نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

سؤال و تاج



نظراً لإني مش فاكرة كام تاج جالي ووديتهم فين بعد ما جولي ونظراً لإني عاوزة أرغي و فيه خمستلاف موضوع في مخي و مش قادرة ابلورهم لحاجات تتكتب
فأنا هكتب سؤال بس طرح نفسة عليا امبارح
و هكمل الموضوع تاج
فاللي عاوز يفيدني في السؤال براحته

واللي عاوز يقرا التاج براحته
كله مشاع

...............
سؤال يطرح نفسه


اللي اتعلمته ولازلت يعني موقنه بيه
إن لما حد بيعلي صوته و يصرخ بيعبر عن ضعف موقفه
أنا نفسي لما تنرفز و اعلي صوتي بعرف إني حاسة إني مش قادرة أعمل حاجة فبزعق
السؤال بقة
ليه بعض الدعاة اللي في شرايط الكاسيت بيعلوا صوتهم
و يزعقوا
المايك مثلاً مش جمب بقهم
ولا عارفين ان الكاسيتات صوتها واطي
أصل إزاي داعيه .. في موقف قوة لإن الدين في صفه و بيدافع عن شئ معروف اصلاً إنه صح
يبقى بيزعق
أنا عن نفسي لما اللي قدامي بيزعق بحس إن مش كل الكلام بيدخل مخي
فيها إيه لو اتكلم براحة و رزانة كدة

مش عارفة صراحة
لو حد عارف يقول



كدة البوست خلص لو حد نفسه يقرا التاج براحته
...............

التاج بقة
هوه تاج من Yusuf
صاحب مدونة إيديا في جيوبي( افعص اسم المدونة كي تصل إلى هناك)ـ

اسمك؟
مريم


سنك؟
21
لحد آخر يوم في السنة بإذن ربي
يااااه .. العمر بيجري يا لواحظ.. يلا خير
اسم مدونتك ؟
بص فوق
بس عشان برضو منكسفش السائل نعكشة

مجال دراستك؟
التب هههههه
مرة كنت بحضر مؤتمر كدة عن الطب النفسي .. المهم عند الريسبشن كدة كان فيه شوية بنات ماشاء الله زي القمر  فبقول  لصحبتي أكيد دول مش تبعنا يا بنتي .. قالتلي تصدقي أيوة 
المهم
رحت بسأل البنت على حاجة قالتلي مش انتو بتوع المرتمر بتاع التب النفسي
آه و الله التب .. أنا ازبهليت اصلاً لما لاقيتها بتتكلم كدة 
المهم بعد ما خلصت معاها قولت لصحبتي .. دول أكيد مش تبعنا

هل فكرت في إغلاق مدونتك؟ والسبب؟
آه .. و قفلت مدونتين ليا بالفعل
واحدة اسمها 
Swing
والتانية
انسحبت من اشتراكي فيها اللي هيا المرسم
و كنت بفكر أقفل نعكشة
ليه بقة؟
لشئ في نفس يعقوب

ا

ايه رد فعلك لو حد قل ادبه عليك ف المدونة؟
همسح تعليقه
عادي يعني اصل الواحد مش هيحكم الناس
وبعدين هوه او هيا طبيعته كدة فأنا مش هدخل في طبايع الناس
ومش هلوم عليه
بس همسح تعليقه
عشان محدش يتأذي لما يقراه
بس



اسوأ مدونة دخلتها؟
مش فاكرة صراحة 
حاولت اعصر دماغي معرفتش
سوري

هيحصل إيه لايميلك بعد ماتموت؟
معرفش يعني بس لو اوبشن ان الايميل يروح لما حد ميستخدموش 30 يوم لسة موجود
فهيروح
عادي يعني

اديت الباسوورد لحد قبل كده؟
آه

 عشان كنت عاوزة لما أموت حد يقفل المدونة عشان لو كنت قلت حاجة غلط مفضل اتحاسب عليها
او يقول إني مُت يمكن حد يدعيلي  يعني
السفر بالنسبة لك؟
يااااااااااااااااه... نفسي قوي اسافر 
دة حلم .. يعني انا بموت في مصر اصلاً و مهما سافرت و عجبتني دول عارفة اني هرجعلها
بس فكرة اني الف العالم دية حلم يرودني في لحظات سعادتي يعني
حلوة يراودني ديه 
السفر بالنسبالي استجماااااام .. هروب بس هروب شييك.. فترة صلح مع النفس
السفر بالنسبالي حاجات جديدة بشوفها وانا بحب قوي استكشف
السفر بالنسبالي تجربة جديدة نفسي اعيشها
السفر تعايش مع ناس و طبايع متعاملتش معاها
السفر بالنسبالي طيارة هبص منها على السحاب و هسرح في الملكوت
السفر بالنسبالي  سفينة هبقى فيها وسط البحر  و اهيم بالليل سواداً
السفر بالنسبالي صحرا على الجمبين او ارض زراعية عالجمبين وانا راكبة العربية و مخرجة راسيو ساندة على  إيديا و سرحانة و بفكر
السفر بالنسبالي دراسة بفكر اعملها
حاجات كتير بس عشان محدش يزهق


المود بتاعك إيه؟
متقلبة بغباء
كل كام دقيقة بحال
بس في الطبيعي متقلبة بس مش قوي كدة يعني كل كام يوم


بتعمل إيه وقت فراغك؟
على حسب المتاح
يعني لو انا مثلاً ساعة وقت الفراغ دة كنت في الشارع فانا هسرح في الشارع.. بحب قوي السرحان( يعني افضل امشى كدةوانا مش عارفة رايحة فين و كل لحظة و التانية اسئل انا في شارع إيه)ـ
لو كان وقت الفراغ دة في بيتي  فهناك الكعبروتر  و الكتب و ترويق البيت( بكرهه بس اهو يعتبر من وقت الفراغ) و تلاقيني كدة برقص باليه مع نفسي ( متعلمتش بالية اصلاً  مجرد حركات ارتجاليه يعني )ـ بسرح مع نفسي في اوضتي و النور مطفي او مولع مش فرخة كتير... بهتم بنفسي بقة يعني احط كريم اسمنتكوا او احط ميكياج ( فاشلة انا في الاهتمام بالنفس ولما بحط ميكياج ببقى عاملة زي امنا الغولة او شبة سعاد حسني في فيلم الزواج عالطريقة الحديثة لما جالها عريس و حبت تطفشة  بإيديا دول .. اشرب اشرب ) بس اهو بحط من باب التغيير و بروح اغسل وشي على طول .. احط منيكير بس انا مبستحملوش على صوابعي فتلاقيني حاطة الاسيتون جمبية على طول ابص بصة على صوابعيني و امسحه.. أي حاجة متاح اني اعملها بحب اعملها
بث


الأكلات المفضلة؟
هوه انا معنديش اكله مفضلة .. المهم انا حالتي اية وانا باكل و مين بياكل معايا
بس انا بحب لبطاطا المقلية و البيتزا مثلاً ممكن الكشري
و الفول و الطعمية السخنة  و المسكعة
وماكرونة اسباجيتي بالكاتشب


الصفات اللي أخدتها عن والدك؟
هي مش صفات لاني مش عارفة اصلا
بس انا عندي في ايدي عرق بينبض بشكل واضح ووالدي كمان
انما صفات .. فانا اصلا مش عارف عشان افيد


الصفات اللي أخدتها عن والدتك؟
ممممم ... يعني ممكن تقول العند و تنشيف الدماغ
بس مش عارفة 
يعني انا مش اقدر افيدكوا


أكتر 6 حاجات بتحبها؟
بعيداً عن ربنا و الرسول و الصحابة و ماما و بابا و عيلتي و أهلي
بحب مصر
بحب الخروج لوحدي
بحب الضحك العالي
بحب المياة بتاعت الشرب
بحب نظارتي ( هوه حب انا مجبره عليه يعني بس من غيرها معرفش اعيش ) ـ
بحب الكمبيوتر



أكتر 6 حاجات بتكرهها؟
عدم النظافة ( سواء في الاخلاق او في المنظر ) رغم اني ساعات بيبقى منظر اوضتي مؤرف فساعتها انا بكرهني
الصوت العالي .. رغم اني صوتي عالي 
الغباء.. رغم اني ساعات ببقى غبية 
الصرصار .. دة بخاف منه جداً
  التوقيع بين الناس و بعضها
الجزء الخبيث مني( الأنا الخبيثة )ـ

شخصيتك نوعها إيه؟
Bipolar
or 
Boarderline
مش متأكدة

لماذا دخلت عالم التدوين من الأساس؟
واحد قالي نظرا لإنك بتعرفي تمتبي فسيبك من الشات و الهبل دة و روحي اكتبي كلام عدل
حد كويس يسمعه او يقراه يعني
مهند صاحب مدونة الباحث عن الحقيقة ( افعص اسم المدونة للوصول لهناك)ـ


أهمية التعليقات بالنسبة لك؟
يا سلام .. التعليقات .. متعة 
آه والله 
بعيداً عن إني بكره التعليقات من نوع تحفة و رائع و رهيب لإني مبصدقهاش
بس لما حد يوصفلي احساس وصله من اللي انا كتبته بحس بشعور بالانتشاء كدة
لما حد بيناقشني في اللي كتبته بحس إني شخص بيفهم 
لما حد بيكتب اي حاجة أي حاجة بعيداً عن كلمات الاطراء و الكلام دة بسعد بيها جداً


أفضل مدونة قريتها؟
مقدرش احدد مدونة معينة عجباني قوي
انا من النوع اللي بيلقّط 
يعني مثلاً بتعجبني بوستات بوستات في عدة مدونات
بث


اهمية الانترنت بالنسبة لك؟
قوقعتي التي لم استطع الخروج منها بعد


إهداء التاج؟
مصر كلها عملت التاج دة
اللي عاوز يعمله 
هو متاح للجميع
اتفظل عزيزي القارئ




في النهاية سوري لو طولت في الحوار 
معلش اصلي رغاية

طلب و رجاء

سلام عليكم
معلش طلب يعني دة بعد إذنكم يعني


لما ببقى كاتبة 
حكوك التبع و النشل محفوسة لنعكوشة
وأما ببقى مش كتبة تحت في الحاجات المتعلقة بالموضوع  ( كلام عني )  رجااااء
محدش يعتبر الموضوع عني
عشان بتشل 
دية
مجرد
حالة
بتقمصها
وبكتبها
حتى و إن كنت عشتها فعلاً فأنا لما بكتبها بكتب اكنها واحدة تانية و مجرد مقطوعة أدبية 


معلش يعني الطلب  : اعصروا على نفسكوا لمونة و انتوا متضررين طبعاً علقوا على البتاعة كمجرد موضوع 
مش كأنا
انا مبتكسفش أقول إني مشوشة
ولا أقول إني مكتئبة
ولا أقول إني مبسوطة 
ولا  بتكسف أقول إن دية حالة عشتها بجد
و عادي يعني بتقبل اي حد ينصحني 


بس دييييييييييييييية ( حكوك التبع و النشل ) ـ
مجرد
مقطوعة
أدبية
وشكراً
جزيلاً
أعزائي القارئين
ولا أقولكوا.. عيشوا عيشوا .. اللي عايز يعتبر أي حاجة يعتبرها ..كل شئ مقبول
خدوا راحتكوا


سلامٌ عليكم أيها القوم


بلاستك


سأكتم أنفاسي لأرحل عنكم أيها القوم 
سأصعد إلى السماوات لأراقص السحب و أرصع ثوبي بالنجوم
سأرتدي ثوباً من الهواء و أشرب كوباً من المطر
سأكلل رقبتي بقوس قزح  و أرتدي خاتماً من المجرات المنسية
هناك .. حيث الطيور المهاجرةو الأرواح الهائمة .. نتحادث سوياً
لن أعود إليكم لأتنفس هوائكم 
سأغمض عيني
أرى شبورة أمامها
أشعر و كأن صدري يكاد يتفجر من الهواء
عيني تجحظ
يكاد الدم يخرج من عروقي البارزة
أرفس بساقي
أحاول أن أنزع ذاك الكيس البلاستيكي عن رأسي
لا أستطيع أن أفعلها
كنت أمزح
لا أريد الرحيل
لا.. آ ...ل
هــــــــــــــــــــــــ
...........................
12-9-2009
11:00 pm
حكوك التبع و النشل محفوسة لنعكوشة
photo is captured by : Henrik Sorensen

ارضي بقة


عندك كل حاجة مش راضية ليييييييييه 
مش قانعة ليه
عاملة كدة ليه
مش حاسة كلمة الحمد لله الذي عافانا مما ابتلى به كثيراً من خلقه ليه
غيرك حالته ما يعلم بيها إلا ربنا
إهدي بقة
إهديها يا رب بقة
ارحمها و ارضيها
و احميها من نفسها

siCk


Damn , i am becoming  more and more stupid 
I guess my social IQ now is Zero
My Mood Swings much more frequent ( every few minutes )
I just wanna be more Normal ( Oh God help me )
.................
photo is designed by: Dan:May

مش فضفضة دة تخيل










محتاجة أتخيل إني إنسانة طيبة
إني بنوتة مطيعة لأمها
و إني بسمع كلامها
و بريحها و تحس إنها فعلاً خلفت بنت صالحة
إني مش انسانة كئيبة


محتاجة اتخيل إني هطلع القمر
و إني هسافر الجزائر
و إني هلف العالم و ارجع تاني مصر
وهخلص الكلية اللي انا فيها وانا لسة بصحتي و متجننتش
و إني هيبقى عندي عزيمة غني أعمل المعادلة و الزمالة
و إني هبقى دكتورة شاطرة و على وشي بسمة تطمن المريض و اسمع من المرضى و اهلهم دعاوي حلوة
و إني هفضل ورا حلمي لحد ما احققه عشان اعمل مستشفى كبيرة الغني فيها بيتعامل زي الفقير


محتاجة اتخيل إني عايشة في حياة ناصعة البياض زي اعلان تكييف شارب
و اني ممكن في اي وقت أقدر آخد وقت مستقطع من الحياة و اروح لوحدي على البحر و اقعدلي كام يوم
واني مبسوطة قوي من جوايا


محتاجة اتخيل إن فيه حد فاهمني و عاوز يفهمني و نفسه يفهمني
وإني واضحة قوي
و إني عندي واحدة صاحبة انتيم و تحبني واحبها تحبلي الخير واحبلها تتقبلني باخطائي و اتقبلها نتناقش ونتشارك و نحاول نصلح بعض براحة


محتاجة اتخيل إني لابسة نقاب ومش هاممني اي حاجة في الدنيا
واني بصلي كل يوم بليل القيام و اقعد ابكي بين ايدين ربنا
واني لما بصلي ركعتين بحس بالخشوع و إني قدام الخالق عز و جل
وإني راضية من جوايا


محتاجة اتخيل إني حلوة
وإني رشيقة
و إني عندي لياقة
وإني انسانة رياضية


محتاجة اتخيل إن عندي حصان في العزبة
و قطة صغنتوتة تتمحك فيا
و كلب العب معاه و يصاحبني
و ذئب قطبي اللي لونهم ابيض دول احضنة جامد لما احس إني محتاجة حضن دافي
و عصفورة من غير قفص تقف كل يوم الصبح على الشباك تزقزق و تصحيني
و سحلية اسميها إليزابيث من اللي بيتلونوا على حسب المكان اللى هما فيه
وصقر و غزالة و معزة صغنتوتة


محتاجة اتخيل إني مش بكرة الجواز و مش بكرة الرجالة و متجوزة ومخلفة بنوتة اسميها مارية
و إن اللى هتجوزه دة يكون حاسس إني أنا و هوه شخص واحد ميتحرجش انه يعتذر لو غلط حتى لو كان مبيعتذرش لأي حد و ميتضايقش لما ازعله و ميفتكرش إني لما بعمل كدة ابقى اتغيرت لإني انا اصلا متغيره بس الثابت الاكيد إني أنا بكمله و بنرسم احنا الاتنين شخص واحد مكون من انا و هوه
و اتخيل إني ممكن اعمله كل اللي يتمناه من غير ما يطلبه و إني ابقى مطيعة ليه
و اتخيل إني مشهبقى من السيدات اللي يكفرن العشير و إني مش لما يغلط فيا مرة انساله كل حاجة عملها عشاني


محتاجة اتخيل إني بتنفس هوا نضيف
و اشرب ماية نضيفة
و لما احتاج هدوء ألاقي هدوء


محتاجة اتخيل إني بعرف اعوم
وبعرف اركب حصان عربي و اجري بيه
و بعرف اجري سريع
و بعرف العب كونغفو و اعرف ادافع عن نفسي


محتاجةاتخيل إني بفهم في الكمبيوتر
و إني بعرف استخدم الفوتوشوب و الثري دي ماكس
و إني بفهم في الهاكنج عشان اعرف احمي نفسي


محتاجة اتخيل إني هقدر ارد للي يضربني قلم (مجاز ) الصاع صاعيين وبرغم دة اعفو و ماعملوش حاجة و اسامح
محتاجة اتخيل إني اعرف اسكت لما يبقى الموقف محتاج اني اسكت ومزعقش و متنرفزش
محتاجة اتخيل إني مبغضبش غير للدين و لله مش بغضب لنفسي
محتاجة اتخيل إني هادئة الطباع
محتاجة اتخيل إني ملاك على وشة ملامح البراءة


محتاجة اتخيل حاجات كتير قوي
قوي
قوي


أصل تعبت من حالة الاكتئاب اللي أنا فيها
فقولت اتخيل شوية
سلام
واحدة راسمة على وشها ابتسامة سلام

..................................
على جمب : الكلام بتاع البوست رايح يمين قوي على حد قول كيكي
مش عارفة ألاقي الحتة بتاعت الحركة دية في
ال html
بتاع التيمبلت
وكمان مش عارفة أكبر حجم الخط بتاع ال بوست نفسة اللي هوه نورمال في ال اتش تي ام ال
أعمل اية؟
...............................

لحظة عمى , Blindness

blindness; that's exactly what I feel
everything has no colour nor differentiation
everything means nothing to me & doesn't symbolize anything
being empty , aimless & walking with gaze staring at nowhere
what is obvious fades when I get close
every single dream has vanquished
I am hopless without myself
confusion , disorientation
hypersomnia
like I am looking at the source of light in a very shiny room
or looking at myself in a very dark room
I cannot see anything
..........................
حكوك التبع و النشل محفوسة لنعكوشة

لحظة صدق


لا .. لن أقولها كما قالتها الاخريات - الشيطان قيدني - بل فعلتها بإرادتي المسلوبة طواعية مني
فعلتها و لم أفكر حينها في أي شئ آخر
لا أقول ذلك فخراً بل إحقاقاً للحق
اعلم أني أستحق العقوبة و لكن ربما هناك حل آخر
لازلت أفكر به
ليقضي الله أمراً كان مفعولا
................................

حكوك التبع و النشل محفوسة لنعكوشة

مطرة

يا مطرة رخي رخي

كانت بتمطر من خمس دقايق
حسيت فجأة بسرعة جداً بشدة السعادة
و الطفولة
و البلاهة

على قرعة بنت اختي

ومديت إيديا من برة الشباك
و قعدت احاول اخليها تنزل على ايدي
و انا مبسوطة و منشكحة
و فاتحة بقي قوي

..................................
فجأة
اتضايقت قوي
عشان ضايقت امي
ليه دايماً بضايقها لما ببقى مبسوطة
فيقلب الموضوع عندي غم
ربنا يهديني بقة
................
يا رب
امتى هبقى بنت مطيعة و حلوة
امتى هبقى كويسة وهادية
امتى هخلي امي مبسوطة اني بنتها
امتى هحس إني لما بفرح بفضل فرحانة
انا مكنتش فرحنة بحاجة حرام
انا كنت فرحانة عشان فجأة حسيت ان الخير جة
بس انا وحشة
هف
................................
في يوم سابق :
ماما .. ممكن أحضر ندوة عاملاها الكلية جايبة فيها احمد فؤاد نجم
هتروحي مع مين
معرفش حد رايح ... هروح لوحدي
انتى يا بنتي شاردة كدة ... مفيش حد من صحابك هيروح معاكي
لأ ... صحابي ملهمش في الادب و الحاجات دية ( في نفسي : و بعدين انا مش طايقة اكلم اى واحدة فيهم و اتحايل عليها تيجي معايا)
يا بنتي الانسان كائن اجتماعي
هوه انا انعزلت عن الناس ... وبعدين انا كدة بحب اعمل حاجات معينة لوحدي
لا مش هتروحي
طيب
.....................
نطلع من دة بإية
1- انا مش انسان خالص الانسانية تماما ... لإن مش دايماً بحب الاجتماعية
2- مبقاش عندي طاقة .. و مبقتش افضل اجادل عشان اعمل الحاجة اللى عاوزة اعملها
3- زهقت من البوست دة
مفيش بنات تيجي تقولي أنا آجي معاكي
عشان الست الوالدةمش معترفة أصلاً بالنت
وبتكره أى حد من طرفه
اللي عاوز يروح .. ياخد صحابة و يروح معاهم
الندوات في الكلية .. طب عين شمس .. ابتداء من يوم السبت لحديوم 5 نوفمبر

سلام

زي القمر


عرفت ليه بيقولوا عالبنت الحلوة زي القمر
عشان بتبقى زي القمر في وسط الليل ... منورة وسط السواد
عشان بتبقى مُلفتة .. حتى و هيه زي الهلال
حتى و هيا صغننة
ولما تغيب في يوم - يوم المحاق - نشتاق لها


عارف .. رغم انك في الحلاوة مش زي القمر ومش هوهمك انك قمر
بس انت فعلاً في حياتي قمر بتلصص عليه أول ما الاقي نورة مشعشع في السما
كُنت حاجة مُلفتة ... منورة .. شدتني ليها زي الفراشة لما بتجري على النور
أنا مش مغرورة عشان أقولك إني شكلي زي الفراشة بس يمكن عقلي زيها بيحب النور
ممكن كمان تقول إنك كنت زي القمر وسط السواد من العوام
كلهم زي بعض .. وانت اختلفت
مكنتش بتتكلم زيهم
وعمري ما حسيت انك اتكلفت
بس كنت طول عمري أحس إنك بعيــــــــــــــــد قوي
زي القمر


زي النجوم يوم المحاق في ليلة من ليالي السويس لما كنت ببقى قاعدة على المرجيحة الجلد على الشاطئ و الكابوريا بتجري تحتي على الرملة و البحر اسود قوي
ساعات كنت بسمع صوت ناس جوة البحر في الوقت دة
كنت بخاف عليهم قوي مش عارفة ليه
زي مانا خايفة عليك دلوقتي مش عارفة ليه


انا من وانا صغنتوتة وانا بعشق المورجيحة الجلد بتاعت السويس دية و زعلت قوي لما سيبنا الشالية بتاعنا هناك و المورجيحة معادتش موجودة... و حسيت إنه بقة وحش قوي يوم ما زرته و لاقيته مدهون بلون تاني مش فاكراه غير اللون الاخضر في لبني اللي كان محفور في زاكرتي
زي ما زعلت يوم ما لاقيتك مش مكمل في الطريق اللي كنت راسمه لنفسك زمان... فاكره؟؟


فين طموحك؟
فين مبادئك اللي علمتني دايماً إني اثق في نفسي حتى لو العالم كله ضدي طول مانا مؤمن بهدفي و محدش برهنلي إنه خطأ؟
راحو فين؟
أقولك... اعتقد انهم راحو زي ما القمر بيروح يوم 28 و هيرجع تاني بعد يومين
أنا مستنياهم وواثقة
إن القمر مش هيغيب
...................................

حكوك لتبع و النشل محفوسة لنعكوشة

ومن العشق ...

ظلت ثلاث ساعات تتفنن في تحضير تلك الأكلة التي بدت شهية ....وضعتها في طبق و زينتها بوريقات البقدونس و ذهبت بها لتضعها في غرفة الطعام..جلست في مواجهة وجبتها شاخصة ببصرها تجاه ذلك الكرسي المقابل لها في آخر الطاولة الممتدة أمامها..أمسكت بقطعة خبز. بدأت تفتتها بين أصابع يديها

كان يجلس هناك … شاحباً … ناظراً إليها بنظراته الجافة التي اعتادت عليها

.

خفضت ببصرها إلى قطعة الخبز بين يديها و عادت بذاكرتها منذ ما يقرب من تسع سنين … كانت لا تزال في الثانية و العشرين.. نضرة .. مبتسمة …رأته و هي تقرأ في ذلك المنتزة بينما كان يحادث والدها

.

مدت يدها لتضع اللقمة في أي من الأطباق لكنها سحبتها مرة أخرى… لمحت طبق سلطة الزبادي عن يمينها…ناصع البياض مرصع بحبات الفلفل الأسود .. تماماً مثل ثوب عرسها

.

تخيلته و كأنه من العالم الآخر .. خجلةٌ كانت بين يديه تراقصه .. الأول في حياتها … حوطها بين ذراعيه وتمتم بكلمات تعدها بالأمان أو هكذا تخيلتها

.

جزت على أضرسها و هي تقاوم دمعة أرادت أن تتسلل من عينها … قبضت عضلات يدها اليمنى و أشاحت الطبق بقوة ليسقط محدثاً دوياً يتبعه صداً في تلك الغرفة المهيبة …

.

عندما عادت من عند أمها في إحدى المرات … وجدتهما هناك.. معاً .. في مخدعها … تسمرت مكانها من هول الصدمة… لم تدر ماذا يمكنها أن تفعل … انسحبت بنفس البطء الذي جاءت به لتفاجئه.. ولكنها هي من تفاجئت .. ركضت من بيته إلى حيث تسكن أمها .. و هي تفكر .. او لم تكن تفكر .. كانت فقط ترى ذلك المشهد يتكرر أمامها بسرعة .. ارتمت بأحضان أمها لتهدئها و تسألها ما الأمر.. فأخبرتها بما رأت .. فكرت قليلاً ثم قالت بأسى : لكن لابد أن تتحمليه يا منى .. فقد تزوجكِ كيلا يزج بوالدك في السجن .. شعرت وكأنها شجرة جافة وحيدة في صحراء شاسعة بلا اهل بعد ان صدمتها كلمات أمها .. فلتتحمليه من أجل أخوك الذي يحتاج والداً يرعاه .. من أجلي .. كما أن لكل رجلِ نزوات .. لكنكِ أنت الباقية .. كانت تثير كلمات أمها التقزز في نفسها ..لم تجد لها من ملجأ بعدما قالتها له والدتها.. ظلت تبكي لعدة أيام في غرفتها و هي ممتنعة عن الطعام ليس عقاباً ولكنها لم تكن تستطيع ..

غابت عن الوعي .. أفاقت لتجد نفسها في بيت زوجها.. لم تصدق ما فعلوه بها .. ظلت تصرخ .. و تصرخ .. اقترب منها احدهم ليحقنها فهدأت … أدمنت المهدئات .. كان هو من يمدها بالمهدئات …

مرت سنة و ربما سنوات و هي تحاول أن تنسى أفعاله

قررت أن تعيش

ذهبت إلى الأطباء للعلاج من إدمانها.. حاولت و فشلت .. حاولت مرة أخرى و فشلت .. كثرت محاولاتها و فشلها حتى تعافت … ملئا بالندابات لكنها عادت..

.

تناولت زجاجة الكاتشب … المزيد من الكاتشب .. ظلت تسكبها على طبقها قرب البطاطس … و ظلت تغمس أصابع البطاطس بها بعشوائية … ارتسمت على وجها علامات القرف و تقضب فمها و أحست وكأنها ستتقيأ… أزاحت الطبق بعيداً .. و نظرت إليه .. كان صامتاً .. لا يزال ينظر إليها نظرته الجوفاء

.

سيل الأهانات لم يكن يتوقف اثناء خروجها و عودتها إلى البيت .. لا بد أن تتحمله .. ولكن لابد أن تعيش .. تكلل كل احتمالاتها بأنها لا يمكنها الطلاق

كان كل شئ في علاقتهما يؤخذ عنوة .. بداية من النظرة حتى الجماع … لم تكن تعلم كيف تتحمله… ولماذا تتحمله .. من أجل آخرون لم يتوانوا أن يفرطوا فيها أو بمعنى أدق .. يبيعونها .. رددت . يمكنني أن أتخلص منها .. ضحكت من هزال تلك الفكرة

كانا يتحادثان على تلك الطاولة في يوم كان فيه صافي الذهن .. حاول أن يمازحها .. لابد لها أن ترسم ضحكتها.. و كانت تفعلها .. ثم انفلتت من بين اصطناعاتها ضحكة حقيقية.. مست قلبها .. نظرت إليه .. كان وسيماً .. تغلب على ملامحه الطابع الأرستقراطي بلمسات من الجاذبية .. شئ ما يجعلك تظل تحدق بعينيه – هذا إن سمح لك بهذا- .. تمنت أن يظل هكذا إلى الأبد

سألتها نفسها بقوة الاستنكار : أتحبينه؟!

ردت بسرعة : لا لا .. فسألتها مرة أخرى : اذا فما هذا الوله؟؟

خفضت بصرها الذي كان متعلقاً به .. فأجابت نفسها بشئ من الأسى : تعشقينه ولا تدرين لماذا ..

قال : منى .. رفعت عينيها إليه لتلاقيه متسائلة : لماذا تفعل هذا بي؟؟

أجاب : قد اشتريتك

شعرت بوخز بداخلها

دققت النظر به قائلة : لكنك لا تعامل مقتنياتك مثلما تعاملني

أتراها قبلت أن تكون شئ اشتراه علها تحظى بأي جزء في قلبه؟.. ربما

أجابها في برود : مقتنيات هذا القصر ثمينة .. اما أنتِ فكنتِ سهلة المنال

أصبح الوخز ألماً يسحقها .. تجمعت الدموع في عينيها و قالت باختناق : و هل أهنتك؟

نظر إليها بطرف عينيه : و هل تستطيعين؟

قامت ببطء من على مقعدها تتحسس خطاها على الأرض

صرخ فيها : انتظري هنا

نظرت إليه بألم فأتبع آمراً : تعالي

اقتربت .. ومع كل خطوة كانت تود لو تخنقه .. أو تخنق نفسها

تماثلت أمامه .. رفع أحد حاجبيه ليرمقها بنظرة ثم اتبع : أطعميني

لم تتحرك… كرر : أطعميني

أرادت أن تتفوه بشئ لكنه اقتحم ذلك قائلاً : إن لم تطعميني .. الآن .. فستعلمين كيف يمكن لعائلتك البائسة التي تعيش في نعيم أن تتشرد .. إذ فجأةً

مدت يدها بارتعاش لتطعمه.. لفظ ما أطعمته في وجهها .. انتفضت .. ركضت باتجاه غرفتها لكنها سقطت و هي تركض .. أخبره الطبيب بأنها حامل …

.

امتدت يدها إلى بندقة مقشورة من طبق المكسرات و ظلت تديرها بين أصابعها..

.

ليلة شتوية ممطرة .. يدوي الرعد في السماء .. كان هو وحده في الصالة أمام المدفأة.. تسحبت لتدس نفسها بين ذراعه و صدره.. حوطها بحركة تلقائية و استمر في القراءة.. ظلت على هذا الوضع مطولاً ثم قالت هامسة : هل يمكنني أن أطلب طلباً .. قال : هذا يعتمد على الطلب .. قالت بدلال : قل موافق دون أن تعرفه .. فكر قليلاً ثم قال : موافق .. سحبت الكتاب من بين يديه لتضعه جانباً .. و قالت : أغمض عينيك .. فأغمضها .. قالت : لا تفكر بأي شئ ..أخذ نفساً عميقاً ثم أخرجه ببطء .. ظلت ناظرة إليه ثم اتبعت : الآن قل لي ما هي أسعد مرة مرت عليك منذ أن تزوجنا .. قضب حاجبيه فقالت آمره: قلت استرخي .. قد وافقت على طلبي.. ابتسم ثم فكر وقال : أتذكرين يوم كنا هناك بالعزبة .. همهمت قائلة : آها .. قال : تحادثنا كثيراً … أحب حديثك … كنت أيضا ترتدين ذلك الثوب الفلاحي .. و شعرك البني قد تدلى بجانب خديك .. اخذ نفساً ثم قال : هذا اليوم كله كان بديعاً … قالت برقة : اليوم؟؟ قال بحنان : بل أنت

سألت و هي تداعب شعيرات ذقنه : صدقاً .. ماذا أمثل لك؟ … فكر كثيرا ثم قال : كل شئ يمكنك أن تتخيليه

همست : حقاً .. أجاب : اجل … لم ترد أن تستفيض بعد جملته هذه .. طبعت على جبينه قبله ففتح عينيه لتلاقي عينيها…

.

سقطت من عينها دمعة … كان ينظر إليها شاخصاً.. دون أن يطلق أي من كلماته السرطانية كسوط يحرق نفسها ألماً

أمسكت بالشوكة لتأكل من الطبق الرئيسي .. غرست شوكتها في قطعت اللحم .. كان يتألم في صورته الشاحبة تلك .. ضغطت بكل قوتها لتتابع تألمه .. ارتعشت

.

كانت في شهرها السادس حينما كانت عائدة من إحدى جولات التبضع لمولودها صعدت و هي تنادي بفرح عليه لتريه ما قد أحضرت … كان هناك مع أخرى … نظرت إلى الأرض و انسحبت متصنعة عدم رؤيتهما ..

صرخ عليها : اقتربي هنا .. فانتفضت تلك المرأة بجانبه ..

لم تتحرك .. قام من موضعه و سحب الأخرى آمراً : قبلي قدميها ..

نظرت إليه بمرارة و مضت باتجاه غرفتها

ركض خلفها و امسك ذراعها بقوة .. فسحبته بشدة لكها لم تفلح .. كاد أن ينخلع .. صرخت :أنت لست بوعيك

قال بحدة : أتصرخين في !! .. صفعها .. بقوة .. شهقت و قد انزلقت على درج هذا القصر العتيق لتسقط جثة هامدة في نهايته..

أفاقت بعد عدة أيام في المشفى و قد أخبرتها الممرضة أنها فقدت طفلها .. صرخت كثيرا .. و غابت عن الوعي لأيام ثم عادت إلى هذا القصر العتيق ولا يشغل تفكيرها سوى شئ واحد

.

أمسكت بالسكين لتقطع قطعة اللحم التي قد غرست الشوكة فيها منذ قليل.. وتابعت تألمه الباهت.. أمسكت بكوب الماء لتشرب منه قليلاً ونظرت بداخله

.

نفس تلك النظرة الجافة رمقها بها و هو يقول : سأسافر

لم تجب

اتبع .. عندما أعود يجب أن تكوني قد تعافيتِ

نظرت إليه ثم عادت إلى طبقها مرة أخرى

لم يؤلمني في ذلك سوى أنني كنت أريد ذلك الطفل حقاً

عادت لتنظر إليه .. تابعته و هو يأكل.. شعر بوعكة في بطنه .. تجزع منها

لم تتغير نظرتها إليه

ألمه يزداد ليغلب على صدره… قام من موضعه و هو يتلوى

ظلت تتابعه

كان يتحرك بخطواته مقترباً منها سائلا : ماذا وضعتِ في الطعام؟؟

أجابت : وضعت تسعة سنين من عمري قضيتها لا أعلم لما يحدث لي ذلك

وضعت طفلاً صغيراً .. وضعت أبي و أمي و أخي الصغير

و قليل من البهارات التي تحبها

شخص ببصره و أراد أن يركض تجاهها لكنه سقط متلوياً في الأرض ناظراً إليها

ولا تزال في عينيها نفس تلك النظرة إليه

امتدت يده تجاهها قابضة على شئ في الهواء ثم سقطت

سقطت دموعها

.

خلعت عنها شالها و اقتربت منه بثوبها الجديد.. انحنت عليه.. قبلته بين عينيه استغرق ذلك وقتاً طويلاً .. ثم أغمضت له عينيه ووضعت يديه بجانبه في سلام

قامت لتضع حقيبته في سيارته الفاخرة و قادتها إلى تلك البحيرة التي لا يقترب منها أحد لكثرة ما أحاطت به نفسها من شائعات… دفعتها بقوة .. لتسقط فيها … وعادت إلى بيته .. ذلك القصر العتيق

.

دخلت إلى مطبخها لتجلب المزيد من السكاكين و ساطور

وقفت أمامه .. جثت على ركبتيها و همست في أذنه : أحبك

تحولت نظرتها الحالمة إلى كره و رفعت ذراعيها عالياً و هي ممسكة بالساطور و تصرخ قائله : هذه لأنك حطمت نظرتي لأمي .. و انقضت بالساطور فاصلة رأسه عن جسده .. تناثرت الدماء على ثوبها

رفعت نفسها وهي تقول : و هذه لتحطيمك إياي . و هوت على ذراعه اليمنى .. و هذه لخيانتي أمام عيني و هوت على ذراعه الأخرى هذه لصفعك إياي

وهذه لأنك أمرتني بتقبيل قدميها

و هذه لأنك جعلتني مدمنة

وهذه وهذه وهذه و هذه ……….

ثم قامت و أمسكت سكيناً مدببه

و هي تصرخ في تيه .. وهذه لأنني كنت أحبك.. بل أعشقك .. بل أردت أن تحبني ولو لمرة ..و هوت بها على صدره تمزقه.. لتخرج قلبه

أمسكته بين يديها و هي تقول : لماذا لم تحبني؟؟

وضعت القلب على الطاولة ووضعت كل قطعة من زوجها في كيس أسود و انطلقت بها إلى محرقة القمامة ووزعتها فوق أكوامها

عادت لتأخذ القلب لتطهيه ..

.

رفعت الشوكة المغروس فيها قطعة القلب إلى فمها لتمضغها و دموعها تسيل لتسقط في كوب الماء

و يتلاشى من أمامها طيفه

.............................

The attached picture is for : The Presidential Palace Dining room, Havana Cuba

حكوك التبع و النشل محفوسة لنعكوشة

زهقت

عاوزة أروح مستشفى يحيى الرخاوي
(طب النفسي)
فى اقرب فرصة بإذن ربي

محدش عاوز يجي؟
.....................

محلوظةجانبية
معلش مش هرد على حد
مليش نفس اعمل اى حاجة
واحتمال انزل بوست بعد شوية اصلا
واحتمال احرق المدونة(لا مش امسحها .. اولع فيها بس)
كتر خيركوا

أبحث عن وظيفة

هوه ممكن لواحدة معاها ثانوية عامة
لسة طالبة فى سنة 5 كلية طب
على دراية بسيطة بالكمبيوتر
بتفهم انجليزي بس مش ضليعة فيه
بتحب تكتب بس مش كاتبة
بتحب ترسم بس مش رسامة فظيعة
تحب تصور بس اقصى كاميرا صورت بيها كانت 12 ميجا بكسل ديجيتل مش الكاميرا بتاعت المحترفين
تشتغل إيه؟؟؟

فكرت في بيبي سيتر او جليسة أطفال .. بس مينفعش عشان في بيوت ناس
وطبعاً مينفعش خدامة لإنى بشتغل فى بيتنا بالعافية و ظهري مكسر
مش عاوزة سكرتيرة
ومينفعش بيع درة او بطاطا او فشار عشان اهلى معارضين دة
فكرت اقف بيع فى محل بس انا لو حد قالي كلمة مش لطيفة مبسكتش و مش ههتم انه زبون يعني و هطفشه من المحل
مينفعش اشتغل ميكانيكي عشان اولا مبفهمش فى العربيات ثانياً اهلى مش هيوفقوا
ماذا يمكنني أن أعمل؟؟؟

ما هي الوظائف المتاحة لحين ميسرة؟

ثقة و فهم

لماذا يجب عليّ أن أثق بالناس؟؟
أو بالأحري ما الفائدة التى تدفعني لأثق بهم؟؟
و ما الضامن لي أنهم لن يخذلوني إذا ما اتأكت عليهم فجأة لثقتي بهم؟
ولنفترض أني وثقت بهم.. ما الذي يؤكد لي أنهم لن يفهموني خطأً؟؟
........................

نظرت في عينيه بتمني و قالت : أريد أن أطير
أمسك بيدها ليصعدا معاً إلى أعلى الجبل
هناك .. على قمته
داعبت الريح ملابسهما لترسم لوحة لطائر مستعد للطيران
نظر في عينيها في ثبات قائلاً : اتركي لي نفسك! ـ
ابتسمت
حوط يده على خصرها
مالت إلى الأمام قليلاً
مدت يدها لتطفو على الهواء
تركها
شهقت فسقطت
قال باسماً : هكذا يمكنك الطيران
.........
it's all about trust & understanding
.................
حكوك التبع و النشل محفوسة لنعكوشة

مجرد كلام



عندما أكون وحدي لا أتعمد أن أبتهج ولا أتعمد البكاء
أنا أترك نفسي لنفسي كي تتحرر كما تشاء
إن أرادت .. فلتبكي
و إن أرادت فلترقص
فمن غيري ليثق بها معطياً إياها الحرية الكاملة لفعل ما تشاء
.......
ربما أنا في فترة صلح مع نفسي و ربما لستُ كذلك
لا أعلم حقاً
ما أعلمه .. أنني لست حزينة لدرجة التفكير فى الانتحار
و لستُ سعيدة لدرجة الضحك عالياً بلا مبررات
..........
حينما أنظر إلى من أخاطبهم أشعر و كأني لن أحتمل مرارة الفراق إذا ما افترقنا
ربما أبكي
ولكن ما أن يرحلوا حتى أستغرب حالي وكأني لم أكن أعرفهم

( هذه قاعدة و بالطبع و التأكيد و القطع لها شواذ )
.....................
لم يكن مقيداً لها أى تاريخ فى الاجندة