نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

تفاصيلها النمنمة




عمرك حسيتي إنك مش عاوزة تكلمي شخص معين لإنك كل ما بتكلميه بتحسي إنه بيلمسك من جوة قوي من غير ما تقربوا من بعض ومن غير حتى ما يبقى فيه كلام حب ... عمري ما حسيتها بس متخيلاها قوي


كانت هيا حكتلهم عن خمستلاف حاجة و خمسميت موضوع و من بينهم ذكرت حاجة عن الزهور اللى هيا بدأت تجمعها مؤخراً و تجففها .. مشيت الأيام و فى يوم لما خرجوا كلهم مع بعض فى وسط الحوار طلعلها وردة صغنتوتة
ولا حمرا ولا بنفسجي ولا تحمل أى معنى غير إنه قالها بتلقائية و صوت عادي زى ما ما كلهم بيتكلموا مع بعض : دية زهرة الليمون يا رب ماتكونيش لسه ضفتيها لمجموعتك .. خدتها برضو بتلقائية
بس جوة منها حست انه مد إيده على قلبها و لمسة بخفة الحرير و سابه تاني
مشيت المواضييع و الايام
كان دايماً بياخد باله من فسافيس كدة هيا بتعملها ومبتبقاش واضحة قوي
نوع البمبون اللى بتحبه و دايماً بتبرم ورقته و تشمها متعرفش ليه قبل ما تحطها فى الشنطة
الوردة الصغيورة اللى طرزتها بايدها على شنطتها
انها مبقتش تاكل ايس كريم فستق زي زمان و بقت تحب المستكة و الليمون
الرسومات اللى على حيطة اوضتها لما وريتهم صورة كانت متصوراها فيها
بتحب تحط الكاتشب بطريقة معينة على البطاطس
حاجات هبلة صح
ولا حد ممكن ياخد باله منها خصوصا انهم جروب صحاب كبيــر
بس كانت بتمثلها هيا حاجات مش هبلة البته
كانت بتعملها بينها وبين نفسها و احتمال تحكي عنها بسرعة و متطولش فيها.. مم
بس كل مرة كان بيلمس قلبها
بحنية و بنظرة بريئة مفيهاش ولا شهوة ولا بتاع
ولا حتى أصلا كان بيتعمد إنه يلمس قلبها
ولا كان يعرف انه كان بيعمل كدة
بس كان بيحب تفاصيلها النونو ديه
"صعب قوي تلاقي راجل بيركز فى التفاصيل المفسفسة بتاعتي دية " دة اللى قالته لنفسها
قررت ما تحكيش تاني تفاصيلها ولا بسرعة ولا ببطء بس هوه كان لسة بيلاحظ و لسة بيلمسها من جوه على فترات متباعدة
هيا؟؟؟
بعدت
آه .. سافرت تعيش مع أبوها هناك و بالمرة تتعلم شوية حاجات فى مجال دراستها
أصلها كانت وحيدة امها و ابوها المتطلقين و هيا عايشة مع امها
بعدت عشان مش هتقدر تقوله إنت بتعمل فيا كدة ليه لما بنتكلم؟
بعدت عشان بقت تفكر فيه اكتر من اللازم و هوه بيعاملها عادي و بيبصلها زي اى واحدة من الجروب
بعدت عشان كانت خايفة على قلبها
متعرفش انه مركزش فى تفاصيل اى واحدة غيرها
من غير ما يتعمد و من غير ما يعرف اصلا انه بيعمل كدة معاها بالذات
مفكرش اصلاً إنه بيحبها او معجب بيها
كان فاكر إنه عادي زي ما بيشوف الكل بيشوفها
دة اللى كان و احتمال يكون لازال فاكره
مركزش فى لحظة مع نفسه انه مش بيعمل كدة مع غيرها
بعدت
منسيتش بس اتعودت محدش يلمس قلبها ولا يركز فى تفاصيلها
وهوه كان عادي .. هوه اينعم بقة متضايق لما سافرت بس كان اصلاً ظروفه كلها مفحكشة
كان دايما بيبقى مخنوق بس كان فاكر انه من الظروف و بس
كان بيفكر فيها آه .. بس كان بيقول لنفسه ." عادي ماهو لو اى واحدة من صحابنا سافرت هفتكرلها مواقف برضو " المهم يعني
أهيه راجعة بكرة
وهوه حس بنغزة في قلبه وان حاجة جواه اتسحبت فجأة لما صاحبه قاله انها راجعة
أما نشوف شو راح بيصير؟! و شو مخبيه الأيام ؟ ـ
.................................
بالمناسبة البتاعة من وحي الخيال تماما ولا اعرف واحدة اصلا حد بصلها فى تفاصيلها
والزهرة اللى فوق دية زهرة الليمون


حكوك التبع و النشل محفوسة لنعكوشة


للتسجيل لنفسي: امتحان الجلدية كان حلو الحمد لله
رغم ان درجاته قليلة بالمقارنة باللى انا ضيعته
بس انا لاحظت حاجة بس
قسم الاشعة و الكلينكال باثولوجي و الجلدية دول عالم رايقة و محترمة
بس كدة
فى العملي جالنا حالة
pytriasis versicolour
اصلا الراجل لما وقفت جمبة
بقوله
هوه فين ال lesion اصلا
قام شاورلي على قفاه
ولا شوفت حاجة ... فين ياعم .. اهوه يا دكتورة ..
قفا مصرى عادي جدا على راي واحدة صحبتي
فين فين اما شوفت البقع الصغنونة الفاتحة مش قوي اللى فى القفا
و افتكرت صحبتي (ه) لما قالتلي ان حالات بتريازس نزلت
يلا خير
الحمد لله
ناقص امتحان شوفي الباطنة و رسم القلب
ربنا يستر
الحمد لله رب العالمين
>>>>>>>>>>>
16 oct 4:38 am

yesterday was the last lecture in internal medicine
prof. Osama was really Rayeq
i'll miss him
really i will
if i were a guy i would have hugged 'em and kissed 'em
we went to Cinnabon
Ma , M1 , M3 , M 18 , H , N
we all laughed , i liked that
we've made a schedule with the places we wanted to go in the vacation
i liked this idea
i was totally exhausted as i was awake since 3 am
yalla , today isA i'll attend a lecture in communication skills in the faculty of pharmacy
yea this new one which was built recently
i wanna go there , i saw it from outside it's marvelous
Now , i feel that am having brain enlargment and increase in ma cranial tension
my cuff muscles are so much hurting and also ma back
i feel like this college is gonna kill me and make me like disables
anyways
الحمد لله

الرجم دون الموت


و كأن القمر يسبني و الشمس تلعنني
وكأن قطرات الماء تسقط عليّ لتصهرني
و تلف جزيئات الهواء خيوطها حولي لتخنقني
وكأن أعين كل الخلق تتفجر بالدماء
تسخط علي
كلهم عينك .. كل ما حولي أنت
اجتمعت عرائسي تشكل هيئة القضاء لتحاكمني
أصبح مكتبي ساحةً للقضاء
الحكم علني
الرجم دون الموت
كل ما في الكون سيقذفني بالسخط
الكل أنت
أنتظر تنفيذ العقوبة - أن أسقط من نظرك - و كأني أرتجف
وكأنني أحوطني بنفسي
وكأن شعيرات جسدي منتصبه و جلدي كالأوزة
و كأن العين محكمة الغلق خشية أن ترى ما يدور من حولها
أذني هي حاستي الآن
لم تفصح عما بداخلك
وقع الحكم عليّ و تشددت العقوبة
لن أطالب بالتخفيف أو الاستئناف
سأفضل الرجم و أنا أجز على أضراسي
بيدك أن تمنعهم من تنفيذ العقوبة
بيدك كل شئ
فلك حق الفيتو على كل أحداثي
فقط إلى أن تنتهي مدة العقوبة
لن أطالبك أن ترق لحالي.. لن أفعلها
و لن أقبل بشفاعاتك إن كانت لمجرد الشفقة
إن لم يكن حباً و حنيناً و شوقاً و غفراناً
فأفضل الرجم علّني أبرأ من خطيئتي

..........................................


حكوك التبع و النشل محفوسة لنعكوشة


يمكن محدش شايف نكبر الخط : هذه مجرد مقطوعة أدبية
مجرد تخيل..
مجرد بتاعة تقمصتها ..
عشان محدش يعلق وكأنها أنا
لو حد هيعلق
دة لو حد فكر يعني
يا يقول حس بإيه
يا يقول إيه الوحش اللى فيها أو إيه الحلو
معلش.. بتتفقع مرارتي من كلمة تحفة
و واو
و رائعة
لإني مجرد هاوية.. و فاشلة في اللغة أصلاً
..................
للتسجيل لنفسي :
13 اكتوبر ـــ 1:02 م
متوقعتش كدة صراحة
تقريبا انا كويسة فى الكلينكال باثولوجي
حسيت ان كل المعلومات تمحورت و تشعررت و راحت فى اتجاهات عجيبة
أول مرة اشوف حاله ثلاثيميا مينور أصلاً .. و حسيت بالبلاهة قدام حالة اللفر
يلا المهم الامحتان عدى و خلاص
ناقص بكرة
ربنا يستر بقة
هانت أهيه
شدى حيلك يا بنتي
شوف قلة الأدب.. نسيت اقول الحمد لله
الحمد لله
...........................


كيف هو حالي؟

كثيراً ما أجلس جلستي هذه أمام ورقتي البيضاء أبحث عن كلمات أكتبها
لا من أجل شئ إلا حبًا فى رؤية يدي تكتب إليّ كلمات أقرأها في وحدتي
أقف أمام كتاباتي القديمة لأتمعن ما بها
أعجب .. لماذا لا أدون تاريخ كتابتي إياها؟
البعض منها فقط مؤرخ و الكثير بلا أي تاريخ
رأسي مزدحم الآن.. أحس بتضخم كل شئ به .. حتى أفكاري .. لا تقدر على الخروج من فتحات عقلي الضيقة من شدة تضخمها
أحتاج إلى النوم .. ليس من شدة تعبي أو ارهاقي برغم كوني مرهقة بالفعل ولكن هرباً من كل شئ .. هرباً من الواقع الذي يغلفني وأنا مستيقظة .. هرباً من الذنوب ربما .. من الالتزامات احتمال ... من المواجهة ... من كل شئ .. في أحلامي أبني عالماً افتراضياً لا يكون دائماً كما أريد و لكن ميزته أنني يمكنني الخروج من مشكلاته بمجرد خروجي من الحلم لتتبدد(المشكلات ) تماماً
ولكن نومي و هربي لن يخرجني من مشكلاتي الحقيقية في عالمي الواقعي

أصبحت دموعي سهلة الخروج .. لا أدري لماذا قلت قدرتي علي التحكم بها .. كنت أكثر صلابة ( لا أعلم متى تحديداً ولكن أذكر انني كنت كذلك) .. لو أنني أعلم مشكلتي

أحتاج إلي شخص فقيه أسرد له قصتي كاملة - دون أن أحذف أي جزء منها- كي يخبرني أين تكمن المشكلة.. لم تعد أحاديثي مع نفسي مجدية .. دائماً ما تنتهي بحلول سطحية لإرضاء جميع الاطراف.. مع بقاء الطبقة الداخلية على حالها.. أصبحت أفتقد نظرتي العميقة المتعمقة للنفس.. أصبحت أعجب من تصرفاتها

تنقصني الكثير من الجرأة و الثقة بلنفس.. علمتني أمي أن ثقتي بنفسي هل أهم شئ.. كنت كذلك قديماً .. ما عُدتُ أثق بنفسي.. لماذ؟؟ لا أعلم

أصبحت هشة جداً .. حتى ضحكاتي التي كانت تغلب عليّ لتواري حزني الداخلي ووحدتي تبددت.. ما عُدتُ استطيع أن أغصبها على البقاء معي .. تخلت عني .. تركتني لينهش الحزن وجهي تاركاً آثره على نظرتي و تجاعيده

أحس أني عجوز بلا خبرات .. أحس بقرب انكسار شوكتي .. أحس بانحداري .. أحتاج ليد عون .. لا ستطيع أن اطلبها
احتاج للفضفضة ( و هأنذا أفعلها) .. ما عدتُ أستطيع أن أخمد كلماتي

لقد تاهت نفسي .. أين هي الآن ؟... كانت دائماً تقف إلى جانبي .. كنتُ أكتب فتستيقظ نفسى الداخلية فجأة لترد عليّ
أين تكمن ؟؟ لا أعلم

أحس أنني تائهة .. هل أنا على صواب أم على خطأ .. لا أجد أحداً اسأله .. أحتاج للسؤال .. أخاف من السؤال
أحتاج للتوجيه .. و اخشى أن أطلبه
أحتاج للمعونة .. و اتحرج منها

أحتاج أن تصحو نفسي
أفيقي.. أعينيني .. أحتاكُ إليكِ

أصبحت في حالة يرثى لها .. لقد خبا حس دعابتي .. خبا كل شئ .. بسمتي
دمعتي الأبية صرت مشاعاً لكل من يرد أن يراها

أحتاج لوسيلة للتنقية تلائمني

tuesday-2-dec-2008
12:33 am

.............................................................
الغريب .. إنى حاسة بنفس الكلام دة دلوقتي
سبحان الله
الزمن بيعيد نفسه بأحداث مختلفه
...........
ملاحظة إني ديما بقول كنت كذا و كنت كذا

بيفكرني باللى بيقول الفراعنه بنوا وا لفراعنه سووا
المهم انا إيه دلوقتي
أنا مش كدة
..........
خير خير
سلام عليكم

اصفحي.. يا من أنا أنتِ

لو أنني قنديلاً لكنتِ أنتِ زيتي و هوائي
لو أنني قلماً لكنتِ أنتِ فكرتي و أوراقي
لو أنني ملكاً لكنتِ أنتِ سطوتي و كبريائي
لو أنني التاريخ لكنتِ أنتِ قدري و أفعالي
ارفعي هامتك ياامرأتي فلو لم تكوني أنت لما كنتُ أنا
قومي و ارقصي طرباً فالقلب لم يعشق سواكِ
دعيني أقبلُ أناملكِ طلباً للصفحِ عن بُعدي
قد كُنتُ مُـغَـيَّـبـاً فعافيني
قومي من صمتكِ مليكتي .. فالصمت يشطرني و يدميني
إن شئتِ.. ـ
تركتُ النورَ و الأحبارَ و العرشَ و الأحداثَ لأجلكِ إن كانَ يرضيكي
وكيف لا أفعل و أنتِ نبعُ إلهامي .. بالله عليكِ لا تجافيني
قومي .. و اعتلي هامتي .. قد جئتُ معتذراً .. فلا تُقصِيني
فإن لم تقبلي الأعذار فلن أبقى .. فلم تعد الحياة - من دونكِ - تستهويني
قد ظننتُ أني شيء من دونك فاعذريني
قد كنتُ مغروراً فاحتوي خطئي و سامحيني
كنتُ تائهاً و بُعدكِ أرشدني .. فاستقبيلني تائباً و ارحميني
فأنا أنتِ يا عمري وما جئتُ إلا لنعود كما كنا
فما عاد الإلهام يزورني و ما عادت الأحلام تأتيني
فأنتِ إلهامي و أحلامي و روحي .. فاصفحي
اصفحي يا سر تكويني

..........................
حكوك التبع و النشل محفوسة لنعكوشة
للتسجيل لنفسى فقط: 8 اكتوبر 11:55 ص.. خايفة قوي و مبسوطة قوي .. نفسي اتغير
وش مستكين و بيبص شمال و يمين
11:04 م راجعة منرفزة من التعب و متضايقة مش عارفة ليه مع انى كنت مش متضايقة
مش طايقة حد يفضل يلح عليا فى الاطمئنان على حالى
ومش طايقةة حد يحبطنى
عادى يعنى لية مبيتكلموش معايا عادي او يراعوا انى مش قصدى اتنرفز
هيبقى يوم السبت باذن ربي عندى باطنة لونج
وبعدها امتحانات متواصلة كل يوم
ربنا ييسر
نفسي الامتحانات تخلص على خير
مش تخلص و خلاص
ماهى كدة كدة هتخلص يعني( إن شاء ربي)
شئت ام ابيت
عاوزه افرحني
أيوة افرحني .. ليا حق افرح برضو لو حاجة حلوة حصلتلي
يارب
و افرح والدي ووالدتي
و احس انى استحق الاجازة
خير خير
.......
10 اكتوبر 12:24 م
اول القصيدة كفر
زهقت من فكرة انى عارفة المعلومة و مش قادرة اقولها
زهقت كمان من انى ابقى قاعدةة خمس ساعات فى السرير عشان انام و منامش وانا اصلا مش متوترة
عارفة انه قدر.. الحمد لله .. والله مش متضايقة من النتيجة ..بس متضايقة انى كدة
محتاجة اتغير.. اما نشوف باقى الاسبوع .. هحاول انام انهاردة كويس.الحمد لله
اة صحيح .. زعقت مع مظ مظ تانى .. زهقت من نفسى
امتى هبقى بنت مطيعة لوالديها بقة
ربنا يهديني
.......
11 اكتوبر 7:25 م
افضل من امبارح الحمد لله
بس حسيت انى كان ممكن اكون افضل نظراً لإنى مديتش لنفسى فرصة افكر فى اللجنة الأولى و كانت بتسأل فى حاجات انا عارفاها
الدكتورة التانية (د/ عزة : قالتلى عندك circumscribed nominal amnesia
عندى مشكلة فعلاً فى الاسماء.. يلا خير
بس الحمد لله
..........

12 اكتوبر 10:31 ص
لولولوولولولوولي .. اول امتحان اخرج منه مبسوطة من ساعة ما دخلت دوامة الامتحانات دية
يلهوي .. دنا كنت تقريبا نسيت إنى بعرف اجاوب
الحمد لله رب العالمين
يا رب تمم باقى الامتحانات على خير .. اما نشوف بكرة كيف راح بيصير
وش مبتسم و مبسوط
احمد ربي
آ صحيح كنت هنسى
الدكتورة كانت كوكي قوي
بتقولنا .. بصو يا جماعة اهوه
the lesion is here , what's ur diagnosis
لأ الراديولوجى دول ناس عسل
اول مرة اشوف حد بيطبطب علينا منس اعة ما دخلت سنة 5
احمد الله
......
11:40 ص
حاسة بصخرة على قلبي و غصة فى حلقى
ليه أنا كدة يا ربي
محتاجة احس إني راضية بجد
وإنى هادية و قنوعة
زعلت امى تانى
لية بتفضل تضغط عليا لحد ما انفجر
و اما انفجر
تضايقا
و انا اتضايق من فنسى إنى ضايقتها
ياااااااااااااااااا رب .. نفسى ابقى انسانة هادية و مش عصبية و خصوصا مع امي
ارضى عنى يا رب
.............

فاكر

ساعات كتير بيبقى نفسي أكلمك .
الصبح بدري.. الظهر عادي ... ساعة العصاري .. عالمغربية .. حتى كمان بعد العشا
بيبقى نفسي أقولك أنا حالي إيه
مبوسطة قوي .. اهوه عادية ... ولا حتى منرفزة
و أقف قدام صورتك و أتخيلك
و إنت بتطبطب عليا هنا و هنا

كتير كمان لما بلبس لبس و يعجبني أقول لما آجي أروحله هلبسه..ـ
ومبلبسوش .. بنكسف
فاكر زمان لما كنت ألبس جديد تقعد تقولي حلو دة و دة لأة ... مبحبش أبقى مُلفتة..

عارف كمان.. كنت بقف قدام المراية و أقلع نظارتي و أقول هروحله كدة .. و مبعملهاش
كنت بحس إني بكدة هشيل كل الحواجز اللي بينا .. اللى كانت بتداريني وانا قدامك ... كنت بخاف تشوف افكاري المتشتتة..

كان نفسي أعرف هوه انت ليه لما جيت عندنا أول مرة كنت قاعد كدة و مبلم
كنت مش مبسوط و مضلم
كنت خايف ولا إيه؟؟

فاكر ما والدي كلمك عالعفش و السيراميك و زعلته جامد و زعلتني
مش كنت قايلي إنك محوش وديعة في البنك و هتفكها
ولا كنت خايف تصرف عليا كل الفلوس اللي حوشتها

فاكر يا عادل لما والدي دخل علينا في الصالون و كنت موطي بتربط رباط جزمتك
وقالك بصوت عالي: بتعمل إيه حضرتك؟؟
اتخضيت انت و اتلخبطت.. خبطت راسك في الترابيزة ووقع العصير على بدلتك
سخسخت أنا

كل أما حاجة كانت تزعلنى منك ارجع و افتكر اليوم دة و كل المواقف اللى بينا ضحكتني و احس اني عايشة في اليوم زي ما حصل

طيب فاكر لما كنا بنتمشى بليل قوي في شهر العسل
وكنا بنتطوح من التعب و احنا راجعين من المحل
و الظابط وقفنا و فتشك و مكانش معانا حاجة تثبت اننا متجوزين
و قعدنا نقول إيه العمل
لحد ما بابا جاب الورقة من المأذون بعد ما طمنا لما اتصل
والله كان يوم عسل
يومها زعقت بصوت عالي و قولت : والله دي مراتي
مش عارفة ليه ساعتها حسيت إنك بطل

عارف .. كتير لما بقعد لوحدي بقول ياااااااااه كأنه لسة امبارح
انا فاكرة كل تفصيلة من حياتنا كل المحازن والمفارح
زي شريط السينما كل أما أغمض عيني يشتغل
و كل أما أبص في الشقة على أي مطرح من المطارح

ابنك دلوقتي كبر و بقة عندة ست سنين
ياختي جميلة لما تشوفه و هوه رايح المدرسة
زي العسل
هبقى أوريك شهادته.. كل درجاته كويسة
طالع لأبوه
وسأل عليك كمان .. و قالي : فين بابي يا مامي؟
حضنته جامد وقلتله وانا بصة فوق : بابي فوووووق هناك عند ربنا
آآآآه يا عادل ربنا يحرسه
بصلي بعنيه اللي شبه عيونك بالتمام و قالي : و هوه مش هينزلنا
ابتسمت و قولت لأة .. هوه مستنينا عشان بعد عمر طويل يا حبيبي إحنا اللي نطلعله.. و نعيش في سعادة و هنا

وحشتني .. قوي
لازم أمشي انا بس وانا رايحة اجيب خالد من مدرسته طلعت في دماغي أشأر عليك
مش هغيب عليك
واحتمال كمان اجيب ابننا معايا و اخليه من فلوسه يدفع صدقة ليك
متخافش
أما يكبر شوية هخليه يدعيلك - كل يوم - زي مانا بدعي ليك
سلامٌ عليك
......................................

حكوك التبع و النشل محفوسة لنعكوشة
..............................................
على جمب :الامتحان كان إى حد ما كويس ..
انا كنت متخيلة إنى مش هنطق ولا كلمة مع الدكاترة
أينعم لبخت
بس الحمد لله على كل حال
بس اهو سبحان الله
ربنا بيستر

أنا حرة


Maryam 2009

سيأتي يوماً و تنصرنى الأحداث في عينيك

سترى فيها انتصاراتي
ستتخلل جنبات عقلك الجامدة
ستحطم ما أمامها من عقبات
لتصل إلى بؤرة تفكيرك المحدود المنغلق
أنا حرة أيها الرجل .. حتى و إن قيدتنى أغلالك
لست عبدةً لأحد
سلاسلك التي كبلتنى ستصهرها حرارة جسدى المؤجج بالغضب
سأنسل منها إلى عالمي .. لأخوض معاركي كجان دارك عربية
سأخطَ تاريخي بقلمى أيها المعتوه فلا تفرح بتحجيمي.. لا تحسب أني سأتركه لكَ ترسمه كيف تشاء
سترعاني قواً من حيث لا أعلم
سأحيطُ صدري بصديرية حديدية لتحميه من سيوف الحاقدين
سأثبتُ لكً أني أخرى .. غير تلك الواهنة التي تراها
و ستبكي دماً طالباً رحمتي و لن تحظى بإشفاقي
سأعود إليك
راكبةً فرسي
شاهرةً سيفي
رافعةً رأسي
وربما حينها لا أعود
فلن يسعني الوقت ولا التفكير كي أتذكرك
يوماً ما سأفعلها .. سأتحرر من قيودك التي طوقتني بها و ألصقتنى بالأرض
يوماً ما
سأسعى كي يكون قريب
........................
.بالمناسبة أنا اللى راسمة الرسمة اللى فوق

حكوك التبع و النشل محفوسة لنعكوشة
..........................................
للتسجيل لنفسي : انهاردة روحت متأخرة ..
متضايقة انى مكونتش متضايقة إنى عملت كدة
بس انا عملت استخارة
...........
اشعر قليلاً بالطمئنينة رغم أنى اشعر أن غداً قلبي سيرتجف
أدعو الله أن يثبتنى و يجعلنى احسن التوكل عليه
..........
امتحان الاطفال بكرة ...
يا رب لو دة ابتلاء خلاص أنا هصبر
بس قوينى انى اعرف اذاكر يا رب
و خلينى اعمل اقصى ما بوسعي ..
و خليني اتذكر الحاجات اللي اتعلمتها على مدار السنة
يا رب حتى لو ماعرفتش اصبر ..
بقدرتك صبرني
................
بين الاذان و الاقامة.
4:48ص
4 اكتوبر
........


هزات البرد


أشعر بالبرد يحوطني
يتخللني
ويجعلني .. منبع للبرد

و كأن البرد امرأة تخنقني
وكأن البرد أباً يحميني

هزات البرد
ـــــــــــــــــ رعشات البرد
ــــــــــــــــــــــــــــــــ همسات البرد تواسيني

أشعر و كأني في الصحراء
و كأن العين تقطر دماء
ممزق جسدي إلى أشلاء

وكأن البرد يمزقني
وكأن البرد يضمدني
وكأن البرد يثلجني ثم يدفيني

رياح البرد تخطفني
و شراع البرد يوصلني
إلى موطني و حنيني

هزات البرد
ـــــــــــــــــ رعشات البرد
ــــــــــــــــــــــــــــــــ همسات البرد تواسيني

آشعة النور
تتخلل بين جزيئات البرد
تصل إلى عيني لتبصرني
و بقسوتها تعميني

أبصر في البرد
أيادي البرد
أحضان البرد
عين البرد تراقبني
وعين البرد تدميني

أشعر و كأني كالعرجون
يمضي و يمضي كالمجنون
أدور في مدارات البرد
و إذا ما قربت يبعدني
يجذبني إلى أعماق البرد
ولا يبقيني

كالهاوي أرسم لوحة برد
تطاير منها وريقات الورد
أتلقفها
لألثمها
لتفرحنى... فتبكيني

هزات البرد
ـــــــــــــــــ رعشات البرد
ــــــــــــــــــــــــــــــــ همسات البرد تواسيني

وكأن البرد امرأة تخنقني
وكأن البرد أباً يحضنني
يقسو عليّ ... ليحميني

..................

حكوك التبع و النشل محفوسة نعكوشة
............................................
بالمناسبة الامتحان مكانش لطيف
قدر الله و ما شاء فعل
الحمد لله على كل حال
بامناسبة برضو البتاعة ملهاش علاقة بالامتحان
دية كاتباها من فترة يعنى

الأطفال هتجيبلى شلل


عندى امتحان اطفال يوم الخميس 1- اكتوبر دة
اشعر بالشلل
مش شلل فى الاطراف
لأ شلل فى الدماغ.. المخ يعنى
يعنى انا لما ببقى فى الايام العادية
ومبنجزش
بخلص مثلاً قول 20-30 صفحة و اكون فاهماهم
انما اقعد فى ايام الامتحانات
يوم كاااااااااااااااااامل
فى 7 صفح
لأ!! إية الحلاوة دية
لأ و اية
حاسة انى مش فاهمة منهم حاجة
المادة 600 صفحة باين
مش عارفة فيه اية
انا بدعى ربنا
و بشغل قرآن وانا بذاكر
وبصلى ركعتين
وبرضو حاسة بالغباء
الاطفال دى مادة جابتلى السل صراحة
يلا
كان الله فى العون
المشكلة
ان امتحان العملى بتاعها
و الراوند كمان
كان اسوء راوند و امتحان مر عليا فى حياتى
وجبت فيه درجة ما يعلم بيها إلا الله
حاسة بالتشحلل صراحة
وش مقروف من عيشتة و بقة معووج
و عينة فيها نظرة شلل
ربنا ييسر
.........................
اللهم إنك تعلم بحالى
وأنتَ غنى عن سؤالى
فارأف يا إلهى بعبدتك
و أعنها كيما تعين المسلمين يوما

أنا مريضة

تحديث:

أولاً أنا لا أناقش هل أنا كويسة ولا مش كويسة .. كل انسان فيه عيوب و مميزات.. و محدش شاف أفعالى فى العلن و الخفاء عشان يقيم هل أنا كويسة او لأ
ثانياً انا مش ببعد اى شخص عنى .. انا ببعد الناس اللى بحسهم قريبين من قلبى
ثالثاً انا افعالى فى ابعادهم عنى فى البداية غير منفره .. فقط أبتعد .. فلو لاقيتهم متمسكين بيا ببدأ ءأذيهم عشان يبعدوا
رابعاً انا كنت فعلاً طول عمرى بكبر و مبتفرقش معايا بس أكتشفت إنى بخسر .. لإنى اعيش وحدى رغم كمية المعارف و الصحاب ( الطيارى) المهولة ( اللهم لا حسد فى ديه كمان عشان تبقى كملت قلبا و قالبا) اللى عندى ..

..................................................

انا مريضة بداء ابعاد الناس عنى
او ان شئت تسميته بأذية المقربين إلى قلبى بهددف اقصائهم عنى .. دة لو مبعدوش عنى بالذوق ببعدهم بالعافية جتى لو اذيتهم او عملت حاجات تقرفهم منى...ـ

مش من حقى أبداً إنى ءأذى حد لا لشئ إلا لأنه حاول يقرب منى
لا لشئ إلا انه حاول يكون جمبى
لا لشئ إلا انه حاول يساعدنى و يخلينى افضل
إنه حاول يسمعنى من جواه
إنه فهمنى
إنه عاوزلى الخير
إنه بيحبنى

مش عارفة أنا بعمل كدة ليه .. و مش معنى الكلمة دى إنى ببرر لنفسى إنى أعمل كدة
أو إنى أحاول أطلع نفسى يا حرام ضحية المرض اللى عندى إن شئت أن اسميه مرض

أحب أقول لكل اللى اذيتهم
متخافوش إنتوا مش خسرانين حاجة أنا انسانة من جوايا مش كويس فاتكوا كسبتوا انكوا بعدتوا عنى
متخافوش ربنا هيعوضكوا عنى بحد أحسن منى خمسين مليون مرة
متخافوش ربنا هينتقملكم منى
متخافوش أنا بتوجع إنى ألمتكم أو وجعتكم برضو

بتوجع قوى لإنى مكانش نفسى أى حد ياذيكوا بس صدمتى إن أنا اللى اذيتكوا
بتوجع لإنى كنت محتاجالكوا .. قوى
بتوجع لإنى هفضل لوحدى .. بتجرع الألم..
هتوجع لإن فيه ناس تانية برضو بتقربلى و كل ما بيقربوا بفتكركوا..
و بقول هعمل فيهم كدة لما يقربوا منى برضو
بحاول ابعدهم برضو

متخافوش ربنا هيحاسبنى بالجامد لإن منكوا ناس ربنا بيحبهم قوى ..
عارفة انكوا مش هتقروا الكلام دة
بس حبيت اقوله يمكن حد يوصلهولكوا
لو حد عارف اصلا انتوا مين

انا مريضة و نفسى اعالج نفسى
مش عارفة اللى فيا دة اية؟
هل حب اذية الناس؟؟
بس انا مبحبش ااذى حد معرفهوش .. و مبنبسطش لما بأذى حد أعرفه
تقريبا انا بأذى نفسى باذيتى للناس المقربين منى


طب عند؟؟
طب انا بعند على مين؟؟
يعنى انا مش فاهمة
لما حد ينصحنى بحاجة عشان مصلحتى و اعند فيها
اية الغباء دة؟؟
ليه بعمل كدة
ليه لما بحاول اقول لا مش هعند
وهبقى حلوة
وهبقى مطيعة
وهبقى متواضعة
بلقينى اكتر قرفا و كبراً و غباءً و عنداً
ليه ؟؟؟؟؟؟؟؟
لية بعمل كدة فى الناس و فى نفسي؟؟

يمكن انا معنديش وفاء؟؟
طب هل الوفاء دة طبع؟؟
ولا شئ مكتسب؟؟
طب لو كان طبع ينفع اتطبع بيه؟؟
ولو شئ مكتسب ازاى اكتسبة؟؟

يمكن انا متكبرة فعلاً زى ما بيقولوا ؟؟
والله يمكن
رغم انى مش فاهمة فين بالظبط التكبر بس اكيد موجود مادام هما شايفينه
طب انا اعالج دة ازاى؟؟
هل ينفع اعالجة بنفسى ولا محتاجة طبيب نفسى؟

طب اللى اذيتهم دول
فيه ناس منهم انا مش فاكراهم
ماهو انا زاكرتى نيلة
المفروض اروح اقولهم ايه؟
انا اسفة؟؟
ططب اسفة دى هتفيدهم باية؟؟


ما كان قد كان
طب اقولهم اسفة ايه؟
اسفة انا بعدتكوا عنى عشان لاقيتكوا قربتوا بزيادة؟؟
عشان لاقيتكوا بتحبونى و تخافوا عليا؟

مش عارفة
اة صحيح
انا عارفة انى عيلة إنى فتحت المخروبة بتاعتى
بس انا فعلاً محتاجالها
انا فعلاً محتاجة اتكلم مع اى حد
فعلاً محتاجة افضفض
فعلاً حاسة انى بائسة و منعدمة
ومليش لازمة فى اى شئ

انا اسفة إنى فتحتها
بس خلاص بقة
يفيد باية الاسف
ملهوش لازمة

ربنا يرحمنى و يهدينى
و يستر

آه صحيح .. محدش يقولى تصالحى مع نفسك و يسكت لإنى مش عارفة اتصالح معاها ازاى؟؟
وعارفة إنى لو تصالحت معاها كله هيتعدل بس انا مش عارفة ازاى اتصالح معاها أصلاً..

ومحدش يقولى أقعدى مع نفسك و يسكت برضو .. لإنى قررت كتير اعمل وقفات مع النفس بس مبطلعش منها بأى شيء
ببقى مش شايفة غير اسود .. يمكن حتى مبشوفش حاجة .. بحس إنى قاعدة فى اوضة ضلمة .. يا ريت تقولولى اناقش ايه مع نفسى بالظبط لما اقعد معاها؟؟

اعتبرونى عيلة ..
اعتبرونى طفلة...
اعتبرونى فى جزء من الاعاقة الذهنية...
اعتبرونى معنديش خبرات....
محدش يعتبرنى انى بميز ولا حاجة .. يا ريت توضيح للحلول ..
ودمتم سالمين


شطبنا


سلام عليكم و رحمة الله و بركاتة
زي ما هوه مذكور في العنوان شطبنا هنا
أيون .. المدوننة مش هيتكتب فيها حاجة تاني إن شاء الله
يمكن افتح مدونة تانية في هذا العالم الالكتروني الفسيح و يمكن مفتحش
شكراً لكل حد اتعلمت منه أي حاجة وانا مش واخدة بالي

من حق أي حد يشيلني من على قائمة المدونات الالكترونية خاصته..
قد يتسائل البعض ليه هتقفلي المدونة و هقول ظروف برضو و مش هشرح ليه

أسئلكم الدعاء
و بشدة
.....................

ما عُدتُ صغيرة.


سألتني قبلاً لمَ تغيرتِ ؟!
ولم أجب..
لم أكن قد حضرت نفسي للإجابة عن هذا السؤال.

هاأناذا قد تهيأت للإجابة...
اقترب مني قليلاً...
أريدك أن تسمع همساتي عالية في أذنيك...
أريدك أن تحس طريقتي في قولها...
أن تتيقن منها بمجرد إطلاقها من خلف شفاهي...
لا تنظر إليَّ هكذا... أنتَ من جعلني ألجأ لهذا التغيير..
أنت من وجهني إليه...
تراك تتساءل ما بها تلك الفتاة؟
أتتعجب من هذا الكحل الذي يصبغ عيني سواداً..
أم من قميصي الحريري و تنورتي الوردية!..
أم من حذائي ذو الكعب العالي...
أتتعجب من نظرتي إليك..
وتسألني في براءة لم لطختِ وجهكِ بتلكَ المساحييق؟
نعم تغيرت.
ربما لم يكن تغيراً كاملاً ولكن لا يزال تغيرا..
صبوت إليه حين وجدت عينيك قد لمعت برؤية تلك المرأة...
تَََفَجَّر بداخلي حينما ربَت علي كتفي قائلاً في حنان : هوني عليكِ يا صغيرتي..
أتعلم لقد نسيت سبب حزني في ذلك اليوم .. و انفعلت عليك ...لا
أنا لستُ صغيرتك .. أنا ...
أقترب مني كي أفصح عن اعترافي..
سيخرج من بين شفتي صوتاً دافئاً حالماً ... تدربت عليه مرات و مرات
تعلمته منهن...

سيخرج محملاً بكل مشاعري التي أطلقت أنا سراحها...
أنا لست صغيرتك أيها العجوز...
أنا لستُ صغيرة...
ما عدتُ صغيرة ...
أنظر إلي جيداً..
ألا تراني قد أصبحت مثلهن...
أصبحت... أنثي ... تحمل كل المشاعر تجاهك..
لا تقل أنكِ مثلُ ابنتي ...ولا تقل أنكَ ستمنع تقربي منك..
سأقترب.. فلن تمنعني كلماتك.. ولا صياحك ..
و لن يعيقني عنك سوى سويعات نومي التي أكف فيها عن متابعتك لأهيم بروحك في أحلامي...


.............................
حكوك التبع و النشل محفوسة لنعكوشة