نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

أنا عايزة أطير

لما شوفت الtemplate دة انا قولت هوه دة
مش دية الفكرة
الفكرة بقة اني ألفت الحتة اللي مكتوبة فوق خالص دية
عشان تليق عالبنوتة الطايرة دية و علي احساسي
وهوب لاقيتني كتبت العك اللي تحت دة
بس كدة
محتاجة أطير
هسيب ايديا
و ارفع عيوني للسما
.
علي وشي بسمة
و في ايدي رسمة
و الدنيا تحتي مأزمة
.
أنا عايزة أكََبّر
مش كل يوم . أفضل افكر
في تلال هموم متكومة
.
قدام مرايتي
هحكي حكايتي
بنوتة قالو مِتعلمة
.
متنورة زي البنات في سنها
علي حظها
كل الظروف مش ضدها
شايفيني واعية مع إني لسة منمنمة
.
شباكي ابيض عليه تراب
لما افتحه بشوف سراب
أحلام كتير متسستمة
.
متقفليه!!
عقلك ليه بتعذبيه!!
بتعيشيه في ملحمة
.
قالتها نفسي و نفسي بردو ردت عليها
و فهمتها و اقنعتها
وانا قاعدة ساكتة ولا فاهمة حاجة
قالت عليا متفهمة
.
بتضحك عليا
مش عارفة ان كلامها ليا
سكينة باردة متلمة
.
بتجرحيني و الجرح صعب
أنا احتمل كل الجروح إلا جرحك يا أغلى قلب
.
لو ترجعيلي
ههننك و أروشك و اسمعك
ضحكاية عالية مجللة
مش من الهموم من فرحتي
برجوعك انتي يا أنا
.
و أنا أهو و أنتي أهو
بقولها عاليا يا أغلى حتى من عنيا
هترجعيلي
ماهو انتي مني و منك أنا
.
عشان نطير ..... و نسيب إيديا ..... و نرفع عيوني للسما...
..................
حكوك الطبع و النشل محفوظة لنعكوشة

45 قالوا رأيهم في العك اللي تحت ؟؟؟:

بقى دا عك د
ا
امال اللى انا بعمله ايه

جميله جدا جدا جدا
والاجمل انك نفسك تطيرى وتبصى لسما
الطموح شئ جميل

ربنا يزيدك

 

ياااااااااااااااااه
انا اول تعليق كمان



احمدك يااارب

 

عايز اطير
تل هموم مكتومة
قاعد ساكت
الجرح صعب

هى دة حالتى

مش عارف شكلك كنتى بتغشى البوست دة

سلاااااااام

 

السلام عليكم
زمان كنت عاوز اطير .. بس اكتشفت ان هنا وانا معاها ( نفسى ) .. احلى واطعم و الذ واشهى ..ويتوغل وينتشر ..وينتشر ويتوغل ..
:)
احلام سعيده.. وجناحات كبيره
اه قبل ماتطيرى ابقى نضفى الشباك الله يكرمك

( سلام عليكم )

 

romansy

ربنا يكرمك
فعلاً شيء جميل
اللهم امين
و يزيد حضرتك
:)

نورت

...........

أيام العمر

بعضنا هذا الرجل
بتختلف المشاكل و الحالة واحدة
بتختلف تكوينات الحالة بس بنوصل ليها
محتاجة انسلخ مني
عشان ارجعلي

تفتكر كنت بغش؟

عليكم السلام و رحمة الله

نورت

.......

2ragooz

عليكم السلام و رحمة الله

ربنا يخليهالك يا رب
مش عايزاها تبقى مجرد احلام
مستعدة اعمل اي شيء
بس لما اافوق من المعمعة اللي انا فيها
عشان اشوف الصفاء بتاعها

هيتكوم تاني التراب لاني لما هطير هبعد كتيــــــــر

بس هرجع تاني
تصدق
بحب جداً اروق اوضتي وانا مسافرة عشان لما ارجعلها ارتاح

هبقى انفضوا ان شاء الله

عليكم السلام و رحمة الله

نورت

........

سلام عليكم

 

فين العك؟؟؟ سؤال يعنى معلش فين هو العك دة يعنى اصلى نظرى ضعيف... انا عايزة اقوللك انى اول ما دخلت قول ايه دة انا غلطت فى العنوان وللا ايه؟؟؟ وبعدين قريت السطرين اللى مكتوبين فوق تنحت..والله العظيم قلت الله ايه دة الكلام دة حلو قوى... وبعدين قريت البوست قلت لالالا البت اتطورت جامد ايه الكلام الخطير دة؟ بجد انت كلامك حلو قوى وكل مرة بحس انك بتكلمينى انا لوحدى بس ... ربنا يوفقك وتحققى كل احلامك وتبقى دنيتك زى الفل وحلو قوى النيو لوك دة يا نعكوشة يا عسولة انت

 

هو انا رغم اني شايفه عك

بس زي بعضه

عك دمه خفيف

و فيه زي ما رومانسي بيقول

طموح و طيران و بص للسماء

وكده يعني

 

ياريت بقى كل مرة تعكي كده :)
كلام جميل جدا

 

انا كمان عاوز اطير والله
عارفة احلى حاجة انك بتكتبلى اللى جواك
والاحلى
ان اللى جواك زى اللى جوا اى انسان
بالحق
انا عارف ان دا كلام مكرر وتقليدى
بس
حد ينقذنى من الكلية دى
بيدونا ستين صفحة فى اليوم
والعيال كلها دحيحة
وانا حاسس انى الحمار الوحيد
على فكرة بجد غلط انهم يحطو كل الدحيحة مع بعض
كدا يجيلنا احباط
ربنا يتوب علينا بقى من الكلية دى

 

المرة دى هاتخانق معاكى
لأن اللى فوق دا مش عك ابدااااااااااا

 

اولا مبروك على التيمبليت الجديد
ولون التانى كلن اجمل
انعودنا دايما على بساطة افكارك مع روعتها
جميلة الكلمات
فى بعض الاحيان احس انى اريد التحليق
غالبا ما اكون كذلك
شعور متبادل يعنى
اريد ان اخرج من الواقع المرير
لكن لا تنصفنى اجنحتى فمخيلتى اقل من ان تتحمل طموحاتى
على فكره احس انى افتقد نعكشة
لا اجد تاويلا
تحياتى

 

enjy

مش حاسة باي تطور صراحة

عشان كتير مننا كدة
فلما بحكي عن اللي بيحصلي تلاقية يتشابة معاكي

بس
اللهم امين

تسلمي
رفعتي من معنوياتي تجاة النيو لوك لإني عندي ازدراء منه برغم حبي للبنت التحفة الرهيبة اللي فوق دية

نورتيني

.......

شوكت

ربنا يكرمك يا رب
ويحققلنا كل طموحاتنا

نورت

.............

chatterbox

تسلم

نورت

..............

واد غلبان

جبت المفيد : اللي جواكي جوا اي انسان

طيب بالنسبة للكلية

1- اول سنة دايمة بتبقي كدة قمة التوهاااااااان
2- انت بتفهم طيب الستين صفحة بتوع المحاضرة؟؟؟؟؟
لو فاهمهم كدة يبقى تمام و هتعرف تلم نفسك آخر السنة
اما لو مش فاهمهم
انت تشوف واحد عندكو في الكلية يكون اكبر منك بسنتين ولا حاجة يفهمهالك
لو ملاقتش
قولي وانا هحاول اقراها و اشوف لو اقدر اساعدك

لا والله انت مش حمار ولا حاجة
هوه بس الطلعة الاولي في الكلية دية الانسان بيحس بهذا لااحساس

انا كنت كدة برضو

بالعكس كويس انكم مع بعض عشان تنافسوا بعض
فقدراتكوا العقلية تنمو

ربنا يوفقك يا رب
تفائل بالخير تجده ان شاء الله

شد حيلك كدة

نورت

...........

blue-wave

دة رأي حضرتك

نورتني

............


احمد بدر الدين


اولا: الله يبارك فيك
معلش انا بيجيلي ملل حتى من نفسي مش من التيمبلت بس

انصحك نصيحة اخوية بمحاولة تنمية مخيلتك اكثر ( اهم حاجة الخياااال هوه اللي بيرفه عننا
)
انا ايضاُ افتقدني

نورت

...........

سلام عليكم

 

نعكشه ..الله عليكى
انا دخلت اشوف ايه النعكشه دى لاقيت كلام اخر ترتيب وجمال
طيرى كمان فى دنيا الكلمات ورفرفى علينا باحلى كلام

 

اهلا سيدتى

كلماتك بسيطة وجميلة وأوضحت ذاك الشعور بالبساطة عندما يجتاح الفرد شعور بالأمل يطير بجناح الحب وجناح الرجاء
جائت كلماتك الرائعة فة وقتها والله

تحياتى لك
.....
نور الدين محمود

 

وانا كماااااااااااااااان
عايزة اطير وفك
!!!
عووووووووووووووووووو

 

عامة لو ده اسمه عك

فانا انهاردة عرفت معنى جديد للعك D:

نيو لووك لظيظ اوى بجد D:

 

و انا كمان نفسي اطير
الكلام حلو
لانه طالع بدون ترتيب

 

بس خلاص

ربنا يخليكي يا قمر

نورتيني

.........

نور الدين

ربنا يفتح علينا جميعا
:)

نورت

..........


كيكي

يلا يا شيخة سيبك من الدنيا ديةة
انا وانتي مع بعض

نورتيني

.........


كفاية طيبة

تسلمي يا قمر

نورتيني

...........

واحدة مفروسة

يلا انا وانتي و كيكي هنطير

احلى حاجة الواحد يسيب نفسة يقول اي حاجة كدة و خلاص

نورتيني

.......

سلام عليكم

 

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا

 

العك ده حلو خالص والله ، بس انا وحشنى حبتين الكريز اللى كانوا فى التمبليت القديم

 

ايه الحاله الجميله دي تيمبلت جديد و كلام جميل
ياريت تاخديني اطير معاكي

 

نعكوووشــــة ، حلووو قوووي بجد، وقصيدة على بساطتها دخلت القلب ،،،،،

ممممممممممممم حلوة فعلاً ، بــس مش متخيل إنك بقى لك حبة صغنتتين في عالم التدوين ،،، أهلاً بيكي وبنعكشاتك ..


بالنسبة للقصيدة فيها كسورات طفيفة جدصا

بـــس حلوة آآآخــر 3 حاجات

تحياتي

 

احساس جميل انك تطيري وتفرحي
و ترسمي
وكلام جميل كتباه قريته ف مطرحي
اتكلمي
وعلمي
خلي الادين ترسم امل
ترسم عيون متبسمه
والله يا نعكشه تسلمي

جميل قوي البوست والله
وربنا يوفقك

 

اولا القالب جميل اوي
والبنت شعرها مش منعكش ولا حاجة وزي الفل

تاني حاجة بقي زي ما د. عمرو بيقول
كل مرة اعلق ادوس علي كلمة ايه رايك في العك .. بضايق

كلامك جميل بجد
انتي كلك مواهب
ما شاء الله

 

السلام عليكم

لو ده اسمه عك يبقى ياريت تعكلنا على طول هههههههههههه...
لأ بجد الكلمات حلوه أوى ماشاء الله...
ربنا يقدرك وتحققى طموحاتك وأهدافك فى الحياه....
دمتى بخير

والسلام عليكم

 

يا ســلام لو كل العك بالشكل ده

انا كمان عايز اطير معاكى

و يبقى ليا جناحين اطير بيهم

 

Cairo, Egypt reading

الراجل ده كداب

عشان انا اسمعلاوي


ام هند

اللوك اللى فات احسن طبعا بكتير مع انه بيتقل جهازي وبيوريني الويل عشان ادخل على المدونة دي

بس بدخل برضه وبقرا ومش برد

ماعرفش ليه

انما ده لسه ماقريتهوش

بس شكله كويس لانه تجربة شخصية



بس لما اقراه احتمال ماردش برضه :))

 

كلام ماشي تماما مع الصوره و الظاهر انك تعبتي في البحث عن قالب مناسب او صوره مناسبه
انا كمان غيرت صورة البانر مرات لحد ما رسيت علي صوره ثبتها

 

من منا لا يشتاق الي هذه اللحظات التي يهرب فيها من كل شئ و أي شئ ..

ساعات بنكون عاوزين نهرب و بس من الواقع و مشاكله و صداعه و نشتاق لمخرج حتي لو في الخيال .. لكن لو هربنا ساعات و رجعنا تاني هنخبط في المشاكل تاني فنتازم اكتر .. المشكلة بجد لو الواحد زالت ازماته و ظروفه الصعبة فاكتشف انها كانت عارضة او مؤقتة .. انما الازمة فعلا باقية مش في الظروف زي ماهي جواه و في طريقة معايشته ليها .. اكيد تصالحه مع نفسه و رضاه عنها الاول اول خطوة في مواجهة الدنيا كلها .. اتمني لك التوفيق في كده

تلقائيتك في كتابة الكلام .. جميلة .. لك التحية

 

السلام عليكم ورحمة الله وبركاته

الله يبارك لك .. والله كلام جميل .. وكله احساس حلو .. عجبني جدا .. وعلي فكرة هخدوا كوبي دا بعد اذنك طبعا .. علشان اقرأ كتير لانه عجبني وكلامه مبهج

وليه بس نعكشه .. بس تعرفي دي نعكشه حلوة اوي
يا ريت تنعكشي لنا كتير

دمت بكل سعاده

غربتي

 

حلوة بشكل
فظيعة
وحشتينى يا لولو

ربنا يزودك بكل خيييييييييييير

 

جميلة جدااا
و تمبلت البلوج جميل و رقيق جدااا
مبرووووووووك :)

 

ربنا يارب يسعدك كمان وكمان

انا بتجيلى لحظات ببقى عايزة اطير فى السما على رايهم شايفة الدنيا وردى

بس بجد جميلة واحساسها عالى

تحياتى

ايمى

 

بجد بجد عجبتني قوي

تحفة فعلا

او لأني بحب الطريقة دي في الكتابة قوي


تحياتي

 

حلوة فى احساسها
بس ايه هروشك ده
:D

 

عايز اطير
تل هموم مكتومة
قاعد ساكت
الجرح صعب
دى كمان حالتى بس ايه العك الجامد ده ياريت تعوكى على طول ياري تنورى مدونتى المتواضعه

 

الله مش عك خالص حلو أوي عادة بزهق من الحاجات دي بس دي كملتها
أتمنى أبقى اشوف تعليقك عندي وأكيد لو دة عك بتاعي يبقى شخبطة ولخبطة

 

كلماتك جميلة زي عوايدك يا نعكوشة
عجبتني اوي القصيدة

معلش انا اتأخرت في الرد عليكي
بس الدنيا عندي كانت ملخبطة شوية
اعذريني بقي
مستنية جديدك قريب ان شاء الله

تسلم ايديكي يا قمرة

 

طيرى براحتك يا نعكوشه
انا جيت امضى انى وصلت مدونتك بسلام
هاخد جوله ورجعالك تانى ماشى؟؟؟؟

 

الله .. أنا كمان و الله نفسي أطير يا نعكشه ..!!

 

أحلى حاجة ان الواحد يطير وميفكرش

كل لما تحسي بجناحاتك طيري

البوست رقيق وفي طفولة جميلة في كلامك

عايزة اقولك ان العك اللى انت كاتباه حلو قوي

انا اول مرة ازورك
وان شاء الله هقرأ مدونتك

 

يا جامد يا بتاع الطيران انت
اوعى وشك لأخضك

بس قوليلى حتهبطى إمتى علشان افرشلك ملاية على الأرض ههههههه

لا بجد جميل اوى كلامك و كله براءة
زى ما انتى نعكوشة و عسولة و زى القمر

تسلم ايدك بجد يا قمراية

 

السلام عليكم ورحمة
الله تعالى وبركاته
انتى لسه طايرة ؟
طيب حتنزلى امتى ؟
منتظرينك العيد قرب
كل سنه وانتى بالف خير

 

ياااااااااااااااااااااه اخيرااااااااا شفت حد بيحلم حلمى .....
روووووووعة ويلا نطير سوا :)