نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

أنا مريضة

تحديث:

أولاً أنا لا أناقش هل أنا كويسة ولا مش كويسة .. كل انسان فيه عيوب و مميزات.. و محدش شاف أفعالى فى العلن و الخفاء عشان يقيم هل أنا كويسة او لأ
ثانياً انا مش ببعد اى شخص عنى .. انا ببعد الناس اللى بحسهم قريبين من قلبى
ثالثاً انا افعالى فى ابعادهم عنى فى البداية غير منفره .. فقط أبتعد .. فلو لاقيتهم متمسكين بيا ببدأ ءأذيهم عشان يبعدوا
رابعاً انا كنت فعلاً طول عمرى بكبر و مبتفرقش معايا بس أكتشفت إنى بخسر .. لإنى اعيش وحدى رغم كمية المعارف و الصحاب ( الطيارى) المهولة ( اللهم لا حسد فى ديه كمان عشان تبقى كملت قلبا و قالبا) اللى عندى ..

..................................................

انا مريضة بداء ابعاد الناس عنى
او ان شئت تسميته بأذية المقربين إلى قلبى بهددف اقصائهم عنى .. دة لو مبعدوش عنى بالذوق ببعدهم بالعافية جتى لو اذيتهم او عملت حاجات تقرفهم منى...ـ

مش من حقى أبداً إنى ءأذى حد لا لشئ إلا لأنه حاول يقرب منى
لا لشئ إلا انه حاول يكون جمبى
لا لشئ إلا انه حاول يساعدنى و يخلينى افضل
إنه حاول يسمعنى من جواه
إنه فهمنى
إنه عاوزلى الخير
إنه بيحبنى

مش عارفة أنا بعمل كدة ليه .. و مش معنى الكلمة دى إنى ببرر لنفسى إنى أعمل كدة
أو إنى أحاول أطلع نفسى يا حرام ضحية المرض اللى عندى إن شئت أن اسميه مرض

أحب أقول لكل اللى اذيتهم
متخافوش إنتوا مش خسرانين حاجة أنا انسانة من جوايا مش كويس فاتكوا كسبتوا انكوا بعدتوا عنى
متخافوش ربنا هيعوضكوا عنى بحد أحسن منى خمسين مليون مرة
متخافوش ربنا هينتقملكم منى
متخافوش أنا بتوجع إنى ألمتكم أو وجعتكم برضو

بتوجع قوى لإنى مكانش نفسى أى حد ياذيكوا بس صدمتى إن أنا اللى اذيتكوا
بتوجع لإنى كنت محتاجالكوا .. قوى
بتوجع لإنى هفضل لوحدى .. بتجرع الألم..
هتوجع لإن فيه ناس تانية برضو بتقربلى و كل ما بيقربوا بفتكركوا..
و بقول هعمل فيهم كدة لما يقربوا منى برضو
بحاول ابعدهم برضو

متخافوش ربنا هيحاسبنى بالجامد لإن منكوا ناس ربنا بيحبهم قوى ..
عارفة انكوا مش هتقروا الكلام دة
بس حبيت اقوله يمكن حد يوصلهولكوا
لو حد عارف اصلا انتوا مين

انا مريضة و نفسى اعالج نفسى
مش عارفة اللى فيا دة اية؟
هل حب اذية الناس؟؟
بس انا مبحبش ااذى حد معرفهوش .. و مبنبسطش لما بأذى حد أعرفه
تقريبا انا بأذى نفسى باذيتى للناس المقربين منى


طب عند؟؟
طب انا بعند على مين؟؟
يعنى انا مش فاهمة
لما حد ينصحنى بحاجة عشان مصلحتى و اعند فيها
اية الغباء دة؟؟
ليه بعمل كدة
ليه لما بحاول اقول لا مش هعند
وهبقى حلوة
وهبقى مطيعة
وهبقى متواضعة
بلقينى اكتر قرفا و كبراً و غباءً و عنداً
ليه ؟؟؟؟؟؟؟؟
لية بعمل كدة فى الناس و فى نفسي؟؟

يمكن انا معنديش وفاء؟؟
طب هل الوفاء دة طبع؟؟
ولا شئ مكتسب؟؟
طب لو كان طبع ينفع اتطبع بيه؟؟
ولو شئ مكتسب ازاى اكتسبة؟؟

يمكن انا متكبرة فعلاً زى ما بيقولوا ؟؟
والله يمكن
رغم انى مش فاهمة فين بالظبط التكبر بس اكيد موجود مادام هما شايفينه
طب انا اعالج دة ازاى؟؟
هل ينفع اعالجة بنفسى ولا محتاجة طبيب نفسى؟

طب اللى اذيتهم دول
فيه ناس منهم انا مش فاكراهم
ماهو انا زاكرتى نيلة
المفروض اروح اقولهم ايه؟
انا اسفة؟؟
ططب اسفة دى هتفيدهم باية؟؟


ما كان قد كان
طب اقولهم اسفة ايه؟
اسفة انا بعدتكوا عنى عشان لاقيتكوا قربتوا بزيادة؟؟
عشان لاقيتكوا بتحبونى و تخافوا عليا؟

مش عارفة
اة صحيح
انا عارفة انى عيلة إنى فتحت المخروبة بتاعتى
بس انا فعلاً محتاجالها
انا فعلاً محتاجة اتكلم مع اى حد
فعلاً محتاجة افضفض
فعلاً حاسة انى بائسة و منعدمة
ومليش لازمة فى اى شئ

انا اسفة إنى فتحتها
بس خلاص بقة
يفيد باية الاسف
ملهوش لازمة

ربنا يرحمنى و يهدينى
و يستر

آه صحيح .. محدش يقولى تصالحى مع نفسك و يسكت لإنى مش عارفة اتصالح معاها ازاى؟؟
وعارفة إنى لو تصالحت معاها كله هيتعدل بس انا مش عارفة ازاى اتصالح معاها أصلاً..

ومحدش يقولى أقعدى مع نفسك و يسكت برضو .. لإنى قررت كتير اعمل وقفات مع النفس بس مبطلعش منها بأى شيء
ببقى مش شايفة غير اسود .. يمكن حتى مبشوفش حاجة .. بحس إنى قاعدة فى اوضة ضلمة .. يا ريت تقولولى اناقش ايه مع نفسى بالظبط لما اقعد معاها؟؟

اعتبرونى عيلة ..
اعتبرونى طفلة...
اعتبرونى فى جزء من الاعاقة الذهنية...
اعتبرونى معنديش خبرات....
محدش يعتبرنى انى بميز ولا حاجة .. يا ريت توضيح للحلول ..
ودمتم سالمين


شطبنا


سلام عليكم و رحمة الله و بركاتة
زي ما هوه مذكور في العنوان شطبنا هنا
أيون .. المدوننة مش هيتكتب فيها حاجة تاني إن شاء الله
يمكن افتح مدونة تانية في هذا العالم الالكتروني الفسيح و يمكن مفتحش
شكراً لكل حد اتعلمت منه أي حاجة وانا مش واخدة بالي

من حق أي حد يشيلني من على قائمة المدونات الالكترونية خاصته..
قد يتسائل البعض ليه هتقفلي المدونة و هقول ظروف برضو و مش هشرح ليه

أسئلكم الدعاء
و بشدة
.....................

ما عُدتُ صغيرة.


سألتني قبلاً لمَ تغيرتِ ؟!
ولم أجب..
لم أكن قد حضرت نفسي للإجابة عن هذا السؤال.

هاأناذا قد تهيأت للإجابة...
اقترب مني قليلاً...
أريدك أن تسمع همساتي عالية في أذنيك...
أريدك أن تحس طريقتي في قولها...
أن تتيقن منها بمجرد إطلاقها من خلف شفاهي...
لا تنظر إليَّ هكذا... أنتَ من جعلني ألجأ لهذا التغيير..
أنت من وجهني إليه...
تراك تتساءل ما بها تلك الفتاة؟
أتتعجب من هذا الكحل الذي يصبغ عيني سواداً..
أم من قميصي الحريري و تنورتي الوردية!..
أم من حذائي ذو الكعب العالي...
أتتعجب من نظرتي إليك..
وتسألني في براءة لم لطختِ وجهكِ بتلكَ المساحييق؟
نعم تغيرت.
ربما لم يكن تغيراً كاملاً ولكن لا يزال تغيرا..
صبوت إليه حين وجدت عينيك قد لمعت برؤية تلك المرأة...
تَََفَجَّر بداخلي حينما ربَت علي كتفي قائلاً في حنان : هوني عليكِ يا صغيرتي..
أتعلم لقد نسيت سبب حزني في ذلك اليوم .. و انفعلت عليك ...لا
أنا لستُ صغيرتك .. أنا ...
أقترب مني كي أفصح عن اعترافي..
سيخرج من بين شفتي صوتاً دافئاً حالماً ... تدربت عليه مرات و مرات
تعلمته منهن...

سيخرج محملاً بكل مشاعري التي أطلقت أنا سراحها...
أنا لست صغيرتك أيها العجوز...
أنا لستُ صغيرة...
ما عدتُ صغيرة ...
أنظر إلي جيداً..
ألا تراني قد أصبحت مثلهن...
أصبحت... أنثي ... تحمل كل المشاعر تجاهك..
لا تقل أنكِ مثلُ ابنتي ...ولا تقل أنكَ ستمنع تقربي منك..
سأقترب.. فلن تمنعني كلماتك.. ولا صياحك ..
و لن يعيقني عنك سوى سويعات نومي التي أكف فيها عن متابعتك لأهيم بروحك في أحلامي...


.............................
حكوك التبع و النشل محفوسة لنعكوشة

رسومات من جوة ( بالقلم الحبر )

حبة رسومات كدة بالقلم الحبر ...
محدش يسألني بتعبر عن إية عشان بتبقى حاجات كدهون نفساوية ...
لو حد برضو حس إن فيه صورة مأزياه ( مش عارفة بتتكتب ازاي) بس عملالة ازية .. مضايقاة يعني .. يقول
و لو صورة عجبته يقول .. المشاركة مش وحشة برضو
انا حطيت شوية تعليقات تحت كل صورة
لسة دلوقتي حاطاها
عادي يعني ممكن أي حد يحط تعليق
للعلم الرسومات دية برسمها وانا في حالة من اللاوعي تقريباً
فمش شرط يكون تعليقي تحت أي صورة هوه حالتي ساعتها
خدوا راحتكوا في نظرتكوا للصور
خدوا راحتكوا في التعليق على أي من الصور بغض النظر عن تعليقي
و من حقكوا برضو تقولوا انها معوقة
مبتضايقش
اة صحيح .. لو الصور مش واضحة دوسوا عليها كليك يمين و افتحوها في صفحة جوديدة عشان تبقى واضحة..

she is looking down , they are looking up

if she owns this world

sands, long hair , park's fountain , midnight ice cream , chips ,fake ceiling moon and stars , sitting over the window while her legs are down throughout it

being a loser

complicated mind

اقلع غماك يا ثور و ارفض تلف

multiple complaints


cuffed , Messy ,deep inside


comparison
being alone & with the dream guy



getting more black
was innocent
was shiny
was
becoming >>>>> still wondering
.............................

حكوك التبع و النشل محفوسة لنعكوشة
i had the worest ever Exam in my entire life
الحمد لله رب العالمين

..................

هكذا خلّفوني ورائهم..

سلام عليكم..
البتاعة طويلة..
لو حد فكر يعلق ..
يا ريت يكون فيه نقد .. سواء حلو أو وحش..
لو وحشة و مدهولة يقول ليه .. و لو حلوة يقول ليه برضو..
بس بلاش التعليقات المعوقة زي : تحفة .. رهيبة جداً .. مش معقولة..( بيبقى واضح تماماً انه مقراش البتاعة)
بس كدهو

............................
Text Colorهكذا خلّفوني ورائهم

وي وا وي وا وي وا وي وا
كان هذا الصوت المزعج هو صوت سرينة الإسعاف التي تقترب من بعيد ليزداد هذا الصوت توغلاً في الأذان فتنقبض له القلوب.
قالت بوهن و على وجهها علامات الفشل : مش قادرة أحركها خالص يا مامي..
هي ؛ فتاة في بداية العقد الثالث من العمر تقف على ذلك الفراش المترب خلف سيدة بدينة .. بادٍ عليها علامات المرض ... بعد أن فشلت تماماً أن ترفعها وحدها لتحركها قدر أنمله كي تستطيع السيدة أن تجلس وهي مرتاحة..
خلاص سيبيها ، الإسعاف جه أهوه .. و هما هيشيلوها بمعرفتهم.
سيدة في أواسط العقد السابع من الطبقة العليا من الطبقة المتوسطة .. رسمت الحياة على وجهها معاني الإرهاق و الكد ....
نزلت بحذر من على الفراش كي لا تخبط تلك القسطرة المتدلية من تلك السيدة المريضة لترتكز على الأرض البلاطية أسفله ..
قبلتها و هي تهمس في أذنها : استحملي الشوية دول يا طنط هما خلاص جايين و هيساعدوكي..
نظرت إليها فجأة بعد نظرة الشرود التي تملكت من عينيها : إيه؟؟؟
رفعت صوتها قائلة : هانـــــــت .. هما هيجو و ياخدوكي يا طنط ...
ابتسمت لها و التفتت إلى أمها ...
قطبت السيدة جبينها و هي تفكر فيما سمعته تواً ..سيدة في منتصف العقد الثامن .. زاد وزنها مؤخراً .. وجهها أصبح شاحباً و علامات المرض تلقي ترانيمها من حولها .. قديماً .. ليس بالزمن البعيد .. كانت تتحكم بالحياة .. تطلب هذه لتجيء . و تأمر هذه أن تطبخ .. و هي في شقتها .. كانت تتحرك كيفما شاءت .. ولكن كان الإكتئاب ينصب شباكه حولها محيطاً إياها بخيوطه البائسة الغبية بعد أن تركتها ابنتها وحدها مغتربة في وطنها ...لكنه تمكن منها بعد أن سقطت في الحمام لينكسر حوضها و تستسلم له تماماً .. رغم أن الأطباء قرروا أنها يمكنها المشي مرة أخرى إذا ما حاولت ...
قالت لأمها و على وجهها نغزات من الألم و الحسرة على مظهر خالتها : بس القسطرة دية يا مامي ممكن تنقلها العدوى .. هما ليه مش بيودوها الحمام تعمل هناك..
نظرت لها أمها بطرف عينيها و هي تحضر الحقيبة التي تحتوي على كل التقارير الطبية لحالة أختها : هيا اللي عايزة كدة!!!
شخص بصرها : يا سلام .. مينفعش تسيبوها كدة برضو حتى لو هيا عايزة..
لوت فمها قليلاً و هي تقول : ماحنا بندورلها على دار نضيفة عشان تحافظ عليها..
هنا دخل عمال الإسعاف ... رجال أشداء .. لا شيء سوى الزمن يغلف نظرات وجوههم ..
تحيطهم الجدية كالهالة ..
ظلت السيدة المريضة تتفرس فيهم و هم ينظرون إليها دون أي تأثر ... نظرت إلى ابنة أختها في استعطاف ...
أخفضت الفتاة بصرها...
قال بصرامة : بصي يا حجة .. هنقول واحد اتنين تلاتة و هنحطك عالكرسي .. خلاص ..
بسيطة ..
نظرت إليهم بحده .. و إلى أختها باستجداء ..
واحد .. اتنين .. تلاتة .. هوووب
وضعوها على ذلك الكرسي و حوطوها بالملاءات ..
قال لها : ربعّي إيدك يا ماما عشان متتحكش في السلم و احنا نازليين...
تحولت نظراتها إلى نظرات ترقب ...لم تسمع ما قاله..كلما نزلوا بها درجة من درجات السلم ..
شعرت و كأنهم يسحبون روحها ...
ضمت الفتاة يدي خالتها الواحدة فوق الأخرى و قالت : امسكي إيدك في بعض يا طنط عشان متتعورش..
وصلوا إلى سيارة الإسعاف ..
هناك .. كانت تقف السيدة الستينية مع زوجها و رجلٌ آخر هو قريب لهم ... كانوا يتناقشون في وجهة تلك السيارة ..
في هذه الأثناء كانوا ينقلونها من ذلك الكرسي إلى السرير الخاص بالسيارة ..
قال لها بجفاء : بصي يا حجة .. احنا هنقلك براحة بس انتي ربعي إيدك ..
لم تسمع شيئاً ... ازدادت نظراتها ترقباً ..
واحد .. اتنين .. تلاتة .. وضعوها بقوة و آلية على ذلك السرير ..
آلمها ذلك كثيراً .. تفّلتت دمعاتها التي احتبست طوال ذلك الوقت و تحولت نظراتها إلى الخوف ...
أكملوا عملهم و دفعوها إلى داخل السيارة ...
صرخت تلك السيدة و هم يغلقون الباب الخلفي للسيارة : أنا عايزة ابراهيم ... يا ابراهيـــــــــــــم
... متسيبنيش يا ابراهيم ..أجابها صوت من خلف السيارة : متخافيش يا حجة هما هيراعوكي .
انتحبت السيدة و قد غلف الحزن وجهها : كدة يا ابراهيم .. هتسيبني ليهم ..
قال عامل الإسعاف للفتاة العشرينية صيغة سؤال بلهجة آمره : هتطلعي انتي معاها؟!
انتفض شيء ما بداخلها ... شردت .. لم يطق الرجل صبراً : ها؟؟؟ ... أومأت برأسها .. و رفعت ساقها لتركب السيارة .. انقبض قلبها و لم ينبسط ... لم تركب سيارة إسعاف من قبل .. و لم تتعرض لهذا الموقف من الأساس قبل ذلك ..

على الجانب الآخر من السيارة قالت السيدة بصوت عال: عزة قالت إن المكان دة كويس .. أنا مش واثقة في عزة .. بس مينفعش نسيب حياة هنا ... أنت شايف تخنت ازاي .. ووشها كمان بقة أصفر قوي و دبلان .. .. الدار الأولانية كانت أحلى و محترمة و نظيفة و فيها رعاية طبية... أنا مش عارفة الدار اللي هنوديهالها دية شكلها إية...
قال أحد الرجلين و هو رجل في العقد السادس من العمر و يعلو جبهته نظارة ذات عدسات كبيرة جداً يستخدمها للقراءة : طيب و عزة مجتش ليه .. مش هيا اللي رجعتها بيتها ..
كانت على وشك البكاء لكنها تماسكت قائلة : أنا اتصلت بيها أقولها تعالي ساعديني تقولي أصل رجلي تعباني شوية ..أنا مش فاهمة هيا طلعتها من الدار ليــــه ؟؟ .. منك لله يا عزة .. حسبي الله و نعم الوكيل فيكي..
حوّطها زوجها بذراعه في محاولة لتهدئتها : إن شاء الله الدار دية هتبقى كويسة
نظرت إليه و في عينيها نظرات الرجاء و كأن زوجها هو من بيده ذلك : أنا نفسي بس تكون مرتاحة و في أمان و بين إيدين ناس أمينة و فاهمة بتعمل إيه؟؟
اقترب عامل الإسعاف من ثلاثتهم قائلاً : ها.. على فين إن شاء الله ؟؟
أخذه الرجل ليفهمه وجهته ... و يعطيه العنوان .. قرر أن يتقدم بسيارة الإسعاف و هم سوف يتبعونه ..
التفتت السيدة فجأة و هي تنادي : يا حنان .. انتي فين يا حنان.. حنااااااااااان ..
أجابت الفتاة من داخل سيارة الإسعاف : أنا هنا مع طنط يا مامي..
صاحت : طيب يا حبيبتي .. خلي بالك منها و من نفسك ...
سألت الفتاة الرجل و هو يغلق الباب الجانبي للسيارة : لو سمحت .. هوه مفيش هنا تكييف .. أصل الدنيا حر قوي عليها ..
قال ساخراً : آه طبعاً فيه تكييف.. و دخل إلى السيارة ليفتح الشبابيك...
نظرت إلى خالتها ثم سألتها : فيه حاجة وجعاكي يا طنط..
نظرت إليها في عتاب : يرضيكي كدة .. يبهدولني كدة يا حنان ...أنا عملت فيهم إيه عشان يعاملوني كدة ..
أمسكت الفتاة يدها قائلة : معلش يا طنط بس والله ماما عايزالك الخير..
ازدادت حدة صوتها و تغيرت نظرة عينيها إلى الغضب الممزوج بقلة الحيلة : خير فين في اللي بيعملوه دة .. حرام عليكوا يا ناس ... كل دة عشان ترتاحوا .. تعذبوني أنا .. عشان مش قادرة أتحرك .. سيبوني في حالي ... سيبوني في بيتي .. منكوا لله ..
لم تعلم كيف تجيبها .. هي خائفة الآن .. مترقبة .. مندهشة ولا تعلم كيف تجيب : يا طنط والله احنا خايفين عليكي و انا و مامي حاولنا نساعدك و معرفناش .. استحملي بس عقبال ما تعرفي تمشي و تبقي كويسة ..
أطلق الرجل العنان لسرينة الإسعاف فشعرت السيدة بانقباض شديدة في صدرها و هكذا شعرت الفتاة أيضاً ..

أحسن حل ليها إنها تسافر لبنتها هناك في أمريكا .. فيه هناك أحسن علاج و أحسن خدمة .. أنا فاكرة قبل كدة كان هيجيلها فشل كلوي و غرغرينا و عالجوها و رجعت تاني تمشي ... أنا مش فاهمة ازاي بنتها سايباها كدة .. و ازاي أصلاً تسفرها لمصر لوحدها ... مفروض بنتها تاخدها تعالجها هناك ... و خصوصاً إن بدأ يجيلها قرح ..أنا خايفة عليها قوي يا شاكر...
نظر لها زوجها و هو يقود السيارة : ماهو يا عفاف قالتلك إنهم معندهمش سيولة ..
أيوة يا شاكر بس حياة عندها سوشيال سيكيورتي و ممكن تتعالج هناك على حساب الدولة و لو بنتها دفعت حاجة هتكون حاجات بسيطة ... هيا مش خايفة على أمها ولا إيه؟
والله مانا عارف يا عفاف .. ربنا يعافينا ..
قال الرجل من مقعده الخلفي في السيارة : ربنا ما يحوجنا للزمن ولا يورينا كدة من ولادنا ..
تمتم ثلاثتهم آمين..
تابعت الطريق في هم ثم قالت بصوت لا يكاد يسمعه أحد سواها : ربنا يشفيكي يا حياة و يقويكي كدة وترجعي قوية زي الاول..
تابعت الشوارع و اللافتات من خلال الشباك المفتوح في سيارة الإسعاف .. كانت تمضي بسرعة في الطريق متفادية السيارات .. و كانت السيدة المريضة تتخبط بداخلها ...شردت الفتاة .. امتزج اللون البرتقالي مع الأحمر مع غيرة من الألوان ... و امتزجت الأصوات الخارجية ...
هيصة ... هيصة .. الفرخة بترقص مع الكتكوت و الديك بيبص عليه و هيصة .. هيصة

يابني حرام عليك..... هدي السرعة
لم يسمعها ....
جوجوجوجوجوجوجوووو .. يابا يابا يابا .. يابا يابا يابا ... ضم ضم ضم ضم ضم...


كان يمضي كالمجنون بسيارته تلك و بسرينته التي تفتح الطريق من أمامه ...
صاحت الفتاة مع السيدة : يا عــــــــــــم .. انت يا عم..
نظر إليها من نافذة صغيرة قائلاً بحده : نعم...
صرخت من الألم بعد أن انتفضت السيارة فخبطت ساقها بحافة السرير : هدي السرعة .. حرام عليك...
قال لها : حاضر.. و أغلق النافذة ..
حولت نظرها إلى الفتاة : يرضيكي كدة ...
لم تجب عليها و ابتلعت كلماتها في صمت و هي تتابع الأصوات و اللافتات في الطريق مع خلفية من صوت تلك السرينة المزعجة القابضة للقلوب...
وصلوا إلى تلك الدار .. ووضعوها هناك على سرير ملتصق بالحائط ...
مبدئياً .. لم تكن الدار كما وصفتها عزة لعفاف ...
رحل عاملوا الإسعاف .. و تركوا الفتاة مع خالتها في الغرفة..ظلت تحك يدها كثيراً .. من كثرة
قرص الناموس ...
وصلت السيارة الأخرى ...
لاحظت السيدة أنها ليست على مستوى تلك الدار الأولى التي كانت فيها ... و لكن رحل رجال الإسعاف .. كما أن الساعة شارفت على منتصف الليل و لن يتمكنوا من الوصول إلى أي دار أخرى في هذا الوقت ..
ركضت الفتاة على أمها و هي تقول : يامامي دية مليانة ناموس كتير قوي ..
نظرت السيدة للرجل قائلة : نامــــوس يا عادل..يعني ممكن ينقللها أمراض و هيا مش ناقصة... هيا دية الدار اللي عزة قالت عليها أحسن من اللي كانت فيها .. ولا فيها رعاية طبية كل يوم زي التانية .. حسبي الله و نعم الوكيل فيكي يا عزة..
أجاب في ارتباك : هي اينعم مش حلوة بس تنفع عقبال ما نشوف دار تانية ...
دخلت الفتاة مرة أخرى إلى خالتها لتطمئن عليها ... عادت إلى السيدة نظرات الشرود و قلة الحيلة ..
قبلت رأسها قائلة : هتقعدي هنا إن شاء الله كام يوم عقبال ما مامي تشوفلك دار أحسن ..
لاحظت الفتاة كائن مقزز صغير يمضي بجانبها على الحائط ... كادت تصرخ و لكن خافت أن ترتعب خالتها ..
انسحبت منها متجهة إلى أمها : مينفعش تسيبيها هنا على فكرة .. دة فيه صراصيــــــــــــر !!!!
كان الاستياء بادٍ على وجهها هي تقول كلماتها ...
نظرت السيدة إلى الرجل معاتبة ..
قال لها الأب : خدي العربية و هاتي حاجة للناموس و الصراصيير دية من أقرب صيدلية ..
دخلت السيدة إلى أختها قائلة في أسف : أنا عارفة إنك زعلانة مني... بس صدقيني يا حياة أنا عايزة مصلحتك..
اقتربت منها لتقبّلها فأشاحت بوجهها و هي تقول : الله يسامحك يا عفاف .. الله يسامحك .. كنتي تسيبيني في بيتي يا شيخة ..
أجابت و هي تحاول أن تمسك دمعاتها : يا حبيبتي أنا مش قادرة أخدمك.. انما هنا هتلاقي دكاترة و رعاية .. استحملي يومين بس و هنوديكي دار أحسن..
لم ترد عليها...
دخلت الفتاة و معها سائل القضاء على الناموس و أنبوبة تحتوي على مضاد للحشرات الزاحفة ...
حرصت على تركيب الأول .. ووضعت الآخر على المنضدة .
قبلت السيدة رأس أختها فتمتمت بصوت خافت بعد أن تسللت من عينها دمعة أخفتها بجانب وجهها : الله يسامحك ..
خرجت السيدة و بنتها من الغرفة بعد أن أطالت الفتاة النظر إلى خالتها ..
أكّدت على صاحبة الدار أن تراعيها ..
شعرت بانقباض في صدرها .. شعر النسوة الثلاثة بانقباض في صدورهم ..
استقلوا السيارة و رحلوا جميعاً ..
مخلفين تلك السيدة المريض وحدها فوق هذا الفراش الملتصق بالحائط...
...............................

حكوك التبع و النشل محفوسة لنعكوشة

انسلاخ


شعور مهيمن ( الانسلاخ أو السلخ)
خلفية بغيضة مرقشة ( الضغوط )
لا أستطيع الاحتمال رغم أني أحاول
أحتاج إليك يا الله
......................


محتاجالك قوي يا رب

انتظار


هي تحملق في النور المنبعث من آخر شمعة لديها..
كان يهتز رغم أنها أحكمت إغلاق النافذة
ظلت على هذا الوضع طويلاً
مبعثر من حولها الكثير و الكثير من الأوراق الممزقة
بدأ نور شمعتها يخبو قليلاً
لم تلحظ ذلك...أو ربما لاحظته و لكنها لم تغير من نظرتها إليه
يرتعش بحدة معلناً لفظه آخر أنفاسه
أغمضت عينيها ثم فتحتها
نظرت للأسفل ..
التقطت واحدة من الأوراق الممزقة...
نظرت إليها مطولاً
قربتها إلى أنفها
استنشقت رائحة الحبر الأسود
اشتمت رائحة العرق الذي غلف القلم الذي كُتبت به الكلمات
باعدت ما بيت أصابعها بحركة تلقائية فهوت الورقة من بين أصابعها
تابعت سقوطها حتى ارتكزت على الأرض الخشبية
خَفَتَ النور أكثر
اقترب حاجبيها و تجعد الجلد فيما بينهما
انطفأ النور
ظلام دامس
وقت يمر
صوت ضغط على زر الولاعة
أضائت الحجرة قليلاً
قربت سبابتها الأيسر من يدها اليمنى الممسكة بالولاعة
ثنت رقبتها قليلاً إلى جهة اليسار و هي تنظر إليه
في عينيها الغائرتين نظرة متبلدة
ربما هي لا تشعر بأي شيء
و ربما نفذت طاقتها فلم تعد تستطيع رسم التعابير على وجهها
أشعلت النار في إصبعها
تركته منتصباً إلى أعلى ليحل محل شمعاتها المنصهرة
قربت إليها قطعة أخرى من الورق الممزق
قرأت ما كُتب فيها
قبّلتها
و عادت لتنظر إلى الخواء
.............................

حكوك الطبع وا لنشل محفوسة لنعكوشة

(سفينتهم) و شوية عك آخر

with each new sunrise life begins anew
الجملة دية كانت دايماً مكتوبة على القلم الأسود بتاعي
مخدتش بالي منها غير من يومين
القلم خلص امبارح
خلص وأنا بكتب البتاعة دية

............................

لا أحتمل أن أكون هكذا..
لا يمكنني الاستمرار..
وكأنني أمزق...
لا يمكنني أن أبق ولكن لابد من أن أفعل..
سأتحامل على نفسي كي أظل هنا...
معهم ..
حتى لا أنجرف مع تيار نفسي...
أشعر وكأنني ممسكة بكلتا يداي بحافة سفينتهم ..
لست على سطحها..
بل متعلقة بها بينما هي مندفعة لتشق طريقها في ثبات..
إذا ما تركتها سأسقط في هذا البحر وحدي ..
ليس بحراً كالذي أعشقه .. بل هو بحر من الضباب ..
الغيوم ..
والكثير من الرياح المتضاربة...
هذا الوضع الذي اتخذته مؤلم حقاً...
الكثير من الألم العضلي و النفسي أيضاً..
أن تبقى متمسكاً بتلك الحافة بأقصى ما يمكنك بينما تصارع التيار الهوائي المعاكس لك..
يلطم وجهك .. و يستمر في ذلك...
تحاول أن تسترق السمع ...
أن تحظى بما تستطيع أن تحصل عليه خلال قربك من هذا الجمع المهيب..
ذراعك يؤلمك كما يؤلمك كفيك و نفسك أيضاَ تئن..
مليء أنت بالغبطة و التمني و الرجاء..
ليتني أستطيع أن أكون معهم على سطح هذه السفينة..
ليتني أنعم بما ينعموا به..
ولكن ..
لا يمكنني الدخول..فأنا لست مؤهل لهذا المكان..
فهذه السفينة لها قدسيتها ...
وهناك سمت تراه واضحاً على كل من يقطنها..

ذراعي يؤلمني...
قشعريرة .. ناتجة عن دخول الهواء بحدة إلى أذني و سماعي لما يقولونه بالداخل.
عيني .. لا أستطيع أن أفتحها من شدة اندفاع الهواء تجاهها...

تراودني نفسي على أن أترك يداي..
أن أسبح وحدي ..
في نفس الاتجاة..

خبيثة هي حقاً .. تعلم متى يمكنها أن تضغط علي..
ولكني أجيبها في وهن و قوة : لا يمكننا أن نتركها فهي أملنا في النجاة ..
فأنا وحدي لن أذهب بنفس السرعة في هذا البحر المخيف...
وربما لا أذهب في نفس الاتجاة فليس معي بوصلة...
كما أنني ربما .. ربما .. في يوم من الأيام أنعم بشرف الصعود إلى تلك السفينة


...................
هنا خلص القلم
بس أنا مخلصتش
.............................

اكتشفت ان فيه ناس تقدر تحمل عليهم وناس لأ.
مش عشان الناس بتوع ال لأ وحشين ولا حاجة .. بس عشان مش واخدين بالهم او مش فارق معاهم..

فيه ناس كمان بيطلعولك كدة في وقت الزنقة .. مبتشوفهمش أو مبتحسش بقيمتهم إلا فيه...
..................

مانتي ياختي فالحة أهوه و بتعرفي تشتغلي و تسهري و تصحي من بدري عشان تخلصي اللي عليكي..
..........................

مبحبش حد يفضل باصص عليا.. بتحرج .. بتضايق ... بحس شعور غريب باني مش مظبوطة و مش مبسوطة..
..................

لما بشوف نفسي وأنا بكتب بحس بالعبقرية و الشموخ ولما بقرأ اللي كتبته بحس بالهبل و العبط..
.........................

نهر بلا شطآن : ابراهيم خريط 27 فبراير 2009 .. رواية بائسة .. يخربيت الواقعية المكئبة ...اسلوبها حلو و مخليتنيش أسيبها إلا لما خلصتها ... الاحداث داخلة كدة في بعضها و يوديك و يجيبك في الحاضر و الماضي.. معجبنيش المضمون .. واقعي قوي ..
.................
الخيميائي .. كيميائي .. سيميائي .. عامتاً 2 مارس 2009 .. برغم إني معرفتش يعني إية العنوان إلا اني فهمت انه حد ليه علاقة بالقدرات الكونية ...فيه كذا حتة معجبتنيش تتعلق بالمعتقدات .. بس عادي يعني كل كاتب و ليه شطحاته ...
المضحك في الموضوع هوه النهاية بتاعتها ...
صحيح نفسي أعرف إزاي هيتجوز فاطمة و هيا مسلمة ؟؟؟ هيأسلم يعني؟؟؟
القصة كويسة

أنا رجل .. باولو كويلو برضو ......... الإعاقة

إبن فطومة ..أول رواية أمسكها بين إيدي لنجيب محفوظ ... واحدة صحبتي ادتهاني ... بتفكرني بالحياة .. برغم إني مفهمتش النهاية العجيبة اللي نهاها بيها ..
عقليتي لا ترقى برضو ..

قشتمر : كان نفسي جداً .. موت .. أجيب آخر رواية طويلة كتبها نجيب محفوظ ...
عجبتني جداً .. أحداثها تحسسك بكلمة .. يااااااااااااااااااااااااااة .. الناس دية عاشت زمن ...
أحلى حاجة عجبتني فيها .. إن كل واحد من الصحاب مختلف برغم من كدة بيحبوا بعض جداً..
برغم إني معجبنيش بطريقة رهيبة .. بس الشخصية اللي حسيتها راقية فيهم هيا الكاتب الصحفي .. مش فاكرة اسمو عشان قريتها من زمن..
جيبتها من مترو الانفاق .. مكتبة الاهرام ... وانا رايحة الأوبرا..

أيامي الحلوة : الأبنودي .... كان نفسي يبقى ليا زكريات كدة أحكيها .. و كان نفسي قوي أعيش في الصعيد شوية .. و كان نفسي يبقى لينا أرض زراعية .. و حمارة و جموساية و معزة و بقرة و شوية بط و كمان أرانب .. و حصان صغنون .. أأكله السكر بإيدي و أركب عليه و نجري مع بعض لبعيد .. و آكل الدرة المشوي بليل بعد ما ألسوع نفسي وانا بشوية .. و أطلع أنتا و اللي معايا و نروح على الحقل نلقطلنا برتقان و مانجة ... و في العصاري نمصمص القصب التخين المليان ماية دة ..
كان نفسي كمان وانا صغيرة أطلع النخلة .. و أشوف القرية من فوق ..
و كان نفسي و كان نفسي و كان نفسي كمان...

a scent of a woman 5-3-2009
لألباتشينو ... حسيت إني نفسي أدخل جوة الفيلم و أعيش أحداثه .. بجد
...........

أحياناً أسئل نفسي سؤال أعلم أنني لا أستطيع في وقتي الراهن أن أجيب عنه بصدق .. ماذا تريدين من هذه الدنيا؟؟؟
لن أجيب إلا وأنا واثقة من اجابتي..
فقد كرهت نفاقي لنفسي ..

.................
يراودني سؤال : هل لرحيق الأزهار هدف آخر غير امتاعنا بفحواها و اغرائنا لإلتقاطها؟؟؟
................
من حقي أتقمص الدور
مش مدونتي
ولنفترض إني كدة
برغم إني على النقيض من الجمل اللي جاية دية
خزعبلات نفساوية :
- هناك بعض الأشخاص أو الأشياء التي لا أستطيع العيش من دونهم.. ينقبض قلبي و سينقبض إذا ما رحلوا .. روحي الكامنة في جسدي ستفقد برائتها حين فراقهم .. و ستفقد احساسها بالأمل ... ستفقد الحياة نفسها ... (يا شيخة)

- أنا لا أخاف من الفشل .. لا أهرب منه ... بل أواجهة و أصارعة بضراوة.... ( ياااااة)

- تغلفني السكينة و الطمئنينة أينما ذهبت ... أشعر و كأنها وشاح على صدري ... أجنحة ملتصقة بظهري .. أصعد إلى العلا متى شئت .. هناك حيث القديسين و الشرفاء... حيث النور ... حيث أجد نفسي الحالمة... أتنفس هواءً عليلاً .. يندفع إلى داخل نفسي النقية و يخرج منها كشعاع من النور
. ( يا سلام)
مجرد أوهام

......................

يلا كفاية زهقت
هروح أكمل ترويق الأوضة

سلام

آه صحيح

حكوك التبع و النشل محفوسة لنعكوشة

تعبت

كنت رايحة أذاكر أطفال
لاقيتني برسم ديه
أنا أول مرة يجيني الاحساس دة: أنا عايزة انجح عشان والدي تعب معايا قوي
BIG T - O - Z for me
مبقاش يهمني اني هبقى مبسوطة لو نجحت
كان نفسي أكون مدخلتش الكلية دية ولا دفّعت والدي كل الفلوس دية عشان والدي ميعلقش آمال على واحدة ملهاش لازمة
أنا مستاهلكش يا بابا
خايفة لو سقطت عشان مبزاكرش إنت تزعل
مش هزعل على نفسي .. أنا هفرح فيها عشان تستاهل
بس إنت متستاهلش مني كدة
نفسي أقدر أقوم من تاني و ازاكر عشانك
انا عارفة إن فيا طاقة
المشكلة مش في الكمبيوتر لإني لو مقعدتش عليه هقعد مع نفسي ومش هعمل حاجة
ولو مقعدتش مع نفسي عشان مؤرقة.. هقعد على التلفزيون اللي بكرهه
المشكلة فيا أنا
منا في ثانوية عامة كنت طول النهار فاتحة الكمبيوتر بس كنت بسيبه شغال و بزاكر
أنا آسفة
..................


تعبت

تعبت قوي كمان

عارفة اني فيا العبر
و اني مستاهلش رحمتك
واني ولا حاجة وسط مخلوقاتك
واني أبشع واحدة في العالم
و إن أخلاقي بذيئة
وإني ضالة عن الطريق الصح
وإني كل مادا ببعد
وإني مليانة عيوب
وإني بخطيء كل شوية
و إن ذنوبي تلال
و إني مستاهلش أعيش أصلاً
و مستاهلش لقب مسلمة اللي محوطني
ولا اللبس اللي لابساه
ولا كل النعم اللي انت مديهاني
ولا أمي ولا أبويا
ولا حنانهم عليا
ولا أخواتي
ولا كليتي ولا علمي
ولا شكلي
ولا عيني ولا كل عضو خلقته و سخرته لخدمتي

انا مستاهلش أي حاجة
بس أنا مش عايزة دول كلهم و عايزة أحس إنك بتحبني يا رب
إني أستاهل إنك تحبني
إني أكون عبدتك بجد
إني مقولش مليون كلمة دلوقتي
و اقول تبت
و اجي بكرة و ابقى انيل و احقر خلق الله
و انافق و أرائي
كرهت نفسي يا رب

نفسي أبقى انسانة بتحبها
مسلمة حلوة

بكره كل حد بيقولي إني طيبةةةةةةةةةةةةةةةةةةةةةةةةةةة
أنا مش طيبة
أنا بمثللللللللللللل
أنا بمثل
أنا بمثل
أنا بمثل

سيبوني في حالي بقة
مش عايزاكوا

مش عايزة حاجة من حد
محدش يقولي إني حلوة ولا إني أستاهل الخير

محدش يعرفني

أنا جوايا طاقة ابقى انسانة كويسة و حلوة
بس مش قادرة ابقى كويسة و حلوة

ممكن انزل و اجري و اخرج و اعمل

بس مبزاكرش عشان ارضي والدتي ووالدي

وبصلي الفرض عشان فرض

بقول بحب ربنا وانا مبعملش حاجة

محدش يقولي طب ما تعملي

مش قادرة
انا حاسة إن فيه اغلال عليا محوطاني
انا حاسة اني ملزوقة في الارض
حاسة إن عقلي عليه غشاوة
قلبي عليه غشاوة

نفسي تقويني على طاعتك
نفسي ابقى انسانة كويسة
استاتهل رحمتك
استاهل نعمتك عليا
اني ابقى مسلمة بجد

نفسي مفضلش أقول نفسي و أعمل بقة
و ابقى حلوة بقة

عشان تعبت
i cannot go closer
i cannot do my best
i cannot adapt it
i just wanna die
why it's forbidden :((

i don wanna take the next breath
i wanna die before saying goodbye to anybody
cause i don care about anybody
and nobody would be interested to saygoodbye to me
if you don love me i don care if anyone would love me
i really don care
but unfortunately you don't
and i don't deserve your mercy
but i cannot continue without it
send your blessings to me
cause i don wanna live again

i wanted to be better , but seems i've to be always bad
i cannot continueeeeeeeeeeee

come on

can't i die , please

please

i can bear any disaster in my life but not in our relation
please , help me to get closer
please

i cannot withstand this life

anybody would say am a big liar if i said i luv you

but i swear i do

i just cannot do my best

help me to do my best

i hate this life

i hate me because am dipped into it

i wanna sleep
don wanna wake up again

i tried to be good
but am not good

i tried to treat them Good
but it's not my real me , cause am not good

i cannot control my me

she is so string and tricky
am weak
am awful


i've to be burnt out in hell

i donno whyyyyyyyyyyyyyyyyyyy am doin thisssssssssssssssss

i donno why i cannot controllllllllllll my self

i donno why i cannot be gooood

why i've to be disgusting like this

am fed up with me

please help me Allah

help a poor little tiny girl in ur universe
she is living mesirably because you don't love her
please love me

GO TO HEll MARYAM
just go to hell
am fed up with you

أنا جبت قماااااااااااااااش


أيوة.. كيك شوكولاتة ... شاي أخضر بالنوعناع.. نوستالجيا للعم يانّي...
انا مبسوطة قوي
منشكحة
أنا كنت قايلة إني مش هكتب حاجة تاني بعد بوست العصفورة
بس مقدرتش محكيش لمدونتي على امبارح
أصلي اشتريت قماش..
طب و فيها إيه يعني .. ما مصر كلها اشترت قماش
لأ أنا أول مرة في حياتي أشتري قماش
و بعدين كنت رايحة لوحدي
و بما إني لوحدي
يبقى هكتشف حاجات جوديدة
يعني هبقى مبسوط مع نفسي
طيب طيب
بدايتا و كما قلنا سابقاً إني عرفت من شخص ما كيف تكتب بس هيا كدة بدايتاً
البتاعة دية طويلة
و انا كاتباها للتذكرة ليا ... عشان منساش حاجة
و مكسلة كالعادة أكتبها في الاجندة
ومفيش تعليقات
يعني خدوها من قصيرها و مش لازم تكملوا....

من يومين ( م) صحبتي جاتلي و قالت : عايزين نجيب هدية ل ( م2) ...
أنا : ليه؟؟؟ ..
(م) : يوم ميلادها .. هنحتفل بيه يوم الخميس .. بس مش عارفين هنحتفل فين

أنا : أقولك مكان تحفة ؟؟؟
( م) قولي ...
أنا : بيت السحيمي ... رهيب يا بنتي .. بجد أنا أول ما دخلت الجنينة أول مرة أحس في حياتي إني دخلت الجنة .. جنة الأرض .. سبحان الله .. الجنة اللي في الاخرة هتبقى عاملة ازاي ...
( م) : أيوة أنا روحتو و عملنة حفلة للاطفال الصغيرين هناك ..
أنا : خلاص أوك نروح..

بالمناسبة أنا روحت بيت السحيمي دة .. تحفةةةةةةةةةةةةةةةةةةةةةةةةةةةةةةةةةةةةةةةة ..لازم تروحوه .. بجد بجد .. هبقى أجيب صور و أتكلم عنه بعدين ..
المهم
يوم الاربع
( م) : محدش لم فلوس للهدية و بعدين أنا تعبانة قوي و مش هقدر أروح و اشتري ل ( م2) الهدية ...
أنا : مممممممممم يعني فركش؟؟؟ ...
( م) : مش عارفة بس أنا مش هقدر أروح ...
أنا : هوه أنتو كنتوا هتجيبولها إيه أصلاً ...
(م) : هنجيب قماشة تعملها عباية و قماشة تعملها إيشارب و شنطة حلوة و تورتة ..
أنا : طيب ما تجيبولها كتاب ...
( م) : بصي يا بنتي .. الواحد بيجيب الهدية اللي تفرح اللي متجابله هدية .. وانا عارفة م2 هتفرح بدة
أنا : طيب مانجيبلها فازة كريستال ولا كاسات زي ما جيبنا لبنات في العيد ميلاد اللي فات ..
(م) : لأ أعتقد إن م2 .. مامتها مظبطاها ...
أنا : مممممممممم .. طيب خلاص أنا ممكن بكرة أروح أجيب القماش .. بعد الكلية .. هوه أنا هجيبة منين.؟؟؟
(م): ربنا يخليكي يا نعكوش ... والله أنا لو كنت قادرة كنت روحت .
أنا : يا بنتي مفيش مشاكل
( م3) : أنا ممكن آجي معاكي .. هسأل والدتي و لو وافقت هاجي معاكي
أنا : ربنا يخليكي يا م3 .. أصل أنا فاشلة في حكاية القماش دية .. و عمري في حياتي ما جبت قماش أصلاً.
(م) : طيب و الفلوس .. أنا مش قادرة ألم .. و مش هلم ..
أنا : خلاص أنا هلم ... مين اللي هنلم منهم ..
(م) : إحنا عشرة تقريبا ..
كتبت اسمهم و اشتغلت أكني محصل بقة و هاتي الشلن اللي عليكي و حركات

.......................

يوم الخميس

حضرت درس الاطفال الساعة 7 الصبح .. بجسمي بس لإني كنت نايمة تقريبا .. هع هع هع .. يلا تتعوض
المهم
طلعت منه على الراوند خدنا ال
IMCI
اللي هوه رعايةو الامومة و الطفولة ..
و اتفرجنا على شوية فيديوهات حلوة كدة
و قعدت أصور في العيال صحابي في الراوند

و بعدين طلعنا عالمحاضرة..
طبعاً الغياب اتاخد
وبعدين سمعت المحاضرة بقة
مش فاكرة كانت بتحكي في اية
تقريبا
آآآآآآآآآآآه
كانت بتتكلم عن العدوي اللي بتصيب الاطفال أول ما يتولدوا
المهم يعين سمعت المحاضرة و قعدت أصور في نفسي ... من كتر الملل .. ساعتين بقة واحنا متعودين محاضراتنا دايما بتبقى ساعة واحدة

و الوقت كان فيه بركة رهيييييييييييييييبة .. الساعة مكانتش بتتحرك خالص...
و انام و أصحى و هيا شغالة ترغي
و أركز معاها و هيا ترغي
و أصور في نفسي و هي ترغي
بس والله قالت كلام حلو

المهم يعني خلصت المحاضرة .. و لاقيتني عايزة أعمل حمام
قبل سنة تقريباً .. كان مهما حصل مكنتش عمري أدخل حمام برة بيتنا ..
انا أصلاً كان مرة فية يوم كان عليا امتحان وكان قبل الامتحان ساعتين.. دخلت الامتحان و خرجت من نصه عشان اعمل حمام في بيتنا
بس بعد ما درست في طب
و عرفت الامراض اللي بالهبل اللي بتنتقل عن طريق الحمامات
بقيت استخدم الحمام
لأ طبعاً .. في اختراع كدة اللي هوه البتاعة البلاستك دية اللي بتتحط على السييت بتاع الحمام..
مفيدة جداً .. منعاً للقرف.. و في المواقف الحرجة

المهم يعني
الحمام مكانش شغال المايّة فيه ..
قمنا نادينا الدادة عشان تشغللنا الماية ..
وأنا واقفة لا بيا ولا عليا
الدادة راحت تشغل الماية
و كانت سايبة الشطاف مفتوح
فجأة أول ما فتحت المحبس
انطلق الشطاف فيا .

أيوة فيا أنا

يععععععععععععععععععععععععععععععععععععععععععععععععععع
أنا كنت هعيط
الدادة قالتلي : يابنتي دية ماية نضيفة
نضيفة مييييين
يا ماما.. عايزة أستحمى...

تقريباً قعدت أغسل في القميص وانا واقفة
لحد بقة منظري خارجة من تحت الدش و القميص كلة مبلول

غسلت القميص و اتوضيت و رحت أصلي الظهر ... و بعدين قررت أنطلق عشان أشتري القماش بقة
كان فيه شوية بنات بيتكلموا عن القماش في الجامع
قمت ماسكة فيهم ::
أنا: لو سمحتي .. هوه انتو بتجيبوا قماش منين
البنت : من الوكالة ..
أنا : فين الوكالة دية ..
البنت : في وسط البلد مش هعرف أوصفهالك .. هيا بتتراح بس
أنا : طيب حضرتك تعرفي ازاي أروح الازهر
البنت : تروحي ميدان البعاسية و من هناك تركبي أي حاجة رايحة السيدة عائشة و تنزلي الغورية
أنا : الغورية؟؟؟ أنا عايزة أروح الأزهر
البنت : ماهو الحتة اللي بتبيع قماش فيها اسمها الغورية
أنا : قشطة .. تسلمي ربنا يخليكي..
سلام عليكم

و طلعت فوق
سلمت على الدادة
كنت عايزة أرغي معاها بس كان لازم اروح اشتري عشان ارجع بيته بدري
قولتلها ادعيلي يا دادة ألاقي قماش حلو للبنت عشان أنا مبفهمش في القماش .. دعيتلي دعوتين حلوين ومشيت أنا بقة

آه صحيح ..
م3 مجتش معايا عشان انا طلعت جري من المحاضرة .. و كنت عاملة الموبايل سايلنت .. عقبال ما شوفت الموبايل ... و اتصلت بيها .. كانت روحت بيتها .. المهم

انطلقت إلى ميدان العباسية وانا قاعدة أقول
الغورية
الغورية
الغورية
روحت سألت عم الحج بتاع الموقف : لو سمحت هوه أنا لو عايزة أروح الغورية أركب إية؟؟؟
تركبي ميني باص 9 من هناك
طلعت و استنيت كتيييييييييير إني ألقي 9 دة .. ولا عبرني
قمت روحت للكشك التاني بتاع المحطة :
أنا: سلام عليكم
هوه: أيوة
أنا :لو سمحت أنا عايزة أروح الغورية أركب إية ..
هوه :بصي إنتي تركبي 501 أو تسعمية و حاجة او أو أو أو .. كذا رقم كدة قالهم و تنزلي عند شارع بورسعيد
أنا : شارع بورسعيد مين يا عم أنا عايزة الغورية .. بص بقولك .. أنا عايزة أروح الازهر
الراجل بتاع المحطة : انتي عايزة إية بالظبط..
أنا : بص أنا عايزة أروح الشارع اللي في الازهر اللي بيبيع قماش
الشاي الاخضر بِرِد :((
قالي: طيب يا بنتي مانا بقولك اركبي الاتوبيسات دية و هتنزلي محطة الموسكي تروحي الازهر
أنا : الموسكي؟؟؟؟
قالي :: هوه انتي من هنا؟؟
أنا : أيوة
قالي : ماعمركيش نزلتي مع ماما الموسكي
لأ
قالي- ولا نزلتي لوحدك الموسكي
لأ
- قالي:أومال لما هتتخطبي هتتفسحي فين؟؟
أنا بصيتلوا بازبهلال كدة .. لما اتخطب أتفسح في الموسكي :| .. ليه يعني؟؟؟ .... و قولتلوا : لما يبقى يجي نبقى نشوف هنتفسح فين...
الراجل : بس لازم تبقي عارفة عشان لما تتخطبي متسأليش
أنا : مالو السؤال .. اللي يسأل ميتوهش
للعلم الراجل مهكع و كحكح و مفيهوش نفس .. و شعرة أبيض و عنية داخلة في جمجمتة .. يعني مفيش أي احتمال 1% يكون بيعاكس
الراجل قالي : لأ يابنتي عيب لما تبقي معاكي خطيبك و تسألوا ..
أنا : يا عم خطيبي مييييييين بس .. هنبقى نسأل أنا معنديش مشاكل .. والله مفيش مشكلة .. قولي بس فين شارع بورسعيد دة في العالم
الراجل وهوه بيبصلي بإزبهال المرة دي : فين شارع بورسعيد في العالم :| .. هوه انتي مش عايشة هنا
أنا : لأ .. مش عايشة هنا .. أروحو ازاي بقة ؟؟؟
الراجل :يا بنتي .. أنا شايفك زي بنتي ولازم تبقي واعية .. المهم يعني .. تركبي الارقام اللي قولتلك عليها دية .. و تقولي للسواق .. محطة الموسكي .. و لما تنزلي ألف مين يدلك على الحتة بتاعة القماش دية ..
أنا : شكراً .. سلام عليكم

.. طبعاً بما إني جربت مرة أسأل الكشك الأول و قالي أرقام و مجتش .. قمت متصلة ب (م) ..بقولك إية الراجل .. قالي على ارقام اتوبيسات بتودي الموسكي .. ينفع اركبها دية .. اسئلي مامتك كدة ...
(م) : ايوة تنفع .. طيب ما تركبي تاكسي ..
صراحة مكنتش عايزة أقولها إني بحب أركب المواصلات ولا إني بحب أجرب الحاجات الجوديدة .. فقولتلها : لأ معييش فلوس
المهم يعني قولتلها ادعيلي ألاقي الاتوبيسات دية .. أنا مكملتش الجملة لاقيت 501 في وشي.. قولتلها بركااااااااااتك و قفلت معاها و روحت أركب

كان فاضي طبعاً بما إننا في الموقف
قمت منقية كرسي من اللي هما لشخص واحد لوحدهم دول مش كرسي لشخصين .. و نقيته قدام عشان لما آجي أنزل .. مافعصش في البشر و تحصل عمليات الاحتكاك و الالتحام البشري اللي بقرف منها دية..

المهم
ركبت و الراجل بدأ ينطلق .. قمت مطلعة كتاب لإبن تيمية أخويا كان إداهولي
diseases of the hearts & its cures

و قعدت أقرا بقة ..
قوم إييييية..
الأتوبيس بدأ يُعبأ بالناس ..
حصل حتة موقف كدة .. هحكية مش فشخرة ولا بتاع بس هحكية عشان أكتشفت حاجة
أنا بطبيعة الحال .. لما بلاقي واحدة ست كبيرة قد والدتي مثلاً أو راجل كبير بقوملهم .. عادي يعني
المهم طلعت ست كدة قومت قولتلها اتفضلي
قالتلي : إنتي نازلة ..
قولتلها : لأ .. و ابتسمتلها ..
قامت قايلالي : ربنا يباركلك
الحلو بقة
و اللي بسطني جداً
إني أول ما عملت كدة
لاقيت الراجل اللي قاعد ورايا قام و قعد بدالة ست تانية كبيرة
و البنت اللي كانت قاعدة على الكرسي المقابل ليا قامت و قعدت بدالها راجل عجوز
صرااااااااااااااحة . أنا انشكحت بس طبعاً مبينتش دة .. و سندت ظهري على البتاعة اللي ورا السواق و قريت في الكتاب
بعد شوية .. البنت اللي كانت قاعدة في الكرسي اللي جمبي قامت
قمت قاعدة مكانها ..
دقيقة فاتت .. قمت لاقيت ست كدة قد والدتي جاية و مبتسمة في وشي .. قمت قولتلها : اتفضلي .. قامت قعدت على الكورسي
و قالتلي .: هاتي شنطتك ..
قولتلها لأ الشنطة مش تاعباني خالص ..
عشان كانت شنطة من اللي بيتلبسوا على الظهر .. اللي باتنين حزام دية..
المهم
برضو أول ما عملت كدة لاقيت حد كان قاعد على كورسي قام لواحد عجوز و قعده ..

اكتشفت إني مش لازم استنكر إن حد بيعمل حاجة غلط .. يكفي إني أعمل قدامه حاجة صح و هوه هيفتكر
يعني مثلاً لاقيت طفل صغنون رمى حاجة مش نضيفة على الارض .. وطي و شيلها و قولوا فيه باسكت نرميها فيه.. هنقوله لإنه طفل

إنما لو واحد كبير .. مش لازم تقوله

أكتشفت كمان إننا لسة فينا خير
و محتاجين بس حد يحمسنا نعمله

الجميل بقة في الموضوع

سبحان الله
يعني احمد ربي

أنا بخاف إني اعمل الحركة اللي بعملها دية .. اني اقوم لحد .. في الاتتوبيسات أو الميني باص .. عشان متعرضش إن حد يلزق فيا أو يحتك بيا و هوه معدي في الممر

سبحان الله والله .. أنا كنت واقفة ومدية ظهري للبتاعة بتاعة السواق دية و بقرأ صح ..
النص دايرة اللي حواليا مكانش فيها ناس .. و مفيش أي حد كان قريب مني خالص

غير واحد كدة جة يميل عليا .. قمت متكلمتش و بصيت جامد ليه بقرف ..وانا لسة في مرحلة ما قبل الزعيق بشوية
قام واحد ربنا يباركلة قام قاله : لوسمحت حاسب كدة شوية
و رجعت تاني النص دايرة اللي حواليا مفيهاش ناس

الحافظ هو الله

نفسي الخبيثة بقة قالتلي : بصي عليه ( على الراجل يعني) .. شوفي مين الشخص الطيب الكريم اللي خلى الراجل ميلزقش فيكي
بس أنا قولتلها بالعند فيها : لأ مش هبص و الحمد لله مبصتش


المهم
قعدت اقرا شوية في الكتاب وانا واقفة
أنا أصلاً مش عارفة أنا كنت واقفة ازاي .. ولا ساندة ازاي
و الراجل بتاع التوك يعدي
و بتاع الإيرة و اللضامة يعدي
و الحجارة يعدي
وانا واقف

المهم الجزء اللي قريته من الكتاب كان بيتكلم عن
different types of Envy ; al7sad & al Ghubtah
& the competition

شوية كدة و الست اللي جمبي قالتلي المحطة الجاية الموسكي

رايحة بقة عشان أنزل .. فسألت اللي قدامي : لو سمحت .. هوه أنا لو عايزة أروح الغورية .. أو شارع الأزهر .. أعمل إية .
قالي : هوه انتي عايزة إية بالظبط
قولتلوا : عايزة أشتري قماش من هناك
قام قال اجابة عجيبة جداً : على فكرة أنا محامي في شركة مش فاكرة إية في شارع مش عارف إي لو عايزة أي خدمة
هرشت في راسي من فوق الايشارب وانا مش فاهمة حاجة و قولت : طيب .. و نزلت أسئل على الشارع بتاع الأزهر
المهم قالولي إمشي قدام على طول و حودي شمال
مشيت بقة
و بعدين فجأة وانا بمشي : قعدت أفكر في الاجابة اللي الراجل قالها .. إني أفتركها ... مفتكرتش .. أحسن
وفجأة
رفعت حواجبيني
لأ مش ممكن
أنا بتعاكسسسسسسسسسسسس
يلهوي
عيني عينك كدة :|
أول مرة في حياتي أتعاكس .. أتعاكس في أتوبيس :|
الحمد لله إني مبركزش في وشوش الناس ولا في كلامهم
و قعدت أضحك وانا ماشية
قام راجل عجوز بصلي كدة و قالي عايز أشرب : قمت مديالة ازازة الماية اللي كانت في ايدي من غير ما أفكر
و كملت طريقي وانا بمد لإني بحب قوي أمشي بسرعة
و سمعت همهة الراجل من بعيد .. أكنة بينادي عليا عشان آخد الماية بس مسمعتش بيقول إية و مركزتش

المهم

مشيت بقة في الطريق إلى الازهر و قابلت واحدة ست كدة جايبة حاجات كتير
قمت قولتلها : لو سمحتي هوه منين شارع لاازهر
قالتلي : انتي عايزة المسجد ولا الشارع
قولتلها : لأ عايزة الشارع بتاع القماش دة
قالتلي : آة دة من هناك.. فية حاجات حلوة قوي
قولتلها : يا سلام .. و بما إني رغاية كالعادة
طيب بقولك إية أنا عايزة أشتري قماشة جينز.. تبقى بكام؟؟
قالتلي 9
بصيتلها كدة : 9 إية
9 جنية
أنا وانا مزبهلة : نعم
هيا : أيوة يا بنتي
قولتلها : طيب أنا مبعرفش أفاصل خالص أعمل إية
قالتلي : يا بنتي انتي أول ما يقولك 26 تقوليلة 5 .. يقولك 30 تقوليلة 6
بصيتلها كدهو : يا سلااااااام
قالتلي : أيوة و إلا هيضحكوا عليكي
قولتلها : والله
قالتلي : أيوة
قولتلها : طيب بصي أنا عايزة أشتري قماشة إيشارب
قالتلي : أحلاها إيشارب هتلاقية ب 7 و نص
أنا : يا سلام
قالتلي : أيوة أنا لسة شارية من هناك

المهم يعني
هيا كانت بتاكل درة مشوي و انا كان نفسي فيه
قمت مشيت و اشتريتلي كوز درة
كان طعمة تحفة
الدرة السنة دي طعمة حلو قوي

المهم
روحت محل لاقيتة في وشي
و قولتله : لو سمحت .. فيه هنا قماش
قال :لأ .. القماش قدام
مشيت قدام قمت سئلت محل تاني : عايزة اشتري قماش
قام سائلني : قماش إية ؟؟ تجنيد
قولتلوا : تجنيد ؟؟؟ مين تجنيد دة .. لأ أنا عايزة قماش هدوم عادية
قالي : آه ... قدام الشارع الرابع يمين ..
و قال بطريقة سخرية : مش عارفة قماش التجنيد؟؟
أنا قولت شكراً و مشيت
إلا صحيح إية قماش التجنيد دة؟؟
مش قماش الظباط اسمو قماش ميري
مش تجنيد خالص
ولا إية
عامة

المهم
مشيت قدام بقة و سألت راجل كدة كان فاتح عربية لحمة راس و محشي باين: هوه فين البتوع بتوع القماش دول
قالي قدام عاليمين
قولتلوا : طيب بقولك أنا عايزة أشتري قماش جينز .. حضرتك تعرف اسعار القماش إية
قالي :لأ أنا عندي عربي ببيع لحمة راس بس ومعرفش.. ممكن تسألي دة
و قالي على راجل صاحب محل
و قمت سألتوا
قالي : الجينز المستورد آخرة 15 و القماش بتاع الطرح 10
قولتلوا طيب

و مشيت
وانا باكل الدرة
و دخلت التربيعة
اللي هما قالوللي عليها

و قعدت ألف ألف ألف ألف ألف
و آخد في كروت من المحلات
و أتصل ب (م) عشان تقولي رأيها
و أروح للاولاني
و أرجع للتاني

الغريب بقة معرفش ليه أول مرة أحس بيها بالفظاعة دية
أنا حسيت إن كل الناس هناك بتبصلي من تحت لتحت
أيوة أنا عارفة إني موسوسة زي ما قولت قبل كدة وعندي نرجسية
و فاكرة إن الناس بتتابعني

بس حتى الزباين كانوا بيبصولي أكني شخص غريب

يمكن الحالة زادت عليا؟؟؟

مش عارف

لأ

أصل وانا بكلم (م) ..
مش فاكرة
:((

الوسوسة شكلها زادت عليا :((

ربنا يعافيني

المهم يعني

سبحان الله
البنت دية مُرزقة اللي هيا م2 اللي هنجيبلها الهدية
مقعدتش كتير عشان اجيب القماش

سبحان الله
ربنا يسر الحال
و لاقيتلها قماشة حلو

اسمها سنتينال تقريباً لونها رصاصي غامق في خيط زيتوني كدة
شبة الجينز بس بتلمع حاجة نونو
مش بتلمع زي الفرح
لأ
اكنها بتكب

المهم يعني

قولتل للراجل وانا بشتري منه .. تعرف دعاء السوق
قالي لأ
قولتلوا
طيب اقول دعاء الاستخارة ولا اية
قمت قولت دعاء الاستخارة
و جبت القماشة
ب 15
3 متر للعباية
و روحت اجيب ايشارب عرض عرضين
الراجل قالي 15
قولتلوا الراجل قالي 10
قالي طيب
قولتلوا راضي يا عم
قالي هجيب بيهم كيلو اناناس و مش عارف اية

المهم كان عندو بنت زي القمر
صغنونة كدة
و كانت واقفة معاة في المحل
و قعدت تكلمني اكنها بياعة شاطرة

جبت الحاجة و انطلقت

اللي حصل مسخرة بقة
المفروض إني اروح

أنا مش عارفة ازاي بنروح البيت بتاعي من هناك

قمت لاقيت تاكسي كدة .. افتكرتة تاكسي من اللي هوه 7 راكب اللي فيه اجرة موحدة دة.. مكنتش عارفة إنه تاكسي
قمت قولتله . هوه حضرتك طالع على صلاح سالم أو الاوتوستراد
قالي طيب اركبي
المهم ركبت : قولتلوا كام؟؟
عادي يعني اللي هيا اجرة موحدة دية ( دة في عقل بالي)
قالي : اصبري بس
قام ركب معانا 3 بنات كدة كانوا رايحين حديقة لاازهر ..
قمت قولتلوا هوه اية البتاعة اللي قدام دية
قالي دية السيدة عائشة
قولتلوا هوه حضرتك رايح هناك ؟؟
قالي طيب
قولتلوا طيب بكام
هههههههههههههههه
قالي : هوه إية اللي بكام بكام .. اصبري لما نوصل
أنا لسة لحد دلوقتي مش فاهمة إني ركبت تاكسي عادي يعني من اللي بيوصلوا الناس لبيوتهم
المهم يعني الراجل مشي كتيييييييييييييييييييييييير قوي
قمت قولتلوا : هوه حضرتك رايح فين؟؟
قالي : السيدة عائشة
قولتلوا : طيب بكام؟؟؟
الراجل تقريباً كان هينتحر ... قام قالي .. الناس لما بتوصل بتسأل بكام
هنا بقة فهمت إني راكبة تاكسي من اللي بيوصلوا الناس عادي دة
مش بيجو 7 راكب ابو اجرة موحدة
فقولت في عقل بالي
طيب إية الغباء دة
ما كونتي تركبي للبيت أحسن بدل اللفة الطويلة دية
قامت نفسي ردت عليها قالتلها
لأ كويس اننا روحنا هنا عشان نشوف مناطق جديدة
المهم الراجل قالي تدفعي كام : قولتلوا معرفش
قالي طيب هاتي خمسة : قمت اديتوا خمسة و نزلت
سألت العسكري اللي واقف عالمحطة .. أركب من هنا ل ... ( بيتي ازاي)
قالي: عدي الشارع و اركبي من هناك
عديت الشارع و روحت سألت ست كدة بتبيع خضار باين ولا كوبايات مش فاكرة : اركب ل ... ( بيتي ) إزاي .. قام جوزها داخل في الحوار و قالي تعدي الشارع و تركبي من هنا
قولتلوا منا لسة معدية من هناك و الراجل قالي عدي هنا
قالي لأ عدي بس صدقيني

بموت أنا في الشعب المصري لما بيفتي

المهم عديت الشارع
لاقيت بائعة الذرة
شويتلي درراية و خدتها و ركبت

لاقيت بنت جمبي
وبما إني رغاية
مش فاكرة كلمتها في إية
و بعدين عزمت عليها بدرة
قالتلي لأ
والله لانتي واخدة
لأ
يا بنتي لأ خودي متتكسفيش
لأ
قمت اتكسفت و قعدت ساكتة لحد ما روحت البيت

مبسوطة قوي إني اشتريت القماش من غير ما يتضحك عليا
مبسوطة قوي إني روحت هناك لوحدي
مبسوطة قوي إني كلت درة طعمة تحفة وانا بموت في الدرة
مبسوطة قوي إني خدمت صحبتي اللي تعبت
مبسوطة قوي إني هدخل السرور على قلب صحبتي اللي جبنالها القماش بتاع العباية
مبسوطة قوي إني ركبت الاتوبيس ( لإني بموت في المواصلات)
مبسوطة إني اكتشفت إني بقدر أتحمل المسؤلية لوحدي حتى لو كنت بخاف منها

أول مرة حد يديني مسؤلية
كانت من تلات سنين
في احد القوافل الطبية
كنت قائد لمعمل ستول ( بلاش أقولها بالعربي)
stool
كنت كل يوم تقريبا بليل أعيط لإني خايفة مكونش قد المسؤلية
و إن الشغل ميبقاش تمام
و من ساعتها قررت إني أبعد نفسي عن أي مسؤليه
بس أكتشفت إني قدها
و ليا قرارات كويسة
و دة شيء مخليني مبسوط
......
ماما لما رجعت و قولتلها : قالتلي روحتي الغورية لوحدكككككك
قولتلها أيوة و جبت قماش كمان
ووريتهولها
و عجبها

من ضمن الحاجات اللي اتعلمتها امبارح

وانا بشتري الخضرة لوالدتي
بقول للراجل هوه البقدونس مفعص ليه
قالي الخضرة بيتقال عليها دبلانة
الطماطم هيا اللي بيتقال عليها مفعصة

بس

سلام عليكم

أن أكون عُصفورة


أودُ أن أكونَ عُصفورةً
أحلقُ بعيداً
يغارُ الكثيرون مني
ولا أعبأ بهم
أنطلقُ كما أريد
إلى أعالي الجبال
إلى البلدانِ البعيدة
أهاجرُ معَ سربٍ لهُ قائد
لا أمانعُ أن يكونَ القائدُ أحداً غيري مادامَ يستمعُ إلى المشورة
بين السحبِ البيضاءِ نمرح
نشقها تارةً ومن حولها نطيرُ تارةًً أخرى
كنتُ دائماً أحلمُ أني في الأفق
هناكَ حيثُ تتجهُ كلُ الأنظار
أنا الشمسُ و القمر
أنا النجومُ و السحب
بأجنحتي أحركُ الرياح
ومن عيوني يسقطُ المطر
بغضبي يحمأ الجوُ و تندلعُ البراكيين
ومن ابتسامتي تتفتقُ الأزهارُ و تعمُ الكونَ رائحةُ الرياحين
هكذا تكونُ العصافير
أنظرُ من موقعي إلى الناسِ بالأسفل
أكادُ لا أراهم
لا يهم
نسافرُ لعدةِ أيام
أعشقُ السفرَ و الترحال
تصدح ُواحدةً منا أنِ اقتربنا من هدفِنا المنشود
نحتفلُ و نحنُ في السماءِ رغمَ الارهاق
نتقافزُ في الهواء
نتسابقُ إليه
يحددُ كلُ منا مكانه
أسرعُ لأبني بيتي الجديد
لن أبنيهِ مثلهم .. أريدهُ مختلفاً
سأبحثُ عن أكثرِ الأزهارَ ندرةً و أحلاها عطراً كي أزينهُ بها
بينما نحنُ مستغرقون في العمل 
يدوي في السماءِ صوتٌ عالِ جداً..
نرى واحدةً منا تسقطُ فجأة ...
تمطرُ السماءُ دماً ساخناً...
على وجهِ كلٌ منا قطرةَ دماءٍ حمراء
نبتعدُ كلنا في هلع
تقتربُ منها صديقتها كي ترى ما بها فإذا بصوتٍ عالٍ آخر
و تسقطُ هي الأخرى
على مسمعٍ منا و مرأى
تشخصُ الأبصار
يدبُ الرعبُ في قلوبنا
نتبعثر
لو أننا اجتمعنا لنقاومه
كلٌ في اتجاةٍ مختلف
أين قائدنا؟!!
هكذا تسائلت..
لمْ يأتِ الرد
يقفُ أمامي بعينِ ملؤها النشوة
تحدِّقُ عيناي فيهِ بحدة... هوَ منْ قتلَ صديقتاي..
يصوبُ تجاهي بندقيته
أبتلعُ ريقي بصعوبة ... لا بدَ أن أفعلً شيئاً
ماذا عساي أن أفعل
تتسارعُ ضرباتُ قلبي
سأنقضُ عليهِ بلا هُواده
سألقِنَهُ درساً
ولكن... أجدني..
أصرخُ كي أسترحمه
صو...صووصوصوو
يتصببُ مني العرق
يحركُ إصبعهُ على الزناد
أرتجفُ و تبردُ أطرافي
أسمعُ صوتٌ عالٍ يدْوي 
أخرجُ منْ حلمي بسرعةٍ و أنا أنهج
لا.... لا .... أريدُ .... أنْ ... أكونَ ... عُصفورة

............................
حكوك الطبع و النشل محفوسة لنعكوشة