نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

تفاصيلها النمنمة




عمرك حسيتي إنك مش عاوزة تكلمي شخص معين لإنك كل ما بتكلميه بتحسي إنه بيلمسك من جوة قوي من غير ما تقربوا من بعض ومن غير حتى ما يبقى فيه كلام حب ... عمري ما حسيتها بس متخيلاها قوي


كانت هيا حكتلهم عن خمستلاف حاجة و خمسميت موضوع و من بينهم ذكرت حاجة عن الزهور اللى هيا بدأت تجمعها مؤخراً و تجففها .. مشيت الأيام و فى يوم لما خرجوا كلهم مع بعض فى وسط الحوار طلعلها وردة صغنتوتة
ولا حمرا ولا بنفسجي ولا تحمل أى معنى غير إنه قالها بتلقائية و صوت عادي زى ما ما كلهم بيتكلموا مع بعض : دية زهرة الليمون يا رب ماتكونيش لسه ضفتيها لمجموعتك .. خدتها برضو بتلقائية
بس جوة منها حست انه مد إيده على قلبها و لمسة بخفة الحرير و سابه تاني
مشيت المواضييع و الايام
كان دايماً بياخد باله من فسافيس كدة هيا بتعملها ومبتبقاش واضحة قوي
نوع البمبون اللى بتحبه و دايماً بتبرم ورقته و تشمها متعرفش ليه قبل ما تحطها فى الشنطة
الوردة الصغيورة اللى طرزتها بايدها على شنطتها
انها مبقتش تاكل ايس كريم فستق زي زمان و بقت تحب المستكة و الليمون
الرسومات اللى على حيطة اوضتها لما وريتهم صورة كانت متصوراها فيها
بتحب تحط الكاتشب بطريقة معينة على البطاطس
حاجات هبلة صح
ولا حد ممكن ياخد باله منها خصوصا انهم جروب صحاب كبيــر
بس كانت بتمثلها هيا حاجات مش هبلة البته
كانت بتعملها بينها وبين نفسها و احتمال تحكي عنها بسرعة و متطولش فيها.. مم
بس كل مرة كان بيلمس قلبها
بحنية و بنظرة بريئة مفيهاش ولا شهوة ولا بتاع
ولا حتى أصلا كان بيتعمد إنه يلمس قلبها
ولا كان يعرف انه كان بيعمل كدة
بس كان بيحب تفاصيلها النونو ديه
"صعب قوي تلاقي راجل بيركز فى التفاصيل المفسفسة بتاعتي دية " دة اللى قالته لنفسها
قررت ما تحكيش تاني تفاصيلها ولا بسرعة ولا ببطء بس هوه كان لسة بيلاحظ و لسة بيلمسها من جوه على فترات متباعدة
هيا؟؟؟
بعدت
آه .. سافرت تعيش مع أبوها هناك و بالمرة تتعلم شوية حاجات فى مجال دراستها
أصلها كانت وحيدة امها و ابوها المتطلقين و هيا عايشة مع امها
بعدت عشان مش هتقدر تقوله إنت بتعمل فيا كدة ليه لما بنتكلم؟
بعدت عشان بقت تفكر فيه اكتر من اللازم و هوه بيعاملها عادي و بيبصلها زي اى واحدة من الجروب
بعدت عشان كانت خايفة على قلبها
متعرفش انه مركزش فى تفاصيل اى واحدة غيرها
من غير ما يتعمد و من غير ما يعرف اصلا انه بيعمل كدة معاها بالذات
مفكرش اصلاً إنه بيحبها او معجب بيها
كان فاكر إنه عادي زي ما بيشوف الكل بيشوفها
دة اللى كان و احتمال يكون لازال فاكره
مركزش فى لحظة مع نفسه انه مش بيعمل كدة مع غيرها
بعدت
منسيتش بس اتعودت محدش يلمس قلبها ولا يركز فى تفاصيلها
وهوه كان عادي .. هوه اينعم بقة متضايق لما سافرت بس كان اصلاً ظروفه كلها مفحكشة
كان دايما بيبقى مخنوق بس كان فاكر انه من الظروف و بس
كان بيفكر فيها آه .. بس كان بيقول لنفسه ." عادي ماهو لو اى واحدة من صحابنا سافرت هفتكرلها مواقف برضو " المهم يعني
أهيه راجعة بكرة
وهوه حس بنغزة في قلبه وان حاجة جواه اتسحبت فجأة لما صاحبه قاله انها راجعة
أما نشوف شو راح بيصير؟! و شو مخبيه الأيام ؟ ـ
.................................
بالمناسبة البتاعة من وحي الخيال تماما ولا اعرف واحدة اصلا حد بصلها فى تفاصيلها
والزهرة اللى فوق دية زهرة الليمون


حكوك التبع و النشل محفوسة لنعكوشة


للتسجيل لنفسي: امتحان الجلدية كان حلو الحمد لله
رغم ان درجاته قليلة بالمقارنة باللى انا ضيعته
بس انا لاحظت حاجة بس
قسم الاشعة و الكلينكال باثولوجي و الجلدية دول عالم رايقة و محترمة
بس كدة
فى العملي جالنا حالة
pytriasis versicolour
اصلا الراجل لما وقفت جمبة
بقوله
هوه فين ال lesion اصلا
قام شاورلي على قفاه
ولا شوفت حاجة ... فين ياعم .. اهوه يا دكتورة ..
قفا مصرى عادي جدا على راي واحدة صحبتي
فين فين اما شوفت البقع الصغنونة الفاتحة مش قوي اللى فى القفا
و افتكرت صحبتي (ه) لما قالتلي ان حالات بتريازس نزلت
يلا خير
الحمد لله
ناقص امتحان شوفي الباطنة و رسم القلب
ربنا يستر
الحمد لله رب العالمين
>>>>>>>>>>>
16 oct 4:38 am

yesterday was the last lecture in internal medicine
prof. Osama was really Rayeq
i'll miss him
really i will
if i were a guy i would have hugged 'em and kissed 'em
we went to Cinnabon
Ma , M1 , M3 , M 18 , H , N
we all laughed , i liked that
we've made a schedule with the places we wanted to go in the vacation
i liked this idea
i was totally exhausted as i was awake since 3 am
yalla , today isA i'll attend a lecture in communication skills in the faculty of pharmacy
yea this new one which was built recently
i wanna go there , i saw it from outside it's marvelous
Now , i feel that am having brain enlargment and increase in ma cranial tension
my cuff muscles are so much hurting and also ma back
i feel like this college is gonna kill me and make me like disables
anyways
الحمد لله

21 قالوا رأيهم في العك اللي تحت ؟؟؟:

سلام عليك

اول مرة اشوف وردة الليمون ..شكلها جميل :)

مفتكرش ان فى حد ركز فى فسافيسى قبل كدة بس لما تخيلتاها لقيتها حاجة حلوة..

ازيك يا مريم عاملة اية؟خلصتى امتحاناتك؟

تصدقى و تأمنى بالله

(لا اله الا الله)

انا لسة من شوية واخدة بالى من ردك على تعليقى اللى بعتهولك من 3 قرون ...اصل انا افتكرتك وقتها مش هترودى..بس شاءت الصدف انى دخلت و لقيتك ردا..كويس الحمد لله انى بعرف احلل الى حد ما..منسبة للكتاب اللى سالتينى عليه..للأسف معرفتش اجيب الحلقة بتاعت اوبرا عشان اعرف اسمه بس عرفت اسم الكاتبة..اسمها kathy freston ..بس انهى كتاب الله اعلم :)

لو حابة تقرى كتاب انا ممكن ارشحلك كتاب بقرأه حاليا و عجبنى جدااا..اسمه the present by spencer johnson ..الكاتب ده مقدرش اقولك والله فظيع تحفة..

بالمناسبة قريتلك (فاكر)و عجبتنى اوى..


.... سلام

 

حلوة اوى
البوست كله على بعضه لمسنى انا شخصيا
مع انى معرفش شكل زهرة الليمون ولا عندى بنبونى معين بفضله ولا عندى اى تفاصيل نونو كده بس جميل انتى خددت فكرة بسيطة اوى عملتى منها حاجة رقيقة جدا .. ومشيتى الاحداث بواقعية شديدة
بس السؤال : هيا ليه الناس بتبعد( او بتهرب) لما حد بيلمسها من جوه ؟

بالنسبة للامتحانات ربنا يوفقك

تحياتى

 

انا كمان سبت ملحوظة فى آخر بوست عندى شبه ملحوظتك يا نعكوشتى
المشكلة فى الملاحيظ دى
ان فى الآخر الكل هيطلع ملاحظ كل حاجة و إحنا اللى مش ملاحظين اى ملاحظات ملحوظة
فهمتى حاجة ؟
طيييييييييب
يا رب كل امتحان يكون كويس و تجاوبى حلو
بوسة و حضونة يا حبيبتى

 

mariam
عليكِ السلام

الحمد لله .. لأ لسة مخلصتش
لا إله إلأا الله ... عادي مافى مشاكل
هبقى ابحث عن هذه الكتب اللى قولتي عليها
ان شاء الله

تسلمي يا كوكي

..........

حياة قيد التنفيذ

هتلاقي ليكي حاجات نونو
حاجات كدة بتحبي تعمليها مع انها عادية او هبلة او صغنونة
بس بالنسبالك حلوة

اة منا لما تخيلتها لقيتها لذيذة

اجابة على السؤال
من وجهة نظري

عشان خايف على قلبه لحسن يتعور ولا حاجة

او انه ميكونش يستاهلوا
مش سهل انك تغامري بقلبك يعني

تسلمي ربنا يخليكي

نورتي

.......

فاتيما

لأ مفهمتش
معلش انا عندي حالة غباء انهاردة
او من شهر تقريبا ولازلت

بمناسبة الامتحانات
احتمال بعد قرن لما اقراها تاني افهم

مين عارف

يا رب يا فاتيما يا رب
داحنا غلابة والله

نورتي
..........

سلام عليكم

 

الحاجات المنمنمة دي قليل لما حد بياخد باله منها ولو حصل مش بيعمل ده مع كل حد ولو خد باله مرة مش هيفكر فيها كتير ولو فكر فيها مش هيكتبها ....الا لو كان انسان اوي اوي

على فكرة الحكاية دي تنفع فيلم جميل و رايق بعيد عن الافلام البايخة المكررة .. دي مختلفة بجد ومليانة احساس عالي فوق فوق ..

بييييييس

 

unique

على فكرة
بجد
مبهرجش
حسيت انك فعلاً يونيك
معرفش ليه فجأة حسيت بدة

طيب ابقوا خدوا الفكرة

و قولوا مقتبسة عن رواية عظيمة للكاتبة الرهيبة التى لم تخطئ ابداً و افظع و ارق و الذ و احلى و اجمل و اى صفة حلوة هههههههههههههه الكاتبة استاذة الاساتذة الدكتورة المعروفة .. اية الهبل اللى بقوله دة

يا ستى ياخدوها فيلم ههههههههه
هوه انا اينعم عندي نوع من انواع الانانية
و لو حد خد الفكرة هزعل لو مجابش هنت عني
بس عادي ياخدوها ولا يعملوا اللي يعملوه و بلا هنت بلا بطيخ
انا مين اصلا

انا معوقة صح
مش حسيتي بالاعاقة
هههههههههه
لأ اصلى لسة صاحية من النوم

معلش معلش
عامة عجبتني حتة انسان دية
حسيت انك انتى اللى انسانة قوي

مش اقصد حاجة والله معلش انا نايمة بس انا حسيت بدة معرفش حضرتك كدة ولا لأ بس دة حسيته

سلام عليكِ لحسن شكلي هخطرف

 

حكاءة ببساطه وعفويه وعمق


كملى


لونى الورء
والحياه
بـحسك الرائع

 

اممممممممم بغض النظر عن انى قريت البوست دة اول امبارح وملحقتش اعلق لان النت غلس عليا...وامبارح جيت من برة مستهلكة جدا ونمت لحد النهاردة..والنهاردة صحيت عيانة تانى ومش عارفة ابلع ريقى وزورى محتقن..

الا انى عايزة اقولك ان الملحوظة بتاعة معرفش اى واحدة حد بص لها فى تفاصيلها دى ضحكتنى اوى...

نعكشة..انا الايام دى مبسوطة الحمد لله بس فى شخص كل لما اكلمه او اشوفه ينكد عليا وانا دلوقتى متنكد عليا..على فكرة مبيعمليش حاجة خالص..انا بس مبحبش اتعامل معاه وفى نفس الوقت مش عارفة اقطع علاقتى بيه..حاجة تقرف

انا كنت جاية اقولك مبروك انك خلصتى الامتحانات..ودكتور اسامة لو عرف انك هتفتقدية كان فرح اوى اوى ولو عرف انك كان نفسك تاخديه بالحضن هيفرح خالص...

اكرمك الله

سلام

 

انتخ

حلوة حكاءة دية
فكرتني بقصة خِنِيفسة اللى حكيتها للعيال صحابي واحنا رايح استنجرية
هههههه


شكرا

..........

انجي

الف سلامة عليك
على فكرة مفروص لو عاوزة تخفى من البرد بسرعة متجهديش نفسك
انتى كدة بتتعبي نفسك اكتر
انا لما ببقى عيانة ببقى عاوزة اعمل كل حاجة
وبجهد نفسى لحد اخر نفس

بس دة بيبطأ فى العلاج

2
عليكي بالعسل و الليمون
تحفة
معلقة عسل كبيرة
الصبح بدري عليها عصرة لمون
ولو عندك كحة

حبة البركة على الريق الصبح

اتدفي كويس و نامي كويس
متجهديش نفسك هتخفى بسرعة باذن الله

سيبك من الكمبيوتر خالص
اة والله
بلا هبل
انا اسفة انى قولتلك يا رب تكوني كويسة
مكانش قصدي والله حاجة بس كنت عاوزة اتكمن عليكي
وملقتش وسيلة غير المخروب الكمبيوتر
بصى
سيبك منه خاااااااااااااااااااالص

اقعدي
واهدي
فى سريرك

لحد ما تخفى

لو سمحتي
............

انا لسة مخلصتش امتحانات
انا لو خلصت امتحانات هعمل فرح اصلا
و ليلة

انا بقول بس انها اخر محاضرة باطنة

تفتكري ؟؟؟
و حتى لو مفرحش والله مش هزعل
ربنا يباركله فى اولادة يا رب
و يرزقه الرزق الحلال الطيب
و يدخله الفردوس الاعلى
بجد
شخصية فظيعة
من كتر مميزاتها تنسي عيوبها

ربنا يباركله يا رب

يااااااااااااااا رب

..........

بعد ما كتبت الملحوظة استغربتلها برضو
ههههههههههههههههه
بس قولت يلا بلا هوسة

انجي لو سمحتي بجد مابهرجش
عشان خاطر نفسك
متقعديش على الجهاز
ومش لازم يا حجة تعلقى ولا تعملى حاجة :@
و اهدي كدة لحد ما تخفى
بالله عليكِ

مش عارفة هتقري الكلام دة ولا لأ
بس انا اسفة انى قايلاهولك برضو عبر شاشات التلفاز
قصدى الجهاز

خدي بالك من نفسك
شفاكِ الله و عافاكِ

على فكرة
كان ممكن تردي هناك فى مدونتك عادي
مش لازم تعبري امى دلوقتي خالص

بصي
ولا مدونتي ولا مدونتك
اهدي
مترديش حتى على الرد دة
إلا اما تخفى خااااااااااااااااااااااااالص

...........

سلام عليكما

 

جميل اوي اننا نحس ان في حد ملاجظنا وبيهتم بفسافيسنا
والاجمل لما نكتشف ده صدفه
لكن البطلة غلطانة انها تبعد
في انتظار الايام القادمة متشوقة جدا صدقيني
اسلوبك فكرني باسلوب عبلة كامل في التمثيل كانه حقيقي من كتر البساطة والتلقائية
اسلوبك المرة دي مافيش فيه فلسفة كتيرة ولا كلمات مجعلصة بجد ممتع اوي
واسلوبك في البوست بتاع الرجم
حسيت ان بطلة القصيدة هي نفسها بطلة رواية ترويض النمرة
تحياتي

 

بس الله الرحمن الرحيم

انا بقالى كتير اوى مبجيش عشان كنت بمر بظروف

هقرا كل اللى فاتنى

وهسيب على كل بوست تعليق

خمس دقايق وانشر تعليقاتى

شاب فقرى

 

ركزى كمان وهتبقى كاتبه كبيرة ومشهورة جدا كمان

احاسيسك حلوة واسلوب السرد رائع وافكارك متجددة :)

تحياتى ليكى عالبوست الجامد دا

وبالنسبة لموضوع الامتحانات

وربنا وربنا وربنا كمان مرة ما فهمت حاجة :D


يارب بس تكون سهلة وتنجحى وتجيبى تقدير كمان

هدعيلك :)

تحياتى

شاب فقرى

 

انا جاى استاذنك فى حاجة كدا

اول حاجة

عايز افهم انهو راى عالبتاع الاحمر اللى كان كويس

ثانى حاجة :

كوكى مين

ولو كوكى عرفتى منين


انا مقلتش اسمى لاى حد

بتعامل بفقرى

وجاى استاذنك امسح تعليق كدا من عندى وهقولك السبب وهبقى امسح كدا كمان :D

بانتظار الرد

شاب فقرى

 

فكرة من الزمن

جميل
بس صعب تلاقيه

الله يكرمك

نرجع نقول انى مبتعمدش البسساطة زي ما بتعمدش الكلمات المجعلصة
كله بيطلع كدة

نورتي
.............

شاب فقري

كان الله في العون
...

الله يكرمك بس انا مش ناوية ابقة كاتبة مشهورة

.........
انا رديت على حضرتك هنك و يمكنك مسح التعليق كيفما شئت

نورت


...سلام عليكما

 

فى إطار حملة مدونتى عنوانى تستضيف رابطة هويتى إسلامية المدون محمد غالية صاحب مدونة هل تبحث عن السعادة

فى نقاش عام وحوار مفتوح حول موضوع الحملة .

والدعوة مفتوحة للجميع للمشاركة معنا فى النقاش من أجل الإفادة والإستفادة

نتمني منكم مشاركتنا من أجل تدوين أفضل

تحياتنا

أسرة رابطة هويتي إسلامية

 

نعكشة

انا قريت ردك امبارح بس مرضتش اقولك انى الويك اند دة مريحتش نفسى اطلاقا

امبارح اللى هو الجمعة روحت حفلة كدة كان عندنا مهرجان وفرق موسيقية بقى وبتاع وروحت مع اصحابى..وكنت تعبانة وزورى مقفول بس روحت..وكمان الحفلة كانت على الواقف يعنى مريحتش جسمى بس كنت متفقة معاهم من قبلها ومقدرتش مروحش

انهاردة اللى هو السبت روحت الجامعة..معرفتش اوفق مواعيدى بتاعة المنحة مع مواعيد المحاضرات..فسحبت الملف..هاجل لحد الفصل الدراسى الجاى..شهر يناير..مع انى عارفة ان دة كان لازم يحصل وانى فعلا مواعيدى مش متظبطة وانى هرجع للدراسة تانى فى يناير الا انى زعلانة اوى ان ملفى معايا معرفش ليه...

بجد زعلانة انى اخدت ملفى...زعلانة بجد يعنى

عموما انا كان لازم اجى اقولك ان الملف معايا...وانى مش طايقة ابص له

وان جدو بيموت ادعى له

سلام عليك

 

لا لا ماليش دعوة من وحي الخيال ولا حقيقة انا عايزة اعرف ايه اللي حصل ..
:)
حلوة اوي واحساسها جامد بجد وفيها تعبيرات مالهاش حل رقيقة جدا

حست انه مد إيده على قلبها و لمسة بخفة الحرير و سابه تاني

عاجبني اوي التعبير ده جامد مووت ..

"صعب قوي تلاقي راجل بيركز فى التفاصيل المفسفسة بتاعتي دية "

بصراحه البوست بتاعك فيه حاجات كتير صعب الواحد يلاقيها اليومين دول .. بس اهو خلي املك في ربنا كبير
:)
انا هبطل رغي بقى احسن رغيت كتير عشان اقولك اني حبيت احساس البوست بتاعك
:)

 

رابطة هويتي اسلامي

مع انى مش فاهمة ملابسات الموقف
بس ان شاء الله يبقى حوار نافع

.........

enjy

ربنا ييسر الحال ويكرمنا

............

عاشقة القمر

ماهو انتى عيشيها فى اللى انتى عاوزة تعيشيها فيه

براحتك يعني
انهيها على مزاجك يا فندم

هوه اينعم صعب

بس الخيال مش وحش زي ما قولتي

مرغيتيش كتير أصلاً
هوه فين الرغي؟؟
هوه انا لحقت ؟؟؟

نورتي حقاً

..........

سلام عليكم

 

السلام عليكم ورحمة الله وبركاته
فين بس الي يركز في الفسافيس والحاجات المنمنة دي ..ويبص في التفاصيل ..ده يوم ما يعرف اسمها وكام حاجة تافهه كده ..يقولها شوفي انا مهتهم بيكي ازاي
ههههههههههههههه
بس جميل اوي الي يركز في الحجات الصغيرة دي ..لانها قليل اوي لما تحصل ..
اسلوبك جميل جدا بجد ..ما شاء الله عليكي
سلام

 

شريكة في المطعم

عليكِ السلام و رحمة الله و بركاتة

هههههههههههه اة ياختي
مهم حاجة نادرة بقة
لو لاقيتي واحد
ابقى احجزيلي اخوه
تسلمي ربنا يخليكي

نورتيني

سلام عليكِ

 

Solar eneragy is the future for the world.
[url=http://www.solarcourses.org/]solar generators[/url]