نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

أنا عايزة أطير

لما شوفت الtemplate دة انا قولت هوه دة
مش دية الفكرة
الفكرة بقة اني ألفت الحتة اللي مكتوبة فوق خالص دية
عشان تليق عالبنوتة الطايرة دية و علي احساسي
وهوب لاقيتني كتبت العك اللي تحت دة
بس كدة
محتاجة أطير
هسيب ايديا
و ارفع عيوني للسما
.
علي وشي بسمة
و في ايدي رسمة
و الدنيا تحتي مأزمة
.
أنا عايزة أكََبّر
مش كل يوم . أفضل افكر
في تلال هموم متكومة
.
قدام مرايتي
هحكي حكايتي
بنوتة قالو مِتعلمة
.
متنورة زي البنات في سنها
علي حظها
كل الظروف مش ضدها
شايفيني واعية مع إني لسة منمنمة
.
شباكي ابيض عليه تراب
لما افتحه بشوف سراب
أحلام كتير متسستمة
.
متقفليه!!
عقلك ليه بتعذبيه!!
بتعيشيه في ملحمة
.
قالتها نفسي و نفسي بردو ردت عليها
و فهمتها و اقنعتها
وانا قاعدة ساكتة ولا فاهمة حاجة
قالت عليا متفهمة
.
بتضحك عليا
مش عارفة ان كلامها ليا
سكينة باردة متلمة
.
بتجرحيني و الجرح صعب
أنا احتمل كل الجروح إلا جرحك يا أغلى قلب
.
لو ترجعيلي
ههننك و أروشك و اسمعك
ضحكاية عالية مجللة
مش من الهموم من فرحتي
برجوعك انتي يا أنا
.
و أنا أهو و أنتي أهو
بقولها عاليا يا أغلى حتى من عنيا
هترجعيلي
ماهو انتي مني و منك أنا
.
عشان نطير ..... و نسيب إيديا ..... و نرفع عيوني للسما...
..................
حكوك الطبع و النشل محفوظة لنعكوشة

مقتطفات روحية

* من أنا؟! *
من أنا؟!
أنا من قتلت نفسي بذنوبي و كفنتها بجهلي و دفنتها بتكرار المعاصي
أنا من علمت أني قد ضللت الطريق و لا أملك أن أعود للهدى
أنا من رفضت برغم شدة احتياجي ليد عون تخرجني مما أنا فيه
أنا من صرت للشيطان نداً نتآمر عليّ كي ابتعد عن كل ما هو جميل
أنا من صارت دموع الخشية تجافيني
و صارت آلامي هي ملأتي
و صار سواد وجهي هو عباءتي
أنا من أردت أن يهديني الله و لكن لم أسع للهداية
لكم تمنيت ألا أكون أنا هي أنا... ولا نفسي هي نفسي ...
أنا التي أكرهها و أحبها و أريدها أن تشقى و أريد لها الهناء..
بإذنك يا نفسي ........ اقبلي تلك الباقة مني فما عدت أطيق أن أخفيها
.
.........................
*انتظار*

لولا علمي بأن انتحاري سيودي بي إلي النار لكنت فعلتها منذ قديم الأزل
ولولا علمي بأني مخطئة و خطئي سيودي بي إلي النار لكنت فضلت الموت عن الحياة
فلا أملك الآن إلا أن أحاول في انتظار ساعة الاحتضار.

.......................
*مصارحة*

أنا لا أريدك أيتها النفس الشقية
أرجوكِ اتركيني
لماذا لا تهدئين
دعيني أنام قريرة العين لأني أرضيت ربي مرة
دعيني أحس بخشوعي في صلاتي مرة
دعيني اذهب لحلقات الذكر لاستمع و استمتع مرة
دعيني ... اغربي عني ... لكم أكرهك و أكرهني لأني انصاع إليك...
فكي أصفاد عقلي ... دعيه ينطلق مثل باقي أقرانه ... دعيه يدلني ... دعيه فلا أطيقك..


.........................
*احاسيس*

كم أحس بصخرة في صدري لا تتحرك وضعت بدلاً من قلبي...
كم أحس بذلك الشيء يهيمن علي عقلي و رأسي فيلفهما ملأة سوداء ...
كم أحس بإنهاك جسدي رغم أني لم أفعل شيء يذكر..
كم أحس بكوني ضعيفة ..
فارأف بي يا رب
.....................
*أمل و رجاء*

ربي
إن كنت تعلم أني لا أحبك بقلبي رغم يقيني بحبك فاجعلني أحبك
إن كنت قد وجدتني لا أصدق حبك بالعمل فاجعلني أصدقه بالعمل.
إن كنت تعلم أن قلبي و عقلي قد ضلا فانعم عليهما بنور الهداية
فليس لي أحدٌ بعدك يهديني.
و ليس لي رب سواك يحميني.
لن تنال مني شيء
و لن أضيف لملكك شيء
فأنا لا شيء
ولكني أطمع بعفوك و رحمتك.
ربي. لا تتركني في الظلمات أبكي.
إن لم تهديني فمن يهديني؟!
و إن لم ترحمني فمن أرحم منك عليّ ليرحمني؟!
لا أحد سواك.
ولا رب سواك.
وأنا لا شيء.
فامنن علي بشيء.
لأني احبك....
.......................
حكوك الطبع و النشل محفوسة لنعكوشة

حبة هلاوس قبل النوم

عندي صداع فظيع في عيني الشمال
اكيد من قعدتك عالجهاز .. احسن تستاهلي
ماشي شكرا بس انا مكنتش بقولك عشان تبكتيني
المهم
انا نفسي دلوقتي العب بالمورجيحة و اتمرجح جامددددددددددددددددددددددددددددددددددددددددددددددددددددددددددددددد
وافضل باصة فوق للنجوم وانا بشعري و يجي علي عيني و ابقي مش عارفة اعمل اية اكمل مرجحة ولا اشيلة من علي وشي
و افضلة قالبة راسي لورا عشان احس انني في السما
زي ما كنت بعمل زمان وانا صغيرة
انا لسة لحد دلوقتي بركب المورجيحة
بس انا اللي بعوم و الكتاكيت الصغننين بيصوتوا من الضحك
نفسي ارجع العب مع الولاد بتوع العمارة لإن البنات مكانوش بيحبوا الجري و التنطيط كانو بيحبوا يتمشوا و خلاص انما الولاد بيفضلوا يجروا لحد ما نفسهم يتقطع
عمر ما نفسي اتقطع
انا بموت في اللعب
عايزة اتنطط علي السرير اللي بسوست القديم دة
وماما تقولي انزلي يا بنت
و انا اضحك منها و اجري
و تمسكني
و اجري منها وانا بضحك
نفسي اعدي الشارع زي زمان وانا مش باصة للعربيات وماما تخاف عليا و تقولي خلي بالك علي نفسك
نفسي ماما تعملي الشاي بلبن كل يوم الصبح ( اللي عمرك ما شربتية)
و تعملي السندوتشات بتاعت المدرسة ( اللي كنتي بترميها جمب سور المدرسة)
ماما زعلت قوي لما عرفت اني برميها
بحبك قوي يا ماما
بس للأسف دايما مقصرة معاكي مع اني بحاول و هفضل احاول
انتي هتقلبيها نكد يا حجة ... امسحي دموعك يا امال

فضلت ازن علي ودن بابتي عشان يخليني ابيض اوضتي اسود
بس هوه مش راضي
وفضلت ازن علي ودنه عشان اعمل نجوم في السقف
انا جبت النجوم
شكلها عسول قوي
بس مبلحقش استمتع بيها لأني بنام علي طول
غريبة مع اني كنت طول عمري اقعد بالساعات عقبال ما انام
اكيد كنت محتاجة ساعتها نجوم
نفسي اقعد علي الشباك و ادلدل رجليا لبرة
في يوم هعملها
بس هوه انا لو وقعت ابقى كدة ميتة منتحرة؟؟؟؟؟؟
ياخوفي لو قعدت القاعدة دية وانا فرحانة و فجأة كالعادة نفسي قلبت عليا و زعلت فجأة
لأ انا مش هقعد علي الشباك و ادلدل رجليا
بس نفسي اعملهااا قوي
زمان كنت بخاف من الظلمة
وكنت بسيب باب اوضتي مفتوح عشان يدخل النور من برة
مع ان اختي كانت بتبقي معايا في الاوضة
دلوقتي بقفل باب اوضتي وانا بنام
مع ان اختي مبقتش معايا في الاوضة
غريبة!
محتاجة انام عشان الحق اعمل حاجات مفروض اعملها و قاعدة قدام الجهاز عشان اكتب مع ان عيني وجعاني و قافلاها كدهو
انا عايزة اجري
باقصى سرعة عندي
من غير ما حد يبص عليا وانا بجري في الشارع
و يقول في عقل باله او بصوت
البنت دية مش كويسة عشان بتجري في الشارع
نفسي اقلع الشراب مرة واحدة بس و ألاقية نظيف بعد اي خروجة من خروجاتي
بحب قوي لما اغمض عيني و ابتسم جامد قوي و تشعلق في نافوخي فكرة مجنونة
عايزة انزل اشتري شيبسي
مع اني مش جعانة
ومنفسيش في الشيبسي
بس عايزة امسكة كدة
و اقعد تحت نجوم اوضتي
و آكل واحدة واحدة
براحة
و افكر في اللي هيحصل بعد سنتين
نفسي ابقى شجاعة
وميهمنيش كلام أي حد

انا محتاجة - دكتورة - نفسية
ان شاء الله لما يجي راوند ال psychatry هيا بتتكتب ازاي مش مهم
لما يجي الراوند هوريها رسوماتي
و هشوف انا عندي اية
يا رب ابقى شجاعة

انا رجلي و صوابعي متلجين و راسي بتوجعني و محتاجة انام
يلا من نفسي

شوية هلوسة

بين الحياة و الموت

في المدونة لأخرى لوحات جديدة Last Ones >>>>>>> افعصو هنا



بين الحياة و الموت



بين الحياة و الموت لحظات
تبذل فيها قصارى جهدك كي تحافظ عليها ..
لكن الاختيار ليس اختيارك دائماً..
حين يهيئ إليك أن هناك بارقة أمل...
تبذل أقصى ما بوسعك...
تكتشف بعدها بلحظات أن حجتك واهية..
تظل على يقينك بقدرتك علي إنقاذ ما يمكن إنقاذه حتى بعد إخبارك بالحقيقة...
تضغط بقوة أكثر..
تود لو أنها تستفيق...
أفيقي...
عودي...
........
لكن هذا ليس بيدينا...
ليس لنا إلا الدعاء لها بالرحمة الآن...
أتحكم بنفس أخرى ...
إذا ما توقفت عن الدفع سيتوقف النفس...
من بعيد يأتيني خاطر ... لا أمل ...
لا يوجد مكان يستوعبها ...
لقد أنهكت... لا أستطيع استكمال الدفع...
يمكنني أن أرحل...
لا أحد يريد المساعدة..
استمر...
بل يستمر ثلاثتنا حتى أصبحنا نتساقط من التعب و نتبادل الأدوار...
عودي...
لا إجابة....
اضغطي علي كفي إذا ما كنتِ تسمعينني...
....
أحدهم علي أحد أجهزة التنفس يحتضر....
يهرعون إليه...
تضغط بأقصى قوتها...
لقد توفى...
لابد من عمل بعض الإجراءات الأخرى كي نرفعه من على الجهاز كي نضع الأخرى...
لازلنا نتحكم بالنفس...
نبضها سريع....
تحدث ضجة كبيرة ....
ينفتح الباب بقوة...
لقد توقف قلبه...
حاولوا إنعاشه....
لا أمل...
إذا ما كان أهله مثيري المشاكل اتركوه هنا لفترة...
تم عمل الإجراءات اللازمة لرفعه من علي الجهاز ...
إحساس غامر بالسعادة لأني سأتوقف عن إجراء التنفس اليدوي الصناعي لهذه المرأة..
لا أريد أن أسئل على حالها حتى بعد مُضي أيام خوفاً من أن تكون قد ماتت...

حينما نجتمع

محلوظة:
مش انا اللي راسمة الرسمة ( انا مبعرفش ارسم بالأوان) ومعرفش مين الفنان اللي رسمها .
حينما نجتمع....
كلمات كثيرة تعبر دهاليز عقلي المظلم .
تمضي خلال ممراتي العصبية سعيا للهرب ، لكنها تقف هناك ..
عند طرف لساني.
تحبسها أسناني في ذلك القفص الموحش المليء بالألم والمرارة.
أقف هكذا ... بلا حراك...
في عيني نظرة أحسها .. لكني لا أعلم إن كانت مفهومة من قبل الآخرين..
تكاد دموعي أن تتكون لكن يأب عقلي أن تسقط أمامهم... فلا يعطيها الأذن بذلك..
أحس بتدفق الدماء برأسي... جريان الدم بأوردتي و شراييني.. وعيي بكل ضربة من ضربات قلبي... احسها قوية مدوية تصم أذني...
ترتعش شفتاي.. اشعر باحتقانهما ...
تبدأ انفي بالاتساع و تتسارع أنفاسي رويداً رويداً ...
أما عن حلقي فلا أعلم كنهه الشيء الذي يؤلمني بداخله ... لا أقو حتى علي ابتلاع لعابي...
هنا فقط ... أمضي...
اترك لهم جسدي يعنفونه ...
أرحل بفكري بعيداً..
فما ستفعله كلماتي سوى إثارتهم و زيادة ما بي من ألم....
و يا ليتهم بعدها تركوني بسلام....

أنا مبسوط

أحب ذلك الإحساس..........
يمدني بشعور داخلي بالانتشاء ....
أتنفس عميقاً ثم اخرج الهواء ببطء.. تماما كما أريد ...
ابتسم و تبتسم معي عيناي لأنه لا يسعني في تعبيري عن شعوري سوى الابتسام...
حين يلفحني ذلك الشيء الشفاف ليتوغل عميقاً إلي ما بين جلدي و عضلاتي ...
يقشعر جسدي..
أحرك يدَيّ الباردتين علي عضدَيّ الباردين أملاً في أن استمد الدفء من تلك الحركة...
تزداد القشعريرة ... تحيطني ...
تغلف كلماتي كقشدة تجمدت علي شوكتي ...
يمكنني أن اشغل النيران كي تذوب و لكني أفضلها هكذا ... فألتهمها و هي باردة ..
يمكنني أيضا أن أغلق نافذتي لأنعم بالدفء و لكني أفضلها هكذا ... فأتقوس علي نفسي و احك جسدي البارد و بداخلي شعوري هذا...
أحب الشتاء ففيه أشعر بقمة سعادتي ....

امرأة في الميناء

كاميرا تستكشف المكان
مكان هادئ
نور اصفر
تمضي ببطيء
صدى صوت لأقدام تعدو مسرعة علي أرض من البلاط
صوت نهيج يهفو من بعيد في ضعف
تقترب الكاميرا
تتكشف الهيئة فإذا هي امرأة
تقترب أكثر
تتضح معالمها شيئاً فشيئاً لتظهر ملامح امرأة في نهاية العقد الثالث من العمر
صوت النهيج يغمر المكان معطياً موجة عارمة من عدم الراحة
راحت تلوح بأحد ذراعيها ضاغطة بالأخرى علي صدرها اثناء ركضها .......
تعثرت في شيء ما
سقطت
اقتربت الكاميرا أكثر
لا تزال يدها ممتدة في الهواء كأنها تستجدي شخصاً ما لكنه لم يكن موجوداً في الكادر
كان وجهها قد غُطي تماماً بطريق من الدموع التي سقطت ولا تزال ....
تبتعد الكاميراً قليلاً عن وجهها في حركة دائرية بطيئة ( ربما لم يرد المصور لن يسترسل في رؤية نحيبها ودموعها الممزوجة بالنهيج أو ربما أراد أن يمنحها بعض الوقت كي تستجمع قواها ليستكمل التصوير)


تظهر في حركته الدائرية أسوار حديدية ثم تتضح أصوات ألأمواج المتلاطمة و المزيج من أصوات الناس المودعة لأهلها علي الميناء و العائدين في طريقهم مارين بتلك الفتاة دون أن يلتفتوا إليها....
بدأت تستند نفسها بعد وقت ليس بقليل.
مضت بخطاً ثقيلة مترنحة تجاه بوابة الميناء وما أن اقتربت منها حتى اتخذتها عكازاً لتكمل به طريقها.
مضت حتى وصلت لطرف المرفأ..
أسرعت الكاميرا ناحيتها لترى ظهرها و ذراعيها الممتدين في الهواء لأعلى...
صرخت......
دوى صوت صراخها عالياً في أرجاء الميناء فالتفت إليها كل من بها من القلة القليلة المتبقية من المودعين و بعض الشيالين
أنا آسفة .... لم أكن أعلم أني سأضيعك من بين يدي.........
ارتخت اطرافها
سقطت واضعةَ وجهها بين كفيها
كنت أظن أنني سأفوز بقضية الحضانة لنظل معاً إلي الأبد.
أسقطت رأسها للخلف
أغمضت عينيها بشدة
تقلصت عضلات فكيها
أرادت أن تحبس دمعة من سيل الدموع
انتحبت
تركتها تهطل
نظرت للأسفل على أرض إسفلتية
ضربت بيدها بشدة علي الأرض
اشاحت بوجهها في ألم
الله يسامحك يا أمي.. أنتِ السبب في أخذه و سفره بعيداً مني
تراجعت الكاميرا ببطء علي صوت موسيقي حزينة
خلفية متلاطمة من أمواج البحر
ضوء اصفر باهت في مكان مظلم
نحيب امرأة فقدت فلذة كبدها
بكاء .... المصور
..................................


حكوك الطبع و النشل محفوسة لنعكوشة

هل حقاً لسنا إلا للطبخ و تربية الابناء؟!!!

سبحان الله لما الواحد يحب يكتب في مواضوع خمستلاف موضوع يطقو في دماغه ... كتبت موضوع و بعدين الجهاز ربنا يمسية بالخير مسحه فقولت اكيد ملكوش نصيب و بعدين جيت اكتب قصيدة حسيت ااني مش عايزة اكتبها فقولت خلاص مليش نصيب اسمع رأيكوا و بعدين دلوقتي بكتب في موضوع اهوه و مش عارفة هيحصل إيه هيكمل ولا لأ المهم . ملكوش دعوة باللغة و الادب ولا البتاع دة دة مجرد موضوع للنقاش مش قطعة ادبية.....


هل حقاً لسنا إلا للطبخ و تربية الابناء؟!!!


سئمت هؤلاء الرجال حقاً . لماذا إذا ما أخطأت المرأة قالو لها " إنتي إية اللي خرجك من المطبخ , يعني مبتفهموش و بتزاحمونا كمان" بينما إذا ما أخطأ الرجل اتخذوا له ألف عذر قائلين " ياعيني شوف الراجل من كتر المسئوليات مش مركز الله يعينه "
بينما كنت في سيارة إحدى صديقاتي متجهين إلي درس من الدروس فإذا بعدة سيارات علي مواقف متفرقة يخطيء قائدوها أخطاءً فادحة . علي سبيل المثال و ليس الحصر ((رجل ينتظر بسيارته عند منعطف من المنعطفات ولا يريد ان يتحرك من مكانه و بعد ان قرر علي مضض ان يتحرك حركة بسيطة لتمر صديقتي بسيارتها إذا به يقول " متروحوا بلدكوا بقة !!! " )) عجبتُ لكَ يا رجل . رجلٌ آخرٌ وجدته أوقف سيارته عند ال ( u Turn) الخاصة بالطريق الجانبي ... قمة الذكاء الذكوري !!!! .
في حين أنه إذا ما أخطأت مرأة في السواقة قالوا لها " ماهو عشان ست " ... عذراً للغة العربية " يعني إية عشان ست دية .. ناقصيين إيد ولا رجل ؟؟؟؟؟؟؟؟؟؟! " .
عندما وصلنا إلي الدرس إذا بالدكتور الذي اكننت له الاحترام يقول " أنا أصلاً مبتعبش نفسي في الشرح غير عشان الولاد هما دول اللي هيبقوا دكاترة إنما إنتو آخركوا المطبخ " قال هذا في يوم سابق
أما اليوم فبينما يشرح شيئاً ما عن عمليات القلب المفتوح فقال " انا مش عارف ياخويا إية البنات اللي بتروح العمليات دية عشان تتفرج .. هوه إنتي متوقعة إنك هتشتغلي كدة . إنتو آخركوا تشيلوا العيل.."

أعترف .. و بشدة إن دور المرأة الرئيسي منصب علي تربية النشأ و لكن أهو عيبٌ أن يكون لها دوراً في المجتمع؟!!!
اعتقد أن الله حباني بعينان و أذنان و يدان و عقل لأفكر لا لأبتكر في فن الطبخ فقط .
لماذا هذه المحدودية في التفكير؟؟؟
ألا يمكنني أن اعمل كطبيبة ناجحة بجانب كوني ام صالحة ؟!!!
و ماذا إن لم يرزقني الله بالزوج والذرية الصالحة ..
ءأكون عالة علي المجتمع؟؟؟؟ كلا و ألف كلا.....

كم أحب نفسي الآن و فقط الآن كوني امرأة كي أثبت لأمثال هؤلاء الرجال أن لي عقل قد يفوق عقول البعض منهم " وليس الكل"
لن أعمل كي أثبت لهم و لكن سأعمل لنفسي و لنصرة ديني و من ثم مجتمعي.
كثيراً ما كنت اتمنى أن اكون رجلاً ولكن ليس الآن و ليس بعد مقالتي هذه و أقوال هؤلاء الرجال.
إنهم يهينون عقليتي .. لكني لن ألتفت .. أجل لن ألتفت...

يوميات دكتورة مستقبلية 4 Back to school

توضيح صغنون:
انا مش في أولي ولا تانية طب ولا حتى تالتة ولا رابعة دية يوميات كتبتها زمان بس لسة بعاني منها
....................
نظراً لأن الناس دخلت المدرسة يوم 21 سبتمبر ( مش زينا ) دخلنا الكلية 1 سبتمبر ... مش حقد ولا حاجة..... بس يعني الموضوع معمول للناس اللي داخلة المدرسة قريب مش لينا
سلسلة ارجوك لا تفعصني
4
back to school

أخيراً – بنفس طبعاً و كل حب و اشتياق لكليتي المحبوبة :S -
اعلانات العودة للمدارس تجتاح التلفاز و الشارع و كل مكان ( شنطة ماتيجو المدرسية ... مكتبة كتاكيتو للأدوات المكتبية .... إلخ إلخ ).
ضاع اليوم في البكاء و الاتصال بالاصدقاء و هتلبسي ايه و هتعملي ايه و هتبقي فين وحشتيني هنتقابل بلا بلا بلا .. من هذا الكلام الذي يقال في اليوم الذي يسبق اليوم الاول الدراسي .
استيقظت صباحاً . أهلاااااا اماني حبيبتي ( ولا حبيبتي ولا بطيخ بس لزوم الشغل بقة كلنا فرحانين ) كل سنة وانتي طيبة يا قمر . و اتجهنا إلي المحطة لنركب النفاثات التي حدثتكم عنها من قبل . عسية عسية( هما بيقولوها كدة او دية بواقي كلمة عباسية يعني ) : كلية طب يا عم ... ايوة ... طب خدني معاك ..
و في المدرج وجدت مكاني فاضي كالعادة ( دفست نفسي بين اتنين اصلاً ) و بعد ان ضمنت موقعي وضعت حقيبتي و انطلقت اسلم علي كل من بالمدرج .. و دخل دكتور شيكوريل دكتور الفاصولوجوي .. أوبس فسيولوجي ( علم وظائف الاعضاء physiology) . و كانت محاضرة عقيمة مثل أي محاضرة في اول السنة ثم دكتورة رابحة رئيس قسم البيو كيمستري ( الكيمياء الحيوية Bio chemistry ) و اخيراً جائت كيريمان بالخبر الأكثر روعة مفيش اناتومي (علم التشريح anatomy ) اول اسبوع يا ولاااااااااااااااااااااااد ... لا استطيع ان اخبركم كم التصفيق و الهتاف و الزغرطة ( لولوولولولوولولوليييي ) هذا غير الصفيربهذا الخبر السار ( عالم دحيحة بقة :D ) ... ....
بذكائي الاصطناعي قررت ان انتهز الفرصة لأستخرج الكارنية ... و بدأت رحلتي بإنطلاقي إلي مكان ما لأستخرج ورقة لإثبات انني لست معاقة ومعافاة تماما..ً و ذلك طبعاً بدون فلوس ( عشرة جنية يعني ) و الغريب انهم اكتشفوا ذلك دون ان يتم الكشف علي - صادقة ياختي صادقة - و اخذت الورقة بعد طابور طويل و انطلقت إلي شئون الطلبة ووقفت تحت الشمس المشرقة الجميلة ( الغير حارقة تماماً ) و بدأ الوقت يمر طويـــــــــــــــــــــلاً و كنت بين زميلاتي و زملائي :S متفاعصين كالعادة . لا اعلم ألا يستطيعون ان يقوموا بعمل نافذتين واحدة للبنين و اخري للبنات فهذا الوضع غير لائق البتة والمشكلة اننا كنا ننتظر ورقة بيضاء مقطوعة بعشوائية من ظهر كراسة مكتوب فيها اسم الطالب و مطلوب 30 جنيهاً ( يا ستي انا هكتبهم بنفسي ) لأأأأأأ .. لية متعرفش .. المهم .. في هذه المحمصة الطبيعية اللاارادية ظللنا واقفين – نعم واقفين فلم نكن نتحرك إلا ان كل منا كان يدفع الآخر( هل كنا سنخترق الجدار مثلا) .. ربما
ثم تقول احداهن للأخرى: يابنتي بتزقيني ليه؟ ألّه!! .. نظرت حولي ... باحثة عن تلك المقصودة بكلمات تلك الانسة أوبس اقصد الدكتورة تلك .. و بعد ان استسلمت للأمر و سلمت بانني انا المقصودة حبست في نفسي فلن تزيد صرخاتي علي وعلي من حولي سوى احساس اكبر بالالم و الصداع و الحر و العرق و الرائحة و .. (كفاية يابنتي قرفتينا)اعمل ايه منا كنت مفلوقة.... المهم... ولانني اصلا لم اكن سوى رد فعل للدفع من خلفي فكبست كل ذلك بمكبس هيدروليكي متحرر من سيارة مكسحة تمضي في طرقات القاهرة ( خلاص يا ماما ارجعي للموضوع) .. ظللت منتظرة -النعكشة- اعني الطابور ان ينتهي و يأتي دوري ولكن هيهات فكل نص ساعة مثلاً تمن علينا الموظفة بكتابة ورقة جديدة لطالب جديد ( ربنا يخليلنا موظفين الحكومة) - هل كتابة ورقة طالب سنة 2 ولنفرض نجوي احمد محمود ستأخذ منها كل هذا الوقت ؟؟؟؟!!!! .. حتي انني لا ادفع أي نقود كي تسجلها .. ( يا جماعة دحنا اللي هنديكوا الفلوس مش هناخد منكوا حاجة ) .........!!!!!
وبعد وقت ليس بقليل وصلت للشباك كدت ان ارقص فرحاً – عيب يا بنتي انتي في الشارع ( اقصد الكلية) – احمدك يا رب و اخذت الورقة المنشودة و انطلقت جرياً إلي الخزينة لأدفع .. ولكنها كانت قد تعدت الواحدة و قد اغلقت الابواب و رحلت محملة بالخيبة علي عاتقي ... أن أن أااااااااااااااااااااااان . تششش.........
انتظروا
لسه اليومية دية مخلصتش :D
وجاء اليوم التالي .. و دخل الدكاترة واحداً تلو الاخر ثم انتهت اول محاضرة و نزلت إلي الخزينة و معي الورقة و انتظرت في طابور اخر و يفوت موعد المحاضرة التي تليها ووصلت اخيراً إلي الشباك( احمدك يا رب ): ثم اجد جملة لم افهم معناها إلا عندما اغلق الموظف في وجهي الشباك : الساعة واحدة يا دكتورة ... لاااااااااااااااااا ... و تكررت المحاولات والايام و الفعص حتي دفعتلهم الفلوس و ريحت ضميري و ......
إلي لقاء اخر في يوميات دكتورة مستقبلية
سلسلة ارجوك لا تفعصني

الفسيولوجي : علم وظائف الاعضاء physiology

البيو كيمستري : الكيمياء الحيوية bio chemistry

الأناتومي : علم التشريح anatomy

حكوك الطبع و النشل محفوسة لنعكوشة

اختلف العيد


ممكن الموضوع ميهمش حد بس هوه حاجة مختلفة بالنسبالي
العيد السنة دي مُختلف

معرفش للأفضل ولا للأسوء
* امبارح و لأول مرة من سنييييييييييييين طويلة آخد عيدية من حد غير والدي ( يااة فاكرة لما كنا بنلف علي اخوالي عشان يدونا عيدية .. عملت الحركة دية تاني زي زمان كنت مبسوطة قوي)
*امبارح انا نمت في الفترة اللي قبل الفجر مع إن كنت طول عمري بفضل صاحية لحد الفجر و الشروق و استنى العيد بقة
*لبست لبس جديد نسبياً وانا رايحة اصلي مع اني كنت متعودة اني اروح اصلي بلبس نظيف( مش جديد) بيتلبس بسرعة و لما ارجع البس لبسي الجديد دة لو فيه اصلا لإني من اعدادي تقريباً نسيت ان في العيد بنجيب لبس جديد ( فبضطر ااقبل شراب او توكة و ملاية سرير جديدة و خلاص)
* انهاردة مقابلتش اي حد من صحابي
* انهاردة رحت لجدتي اللي كان بقالي كتيييييييييير مروحتلهاش و كنت مبسوطة اني روحتلها
* انهاردة اكتشفت اني ماستمرتش في محاولاتي لتقويم نفسي بس مش هضعف باذن الله و هحاول تاني لان دليل قبول العمل الاستمرار فيه
* انهاردة مسافرتش البلد كالعادة عشان جدتي توفت من كام شهر قبل رمضان ( سبحان الله مكنتش عارفة اني بحبها قوي كدة) ربنا يرحمك يا تيتة
* انهاردة اوضتي مكانتش متروقة و ممسوحة ومتظبطة تظبيطة العيد
* انهاردة أنا كنت حاسة اني سعيدة مع إني مفرقعتش بمب ولا لعبت بالبلاليين ولا اتمشيت مع صحابي ولا سلمت علي الناس اللي بحبهم ولا اي حاجة بس حاسة اني سعيدة مش عارفة لية
* انهاردة انا اول مرة اكتب بوست عني في العيد
كل سنة وانتو طيبيييييييييييين
D:

نعكوشة

سلام عليكم
المفروض يعني ان دية مسرحية معمولة للأطفال
مع العلم إني اول مرة اكتب مسرحية

الفصل الاول، المشهد الاول

المكان : غرفة نوم مهرجلة . هدوم علي الارض . الكتب تحت السرير . هدوم خارجة من الدولاب

بنت منكوشة نايمة علي السرير و علي وشها اسود و مش نظيفة

صوت الام من بعيد : يا نعكووووووووووشة . يا بنتي تعبتيني قومي لساعة بقت 7

لا استجابة من نعكوشة


بعد فترة و قد دخلت الام غرفتها : يا بنت يا نعكوشة الساعة بقت 7 و نص قومي المدرسة يلا
نعكوشة بتمطع : يووه يا ماما هو انا قدرة .. سيبيني كمان خمسة
الام : يلا يا بنت
نعكوشة : طيب حاضر
تقوم بتكاسل من علي السرير متجهة للحمام و هي تهرش
تعود و هي متسربعة

نعكوشة : ماما فين الكشكول
ماما فين هدوم المدرسة
ماما القميص زرارة مقطوع
ماما............
الام : ايوة ايوة ايوة
يا نعكوشة يا حبيبتي مش انا قلتلك كذا مرة تديني الحاجات المش نظيفة بليل
و قولتلك ترتبي شنطبك
شربتي اللبن؟؟؟


نعكوشة و هي تبحث عن شيء ما : هوه فين يا ماماااااااااااااااا
الام : هوه اية دة؟؟؟؟؟؟
نعكوشة : الشراااااااب يا ماما
الام : ميت مرة اقولك يا نعكوشة حطيهم في درج الشرابات
نعكوشة : فين الجزمـــــــــــــــــــــــــــــــــــــــــــة

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

مشهد 2 فصل 1

نعكوشة في الفصل

المدرسة : يلا يا أولاد وروني الواجب بتاعكوا
نعكوشة تهمس لصاحبتها : هاتي انقل الواجب منك بسرعة
صاحبتها : ازاي بس المدرسة هتشوفنا
المدرسة توقفت امام نعكوشة : فين الواجب يا نعكوشة
نعكوشة : ماهو أصل...........
المدرسة : انتي محليتيش الواجب ليه ... و فين الكراسة بتاعت المادة
نعكوشة: مش عارفة
دخلت الطبيبة إلي الفصل للتفتيش علي الفتيات
وصلت إلي نعكوشة
الطبيبة: وريني ضوافرك يا نعكوشة
نعكوشة واضعة يدها خلف ظهرها : لية بس يا دكتورة
الطبيبة : يلا يا بنت
نعكوشة تمد يدها إلي الدكتورة
تنظر الدكتورة و عليها علامات الغضب : إيـــــــه دة ... ضوافرك طويلة قوي .. مش قولنا الضوافر الطويلة بيبقي تحتها اسود و بتجيب امراض دة غير ان شكلها وحشششششش
نعكوشة في خجل : ماهو أصل
الطبيبة : مفيش أصل .. يلا وريني شعرك
الطبيبة : لا لا لا يا نعكوشة ........ لازم تحافظي علي نظافتك .. مينفعش كدة ... كدة ممكن تعدي زوملاتك
نعكوشة و هي مُحرجة : حاضر يا دكتورة

..................................................................

مشهد 3 فصل 1

أطفال يلعبون في لشارع ومن بينهم نعكوشة و قد كانت تلعب في التراب هي و اصدقائها

نعكوشة : بصوا يا ولاد لقيت اية ؟؟؟؟؟؟؟؟؟؟
الأول : لقيتي اية؟؟؟
نعكوشة : لاقيت توووووووووووووت
الثاني : ورينا كدة
نعكوشة : اهوه ... يلا نجمعوا بسرعة و نروح ناكلة

ظل الاطفال يجمعون التوت من علي شجرة ليست شجرة توت من الأصل ثم بعد ان انتهو
قالت نعكوشة بسعادة : يلااااااا ا انا هعزمكوا علي توت انهاردة
الاول : لازم نغسلو الاول يا نعكوشة
نعكوشة : دة يابني كان علي الشجرة يعني نضيييييييف

الثاني : مش هاكل منه لو مغسلناهوش
نعكوشة : براحتكوا ... انتو الخسرانييييين

و راحت نعكوشة تلتهم التوت الذي هو ليس بتوت

.............................................................................

مشهد 4 فصل 1

نعكوشة في غرفتها غير المرتبة و هي تتألم : مااااااااااامااااااااااااااااااا
الام تجري علي بنتها : فيكي اية يا نعكوشة
نعكوشة : أأأأأأاة يا بطنييييييييي .. بطني بتوجعني يا مامااااااااااااااا
الام : لية يا حبيبتي
نعكوشة : مش عارفةةةةةةةةةةةة
آآآآآآه يا ماما
الام : انتي كلتي حاجة من الشارع؟؟
نعكوشة و علي وجهها علامات البلاهة : أيـــة ؟؟؟
الام : يعني كلتي من الشارع
نعكوشة : دة هوه توت يا ماما
الام : هو فين التوت دة
نعكوشة اشارت الي جيب فستانها قائلة : هناك يا ماما في جيب الفستان
الام :أنا مش قلتلك تعلقي الفستان علي الشماعة لما ترجعي
نعكوشة و هي تبكي : آآآآآآآآآة يا بطنييييييي
الام : يلهوي .. دة مش توت أصلا .. يا نعكوشة ميييت مرة اقولك متاكليش من الشارع و حتى لو بتاكلي حاجة عارفاها لازم تغسليها
اية يا نعكوشة دة

نعكوشة : آآآآآآآآآآآآآآآآآآآآه

........................................................

مشهد 1 الفصل الثاني

بينما يلعب الاطفال في الشارع لمحت نعكوشة طفل نظيف لطيف يلعب مع اصدقاءه

و بينما هم يلعبون بالكرة اتجهت الكرة ناحية نعكوشة
فاقترب منها – مهندم- و قال بذوق : لو سمحتي ممكن الكورة
قالت نعكوشة : آه طبعاً اتفضل
قال مهندم : انتي ممكن تيجي تلعبي معانا علي فكرة
قالت نعكوشة بفرحة : بجددددد ... طيب

بينما هي تخلع شبشبها لتبدأ في اللعب
اسرع مهندم قائلاً :إيه دة .. البسية تاني و إلا هيدخل في رجلك حاجة و بعدين الارض مش نظيفة
قالت نعكوشة : بس اصل
قال مهندم : يا نعكوشة الارض دية عليها حاجات كتير مش نظيفة و لو دخلت لرجل و عورتها تعملك امراض وحشة
فلازم تلبسي الشبشب
نعكوشة : ماااااااشي

بينما هم يلعبون وجدت نعكوشة بائع جائل فأسرعت إليه لتشتري بعض الاكل

ثم عادت

قال مهندم بدهشة : ياااااااااااااه مينفعش تاكلي الاكل دة .. الناس دية مش نظيفة .. متاكليش منهم

قالت نعكوشة : بس أصل

قال مهندم : يا نعكوشة الذباب بيقف علي حاجات كتير مش كويسة و بيرجع يقف علي الاكل بتاع البياع
وحتى لو احنا مش مغطيين الاكل في البيت الذباب هيقف عليه
لازم نغطي اكل بيتنا و مناكلش من البياعين دول
قالت نعكوشة : طيب

ألقت بالسندوتش علي الأرض

فصرخ مهندم : لاااااااااااااااااااا ... مترميش حاجة علي الأرض
قالت نعكوشة : لية بقة يا سيدي ، ماهي الارض اصلا مش نظيفة
فقال مهندم : يا نعكوشة عامل النظافة اللي بينظف كل يوم بيتعب عشان ينظف الارض .. لية احنا منساعدوش باقل حاجة و منرميش القاذورات عالارض مفروض نرميها في الباسكت عشان نحافظ علي النظافة و ميزيدش الذباب و منتعبش عامل النظافة
قالت نعكوشة : طيييييييييب
و اخذت الساندوتش و القته في سلة القمامة

،،،،،،،،،،،،،،،،،،،،،،،،،،،،،،،،،،،،،،،،،،،،

مشهد 2 فصل 2

مهندم في غرفة نظيفة مرتبه

جرس المنبه يدق

الام تقول : مهندم قوم الساعة بقت 7

قام مهندم سريعاً متجها إلي الحمام : صباح الخير يا ماما
قالت الام : صباح النور يا حبيبي ... يلا بعد ما تخلص الحمام اطلع عملتلك اللبن
مهندم : شكرا يا ماما
قالت الام : ها عايزني اساعدك في حاجة
قال مهندم : مانتي عارفة يا ماما اني مجهزهم من بليل .. شكرا يا ماما
الام: طيب يلا الحق البس و انزل المدرسة
مهندم بعد ان شرب اللبن ... نزل في معاده

.............................................................

مشهد 3 فصل 2

مهندم في الفصل

المدرسة : عاملين الواجب يا أولاد
مهندم رافعاً رأسه : ايوة يا أبلة
المدرسة : شاطرين
يلا يا أولاد عشان الامتحان
مهندم مستعد و بدأ يحل في ورقته
احد اصدقاءه يطلب منه أن يغش قائلاً : قولي يا مهندم اجابة السؤال 4 عشان مش عارفة
قال مهندم : لا الرسول عليه افضل الصلاة و السلام قال " من غشنا فليس منا"
قالت المدرسة : يلا يا أولاد الوقت خلص
قدم مهندم الورقة و هو سعيد
دخلت الطبيبة الفصل للتفتيش علي الأولاد
وريني ضوافرك يا مهندم
مد إليها يديه فقالت الطبيبة : جميييييل ... شاطر يا مهند
.....................................

مشهد 4 فصل 2

مهندم يلتقي بنعكوشة مرة أخرى و هي منكوشة الرأس

فقال لها مهندم : هو انتي ليه يا نعكوشة مش بتربطي شعرك بتوكة عشان ميلمش تراب و يتبهدل
فقالت نعكوشة : منا بكسل بقة
قال مهندم : بس الكسل دة صفة وحشة يا نعكوشة .. و انتي شكلك بنت طيبة
وبعدين البنات الحلوين بيبقي شعرهم متسرح
قالت نعكوشة : ماشي
قال مهندم بعد أن لعبا قليلا : أنا هطلع بقة عشان الحق احضر شنطتي و اكوي هدومي و ارتب اوضتي و انام بدري عشان اصحى بدري
قالت نعكوشة :يااااااااااة كل دة
قال مهندم : وانتي مش هتطلعي
قلت نعكوشة : هاه؟؟؟؟؟؟؟؟
قال مهندم : عشان تجهزي شنطتك ...انتي عاملة الواجب بتاعك صح ؟؟؟
نظرت نعكوشة لأعلي و هيا تهرش في شعرها : هاه
قال مهندم : لا يا نعكوشة البنات الحلويين لازم يعملو الواجب و يحضروا شنطتهم بدري
قالت نعكوشة : ممممممممم طيب

عادت نعكوشة إلي البيت
و تذكرت قول مهندم : رتبي اوضتك
مممممممممم
صعبة دية ؟؟؟؟
صرخت نعكوشة : ماماااااااااااا
تتجة الام ناحيتها
تقول نعكوشة : ممكن تساعديني اروق الاوضة
قالت الام بفرحة: طبعا يا حبيبتي
رتبت نعكوشة غرفتها
ثم انهت عمل الواجب و حضرت حقيبتها

ثم في الصباح قامت بالصحيان بدري لإنها نامت بدري
و احضرت لها امها اللبن
و ارتدت ملابسها التي كانت قد حضرتها نعكوشة مسبقاً
وقالت لأمها: ماما سرحيلي شعري عشان ابقى زي البنات الحلوين
ابتسمت لها امها و سرحت لها
و اتجهت نعكوشة إلي المدرسة
استغربت المدرسة و التلاميذ من نعكوشة
فأطلقت المدرسة عليها بدلاً من==اسم فرفوشة

و من هنا نعرف ان الصديق قبل الرفيق( ديه حته من عندي كدة)


تمت
..................................................




حكوك الطبع و النشل محفوسة لنعكوشة

بلا أي شيء

سلام عليكم
قبل ما حد يقرا اي كلمة بعد السلام هذا البوست لا يحمل أي فنيات
ولا يحمل أي شيء
حرصاً علي وقتك
لا تقرأة
أنا فقط أفضفض مع مدونتي

هوه انا ليه كده . ليه بفرح . و ليه بحزن . ليه لما بقعد لوحدي مبلاقيش غير إحساس بشع بإن دموعي هتنزل و إن دماغي مفيهاش افكار

ليه لما بفكر بلاقي إن معظم افكاري ملهاش لازكمة . انا لية مليش قدوة . يا بنتي ما قدوتك الرسول عليه افضل الصلاة و السلام . و هوه انا بتبع اللي الرسول عليه افضل الصلاة و السلام بيقوله

انا ولا حاجة

انا جسد معبأ بالذنوب

ربنا بيمهلني كتير وانا لا اتعظ

انا مش مُبتلاه للأسف .. مع علمي الشديد إن اشد الناس بلاءً الانبياء و ثم الناس الكويسين قوي و بعدين اللي اقل منهم شوية

يعني أنا بشعة

انا مش عارفة انا عايزة اية

مفروض اني اعبد ربنا " وما خلقت الجن و الأنس إلا ليعبدون" صدق الله العظيم

بس هل انا ماشية ورا تعاليم ربنا ؟؟؟؟؟؟؟؟؟؟؟

محتاجة اقف مع نفسي و اعمل زي ما كل الناس بتعمل و اعرف انا مفروض أمشي ازاي و اعمل اية

بس مش عارفة

مش قادرة

كتير حاولت اني ابقي كويسة مش عارفة

مش عارفة احكم تصرفاتي

مش عارفة اكون بارة بوالدتي ووالدي

مش قادرة احكم غضبي لما بتنرفز

احساس بشع لما تبقى عارف انك بافعالك هتروح النار

مع العلم انك عايش في جحيم في الدنيا

ولن تُرحم من سكرت الموت

و في القبر هيكون الجزاء من جنس العمل

يعني في كل الحياة و الموت و البعث ألم

طيب ليه بعمل في نفسي كدة

طب مانا عارفة ان كدة غلط

اقفي بقة

بطلي بقة

اهتدي بقة

انتي عايزة تودينا فين

يا رب اهديني

بس " إنك لا تهدي من حببت والله يهدي من يشاء"

يعني اللي عايز ربنا يهدية فعلاً و بيعمل علي ذلك ربنا هيهديه بقدرته

نا عايزة

بس مبعملش

لية نفسي مش مطمئنة

لية دايماً امارة بالسوء

ولما اعمل السوء تبدأ نفسي اللوامة

نا لية كدة :(

أنا لية مش لاقية سلام داخلي ولا خارجي

" ألا بذكر الله تطمئن القلوب"

مانا بقرأ قرآن و مبحسش زي الناس دية ما بتحس بية

ودة إن دل على شيء فإنما يدل علي كم السواد اللي علي قلبي

شكوت إلي وكيع سوء حفظي فأرشدني إلي ترك المعاصي

وقال إن العلم نورٌ و نور الله لا يهدي لعاصي

لا يهدى لعاصي

أنا لية مش عارفة اوقفني عند حدي

أنا لية بشعة قوي كدة

كان نفسي ابقى كويسة

انا مبأذيش الناس اكتر من اذيتي لنفسي

اويكب الناس علي وجوههم في النار إلا حصائد ألسنتهم

يااااااااااااااه

هتوديني فين

انا بكرهني قوي

مش عايزاني

ربنا يهديني


اللهم إني أستغفرك لكل ذنب..

خطوت إليه برجلي..

أو مددت إليه يدي..

أو تأملته ببصري..

أو أصغيت إليه بأذني.

. أو نطق به لساني......

أو أتلفت فيه ما رزقتني

ثم استرزقتك على عصياني فرزقتني

ثم استعنت برزقك على عصيانك.. فسترته علي

وسألتك الزيادة فلم تحرمني

ولا تزال عائدا علي بحلمك وإحسانك.. يا أكرم الأكرمين

اللهم إني أستغفرك من كل سيئة

ارتكبتها في بياض النهار

وسواد الليل

في ملأ وخلاء

وسر وعلانية..

وأنت ناظر إليّ

اللهم إني أستغفرك من كل فريضة

أوجبتها علي في آناء الليل والنهارتركتها

خطأ أو عمدا

أو نسيانا أو جهلا

وأستغفرك من كل سنة من سنن

سيد المرسلين وخاتم النبيين

سيدنا محمد صلى الله عليه وسلم

تركتها غفلة أو سهوا

أو نسيانا أو تهاونا أو جهلا

أو قلة مبالاة بها..

أستغفر الله ......

وأتوب إلى الله..

مما يكره الله

قولا وفعلا .. وباطنا وظاهر

استغفر الله العظيم

والله و توجوكي يا نعكشة

تحديث:
في مدونة شخابيط : لوحات ( نعكشة) عن : 1- علي الفراش 2- اوضاع 3- رسمة نفساوية
وكمان كتاب Drawing Faces أو رسم الوجوه و لينك بالسايت بتاع الكتاب
يا ريت تشرفوني هناك
......................
سلام عليكم و رحمة الله و بركاتة

كيف الحال؟؟

يا رب تكونوا بخير

بما إني مش لاقية حاجة اكتبها
وبما إني او الناس ملت من حكاية القصص اللي ورا بعضها
وبما إني في نفس ذات الوقت بحب الرغي
فلازم الاقي حاجة
بُقي ( او اصابع يدي علي الكي بورد ) يلعب
مليش دعوة

وبما إن كان جايلي تيجان من مصادر كتيرة حلوة تيجان دية
عشت و شوفتك يا نعكش ( علي رأي ميادة) بتعرفي تجمعي

المهم بقة هما من مناطق مختلفة اصلي مشهورة طول عمري هههههههههههههههه
أنا اصلا كنت قاعدة بنش ولا لاقية ولا صامولة في تاج حتى ( التاج الجديد بصواميل اليومين دول الصواميل دية بدل الجواهر اكمن الحديد غلي)
و إذ فجأتان الخير لما بيجي بيجي بالكومة
وبما انكوا مش هتستحملوا 3 تاج في طقة واحدة ( شوفتوا الخير)
وانا عن نفسي مش هستحمل
فأنا هاخد اللي جالي الاول بالاول
قشطة

الأول ( علي رأي يوسف وهبي ولا كان اسمو اية ابو شعر دة آة انور وجدي في امير الانتقام)
اتعاد مرة تانية الفيلم دة بفريد شوقي المهم

الأول
نظراً لأني ملاقتش تاج شكله منكوش ومعوق
فأنا قرقرت اني اصمم التاج بتاعي بنفسي
طبعاً جميل
شكلي كدة هحب ال Paint brush و هفقعلكوا مرارتكوا برسوماتي عليه
ياتي قمر


التاج دة جالي من ميرو صاحب مدوننة من أجل البشرية المعذبة
ومخترع هذا التاج هو احمد هشام صحب مدوننه بلدك يا رأفت
والتي ستجاوب التاج هي نعكشة صاحبة مدوننة نعكشة

بدأت تدون من امتي ؟ و دخلت العالم ده ازاي ؟

سؤال ظريف جداً . من ممممممممم يادي النيشة عالذاكرة من اخر السنة اللي فاتت او بداية السنة دية و كان في مدونتي الاولي Swing
قعدت فيها فترة طويلة يعني و حطيت فيها حاجات ليا برضو بس مكنتش حاسة اني مرتاحة فيها معرفش لية

... انا اصلاً انسانة ملولة....

المهم غيرتها لمدوننتي دية نعكشة شهر ابريل باين ولا مش عارفة اية

دخلت العالم دة عن طريق: مهند صاحب مدونة- الباحث عن الحقيقة - قالي سيبك من الشات و الهطل دة و قوليلك كلمة مفيدة في حياتك
وانا مصدقت صراحة
و قعد يعلمني حاجات كتير
تسلم يا سيد مهند


ايه كان انطباعك في البداية ؟
مكانش عندي انطباع .... او كان عندي وانا مش فاكرة ........ بس عادي يعني حسيت ان يا مكان بحط فيه الحاجات بتاعتي بدل مانا كل شوية اقرف الناس المشيتين و اقولهم اسمعو وعوا هقولكوا شعر و حاجات كدة

مين أكتر واحد بتهتم بتعليقه علي بوستك الجديد ؟


ممممممممم حالياً ؟؟؟؟ يعني هما ناس كتير مش واحد بس
بالنسبالي أي حد بينقد الكلام او الموضوع اللي انا كاتباه و بيحلله من وجهة ويناقشني في الي كتبتوا بحب تعليقه جداً و يعني ببقى في قمة سعادتي لما اقراله حتى لو بيقولي: إية القرف اللي انتي كاتباة دة كان المفروض تكتبي كذا وكذا عشان تبقى احسن
بس كأسماء
ممكن نقول و محدش يزعل لإن زاكرتي حلبسة خالص

علي سبيل المثال و ليس الحصر

أراجوز صاحب مدوننة أراجوز بس هوه بقالو كتير مش معبرني
محمد حلمي مخلوف صاحب مدوننة لمحة من حياة الكائن صفر ( يعني هذا الشخص فعلاً فعلاً بعتز بأراءة جداً من ناحية الأدب)
كوشيا صاحبة مدوننة قصاقيص ( الأنسانة دية رائعة ... بحس فعلاً بتعليقها دخلت جوايا و تمعمقت و طلعت بالمفيد)
آدم الغامض صاحب مدونة افكار في عقلي بتزعقلي ( ساعات كدة بتطلعله أراء مفيدة و بتوريني حاجات معيننة)
والله ما فاكرة يخربيت الغباء الاصطناعي
آه راجي صاحب مدوننة عين في الجنة ( كان بيظبطني في اللغويات و الحاجات دية ربنا يخليك يا رب)
ورود و اشواك صاحبة مدونة عازفة الأوتار ( بتحسسني كدة انها جابت الخلاصة)
بنوتة مصرية صاحبة مدونة دي دماغي ( ساعات برضو بتتحفني بأحاسيسها)
كتير والله بس أنا اللي معوقة ذهنياً
او فاكرة يعني مثلاً زي نور الحياة و ميرو و نورة الخشن و فارس با جواد و داركنس ( علبة ألوان) و محمد داوود و غيرهم والله بس انا مش هينفع اكتب كل الناس

فعلاً فعلاً : أي حد بيكتب في اطار النقاش بعتز بتعليقة جداً جداً جدا اكتر من الناس اللي فوق لو كان كاتب نقاش و هما مش كاتبين

و بكره حكاية حلوة قوي و خطيرة موت و الكلام دة

مين اتعرفت عليه من خلال المدونة و نفسك تتعرف عليه في الحقيقة ؟
هوه انا اتعرفت علي حد أصلاً ههههههههههههههههههه

يعني ممكن تقولوا سبهلة نفسي اشوفها هيا ووورود وا شواك و نورة الخشن و خيخة و بنوتة مصرية و بصوا
كل البنات عشان انا كدة هتفتح زي السؤال اللي فات


ايه أهم حاجة اتعلمتها من عالم التدوين ؟

متعلمتش حاجة صراحة .. عشان مبقاش كدابة
ولو اتعلمت حاجة وانا مش واخدة بالي فانا مش واخدة بالي عشان اقولها

تحديث : اكتشفت اني اتعلمت شوية حاجات علي الصعيد الادبي و علي الصعيد الفني


ايه أكتر حاجة كرهتها ؟
مش حاجة معينة ينعني مفيش حاجة بكرهها كره بقة و بتاع

بس بتتفقع مرارتي من التعليقات مثلا :
سوووووووووووو روعة
تحفة تحفة
خرافة لأ انتي معدية


بحس ان اللي جه مقراش
و حتى لو قرا محسش بحاجة

لأنه أكيد لو قراها بتعمق كان نفسه يقولي كلمة
انشالة يقولي :ليه كدة ،او مثلاً الافضل كذا ،أي حاجة بحب التواصل جداً
.........
هييييييييه أول تعليق و راجع تاني
او بسجل حضور و راجع تاني
طب انا استفدت إية؟؟؟؟؟؟؟؟؟

انشاله تكون التعليق الاخير و بعدها بخمسين بوست
و كلمتني في الموضوع و ناقشتني هبقي سعيدة جداً
............
بتفقع مرارتي برضو من اللي يرمي التعليق و يجري .. و الرخامة بقة يكون سألني سؤال ولا حاجة وانا جاوبت علية

طيب فيه اختراع اسمة تتبع باقي التعليقات عالايميل
مش عايز ايميلاتك تزيد
ابقي تعالى تاني المدونة
مبحبش النظام دة صراحة
يعني مثلاً حتى لو كاتبة أي حاجة بروح اشوف الرد عليها كان إية


ممكن تدي مثال عن اللي بتحلم تلاقيه ؟
انا هحلم لمين ولا لمين مش كفاية بحلم لنفسي
طيب طيب
نحلم للمدوننة يلا
المفاجأة بقة

مبحلمش بحاجة
هههههههههههههههههههههههه
رخمة طول عمري

طيب خلاص متزقوش
يعني كان نفسي في تنوع اكتر من كدة
يعني مثلاً : اكثر المدونات يا اما (سياسة يا اما ادب و شعر و يا اما فنون جميلة رسم و موسيقي )

يمكن قصور مني
او قصور من أي حد المهم يعني الاقي اختلاف
علوم ( فيزيا مُبسطة طبعاً عشان الجُهلاء أمثالي ، كيميا ، رياضة ، ألعاب بتاعت الزكاء)
تاريخ مثلاً
جغرافية
ثقافة عامة
معلومات عن كُتاب عن فنانين عن كيميائيين
معلومات كدة يعني
ملاقتش صراحة

ولو حد يعرف مدونات كدة يا ريت يقولي هكون شاكرة ليه جداً


نفسي كمان يتعمل اجتماعات ثقافية ( صالون تدويني)
او تنوية عنها بحيث نقدر نستفيد اكتر


حاسس ان التدوين له تأثير ؟
علي إية بالظبط؟؟؟
أي حاجة في الحياة دية مهما كانت تافهة( ولا اعني بالتدوين انه حاجة تافهة)
بتأثر
أي حاجة بتأثر في الكون
لكل فعل رد فعل
يعني مثلا لو رميت الكورة علي الارض حاجة بسيطة و يمكن في بال حد ولا حاجة
بالعكس انا نشط بيها بعض من عضلاتي و تابعتها بعيني فقوت قدرتي علي التتبع و افتكرت اهوه اني كنت رميت الكورة فبقت زكرى ليا بستخدمها عشان افرح بيها او ازعل او واتفر

أكيد مؤثر

سلباً بقة إيجاباً حسب المدونة نفسها

طيب كلمة أخيرة ؟

اعتقد والله اعلم ان الناس طفشت و فية اللي مكملش البوست اصا و فية اللي زهق
و فية اللي قفل المدونة
بس الناس اللي تعبو نفسهم و قروا ابوست او التاج للآخر
آسفة لو كنت مفدتكوش
مبسوطة لو استفدتوا ولو من فسفوسة من كلامي

كلمة آخيرة بقة ( يييييييييييه) استحملو استحملوا بعلمكوا الصبر

انا فعلاً بحترم كل كلمة نقد ليا و بستفسيد منها جداً
انا كنت عاملة المدوننة عشان اتناقش مع الناس و اتواصل معاهم و يفيدوني
ولو اقدر افيدهم هفيدهم
لو لاقيتوني يا جماعة حيدت عن طريقي
و عملت حاجات مشينة او وحشة
يا ريت تعيدوني لرشدي
لو حد شايف فيا حاجة مش كويسة يقولي
سواء أنا قبلت الحاجة دية و غيرتها ( خد ثوابي)
او عرفت صفة عني - لإني كتير بتصرف كدة جهجهوني-( الكلمة دية عرفتها من واحد كان بيفرجنا على شالية من كام سنة) و مبلاحظش كويس
او حتى معملتش بيها
خد ثواب النصيحة
سوري اني عطلتكوا

تحديث : افتكرت حاجة

شوية مدوننات كدة عاجبني

صور ساخرة : بتاعت EgyBoy و اللينك بتاعة في البوست اللي فات لإني تعبت

مدوننة بلدك يا رأفت : هذا الرجل يفكر

مدوننة : طيارة ورق ( عميقة قوي)

مدوننة : قصاقيص ( بحب اسلوبها جدا)

مدوننة : من اجل البشرية المعذبة : لية نظريات نظريات

مدوننة فارس بلا جواد : شعر علي اصوله

مدوننه : لمحة من حياة الكائن صفر : عايز تستمتع بانك تركز عشان تستمتع و في الاخر هتستمتع ( لية اسلوبه)

مدوننه : المهم هات من الآخر : ممكن فجأة تلاقيها بتتكلم عنك مش كشخص بس تحس انها بتوصف مشاعر الناس قوي

مدوننة : نداء إلي الحياة : عايز تريح اعصابك روحها

مدوننة : نورة الخشن آه و كفى : في كلمات قليلة توصف موضوع كبييييييييير

مدوننة :كيكي فكك مني : روقااااااان

مدوننة رحايا العمر : برغم اني متمعمقتش فيها كتير بس هذا الرجل بيتكلم كلام كبيير

مدوننة : عارفة مش عارفة ليه : عايز تحس بجمال البساطة روح هناك

مدوننة : علم الهسس : مُخ

مدوننة : مقهى ليلي : he's Got Style

مدوننة : روح قلب ماما : بحس اني روحت البيت

مدوننة : شريف مش فاكرة اسمها اية دلوقتي و مكسلة اروح : هذا الرجل انسان راقي

بصو لو سبتوني هقعد اكتب من هنا للصبح- معظم- المدوننات اللي علي الجمب عندي مدوننات عسولة



سلامٌ عليكم
أوجه التاج .. ينهاااار نسيت السؤال دة


ميادة رفعت

حنين


استراحة محمد


بنوتة مصرية


محمد داوود


سبهلله


مش عارف


راجي


ابو صلاح


انجي


عالم الهس

نور الحياة
داركنس

كيكي

انا كنت كاتبة ناس كتير بس كسلت بقة

فأي حد نفسة ف يالتاج ياخده

سلام عليكم

لحظات من عمري ( سامحني )

تنوية:
في مدوننتنا شخابيط لوحة للفنانة عازفة الاوتار - ورود و أشواك-
...................
برضه ملوش علاقة بالقصة اللي قبلها و دية مجرد لحظات من العمر
أمــــــــــــــــــــــــــــــــــــــــــــــــي ، محمــــــــــــــــــــــــــــــــــــــــــــــد

دوت صرخات عالية فجأة قبل أن تسرع أمها لتلحق بها

قالت برعب: ماذا هناك
أظن أنني سألد، آه لا ... لا أستطيع ... أمي... أم...... .
تسارعت أنفاسها لم تعلم كيف تقول لها ما تحس به ولكن أمها كانت تحس بها فعلاً
دلف محمد مسرعاً إلي غرفتها فوجدها باهتة اللون علي جبينها قطرات عرق وهي مرتعشة
اقترب منها قائلاً بهدوء مصطنع: شششششششششش خذي نفساً عميقا ( مثلما أفعل) ثم اخرجيه بهدوء

حاولي
بدأت تحاول و هي ترتعش

ثم فجأة

آآآآآه .. لا .. سا .... سألد ... تكررت كلمتها الأخيرة و هي ضاغطة علي شفتيها حتى كادت تمزقها مع اهتزاز شديد في رأسها من شدة تقلص عضلاتها.

ألبستها أمها عباءة و انطلقا في السيارة و أمها لا تنفك تقرأ كل ما حفظت من الآيات القرآنية
شخصت عينيها فجأة و ضغطت بشدة علي ضروسها و علي يد أمها : توقف ، أرجوك توقف لا تحرك السيارة فأنا ......... لم تستطع إكمال الجملة ......
أبطأ من سرعة السيارة حتى وصلا إلي المشفى

أسرع يصرخ في الاستقبال : أختي ستلد أرجوكم أسرعوا.....
انطلقت معه إحدى الممرضات للتأكد و نادت علي العامل ليحضر لها سريراً متنقلاً
وضعوها علي السرير المتحرك و انطلقا في الطريق إلي مقر الولادة
نظرت بعينين زائغتين و دموع هاربة إلي امها و بشفاة مرتعشة قالت : قولي لحسن أنني لم أستطيع احتمال أكثر من ذلك .....أخبريه أن يعامل ابنتنا كما كان يعاملني ... و أن يسميها حنان كما اتفقنا .
طمأنتها أمها قائلة : بل ستقولين أنت له هذا.
لم تستطع أن تجادل أمها في هذه اللحظات .
ازداد شحوب وجهها و ازداد تصبب العرق منها ووهنت ضغطتها علي يد أخيها
نظرت إلي محمد في محاولة صعبة أن تبتسم : إن نورا تحبك ، لا تتركها مهما فعل بك أبيها ، لا تحطم قلبها الصغير ، الذي اكتفي بأن يضعك فيه فأنت تملئه تماماً .......... عدني بأنك ستكون معها إلي الأبد، ان تفعل ما تستطيع ولا تستطيع كي تتزوجها
لم يملك إلا أن يقول : أعدك يا أختي ، ولكن عديني أنتي أن تصمدي
بدأت كلماتها تتفلت منها و عينيها تدوران
.
أول مرة التقت بحسن صدفة: أحست و كأن الحياة دبت في قلبها ولم تعلم لماذا ..... قدم لها وردة : أخذتها بيد مرتعشة ...........طلب منها الزواج : لم تملك إلا أن تومئ برأسها في خجل .......... لأول مرة يقول أحبك : احتضنته و دار بها .......... أول مرة يسافر: تحبس نفسها في غرفتها لا تريده أن يرى دموعها .......... عاد بعد شهر و يومين: طارت في المطار كيمامة عولجت من انكسار جناحيها ............. سكنا في شقة جديدة بدل من سكنتهما فوق السطح :شموع و رقصات ناعمة و نظرة انبهار بزوجها .......... قالت له أنا حامل شهق قائلاً أريدك لي وحدي .......... سافر منذ شهران أمسكت بيده بشدة و أعطته ورقة كُتب فيها " لم أكن سأحتمل أن يرفضه أبي نظراً لسوء حالته المادية أظن أني سأبقى معه إلي أن يحين الأجل"

أسرع الطبيب إليهم همهم ببعض الكلمات اللاتينية إلي الممرضة التي أسرعت لتأخذها بعيداً عن عيني أمها القلقة و أخيها الذي راح يدعو الله جاهداً
وقت يمر .... و هما يبدلان الأماكن
قال محمد :ءاتصلتي بحسن ؟؟؟
قالت : لم استطع الوصول إليه
أغمض عينيه بأسى فأمسكت أمه بيديه : تفاءل
أجاب في يأس : سأحاول
.
خرجت الممرضة مسرعة و علي وجهها علامات الخوف و الرعب فقامت الأم مسرعة لتسألها عن حال ابنتها فقالت : بخير بخير ... ركضت إلي زميلتها الممرضة الأخرى : ابعثي أحداً ليحضر دكتور أحمد شفيق و اسألي عن فصيلة دم أوه السالبة .
و غابت الممرضة عن النظر
.
تسارعت ضربات قلب أخيها و أمها ....................
دخل طبيب آخر إلي حجرة العمليات في توتر
فأمسكت الأم بالممرضة في عصبية : قولي لي ماذا يحدث!!!!
قالت : لقد نزفت كثيراً مما أثر علي بعض أجهزتها ، للأسف لا يوجد فصيلة ابنتك في بنك الدم .... قالت لها : إذن فخذوا مني .... سألتها بسرعة ما هي فصيلة دمك قالت : أوة الموجبة
حركت رأسها بالنفي قائلة لا يمكن .. نحتاج إلي السالبة ... قالت و أنت : قال محمد : أنا فصيلة – إية-
قالت الممرضة بسرعة و هيا تتحرك باتجاه غرفة العمليات : أعتقد أننا سنضع لها محاليل علها تصمد ولكننا نحتاج إلي نقل دم فوراً........
.
أجهشت الأم بالبكاء داعية : يااااااااااااااااااااااااااااااااا رب
.
خطوات مسرعة باتجاههم ........... وجه تتضح معالمه شيئاً فشيئاً
صرخ محمد : إنه حسن
قالت له أمها دون أن تسأله عن حاله : ما هي فصيلة دمك؟؟؟؟؟؟؟؟
قال وهو يأخذ أنفاسه بسرعة : أوة السالبة
.
صرخت الأم من الفرحة علي الممرضة: إن زوجها فصيلة دمه مناسبة
قالت الممرضة : تفضل معي لنقوم ببعض التحليلات و اخذ منك التبرع
غابا عن الأنظار
وقت يمر
انقبض قلب الأم فجأة
خرج الطبيب الأول و علي وجهه نظرات علمتها أمها جيدا ...
سقطت دموعها بألم
فأردف الطبيب يقول : للأسف لم نستطع أن ننقذ حياة المولودة
.
شخصت عيناها من الفرح ... كادت أن تقبله ...
قالت بصوت مرتفع : هذا يعني أن ابنتي بخير؟؟
أجاب : لقد حضر دكتور احمد في الوقت المناسب .
.
امتزجت دموع الفرح مع دموع الألم
أسرعت الممرضة بالدخول إلي حجرة العمليات محملة بكيس الدم
.
اقترب حسن من أمها قائلاً : هل علمتِ كيف حالها ؟؟؟
قالت بأسى : لم يتمكنوا
شخصت عيناه و قال : لااااااااااااااااا
كيف هذا................
سقط علي الأرض مغمضاً عينيه من الألم
ارتعشت شفتاه
اسقط رأسه للخلف ناظراً لأعلي و قد هربت دموعه منه
قائلاً : لا تتركيني يا حلااااااااااااااااااااااااااا .
لا تدعيني وحدي .
بادرت الأم بسرعة : حلا بخير
ألتفت إليها بسرعة
أكملت : لم يتمكنوا من الحفاظ علي حياة المولودة
خرجت حلا من غرفة العمليات و هي غائبة عن الوعي
.
وقت يمر في غرفتها و هي نائمة ..........
دموع تخرج من بين جفنيها المغلقين
امسك حسن بيدها في حنان
أول مرة التقى بها صدفة : لم يستطع أن يرفع عينيه من عليها ............ أخذت وردته بيد مرتعشة : أحس و كأنه قد وقع عهداً للبقاء معاً و كانت هذه هي الإمضاء ................أومأت برأسها خجل حين طلب منها الزواج : صرخ في نفسه عالياً أحبـــــــــــــــــــــــــــــــــــــــــــــــــــــــــــك ....................... حين قالها علانية احتضنها و كأنه يحتضن كل سعادته بكلتا يديه و لا يريد أن يترك سعادته أبداً ............ أول مرة يسافر : أحس و كأن روحه تنسحب منه بصعوبة .....................رآها بعد شهر و يومين و ثلاث ساعات : تسارعت نبضات قلبه حتى انه لم يسمع الضابط حين أخبره بأن عليه جمرك وزن زائد ..............قالت له أنا حامل شهق قائلاً: ألم نتفق أن نؤجل الحمل قليلاً ، أريدك لي وحدي ...... عند طبيب الموجات الصوتية : انظر كيف ابنتنا جميلة . أنتي أحلى. ................... كبرت بطنها ، اقترب منها علي السرير فانزعجت و قالت بحنق : ستخنق الفتاة ..... أمسكت يده قبل أن يسافر و أعطته ورقة فنظر إليها قائلاً بالطبع يا حبيبتي .
.
سقطت من عينه دمعة
قالت بصوت خفيض : سامحني لم استطع أن .......
قبلها علي رأسها قائلاً : يمكننا أن نجلب أولاداً آخرين
حاولت إظهار ابتسامة تضاهي ما بقلبها من فرحة قائلة : حقاً
قبل يدها قائلاً : حقاً

تعليق مع إصراري :

الشخبطة دى بتاعتى(عائدة علي مع اصراري مش نعكشة اللي كاتباها) وهى مكتوبة فى حلا من حسن انفعال لحظى بعد ما قريت القصة

زى الحياة

الحب لما بيتولد

وبنتولد وياه

زى الوجود

لما اراد المولى

م العدم احياه

زى الربيع

لما ظهر

وكسى الشجر

بالحسن يا محلاه

زى القمر

حبك

وأجمل مالقمر

طول م القمر بيغيب

وحبك لا

يا شمس أبدا لا تغيب

ولا يحجبك عن قلبى غيب

أنا بعشقك رغم البعاد

وجوه قلبى الف آه

تعليق فتي مصر EgyBoy :

وللتوضيح بقى فصيلة الدم O ليست هى المشكلة فى القصه إنما المشكله هي (عامل ريسس) سالب نسبته عندنا نحن الشرقيين تكاد تكون معدومة أما الأجانب الجنس الأبيض فنسبته 15%

ديه اضافة من عندي انا بقة : لا يمكن نقل دم من الموجب للسالب و إلا سيحدث تجلط في الدم

..................................

حكوك الطبع و النشل محفوسة لنعكوشة

لحظات من عمري ( على الشاطيء)

سلام عليكم
هذه القصة غير مرتبطة بالقصة اللي قبلها ولكن ما اكتبه هو مقطع من الحياة
عشان كدة هيا لحظات من عمري ( مش عمري أنا ) بل عمر أي حد عايز يقول عمري
في جو هادئ . تدغدغه بعض النسائم و تعلو أصوات طيور النورس بين الفينة و الأخرى علي خلفية حالمة من أصوات الموج علي شاطئ ذو رمال بيضاء و بحر تتدرج ألوانه ما بين الأخضر الرقيق إلي الأزرق الغامق ليلتقي باللون السماوي معطياً ....
سقط قلمي بعد أن خبطه بكرته الصغيرة
إلتفت إليه بضيق
سمعت ضحكاته الطفولية فابتسمت.
علمت أنها دعوة منه كي أقوم من علي كرسيي الصغير خشبي الصنع و المنضدة اللذان اتخذتهما مكتبي...
صرخ عليّ : ماماااااااااااا ... شوفي عملت إيـــــــه؟
قمت من مكتبي لأخطو بقدمي علي تلك الرمال الساخنة و يبدأ العد التناقصي لعمري 27 > 23 > 19 > 15 لأصل إليه في عمر الخامسة
حفرت معه و بدأنا نصنع طرقاً و أنفاقاً في مدينتنا الرملية
كنا نتبادل الأدوار
هو يحضر الماء من البحر لنملأ البحيرة بينما أنا أضع القواقع لتزين المدينة ثم أذهب أنا لأحضر الماء و ياخذ هو دوري

ألتفت إلي صرخات ميادة الضاحكة و هي تركض باتجاهنا لتشاركنا عمارة مدينتنا الصغيرة
ثم فجأة ............

وجدتها قد قفزت علي المدينة

شخصت عينانا أنا و عليّ و ارتفعت ضحكاتها التي أثارت في غريزتي الطفولية ..
و بروح طفل غاضب عنفتها قائلة: امشي أنتي وحشة .
انطلق عليّ في البكاء
تبدلت ملامح ميادة حين قالت في حزن : آسفة يا ماما :(

- ماما - ما هذا الذي فعلته . أنا أمها و لست أصغر منها. كيف قلت لها هذا . تخبطت الأفكار في عقلي قبل أن آخذاهما الاثنين في حضني قائلة : متزعلش يا لولو، ممكن نعمل مدينة تانية وانتي يا مودة مش وحشة يا حبيبتي. إنما التصرف اللي عملتيه هوه اللي وحش وأنا محبش بنتي الجميلة تعمل تصرفات وحشة ، ولا إيه يا مودة؟؟
أومأت برأسها
قمت بدغدغتهما فانقضا علي كي يدغدغاني
و ارتفعت ضحكاتنا
لأعود مرة أخري لطفولتي

كم أحبكما
كم تمنحاني ما ظننت أني افتقدته
متى تعود يا قاسم لترى كيف صار بَنوك

احتضنتهما بشدة و غطينا عليّ بالرمال ثم انطلق ثلاثتنا لنستمتع بماء البحر البارد....................
...........................
حكوك الطبع و النشل محفوسة لنعكوشة