نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

حبيبي كرهتك



حبيبي كرهتك... كرهتك كتير
كرهتك لأنك .. زي الحمير
بتمشي تنهق
كلامك يزهق
وحتى إن قلت كلمة.. حلوة في حقي
بتقلب أكنك.. جناب الوزير

حبيبي كرهتك و كرهت الغرور
غرورك جرحني و خلاني أثور
أثور عالمشاعر.. و قلبي اللي شاعر
و حتى كلامي ... ميفرقش عنك
حبيبي كرهتك ... كرهتك كتير
كرهتك كتير

كرهت الحقيقة... في إني بحبك
و كلام الناس .. دول زي بعض

الله عليهم .. عصافير كناريا
شوف السعادة .. يا عيني عالوعد

متقولش بحبك.. مبقتشي تأثر
خلاص مش هينفع .. تقولي أي رد

فراقنا لازم ... دة درس في حياتنا
أنا و إنت حاولنا ... وضيعنا كل عهد

الحب قطة...نربيها إحنا...ندللها إحنا
و يوم ما نهينها...هتخربش أي حد

مش إنت بس الغلطان.. أنا كمان غلطانة
سامحني و سيبني .. عشاني بحبك
لأ قصدي كرهتك
كرهتك كتير

كرهتك كتير

حبيبي كرهتك .. كرهتك كتير
كرهتك لأنك .. زي الحمير
بتمشي تنهق
كلامك يزهق
وحتى إن قلت كلمة .. حلوة في حقي
بتقلب أكنك ... جناب الوزير

كرهتك كتير

...............
البتاعة دية لاقيتها وانا بقلب في الكعبروتر بتاعي
المقطع الأول منها اللي هوه لحد كلامي ميفرقش عنك اتسجل في فبراير
و الجزء التاني منها لاقيته متسجل في مايو
كلو سنة 2008
بس
هناك اعتراض عندي بس على البتاعة اللي فوق دية .. لإني بحس الحمير دول مخلوقات طيبة و مطيعة
ولا يليق بيها الغرور و الخيانة

.............
حكوك التبع و النشل محفوسة لنعكوشة

اللي هيجي على بالي هكتبه

هههههههههههههه
انا قولت هنقي أي صورة و اللي تتطلع و خلاص

حاسة إني مشوشة
بس مبسوطة
مش مبسوطة قوي
بس يعني حاسة بسعادة
مع اني حاسة باضطراب
حاسة إني خلاص مش هقدر ألحق
وحاسة إني لو بدأت كلو هيتظبط
كل يوم بقول هبدأ انهاردة
end up in reading one of the books i've bought lately
هيا جت كدة
حاسة إني عايزة أصرخ

عايزة اقول
freeeeeeeeeeeeeeeeeeeeeeeeee dom
زي ما قالها ميل جيبسون في الفيلم

الدنيا برد قوي في اوضتي وانا مبسوطة جداً إنها رجعت برد
رجليا متلجين
و ايديا كمان

زوري بيحرق حرقة البرد :D

مظمظ ( مامتي ) بتقولي: هنروح الساحل آخر الاسبوع
معنديش اجازة يا عالم يوم السبت( دة أنا)

مانتي بتغيبي كل شوية من الكلية .. حبكت المرة دي .. اكنك صحيتي متأخر
لأ يا مظموظتي مش هينفع

يعني هتقعدي لوحدك
اللي جة في بالي ( مانا بقعد لوحدي عادي ) بس محبيتش اقول كلمة وحشة( تزعلها يعني)
لأول مرة أفكر قبل ما أقول حاجة لحد
قولتلها :هفكر يا حبيبتي ( انا مبقولش كلمة حبيبتي لمظمظ عادة فحسيتها حلوة و هيا طالعة مني)

قبل شوية انهاردة قعدت ابوس فيها و اقولها الكلمة اللي بحب اقولهالها كل ما أبوسها ( كميلة مامي) هي: أيوة اضحكي عليا.. أنا : أحلى مامي

يخربيت كدة
البرد دة عيشة تانية
أحب البرد و اموت في البرد يا سلام عالبرد

مضطربة
مقلقة
مشوشة
مبسوطة
مرتاحة
موسوسة

فتحت البتاع و بصيت بصة و مشيت .. مكنتش هخل بالاتفاق بس بحب كدة كل فترة أبص

سمعت البتاعة من كام يوم و كنت بقرأ أيامي الحلوة لعبد الرحمن الأبنودي .. قعدت أعيط
فكرت: هوه انا ليه معنديش زكريات زيه كدة؟؟
تخيلت : المخدة بتحكيلي و بصيتلها و قولتلها تفتكري لما أكبر المدونة دية هفتكرها كذكرياتي
مردتش عليا مش عارفة ليه
قولتلها: تصبحي على خير

الراجل دة تحفة ( ربنا يكرمه) >>> الأبنودي

كدة يا حراجي
فكرني بيها إبن الإيه و هوه بيتكلم عن الكرم اللي كان في بيتهم اللي في القرية
..............

ناوية على نية و ربنا ييسر و يوفقني فيها

أنا حاسة إنو مبقاش عندي إرادة

بس برضو ربنا ييسر و أعملها

ياااااااااااااااااااااااااااااااااااااااااا رب

...........

مكملتش كوباية الماية مع إني بحب الماية و بشرب منها كتير

تفتكري يا نعكشة في يوم هيبقى عندي واحدة أقولها إنتي صحبتي؟؟؟
مش عارفة
تفتكري لو عيشت من غير ما أقابل واحدة أقولها إنتي صحبتي .. هخسر كتير؟؟؟
تفتكري لو قابلت واحدة قولتلها إنتي صحبتي .. و دوقت معاها طعم الصحوبية .. و لظرف ما ( و ظروف الحياة كتيرة) سيبنا بعض .. تفتكري هزعل زي مانا زعلانة إني معنديش واحدة أقولها إنتي صحبتي
لأ
هبقى زي الفرق بين اللي بيعيط عشان مدخلش الجنة
و اللي بيعيط عشان دخل الجنة و طردوه منها

أكيد صحبتي مش الجنة يعني...
بس تصدقي ممكن تكون الجنة( وش بيفكر)

لو انا و هيا أعانا بعض عالطاعة
جيت اغير كلمة الطاعة بالخير بس قولت انا هكتب اللي يجي في بالي.. مليش دعوة

تفتكري هلاقي واحدة تعيني عالخير... تفتكري أصلاً إني هسمح لواحدة تقرب مني و تعيني عالخير؟؟
تفتكري أصلاً إني استحق واحدة تعيني عالخير؟؟؟

يابنتي طول ما الزفت دة قدامك، بايظة انتي خالص .. قومي!!

دية مظمظ

يلا هقوم سلام


قلبي لسه بيوجعني يا دكتور (2)


آه ياني يا شلبي
اثبتي يا دوك
مش شايفة حاجة يا شلبي
معلش يا دوك .. هما كل المشاهير ابتدوا كدة
عيني باظط يا شلبي
مش تبقى تركزي بعد كدة يا دوك .. لما تلاقي طوبة بتتحدف توطي بسرعة
ماشي يا شلبي .. هتبقى انت و الزمن عليا
يلا يا دوك عشان هنبدأ
عيني باينه يا شلبي
بنفسجي و زي العسل يا دوك
طيب يا شلبي... خد بيدي يابني وصلني لحد الكرسي
يلا يا دوك
اجهزي يا دوك
حاضر ياخويا
أكششششششششششششن

سلام عليكم

اعظائي المشاهدين .. عظيظاتي المشاهدات
سباح الخير لو كنتوا بليل و مصاء الخير لو قريتوا البوست الصبح

قبل ما تقروا موضوع حلقة النهاردة لازم تكونوا قريتوا الموضوع الاول قلبي بيوجعني يا دكتور .. مش رخامة لأ عشان الموضوع الاول مبسط و بيمهد للموضوع بتاع حلكة انهاردة لإن الحلكة انهاردة تقيلة شوية ....يلا روحوا اقروا الموضوع الاول قلبي بيوجعني يا دكتور 1
افعص اللينك اللي فوق عشان تروح هناك بسرعة
احم احم

نظراً للإقبال الرهيب على البوست اللي فات .. و ردود فعل المشاهدين العظام من جمهور المدونين فقررت ادارة العيادة المنعكشة
انها
تتنحي
ايوة منا لازم اتنحى في عز مجدي اومال
بهزهز .. ولا هتنحى ولا بطيخ أنا قاعدة على قلبكم

كنت وعدتكوا اني هجيبلكوا صور و حركات .. حكم انا بموت في الصور
و نظراً لإن كلمتي زي السيف فانا مجبتلكوش حاجة ههههههههه بمزح بمزح ( بمزح البلاط ) هع هع هع ( يا دوك إحنا عالهوا)
اة اقطعها دية يا شلبي



كنا اتكلمنا في الحلكة اللي فاتت عن الأمراض اللي بتصيب القلب و الحاجات دية
طيب إيه هوه ال بري كارديم اصلاً دية صورة بتوضح إيه هوه
زي مانتو شايفين هوه غشاء بيحوط القلب
ولما بيلتهب بيبقى اكيد بيوجع و بيعيق القلب عن الضخ
زي مانتو شايفين في الصورة
inflammed pericardium
يعني ملتهب

طيب كنا اتكلمنا برضو عن ال بيري كارديال افيوجن
و زي ماحنا شايفين على اليمين اللون الازرق دة هوه الماية اللي موجودة جوة الغشاء المحيط بالقلب
و زي ما قولنا برضو بتعيق القلب عن أداء و ظيفته
ألا و هي توصيل الدم إلى اجزاء الجسم

اتكلمنا كمان عن ال كونستركتف بيري كارديتس و قولنا إنها تليف في الغشاء دة و انها بتلزق فيها و في الحاجات اللي محوطاها و بتخنق عليها زي مانتو شايفين البتاع البرتقاني اللي محوط القلب دة في الرسمة اللي على لاشمال

كلمتكوا كمان عن الشرايين التاجية
و مقولتلكوش ليه اسمها تاجية .. تاجية او
coronary
يعني شبة التاج محوط القلب
و هما عبارة عن اتنين واحد يمين وواحد شمال
و الشمال بيتقسم اتنين واحد قدام وواحد بيدور لورا
و اسمهم
right coronary , left coronary which divides into anterior and circumflex
يعني هما بيتعاملوا معاملة 3 شرايين
طيب

ومكلمتكوش عن الصمامات و الكونجينيتال هارت ديزيز ..

موضوع الحلكة انهاردة هوه


الدورة الدموية و الدورة القلبية و أمراض الصمامات




حابة إني اكلمكوا عن ال
cardiac cycle & cardiovascular circulation
كارديك سايكل و كارديوفاسكولار سيركيوليشن .. كارديك = قلب ... سايكل = دورة .. كارديو = قلب .. فاسكولار = اوعية دموية .. سيركيوليشن = دورة
دورة القلب و دورة الدم في الجسم
طيب قبل كدة لازم اصلا تعرفوا منظر القلب عامل ازاي من جوة
القلب عبارة عن 4 اوض مجوفة بينقسموا لأوض يمين و إوض شمال
الغرف اللي فوق اسمها أذين أو
atrium إتريم
و الغرف اللي تحت اسمها بطين او
ventricle فنتركل
الأذين أو الإتريم وظيفتوا إنه يستقبل الدم سواء الدم اللي جاي من الرئة أو الدم اللي جاي من الجسم عشان يبعته للبطين او الفينتريكل عشان لما الفينريكل او البطين ينقبض يودي الدم اللي جاي من الجسم للرئة عشان يتأكسد و يودي الدم اللي جاي من الرئة لباقي الجسم عشان يتغذى

استني بس يا دوكتورة إيه اللي بيحصل؟؟؟

الاذين بيستقبل الدم ...... ينزل الدم منه للبطين ( وقت انبساط القلب) عشان البطين ينقبض فيخرج الدم للرئة و الجسم ( وقت انقباض القلب).

طيب
الأوعية الدموية اللي داخلة في الاذين تسمي ( أوردة) وارد يعني جاي
و الأوعية الدموية اللي خارجة من البطين تسمي ( شرايين)
الأذين الشمال ( اللي هوه يمين الصورة.. لإن إحنا باصيين على الجسم من قدام زي بالظبط لما تبص على حد من قدام إيدك اليمين بتواجه إيده الشمال))
جايلة 4 أوردة ( كنا قولنا إن الوريد يحتوي على الدم غير المؤكسد بس هنا الاوردة فيها دم مؤكسد اللي جاي من الرئة .. طيب قولنا عليها أوردة ليه لإنها داخلة في الاذين)
يبقى
الاذين الشمال.. جايلة 4 اوردة رئوية من الرئة فيها دم مؤكسد
ينزل الدم من الاذين للبطين ساعة الانبساط او الدايستول عشان
البطين الشمال لما ينقبض يدفع الدم لباقي اجزاء الجسم عن طريق الشريان الأورطي
خلاص

و الاذين اليمين جايلة 2 وريد اللي هما الأجوف العلوي و الأجوف السفلي
inferior vena cava & superior vena cave
إنفيريور فينا كيفا و سوبيريور فينا كيفا
إنفيريور يعني سفلي
و سوبيريور يعني علوي
و فينا يعني وريد
كيفا يعني أجوف
و الإنفيريور( السفلي) بيجيب دم من تحت يعني الرجلين و البطن
و السوبيريور ( العلوي) بيجيب دم من فوق يعني الايدين و الراس

طيب المهم

الاذين اليمين جايلة 2 وريد اللي هما الإنفيريور و السوبيريور فينا كيفا بيجيبوا دم غير مؤكسد من الجسم بينزل من الاذين للبطين ساعة الانبساط
و البطين الايمن يدفع الدم دة ساعة الانقباض
يودية في الشريان الرئوي
pulmonary artery بلموناري أرتري
و بلموناري يعني رئة
و أرتري يعني شريان

يودية للرئة عشان يحصله أكسدة
يعني الاذين الايمن ياخد الدم من ال الاجوف العلوي و السفلي يودية للبطين الايمين يطلعة على الشريان الرئوي
الشريان الرئوي هيودية للرئة

و طبعا الرئة هترجع الدم دة تاني للقلب عن طريق الاوردة الرئوية للاذين الشمال للبطين الشمال يدفعها للشريان الأورطي تلف في الجسم ترجع عن طريق الوريد الاجوف العلوي و السفلي للأذين اليمين ينزلها ساعة الانبساط للبطين اليمين اللي هيدفعها ساعة الانقباض في الشريان الرئوي للرئة
وتتكرر العملية

زي مااحنا شايفين في الرسمة المطولة على الشمال هنلاقي الدم بيخرج زي ما قولنا يروح لكذا منطقة في الجسم
حابه إني اكلمكم على كذا منطقة منهم
أول منطقة فوق اللي هيا المخ ( ملناش دعوة بيها دلوقتي )
و بعدين الرئة ( بيحصل فيها أكسدة للدم)
و بعدين الأمعاء و الكبد ( بيحصل فيهم إن الدم بيتملي بالجلوكوز و الدهون اللي كلها الانسان مع العلم إن الدم دة مش مؤكسد بس مليان بالخيرات الغذائية بيروح للقلب عن طريق الوريد الاجوف السفلي اللي هيوديه للرئة عشان يبقى الدم مؤكسد و كمان مليان خيرات عشان ينزل الدم من الرئة مليان اكسجين و جلوكوز يروح لباقي اجزاء الجسم لما ينزل للاذين الشمال منه للبطين الشمال عشان يضخة لكل الجسم
الكلي ( بيعدي عليها الدم عشان يتنقى من المخلفات بتاعت الخلايا )
و الرجلين

و دية رسمة متحركة توضح العك اللي قولته فوق
للأسف الرسمة فيها عيب خلقي ( ضيق في الصمام الرئوي) هنتغاضى عنه دلوقتي لإني نسيت انزل الرسمة التانية ولو نزلتها دلوقتي الموضوع هيبوظ ( كدة يا شلبي تفضحني علناً ) معلش يا دوك علينا المرة دي
المهم يعني

زي مانتوا شايفين ساعة انبساط القلب ( و هوه رفيع) بينزل الدم من فوق- الاذينين- لتحت
و لما بينقبض القلب بيمشي الدم من البطينين للشريان الأورطي و الشريان الرئوي
الاورطي هيودي الدم للجسم و الرئوي هيودي الدم للرئة

طيب
ملخص العك اللي فوق

إن ساعة انبساط القلب بينزل الدم اللي اتجمع في الأذينين.. الشمال ( دم مؤكسد من الرئة) و اليمين ( دم غير مؤكسد من الجسم) ينزلوا للبطينين
و ساعة الانقباض بتاعة القلب يندفع الدم اللي اتجمع فيه ساعه انبساطه... الشمال ( دم مؤكسد و مليء بالخيرات يروح للجسم كله ) و اليمين ( دم غير مؤكسد يروح للرئه)

طيب بعد ما فهمنا الدورة بتاعة الدم في الجسم

لازم نفهم فين الصمامات
و إيه حركة الصمامات

عشان لما صمام يبوظ نعرف إيه اللي هيحصل في القلب

الصمامات Valves
يعني إيه صمام أصلا
لو انتو في ميكانيكا و هندسة و الحركات دية هتعرفوا أكتر مني يعني إيه صمام
و لو إنتو زي حالاتي مش عارفين يعني إيه صمام اقولكوا وجهة نظري في الصمام

الصمام دة زي غطا الفتحة بتاعة الإزازة بتتفتح وتتقفل حسب اللي انا محتاجاة
وأهم حاجة
إنها لما تتقفل ميخرجش منها ولا نقطة مية او دم
ولما تتفتح تبقى واسعة عشان متعيقش الدم و ميتكعبلش وهوه ماشي من خلالها

طيب
يعني عرفنا إن الصمام دة هوه الغطا بتاع فوهة الازازة

طيب عندنا كام صمام؟؟؟

عندنا 4 صمامات

صمامات بين الاذين و البطين
و صمامات بين البطين و الشرايين اللي خارجة منه

كل صمام ليه شكل معين ربنا خلقه بيه عشان يتوائم مع وظيفته ( سبحان الله) و دة مش مجالنا في الشرح بس انا بفتح مجال للي حابب يبحث
المهم يعني
قولنا إن عندنا أربع صمامات

الصمام الميرترالي
ميترال فالف mitral valve
و دة موجود بين الأذين الشمال و البطين الشمال .. يعني موجود فين في الصورة؟؟ّّّ ( صح موجود في يمين الصورة )

الصمام ثلاثي الابواب
تراي كاسبت فالف tricuspid valve
ودة موجود بين الأذين اليمين و البطين اليمين

الصمام الأورطي
Aortic Valve أورطك فالف
ودة موجود بين البطين الشمال والشريان الأورطى

الصمام الرئوي
Pulmonary Valve بالموناري فالف
و دة موجود بين البطين اليمين و الشريان الرئوي

طيب
لازم نعرف ان الصمام متكون من إيه؟

متكون من اربع حاجات

دايرة اللي هياالاطار اللي محوط فتحة الازازة واسمها
ring حلقة
و باب بيقفل و يفتح اللي هوه الحتة اللي مغطية الفتحة و اسمها
cusp كاسب
و الفتحة بين الأبواب
commissure كومّيشر
و الاستك اللي بيربط الابواب بالأزازة عشان متقعش لما تفتح و تقفل و اسمها
chorda tendinae & papillary muscle
كوردا تنديني و بابيلاري ماصل و المصل يعني عضلة و الكوردا تنديني هيا الألياف اللي بتبقى في نهاية العضلة ( مش مجال شرح دلوقتي ) عامة هيا الاستك اللي بيربط عضلة القلب بفتحات الصمام

بعد ما عرفنا إن الصمام فيه حلقة و باب و فتحة و استك (عضلة) او
ring , cusp , commissure and papillary muscle
رنج ... كاسب ... كومّيشر و بابلري ماسل


سيبكوا من العك اللي فوق دة

بصوا كدة على الشمال ( الصورة للأسف برضو فيها عيب خلقي بس ملكوش دعوة بيه)

الصورة لقطاع طولي في القلب
بصو هتلاقوا بتاعة بيضا زي الغشاء كدة هوه دة الصمام
و الخيوط اللي نازلة منه هيا ال عضلات اللي قولتلكوا عليها
دول الصمام المترالي ( يمين الصورة ) اللي هوه بين الاذين الشمال و البطين الشمال و الصمام ثلاثي الابواب ( شمال الصورة ) بين الاذين اليمين و البطين اليمين.






طيب لو قطعنا القلب زي البرتقانة بتاعة العصير قطاع عرضي هنشوف منظر الصمام كدهو
واضح قدامنا الاربع صمامات فوق خالص البالموناري ( الرئوي ) و الأورطي
اللي هما الدايرة البنفسجي ( بالمونري) و الدايرة الحمرا( الاورطي)

و تحت هنلاقي أبو تلات أبواب ( تراي كاسبد ) و ابو بابين ( الميترالي)
اللي هما الدايرتين اللي جمب بعض البيض دول
و هنلاقي المترالي يمن الصورة و التراي كاسبد شمال الصورة


طيب


إيه بقة الامراض اللي بتصييب الصمامات؟؟؟؟؟؟

لااااااااااا
قبل ما تعرفوا إيه هيا لاامراض دية لازم اشلكوا قصدي لازم افهمكوا الصمامات بتفتح امتي و بتقفل امتى
ماهو كل حاجة محسوبة في القلب و في كل الجسم و في الكون ( سبحان الله)

طيب
قولنا إن الصمام الاورطي و الصمام الرئوي ( بالمونري) بيعدي الدم من البطين فيهم عشان يروح الجسم أو الرئة بالترتيب.... إمتى؟؟؟
ساعة انقباض القلب
يعني مفروض يبقوا مفتوحين إمتى؟؟؟
ساعة إنقباض القلب
زي ما هوه واضح في الرسمة المتحركة لما القلب بينقبض بيتفتح الصمام الاورطي و الرئوي اللي هما على فتحة الشريان الاورطي و الرئوي في نص الرسمة بتاعة القلب

طيب
قولنا كمان إن الصمام الميترالي ( بتاع الاذين الشمال) و الصمام ثلاثي الابواب ( التراي كاسبد) ( بتاع الاذين الايمين) بينزل منهم الدم من الاذين للبطين.... إمتى؟؟؟
ساعة انبساط القلب أو الدايستول
يعني مفتوحين امتى؟؟؟
ساعة انبساط القلب
زي ما هوه واضح في الرسمة المتحركة على الشمال لما القلب بينقبض الخطين الحُمر اللي بيمثلوا الصمام الميترالي و ثلاثي الابواب بيتقفلوا ساعة انقباض القلب ( لما بيبقي الجدار بتاعة سميك) و لصمام الميترالي و ثلاثي الابواب هما اللي على الطرف في الرسمة

طيب إيه هيا بقة الامراض اللي بتصيب الصمامات:

الأمراض دية يا إما عضوية أو وظيفية
Organic or functional
أورجانك أو فانكشنل

هتكلم أنا عن العضوية و اللي عايز يبحث أكتر ممكن يدور عن الوظيفيه

طيب يا ستي كلمينا عن العضوية

تخيلوا معايا إن الصمام دة زي باب قاعة مؤتمر أبو ضرفتين

لو الضرفتين إتفتحوا تماما - في الوقت المظبوط- الناس هتعدي منه و هيا مستريحة و بنظام لإن دة معاد الخروج
طيب لو فتحنا ضرفة واحدة بس؟؟
الناس هتتزحم على الباب و هتزق في بعض

طيب لو اتفتح الباب في غير معاد فتح القاعة يعني فضل مفتوح عمال على بطال؟؟
الناس هتدخل و تخرج وقت ما هيا عايزة و الراجل اللي بيشرح في القاعة مش هيعرف يقوم بوظيفته
و احتمال كمان ناس كتير تدخل القاعة اكتر من مساحتها و دة يبقى عبء على القاعة

يعني إيه يا حجة؟؟
اقصد يا دوكتورة

يعني مثلا و لنفرض الصمام الاورطي مثلا

الطبيعي بتاعة إنه يفتح ساعة انقباض البطين الشمال عشان يضخ فيه الدم
و يقفل باحكام ساعة انبساط القلب عشان الدم ميرجعش منه و يكمل طريقة تمام.
طيب لو الصمام دة كان زي ما قولنا فوق باب منه مقفول يعني يبقى ضيق إيه اللي يحصل... يحصل ضيق الصمام زي الرسمة اللي على اليمين أو
stenosis ستينوزس
طيب إيه اللي يحصل يعني لما يحصل ستينوزس دة؟؟؟

تخيل معايا كدة
القلب بينقبض جامد بعزم ما فيه عشان يضخ الدم لكل الجسم و لما انقبض جامد لقى الصمام الاورطي مقفول ؟!!!
يلهوي ... تخيل إنك جيت بتشوط الكورة مثلا بعزم ما فيك قمت لاقيت الكورة حديد او قلبت حيطة؟؟!!!
صدمة طبعا بالنسبة للقلب
و طبعاً القلب في الاول مش هيستسلم و هيفضل يقوي في عضلته و يتضخم عشان يقاوم الضيق دة و يخرج الدم منه
بس بعد فترة مش هيقدر
و هيحصل فشل في القلب
heart failure هارت فالير و فاليور يعني فشل

طيب
لو الصمام دة مفتوح عمال على بطال؟؟؟
incompetence or regurgitation
انكومبيتنس او ريجرجيتيشن ( الجيم التانية متعطشة)

يعني مثلا مفتوح ساعة انبساط القلب؟؟؟
ساعة انبساط القلب قولنا إن الدم فيها بينزل من الاذين للبطين عشان البطين يستعد إنه يضخ الدم دة للجسم
طيب الصمام الاورطي كمان مفتوح
الدم هيجي من الاذين الشمال و ينزل البطين ولكنن
الاورطي كمان هيرجع منه دم للقلب ساعة الانبساط
زي بالظبط القاعة اللي الباب فيها مفتوح عمال على بطال الناس هتدخل فيها من غير حساب ولا تحكم.
او إنك مثلا مليت بلونة الماية بمية زيادة
القلب في الاول هيحاول يوسع نفسه عشان يقدر يستوعب الكم دة
بس من كتر ما بيوسع نفسة بيوصل لدرجة إنه خلاص مش قادر يوسع تاني
و يحصل
فشل في القلب
او فشل في وظيفة القلب
heart failure هارت فاليور

دة اللي هيحصل في القلب
طيب اللي هيحصل في الجسم إيه؟؟؟؟؟؟؟؟؟؟

دة اللي هتعرفة في الحلكات القادمة

اتمنى تكونوا استفادتوا
و نلتكي في الحلكات القادمة باذن الله مع توضيح اثر ضيق و وسع الصمامت
و الكونجينيتال هارت ديزيز

اعتقد والله أعلم إني هعمل الحلكات دية بعد فترة طويلة يمكن شهور لإن الحلكات بتاخد وقت طويل جداً عقبال ما بتتعمل
و الوضع غير مستقر
دعواتكم

متنسوش تصوتوا إذا كانت البتاعة مفيدة ولا مفهمتوش منها حاجة في مكان التصويت الصحيح
مش تبع الموضوع الاول ( قلبي بيوجعني يا دكتور 1)
ولكن تبع الموضوع التاني ( قلبي لسة بيوجعني يا دكتور 2)


كانت معكم
دكتورة نعكوشة
من وراء الكورسي
في العيادة المنعكشة

......................
الالفاظ اللاتينية
inflammed pericardium: يعني الغشاء المحيط بالقلب ملتهب
coronary artery : الشريان التاجي
cardiac cycle: دورة القلب
cardiovascular circulation : دورة الدم في الجسم
inferior vena cava : الوريد الاجوف السفلي
superior vena cava: الوريد الاجوف العلوي
pulmonary artery : الوريد الرئوي
valve :صمام
cusp : بوابة الصمام
commissure : الفتحة بين بوابات الصمام
ring :الحلقة المحيطة بالصمام
papillary muscle : العضلة المتصلة بالصمام و تربطه بالقلب
mitral valve : الصمام الميترالي .. بين الاذين لاشمال و البطين الشمال
tricuspid valve : الصمام ثلاثي الابواب بين الاذين اليمين و البطين اليمين
pulmonary valve : الصمام الرئوي .. بين البطين اليمين و الشريان الرئوي
aortic valve : الصمام الاورطي .. بين البطين لاشمال و الشريان لااورطي
stenosis : ضيق
incompetence : بينفد منه
regurgitation : ارتجاع

.......................
لو فيه معلومات غير صحيحة دة عيب مني اكيد لإني لسة طالبة و مش دكتورة و الكمال لله وحده


كتب الحلكة نعكشة
حكوك الطبع وا لنشل محفوسة لنعكوشة


قبل ما تقروا موضوع حلقة انهاردة لازم تكونوا قريتوا الموضوع الأول قلبي بيوجعني يا دكتور 1 عشان فيه كلام مبسط و الموضوع التاني كلامه صعب شوية
و قد اعذر من انذر
روحوا اقروا الموضوع الاول يلا

قلبي بيوجعني يا دكتور(1)


احم احم
هندخل على الهوا يا دوك جهزي نفسك
طالعة حلوة يا شلبي
زي القمر يا دوك
و السماعة ، مطلعها يا شلبي
واضحة يا دوك
النظارة مظبوطة على عنيا
تمام يا دوك
يلا
اكشششششششششششششششن

سلامو عليكم
مصاء الخير
اعظائي المشاهدين
هنبدأ اليوم أولى حلقات برنامجكم المدهش ( عيادتنا المنعكشة للدكتورة نعكشة)
و تتناول حلكات برنامجنا شوية معلومات تبية احم اقصد طبية على الماشي

و هنتناول الموضوع بطريقة معرفش عاملة ازاي بس انا هحاول اشرح على قد ما أقدر

هتكلم انهاردة عن


القلب

زي ما احنا عارفين القلب دة اهم عضو في الجسم بعد المخ
ليه بقة

عشان وظيفة القلب هي : الضخ .. أي ضخ الدم
بحيث يمشي جوة الجسم فيروح الدم اللي فيه اكسوجين و جلوكوز لخلايا الجسم و ياخد الدم اللي مليان ثاني اكسيد الكربون و المواد المتخلفة من أيض خلايا الجسم
يوديها الرئة : اللي بتقم بعمليه أكسدة الدم أي تخلي الدم فيه اكسجين و الكبد و الكلى بيعملوا عمليه تنظيف للدم
و الاكسجين هنا هو مصدر التنفس للخلايا و الجلوكوز هو مصدر غذاءها و الاتنين مع بعض مصدر طاقتها

لما القلب بينقبض قبضة مقدارها 120 مليمتر زئبق : بيتملي الشريان الأورطي بالدم و نتيجة اندفاع الدم الجامد بالضغط دة في الشريان الاورطي بيسري في الشريان دة و اللي بعديه من الشرايين اهتزازة بتنتقل من جدرانه للشرايين التانية
ومع انقباضات القلب المتكررة تسري الاهتزازات دية في الشرايين اللي بتخلينا نحس النبض في ايدينا و رجلينا و المناطق اللي بيبقى فيها الشريان محسوس

المهم يعني
لما بينقبض القلب : بيتملي الشريان الاورطي و تبعاً ليه باقي الشرايين و بيفضى القلب من الدم
ولما بينبسط القلب ( يعني لما بيبقى مريح ) : بيتملي القلب بالدم اللي جاي من الأوردة ( الدم الغير مؤكسد)

طيب
وبعدين ...
و بعدين دلوقتي كل الجسم معتمد على القلب في وصول الاكسجين ليه لإن الاكسجين دة بتعتمد عليه الخلايا في الحصول على طاقتها عشان تفضل تشتغل

جميل

عرفنا كدة وظيفة القلب

القلب دة طالع منه شريان كبير قوي اسمو الشريان الأورطي دة اكبر شريان موجود في الجسم .. و الاورطى دة هوه اللي بيطلع منه الشرايين التاجية ( اللي بتغذي القلب بالدم ) و باقي الشرايين اللي بتغذي باقي الجسم

و من هنا لازم نعرف إن فيه فرق بين الشريان و الوريد

الشريان artery أرتري:
عبارة عن وعاء دموي الجدار بتاعه سميك ... يحتوي على الدم المؤكسد .. كما أنه ينبض.. الشريان دة بيكون elastic أي على درجة عالية من المرونة
الوريد vein فين :
فهو وعاء دموي جداره رقيق شوية ... يحتوي على دم غير مؤكسد ... لا ينبض .. و دة هوه اللي بنشوفه منم تحت جلدنا

دة لإن الأوردة بتبقى سطحية و الشرايين بتبقى جوة شوية

.........................
pericardiumال بري كارديم:
غشاء بيحوط القلب عشان يحميه و يسهل حركته .. بري يعني محيط و كارديم يعني قلب أى الغشاء المحيط بالقلب

.........................

يتبادر إلى ذهني سؤال :

يعني ايه يا دكتورة مريض بالقلب ؟؟؟؟؟؟؟

فيه كذا نوع من الامراض اللي بتصيب القلب

و دة على حسب إيه بالظبط اللي اتأثر فيه

يعني مثلاًمن برة لجوة اللي ممكن يتأثر في القلب هوه:
1-الغشاء المحيط بيه
2-عضلة القلب نفسها
3-الصمامات اللي بين غرف القلب ( هنتكلم عليها بعدين)
4-العيوب الخلقية في القلب
................

الغشاء المحيط بالقلب :
1-pericarditis بيري كارديتس
دة التهاب الغشاء المحيط بالقلب
2- pericardial effusion بيريكارديال ايفيوجن
وجود سائل ( زيادة عن الطبيعي) بالغشاء المحيط بالقلب
3- hemopericardium هيمو بيري كارديم
وجود دم داخل الغشاء المحيط بالقلب ... هيمو = دم .. بري= محيط ... كارديم = القلب
4- constrictive pericarditis كونستركتف بري كارديتس
تليف الغشاء المحيط بالقلب .. يعني يتحول لألياف تحوط القلب و الاعضاء اللي جمبو .. كونستركتف يعني حاجة خانقة القلب

كل من ال إفيوجن و ال هيمو بيريكارديم و ال كونستركتف بيري كارديتس ( امراض الغشاء المحيط بالقلب) يسببوا إعاقة لحركة القلب
يعني هيعطلوا وظيفته
اللي هيا زي ما قولنا ضخ الدم لأجزاء الجسم

وهنا الخلايا بتاعة الانسان مش هتحصل على الغذاء الكافي ليها
يعني يحصل ان الدم اللي خارج من القلب يقل .. يعني يقل الدم الخارج من القلب اللي المفروض يوصل للخلايا عشان يغزيهاو هذا ما يسمي بال
Low cardiac output
و بالتالي الانسان يحس بدوخة مع المجهود
او مثلا عضلات رجله تقفش عليه
او مثلا زغلله
أو أي حاجة ناتجة عن نقص الدم لخلايا الجسم

.............................................

تاني حاجة ممكن تتأثر هي

عضلات القلب نفسها:
ودة عن طريق نقص الدم اللي رايحلها من الشرايين التاجية
و قولنا الشرايين التاجية دية بتطلع من الاورطى

الجديد بقة إننا فوق قلنا إن الشرايين كلها بتتملي بالدم ساعة ال ( سيستول) اللي هيا لحظة انقباض القلب ... systole
إلا الشرايين التاجية دية
الشرايين التاجية بتتملي بالدم لما القلب يكون في حالة ال ( الدياستول ) اللي هيا ساعة انبساط القلب أو لما بيبقى مريح
و بالتالي لو فيه حاجة أثرت على القلب و مخليتهوش يريح كويس هتأدي إن الشرايين التاجية متتمليش كويس بالدم و بالتالي القلب مش هيتغذى كويس و بالتالي يعني مثلا حاكة كابسة على نفسة زي الامراض بتاعة الغشاء المحيط بالقلب. Diastole

كمان لما الكوليستيرول يبقى عالى عند الناس دة بيؤدي لتصلب الشرايين و يؤدي إلى الجلطات في الشرايين التاجية مما يؤدي برضو إن الدم ميوصلش كويس لعضلة القلب فمتتغذاش كويس برضو

استني هنا بس يا دكتورة

يعني إيه الكوليستيرول عالي : الكوليستيرول دة نوع من انواع الدهون اللي بتبقى موجودة في الجسم نتيجة أكل الدهون عادتاً او نتيجة حاجة وراثية
لما بيزيد الكوليستيرول دة بيحصل إنه بطريقة ما بيدخل جوة جدار الشريان ... يا سلام .. ايوة بيدخل في جدار الشريان و يعمل حاجة اسمها تصلب الشرايين

زي ما قولنا قبل كدة إن الشريان بيكون مرن فلما بيدخل الكولستيرول أو الدهون في الجدار بيفقد مرونتة و بيحصل ما يسمى بتصلب الشرايين و تبقى عاملة زي الانبوبة الناشفة
loss of elasticity فقدان المرونة
طيب و بعدين لما يحصل تصلب شرايين دة يحصل إيه
يحصل إن الدم يتجلط في الشريان

يعني إيه الدم يتجلط في الشريان ..

يعني الدم يلزق في بعضة عن طريق ال صفائح الدموية ( لو قدرت اكلمكوا عليها بعدين) و يعمل جلطة أو حتة بتاعة كدة
بتعمل إية الجلطة دية
الجلطة دية بتسد الشريان
و لما تسد الشريان ميمشيش فيه الدم
و بالتالي الدم ميوصلش للمكان اللي المفروض يروحله
المكان دة يحصلة ايه؟؟؟ :
hypoxia و ischemia
هيبوكسيا و ايسكيما : نقص الغذاء و الاكسوجين الواصل للخلايا
ينقص الاوكسجين الواصل للخلايا دية
و لو طالت المدة اللي اتعرض فيها المكان ؟
يحصله necrosis نكروزس
اي موت الخلية
ولو حصلت الحركة دية في عضلة القلب تسمي
infarction انفاركشن
اي موت جزء من عضلة القلب

طيب ايه كمان
ال Spasm سبازم
وديه حاجة ممكن تحصل للشرايين التاجية و هي انقباضها .في مرض يسمي بال
prinzmetal angina برنزميتال أنجينا
يعني اية يا دكتورة؟؟
يعني الشريان نتيجة ظروف معينه بينقبض من نفسه( مش بينقبض و ينبسط زي ما بيحصل في النبضات .. لأ بينقبض و يفض منقبض) فبالتالي الشريان بيبقى ضيق و الدم اللي بيروح لعضلة القلب برضو يقل
و يحصل الكلام اللي قلناه قبل كدة

قشطة كدة

طيب نجمع اللت و العجن اللي فوق دة في ان

الشرايين التاجية هيا اللي بتغذي عضلة القلب اللي بتنقبض فيقوم القلب بوظيفته
لو حدث أي شيء للشرايين التاجية 1- معرفتش تملى كويس لإن القلب مريحش كويس
2- حصل فيها جلطة سدتها
3- انقبضت فضاق الشريان

بيحصل إن الدم الواصل لعضلة القلب بيقل
و زي اي خليه في الجسم
لما الدم بيقل منها بيحصلها اسكيميا اي نقص في الاكسوجين و لو المدة طالت و معرفناش نعمل حاجة ترجع الدم يوصل للخلايا اللي مش واصلها الدم في الوقت المناسب هيحصل نكروزس اي موت هذة الخلايا اوانفاركشن و هو موت جزء من العضو

طيب يعني يا دكتورة لو حصل الكلام دة الواحد يموت بقة لإن العضلة كلها هتموت؟؟
لأ طبعاً
لإن مش الشريان التاجي الكبير نفسه هوه اللي بيتسد او مبيملاش ( هبقئى إن شاء الله اكلمكوا عن الشرايين التاجية بعدين )
بيبقى الشرايين اللي طالعة منه
و طبعاً مبتبقاش كلها
و بالتالي
بيبقى فيه حتة بس صغيرة ميته في عضلة القلب
أكيد الحتة دية بتأثر على وظيفة القلب
و لو اتعرض الانسان لجلطة تانية ادت لموت منطقة تانية بيبقى حياتة بعدها على المحك

هبقى اشرح موضوع الشرايين لاتاجية ديه بعدين
بس خلينا نكمل باقي الامراض اللي بتصيب القلب

ثالت حاجة ممكن تتصاب هيا الصمامات
و رابع حاجة هيا الامراض الوراثية او القلب المولود بعيب خلقي

و دة اللي هتناوله في الحلقات اللي بعد كدة
لإني طولت قوي في الكلام
و المشاهد من كثره نام

و اختصاراً للحلقة
نعرف

1- وظيفة القلب هيا ضخ الدم المؤكسد لكل خلايا الجسم وقت الانقباض
و استقبال الدم غير المؤكسد من خلايا الجسم و قت ال الانبساط عشان يودية للرئة في وقت الانقباض

2- الشرايين هيا اوعية دمويه مرنة جداً نابضة تحتوي على الدم المؤكسد
الأوردة هيا اوعية دموية تحتوي على الدم غير المؤكسد ( عشان تودية للقلب اللي هيودية للرئة عشان يأكسدة)

3- الامراض التي قد تصيب القلب هيا امراض
أ - تصيب الغشاء المحيط بالقلب pericardium
ب - تصيب عضلة القلب myocardium ميو يعني عضلة و كارديم يعني قلب
ج- امراض تصيب الصمامات vavles
د- congenital heart disease كونجينيتال هارت ديزيز ..
كونجينيتال يعني ( من وهوه لسة مولود ) هارت ( قلب ) ديزيز ( مرض)

و بكدة حلقتنا الأولى من برنامج عيادتنا المنعكشة خلصت
عارفة انها كانت حلقة تقيلة
ادعولي اني اعمل الحلقات اللي بعد كدة لو حسيتوا انكو استفادتوا

Don't forget to Vote
متنسوش تصوتوا في البتاع اللي جمب الموضوع
هل كان كويس
او أي كلام

و ادعولي برضو لو مستفادتوش لإن نيتي إنكوا تستفيدوا

بعتذر إني انهاردة مجبتش صور توضح اللي بقوله
بس باذن الله في الحلقات القادمة هنعمل الحركة دية
عشان الرؤية تبقى واضحة

و على موعد آخر إن شاء الله في يوم من الايام لو عشت و كان ليا عمر

و السلام عليكم و رحمة الله

......................................
المصطلحات اللاتينيه
Aorta : الشريان الاورطي و هو اكبر شريان في جسم الانسان
Artert : شريان
vein : وريد
elastic : مرن
pericardium : الغشاء المحيط بالقلب و هو غشاء مكون من طبقتين بينهما نسبة ضئيلة جداً من السوائل تسمح للقلب بالانقباض في سهولة و يسر و تعمل على حمايته .. محلوظة : يمكن أن يعيش الانسان بدون هذا الغشاء.
pericarditis : التهاب الغشاء المحيط بالقلب
pericardial effiusion : وجود سوائل بين طبقتي هذا الغشاء مما يعيق حركة القلب
hemo pericardium : وجود دم بين طبقتي هذا الغشاء
constrective pericarditis : تحول هذا الغشاء لألياف تلتصق بالقلب و الاعضاء المحيطة به فتعيق حركته
low cardiac output : هوه أن يكون الدم الخارج من القلب قليل .. أقل من احتياج الجسم فيعاني الانسان من الاحساس بالتعب من اقل مجهود .
systole : لحظة انقباض القلب
diastole : لحظة انبساط القلب ( لما يريح)
ischema : نقص الغذاء للخلية
hypoxia : نقص الاكسوجين الواصل للخلية
necrosis : موت الخلايا
infarction : موت جزء ما من عضو ما و ليكن القلب
spasm : انقباض
prinzmetal angina : نوع من انواع الزبحات الصدرية .. هنناقشها بعيدن لو عشت و كان ليا عمر
valve : صمام
congenital heart disease : مرض وراثي بالقلب
................
محلوظة عميقة
نعكشة دية ولا دكتورة ولا يحزنون .. ديه حتة عيلة في الكلية لسة .. و انا بخلي مسؤليتي من اللي بتقولوا ..

كتب الحلكة : نعكشة

حكوك التبع و النشل محفوسة لنعكوشة

لما بغمض عيني


أتوق إلى غدٍ مختلف

رسمة و شوية تهييس


سلام عليكم رحمة الله

طيب بدءً من هذه الرسمة العظيمة ( دوسوا على الصورة علشان تكبر و تتضح معالمها) و التي تعد طفرة و تحول ملحوظ في الحياة الفنية هنفتتح جلستنا
دة مش فشخرة ولا تكبر ولا بطيخ
بس فعلاً تعتبر الرسمة اللي فوق دية في حياتي بعد الرسمة اللي فيها وشوش حصنة و الرسومات النفساوية بتاعتي
تحول في حياتي
ليه
لإني في الرسمة اللي فوق دية جمعت بين تلات اساليب في رسمي
و ضيفت عليهم اسلوب جديد اول مرة ارسم بيه
انا بتكلم اساليب في رسمي انا وليس مدارس ولا مذاهب فنيه ولا بطيخ لإني أصلا مبفهمش في الفن
انا بتذوقه فقط
المهم
لو مشينا بالترتيب الزمني لرسم الصورة هنبدأ باليمين
لو بصيتو علي يمين الرسمة زي ماهو واضح قدامكوا كرسي وراة ترابيزة عليها فازة وراها شباك كبير او بلكونة مفتوحة
الجديد في الموضوع إني أول مرة أرسم جماد او جزء من الواقع الجامد في حياتي إلا إني اكتشفت أنا ليه رسمت التجميعة اللي فوق دية مع بعض بعد ما خلصت الرسمة ... الفازة اللي في الرسمة بالمناسبة فازة خشب بتلمع

تاني حاجة رسمتها في الصورة المدهولة اللي فوق دية هيا الجزء اللي فيه الشبشب
الشبشب دة بالمناسبة برضو لونو لبني ... رسمت ليه الشبشب دة برغم ان كان فيه حاجات كتير في اوضتي ... مش عارفة.. بس أنا بحب الشبشب دة
يمكن عشان شبشب بصباع بيفكرني بالاغنية العظيمة للفنان العبقري ( يابتاع الشباشب عايز شبشب بصباع أو شبشب بفيونكة بدل حبيبي اللي ضاع) او يمكن عشان لونوا لبني وانا بحس اللون دة بيعبر عن الريلاكسيشن .. و يمكن عشان شبشب عالي وانا بما إني أوزعة بحب أحس إني طويلة... المهم يعني
لو بصيتوا كدة جمب الشبشب هتلاقوا حاجات غريبة قوي أنا عن نفسي مش عارفة بتعبر عن إيه بس هقولكوا ملابسات رسمها

تحت كدة هتلاقو بتاعة ملهاش ملامح و ليها سن مدبب شبة القلم بالفعل أنا كنت بحاول ارسم ظل ايدي و هيا ماسكة القلم بس قررت إني أخليه شيء آخر لا أعلم ما كنهة... جمبيه من اليمين حاجة كدة عندها عيب أنا تخيلت انه عصفور غريب ... و جمبيه على الشمال شيء ملزوق فيه كدة
بيفكرني بالصوابع اللي بتتعمل أكنها واحدة ماشية لما تضم صوابعك كدة على إيدك و تسيب السبابة و الوسطى و تتمشي بيهم تحس إنها بنت ماشية بتتأصع مش قاصدي مايصة لأ .. بتتسكع .. مش عارفة اجيب اللفظ .. بس لما تبقى ماشية كدة بروقان و نازلة منزل... متعرفش ازاي روقان و نازلة منزل المهم يعني دة احساسي .. من حق كل شخص يحس باللي حاسس بيه اللوحة عامة ههههههههههههه
والله العظيم مسخرة
يلا المهم
لو بصينا فوق بقة هتلاقوا شيء مؤرف كدة أحب اقولكوا إنها إيد شبه الايد بتاعت الناس الاشرار لما تبقى الايد متشنجة كدة ... معرفش اية البتاعة المشرشرة اللي جمبها دية بس أكيد بتعبر عن حاجة

تالت حاجة رسمتها كانت الجزء اللي تحت في الصورة
و هوه نظرة من على سريري إلى السرير المقابل ... تحت خالص هتلاقوا سرير بمخدة و عليه علامة كهربا
نفسي اعرف ليه سرير عليه علامة كهربا
هيكهربوا بيه العيال ولا اية متعرفش
عامتاً
المهم يعني فوق هتلاقي صورة لشيء يشبة الوردة و دية هدية من عمي يوم ما نجحت في الوثنية العامية ...... يااااااااااااااه من زمان الكلام دة .. والله لسة فاكرة اليوم ... و ايامي لما كنت في ثانوي
مش مصدقة إنه عدى خمس سنين
يلا بلا نيشة
المهم هتلاقوا جمبيها ورقة ملزوقة باللزق بالمناسبة الورقة دية اصفرت و اللزق لونه احمر و مكتوب على الورقة دعاء الاستغفار ... زمان وانا صغيرة مش فاكرة من قد إيه بس يعني تلات اربع سنين كدة مكنتش حافظة الدعاء دة قمت قررت اني الزقه على الحيطة و من ساعتها مشلتهوش متعرفش ليه... و المصيبة إني قبل ما أحفظوا كنت بقولوا قبل ما أنام على طول و من ساعة ما حفظته مبقتش أقولوا قبل ما أنام ... عته والله
يلا
المهم
الساعة دية ساعة بتاعت السيد الوالد من المكتب بتاعة ... قعد يقولي ساعة سايكو و مش سايكو .. قولتلوا يعني جايبلي ساعة رولكس ياخي .. المهم يعني .. إنها دايماً بتفكرني إني بقوم من النوم متأخر و شكلى هنتقم منها... المهم

آخر جزء رسمتوا في الرسمة دية
كان كوباية الشاي و براد الشاي
و الشجرة
و البنت اللي ساندة عليها

الرسمة دية كلها بتعبر عن إيه :
بتعبر عن الساعات اللي ببقى فيها مستكينه
مبسوطة
بتنفس بعمق
و بتعبر برضو عن الساعات اللي ببقى فيها قاعدة لوحدي
و بائسة
و محتاجة حنان بس لما حنان بتيجي بتطردها برة
المهم يعني

الكرسي اللي في الصالة دة
ياما بليل قلبت وجهته بحيث تقابل البلكونة و قعدت فيه على ضوء الشارع اتفرج على العربيات و الناس
و القمر و السما اللي مفيهاش نجوم

الشبشب دة بحبو معرفش ليه

الأوضة بتاعتي هيا الكهف بتاعي الصغنن اللي بنط فيه لما بكتئب عشان مكئبش اللي حواليا معايا

و الشجرة و كوباية الشاي بيعبروا عن العك اللي فوق

....................................

دة بالنسبة للرسمة

بالنوسبة بقة للتهييس
فانا عندي كلمتين كدة أحب اقولهم لنفسي و ليكوا و للمدونة

سؤال قريتوا من فترة في إحدى المدونات
و حاولت أجاوب عليه و معرفتش

بتمثل ليك إيه نسبة 10%
مش عارفة والله
حاولت اشوف الحياة بتاعتي بالنسب معرفتش
حاولت أحولها لحسابات مقدرتش

بس أنا ممكن أقول تمثل ليك إيه النسبة الصغيرة او ال minority
بتمثل ليا تقريبا معظم الحاجات الكويسة اللي بعملها
بتمثل ليا طاعتي لأمي مقارنة بعصياني
بتمثل ليا امتثالي لأوامر ربنا
بتمثل ليا الجزء اللي بعمله من السُنّة
بتمثل ليا الجزء اللي بظهره للناس
بتمثل ليا الجهد المبذول في العمل
بتمثل ليا لحظات الانتشاء بتاعتي ( و دية اللحظات اللي بحس فيها اني عاليه)
بتمثل ليا الطمئنينة
بتمثل ليا حاجات كتير قوي معملتهاش مقارنة باللي اقدر اعمله

المهم يعني أكتشفت إني فعلاً محتاجة أتغير

..............

في مدونة أخرى من المدونات قريت حد كاتب هل البنات بتحب تبقى مخدوعة او تحس انها مظلومة ولا هيا بتحب الحزن
فيما معناه يعني

اكتشفت اكتشاف عظيم جداً
إني بحب قوي احساس إني مظلومة
مش من قبل الناس ( لإن مبتفرقش معايا الناس كتير قوي)
بس من قبل نفسي
بحب احس إنها شخص آخر مسيطر عليا برغم انها مش كدة
آل يعني لما هحس كدة مش هتحاسب على اني عارفة انا بعمل اية
كهن بنات ميخلش معانا
المهم يعني

بس انا عادتاً بميل للحزن
و نظراً لأني مسمعتش الاغنين اللي اتكلم عليهم في مدونته فأنا مقدرش أقارن اذا كنت بحبهم اكثر ولا باقي شريط جناين


...............

حاجات بحبها

الشيبسي و الكاراتيه و الحاجات الحلوة بتاعت العيال دية

بحب قوي اشتري مصاصة و اكلها بكل عظمة وانا بتمشى

بحب الكركدية السخن و خصوصا من شركة إس إس اللي هيا ايزيس

بحب الايس كريم شيكولاتة بيضا و الايس كريم ليمون و ايس كريم فستق و ايش كريم بندق ( بموت في الايس كريم أصلا)

بحب اقعد أكتب على الكيبورد وا سمع صوت ضرب صوابعي على زرايرة

بحب أتسنكح في الشوارع بلا هدف ولا هوية ولا أي شيء

بحب امشي بليل أكتر من الصبح

بحب البحر قوي

بحب الهوا الساقع اللي يدخل عليا وانا لسة صاحية من النوم و متدفيه ( بحس إني مكسوفة منه قوي)

بحب السبيط المقلي
بحب اللبس الشنط و الجزم و الهدوم
بحب مرايتي
بحب كراسة رسمي
بحب قلمي الرصاص
بحب اجندتي
بحب اقعد جوة الدولاب
بحب العب مع العيال قوييييييييييييييييييييييي ( برغم اني ساعات بعمل أكني بنت كبيرة و مبعرفش العب معاهم بيبقى مسألة مود )
بحب القطط
بحب الكلاب
بحب العصافير و خصوصا اليمام
بحب الدنيا بعد ما تخلص المطرة
بحب الدنيا و هيا بتمطر و امشي براحة و الهدوم بتاعتي تتبل ولا هاممني و أبص على الناس و هيا بتجري و خايفة من المطر
بحب المواصلات و خصوصا بليل لما أركب اتوبيس فاضي من اللي بيلفوا حوالين نفسهم عقبال ما يوصلوا للهدف دول
بحب الانطلاق
بحب اعمل اللي يجي في بالي
بحب اضحك بصوت عالي
بحب انفخ اللبانة و اطرقعها
بحب البرفيومز جداً بس مبحبش أرش على نفسي كتير عشان ريحتي متبقاش ظاهرة .. برش بطريقة تخلى صحباتي اللي بسلم عليهم بس يشموني ولو بعدوا حاجة بسيطة عني ميشموش
بحب ماما قوي
بحب بابتي
بحب عيلتي برغم اني ساعات كتير بقول عايزة اعيش من غير أهل بس برجع اقول لنفسي .. إذا كان كدة و عندي أهل اومال لو معنديش أهل هيبقى حالتي إيه .. اكيد هبقى في حالة يرثى لها..

بحب الشريطة البيضا اللى كانت مغلفة العلبة

يااااااااه بحب حاجات كتير و لسة تاني

...............
مصالحة

عارفة يا نعكوشة ( بدلع مدونتي)
في الاول كان اسمك ( كرهت نفسي)
فاكرة مين اللي قالي غيري الاسم دة عشان متكتئبيش؟؟؟
انا عادةً بمل من أي حاجة بسرعة بس أنا مملتش منك يا نعكوشتي لحد دلوقتي

برغم إنه مر تقريبا سنه على بداية انشائي ليكي

ساعات كتير بتخيل
لو حد مسكك غربلك
هيشوفني انا

هتطلعي كلام كتير بائس

و شوية قصص و اغاني و افكار هطلة

و لحظة او لحظتين سعادة

و برغم كدة مستحملاني
و مستنياني اكتب فيكي لحظات السعادة

عارفة

لما ببقى مبسوطة قوي
مببقاش عارفة أعمل إيه ولا إيه

غلطانة إني مبشارككيش فيها
بس هشاركك بعد كدة
اوعي تزعلي يا نعكوشة

لو انتي زعلتي
هصالحك
و هتسامحيني

و ان شاء الله لما ابقى مبسوطة
هبقى اكتبلك

اضحكي بقةةةةةةةةة

:)

سلام عليكِ

Iam not Bipolar


friends of me said " you are bipolar." but i think am not
i can say yes easily
and i like this answer
when i am in the high mood
i feel life is perfect
and wow
but i never be manic
you can say i be hypo manic

i like to spend all the money I've
i like to make everybody happy
i see everybody beautiful
i walk
i Run
i scream
i laugh
i may dance

when i be in my depressive mood ( which is almost most of the time)
i don't be in severe depression
up to suicide
although i think a lot about suicide
what makes me not to attempt it??
because i am a Muslim
i believe in what Allah (3z w jal) said
so i don't want to suffer in life & after life ( by dying as a disbeliever )
ok

this may make me bipolar
but am not having bipolar disorder
because my life is continuing
and my studies isn't affected

my social life is affected

yes I've many friends that i cannot remember all their names
but i don't have one close friend
or intimate

why that??
i don't trust people
i just to be frank with myself don't feel comfortable when i become close to someone

that doesn't ever mean that i think people are bad
i always see the good part in them
and
even if anybody missed with me , hundreds of excuses are made for that one ( by me) saying ( et7'z le27'eek sab3een 3ozran).i don't remember the bad things made against me
and even if i remember that doesn't affect my relation with that one , because i think that whatever they do , i will not be affected ( in my thoughts not life) , they who will lose and they who will win .( about self respect i talk)


ok
i am not bipolar

i am also not borderline

although
i can't have friends
as i said I've hundreds of them but they are not friends
so that makes me not borderline disorder

i also hurt myself
yes
i scratch her
i hit her
i punish her
i bite her
i take off her hair

but not up to seeing blood
some times i prick her and i see a drop of blood or something

but i am not disfiguring her

i luv her to be pretty

yes
every time my personality changes
and they say ( my family) am not stable

but i am not borderline personality disorder

i maybe cyclothymic
but i am not

i am not paranoid
although
am being sensitive , but i try not to show this
i think am having pride , but i try not to be because i knew ( mn kan fe qalbehe zartan mn kebr fa hoa fe alnar ) so i try not to be , although ( my family ) says i am .

i am not schizoid
although i love to be alone in many occasions

i am not oppressive compulsive
although i have thoughts and orders to hurt people , hurt myself , do somethings
i sometimes obey and many not
but i am not
because my room isn't tidy
and my life is messy
and am called messy Girl

i don't know what am i.

i don't know

i need help
i need psychiatrist
but when a friend of me said : shall we go?
i became frightened
and i said no,i can handle it
although i cannot

i love the idea that i am ill
and i have disorder
it takes off all the blame and guilt directed toward me

but actually , i am not ill and am not having disorder
i am guilty
i deserve it
i deserve all the consequences
cause i walked toward it

i love pain
although i hate it

i love people
i don't love people

i love myself
i hate myself

i love life
i don't love life

i want to die
am afraid of death

i love mother
i don't obey her

i love to be a good girl
i do bad stuff

i dunno what i want
i dunno what i need

i have no freaking idea about what's going inside me

they said to me " fix yourself , before asking people to treat you good >"
i say " i don't know how to fix her"
they said " be good girl , ehtedy "
i said " i swear , i pray everyday " ya rab ehdeny"
i don't change
i cry when i read a verse
or hear a verse
or listen to a story of ( alsalf alsale7)
or when the Emam prays

i shiver
i say i will change
but i don't

i don't change
i say " i will do this and that , and stop doing this and that"
and after i start , i stop
i dunno why i stop
and how i stop

when i take one step forward
myself - which is me- takes twice backwards

i change in the look
how i wear
how i treat foreigners
how i deal with old age
how i treat youngsters

but my home
my family
i guess
they hate me
not because they hate me( they are good people and everybody loves them , even me ) it's my deeds

they hate my deeds
they don't love it
because i treat them badly

the prophet ( peace be upon him ) said : khayrokom , khayrokom le2ahleh , wa 2ana khyrokom le 2hly .

i am not treating them good

i try
but i cannot handle it

i am not patient

when i sit in my room while they are chitchatting in other room , laugh , cwarel or whatever
i feel i wanna join them
but i don't
and because i don't join them

when i decide to do it
they disgrace me
they say : why you're out of your snail

i turn worse
i treat them worse
i feel more guilt
i feel more pain
i deserve more pain

sick me

i need a deep breath then i need to die

i wish can die in peace
but peace is not for those who have sins like mountains

yes i know ,
لو تبت تتبدل السيئات حسنات
بس انا مبتوبش توبة نصوحة
وكل ما اقول هتوب توبة نصوحة مبكملهاش
وبرجع تاني للغلط

يارب
انت قلت
قل يا عبادي ومقولتش قل يا ايها المؤمنون
قلت الذين اسرفوا على انفسهم و مقولتش الذين يفعلون الخير دائماً
قلت لا تقنطوا من رحمة الله و مقولتش مفيش أمل

يا رب
انت العالم بحالي
وانت العالم ان كلماتي مبتعرفش توصفني
و العالم بذنوبي
يا رب
اهديني
انا محتاجة اهتدي يا رب
يا رب انت القادر انك تجعلني احسن
انا هحاول يا رب
وانت العالم
ساعدني يا رب
انا فعلاً محتاجاك

when i think that this life is nothing
and worthless
and
i will just live few years in comparison with the eternity - in heaven or hell- in the other life
i say
what da hell am i doing?
but
few days go
and i turn my back to what i said before
and i become dipped in life

offffffffffffff

sick

EW

i need to go
i know when i publish this
i will remove the cover from myself
but i will try to face the world with the real me ( starting with my blog ,may turn into the real world , as some of the people that i know , knows about this blog and visit it sometimes )

this is not me completely


frustrated؟؟
nope

i just felt

peace

and i wanted to discuss my state

i am quiet good ( not perfect) a7med Rby
i will become better insha2 Allah
some day
as long as i keep trying

i will fail
i will succeed
i will do
insha2 Allah

just pray for me

salam

محدش يتسائل أنا لية بكتب بالزنجليعي
لإني مش عارفة لحد دلوقتي
انا مصرية
لغتي الام العربية
فاشلة في االنجليزي
و في العربي كمان
و مبستخدمش الانجليزي أصلا
حتى في امتحانات الشفوي لما دكتور بيقولي اتكلمي انجليزي مبقولش جملة على بعضها بالانجليزي
ليه بقة بفكر بالانجليزي ساعات
معرفش



بلا عنوان

تحديث:

عندي حالة من الانشكاح (السعادة) بسبب كذا بتاع على عدة أصعدة
1- الصعيد الروحاني( حاجة حصلتلي و إن شاء الله هستمر عليها-الله المستعان-)
2- الصعيد الدراسي( كان عندي انهاردة امتحان جلدية و كان حلو و عرفت نتيجة النفسية و العصبية - الحمد لله -)
3- الصعيد النفساوي( دية بتبقى وقتية - عدة ساعات- بس مع وجود 1 و 2 ان شاء الله تستمر شوية - اصلها وحشتني قوي- )
حاسة اني مِقَلَقَة شوية بس مش وحش
الحمد لله على كدة ( وش واحدة مبتسم في سلام)
( مش عارفة أصغر الخط بتاع التحديث :( شكلوا صغير في الكمبوز و مش صغير في المدوننة -
يلا المهم النيه-)

.....................................................................................
بلا عنوان
السؤال الذي يعتريني الآن هو لماذا أ.......ـ

حلمي هو أن أكون مثل هؤلاء الذين يعيشون في الدنيا من أجل الآخرة ولكني لست كذلك.. و ما يثبتُ ذلك هو أفعالي التي.....ـ

إن أكثر من يقلقني هو .......ـ

حدثتني أمي عن كيفية أختيارها لإسمي.. قالت لي : لقد فتحت المصحف فوجدته مكتوب أمامي.. ترى هل...................ـ

دخلت إلى هذا العالم الافتراضي منذ سنوات عديدة.. علمت منه................ـ
....................

؟؟؟؟؟؟؟؟؟؟؟؟؟

أصبحت أفقد مذاق الكلمات
هناك خطأ ما
أعلم أني أحتاج أن أقومني لكني أنتظر شيئاً لا أعلم ما هيته...ـ
يؤرقني دائماً عدم قدرتي على كتابة ما يعبر عما بداخلي...ـ
شعور جلي بالحسرة و الألم حينما أنظر إلى كلماتي ولا أجدها تحويني..ـ
ليتني أستطيع أن أعلم كيف هي نظرتي و أنا شاردة
أمسك بالقلم كي أحاول أن أكتب ما بداخلي و لكني أجدني أكتب كلمات بلا معنى
ظننت في يوم من الأيام أني امرأة قوية
ظننت أني أصل دائماً إلى مرادي
ظننت أني ذات ذكاء فوق المتوسط
ظننتُ أنني لن أُحرج من أي شيء أفعله
ظننت أني طيبة القلب
ظننت أني قد سلكت طريقاً أقرب للصحيح
كثرت ظنوني
لكنها تحطمت جميعاً أمام واقعي المقيت المشبع بالذكريات العفنة و الحاضر المؤذي و مستقبل لا أعلم إن كنت حقاً أسعى إليه..فلم تفلح محاولاتي للتحسن من أجله
أنا امرأة بلا هدف
بلا عزيمة
إذا مِتُ سأكون في طي النسيان

لا أريد أن ألوث صفة المرأة بنعتي بها
أخشى أني لا أستحقها... و كيف أستحقها و قد رفضتها منذ بلوغي و إدراكي للفرق بينها و بين الرجل..

إن حرية المرأة من وجهة نظري تقودها للتلوث من وجهة نظرهم هم
لكني اكتشفت أنهم محقون و أنا المخطئة كالعادة

لا أجد للبكاء مكان.. ولا قيمة
ماذا سيحدثُ إن بكيت؟!
فعلتها مراراً و لم يتغير شيء

لماذا حدث كل ما حدث... لم يحدث فجأة فقد سعيت إليه و ها أنا ذا فيه
لم أكن أتخيله بهذة البشاعة
حان الوقت لأتخيله إذاً
لا داعي للتخيل فأنا أراه بأم عيني
أراه ولا أستطيع البكاء الذي حسبتُ قديماً أنه كان ليطهرني

أنا امرأة بلا هوية بلاعنوان
أنا امرأة أغراها الشيطان
أنا امرأة سقطت وبعد سقوطها لطخت وجهها بالطين و الذل و الهوان
سبحت في نهر بلا شطئان

أنا صمتي و حرماني
أنا حزني و ألحاني
أنا كذبي و إيماني
أنا أمي و أوطاني
أنا لست امرأة
أنا انسان

أنا امرأة ككسرة خبز استكبرت قائلة: أنا صلدة
و ازداد غرورها حتى أفاقت لتجد نفسها مشبعة بالماء
هينة
مفتتة
بلا طعم
تمضي عارية الأقدام على أشواكٍ صنعتها بنفسها و لم تكن تعلم أنها صنعتها لها..
تود لو تبكي ولا تستطيع .. لا لم تصبح متبلدة المشاعر ولكن ...لا أعلم
تود لو تصرخ ولا تحاول
تود أن تقاوم ولكنها ترضخ بلا كرامة
تفتح بيدها أقفال قلعتها واحداً تلو الآخر و هي لاتعلم حتى لمَ تفعل ذلك
تحلم و تحلم و تحلم ولا تحقق أمانيها

أنا صخرة جامدة تغلى من تحتها البراكين كاذبة
أنا لست صخرة .. أنا شوكة سهلة التكسر ... و بقصد أو دون قصد تأذي من حولها
أنا لوحة بلا ألوان... ولا حتى لونها الأبيض
أنا لا شيء .. أنا أسود ... أنا بنيّ .. أنا رماديّ ... أنا شاحبة اللون ...أنا لا أعلم كيف أنا
ليتني أستطيع أن اتابعني من بعيد

لا تقولوا عني أني رفيعة الأخلاق فهذا يمزقني
لا تنعتوني بصفة الطيبة فهذا يزيد احساسي البائس بالكذب


أريد أن أرحل بعيداً .. إلى عالم لا أعلم أحداً فيه.. ولا أحاول التظاهر فيه
لا أبذل قصارى جهدي كي أواري أخطائي
و أستخدم طاقتي في تقويمي لا تهويمي

أنا لست كما ترونني
أنا لست أنا التي أظهرها لكم
أنا فاسدة
أنا منتهية الصلاحية

لماذا علي دائماً التخفي... لم أكن كذلك قبل أعوام.. نعم كانوا يقولون عني أنني غامضة و لكني كنت أخفي ما لا أستحيي أن أظهره
الآن
أنا أخاف من كل شيء أفعله

أنا ظل بلا ملمح
أنا عبد بلا مطمح
أنا غرفة بلا أركان

أنا امرأة
بلا هوية ولا عنوان
أنا لست امرأة
أنا انسان


................
حكوك الطبع و النشل محفوسة لنعكوشة