقول للمدونة
لسة واحدة صحبتي امبارح بتقولي بطريقتك دية مش هتلاقي  جمبك حد
ومش هيبقى عندك صحاب
وأما تحتاجي حد يبقى جمبك مش هتلاقي
السؤال اللي طرأ ف دماغي بقة ...ـ
وهوه أنا مش محتاجة حد   ؟
طول عمري بحلم بأستاذ أو شيخ   يبقى مرجع ليا
بغبط  الناس بتوع زمان قوي
وبغبط أي حد  لية استاذ متبنية فكرياً
أنا بطلت أفكر أصلاً
يوة
أنا أصلا مش عارفة أنا بكتب هنا دلوقتي ليه...ـ
أنا  جالي حالة بلاهة اكتر من اللي عندي
عامة مش وقته
أنا عندي شوية حاجات لازم أعملها قبل الصبح
يلا  سلام
آه  صح الرسمة اللي فوق أكيد مش بتاعتي أنا قولت إني بطلت رسم
دي  ل
Dale Grimshaw


آه  صح  برضو
القصيدة دي حلوة  قوي  
لأشرف  توفيق
مرسال لحبيبتي


9 قالوا رأيهم في العك اللي تحت ؟؟؟:

حمدا لله على السلامه
احنا في حاله ما يعلم بها إلا ربنا
انا أسوأ شهر عدى عليا من يوم ما اتولدت سنة 78 كان الشهر الماضي
هي ايام صعبه كله بيمر بيها على حسب المشاكل اللي عنده وعلى حسب الاحداث الجاريه
كله بيأثر في البني آدم

المهم حمدا لله على السلامه

 

يا رب
يعديها على خير

الله يسلم حضرتك :)

جزاك الله خيراً :)

 

وحشتينا
:)

حمد لله على سلامتك اولاً
والف مليون خمسة وعشرين عشرطاشر زليار مبروك النجاح والتخرج ثانياً
لو اعتبرنا ان ده تخرج مبدئي يعني من الجامعه لحد اما تخلصي امتياز على خير ان شاء الله وتبقى دكتورة رسمياً قد الدنيا كده
:)

ربنا يكون في عونك ويقويكي وما تستعجليش على الشغل كله جااااااااي

وعـ فكرة حكاية البلآهة دي
انا زيك بالضبط بالضبط بالضبط
" تلاته بالضبط "

ومرسال لحبيبتي دي خرافيه واكتر كمان
:)

" مش عارفه ايه الاضافات العبقريه اللي انا بضيفها بالكومنت ده "


عموماً
ربنا يكرمك بكل خيييير يا دكتووورة
:)


انا كنت هنا
تحياتي

 

ههههههههههه
بجد ضحكتيني ربنا يخليكي

ميوحشكيش غالي يا رب
هوه مفروض ميوحشكيش وحش بس انا قولت اعمل نفسي مهمة
هههههههه
الله يسلمك و يخليكي

الله يبارك فيكي برضو

يعني حاسة اني اضافاتي انا اللي عبقرية؟

ربنا يعافينا من البلاهة انا وانتي و أي حد تاني يا رب نفسة ربنا يعافية

اة فظيعة :)

بجد والله ؟؟ انتي جيتي؟؟
حياكِ الله
:)

 

وحشتيني جدًا:)
أنا تقريبا كنت كل يوم أدخل أشوفك نزلتي بوست ولا لسة
.....
بالنسبة للبوست هو تقريبًا الناس هي اللي كدة بس ميهمكيش خليهم مع نفسهم وفي الآخر هتلاقي أشخاص شبهك أو على الأقل معندهمش مشكلة في انك تقولي الحقيقة
والبلاهة متأصلة في كل شخص عادي يعني مش حاجة وحشة
........
متسبيش المدونة تاني
وارجعي ارسمي رسمك وحشني

تحياتي

 

ايثار
همممممم

خدت نبذة سريعة عن اللي بتكتبيه و اللي بترسمية
اكيد عشر دقايق او ربع ساعة في مدونة كاملة ي ميكفيش بس قولت اخد فكرة

انا نفسي اعرف ارسم بالالوااااااااااااااااااااااااااااااااااااااااااااااااااااااااااااااان

اية دة انا خلصت العياط؟
لا
عااااااااااااااا
ههههههه
معلش معلش اختك حصلها تضخم ف معدل البلاهة

..
ميوحشكيش وحش يا سيدتي الجميلة
ومنجلكمش ف حاجة وحشة
وشالة يخليكي و يسترك

:)

سلامٌ عليكي

 

على فكرة أنا عاشقة الحب.. زماااان فاكراني؟؟
وغيرت اسم المدونة من مدينة الحب للأرجوحة الحمراء

 

يا شييييييييخة
والله العظيم؟

رسمك احلو قوي بجد
بقة تحفة

بنت انتي مخك حلو ماشاء الله

اذا لزما وحتما ولابد ان ادعبس اكتر ف المدوننات بتاعتك

ماشاء الله عليكي :)

مبسوطة بجد ان انتي انتي يعني وهنا وبتاع
هههههه

سلامٌ عليكي

 

انا كنت معدي من عندكو بظروفها وشفت الكتابات دي مش عارف اساسا اللي بكتبه ده هيوصل ولا لا بس اقولك حلو اوي الشغل ده والصدق اجمل شىء والبلاهه مش موجوده عندكو اسا بس انا شايف ان فكرة الدنيا السريعه مسيطره خلي فيه شوية صبر