نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

عيب كدة


 على فكرة أنا مستنية بقالي كتير
وهوشتي كذا مرة إنك جاية
  وحسيت فجأة بسعادة
وبعدين روحتي بعدها بدقيقتين
لأ يا ماما متفقناش على كدة
انا قاعدة في حالة عجيبة من الاحباط ولا الملل ولا مش عارفة اية بقالي كتير
يعني عيب عليكي
فينك يا حجة
أنا أهوه
مش شايفاني؟؟؟؟
المفروض انبسط امتى؟؟؟
where is my Ecstasy?
euphoria?
elation????
Mania?????
creativity???
Hard working???
Power???
Stamina???
Loving people??
انا تقريباً كدة هنساهم؟؟
لأ كدة عيب على فكرة و ميصحش
يلا يمكن تيجي في العيد
أديني مستنية
 بس بجد
بجد
اتأخرتي
(وش لاوي بوزوا)
................
the photo is painted by : Dr. Hugo Heyrman

كلام ملهوش لازمة

نصيحة أخوية .. بلاش تضيع وقتك في قراءة هذا العك


تقريبا مليش نفس انشر اي حاجة كتبتها
ومليش نفس ءألف أي حاجة
ومليش نفس أنبسط
ومليش نفس أعيط

كلت ايس كريم ......عادي
كلت درة ........ طعمه نشا
كلت بيتزا ....... شوية عجين

خرجت مع والدتي ..... متضايقة ان حد بيوجهني
خرجت لوحدي ...... منبسطتش

قعدت أهبل عالانترنت ....... حسيت بالاعاقة
قولت أتعلم حاجة وانا قاعدة على النت ....... زهقت

سمعت أغاني ....... قرفت من نفسي
سمعت أناشيد دينية ........ مليت و مكملتش

روقت بيتنا و نضفته ...... بقيت  و اتضايقت ان محدش بيساعد
بقوا يساعدوا و انا بطلت اشتغل في البيت ........ قرفت من منظر البيت و مني عشان انا فاضية

جبت شوكولا و بسكوي و ميرندا تفاح .......... كلتهم و خلاص
مجبتش .......... حاسة إن فيه حاجة ناقصة

استحميت .......  كسلت أسرح شعري و زهقت
مستحمتش ....... قرفت من نفسي

جبت كتب كتير و بقيت  اقرا....... فرحت في الاول بنفسي و بعدين مليت ( انا اصلا بكره القراءة)ـ
مبقتش أقرا ........ حاسة إني جاهلة

دعيت ربنا كتير ...... حسيت إني مقصرة و مستحقش إني أدعي
بطلت أدعي ....... حاسة إني  منيلة بستين بتاع و بعيدة عن ربنا

مفروض أعمل حاجة  مهمة نفسي جداً اعملها بقالي كتير قوي
وآخر ميعاد ليها بعد اسبوع و كام يوم
بدأت فيها و زهقت
احتمال كبير يكون شيطان
بس انا فعلا مش عارفة ليه مش قادرة اواصل
حاسة إني بطاريتي فاضية

محتاجة اعادة شحن
واعادة هيكلة
واعادة روحانيات
واعادة حاجات كتير قوي

نفسي اموت خميس و جمعة و سبت و حد و اصحى التلات

يييييييييه افتكرت
مفرض اني اركب الوش البلاستك
واعمل نفسي مبسوطة وانا بسلم على الناس في العيد
عارفة ان مفروض ان الناس تفرح في العيد
وتتلاقى و كدة
بس
انا فعلاً بحس إنه فرض
وإني بنافق
اهلا يا حبيبتي
وحشتيني
وانا نفسي اسيبهم كلهم
مفروض اني مدورش وشي ومعملش نفسي مش شايفاهم زي ما بعمل في الطبيعي
مفروض ودة اللي بعمله في العيد
إني اروح ناحيتهم
وابوس و احضن

احلى حاجة في العيد صراحة هيا صلاة العيد نفسها
مليش انا صراحة في اللحمة
ولا في التهاني و التسليم و البوس و الاحضان

يلا
ربنا يهديني بقة
يمكن تحل عليا رحمة منه و افرح يومها و اسلم على الناس بحب داخلي و ليس نفاقاً

آه صحيح
كل سنة و أي حد طيب و مبسوط و سعيد و ربنا يرضى عنا جميعاً و ينزل السكينة و الرحمة و الرضا و السعادة و الحب و المودة في قلوبنا كلنا
آمين

بحبك بس مش قادرة





جزء مني بيحبك انا متأكدة
بس فعلاً مش قادرة أقدملك حاجة
عشان خاطري سامحيني
و اصبري عليا شوية كمان 
في يوم هفوق
و اعمل كل اللي حلمنا بيه
في يوم هنفض عني الغبار
و اقولك أنا هيا دية
معنديش حد ممكن اتعشم فيه و اقوله - وانا متأكدة إنه مصدقني - اصبري غيرك
استحملي شوية كمان
(وش مبتسم و جوه  قلبه حزين)
عارفة إنك بتقولي حاسبي عشان الوقت بيفوت
و عارفة إنك مش هتقضيها سكوت
وكتير فيا هتصرخي
بس متأكدة
إنك هتستحملي
وجوه منك هيفضل يقولي كملي
بحبك
يا 
أنا
.............
the photo is painted by : Cyn McCurry

نفسي


نفسي أمحي كل القيود اللي  محوطاني
و متمناش أبقى واحدة تانية غيري
وأبقى أنا
وأنا بس اللي أحدد مصيري
نفسي أشيل كل التراب اللي محطوط عليا 
نفسي أتنفس هوا محوط حاجة أنا عاملاها بإديا
إمتى بقة هفوق 
إمتى هبدأ أعيش
 

رغي ملهوش أي لازمة بالنسبة لحد غيري

اوك ... كلام ملهوش لازمة

أشعر بالتخلف و التفاهة
نفسي ابقى شخص بيفهم
عامة هذا  مجرد رغي
نصيحة أخوية بجد ... بلاش تضيع الوقت في القراية عشان كلها حاجات تافهة و ادعيلي ربنا يهديني و خلاص

.........

الموبايل بتاعي جابلي السُل
اختي بتقولي هاتي موبايل تاني
انا مش من النوع اللي بيحتفظ بالحاجة ولا يرتبط بيها
بس الموبايل اللي انا عاوزاة ب 2500 و صراحة انا مش هدفع 2500 في موبايل
فمستنياة يرخص شوية .. المهم الموبايل وديتة للمرة الخمستلف للراجل عشان يصلح الكاميرا .. و هروح اشتريلة بطارية اصلي من التوكيل ان شاء الله .. عشان موايلي مش طايق البطارية التقليد .. طالع تنك  مش عارفة لمين
المهم

...........
اشتريت مثبت لأ مش مثبت شعر .. مثبت ألوان لأ مش صبغة .. أنا أصلاً ماليش في العك دة
دة مثت ألوان بتاع اللوح
عشان القلم الرصاص بيبهب و بيبوظ شكل الرسمة بعد فترة.. فهذا السبراي يحفظ لها رونقها
المهم يعني .. اتدبست في 75 جنية .. اختي بتقولي : آل يعني دافنشي بيرسم

وبهذه المناسبة أحب أقول إني بقيت أرسم على اسكتش 35 * 50 بدل من 25* 35
و رسمت عليه أول رسمة .. لما موبايلي يرجع من عند الحلاق هصورها و  اصور اخواتها الصغننين و اعرضهم باذن ربي
الرسمة برضو متعرفلهاش معنى محدد
و صراحة مبقتش بركز بقة انا برسم إيه
المهم إني بطلع مشاعري
و اللي يترسم يترسم

...........

نفسي أتعلم أرسم رسم تشكيلي بالألوان .. بجد بجد
ونفسي جداً عالآخر آدرس فنون جميلة .. دراسة حرة
محتاجة انظم وقتي

............

حاسة إني مكبوسة .. لأ مش حد كبسني المتعارف عليها دية
لأ مضغوطة .. اللي هيا .. لما تحس إن حد واقف و حاطط إيده على كتفك وبيدوس على راسك و مش عارف ترفع نفسك
حاسة إني عندي طاقة الهبل ومُهدرة

حاسة إني هتسئل يوم القيامة عنها
بجد محتاجة حد يشعل فتيلتي  و يسيبني  انطلق
حاسة ان جوايا قدرات اني اعمل حاجات بس مش قادرة
.............
بقيت بسمع أغاني  تاني .. الموضوع دة مضايقني قوي
حاسة بالقرف
انا حتى مبقتش سمع موسيقى
هبطلها في يوم ما  .. معتقدش إنه هيكون اليوم دة بعيد
لإني مش عاجبني منظري كدة
..........
مبقتش بطيق التلفوز ( قشدة جداً ) مبقتش مدمنة زي زمان
وحتى مبقتش أكمل أي برنامج أو فيلم .. نص ساعة و بقوم
شئ جيد
............

مبقتش أحب أي نوع من المشروبات
ومبقتش اشرب في كوبايتي المج اللي بحبها
و بقيت آكل الشيبسي كدهو و خلاص
بقيت أحب رفايلو و فريرو روشية  بس مبحبش ازود منهم عشان انا مليش في الحاجات المسكرة
بقيت بحب اتمشى انتقاماً من نفسي
وكل ما أحس إني تعبانة أمد زيادة
و كل ما رجلي توجعني اسرع و ادوس عليها اكتر
لما بلاقي حد بيمد قدامي بمد و احاول اسبقة

..............
جبت كتب كتير و كنت مستعدة إني اقراهم كلهم
وكنت تقريباً في الفترة اللي فاتت مبعملش حاجة غير القراية
مبقتش قادرة اقرا دلوقتي

مبقتش قادرة اعلق عند حد
بروح و الف عالمدونات و اقرا و مبقتش حتى بدوس كلمت التعليقات
ولما بعلق بيبقى عند مع نفسي عشان اثبت لنفسي اني لسة بعرف اعلق و لسة بعرف احس بلكلام و افهمه

............

انهاردة  مكنتش عارفة اقول للراجل بتاع الميكرو باس على المكان اللي كنت رايحاه
وغلطت في النطق كتير قوي
ونزلت وانا حاسة بالعجز

............

روحت ميترو و اشتريت بحاجة و ستين جنية حلويات ( بسكويت و شوكولاتة و ... )ـ .. للعلم .. دة بالنسبالي أنا مبلغ كبير

............
عاوزة أروح أفصل فساتين
لأ مش فساتين فرح .. فساتين كدة حاجة شبة العبايات و بيتلبس عليها جاكت.. عندي القماش بس عاوزة لسة انزل الازهر اشتريله بطانة
عاوزة آخد من مها ( إنها الحياة) نمرة الخياطة .. بس مش عارفة أوصل لمها أصلاً
...............
عاوزة اروح لدكتور نفساني بجد عشان اكتشفت إني فعلاً مش زي الناس الطبيعيين.. هوه الموضوع مش مضايقني شخصياً ..بالعكس انا أصلاً مبحبش أكون زي الناس .. عندى الداء دة للأسف .. مرة لاقيت ايشارب كنت لابساه واحدة تانية لابساه .. بطلت ألبسه .. مش عارفة ليه .. المهم يعني .. إن موضوع الناس .. زهقت
..........
بس زهقت
او مزهقتش بس مش لاقية كلام
يعني أهو
آه صحيح بالمناسبة
إنتي يا بنت ياللي عارفة نفسك
أيوة انتي
آه آه انتي انتي
بجد ربنا يخليكي عشان مستحملاني  رغم  كل اللي قولتهولك
.........
بث
مفيش كلام تاني .. مع إني لسة نفسي أرغي .. المهم بقة خلاص

آه صحيح
بقالي كام يوم عاوزة اعيط
بس مش بعيط عشان سبب بسيط جداً إني مش عارفة هعيط على إيه و إن العياط مش هيفيد بأي شئ خالص
ومش هيحل أي حاجة
بس بقة عشان قرفت

سلامٌ عليكم

كثيراً ما أكون حقاً صعبة الإرضاء 
حتى و إن بدا عليّ عكس ذلك
............
photo is painted by :John Singer Sargent

لهذا أعشق الماء




أود أن أكون كالماء
شفافة: في مشاعري.. يكاد الذي يراني يرى من خلالي 
لكني أملكُ من الغموض ما يجعله يحتاج إلى الكثير من العمليات الكيميائية و الجهد الكهربي كي يعلم تكويني


واضحة : يظهر على وجهي إذا ما تعكر صفوي
لكني قد ارسب الطين في اعماقي كي لا يتكدر به من حولي


أملكُ الكثير : تماماً كالبحر.. غير أني أخفي الآليئ في أعماقي لا يحصلُ عليها إلا من يستحق


متكيفة : أملكُ كالماء خاصية الميوعة فيسهل علي التكيف على قدر الاناء و على شكله 
لكني قد أكون جامدة كالثلج إذا مااحتجت إلى ذلك
و قد أغلي لأحرق من يقترب مني في حالة غضبي
و إذا ما حزنت أتمكن من التبخر و الانتشار لأرحل عن الجميع


مُعِينَة : كالماء أحمل من يطلب معونتي لتسير مراكبه على سطحي
لكني قادرة تماماً على إغراقة إذا  شئت أن أفعلها


غير متكلفة : كالماء أبدو في  مظهري .. أبسط من أن يلتفت إلي من لا يفهم في الذوق و أصعب من أن يتمكن الكثيرون في تقليدي
لا يهيم بي عشقاً إلا من يفهم كيف يعشق بساطة الماء 


متقلبة : كالبحر تتدرج ألواني  ليلاً و نهار و تختلف حالاتي و تموجاتي
بين الهدوء و العاصفة
أحتاج من يعشق الجنون في حالات جنوني
لكني سهلة بسيطة  أحمل لصغار ليسبحوا بي في حالات روقاني  و هدوئي


ذات مذاق  فريد : أن أكون كالماء بلا مذاق  محدد .. بل بمذاق  لا يقدرُ أحداً على افتعاله


لكل الأغراض : أروي العطشى و انبت الزروع
أرطب الأجواء في القيظ
أدفئ في البرد
أزيح الآلام
أنا للهو كما أنه لا يمكن الاستغناء عني في ساعات الجد
و هناك بالطبع المزيد


ولهذا أعشق لماء
وأتمنى أن أكونه

....................
حكوك التبع و النشل محفوسة لنعكوشة
photo is painted by: dark-zephyr

خلطة محتاجة أظبطها


الأمر يحتاج إلى  : حبة ثقة في الله
شوية ارادة
قدر من الثبات 
كمية لا بأس بها من البرود
معلقتين  ذاكرة
عصير التفكير و الحكمة
ذرة شكيمة
وصلاة استخارة 
في صينية من الدعاء
و اتركي الموضوع في فرن الحياة حتى يتم النضج
...............
مش عارفة أقفله ولا أسيبه مفتوح
اعتقد اني محتاجاه فترة يظل مغلق حتى استجم
.............
نفسي اروح اسكندرية
............
photo is captured by:Carolyn W

رقصة جنائزية


أرقصُ على تلك المقبرة كحمامٍ مذبوح
أخترق جزيئات الهواء و تبللني قطرات المطر
يندمج -المطر- مع شعري ليرقصا بتثاقلٍ معي


أضرب الأرض بقوة في محاولة لسحقها أو سحق آلامي
رقصةً اسبانية أرتجلها على أنغام تتخبط بجنبات عقلي
أشعر بألم  ضرباتي فأزيد منها 


أسقط على ركبتاي صارخةً أحبك
فلا أسمع سوى صدى صوتي
وصوتٌ مبحوح بداخلي يردد أنك أيضاً تحبني
لكن عيني لم تكن تملك مزيداً من الدموع لتلفظها تضامناً مع صوتك


ها هي أنغام زوربا تتسلل عبر آذاني 
وها هو يقترب مني يدعوني للرقص فأرفع عيني إليه بتوسل : لا أعلم كيف أرقصها
يأخذ بيدي ليعلمني: تلك هي الخطوات .. واحد اثنان .. واحد اثنان
أكاد أسقط .. فتهرب مني ضحكة ..فيضحك عالياً
تعلو ضحكاتنا فأنثر تلك الزهور البيضاء التي جلبتها معي
أواجهه  فجأةً بضربةٍ على صدره : لماذا تركته؟ـ
لم يجيبني .. بل و يختفي زوربا و تخفت أنغامه


أنا وحدي .. وأنت لست معي
وصوتك البالي يرحل بعيداً مني ساحباً روحي معه
تتحجر مقلتاي أسفاً و صدمة و أتيقن مما لم أكن أصدقه 
لا أجد أحداً يشاطرني صدمتي سوى ضوء القمر
سكون الليل
صفير الحشرات
وحفيف الشجر


أقف بلا حراك .. لمَ أنا لازلتُ واقفة؟ .. لماذا لم أرحل؟.. ولماذا أنا هنا بالأصل؟ـ
أنا حتى لا أملكُ حديثاً لأخاطبُ به الأموات
ولا أملكُ تعليقاً على أسمينا الذان كتبتهما للتو على شاهد ذلك القبر


يداي ساقطتان بجانبي رغم ارتعاشات جسدي
لا أعلم هل أرتعد من البرد؟ـ 
أم أنه أنت وأنا بين سكرات الموت؟ـ
أم أنه الخوف من كل شئ بعد فقدك؟ـ


لا أحوطني
لم أفكر بالأصل أن أحوطني
فقط.. لا أزال واقفة


تعلو أصوات أنفاسي
و أسمع نبض قلبي يرتفع رويداً رويداً
أشعر بالبرد فأنكمش على نفسي
أرتجف فأحوطني 
أنزع القلادة عن رقبتي
أتركها لتسقط دون أن أقذفها
تسقط دموعي
أجر أزيالي
ببطْ
حتى أختفي مع وقع خطواتي بين ظلال المقبرة
......................
تقول أحلام مستناغمي: "لتشُفى من حالة عشقية ، يلزمك رفات حب ، لا تمثالاً لحبيب تواصل تلميعه بعد الفراق ، مُصّراً على ذاك البريق الذي انخطفتَ به يوماً .يلزمك قبر ورخام وشجاعة لدفن من كان أقرب الناس إليك"ـ


حكوك الطبع  و النشل محفوسة لنعكوشة
photo is designed by:DesignzGraphix

صحيح... عرفتي تنسيني؟؟


بليل هقول للقمر ميطلعش ليك
و أخلي النجوم كمان تغمض و يبقى ليلك اسود كحيل
هرقص و اغني لوحدي ومش هفكر فيك
ولا ثانية و هفضل أضحك طول الليل
هطلع كمان للشهاب و اقعد احكي معاه و مش هجيب في سيرتك
و اقفل  موبايلي و اسيبك قاعد كدة في حيرتك
هنام عالهوا و اسند راسي عالسحاب
و اضرب برجلي الخوا تبرق 
 و لما انفخ فيه تقلب ضباب
هنساك على فكرة عادي
منا بنسى كل الناس
ومش هعتب عليك
و هعزق في ارضي بفاس
و ازرع زرعة جديدة 
غيرك يا زرع شيطاني
وهقلع جزورك مني
ومش هرويك بحناني
لأ .. مش هدوس على قلبي
هوه اللي هيدوس عليك
وهفضل أحلف بحبي
ماهو  أصلاً مكانش ليك


بس ابقى قولي إزاي  أول ما اشوفك 
ميرتجفش جسمي 
ولا دمعي يجري عليك
ولا تثبت عيني في عينك
ولا احس إني مشتاقة ليك
ولا يهرب كلامي مني 
اول ما تقول وحشتيني
وتسألني والبسمة على وشك
صحيح... عرفتي تنسيني؟ـ 
.....................
حكوك التبع و النشل محفوسة لنعكوشة
photo is painted by : Paul Robertson

موعد الرحيل




تظهر بالمرآه صورة مشوشة لامرأة ارتسمت ملامحها الأولية منذ قرابة الثلاثة عقود
عبثت انامل الحياة في وجهها لتكسبه لحناً صاخباً - هو تقليد رديء لموسيقى  مبهجة - فلا تدري من منظرها هل هي سعيدة أم بائسة
إذا ما نظرت إلى جبهتها تجد بوادر التجاعييد التي  ستكسو وجهها بعد حقبة من الزمن إذا ما طال بها العمر 
 ترى سطحاً مهيئاً تماماً لتلقي مزيداً من الألم
قديماً كان يمكنك أن ترى لمعة عينيها الضاحكة تبرق على استحياء من وراء جفونها المحروسة برموشها الكثيفة السوداء 
الآن لا ترى سوى عيناً ذابلة تكاد تشك في بياضها محاطة بالهلات السوداء 
أما أنفها  فقد فعلت به الدنيا أفاعيلها .. هوغاضبٌ منها لا محاله فتراه موجها  إلى اليسار فتقتنع كلما نَظَرَتْ إليه أنها من أهل الشِمال 
تعبث به في محاول لتعديلة وهي تقول : لماذا لا يمكنه أن يكون معتدلاً
رغم عمرها فإنك تجد الحبوب تغزو وجهها خاصة فوق شفتيها و قرب صدغيها وكأنه نمل متكوم على فتات الخبز 
فمها .. ذلك الشئ الذي لا تكاد تراه في وجهها لشحوبه و صغره ولكن فائدته الوحيدة هو أنه يغطى تلك الاسنان الصفراء- لشراهتها في شرب السجائر- و يحبس تلك الرائحة الكريهة التى تنطلق من فمها إذا ما قامت بفتحه
لا شئ أكثر بؤساً من وصف ملامحها
لا شئ سوى وعاء غبي يحمل بداخله روحاً لفتاة تغزل بورقة بيضاء كفنها 
و تغسل بدموعها ما قد خلفته الأحبار السوداء على تلك الورقة
تعزف على رسغها بمشرطٍ حاد فتنساب منها ألحاناً تُكتَب بدمائها على آخر نوته موسيقيه لها
تبتسم ابتسامة صفراء و هي تتممتم آخر أهازيجها
ثم تثبت عينها لأعلى معلنةً أنه موعد الرحيل
....................
حكوك التبع و النشل محفوسة لنعكوشة

مبحبهاش


ببساطة .. مش هعرف أحب حد بجد إلا أما أكون بحب نفسي
وانا مبحبهاش
آسفة

سؤال و تاج



نظراً لإني مش فاكرة كام تاج جالي ووديتهم فين بعد ما جولي ونظراً لإني عاوزة أرغي و فيه خمستلاف موضوع في مخي و مش قادرة ابلورهم لحاجات تتكتب
فأنا هكتب سؤال بس طرح نفسة عليا امبارح
و هكمل الموضوع تاج
فاللي عاوز يفيدني في السؤال براحته

واللي عاوز يقرا التاج براحته
كله مشاع

...............
سؤال يطرح نفسه


اللي اتعلمته ولازلت يعني موقنه بيه
إن لما حد بيعلي صوته و يصرخ بيعبر عن ضعف موقفه
أنا نفسي لما تنرفز و اعلي صوتي بعرف إني حاسة إني مش قادرة أعمل حاجة فبزعق
السؤال بقة
ليه بعض الدعاة اللي في شرايط الكاسيت بيعلوا صوتهم
و يزعقوا
المايك مثلاً مش جمب بقهم
ولا عارفين ان الكاسيتات صوتها واطي
أصل إزاي داعيه .. في موقف قوة لإن الدين في صفه و بيدافع عن شئ معروف اصلاً إنه صح
يبقى بيزعق
أنا عن نفسي لما اللي قدامي بيزعق بحس إن مش كل الكلام بيدخل مخي
فيها إيه لو اتكلم براحة و رزانة كدة

مش عارفة صراحة
لو حد عارف يقول



كدة البوست خلص لو حد نفسه يقرا التاج براحته
...............

التاج بقة
هوه تاج من Yusuf
صاحب مدونة إيديا في جيوبي( افعص اسم المدونة كي تصل إلى هناك)ـ

اسمك؟
مريم


سنك؟
21
لحد آخر يوم في السنة بإذن ربي
يااااه .. العمر بيجري يا لواحظ.. يلا خير
اسم مدونتك ؟
بص فوق
بس عشان برضو منكسفش السائل نعكشة

مجال دراستك؟
التب هههههه
مرة كنت بحضر مؤتمر كدة عن الطب النفسي .. المهم عند الريسبشن كدة كان فيه شوية بنات ماشاء الله زي القمر  فبقول  لصحبتي أكيد دول مش تبعنا يا بنتي .. قالتلي تصدقي أيوة 
المهم
رحت بسأل البنت على حاجة قالتلي مش انتو بتوع المرتمر بتاع التب النفسي
آه و الله التب .. أنا ازبهليت اصلاً لما لاقيتها بتتكلم كدة 
المهم بعد ما خلصت معاها قولت لصحبتي .. دول أكيد مش تبعنا

هل فكرت في إغلاق مدونتك؟ والسبب؟
آه .. و قفلت مدونتين ليا بالفعل
واحدة اسمها 
Swing
والتانية
انسحبت من اشتراكي فيها اللي هيا المرسم
و كنت بفكر أقفل نعكشة
ليه بقة؟
لشئ في نفس يعقوب

ا

ايه رد فعلك لو حد قل ادبه عليك ف المدونة؟
همسح تعليقه
عادي يعني اصل الواحد مش هيحكم الناس
وبعدين هوه او هيا طبيعته كدة فأنا مش هدخل في طبايع الناس
ومش هلوم عليه
بس همسح تعليقه
عشان محدش يتأذي لما يقراه
بس



اسوأ مدونة دخلتها؟
مش فاكرة صراحة 
حاولت اعصر دماغي معرفتش
سوري

هيحصل إيه لايميلك بعد ماتموت؟
معرفش يعني بس لو اوبشن ان الايميل يروح لما حد ميستخدموش 30 يوم لسة موجود
فهيروح
عادي يعني

اديت الباسوورد لحد قبل كده؟
آه

 عشان كنت عاوزة لما أموت حد يقفل المدونة عشان لو كنت قلت حاجة غلط مفضل اتحاسب عليها
او يقول إني مُت يمكن حد يدعيلي  يعني
السفر بالنسبة لك؟
يااااااااااااااااه... نفسي قوي اسافر 
دة حلم .. يعني انا بموت في مصر اصلاً و مهما سافرت و عجبتني دول عارفة اني هرجعلها
بس فكرة اني الف العالم دية حلم يرودني في لحظات سعادتي يعني
حلوة يراودني ديه 
السفر بالنسبالي استجماااااام .. هروب بس هروب شييك.. فترة صلح مع النفس
السفر بالنسبالي حاجات جديدة بشوفها وانا بحب قوي استكشف
السفر بالنسبالي تجربة جديدة نفسي اعيشها
السفر تعايش مع ناس و طبايع متعاملتش معاها
السفر بالنسبالي طيارة هبص منها على السحاب و هسرح في الملكوت
السفر بالنسبالي  سفينة هبقى فيها وسط البحر  و اهيم بالليل سواداً
السفر بالنسبالي صحرا على الجمبين او ارض زراعية عالجمبين وانا راكبة العربية و مخرجة راسيو ساندة على  إيديا و سرحانة و بفكر
السفر بالنسبالي دراسة بفكر اعملها
حاجات كتير بس عشان محدش يزهق


المود بتاعك إيه؟
متقلبة بغباء
كل كام دقيقة بحال
بس في الطبيعي متقلبة بس مش قوي كدة يعني كل كام يوم


بتعمل إيه وقت فراغك؟
على حسب المتاح
يعني لو انا مثلاً ساعة وقت الفراغ دة كنت في الشارع فانا هسرح في الشارع.. بحب قوي السرحان( يعني افضل امشى كدةوانا مش عارفة رايحة فين و كل لحظة و التانية اسئل انا في شارع إيه)ـ
لو كان وقت الفراغ دة في بيتي  فهناك الكعبروتر  و الكتب و ترويق البيت( بكرهه بس اهو يعتبر من وقت الفراغ) و تلاقيني كدة برقص باليه مع نفسي ( متعلمتش بالية اصلاً  مجرد حركات ارتجاليه يعني )ـ بسرح مع نفسي في اوضتي و النور مطفي او مولع مش فرخة كتير... بهتم بنفسي بقة يعني احط كريم اسمنتكوا او احط ميكياج ( فاشلة انا في الاهتمام بالنفس ولما بحط ميكياج ببقى عاملة زي امنا الغولة او شبة سعاد حسني في فيلم الزواج عالطريقة الحديثة لما جالها عريس و حبت تطفشة  بإيديا دول .. اشرب اشرب ) بس اهو بحط من باب التغيير و بروح اغسل وشي على طول .. احط منيكير بس انا مبستحملوش على صوابعي فتلاقيني حاطة الاسيتون جمبية على طول ابص بصة على صوابعيني و امسحه.. أي حاجة متاح اني اعملها بحب اعملها
بث


الأكلات المفضلة؟
هوه انا معنديش اكله مفضلة .. المهم انا حالتي اية وانا باكل و مين بياكل معايا
بس انا بحب لبطاطا المقلية و البيتزا مثلاً ممكن الكشري
و الفول و الطعمية السخنة  و المسكعة
وماكرونة اسباجيتي بالكاتشب


الصفات اللي أخدتها عن والدك؟
هي مش صفات لاني مش عارفة اصلا
بس انا عندي في ايدي عرق بينبض بشكل واضح ووالدي كمان
انما صفات .. فانا اصلا مش عارف عشان افيد


الصفات اللي أخدتها عن والدتك؟
ممممم ... يعني ممكن تقول العند و تنشيف الدماغ
بس مش عارفة 
يعني انا مش اقدر افيدكوا


أكتر 6 حاجات بتحبها؟
بعيداً عن ربنا و الرسول و الصحابة و ماما و بابا و عيلتي و أهلي
بحب مصر
بحب الخروج لوحدي
بحب الضحك العالي
بحب المياة بتاعت الشرب
بحب نظارتي ( هوه حب انا مجبره عليه يعني بس من غيرها معرفش اعيش ) ـ
بحب الكمبيوتر



أكتر 6 حاجات بتكرهها؟
عدم النظافة ( سواء في الاخلاق او في المنظر ) رغم اني ساعات بيبقى منظر اوضتي مؤرف فساعتها انا بكرهني
الصوت العالي .. رغم اني صوتي عالي 
الغباء.. رغم اني ساعات ببقى غبية 
الصرصار .. دة بخاف منه جداً
  التوقيع بين الناس و بعضها
الجزء الخبيث مني( الأنا الخبيثة

شخصيتك نوعها إيه؟
Bipolar
or 
Boarderline
مش متأكدة

لماذا دخلت عالم التدوين من الأساس؟
واحد قالي نظرا لإنك بتعرفي تمتبي فسيبك من الشات و الهبل دة و روحي اكتبي كلام عدل
حد كويس يسمعه او يقراه يعني
مهند صاحب مدونة الباحث عن الحقيقة ( افعص اسم المدونة للوصول لهناك


أهمية التعليقات بالنسبة لك؟
يا سلام .. التعليقات .. متعة 
آه والله 
بعيداً عن إني بكره التعليقات من نوع تحفة و رائع و رهيب لإني مبصدقهاش
بس لما حد يوصفلي احساس وصله من اللي انا كتبته بحس بشعور بالانتشاء كدة
لما حد بيناقشني في اللي كتبته بحس إني شخص بيفهم 
لما حد بيكتب اي حاجة أي حاجة بعيداً عن كلمات الاطراء و الكلام دة بسعد بيها جداً


أفضل مدونة قريتها؟
مقدرش احدد مدونة معينة عجباني قوي
انا من النوع اللي بيلقّط 
يعني مثلاً بتعجبني بوستات بوستات في عدة مدونات
بث


اهمية الانترنت بالنسبة لك؟
قوقعتي التي لم استطع الخروج منها بعد


إهداء التاج؟
مصر كلها عملت التاج دة
اللي عاوز يعمله 
هو متاح للجميع
اتفظل عزيزي القارئ




في النهاية سوري لو طولت في الحوار 
معلش اصلي رغاية

طلب و رجاء

سلام عليكم
معلش طلب يعني دة بعد إذنكم يعني


لما ببقى كاتبة 
حكوك التبع و النشل محفوسة لنعكوشة
وأما ببقى مش كتبة تحت في الحاجات المتعلقة بالموضوع  ( كلام عني )  رجااااء
محدش يعتبر الموضوع عني
عشان بتشل 
دية
مجرد
حالة
بتقمصها
وبكتبها
حتى و إن كنت عشتها فعلاً فأنا لما بكتبها بكتب اكنها واحدة تانية و مجرد مقطوعة أدبية 


معلش يعني الطلب  : اعصروا على نفسكوا لمونة و انتوا متضررين طبعاً علقوا على البتاعة كمجرد موضوع 
مش كأنا
انا مبتكسفش أقول إني مشوشة
ولا أقول إني مكتئبة
ولا أقول إني مبسوطة 
ولا  بتكسف أقول إن دية حالة عشتها بجد
و عادي يعني بتقبل اي حد ينصحني 


بس دييييييييييييييية ( حكوك التبع و النشل ) ـ
مجرد
مقطوعة
أدبية
وشكراً
جزيلاً
أعزائي القارئين
ولا أقولكوا.. عيشوا عيشوا .. اللي عايز يعتبر أي حاجة يعتبرها ..كل شئ مقبول
خدوا راحتكوا


سلامٌ عليكم أيها القوم


بلاستك


سأكتم أنفاسي لأرحل عنكم أيها القوم 
سأصعد إلى السماوات لأراقص السحب و أرصع ثوبي بالنجوم
سأرتدي ثوباً من الهواء و أشرب كوباً من المطر
سأكلل رقبتي بقوس قزح  و أرتدي خاتماً من المجرات المنسية
هناك .. حيث الطيور المهاجرةو الأرواح الهائمة .. نتحادث سوياً
لن أعود إليكم لأتنفس هوائكم 
سأغمض عيني
أرى شبورة أمامها
أشعر و كأن صدري يكاد يتفجر من الهواء
عيني تجحظ
يكاد الدم يخرج من عروقي البارزة
أرفس بساقي
أحاول أن أنزع ذاك الكيس البلاستيكي عن رأسي
لا أستطيع أن أفعلها
كنت أمزح
لا أريد الرحيل
لا.. آ ...ل
هــــــــــــــــــــــــ
...........................
12-9-2009
11:00 pm
حكوك التبع و النشل محفوسة لنعكوشة
photo is captured by : Henrik Sorensen

ارضي بقة


عندك كل حاجة مش راضية ليييييييييه 
مش قانعة ليه
عاملة كدة ليه
مش حاسة كلمة الحمد لله الذي عافانا مما ابتلى به كثيراً من خلقه ليه
غيرك حالته ما يعلم بيها إلا ربنا
إهدي بقة
إهديها يا رب بقة
ارحمها و ارضيها
و احميها من نفسها

siCk


Damn , i am becoming  more and more stupid 
I guess my social IQ now is Zero
My Mood Swings much more frequent ( every few minutes )
I just wanna be more Normal ( Oh God help me )
.................
photo is designed by: Dan:May

مش فضفضة دة تخيل










محتاجة أتخيل إني إنسانة طيبة
إني بنوتة مطيعة لأمها
و إني بسمع كلامها
و بريحها و تحس إنها فعلاً خلفت بنت صالحة
إني مش انسانة كئيبة


محتاجة اتخيل إني هطلع القمر
و إني هسافر الجزائر
و إني هلف العالم و ارجع تاني مصر
وهخلص الكلية اللي انا فيها وانا لسة بصحتي و متجننتش
و إني هيبقى عندي عزيمة غني أعمل المعادلة و الزمالة
و إني هبقى دكتورة شاطرة و على وشي بسمة تطمن المريض و اسمع من المرضى و اهلهم دعاوي حلوة
و إني هفضل ورا حلمي لحد ما احققه عشان اعمل مستشفى كبيرة الغني فيها بيتعامل زي الفقير


محتاجة اتخيل إني عايشة في حياة ناصعة البياض زي اعلان تكييف شارب
و اني ممكن في اي وقت أقدر آخد وقت مستقطع من الحياة و اروح لوحدي على البحر و اقعدلي كام يوم
واني مبسوطة قوي من جوايا


محتاجة اتخيل إن فيه حد فاهمني و عاوز يفهمني و نفسه يفهمني
وإني واضحة قوي
و إني عندي واحدة صاحبة انتيم و تحبني واحبها تحبلي الخير واحبلها تتقبلني باخطائي و اتقبلها نتناقش ونتشارك و نحاول نصلح بعض براحة


محتاجة اتخيل إني لابسة نقاب ومش هاممني اي حاجة في الدنيا
واني بصلي كل يوم بليل القيام و اقعد ابكي بين ايدين ربنا
واني لما بصلي ركعتين بحس بالخشوع و إني قدام الخالق عز و جل
وإني راضية من جوايا


محتاجة اتخيل إني حلوة
وإني رشيقة
و إني عندي لياقة
وإني انسانة رياضية


محتاجة اتخيل إن عندي حصان في العزبة
و قطة صغنتوتة تتمحك فيا
و كلب العب معاه و يصاحبني
و ذئب قطبي اللي لونهم ابيض دول احضنة جامد لما احس إني محتاجة حضن دافي
و عصفورة من غير قفص تقف كل يوم الصبح على الشباك تزقزق و تصحيني
و سحلية اسميها إليزابيث من اللي بيتلونوا على حسب المكان اللى هما فيه
وصقر و غزالة و معزة صغنتوتة


محتاجة اتخيل إني مش بكرة الجواز و مش بكرة الرجالة و متجوزة ومخلفة بنوتة اسميها مارية
و إن اللى هتجوزه دة يكون حاسس إني أنا و هوه شخص واحد ميتحرجش انه يعتذر لو غلط حتى لو كان مبيعتذرش لأي حد و ميتضايقش لما ازعله و ميفتكرش إني لما بعمل كدة ابقى اتغيرت لإني انا اصلا متغيره بس الثابت الاكيد إني أنا بكمله و بنرسم احنا الاتنين شخص واحد مكون من انا و هوه
و اتخيل إني ممكن اعمله كل اللي يتمناه من غير ما يطلبه و إني ابقى مطيعة ليه
و اتخيل إني مشهبقى من السيدات اللي يكفرن العشير و إني مش لما يغلط فيا مرة انساله كل حاجة عملها عشاني


محتاجة اتخيل إني بتنفس هوا نضيف
و اشرب ماية نضيفة
و لما احتاج هدوء ألاقي هدوء


محتاجة اتخيل إني بعرف اعوم
وبعرف اركب حصان عربي و اجري بيه
و بعرف اجري سريع
و بعرف العب كونغفو و اعرف ادافع عن نفسي


محتاجةاتخيل إني بفهم في الكمبيوتر
و إني بعرف استخدم الفوتوشوب و الثري دي ماكس
و إني بفهم في الهاكنج عشان اعرف احمي نفسي


محتاجة اتخيل إني هقدر ارد للي يضربني قلم (مجاز ) الصاع صاعيين وبرغم دة اعفو و ماعملوش حاجة و اسامح
محتاجة اتخيل إني اعرف اسكت لما يبقى الموقف محتاج اني اسكت ومزعقش و متنرفزش
محتاجة اتخيل إني مبغضبش غير للدين و لله مش بغضب لنفسي
محتاجة اتخيل إني هادئة الطباع
محتاجة اتخيل إني ملاك على وشة ملامح البراءة


محتاجة اتخيل حاجات كتير قوي
قوي
قوي


أصل تعبت من حالة الاكتئاب اللي أنا فيها
فقولت اتخيل شوية
سلام
واحدة راسمة على وشها ابتسامة سلام

..................................
على جمب : الكلام بتاع البوست رايح يمين قوي على حد قول كيكي
مش عارفة ألاقي الحتة بتاعت الحركة دية في
ال html
بتاع التيمبلت
وكمان مش عارفة أكبر حجم الخط بتاع ال بوست نفسة اللي هوه نورمال في ال اتش تي ام ال
أعمل اية؟
...............................