مطبخنا المنعكش ( الحلقة الاولي دة لو هيبقي فيه حلقات بعد كدة لإني مبعرفش اطبخ)

سلام عليكم و رحمة الله و بركاتة
اعظائي المشاهدين( الرجالة العزاب اللي مش لقين حد يطبخلهم) اعظاتي المشاهدات( الستات الغلابة اللي متجوزين و عندهم قرطة عيال)
أهلا بيكوا في مطبخكوا

مطبخنا المنعكش مع الشيف نعكوشة المنكوشة و بمساعدة خالها
بمناسبة إن انهاردة أول يوم من الثلاثة البيض بتوع شهر رجب
وبكرة الخميس برضو يعني ممكن تصوموا
المهم يعني اعملوا الاكلة عالفطار
بالمناسبة دية كل سنة و سعادتكو طيبين
و متنسوش تصوموا لإني نسيت اصوم انهاردة بس هصوم الباقي ان شاء الله

و بالمناصبة الخطيرة دية

هقدملكوا وجبة ( يخن عجـــــب) أنا اللي مخترعاها
او مش مخترعاها بس يعني أنا الي فنكشتها
بمساعدة السيد العظيم ( خالي ربنا يستره زي ما سترني)

الوجبة إن شاء لله

1- مش دسمة
2- اقتصادية
3- مفرحة للعيال لو عندك عيال سيدتي
4- سريعة التحضير

وبما إني أنا اللي منعكشة المقادير
فإسم الأطباق كالتالي

1- هربرجر
2- مسكعة ( بطريقة سهلة جداً)
3- الطبق الرئيسي ( مكروناتو شوفانكية)
ومتسألونيش يعني إية ( قولي لجوزك كدة هيقول بقة إن سيادتك مستوردة طبق إيطالي)

المهم

نخش بقة في المقادير

معاكي ورقة و قلم ( مش لازم خديها كوبي بيست) هيا دية التكنولوبيا

اهم حاجة ( إلبسي حاجة فوق راسك يا حاجة عشان ميبقاش فيه شعر ولا حاجات من دية وانت كمان البس أي حاجة فوق راسك )

لتحضير المسكعة
1- طماطم
2- شرائح بازنجان
3- بصلة متوسطة الحجم
4- لتر ماء ( مش شرط لتر يعني ممكن اكتر او اقل انتي ادري)
5-ملح و فلفل و بهارات

لتحضير الهربرجر ( بالمناسبة متقولوهاش هام برجر عشان هام = لحم خنزير يا تقولوها بيف برجر يا تقولوها هربرجر او أي حلبسة اهو أي شحاليل)

هربرجر جاهزة من فرجلوا ولا ثري شيفس
( ممكن تستغني عن الهربرجر علي فكرة لإنها طلع طعمها معوق معايا و كانت هربرجر حجرية و إنتي هتلاقي في الطبق الرئيسي المادة البروتينية لذا مش لازم الهربرجر سيدتي
وبعدين الهربر غالي اليومين دول)
الله يخربيوتكوا :@ متقدروا الناس الغلابة ... مين الست دية
خلاص يا حجة انا اسفة
عالمة غريبة صحيح
انت بتصور يا عبعال :@ كتتتتتتتتتتتتتت
...........................................
عدنا لكم اعظائي المشاهدين ( ابتسامة من هنا لهنا ووش منشكح) بمكادير الطبق الرئيسي

مقادير الصلصة :
1-ثوم ( علي قد ما بتحبي)
2- بصل ( علي قد ما تحبي)
3- مشروم ( المادة البروتينية )

ممكن تستغني بيه عن اللحمة و بعدين سعر المشروم دلوقتي حلو العلبة ب 7 جنية و نص طبعا هتاخدي منها خمس ست واحدات يعني هتكفيكي و العيال يفرحوا انهم اول مرة في حياتهم كلو مشروم بقة
المهم
4- فسفوسة زبدة عشان الريحة بس – حتة صغيرة قوي- ( لو معندكيش ملهاش لازمة) اصلا دسم و حاجة مش لطيفة يعني
5- قليل من الزيت
6- دقيق ( حبة صغيرة معلقة ولا حاجة ومش كاملة يعني )
7- لبن ( لو مش من السراميك يبقي قشطة لو سيراميك خلاص اوك)
8- ملح و فلفل و بهارات
........................

مقادير الطبق:

1- نص كيلو مكرونة اسباكتي ( مش روجينا ) لو ريجينا تبقي حضرتك من الطبقات الراقية واحنا عالم اقتصادية
2- لتر ماء او اكتر( الله اعلم مفروض قد اية)
3- ملح و فلفل و بهارات
4- زيت

نترككم مع فاصل اعلاني

تان تان تان تان
تيرارارورووروروووووووو

لبان فسفسة حلوة و ملبسة طعمة و مفسفسة كلي مرة واحدة هتلقيها كويسة

سمنك في الاكل كتير .. لأ . طب قليل .. لأ استخدمي سمن الشجرتين جزك هيطلقك من أكلتين

امشي يا نموسة يا غلوسة متقرصنيش كيتو هيمسكك يفشفشك فشافيش .... عندنا كيتو عندنا القرص عندنا كيتو مفيناش قرص

اجري بسرعة يا واد يا حسين هاتلنا ريري منو اتنين


تان تان تان تان
تيراراراروورورورووروووووو

عدنا لكم اعظائي المشاهدين و هقولكم عالسريع

ازاي تعملي المسكعة :

1- قطعي البصل
2- قطعي البتشنجان
3- شوحيهم شوية في زيت قليل جدا عالنار مع الطماطم
4- ضيفي ملحك و فلفلك
5- ضيفي ميتك( الماية بتاعتك) شيلو الميتين من هنا لأ لأ
6- سيبي الخليط ( والله بتطلع مسقعة حلوة و مش دسمة )
ومش لازم تقلي البدنجان و تصفي البدنجان و تعملي هيصة
هيا دية المسقعة
للطبقات الراقية ممكن تبقي تحطي لحمة مفرومة
بس انا محطتش و كان طعمها حلو جداً
7 – اتركي الخليط حتي يكون متماسكاً
وبكدة خلصتي من المسكعة في 10 دقايق

...............................

اما عن الصلصة للطبق الرئيسي:

1- قطعي التوم صغنن صغنن

2- قطعي المشروم صغنن صغنن
3- قطعي البصل صغنن صغنن

4- شوحيهم كلهم مع بعض
5- حطي ملعقة دقيق متكتريش الديقيق عشان متعجنش

6- شوحيهم لحد ما اللون يبقي حلو كدة مصفر

7- حطي اللبن وانتي بتقلبي ( عشان ميعجنش )
8 - قلبي حتي يصبح الخليط متماسك شوية

9- اطفي النار و حطيها بعيداً
....................................

اسيبكوا مع فاصل ؟؟؟
يلاااااا فاصل

تان تان تان تان
تيرارارارايوويويوووووووووووو

بست . واااااااااااه ......... بحب اتنين سوا يا هنايا بحبهم ازوزا كولا و الهوا يا ميلة بختهم

رايحة فين يا سميرة ......رايحة اجيب شومو ...... جاية منين يا سميرة ....جبت شومو
لسواد غسيلك و نظافتة استخدمي شومو

اطلب زيرو 0900 و كمان 00000 هنديك جوايز فورية ... فيلا و شقة و عربية و هناخد منك قرشينيلا بسرعة الدقيقة بجنية ونص يا تلحق يا متلحقشالفائزين معنا في المسابقة الماضية عم شفطورة و عايدة الزايدة

ألووووووووووووو إيوة ابا الحج انا جبت لفلفون ...... هيع هيع هيع
ألووووووووووو الدجيجة بكام ... 15 قرش للثانية
لأ يا بلاش
الشبكة النعكوشية للأتصالات
شبكة واحدة
بتنهبنا كلنا


تان تان تان تان
تيراارارارارااوووووووووووووو

عدنا لكم اعزائي المشاهدين مع طريقة

تحضير المكرونة :

1- قومي سيدتي بفتح كيس المكرونة
2- ضعي حلة بها شوية ماء و حبة فلفل و شوية ملح ( فيه بيقولوا حطي الملح بعد ما الماية تغلي بس دية شوية كلام كدة كبري يا شيخة مفيش وقت جوزك هيرجع من الشغل)علي النار

3- اتركيها حتي تغلي

4- ضعي محتويات الكيس ( من غير ما تكسريهم في الحلة... العيال - وانا منهم- بنحبها لما بتبقي طويلة) ====>
5-اتركيها حتى يصبح لونها ابيض

6- اغسلي المكرونة( لأ مش بمسحوق الغسيل بس بالماية و تكوني حطاها في الماصفة - الحلة المخرمة من تحت-)

7- ضعيها في صينية ( يا ريت تيفال ) لو مفيش تيفال ( فلوس عالفاضي ) حطي زيت و افضلي قلبي اهم حاجة المكرونة متلزقش

..........................
سيدتي احب اقولك انك ممكن تكوني بتعمل المكرونة دية وانتي بتعملي الصلصة بتاعتها يعني كلهم علي بعضهم مش هياخدو ربع ساعة !!!!
و خدتي عشر دقايق في عمل المسقعة يعني كلها علي بعضها 25 دقيق
و تكوني عملتي اكلة شهية لجوزك و عيالك هيفرحوا انهم كالو مكروناتو شوفانكية
و قوليها كدة بألاطة و عنجهية يعني منظر شغل شغل

المهم

التقديم :(احلي ما في الموضوع )
لو عملتي كل دة و قدمتيه بطريقة مؤرفة الراجل هيقرف منك و من منظرك
حطي المكرونة في الطبق
حطي علي وشها الصلصة
و حطي عليها حتة بقدونس او كرفس أي حاجة خضرا
و علي جمب الطبق ( لو انتو من العائلات اللي بيكل كل واحد في طبقوا)
او في طبق لوحدو ( من العائلات اللي بتعمل شير في الطبق)
المهم علي جمب الطبق او لوحدو حطي المسكعة
المهم جملية

بالشكل دة

ممكن تعملي سلطة طماطم بقة تبقي ست فله
ولو عندك بواقي تفاح ممكن تعمليها عصير
ولو عندك بواقي خوخ ممكن تعمليها كمبود ( قطعي الخوخ ترانشات ترانشات + شوية ماية + شوية كتيرة سكر ) اغلية عالنار و حطية ف يالتلاجة >>>> احلي من الكمبود المعلب
المهم اعملي الديزرت علي مزاج سيادتك
وبالهناء و الشفاء

همسة في ودنك سيدتي ( استمتعي وانتي بتغسلي المواعين هع هع هع <===ضحكة شريرة)

اوعي تكون صورت الحتة دية يا عبعال

لأ يا مزمازيل نعكشة كلو هيطلع في المونتاش

طيب

( وش منشكح وبق مفتوح من هنا لهنا) و بكدة سيدتي ( أو سيدي لو كنت من العزاب)وصلنا لنهاية حلقتنا من برنامجك الاقتصادي

مطبخنا المنعكش

دمتي سالمة
سلامٌ عليكم و رحمة الله و بركاتة

تتر النهاية

صور بكاميرا نعكشة

مقدم الحلقة نعكشة

فكرة الحلقة نعكشة برضو

طريقة عمل المسكعة عن طريق السلق مش القلي فكرة ( خالي ربنا يخليه )

خلاص خلاص البرنامج تبع شركة نعكشتكو للمصنوعات الغذائية

.........................................

حكوك الطبع و النشل محفوسة لمطبخنا المنعكش