كيف الحال؟؟
يا رب تكونوا بخير
بما إني مش لاقية حاجة اكتبها
وبما إني او الناس ملت من حكاية القصص اللي ورا بعضها
وبما إني في نفس ذات الوقت بحب الرغي
فلازم الاقي حاجة
مليش دعوة
وبما إن كان جايلي تيجان من مصادر كتيرة حلوة تيجان دية
عشت و شوفتك يا نعكش ( علي رأي ميادة) بتعرفي تجمعي
المهم بقة هما من مناطق مختلفة اصلي مشهورة طول عمري هههههههههههههههه
أنا اصلا كنت قاعدة بنش ولا لاقية ولا صامولة في تاج حتى ( التاج الجديد بصواميل اليومين دول الصواميل دية بدل الجواهر اكمن الحديد غلي)
و إذ فجأتان الخير لما بيجي بيجي بالكومة
وبما انكوا مش هتستحملوا 3 تاج في طقة واحدة ( شوفتوا الخير)
وانا عن نفسي مش هستحمل
فأنا هاخد اللي جالي الاول بالاول
قشطة
الأول ( علي رأي يوسف وهبي ولا كان اسمو اية ابو شعر دة آة انور وجدي في امير الانتقام)
اتعاد مرة تانية الفيلم دة بفريد شوقي المهم
الأول
التاج دة جالي من ميرو صاحب مدوننة من أجل البشرية المعذبة
ومخترع هذا التاج هو احمد هشام صحب مدوننه بلدك يا رأفت
والتي ستجاوب التاج هي نعكشة صاحبة مدوننة نعكشة
بدأت تدون من امتي ؟ و دخلت العالم ده ازاي ؟
سؤال ظريف جداً . من ممممممممم يادي النيشة عالذاكرة من اخر السنة اللي فاتت او بداية السنة دية و كان في مدونتي الاولي Swing
قعدت فيها فترة طويلة يعني و حطيت فيها حاجات ليا برضو بس مكنتش حاسة اني مرتاحة فيها معرفش لية
... انا اصلاً انسانة ملولة....
المهم غيرتها لمدوننتي دية نعكشة شهر ابريل باين ولا مش عارفة اية
دخلت العالم دة عن طريق: مهند صاحب مدونة- الباحث عن الحقيقة - قالي سيبك من الشات و الهطل دة و قوليلك كلمة مفيدة في حياتك
وانا مصدقت صراحة
و قعد يعلمني حاجات كتير
تسلم يا سيد مهند
ايه كان انطباعك في البداية ؟
مكانش عندي انطباع .... او كان عندي وانا مش فاكرة ........ بس عادي يعني حسيت ان يا مكان بحط فيه الحاجات بتاعتي بدل مانا كل شوية اقرف الناس المشيتين و اقولهم اسمعو وعوا هقولكوا شعر و حاجات كدة
مين أكتر واحد بتهتم بتعليقه علي بوستك الجديد ؟
ممممممممم حالياً ؟؟؟؟ يعني هما ناس كتير مش واحد بس
بالنسبالي أي حد بينقد الكلام او الموضوع اللي انا كاتباه و بيحلله من وجهة ويناقشني في الي كتبتوا بحب تعليقه جداً و يعني ببقى في قمة سعادتي لما اقراله حتى لو بيقولي: إية القرف اللي انتي كاتباة دة كان المفروض تكتبي كذا وكذا عشان تبقى احسن
بس كأسماء
ممكن نقول و محدش يزعل لإن زاكرتي حلبسة خالص
علي سبيل المثال و ليس الحصر
أراجوز صاحب مدوننة أراجوز بس هوه بقالو كتير مش معبرني
محمد حلمي مخلوف صاحب مدوننة لمحة من حياة الكائن صفر ( يعني هذا الشخص فعلاً فعلاً بعتز بأراءة جداً من ناحية الأدب)
كوشيا صاحبة مدوننة قصاقيص ( الأنسانة دية رائعة ... بحس فعلاً بتعليقها دخلت جوايا و تمعمقت و طلعت بالمفيد)
آدم الغامض صاحب مدونة افكار في عقلي بتزعقلي ( ساعات كدة بتطلعله أراء مفيدة و بتوريني حاجات معيننة)
والله ما فاكرة يخربيت الغباء الاصطناعي
آه راجي صاحب مدوننة عين في الجنة ( كان بيظبطني في اللغويات و الحاجات دية ربنا يخليك يا رب)
ورود و اشواك صاحبة مدونة عازفة الأوتار ( بتحسسني كدة انها جابت الخلاصة)
بنوتة مصرية صاحبة مدونة دي دماغي ( ساعات برضو بتتحفني بأحاسيسها)
كتير والله بس أنا اللي معوقة ذهنياً
او فاكرة يعني مثلاً زي نور الحياة و ميرو و نورة الخشن و فارس با جواد و داركنس ( علبة ألوان) و محمد داوود و غيرهم والله بس انا مش هينفع اكتب كل الناس
فعلاً فعلاً : أي حد بيكتب في اطار النقاش بعتز بتعليقة جداً جداً جدا اكتر من الناس اللي فوق لو كان كاتب نقاش و هما مش كاتبين
و بكره حكاية حلوة قوي و خطيرة موت و الكلام دة
مين اتعرفت عليه من خلال المدونة و نفسك تتعرف عليه في الحقيقة ؟
هوه انا اتعرفت علي حد أصلاً ههههههههههههههههههه
يعني ممكن تقولوا سبهلة نفسي اشوفها هيا ووورود وا شواك و نورة الخشن و خيخة و بنوتة مصرية و بصوا
كل البنات عشان انا كدة هتفتح زي السؤال اللي فات
ايه أهم حاجة اتعلمتها من عالم التدوين ؟
متعلمتش حاجة صراحة .. عشان مبقاش كدابة
ولو اتعلمت حاجة وانا مش واخدة بالي فانا مش واخدة بالي عشان اقولها
تحديث : اكتشفت اني اتعلمت شوية حاجات علي الصعيد الادبي و علي الصعيد الفني
ايه أكتر حاجة كرهتها ؟
مش حاجة معينة ينعني مفيش حاجة بكرهها كره بقة و بتاع
بس بتتفقع مرارتي من التعليقات مثلا :
سوووووووووووو روعة
تحفة تحفة
خرافة لأ انتي معدية
بحس ان اللي جه مقراش
و حتى لو قرا محسش بحاجة
لأنه أكيد لو قراها بتعمق كان نفسه يقولي كلمة
انشالة يقولي :ليه كدة ،او مثلاً الافضل كذا ،أي حاجة بحب التواصل جداً
.........
هييييييييه أول تعليق و راجع تاني
او بسجل حضور و راجع تاني
طب انا استفدت إية؟؟؟؟؟؟؟؟؟
انشاله تكون التعليق الاخير و بعدها بخمسين بوست
و كلمتني في الموضوع و ناقشتني هبقي سعيدة جداً
............
بتفقع مرارتي برضو من اللي يرمي التعليق و يجري .. و الرخامة بقة يكون سألني سؤال ولا حاجة وانا جاوبت علية
طيب فيه اختراع اسمة تتبع باقي التعليقات عالايميل
مش عايز ايميلاتك تزيد
ابقي تعالى تاني المدونة
مبحبش النظام دة صراحة
يعني مثلاً حتى لو كاتبة أي حاجة بروح اشوف الرد عليها كان إية
ممكن تدي مثال عن اللي بتحلم تلاقيه ؟
انا هحلم لمين ولا لمين مش كفاية بحلم لنفسي
طيب طيب
نحلم للمدوننة يلا
المفاجأة بقة
مبحلمش بحاجة
هههههههههههههههههههههههه
رخمة طول عمري
طيب خلاص متزقوش
يعني كان نفسي في تنوع اكتر من كدة
يعني مثلاً : اكثر المدونات يا اما (سياسة يا اما ادب و شعر و يا اما فنون جميلة رسم و موسيقي )
يمكن قصور مني
او قصور من أي حد المهم يعني الاقي اختلاف
علوم ( فيزيا مُبسطة طبعاً عشان الجُهلاء أمثالي ، كيميا ، رياضة ، ألعاب بتاعت الزكاء)
تاريخ مثلاً
جغرافية
ثقافة عامة
معلومات عن كُتاب عن فنانين عن كيميائيين
معلومات كدة يعني
ملاقتش صراحة
ولو حد يعرف مدونات كدة يا ريت يقولي هكون شاكرة ليه جداً
نفسي كمان يتعمل اجتماعات ثقافية ( صالون تدويني)
او تنوية عنها بحيث نقدر نستفيد اكتر
حاسس ان التدوين له تأثير ؟
علي إية بالظبط؟؟؟
أي حاجة في الحياة دية مهما كانت تافهة( ولا اعني بالتدوين انه حاجة تافهة) بتأثر
أي حاجة بتأثر في الكون
لكل فعل رد فعل
يعني مثلا لو رميت الكورة علي الارض حاجة بسيطة و يمكن في بال حد ولا حاجة
بالعكس انا نشط بيها بعض من عضلاتي و تابعتها بعيني فقوت قدرتي علي التتبع و افتكرت اهوه اني كنت رميت الكورة فبقت زكرى ليا بستخدمها عشان افرح بيها او ازعل او واتفر
أكيد مؤثر
سلباً بقة إيجاباً حسب المدونة نفسها
طيب كلمة أخيرة ؟
اعتقد والله اعلم ان الناس طفشت و فية اللي مكملش البوست اصا و فية اللي زهق
و فية اللي قفل المدونة
بس الناس اللي تعبو نفسهم و قروا ابوست او التاج للآخر
آسفة لو كنت مفدتكوش
مبسوطة لو استفدتوا ولو من فسفوسة من كلامي
كلمة آخيرة بقة ( يييييييييييه) استحملو استحملوا بعلمكوا الصبر
انا فعلاً بحترم كل كلمة نقد ليا و بستفسيد منها جداً
انا كنت عاملة المدوننة عشان اتناقش مع الناس و اتواصل معاهم و يفيدوني
ولو اقدر افيدهم هفيدهم
لو لاقيتوني يا جماعة حيدت عن طريقي
و عملت حاجات مشينة او وحشة
يا ريت تعيدوني لرشدي
لو حد شايف فيا حاجة مش كويسة يقولي
سواء أنا قبلت الحاجة دية و غيرتها ( خد ثوابي)
او عرفت صفة عني - لإني كتير بتصرف كدة جهجهوني-( الكلمة دية عرفتها من واحد كان بيفرجنا على شالية من كام سنة) و مبلاحظش كويس
او حتى معملتش بيها
خد ثواب النصيحة
سوري اني عطلتكوا
تحديث : افتكرت حاجة
شوية مدوننات كدة عاجبني
صور ساخرة : بتاعت EgyBoy و اللينك بتاعة في البوست اللي فات لإني تعبت
مدوننة بلدك يا رأفت : هذا الرجل يفكر
مدوننة : طيارة ورق ( عميقة قوي)
مدوننة : قصاقيص ( بحب اسلوبها جدا)
مدوننة : من اجل البشرية المعذبة : لية نظريات نظريات
مدوننة فارس بلا جواد : شعر علي اصوله
مدوننه : لمحة من حياة الكائن صفر : عايز تستمتع بانك تركز عشان تستمتع و في الاخر هتستمتع ( لية اسلوبه)
مدوننه : المهم هات من الآخر : ممكن فجأة تلاقيها بتتكلم عنك مش كشخص بس تحس انها بتوصف مشاعر الناس قوي
مدوننة : نداء إلي الحياة : عايز تريح اعصابك روحها
مدوننة : نورة الخشن آه و كفى : في كلمات قليلة توصف موضوع كبييييييييير
مدوننة :كيكي فكك مني : روقااااااان
مدوننة رحايا العمر : برغم اني متمعمقتش فيها كتير بس هذا الرجل بيتكلم كلام كبيير
مدوننة : عارفة مش عارفة ليه : عايز تحس بجمال البساطة روح هناك
مدوننة : علم الهسس : مُخ
مدوننة : مقهى ليلي : he's Got Style
مدوننة : روح قلب ماما : بحس اني روحت البيت
مدوننة : شريف مش فاكرة اسمها اية دلوقتي و مكسلة اروح : هذا الرجل انسان راقي
بصو لو سبتوني هقعد اكتب من هنا للصبح- معظم- المدوننات اللي علي الجمب عندي مدوننات عسولة
سلامٌ عليكم
أوجه التاج .. ينهاااار نسيت السؤال دة
ميادة رفعت
كيكي
انا كنت كاتبة ناس كتير بس كسلت بقة
فأي حد نفسة ف يالتاج ياخده
سلام عليكم
.jfif)
.jpg)
76 قالوا رأيهم في العك اللي تحت ؟؟؟:
عوووووووووووووووووووووووووووو انا جيت اتخديتى
...........................
هيييييييييييييييييييييييييية
هييييييييييييييييييييييييية
اول تعليق مش ممكن
انا كدة عديت
انتى بجد مش ممكنة
رووووووووووووووووووووووووووووووووعة كتيررررررررررررررررررررررررررر
وتجنينى كتيرررررررررررررررررررررررررر
وسلااااااااااااااااااااااام بقى عايزة حاجة تانى
هههههههههههههههههههههههههههه
هههههههههههههههههههههههههههه
ونبى لاقرفك...
طب تعرفى بجد بجد من غير هزار..والله اكتر حاجة بحبها فيكى..المناقشة وانك مش بتقرى الحاجة كدة وخلاص....لا بحس انك بتعفرى...وانك عايزة توصلى للى انتى عايزة بكلم عن الحياة بجد انا بحب الشخصيات دى....
بصى من الاخر...اى حاجة مش فية وكانى نفسى تكون فى..بحب اوووووووى الشخص الى قدامى يكون فى الصفات دى
انتى فاهمة انا بقول ايييييييية
ولا هيستى...ولا بتقولى البت دى عبيطة ولا ايييييييييييييييية...بجد التاج تحفة...واجابتك تلقائية..يعنى انا حسيت الى جاة فى دماغك قولتى صح
يا نعكوشتى!
!
وربنا يخليكى ويسعدك على طوللللللللللل الخط
عوووووووووووووووووووووو
هههههههههههههههههههههههههه
كنت هضربك علي فكرة
انا موت علي نفسي من اضحك
أنا قولت مقريتش البتاع و جت كدة
بس لحقتي نفسك
:D
بعفر يعني بشرب شيشة و بتاع
و حاسب العفرة و كدة
ههههههههههههه
بهرج بهرج
الله يكرمك
كويس انك لاقيتي حاجة تحبيها فيا
والله بالنسبة للوصول للي انا عايزاة
هوه انا بعافر فعلاً
بس مع نفسي
لإنها مش سايباني في حالي
الله يسامحك يا نفسي
ايون فاهمة
ان شاء الله ربنا يرزقك المثابرة و الجلد و التحدي للحصول علي اللي انتي عايزاة
لأ لأ انا لما بهيس و بشعشع بفهم
العكس
بقة
لما ببقة مركزة مبفهمش حاجة
ههههههههههههههههههه
اة كنت عايزة ارغي بقة
ملاقتش غير التاج
ما تاخدي تجاوبيية
اصل انا معرفتش احط مين ولا مين
كنت حاطة ناس كتير و كسلت اروح مدونناتهم
( دعوة اهيه مني ليكي
خدي التاج يا كيكي
انا بحب اقرا الكلا اللي بتكتبية
دمتي سالمة
نورتيني
و استعدتيني
سلامٌ عليكي
اولا شكرا لرأيك
ثانيا انتي فعلا انسانه رائعه وذهنك متفتح جدا لأنك بتقبلي النقاش غيرك بعتز بكلامه قوي قوي و بيستكبر انه يغيره
عارفه انا بعد ما وصلت لنص الروايه حوالي اربع مرات رجعت اكتبها من الاول علشان اصحابي انتقدوها وقالوا علي اخطاء انا دائما اقول طالما وضعت يدي علي الخطأ اكون قد وصلت لمنتصف الطريق وانا كلامي مش بعتز بيه قوي سهل جدا اني اغيره لأني اصلا لازم اكتب العمل علي الاقل مرتين قبل ما اكتبه علي الكمبيوتر علي فكره انتي واسماء صاحبة مدونة كلام وخلاص هتكونوا من كبار الاديبات في مصر
ربنا يوفقكم
ادعولي بس
نعكوشتى........... والله ولبستى التاج يا نعكشه!.. لا... ومش كدا وبس, وعايزه كمان تلبسينى التاج, اولا. يا ستى بحييكى على الصوره.. وانا بحب رسمك اوى... بعيدا طبعا عن انه منعكش.. بس معبر عن مواضيعك, يا بنتى انا كل مره بعد ما بعلق... بقوللك كلمتين, سيبك من الطب دا... اتصدقى طلعوا اربعه..ههههههههههه, ثانيا وثالثا.. انا هموووووووووت ويبقى فى اى حاجه بتجمع المدونين مع بعض على النت, ونفسى تفكرى فى الموضوع دا با لله عليكى.. قبل ما اموت.. ويبقى ذنبى فى رقبتك.. وساعتها مش هسامحك, رابعا. انا والله بحب تعليقك اوى على مواضيعى, لانى بجد بحس انك مزاكره البوست, وكمان بيبقى تعليقك كبير... يعنى بتناقشى الموضوع بجد وبخفة دم, وايه دا(كلمة آخيرة بقة ( يييييييييييه) استحملو استحملوا بعلمكوا الصبر) نستحمل ايه, دا احنا ما بنستحمل تغيبى عنا بكتاباتك, وعلى فكره .. انا كنت قاعده اتكلم عليكى النهارد ه, انا ومياده... وملخص اللى اتقال انك( عثل وثكر وثربات خالث. والبوست تحفه, روعه, جميل هههههههههههههههههههههههههههههههههههههههههههه يلالا بقى اتحملينى, دمتى سالمه يا قمورتى... فى انتظار المزيد اختك حنين
محمد حلمي مخلوف
اولا مفيش داعي للشكر انها الحقيقة
ثانياً : مناظر مناظر
مش حكاية اعتزاز ولا استكبار
مدام هتعلم يبقى اية المانع
اكيد طبعاً مادام الواحد بيعرف غلطة بيتفاداه بعدين
و بيكتشف اخطاء جديدة كل ما بيطور نفسة
وكل ما الواحد بيتعلم الاخطاء اللي بيكتشفها بتبقي دقيقة قوي
مع ان في الاول بتبقي اخطاء جسيمة
بالنسبة لأديبة : بالنسبالي أنا معتقدش
لإني مبقراش كتير
ومبحبش القراية
ولازم الاديب يكون قاري و فاهم وواعي
أنا مش كدة
ومعنديش حب القراءة الدؤوبة دية
بالنسبة لكلام و خلاص
ربنا يعزها يا ر بو يكرمها و تبقي من الادباء العالميين كمان
مش بعيد علي ربنا
نورتني يا فندم
ربنا يعزك وي كرمك و يقويك
دمت سالم
............
حنين
شوفتيني وانا بالتاج : قمر صح ( ليلة 28 ههههههههههههه)
آة اومال البسوا لوحدي
أنا قولت من زمان ان رسمتي عبقرية
ههههههههههههههه
يخربيت الغرور
آديكي قولتيها بنفسك
طلعوا أربعة
محدش عارف الخير فين يا حنونة
انتي هتدبسيني ليه متفكري انتي
شكلك مخك واعي ومزهزه
فكري فكري وانا معاك يا ريس
الله يخليكي ( ببتكثفيني كدة)
وانا اقووووووووووووول
فروتي مالها هفتانة و خسانة كدة لية
بترغو من ورايا
ماشي ماشي
ربنا يخليكوا يا رب
دية بس مناظر
أنا مش عسولة خالص علي فكرة
يعني انا أليفة مع الناس خارج نطاق اسرتي بس
نورتيني يا فندم
دمتي سالمة
.............
سلامٌ عليكما
يا ترى لو كتبت
بوست جااااااااااااااااااااااااااااااااااامد مووووووووووووت
ورووووووووووووووووووووووووووعة
يبقى انا قريت البوست وفهمته
معتقدش
====================
الحاجات اللى مش عاجباك فى المدونات كلنا بنعملها كتير
سعات بنكون مستعجلين وعاوزين نسجل حضور وخلاص
وسعات بنكون زهقانين
مش من الموضوع طبعا
وساعات بنفرأ الموضوع ومنلاقيش كلمة نعلق عليه بيها
مش كدة برضو
===============
على فكرة انا قاعد على البلوج بتاعى طول اليوم
واى كلمة هاتردى بيها على التعلق هاقرأها
يللا سلامم
شكرا غلى تعليقك فى مدونتى
نعكشة هانم
مبارك عليك التاج يا فندم
" معلش مبارك هى الأصح لغويا "
بالنسبة للحاجات اللى إستفتديها من التدوين
أكيد فى حاجات كتير
بس هى مش بتبقى واضحة أوى
حتحسى بيها لما يجى موقف معين و تستخدميها
صدقينى
عن تجربة
نعكشه بصى هقولك حاجه
انك تعملى تعليق كويس يناقش الموضوع بطريقه موضوعيه نقديه سواء ايجابيه او سلبيه
تنفع شعر :)
المهم ده موهبه مش كل الناس عندها
فى ناس تعرف تكتب بوست هايل ورائع بس مبتعرفش تعلق بتحس ان الموضوع كامل وعاجبها اوى ومش عايزه تقول اكتر من انه عجبها وان اسلوبك جميل
عارفه لما تقرى مسرحيه لشكسبير وتحسى انك عايزه بس تقومى تصقفى ومعندكيش اى تعليق
اهو ده فى منه كتييييييييييير
تحياتى
واااااااو تحفة مووووووووووت....
سك سك........ما تزعليش من حكاية تحفة مووت دي انا بس برخم ولوو انها اول زيارة بس معلش يعني طريقة تعارف جديدة.......بجد عجبتني اجاباتك اوي ولو ان نص الحجات انتي مش فاكراها بس احسن من انك كنتي قلتي كلام وخلاص.عجبتني كمان حكاية انك بتكرهي حد يعلق ويقلك حلوة موووت ويمشي (اللي انا عملتها دي) عندك حق انا كمان مش بحبها لاني بحس ان اللي كتبها .كان بيادي واجب وخلاص ولو ان احيانا الواحد فعلا بيبقى عنده كلام كتير.كتير اوي ومع ذلك في الاخر بيكتب حلوة مووووت ويمشي........
كمان عجبني الملاحظات الاخيرة .حلو ان الواحد يكون عنده استعداد لتقبل الراي الاخر كده.....
بس معلش يعني كان نفسي المدونات اللي كتبتيها في الاخر كنتي كتبتي اللينكات بتاعتها عشان الواحد يعرف يروح هناك لكن يلا مش مشكلة ندور احنا....
.........معلش عارفة اني رغاية بس ما انتي كتبتي كتيييييييييييير
الف الفين مبروك
يا نعكشة
عالتاج
وعقبال تاج الإمارة
ودمت بخير
ايه الحلاوة ديه
ياااااااااااااااااااه
عظمة على عظمة
هههههه
لا بجد يا نعكشة انت من اكتر الناس اللى شوفتها
فى المدونات اللى بتحب النقاش وبتح الناس تنقد اللى بتكتبه
مش بتستنى الشكر والمجملات
ربنا يكملك بعقلك كده يارب
والتاج بقة هخده بس هرد عليه كمان حبة كده
عشان ميبقاش تاجين ورا بعض الناس هتربضنى كده
والحقى خدى التاج اللى عندى عشان واقف صف تانى
وممكن يتشال بسرعة بقة
سلام
ازيك يا نعكشه
منوره الدنيا
تاج حلو
واجباتك جميله
اسعدنى مرورك
ويارب يديم التواصل
دمتى بالف خير
جيتى على نفسك يا نعكشه ياختى..
شيلتينى الهم بدرى..ورميتيلى التاج..
3 تيجان فى اسبوع واحد..
منهم تاجين فى يوم واحد؟
ده لو واحده بتزرب عيال متجيبش كل ده..عاااااااااااااا..
ده حتى النت جاله زعر..كل شويه يفصل مش عارفه ارد عليكى..من ساعه ما كانت التعليقات لسه زيرو حياتك..
اه الصدمه نستنى ارد على التاج بتاعك..
انا من ساعتها هلكانه من الضحك..
اى نعم فيكى شويه جهجاهون بس حلو بحب انا الجهجاهون ده..بس اهم حاجه ان الجهجاهون ده بييجى ووراه حاجه مفيده مش اى حاجه والسلام..
وخليكى على الجهجاهون بتاعك بحب اقراه هههههههه..والله بحس انك بتفيدينى جامد..
وربنا يسامحك على العيل اللى رميتيهولى على باب المدونه وجريتى ععععععععااااااااا..
انتى عقلك متفتح أوى نعكشه والمناقشة الى انتى اتكلمتى عليها فى التاج دى من أحب الأشياء التى ترفع قيمة المدون فى أعين الآخرين فالعقاد كان يرى أن النقد هو الذى يعطيه وزنه الحقيقى بين البشر ولكن ماهو النقد ياترى
النقد فى اللغة هو التميز بين الحسن والسئ أى انه يمكن أن ننقد الشخص بأنه حسن ويمكننا أن ننقده بأنه سئ وهذا ما يستخدمه كبار نقاد الأدب والسنيما بالفعل وأنا أنقد التدوينه والتاج بأنه من أفضل التاجات الى قرأتها أحسست فيه بالصدق بحق ولوأنى بصراحه لم أكن أرتاح لقراءة التاجات
أنا مشفتش أن تعليق طلع على الصفحة الرئيسية فى البوست اللى فات بصراحه أنا كنت سعيد جدا جدا شكرا ليكى نعكشة
مصطفى
هاهاهاهاهاها
و الله و توجوكي يا بت يا نعكشه
ههههههههههههه
<<< تتشمت
بس ليه ليه ليه
انا عملت ايه
ليه تلبسيني التاق؟؟
حاظر
انتي تؤمري امر
:)
امممممم
اجابات غريبة شوية ..شعور بالتحفظ..
لكن ع العموم تاجك ظريف اوي..
اشكرك على الاشادة بمدونتي المتواضعة...
وشكرا انك حليتي التاج ومنفضتيش..
دمت بخير..
اولا ازاي اتكتب 19 تعليق وانا لسة معرفش انك كتبتي موضوع جديد
الظاهر لما حطيتك فوق في حتة الناس المميزين مش واخدة بالي مين اللي كتب
يعني انولك تاني تحت مع عامة الشعب ولا ايه ؟؟؟
المهم يا ستي انتي كل حاجة بتكتبيها حلوة
وعشان النفاق هقوللك فيه حلو اوي اوي وفيه حلو بس
ها
كويس كدة ؟.
ثانيا بقي انا متشكرة جدا علي رايك فيا
ورغم اني اكبر منك بشوية لكن بحترم كلامك جدا وبحس انك شخص ناضج وعاقل رغم التعبير الساخر عن بعض القضايا
لكن في الداخل ينبض القلب بالصدق
مش عارفة اقول ايه لاني فعلا متشكرة جدا ليكي
وطبعا احلي حاجة في التاجات انك ممكن تعرفي حاجة مكنتيش عارفاها عن اشخاص مش بتقابليهم في الحقيقة
وده اللي حصل
بس بيخلينا نقرب من بعض اكتر
لكي كل التحية
وادام الله الود
لو شكلك بالتاج يا نعكشه زى الصوره كده يبقى حلو جدا وربنا يكون فى عونه بقى.أكتر حاجه عجبتنى فى التاج انك مزعلتيش حد منك خاااالص. منتهى الدبلوماسيه والذكاء الاجتماعى. متهيألى كل اللى دخل عندك المدونه ولو مره حيلاقى اسم مدونته موجود فى مكان ما فى البوست. على فكره انا بحترم جدا الذكاء الاجتماعى. أنا مقدر جدا نرفزتك من موضوع حلو وروعه والسلام عليكم بصراحه حاجه تحرق الدم. أنا منساش انك أول مره تدخلى عندى المدونه مشيتى على بوست بوست او على رأيك بتاع بتاع تعلقى عليه ومش أى تعليق لا تعليقات تدل على انك بتقرى بتمعن وبفهم والتعليق عاوز مناقشه طويله لوحده. بجد وقتها قدرت جدا تفكيرك وأحترمتها فيكى. من الحاجات الجميله كمان فى التاج عندك البساطه والتلقائيه الشديده جدا والملحوظه قوى. ياترى حتفضل معاكى بعد ما تتخرجى يا نعكشه؟ كتير من أصدقائى فقدوها تماما بعد ما اتخرجوا وبقوا دكاتره. تقريبا متطلبات المهنه. أوعى تفقديها. أجمل حاجه فى أهداء التاج ليا انه مش نوعية التاجات اللى بتقول اذكر 16 صفه عن نفسك ولا 32 سر فى شخصيتك. الأسئله فى التاج ده محدده واضحه ومش عاوزه افتكاسات وانشاء الله حقدمه فى اقرب فرصه.....خالص تحياتى واسف انى طولت عليكى....سلام
نعكشه... خسانه وهفتانه يا حبة عينى, طيب والله لاجيب سيرتك علطول..ههههههههههههههههه, ولازم تفكرى فى الموضوع من غصب عنك, اوامر جماهيرك بقى, وما عليكى اللى السمع والطاعه والتنفيذ, دمتى سالمه
سلام عليكم............
مبروووووووك يا نعكوشة بجد عجبتني ردودك جدا وفطست علي روحي من الضحك ماعرفش ليه انا حاسة ان وانتي بتكتبي بتتخانقي مع حد ههههههههه اه والله او غالبا بتتخانقي من نعكشة نفسها
وعاجبني فيكي جدا ان ذهنك متفتح وعندك استعداد تعرفي راي الاخرين بكل صراحة وبتقبلي النقض مش زي ناس تاني عايزين باستمرار الواحد يصقف لهم عالحلو والوحش
انا لسه جديدة في عالم التدوين وبجد باتعلم منك كتيييييييييييييير
استمري استمري الي الامام يا روميل قصدي يا نعكوشة
والف مبروووووووووووك
الله المستعان
ولو اني اتذكرت كدة في كلمة عابرة سريعة.. لكن شرف كبيييييير ليا يا نعكشة اني سموك تفتكري مدونتي المتواضعة
بصي هو عالم التدوين ده فيه مزايا كتير وفيه عيوب قليلة،من المزايا انك بتتعرفي على آراء وأفكار ناس، اغلبهم طبعا شباب، وبتناقشي معاهم افكارك، بتلاقي مساحة كويسة لعرض افكارك ومواهبك.. ودي كلها حاجات كويسة.. وكفاية ان العالم ده عرفنى بانسانة جميلة وعندها مواهب رائعة في الرسم زي سموك.
بالمناسبة انا مش فهمت حاجة من الرسمة اللي في البوست.. دي تاج ولا صورة وش منعكش..هههههههه
متشكر جدا على التاج وانشاء الله اجاوبه في أقرب فرصة
تحياتي
نعكشة ان كتير بدخل وااقرا البوست ويعجبنى وفى الاخر بحي الشخص ده على البوست بتاعه يعنى مش بحب ارغى كتير ولو البوست معجبانيش مش بعلق اصلا واكيد فى ناس زى كتير ومتهيالى ديه حاجة متزعلش ولا ايه يا قمر وعلى فكرة شكلك حلو اوى بالتاج تحياتى
الف مبروك ع التاج
وبجد اكتر حد حسيتو صادق وهو بيتكلم ف تاج
مفيش تذويق ولا لف ودوران ولا مجاملات
بجد حقيقية يانعكشة
تحياتى ليكى ياقمر
السلام عليكم
ربنا يوفقك انت الحاجة اللى لحظتها انك بتحبى الجديد وبتحبى تغيرى من حولك وده شئ جميل وبتحي النقاش غيرك كتييير مش بيحبه ربنا يوفقك
بعد السلام عليكم
أزيك يا نعكشة
التاج جميل
وإجاباتك وصراحتك وتلقائيتك أجمل
أجمل شئ فيكى قابليتك للتعلم
وتقديرك للنقد
وتواضعك دا
وحبك للنقاش
واجمل حاجة في التاجات بتخلينى نتعرف علي اصحابها اكتر
ونعرف انهم شخيات ظريفة
أشكرك ياست نعكشة انك افتكرتينى
وهدية مقبولة ياستى رغم انى عندى تاجين في الاستبن
هههههههههههههه
تحياتى
واد غلبان
طيب السؤال؟؟؟ لية نسجل حضور و خلاص
يعني انا مش معترضة انك عايز تبقي موجود عشان الناس تعرف مدونتك ( انا ساعات بعلق عشان كدة انا لا انكر) بس تعليق في صميم الموضوع
يعني يحسس اللي كتب دة انه مكانش بيهرتل
او انه ساحة اعلانات بس
انك استفدت حاجة
لو مش عاجبك الموضوع يا متعلقش يا تعلق و تقول رأي صريح
لو زهقانين دية بقة مقدرش اتحكم في النفساويات ههههههههههه
مفيش اي حاجة بس انا كنت اعني ما قلته
و ربنا يوفقك يا رب في الكليه
دمت سالم
.................
جامعاوي روش طحن
ايون يا جامعاوي بيك
الله يبارك فيك ( طول عمري شكلي حلو ف ياللبس الملوكي )
ههههههههههههههه
ماهو انا عشان كدة قلت يمكن مش واخدة بالي
بس انا افتكرت ان كتاباتي و اسلوب رسمي اتطور
تسلم علي النصيحة
دمت سالم
............
بطوط حبوب
مش لازم يكون شعر
هوه انا قولت اشعرولي في اللي انا كاتباة
نا بقول انشالة تقولوا اية القرف دة اعملي دة افضل <<<< دة شعر؟؟؟؟؟؟
ناس موهوبة لما تحس باللي كتبه الكاتب
وانها تقول رأيها؟؟؟
منا مبعرفش اعبر عن نفسي كتير
بس لو هعلق بقول اللي حاساه
ساعات بتبقي مش قادر تقول غير جميلة جداً
ماشي انا مبقولش عايزة كل التعليقات مقالات
بس مش كل موضوعاتي بتبقي بروعة انك مش قادر تقول غير جميلة جداً
يلهوي انت بتقارني بشكسبيرررررررررررررر
يا عزيزي دة انا ببيع كبدة في عربية كارو لو قارنتني بشكسبير
انا مين انا عشان قصتي او موضوعي يبقي متكامل لدرجة ان اللي قدامي ميملكش غير التصفيق
عامتاً رأيك يستحق التقدير
وتسلم عليه
دمت سالم
..............
دواير
اكيد تحفة ههههههههههه
لأ كيكي عملتها فيا من شوية
اللي اتلسع من الشوربة
قشطة انا كمان رخمة بس رخامتي تفوق الوصف :D
انا مبعرفش اتكلم او اعبر عما بداخلي قوي فممكن دة السبب اني مش مركزة مش فاكرة او مش عارفة
تصدقي بالله : لا إله إلا الله
فيه بوستات كتير ببقى قريتها
وببقى حاسة اني لو دخلت صفحة التعليقات هقول و اقول و اقول
بس مبعرفش اقول حاجة
و في الاخر يا بمشي و مكتبش تعليق يا بقول كلمة واحدة بس من اللي في بالي
بس يبقي الناس كلها الكلمة اللي في بالهم تحفة قوي
لأ كتير كدة علي اختلاف عقليات البشر
منا قولت يقولي سواء عملتها خد ثوابي
معملتهاش عرفت صفة عني لإني مبلاحظش نفسي كويس
صراحة انا كنت تعبت خالص
بس لو عايزة اللي ينكات ممكن تدعبسي في البلوجات اللي عندي علي الشمال هتلاقي اللي قولتهم هناك
ولا رغاية ولا حاجة
معاكي ملكة الرغي المحلي و الدولي
ههههههههههههههههه
نورتيني يا فندم
دمتي سالمة
.............
علم الهسس
الله يبارك فيك
دمت سالم
...............
سبعة seven
الله يكرمك
من جهة العقل فهوه سايح صراحة
ربنا يعينا بقة
جاوبوا وقت ما تحب يا فندم
التاج تاجك
نورتني
عليكم السلام و رحمة الله و بركاتة
دمت سالم
.............
فارس بلا جواد
بخير احمد ربي
تسلم
دمت سالم
...............
ميادة رفعت
اة اومال اشيلو لوحدي
وبعدين عشان تفرحي بالمدوننة بتاعتك بقة هههههههههههههه
يابنتي لازم تحسي بالفرق
هههههههههههههههه لأ شكلة كان مزعور مزعور يعني
ربنا يعزك يا رب
اة يا اوختي الجهجاهون دة اللي مدوخني
يا ولد علي الجهجاهون المفيد دة
ربنا يخليكي يا رب
اللهم امين
استحملي استحملي
العيال مش وحشين برضو
بيجيبوا الضغط و السكر بس
هههههههههههههههههه
نورتيني
دمتي سالمة
............
فتى مصر EgyBoy
الله يكرمك علي الكلمتين دول
ماهو هوه دة قصدي
لو كل الناس اللي دخلت و قالتلي روعة و تحفة
انا مش هتغير
ومش هتطور
ومش هتحسن
انما لو ناس عجبهم الموضوع و ناس ناقشتني ناس قالت زدي من دية عشان حلوة نقصي من دية عشان وحشة
اكيد هستوفاد
الله يكرمك
لأ انا قريت تاجات تانية احسن من اجاباتي بكتييييييييييير
ربنا يسعد ايامك دايما
نورتني
دمت سالم
............
الظلام Darkness
هههههههههههههه
ماهو الدور هيجي عليكي برضو
اما نشووووووووووف اجاباتك انتيي
يحضرلك الخير يا رب
الامر لله يا غالية
نورتي
دمتي سالمة
..............
ميرو
غريبة من انهو اتجاة
مين اللي حاسس بالتحفظ انا ولا حضرتك؟؟؟
اتفضله
انا اللي بشكر حضرتك انك اتحتلي الفرشة اني ابعبر عن رأيي
ربنا يكرمك
دمت سالم
...........
كوشيااا
يا فندم انتي تنوري في أي وقت
انا من الشعب و إلي الشعب اعود
المهم
ايوة طبعاً انا اصلا كي بوردي بينقط شهد
هههههههههههههههههه
ثانياً بقة انها الحقيقة
الله يخليكي بتخجليني كدة
هما فية ناس القلب عندهم بينبض باستهبال
هههههههههههههههه
متشكرة علي اية اصلا انا مقولتش حاجة
والله مش دايماً الحقيقة بتبقي كاملة
وانا مهما قلت عن نفسي
فانا عندي نقاط كتير سوداء في حياتي
وده يبقى شرف ليا اننا نقرب من بعض اكتر
دمتي سالمة
.............
محمد داوود
ربتا يستر عليه هههههههههههههههه
مع اني طول عمري حاسة اني عندي غباء اجتماعي (يلا اكتشفت فيا صفة جديدة)
مش دايماً بمشي علي بوست بوست ف يالمدوننات بس مدونة حضرتك جميلة ماشاء الله
بس علي الاقل البوست اللي بقراه بعلق باللي حسيت بيه
مش عارفة هتفضل ولا لأ ... لاني لسة متخرجتش
هههههههههههه
وبعدين انا فيييييييين و التخرج فييييين
ربنا يستر محدش عارف هيحصل اية بكرة
اة انا حبيتو برضو
في الانتظار
خد راحتك علي الاخرررررررررر
عليكم السلام و رحمة الله و بركاتة
دمت سالم
.............
حنيييين
اة مكلتش إلا حلتين محشي بس
هههههههههههههههه
يابنتي فكري انتي بدالي
انا مليش في تشغيل الدماغ
فكري وانا معاكي بجد
جماهير مين هوه انا واقفة عالمرسح
هههههههه
انا اللي ذنبي هيبقي في رقبتك
فكري يا بنت
دمتي سالمة
...............
روميييييييييييييييييييييي
عليكم السلام و رحمة الله و بركاتة
الله يبارك فيكي يا سكرة
شوفتيني وانا بالتاج ههههههههه
ماهو انا و هيا قصدي نفسي دايماً نتخانق
نفسي نصطلح في مرة
ماهو انا هسخسر لو معرفتش راي الاخر
ومش هخسر لو عرفته
بل بالعكس هستفيد
طب لية متقبلوش
يلهوي بتتعلمي مني انا
:|
مملاقيتيش إلا نعكشة
حرام عليكي نفسك
ههههههههههههه
والله انتي سكر يا رومي
الله يبارك فيكي يا رب
دمتي سالمة
...............
في حب مصر
والله انا لو سابوني هفضل اتكلم كتير بس انا خوفت علي صحة المشاهد
ههههههههههههههههههه
مش عارفة ليه بحس اني متعرفتش علي افكار او امخاخ الناس قوي
ممكن دة نتيجة قصور مني
بس يمكن انا اتعرفت وانا مش حاسه
بس انا ببقي سعيدة وانا بتناقش مع حد و اقول افكاري وي قول افكارة
بس مبعرفش احللها يعني قوي
الله يكرمك يا رب دة شرف ليا انا
دة واحدة منعكشة والتاج بمبي علي الجمب
العفو يا فندم
اي وقت حضرتك تجاوبوا جاوبه
انه تاجك يا سيدي
دمت سالم
............
شاشة shasha
قد تكون كلمة قليلة جداً
بس تحسس اللي كتب انه فعلا البوست اتقرا و كان حلو
مرسيخ بكوز
دمتي سالمة
...............
دعاء مواجهات
الله يبارك فيكي يا جميلة
ربنا يعزك
بس فية كتير صادقيين
نورتيني
دمتي سالمة
..............
توتي tote
عليكم السلام و رحمة الله و بركاتة
اللهم امين
انا فعلا بحب الجديد برغم اني مش بقدر احصل عليه
لو اقدر اغير هغير
بس مش دايماً بعرف
بحب النقاش فعلاً
مش عارفة بس اعتقد اني اتكلمت مع ناس كتير و فية كتير بيحبوا النقاش برضو
اللهم امين
و يوفقنا جميعاً
آمين
...........
أبو صلاح
عليكم السلام و رحمة الله وبركاتة
بخير احمد ربي
الله يكرمك
انا اتعلمت حاجات كتير فعلاً
انا مش متواضعة كتير بيقولوا عليا متكبرة
عندك حق بالنسبة للتاجات
مفيش داعي للشكر
حضرتك تجاوبه وقت ما تحب
انه تاجك
دمت سالم
...........
سلامٌ عليكم
السلام عليكم
نعكشة يا شقية
برضه في اجابات تاجاتك منعكشة
ضحكتيني يا نعكوشة وانا كان نفسي الصراحة
تعليقات بتكرهيها
سوووووووو رائعة فظيعة
هههههههههههههههههه
وانا كمان
احبك في الله
بجد اجابات واقعية اوي واغلبها انا كمان بتفاعل معاها زيك
ربنا يبارك فيكي
الرسمة حلوة ارسمي وجربي فينا ولا يهمك
تحياتي
لسلام عليكم
انتي قصدك اني من الناس اللي ملت؟؟ ولا في حد تاني قالك كفاية بقة ارحمينا؟؟
بهزر طبعا دي كانت لحظات روعة من العمر بس التجديد مطلوب
لو ال Paint brush
بيعمل رسومات كده يبقى بلاش منه بجد وبلاش تلوث بصري
وتقريبا: هو تقريبا تاج يعني تعريف لشخصية جاية من كويسشن تاج
مش تاج اللي بيتلبس فالراس
بصراحة فرحت لانك حطتيني مع الناس الكويسة دول..ومدام كده يبقى ههريكي نقد وانسي انك تاخدي كلمة حلوة مني
وهقولك على حاجة هو مش هياخد باله منها
بس ردي عليا بجد
انتي بتفهمي الردود بتاعة محـ,ـمد حلـ,ـمى مخلــ,ــوف دي (طبعا الكومة , دي عشان لو بيعمل بحث مايلاقيش هنا)
قصدي الادبيات اللى بيكتبها مش الكلام بتاعنا ده؟
جهجهوني دي كلمة من ابتدائي اساسا.
انا حاسس فيكي حاجة وهي انك مش طيبة من جوة..فيكي شر كبير ...طبعا انتي انسانة كويسة وبتحاولي تكوني ملتزمة لكن دي حاجة انا حسيتها فيكي
حد فريب ليكي قال لك انك شرانية؟
تحياتي لكي
وتقبلي نقدي الجاف
ادم
صحيح
انا اخدت التاج ده
واوووو تحفه مووووت
عديتي
تجنني :D
مش دي الكومينتات اللي مش بتحبيها
بصي هقولك حاجه
فيه ناس بترد تعلق على النص
وفيه ناس بتعلق على شخصيتك
لكن مش معنى انهم بيعقلوا على شخصيتك انهم مش قروا النص....لا قروه وكويس كمان ووصلوا لحكم على كاتبه النص
انا متابعاكي على فكره من زمان
بحس ذهنك صاحي كده وحد دماغو نضيفه وعاليه اوي :)))))
عاشقة النقاب نونو
عليكم السلام و رحمة الله و بركاتة
اومال اية احنا بتوع النعاكيش :D
ربنا يسعدلك ايامك دايماً يا رب
ينهاري إية دة احبك في الله مرة واحدة :$
احبك الذي احببتيني فيه :$
ياكثوفي يا ولاد :$
اللهم آمين
هطلع فيكوا متخافيش
هههههههههههههههه
نورتيني
دمتي سالمة
................
آدم الغامض
إية السرقة العلني دية
مينفعش كدة لو سمحت رجع التاج
هههههههههههههه
إني امزح
امزح البلاط
هيع هيعهيع
المهم
هوه تقريبا أنا مليت قبلك
و حضرتك مليت بعدي فزهقت بقة
ههههههههههه
طول عمري بقول انك ملكش في الفن
دة فن رفيييييييييييع
:P
مليش دعوة تج علي الراس و خلاص
انا ملبستش تاج قبل كدة و عايزة البس مليش دعوة :(
ربنا يفرحك كمان وكمان
بس مش دول بس الكويسين
بجد انا من الناس اللي مبعرفش قوي معادن الناس
ومن جهة النقد
انقد يا عم احنا ورانا حاجة
:D
ادبياته : بص مش هقولك اني اول ما بقراها بفهمها علي طول
بس انا بحبس انها ممتعة مش عارفة لية في البداية
وبعدين بقراها مرة تانية
فبتتكشف ليا حاجات و ببقي سعيدة اكتر
انا عن نفسي من الناس اللي بتبقي سعيدة لما بتجهد نفسه عشان تفهم
انا بحس في كتاباته انه محتاج واحد واعي لكل كلمة و كل حرف
عاجباني حاجاتة صراحة
بس مثلا الرواية اللي كتب منها فصلين
انا جبتلوا الضغط وا لسكر و القلب عشان ارسم في مخي ملامحها
بس لما رسمتها حسيتها حلوة
عاجبني جدا لما بيتكلم عن المستقبل اكنه شايفة
ولما بيتكتب كنه فيلم
انا بحس انه ليه اسلوب مختلف
وانا بموت ف يالاختلاف
عايز تفهم هوه كاتب إية
قرا القصص بتعته وانت مروق كدة و ركز ف يكل كلمة
و بعدين اقراها تاني
هتلاقيها روعة
أنا قاموسي اللغوي يكاد يكون منعدم
انا فعلاً عندي ميول انحرافيه و دة سبب الصراع الدائم بيني و بين نفسي
بص هقولك علي حاجة
عارف لما تبقي مش عارف انت من جوه اية
لما تحس انك من جواك بيقولك و بيصرخ فيك قوم صليييييييي و انت ولا انت هنا
و في لحظة تانية لما تبقي قايم ساعة الاقامة من جوة يقولك لأ يابني ما لسة الوقت قدامك
للأسف انا كدة مش في الصلاة بس
بس اللي اعرفه عني اني عمري في حياتي ما اذيت الناس إلا لو كان لساني اللي عايز قطعة و في الاخر يعود علي نفسي
اللي فعلاً بأذيه هو نفسي
لأ قالولي متكبرة و مبذرة ينفعوا دول بدل شرانية؟؟؟؟؟
نفسي اعرف إية وجهة نظرك في الجاف يعني ماله الحبر ولا الرصاص
يلا خير
يا فندم المدوننة كلها بتاعت حضرتك
خذ منها ما شئت
دمت سالم
.................
أوما
لو بتعلق علي النص عمر النص ما هيبقي تحفة كل مرة
ولو بتعلق علي شخصيتي فأنا فيا العبر فعمري ما هبقي تحفة إلا لو قصدهم تحفة بمعني شتيمة
هههههههههههههههه
ولا صاحي ولا بتاع انا مخي زي المش عارف اية
خدتي عني فكرة وحشة
هههههههههههههه
نورتيني يا فندم
و ليا الشرف ان حضرتك تتابعيني
دمتي سالمة
.............
سلامٌ عليكم
أكتر حاجة عجبتنى فى التاج ده هو إن كل الإجابات حسيت إنها خارجة من جواكى على طول على الكيبورد من غير تزويق ولا حذف وإضافة وده اللى شدنى أكمل قرايته للاخر وعجبنى كمان إنك قولتى فى الآخر على شوية مدونات بتحبيها وبتشوفى فيها حاجات كويسة وأول ما أخلص تعليق هاروح على طول أبص عليهم.
لا بقى انا زعلانة....كده برضوا اسمى مش مكتوب
ماشى
على العموم الاجابات نموذجيه بس اوعى تنسينى
هههههههههههههههه
مش فكره مقارنتك بشكسبير -رغم انه هيفرح لما يعرف - انما هى فكره انك لقيت موضوع حلو ومش عارف تعلق عليه
بتحصل والله
:) :) D:
نعكشه اولا سامحينى على غيابى وتقضيرى فى البوستين اللى فاتوا
بس انا قريت اللى فاتنى وكتاباتك جميله وبتشدنى بجد
بس انا للاسف الويندوز بتاعى ضرب ( بعد الشر عن السامعين ) والصفحه شكلها تحفه اساسا وانا مش عارفه انا بكتب ايه بس ربك يسهل بقى وانزل ويندوز جديد
المهم
انا طبعا مش جديده بس كنت لما بقرا تاج مش بفهم حكايته ايه بالظبط
ودى اول مره اشوف فيها اسم مخترع التاج
كويس اوى
بس اعتقد بما ان اسمه اتذكر ان التاج لسه حديث الاختراع ههههههههههههههههه
عموما اسئلته حلوه فعلا
وياريت كان بيتذكر اسم مخترع اى تاج تانى برضه
بس ما علينا
المهم
بالنسبالك انتى بقى
احلى حاجه انك تلاقى تعليق بيناقشك فى وجهة نظرك
حتى لو بيضادها
تحسى انه قرا ما بين السطور وفاهم انتى عايزه تقولى ايه
بيقرب من جواكى اكتر
مش مجرد يكتب تعليق ويعلن عن مدونته ويمشى
انا ذيك بكون منتظره مناقشه فى صميم الموضوع
وبكون سعيده جدا لو تعليق واحد وفى الصميم عن عدد كبير من التعليقات ومفيهاش اللى كنت منتظراه
ربنا يوفقك يانعكشه :)
يا بنتى حرام عليكى
إنتى شردتى البنى آدمين
أنا كمان بحب المناقشات والخناقات والحاجات دى
بس هقولك على حاجة
مش بالضرورة تستنى من الجميع المناقشة ,لإن أحيانا وبالذات فى الأعمال الأدبية بيكون الإستمتاع بقراءة ما هو جيد غالب على التفتيش فى الأمور النقدية
يعنى دا رأيي
وياستى
كلامك رااااااااااااااااااااائع
أى خدمة
d:
قلب مصري
للأسف مبعرفش ابعبر بالكلام العاتدي بنظام زي الناس الطبيعيين
بس جميل ان النعكشة عجبت حضرتك
فيه مدونات كتير جداً روعة بس انا مقدرتش اكتبهم كلهم
نورتني يا فندم
دمت سالم
..............
عروسة ننوسة
صراحة مكانش هينفع اكتب كل الناس في البوست وإلا هيبقي من هنا لبكرة بقة
نورتيني يا فندم
دمتي سالمة
...............
بطوط حبوب
بتحصل اوكية بس مش في كل المواضيييييييييع
دمت سالم
............
أمل
ياعيني ربنا يعينك يا رب و ان شاء الله تنزلي الوندوز و يبقي فُله
ثانياً حضرتك تنوريني اي وقت
وتسلميلي يا رب
بالنسبة للموضوع
انتي فاهماني جداً جداً جداً
بالنسبة للمخترع
أصل أنا شهدت واقعة التنزيل
قفشته و هوه منزلة
هههههههههه
فعلاً ببقي ساعات عايزة اعرف مين اللي نزل التاج دة
خير خير
نورتيني ا فنم
و ربنا يشفي الكمبيوتر بتاعك
دمتي سالمة
.............
فزلوكة
معلش أنا فضيحة طول عمري :D
قشطة ....... يلا نتخانق بقة
هههههههههههههه
اكيد مش بستنى من الجميع
بس بحبها برضو
طبعاً رائع من غير ما تقوللي
هههههههههههههههههههههههه
بهرج بهرج
نورتيني يا فندم
دمتي سالمة
.........
سلامٌ عليكم
مبروك عليكي التتويج يا نعكشة ، بس عجبتني إجاباتك ، و أكتر حاجة باحترمها في المدون إنه يكون بيكتب من دماغه ، يعني اللي بيفكر فيه أو اللي حاسس بيه ، مش كتابة و خلاص ، بغض النظر عن إتجاهه الفكري ، و إنتي من النوع ده ، باحس بكده في موضوعاتك و تعليقاتك ..
لكن قصدك إيه إني باتكلم كلام كبير ؟ أصل دي تتفهم بطريقتين :) لكن على العموم أشكرك على ذكر رحايا العمر ضمن المدونات اللي عاجباكي ، و أرجو إنك تتعمقي يمكن تعجبك أكتر :))
اول مرة أجي مدونتك
وكويس اني جيت علي التاج وعرفت رأيك في التدوين , التعليقات اللي بتدايقك انا برده كنت اتكلمت عن الموضوع دا لما جاوبت التاج معاكي حق طبعا
وعلي فكرة انا ما زهقتش وكملت الموضوع للأخر , اسلوبك من غير مجاملات مش بيزهق بالعكس
ان شاء الله مش هتبقي اخر زيارة واتمني يكون فيه بينا تواصل دايما
بس هو جمع تيجان ولا تاجات :)
السلام عليكم ورحمة الله وبركاته
تعرفى ايه اول حاجه لفتت نظرى من اسم مدونتك
هو انو انتى اسمك نعكشة وانا اسمى توكا
شكلنا حنكمل بعض
انا اول مره أزور مدونتك
ومعلش لو أتأخرت بس أعذرينى اصلى ما بعرفش اعرف ناس كتير لانى مش حقدر اوفيهم حقهم من متابعة مدوناتهم والتعليق
المهم
ضحكتينى كتير اوى
لانو انتى اللى بيجى على بالك بتقوليه
ضحكتينى اوى وانتى بتقولى انا عرفت الكلمة دى من واحد كان بيورينا بيت الصيف اللى فات (على حد ما أتذكر ) شكلك كده طيبه اوى وبتقولى كل اللى بيجى على بالك من غير ما تفكرى
وعجبنى بردو انك عارفه مدونات كتير وشكلك كده مابتقصريش فى حد
وبالرغم انك فى طب
ربنا يوفقك يا نعكوشه ويسعدك
بس انا بجد سعيده بزيارتى ليكى
أختك توكا
يا نهار اسوح كل دة تاخير انا لو مكانك اطالب بعنقى واعدمنى فى ميدان المدونة العام...........
عارفة يا نعكوشة اجاباتك مبتكرة جدا جدا مستحيل تتوقعى الاجابة لانها مش نمطية ابدا........
احلى نعكوشة
اذييكى اية الكلام الجامد دة كلة
والله انتى سكرة وعثل
وشخصية شربات
وحلو اوى التصميم بتاعك بتاع التاج
عقبال التاااج 1000
يا يا نعكش انتى فين..
عندى ليكى تاج ههههههههههه..
معلش يا ست الحاجه هنتجل عليكى..
وكام تدين تداااااااااااااان..ههههههههه..
تحياتى..
يا كرمك يا نعكشة ..
و يا جمال كلامك و بساطته ..
:)
أحمد كمال
الله يبارك فيك
مع اني ساعات مبحبش اسلوبي دة لاني بحس انه مش منمق
بس تسلم علي رأي حضرتك
هوه أنا مش فاهماها غير بطريقة واحدة ان حضرتك شخص مخك كبير و طريقة مواضيعك تحس انها راقية كدة
مش عارفة اعبر صراحة
وان شاء الله هتوغل في مدونة حضرتك
وتسلم عالدعوة
ربنا يكرم حضرتك
دمت سالم
..............
توكة
هههههههههههههههههههههههههههههههههههه
:D
اول مرة الاحظها
بس محتاجين شخص ثالت يبقي دور المشط
ههههههههه
بقول اللي علي بالي من غير ما افكر
دة مش حلو علي فكرة :(
سعيدة اني ادخلت السرور علي قلبك
انا في الاجازة
وبعدين انا لِعَبية كتيييييييير
هههههههههههه
عشان كدة معظم وقتي عالجهاز
اللهم امين
تسلمي يا رب
نورتيني حقاً
دمتي سالمة
..............
انجي
يا فندم انتي تيجي أي وقت يعجبك
مش بإرادتي
هههههههههههههه
دمتي سالمة
............
نونو
الله يكرمك
و يخليكي
تسلمي يا رب
دمتي سالمة
..................
ميادة رفعت
انا هنا هنا يا بنت الحلاااااااال
روحت هناك خلاص
دمتي سالمة
.........
سلامٌ عليكم
قهوة بالفانيا شيماء علي
الله يكرمك
تسلمي
دمتي سالمة
سلامٌ عليكي
لا أنا اللي حاسس بالتحفظ من الاجابات ..
لا عليكي اختاه
دمتي بخير :)
ميرو
مش عارفة بس انا مجاش علي بالي اجابات تانية
يمكن انا من جوايا مُتحَفِظة بقة
مش عارف
اني وايز طيب
سلام عليكم
نعكشه
انا جيت علشان اتحفك بأحاسيسى
ههههههه
اجاباتك فعلا تلقائيه
و بخصوص موضوع التعليقات المختصره بتاعة روعة و حلوة و الكلام ده
هو ساعات انتى بتلاقى نفسك مضطره تعملى كده
يعنى لو حد كتب موضوع سياسى مثلا و انا موافقه على رايه
ممكن ما الاقيش كلام اكتبه فاكتب اى حاجه
او ساعات يبقى البوست عادى بس تلاقى الكلام يهرب منك و بجد ما تبقيش عارفه تقولى ايه
او الحل التانى انى اخرج من غير ما أسيب تعليق
و بيعجبنى فيكى انك بتتقبلى النقد و لما حد بيننقد حاجه بتقعدى تتناقشى معاه و ليكى صبر كده
و متشكره على التاج
يعنى يبقى اسئلة و امتحانات فى الكلية و على المدونة كمان
و لا علشان انتى فى الاجازه و مش حاسه باللى بيحصل فينا
ربنا يوفقك ان شاء الله
السلام عليكم
نعكوشة الجميلة
التاج ده على فكرة متميز جدا واللى ألفه يستاهل تحية. أعتقد انك من غير ما تدرى اتعلمتى كتير وبرضه اكيد الناس اتعلمت منك لان التدوين فى النهاية تبادل آراء وأفكار وخبرات.
أنا كمان فى تعليقات زى اللى قلتى عليها بتفرسنى وبحس انها مش حقيقية مجرد مجاملة والواحد نفسه حد يقوله الحقيقة وطبعا فيه ناس كتير بتعمل كده.
وفى النهاية انا فعلا مقتنعة ان التدوين اكثر فائدة من الشات
تحياتى
السلام عليكم ورحمه الله وبركاته
صديقتى نعكشه
بجد التاج جميل اوى بردك العفوى
وفى حاجه بجد انا عايز اقولها
انتِ رغايه جداااااااااااااااااااااااااا بجد
وربنايكون فى عون الاسره والزوج ان شاء الله والاولاد
ههههههههههههه
دمتى بكل خير وسعاده وراحه بال
والله الموفق
عجبتنى اوى صورة التاج اللى انتى رسمتيه
قليل أن أشكرك ..
لأنه خلف خفة الدم هذه شعور حساس يحب كل الناس
هو بالأحرى شعور فنانة ترسم بالكلمة أيضا
بنت مصرية
الله يكرمك يا رب
بس لو بوست سياسي ولا حاجة لو قولتي اتفق مع حضرتك و أهيه اجابة مختصرة جداً
تعبر ان حضرتك قريتي البوست
حتى لو كنتي جوبتي البوست بعينك بس
بس عرفتي الملخص
انما بوست عادي و تقولي
جميلة جدا
طيب شكر اقول انا اية
طيب ميرسي
بس
بالنسبة للنقد فعادي يعني مش عارفة بترفضوه ليه
دة الواحد ما بيصدق حد يقوله عيوبة
يبنتي مفيش شكر
و ربنا يعينك يا رب
شدي حيلك انتي بس
في حفظ الله
................
جنة
مليش دعوة بأول جملة بس ربنا يكرمه يا رب
عشان كدة قلت مش واخدة بالي
شعور متبادل يعني
انا كمان اقتنعت بكدة
نورتيني يا فندم
في حفظ الله
....................
التائب الحائر
عليكم السلام و رحمة الله و بركاتة
الله يكرمك
دية حاجة انا عارفاها
اللهم امين ( تسلم عالدعوة)
اللهم امين
في حفظ الله
...............
موناليزا
اتفضليها
في حفظ الله
................
شريف
مفيش شكر علي حاجة
مش عارفة المفروض ارد بإية
بس انا مش طيبة قوي كدة
تسلم ربنا يكرمك
بس انا لا استحق هذا الكلام
في حفظ الله
..............
سلام عليكم
مبروك التاج لكن انا زعلانة موووووووووووووت اسمى مش مكتوب
هل تسمح لي بأن امرر لك كراسة الواجب
تفضل بزيارة مدونتي لتعرف الشروط والتفاصيل
هههههههههههههههههههه
ايه التاج المحرج دا , انا مابحبش التاجات اللى بتطلب اسماء دى , بتحرجنى , بابقى عايزة اكتب كل الناس , وبحس انى حتى لو كتبتهم هابقى ناسية ناس برده
انا مش عارفه انتى قافله التعليقات على الموضوع الجديد.
ولا فى ايه , انا مش عارفه اعلق
ولو انتى قافله التعليقات افتحيها
عشان احنا كمان نفضقض معاكىىىىىىىىىى
بالله عليكى
بالله عليكى
حنين
السلام عليكم
أولاً اذيك يارب تكوني بخير
أنا جاية عشان أعرفك بمجلة علّي صوتك
أصدقائنا وأعزائنا المدونون
الآن
مجلة علّي صوتك
مجلة المدونين
منهم وإليهم
لينكها http://3allisotak.net/
انتى مش منشطة التعليقات فى البوست اللى فوق ليه
عموما هى حالة وهتعدى
هو من وقت للتانى الواحد لازم يكون له وقفة مع نفسه على الاقل علشان يصحح مفاهيمه ويتصالح مع الدنيا
ابقى طمنينا عليكى
نعكوشتى الجميله انتى مختفيه فين ياقمر يارب تكونى بخير وتكونى احسن وعديتى فتره البوست اللى فات
>>>>>>>.نعكشه والله انت كدا قلقتنى عليكى بجد
با لله عليكى ادخلى طمنيننا.
نعكشه
نعكشه
يا بنتى
نعكشه
سوري اني مردتش عالتعليقات
معلش
عروسة ننوسة
المرة الجاية ان شاء الله
الله يبارك فيكي
دمتي سالمة
................
احمد حشمت
تسلم
نورتني
دمت سالم
...................
زي الهوا
انا قلت علي سبيل المثال و ليس الحصر
دمتي سالمة
........................
حنين
ممممممممممممممم
ربنا يعزك يا قمر
بس فعلا دية مجرد فضفضة مع مدونتي
مش اكتر
مجرد فضفضة
ربنا يكرمك يا رب
دمتي سالمة
.............
غير معرف
عليكم السلام
بخير احمد ربي
تسلم عالدعوة
دمت سالم
.................
قطة الصحراء
الحمد لله علي كل حال
وانا افضل حالا دلوقتي
تسلمي يا جميلة
دمتي سالمة
................
سمر الشافعي
معلش عندي حالة ملل
تسلمي عالسؤال
دمتي سالمة
..................
حنين
انا افضل حالاً دلوقتي
الحمد لله
بس انا عندي حالة ملل
تسلمي عالسؤال
دمتي سالمة
..........
سلام عليكم
ازيك ياقمر عاملة اية
معظمنا فية لاحاجات الى قولتيها دى
انا بعلق ع بوست الى بتفضفضى فية
واحب اقولك
اكثرى من ذكر الله مع الاصرار على التوبة من اى ذنب مهما كان بسيط
وادعى كتير اوى لنفسك وللناس بنية خالصة
وسيفرج الله همك ان شاء تعالى
(ولا تهنوا ولا تحزنوا وانتم الأعلون)
ربنا يعينك
سلااام
good blog
good posts
thx u
طيب انا عايز أعلف على البوست الجديد اللي فوق أعمل ايه؟؟؟؟؟؟؟؟؟؟؟؟؟؟؟؟؟؟؟؟؟؟
وبعدين انتي مختفية كدة ليه؟؟ يارب يكون المانع خير
بعد السلام عليكم
أزيك دلوقتى يا نعكشة ؟
عاملة ايه ؟
يارب تكونى بخير
معلش أنا أسف لغيابى لأنى كنت مسافر
ومعلش برضه أنتى قافلة تعليقات البوست الأخير
فبعد أذنك هأعلق هنا
هونى على نفسك يا نعكشة
أنت أفضل حالا من ناس كتير
أنتى أفضل من ناس عايشين فى غفلة .. قلوبهم ماتت وتوارت فى التراب
كلامك دليل على أنك مش فى غفلة
ولذلك فهونى على نفسك وبلاش جلد الذات
كل أبن أدم خطاء .. وخير الخطائين التوابين
لو لم نكن نخطئ لأبدلنا الله بقوم يخطئوا فيتوبوا
بسم الله الرحمن الرحيم
"قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور ارحيم"
شوفتى كلمة جميعا دى يا نعكشة .. شوفتى رحمة ربنا أد أيه .. يبقي هنيجى احنا بقي ونيأس من رحمته
كثرة المعاصى تميت القلب .. وكثرة الاستغفار يذيب الذنوب
أسال الله لكى ولنا أن يزيدنا من خير زاده - التقوى - فمن يتق الله يجعل له مخرجا ويرزقه من حيث لا يحتسب
تحياتى
السلام عليكي يانعكشة
انا التعليق رقم 71 بس واثقة انك هتقريه برضه
اولا حاسة انك بتمري بحالة نفسية شبيهة باللي انا بمر بيها ده من خلال البوست الاخير اللي مش لاقياله مكان اعلق فيه ولاني زيك حاليا فمش عارفة اقوللك ايه غير ان رمضان جاي ويمكن يكون فرصة لينا نصلح حاجات كتير بس لازم نحاول .... انا معاكي شجعيني
ثانيا : بالنسبة لردودك علي اسئلة التاج هقوللك الحقيقة : انا عمري ماعلقت علي بوست زي ده لحد بس المرة دي فعلا لاحظت قد ايه انتي بجد علي سجيتك وتلقائية وبتتعاملي ببساطة ودي من الحاجات اللي مفتقداها كتير ... ده حتي الشخص اللي علمني يعني ايه بساطة وازاي اكون بسيطة هو نفسه بقي من اكثر الشخصيات تعقيدا
المهم انتي وحشتيني وعاوزة اقوللك حاجة بقالي كتير مقلتهاش لحد
اني احبك في الله
وشكرا لان كلامك في البوست الاخير خلاني احس بشوية تفاؤل لاني حسيت انها حالة عابرة اكيد وفيه ناس كتير بتمر بيها
اسفة طولت عليكي
تحياتي ليكي ودعواتي
دعاء مواجهات
إن شاء الله هكثر من الذكر
و تسلميلي يا رب
ربنا يخليكي يا جميلة
نورتي بكلامك
دمتي سالمة
................
steel beauty
tnx
...................
ابو صلاح
حمد الله علي سلامة حضرتك
انا بخير احمد ربي كتيير
ربنا يخليك عالكلام
فعلاً سبحان الله
لو الواحد استسلم للموضوع هيجر رجله في سكك غريبة
ربنا يغفرلنا و يرحمنا
تسم عالتذكرة
ربن يعزك يا رب
دمت سالم
...................
موني
عليكم السلام و رحمة الله
نورتي يا فندم
ربنا يفرج عليكي و عليا و علي المسلمين اجمعين
إن شاء الله هنصلح
بإذن الله
ماهو التلقائية دية ساعات كتير بتبقي وحشة
بقول كلمة مثلا بسرعة
انا اقصد بيها حاجة و هي دية اقرب كلمة لاقيتها و اللي قدامي بيفهم حاجات تانية خاااااااااااالص
مش دايما بتبقي حلوة التلقائية
ميوحشكيش غالي
يالهوي :$$$$$$
احبكِ الذي احببتيني فيه :$
تفائلي بالخير تجديه
يا حبيبتي طولي براحتك
نورتيني بكلامك
دمتي سالمة
..............
سلام عليكم
نعكوشتى الجميله ايه ياحبيبتى لسه مش عاوزه ترجعيلنا تانى ولا ايه
مدونتك مش وحشتك طيب ياستى انتى وحشتينا وعاوينك تنورينا
كل سنه وانتى طيبه ياحبيبتى ويارب يارب تكونى احسن دلوقتى
ياريت لو تطمنينى عليكى
نعكوشتى
ازيك اولا...........
كل سنة وانتى طيبة..
وبجد وحشتينى اووووووووووووووووووى
بخصوص بوستك بلا اى شئ..
مش عارفة اقولك ايييييييييييييية غير كل الحاجات الى انتى قولتيها فى..
امممممممممممممممممممممممم
مش عارفة ارد
لية مش حاسة بسلام داخلى او خارجى
؟
يمكن علشان مش حاسين بالامان
مش عارفة بجد
عارفة انا مستغربة حاجة انك انتى تكونى نزلتى بوست زى دة
لانى حاسة انك شخصيتك اقوى من دة
اقوى من 1000 مرة
يااااااااااااااااااااااااااة
هى النفس بتهد اى حد كدة
لا يا نعكوشتى انتى اقوى من كدة بجد
قومى يا حبيبتى بجد قومى وفكك
قولى لتفسك
انا الى هاهدك مش انتى
قومى يا نعكشة
قومى
اول ما تظهرى تعالى قوليلى
طمنينى عليكى
اسفة على الرغى..بس انتى السبب
عوووووووووووووووووووووووووووو
سمر الشافعي
وانتي بالصحة و السلامة يا قمر
كل سنة وانتي طيبة
مش عارفة بس تجمع حالات عائلية علي شوية كسل علي شوية ملل كدة يعني
والله انتو طيبين قوي
ربنا يخليكوا للوطن
دمتي سالمة
..........
كيكي
بجد والله تسلميلي علي الكلام اللي قلتية
بس انا مش قوية كدة زي مانتي فاكرة
مناظر بس
ههههههههههه
يلا خير
ياجميلة انتي ترغي علي مزاجك
دية مدونتك يا باشا
نورتي
.........
سلام عليكم
اخوانا يا شلة متقاطيع
لو تسمحو بس ثوانــــي
انا حد معجب بيكو جــدا
افكاركو حلوه وعجبانـي
عامل مدونه مجنونــــــه
علشانكو برضه وعلشاااني
بس اسمحولي انضملكــــــو
وابقي معاكو وانا مكاني
هنعمل معا شله جميلــــه
واكتب كمان عنكو اغاني,
ميوشه
هبدأ بميوشه ويالـــــــة
اسمع كلامي ومزازيكـــــي
وهقولها يا انجح فاشلــــه
ياللي الفشل مخلوق ليكــي
اما انت من بين الشلــــه
تسلملنا كده حكاويكــــي
وخديها من اخوكي نصيحـــه
اصل الشهامه وخدانـــــي
لو مره قاعدة جوه كتــاب
والدنيا مضيقه عليكــــي
فورا قومي قالعه الشرااب
وشمي ريحة رجليــــــــــكي
هتلاقي احساسك اتخـــــــدر
والدنيا وسمعت حواليكــــي
ويجوز كمان عقلك يقـــــدر
يفهم ماد صعبة عليكـــــي
ويفك طلاسيم مناهجهـــــــا
و علي المذاكرة يقويكـــــي
وبلاش تشمي مره كمـــــــان
اصل الزيادة وحشه عليكـــي
يزيد عالفشل حبة ادمــــان
عليه العوض يا اختي عليكــي
درش
وانت يا درش يا درووووشه
اوعاك تبطل يوم دوووشـــه
ادوشنا يا ابني كمان وكمـان
واسمع نصيحتي المرووشـــــــه
لو مره قاعد في الاوتوبيــس
عمال بتدوش في الركــــاااب
وعدي جنبك جوز نسانيــــس
بيبصو ليك بصة اعجـــــــاب
روّح اوااام غير شكــــــلك
او استخبي في اي دولاااااااب
دول فكرووك تامر حسنــــــي
جمهوره بقي- والشوووق غلااااب
من ما حكيتلنا عنـــــــــه
بهت عليك شكله الجذاااااااب
بس اوعي تزعل يوم منــــــي
بتمني اننا نبقي اصحااااااب
نعكووووشعه
نعكوشه بقي دي حدوتـــــــه
حكايتها كده مش طبيعيـــــه
في طيبتها طفله صغنطوطـــــه
وفي الشقاوة معديــــــــــه
احلامها شخابيط رسمتهـــــــا
ورسومها احلام مرئيــــــــه
تسلملنا وليها شخابيطهــــا
والشخبه في طبعها غيـــــــه
بس اسمعيني يا نعكوشــــــــه
وانتبهي للفقرة الجايــــــه
لو مره عاكستك الايـــــــام
و اتنعكشت بس شويـــــــــة
و القطر داس علي احلامـــــك
والدنيا رزعاكي بنيــــــــه
اوعاك تبطلي شخابيطــــــــك
وافعي علي الدنيا قضيــــــة
بصوا يا جماعة دي غنوه انا بهديهالكم
وبقتريح عليكم فكرة اننا نعمل مدونه مشتركه لاننا تقريبا نفس الافكار والاسلوب والدمااااغ مدوانتكم عجباااني جدا لذلك بقترح نشترك في مدونه مع بعض ونسميهامبدئياا ( شلة المقاطيع)ودي هتفيدنا جدااا لان كل واحد مننا هيعملها دعايه علي المدونه بتاعته وقراءة هيدخلوها وبالتالي هيتعرفوا علي الباقيين وعلي مدوناتهم وافكارهم واسف اني طولت بس يا ريت الفكره تعجبكوم وماتزعلوش من الاغنيه لو كانت ساخره شويه
ردو عليه
Post a Comment