نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

فضفضة

انا اللي مصورة الصورة دية

- طعم الماية -برغم إنه مفروض إنها ملهاش طعم- بيديني إحساس إني عايشة

- لما بمسك المج بتاعتي الأبيض اللي مكتوب عليه من قدام
Islamic
Institute
of new york

ومن ورا
( Allah, will never punish the heart in which Quran resides.)
ببقى حاضناه بإيديا و مش عايزة أسيبه .. بشرب منه براحه .. و أغمض عينيا و أشمه وأنا باخد منه بق.
بستخدمه في كل حاجة .. شاي أخضر بالنعناع ماشي .. نسكافية بالعسل ماشي .. شوكولاته باللبن مايضرش ..كركدية سخن ميقولشي لأه
بحبه .. هوه يعني إيه بحبه
يعني ببقى مبسوطة وانا ماسكاه بين ايديا
مبحسش مع أي مج تاني -غير مج عباد الشمس- الشعور اللي بحسه وانا ماسكاه
ممممممم
لما تحس كدة انك مكسوف و مبسوط و عالي و مستكين و نفسك تنط لفوق
لما تتكعور كدة على كورسي الانترية ولا تاخدلك ركن في السرير و تسيب النور مفتوح و تفضل تبص في تفاصيل الأوضة أو ممكن تقفل النور و تسيب النور البرتقاني يدخل من الشباك و تبحلق في النجوم اللي على السقف اللي فوق السرير و في الاشكال اللي عاملها الظل بتاع النور البرتقاني على الحيطة
لما تحس بالدفا في عز البرد وانت ماسكه بين ايديك
ولما تحس بلسعة البرد الأروبة اللي بتزغزغك و تقشعرك مع إني مبغيرش
لما تضحك ضحكة سلام عشان انت معاه مستكين
أنا بحبه عشان بعيِّش نفسي و بحس معاه حاجات كتير قوي مبتحصليش لما بسيب كرسي الانتريه وركن السرير..و أقوم و أخرج من انفصالي و ادخل تاني في الحياة.

- مبقتش بحب الشيبسي زي زمان مش عارفة ليه... كنت زمان الشيبسي دة لو أنا موتضايقة أكله و أرمي ورا ضهري كل حاجة مضايقاني و أما أخلص الكيس أبص كدة لنفسي و أقول عايزة تاني .. كنت أم أحس إني عايزة أدلع نفسي أجيبهولها .. بالملح .. جبنة ... و ساعات بالجبنة المتبلة ... طلعت أنواع كتير و طعم الشيبسي اتغير أو أنا اللي حاسة إنه اتغير .. مبقتش قرمشته تخرجني من حالات البؤس بتاعتي..
بقيت بجيبه و خلاص ...بكله و خلاص .. لو مجيبتوش مش بتفرق.. زعلانة إني مبقتش أحب الشيبسي .. مش عشان حاجة بس عشان فقدت حاجة كنت عارفة إن ليها تأثير إيجابي علياً و أنا نادراً ما بعرف إيه اللي ممكن يبسطني..

- بمناسبة الحاجات اللي ممكن تبسطني .. مبحبش المفاجآت و بموت فيها ... انتي مخك ضارب ولا إيه .. لأ .. بس مثلاً مثلاً .. لو حد مثلاً يعني عرف إني بحب حاجة .. و قرر إنه يعملي مفاجأة و يجيبهالي .. بحس بشعور بالبلادة .. ساعات بحاول أرسم على وشي علامات التفاجؤ و الانبساط برغم إني مش حاسة إني مبسوطة و ساعات أكسف اللي قدامي .. عارفة عارفة .. يعني دة جزاته إنه فكر فيكي أصلاً .. لأ بس أنا معرفش ليه بيحصلي كدة..
اللي بيبسطني بشدة إني اوفاجأ فعلاً .. مثلاً يعني .. حد جابلي حاجة أنا مش متوقعاها... خبر مستنياة ... فكر فيا من غير ما أقوله ...
مش عارفة
بس أنا بوفاجأ لما أوفاجأ .. مش لما حد يكون عايز يفاجئني..
يعني بتفاجيء بالصدفة .. و انا بحب المفاجآت الصدفة دية ...

- بقالي أكثر من اسبوعين أو تلاتة لابسة سلسلة فضة حوالين رقبتي و من يومين رجعت ألبس الانسيال الفضة اللي ادتهوني خالتي ..الغريب في الموضوع إني مبستحملش حاجة تبقى محوطاني زي الغوايش و السلاسل و الخواتم و الحاجات دية .. بحس كدة إني مخنوقة مبحبش حاجة تحوطني .. بس مش حاسة كدة مع السلسلة اللي لابساها .. مش عارفة ليه .. السلسلة دية لاقيتها بالصدفة وانا بدعبس في الشنط وقعت على الارض..

- آه صحيح الصورة اللي فوق دية أنا اللي مصوراها - بس عاملاها نيجاتيف- كنت مصوراها في الصيف اللي فات دة .. مش عارفة إيه النبات دة بالظبط .. الصورة الاصلية للصورة النيجاتيف تحت في آخر الموضوع .. بس عجبني النبات قوي ..

- اكتشفت شوية حاجات فيا .. أنا غير إني بوردر لاين أو باي بولار اللي اتكلمت عنها في موضوع قديم اكتشفت إني نارسيسيستك أو نرجسية ... أيوة ..
انا فاكرة مرة في موضوع من الموضوعات كنت اتكلمت عن الحركة دية و إني مش عارفة إية اسم المرض اللي عندي بس اكتشفت ان دة اسمة نرجسية..
إنك تبقى ماشي و حاسس إن كل اللي حواليك باصيين عليك..
و بما إني بأوحرج لما حد يبص عليا فبعمل نفسي مش شايفاهم .. و الزيادة في الموضوع إني أصلا مبشوفهمش ..
يعني مثلا مثلا .. دخلت أوضة بكلم صحابي .. وواحدة أعرفها قاعدة هناك لمحتها بالصدفة ... بحس إنها شافتني و متابعاني و بعدين أنا بقة أعمل نفسي مش واخدة بالي لدرجة إني أنسى أصلاً إن صحبتي دية موجودة أصلاً في الاوضة .. بس بيبقى جوايا شعور إن شخص ما مش فاكرة مين بقة متابعني ..
مثلاً مثلاً ... انا بتكلم مع اي حد أو حتى قاعدة ساكتة .. بحس إن الناس اللي في الجوار متابعيني برغم إني أصلاً مبكونش شايفاهم و ممكن يكونوا مشيوا من المكان ...
دة لإني أصلاً بطبيعتي ببقى ماشية باصة في الارض . أو لو ماشية قدامي مببقاش باصة لشيء معين .. مبشوفش الناس و مبحاولش أتابعهم .. إلا لو كنت راكبة مايكروباص مثلاً و ماشي براحة في الزحمة ... بحب قوي أتابع الوشوش .. بحب أبص عالملامح ... بحب أحس إن دية طيبة .. و إن دة ابنه عيان في البيت و بيجري عليه .. و إن دية مش شايفة غير نفسها ..
بس مبحبش أبداً أقول لحد إني بعمل كدة...
اللذيذ كمان اللي بيخليني احس بالتناقض .. إني لما كنت بمشي مع صحبتي .. و تقولي : شوفتي قله الادب .. أقولها: قله أدب إيه .. تقولي اللي كان معدي دة كان بيبص ازاي .. أو مثلا قال إيه .. أبصلها كدهو .. لإني مشوفتهوش أصلاً ولا بكون سمعت أي شيء ..
يعني أنا أصلاً مش بلاحظ ان فيه حد .. ازاي بقة بحس إنه متابعني .. متعرفش ياخويا .. بس هوه شعور جوايا
إنهاردة وأنا قاعدة جمب واحدة زميلتي .. أنا عادي عارفة اسمها و آخري معاها هاي و بتاع .,. قعدنا نتكلم و حركات - بما إني رغاية يعني و برشق مع أي حد - و بعدين فجأة دخّلت في الحوار البنت اللي قاعدة هناك " على فكرة ..... تخنت قوي عن قبل كدة " آآآآآآآآآآآآآآآآآآآآآآآآآآآآآخ
أنا موتي و سمي إن حد يتكلم معايا أو قصادي عن حد تاني ... أنا " بس هيا لسة روفيعة عامة ... ربنا ييسر .. هيا الكلية دية هتجيبنا الارض إلا صحيح .. إنتي بتعملي ريجيم مع دكتور معين ..." و هلم جرجر و نشد الحوار إلى منطقة أخرى بعيداً عن الشعب ..

- عملت حتة موقف مسخرة نظراً لإني مبعرفش أنتقي ألفاظي ...
كنت راكبة البتاع دة أبو جنية و نص .. وواقفة - كالعادة- ... المهم يعني الراجل صراحة كان بيسوق مش عارفة ازاي .. أكنك راكب الغسالة بتاعة الملاهي .. لازم تمسك كويس قوي .. المهم يعني .. طلعت ست ممممم ممكن تقول في أواخر الستين كدة أنيقة و لابسة بدلة شيك و شكلها بنت ناس يعني .. الراجل أصلاً او ما حطت رجلها على أول سلمة انطلق أكن فيه حد بيجي وراه .. طبعاً الست كانت هتقع .. قامت قالتله .. مش تستنى لما الناس تطلع وبعدين تتحرك .. فالراجل قالها بطريقة موش لطيفة : يعني عايزاني استنى الزبون لحد ما يقعد و بعدين اتحرك .. قالتله : أيوة طبعاً .. الراجل كان هيزعق فيها .. طبعاً البتاع فيه رجالة كتير و محدش دافع عن طنط .. و بما إني حشرية و رغاية بطبعي قمت قايلة للراجل : يعني عيب قوي كدة تتكلم بالاسلوب دة مع واحدة قد والدتك مفروض تحترمها ...المهم شخص ما لما سمع العك اللي قولته قام قاملها و قال : اتفضلي . و قعدت .. و نزلت أنا بعد شوية ...
اللي محسسني اني مبعرفش انتقي الفاظي إن قولت قد والدتك .. يعني هيا انيقة و حركات و الستات وانا منهم مبنحبش حد يكربنا في السن أقوم أنا اقوله: قد والدتك .. أعتقد لولا ان فيه واحد بعد اللي قولته قاملها و قعدت هيا كان زمانها ضربتني ... بس مليش دعوة محبش حد يزعق. مع حد عشان هوه راجل يعني و هيا ست مش هتقدر تزعق معاه !!

- سبحان الله .. اللي مكتوبله عمر .. هيعيش حتى لو حاصله إيه ..
انهاردة جاتلنا واحدة قريبة ماما .. بما إني إجتماعية جداً .. مطلعتش عشان أسلم عليها عشان كان معاها ابنها و انا أصلاً معرفهاش قوي و بتاع... و قعدت ألعب على الكومبيوتر لعبة كدة بتقتل الناس مش فاكرة اسمها إيه شبة هاف لايف كدة .. المهم ... على الساعة 9-10 كدة المفروض انها هتقوم تروح .. فقالت نادوهالي أسلم عليها .. بصيت لأختي بوش مزبهل كدة .. و قمت لابسة العباية و الإيشارب و طالعة .. سلمت عليها و حركات و المفروض أقوم بقة ... و حكم أنا رغاية .. و هما كمان مظمظ و طنط بيحبوا الكلام ( ستات بقة ) قعدنا نتكلم كتير كدة مش فاكرة قد إية .. المهم يعني
طنط دية بقة ( ماشاء الله ... الله أكبر ... ربنا يبارك في صحتها و يديها طولة العمر) حصلها حبة حوادت لا يُعلى عليها ..
و هيا صغنونة في سن الشباب كدة بعد ما اتجوزت .. خبطتها عربية خبطة جامدة جداً و فقدت الزاكرة .. و الحمد لله ربنا كتبلها النجاة ... لحد دلوقتي طنط بتقول مش فاكرة أي حاجة قبل الفترة بتاعت الحادثة دية ..
وبعدين لما أولادها كبروا شوية .. كانوا مسافرين اسكندرية ولا مش عارفة فين ... كان فيه سواق عربية نقل بيرجع بظهرةو هيا واقفة توقف تاكسي ... قام خبطها و وقعت تحت العربية .. و الناس اتجمعت و ليله و بتاع و قالها أوديكي المستشفي أعملك أي حاجة .. قالتله لأ و كملت طريق سفرها .. سبحان الله
بعدها بفترة .. كانت مسافرة لزوجها مع أولادها بالعربية ... و هيا سايقة العربية .. سبحان الله الكاوتش اللي قدام يفرقع طبعاً ماشية على سرعة عالية .. العربية قعدت تلف و تتهبد و تتعمل .. في الطريق الصحراوي .. يعين أي عربية معدية ممكن تخبط فيها بس وقفت معدولة و مجرالهاش حاجة هيا ولا أولادها ( الحمد لله).. اللذيذ بقة .. إن العربية قعدت تلف في الطريق الصحراوي ووقفت قدام بتاع كاوتش .. سبحان الله و صلحلها العجلة و كملت طريقها لاسكندرية ...
سبحان الله .. الانسان اللي ليه عمر .. مهما حصل .. هيعيش عمره بالتمام و الكمال.

- واحدة صحبتي ادتي كتيب - ارز باللبن لشخصين - بجد بجد .. عارف لما تحس إنك جوة الكتاب و انت بتقراه .. قاعد بتتخيل بتعمل إيه .. و ازاي حصل .. اسلوبها حلو قوي ماشاء الله .. و احاسيسها كمان. عجبتني كام حاجة من الكتاب ... 1- ارز باللبن لشخصين 2- طق حنك دية مسخرة بجد هيا و جمال الدنيا و حقيقة الاشياء ... 3- المورجيحة 4- سقط سهواً 5- رحيل ( جميلة قوي ) بدايتها .. وسطها .. نهايتها .. كلها على بعضها ..
ناقصلي كمان خمسة او ست مقاطع نثرية .. في حاجات معجبتنيش مش عشان حاجة بس حسيت إني مطلعتش بحاجة أو مفهمتش حاجة .. أكيد اختلاف الاحساس بالحاجة بيختلف من شخص لآخر فانا بقول رأيي زي 1- طاقة نور 2- المرأة الخارقة 3- أعماق أعماقي .. برغم إني فضولية بطبعي و بحب أدعبس في الشُنط بس اكتشفت إني لما بقرأ إيه اللي موجود في الشنط مختلف تماما عن الفعل العملي ألا و هو الدعبسة .. 4- عناوين الصحف 5- الشباب الدائم للألوان 6- مرسي اتهزم يا رجالة 7- الخرتيت البمبي البطيء 8 - نظريتي اللغوية

فيه حاجات بقة حسيت فيها إني متضايقة قوي زي لما الشتا بيدق البيبان عشان أنا بحب الشتا قوي و هيا ربطته عندها بالموت .. عارفة إنه شعور خاص بيها .. بس دة شعور راودني أنا
كيف يبايعون الريس في شارعي .. لذيذة و مكنتش عارفة إن الناس كدة فعلاً و كنت بستغرب قوي لما بشوف الاعلانات.

حنين .. لما تحس انك رجعت معاها طفل صغير تاني

انا و الضباب و هواك .. مفهمتش حاجة ( وش عليه نظرة بلهاء)

لسه هكمل قرايتها بس هيا لذيذة قوي ..
المسخرة في الموضوع إنه هيا اسمها اللي بتعلق بيه - محض الروح -
و أنا كنت بحب أروح مدونة اسمها - محض الروح - زمان .. و لما شوفت الأسم جريت بسرعة و قولتلها ( هههههههههه اكتشفت إني عارفاكي من زمان و كنت بقرأ مواضييعك .. ولما سألتني عليكي صحبتي قولتلها معرفهاش ) و اكتشفت بع تفكير إني فعلاً معرفهاش ..
عايزة أبقى أروح مدونتها و أقولها انا فعلاً معرفكيش .. اعذري تسرعي ..


- عندي زنقة فظيعة في الوقت و مفروض أزاكر .. بس لما باجي أقرر إني أزاكر مبلاقييش وقت .. هتقولي إني قاعدة أهوه و برغي .. هقول إنهاردة الخميس .. المهم يعني .. محتاجة دعوات بالكوم .. و خصوصاً إني كل شوية انزل دروس و ارجع مسحولة .. اتدلق على السرير و أصحى تاني يوم زي أكن حد ضاربني بوكسين .. و اعيش يوم تاني
يعني مثلاً .. أحط يوم كمثال
اصحى اصلي الفجر قبل الشروق و البس عشان انزل درس اطفال من 7-9
من 9-11 محاضرة اطفال
من 11-1 راوند اطفال
جري نصلي الظهر و نطلع
من 1-3 علاج طبيعي أو طب مسنين
جري نركب العربية بتاعت صحبتي و نطلع على درس الباطنة
من 3-7

طبعاً لو مخدتش درس الاطفال من 7-9
اليوم يبدأ من 9
و آخد درس الاطفال بليل بعد الباطنة على الساعة 8 - 10

و لكم أن تتخيلوا

اللذيذ في الموضوع بقة .. إننا هنمتحن في رمضان ... يعني مش هشرب 10 كوبايات شاي ..
يعني مش هقدر أزاكر من الظهر للمغرب لإني هبقى بودع و أنا أصلاً مبعرفش ازاكر في الفترة دية
وطبعاً مش هعرف ازاكر من المغرب لبعد العشا بساعتين لإني مبعرفش أصلي التراوييح في البيت فهنزل اصليها في الجامع ..
طب تخيلوا معايا
هنمتحن في العشرة الاواخر
لأ و الألذ إن الاقتراح اللي مقترحينه إن الامتحان يبقى تالت أو رابع يوم العيد . هع هع هع ...
والله اللي ربنا عايزه هيكون ..

الشيء اللي مضايقني قوي دلوقتي هوه المعاملة اللي بيعاملوهالنا في راوند الأطفال ..
يعني المحاضرات بغياب ... ولو مجيتش 7 ايام من الشهرين تنقص درجات الغياب
و الدكارتة .. اللي يجي بدري الساعة 9 و اللي يجي الساعة 9 و نص و اللي يجي 10
و اللي يجي بدري و يدخل الطلبة
و اللي يجي متأخر و ميدخلهمش
و اللي يجي بدري و ميدخلهمش
يعني أنا اتأخرت 3 أيام متفرقة و متاخدش فيهم غيابي
دة غير إني حضرت المحاضرات مرة و متاخدش غيابي برضو
و غبت 3 ايام
يعنمي المجموع 7
و لسة هغيب قبل الامتحان عشان ازاكر

حاجة تعل

يلا خير ...
ربنا يهون

أنا مش مضايقة منهم قوي .. بس ربنا يسامحهم..

- بمناسبة ربنا يسامحهم .. اكتشفت إني مبقولش لحد الله يسامحك من جوايا قوي إلا لما يكون حسسني بألم قوي .. ذلني ( زي القهر اللي بشوفه في الاطفال مثلاً) .. شلني .. علني .. خلاني غضبانة .. كدة يعني.. غير كدة لما حد بيعمل أي موقف في الحياة مبفكرش إني متضايقة منه أصلا و عادي يعني .. اللي هيا الله يسامحك التلقائية اللي بتطلع دية ..

- أنا قاعدة بقالي يجي 3 ساعات بكتب ...

آة صحيح الصورة اللي تحت دية .. هيا الصورة الأصلية للصورة اللي فوق ..
سلام

دعوات





تموت الحرة...!!


وقفت ممسكةً بدلاية سلسلتها الذهبية لوناً فقط - تماماً مثل مظهرها - وهي تمضغ العلكة

كانت مستندة بظهرها على ذلك الجدار الحجري القديم..

تهيمن على الشارع مسحة من ضوء برتقالي لا يكاد يخفي ظلامه..

يحتويها الظلام .. بل هي منغمسة به .. لا تعلم في أي ظلام هي :ظلام نفسها الذي يعتصر خلاياها أم ظلام العالم من حولها الذي لا يكاد يسترها.

لا تعلم إن كان يواسيها أم يحضها على استكمال طريقها المظلم...

- تعالي يا قطة ؟-

ذهبت إليه و في عقلها ألف علامة استفهام خلف سؤال لا يفكرعقلها في سواه

قالت في ميوعة مصطنعة بركاكة : 200؟

- لية مورلين مورنو؟!!!

نظرت إليه بقرف و هي تقول كعلامة لإنتهاء الحوار : يفتح الله

ذهبت بخطواتِ متمايلة مبتعدة عنه

و استندت مرة اخري الي الجدار , مرت الدقائق عليها كساعات ,

كلما حاولت علامة حزن أن تقترب من عضلات وجهها واجهتها بضحكة عالية ، طرقعة لبان أو غمزة من عينيها لأي شخص تشعر أنه قد يكون زبون جيد.

اقترب منها آخر

كانت تبدو عليه علامات الغني و الترف

دار بعقلها : ليه يعني يفكر في بنت ليل لما فيه بكارا ياما يتمنوه يأشر لهم بس.

يسيب الحرير و يدور على الساتان !!

قال: يلا بينا !

قالت : 200؟!

قال : ماشي ماشي يلا بقة

انتشلها من الظلام الي سيارة فارهة لا سقف لها.

ظللت تفرك في السيارة و تقف ثم تجلس

تجيء يمينا ثم يساراً..

لم تركب سيارة مثلها من قبل...

وقفت فاتحة ذراعيها لتقابل الهواء ...

صرخت بأعلى صوتها في سعادة...


و انطلق هو سريعاً الي مكان لم تعلم وجهته.

طال الطريق

و طال الصمت

هوه انت بتشتغل اية؟

مصور

بتصور اية؟؟

بصور اي حاجة

اي حاجة زي اية؟؟

زيك مثلاً

نظرت الي نفسها وقالت :يا سلام ... يعني الحاجات دية بتكسب؟

ها ها ها ها ها ها ها ها هاااااااااااااا , متهمينيش حكاية المكسب و الخسارة دية

اومال بتصرف علي نفسك ازاي؟؟؟؟

بال كريديت كارد

كبريت الورد يعني اية دة ياخويا

نظر إليها و ابتسم ابتسامة ملائكية ثم قال : ليا فلوس في البنك يعني

دي جتلك منين بقة ؟

والدي

آآآآآآآآآآآآآآآه .... .... طيب

استمر الصمت بعدها طويلا

راودها النعاس وداعبها الهواء فزاد احساسها بالرغبة في النوم فنامت

لم تصح إلا على حرقة الشمس لرقبتها المشوهة بعلامة لجرح غائر منذ زمن بعيد...

قامت من مرقدها بصعوبة بالغة و كأنها لم تنم منذ أشهر عديدة


تلفتت حولها , فاذا هي في مكان تكسوه الخضرة و تداعبه السماء بلونها الفاتح المتشح بالبياض المرسوم بدقة عليها ..

سمعت صوتاً كهدير الموج في اذنيها

اغلقت عينيها فتذكرت امها...

سرحت : مسكينة يأما ... متعرفيش اللي بنتك بتعمله ... بس أعمل إيه الدنيا بقت صعبة و العيشة أصعب ..و أخاف عليكي ليجرالك حاجة لو عرفتي أنا بشتغل إيه..

سمحت لدمعة تسقط منها بعد أن شعرت أنها وحدها في المكان

و إذا بصوت من امامها يقول: ياااااااااااااااااااااااااااااااااااااااااااااه

انزعجت و : تف تف تف فزعتني يا شيـــــخ

نظر إليها مبتسما فتسائلت : ياة اية ؟؟

اصلي واقف قدامك بقالي يجي خمس دقايق

المهم

تعالي يلا عشان هصورك كام صورة

جذبها من يدها الهزيلة المحاطة بالكثير من الأساور البلاستيكية و النحاس المطلي بالذهب

أخذها إلي غرفة مظلمة..

بعد أن اعتادت عينها على الظلام تبينت شارعاً كالذي كانت تقف فيه ...

طلب منها أن تبدو على سجيتها ...

و بدأ يصورها من عدة اتجاهات...

تشك تشك تشك

حلوة كدة

كويس قوي

خليكي طبيعية

أثارت كلمته هذه في نفسها شيء ما

دار بعقلها:... خليني طبيعية؟؟؟ ازاي اخليني طبيعية؟؟؟

كدة تمام قوي

هوه انا مولودة بنت ليل؟؟؟ ...

انحبست الدموع في عينيها

أيوة خليكي ثابته كدة ...

أنا مش طبيعتي إني بنت ليل

آخر تمام

صرخت فيه فجأة : بس أنا كدة مش طبيعية .

توقف عن التصوير ثم قال في ثقة : منا عارف..

أنا عايزك طبيعية

سألته بحدة : هوه فين الحمام ؟؟

أجاب و على وجهه ابتسامة :هناك على الشمال ..

وقفت أمام المرآة بعد أن فتحت الصنبور على آخره

شخصت أمام صورتها الملونة

مسحت ما قد لطخت به وجهها من مساحييق..

عقصت شعرها كذيل الحصان وراء ظهرها ..

أغلقت أزرار قميصها

خرجت إليه

قالت في حياء و قد احمر وجهها و هي تشير بإبهامها إلى صدرها :أنا ديه

بدأ يلتقط لها الصور و هي تتخذ كل الاوضاع التي تريدها في حديقة الشالية ...


ثم قال:بس كدة

ادي يا سيدتي ال 200 جينية و عليهم 70 جينية حق رجوعك للقاهرة

اخذت النقود و انطلقت

جلست في الناقلة واستندت برأسها علي النافذة..


و تذكرت اختها التي أقامت عند والدتها مؤخراً هي وأولادها لتزيد من الأعباء و المصاريف التي لا يحتملها المعاش الذي تقبضه والدتها أول كل شهر. ذلك لأن زوجها قرر فجأة أن يتركها.

تذاكر يا آنسة

شعرت فجأة بالبرد ... تشبثت بملابسها و حوطت نفسها بها أكثر

هاه ........, اتفضل

عادت لسرحانها

تابعت الصحراء التي لا تتغير كثبانها


لاااااااااااااا سيبني سيبني

الحقونيييييييي

يا ماما

يا ماما

حد ينجدني يا ناس

مفيش حد هيرد عليكي , كلهم خرجوا

أرجوك ... دنا بعاملك زي أخويا الكبير

حرام عليك...

حرام عليك...


ههههههههههههههههههههههههههههه

لااااااااااااااااااااااااااااااا

هوه شيعال يبخه ابلس محطة


انتفضت و هي تنظر إليه بهلع :هاه

هوه ناقص كام وقت عشان يوصل للمحطة

عدلت من جلستها و تنحنحت قليلاً : آه مش عارفة


سقطت منها الجريدة فدفعت جسدها للأسفل لتحضرها


للأسف مش هنقدر نثبت حاجة

يعني خلاص ضاع حقي

احنا هنفضل ورا القضية يمكن نجيب تعويض

انا مش عايزة منه حاجة أنا عايزاة يروح السجن , يروح السجن , ولا يتعدم ...

بس يا حبيبتي : انا الغلطانة اني سيبتك معاه

اهيء اهيء اهيء اهيء اهيء


تفوهت بكلمات مسموعة : ما خلاص يا أما.. كل شيء راح


وصلنا يا انسة


نظرة شاردة

خطوات شاردة إلى خارج الحافلة

طريق مليء بالضباب في وضح النهار

.......................................


حكوك الطبع و النشل محفوسة لنعكوشة

وراثة.


يكفيني أن أدقق النظر في الأعين كي أضطلع على ما بداخل القلوب..
دخلت الغرفة في بطء شديد ... كانت مطأطأة الرأس و كأنها تحسب عدد خطواتها للوصول إلي..
نزحتُ إلى اليسار قليلاً مفسحة لها مكاناً على سريري.. وضعت نفسها في حزن عليه ...
مددت أحد ذراعاي على الوسادة كأني أدعوها لتلتحم بي فأحوط عليها ... تكومت بداخلي واضعة ذراعها حول صدري...
لم أسألها ما بها فقد علمتُ أنها تواجة مشكلة ما ولم تجد أحداً غيري يتسع صدره لثرثرتها...
اسندت رأسي على رأسها و عدت مرة أخرى لاستكمال ما كنت أقرأه ...
حركت رأسها على صدري و هي تقول بصوت خفيض : ماما ... هوه أنا لو عملت حاجة غلط هتسامحيني..
ارتسمت ابتسامة على وجهي فقد فلحت خطتي في اجتذابها .. اومأت برأسي وهمهمت بصوت خفيض أيضاً : أها..
قضبت فمها ثم دفنت رأسها في صدري و هي تقول : أنا خرجت مع صحابي انهاردة ... رفعت أحد حاجبي ( في عقلي فقط ) حاولت أن أبدو على حالي ثم قلت لها : كدة متقوليليش قبليها .. قالت : مانتي مكنتيش هتوافقي...
اجابتها أثارت فضولي ولكن لابد من الحفاظ على تلك الوتيرة كي أعلم ما بها ثم أبدأ بعد ذلك في اتخاذ القرارات .. اعتقد أني قد استغرقت في محاولاتي تلك كثيراً فقد قالت لي مستفهمة : ماما .. مالك؟؟ ..
أجبت : لأ يا حبيبتي أبداً .. مكنتش هوافق ليه؟؟ انتو روحتوا فين؟؟؟
بدأت توقعاتي الخبيثة في الظهور : صالة ديسكو ( لا لا بنتي مربياها كويس) .. قهوة و شربوا شيشة ( لا لا دية طالعالي بتكرة السجاير و ريحيتها) .. بيت واحدة معرفهاش ( لأ البنت مش.... اسكندرية .. قالتها مقاطعة أفكاري .!
لم أستطع ازالة نظرة الذهول التي ارتسمت على وجهي كي ابدو طبيعية امامها فتحكي لي كل شيء بالتفصيل ولا تتردد ولكن ...
اسكندرية ..
دون أن تخبرني ....
عدلت من جلستي ببطء لأجلس القرفصاء على الفراش لأستطيع مواجهتها و مواجهة تلك التجربة ..
قلت لها و انا مسيطرة تماما على عصبيتي اللا محدودة بداخلي : ازاي يا منة متقوليليش قبل ما تروحي هناك ..
كررتها ثانية : مانتي مكونتيش هتوافقي ... و بعدين أنا قايلة لصحابي من زمان إن مامي فري ..
لماذا دائماً تدهشيني يا ابنتي : فري :| ...
روحتي أنتي و مين بقة إن شاء الله ؟؟ ..
لا أعلم ماذا يمكنني أن أفعل... إذا ما علم والدها بالأمر فربما يقتلني قبل أن يقتلها .. و سأستمع إلى القصائد الهجائية التي تبدأ دائماً ب : هيا دية تربيتك ... أنا غلطان إني ...و إنتي ولا أم ولا بتاع...
غير أني قبل ذلك مصدومة من فعلة ابنتي ..
ربما إذا ما طلبت مني .. بعثت معها أخوها -بعد أن تلح علي كثيراً في الأمر- ..
ولكن أن تسافر ... دون حتى أن تخبرني .. ولا تكلف نفسها عناء مكالمة هاتفية ...
كيف حدث ذلك ...
لقد ضاعت سنين عمري هباءً ..
أشعر بالحسرة و الألم ..
شعور مجرد بالوحدة اجتاحني.
كيف لها؟...
أردت لها أن تفهم أنها حرة ... ولكن لأي حرية حدود ...
لا أعلم إن كانت أجابت على سؤالي السابق لها أم لا ولكني لم أنتبه إلا و هي تربت على فخذي متسائلة : ماما .. انتي معايا ؟
حاولت أن أبتسم فلم أستطع .. قلت : مين صحابك اللي طلعوا معاكي يا منة؟؟
بدأت في سرد أسامي فتيات كثر .. ربما ارتحت حينما كثرت عدد الفتيات و لكنها لم تتركني لراحتي فسردت الكثير أيضاً من الفتيان بينما أنا في ذهولي .. قلت لها : ومين بقة صاحب الفكرة دية ؟؟؟
أنا ...
نعمممممممممممممممممممم : لم أستطع كبت مشاعري أكثر من ذلك .
يعني ازاي انتي : قلتها وانا على وشك الانفجار فيها ..
ماما ... منا مش هعرف أتكلم وانتي مبرقالي كدة .. : لمحت في عينيها نظرة استرحام فشعرت بقسوتي عليها ( لا أعلم أيه قسوة ولكن كان لابد من العودة إلى وضعيتي الأولى كي أتركها تفصح عن كل ما بداخلها)
حللت عقدة شعري و أنا أعبث به ثم قلت لها : ازاي طيب تقترحي انكوا تسافروا من غير ما تستأذنيني يا منة .. أنا ربيتك على كدة؟؟
نظرت إلي نظرة علمت منها أنها عرفت ما أقصدة تماماً ... يمكنها أن تفعل ما تشاء في حدود المسموح و بعد استئذاني ..
لو كنتي قولتيلي كنت بعت معاكي اخوكي و أهو كان هيوصلك بالعربية ..
أنا أسفة يا ماما ... لمحت ذلك في عينيها قبل حتى أن تتفوه به..
مش هقبل الأسف دة إلا لما توعديني إنك متتصرفيش بشعننة كدة من دماغك إلا لما تقوليلي ..
اوعدك يا ماما..
حبيبتي أنا خايفة عليكي ... مكانش يصح أبداً إنك تعملي كدة ... و بعدين لية مقولتيليش من قبلها؟
أصلها جت بالصدفة يا ماما .. أنا قولتلهم نفسي نروح اسكندرية .. قالوا : بييييييييييس و اللي معندوش كلمة اللي ميطلعش دلوقتي ...
طيب متصلتيش بيا ليه؟
منا خوفت
وماخوفتيش وانتي هناك من غير ما تقوليلي ؟؟؟
منا عشان كدة قولتلك
وانا عشان كدة سامحتك
متعمليهاش تاني يا منة
عشان خاطري يا حبيبتي .. فكري قبل ما تعملي الحاجة..
حاضر يا ماما... قبلتني و انطلقت إلى غرفتها ..
عدت إلى حيث كنت ... لأتذكر كيف كان حالي و أنا في مثل سنها ... كانت أحلامي أن أفعل ذلك .. أن تخرج من عقلي الفكرة فأنفذها ... و لكن لم يكن بوسعي ... فكنت أخاف أنا أيضاً من أن يتعصب أحد أبواي...
لا أعلم إن كنت أخطأت في تربيتها
ولا أعلم إن كنت أخطأت في موقفي معها
ولكن ما أعلمه.. أني أريدها عصفورة تحلق بعيداً لتكتشف ذاتها .. ولكن تعود إلي كي أبث بها خبرتي .. و نصائحي ...
تذهب إلى أقصى ما تستطيع ثم تعود إلي ..
لا أستطيع أن أخبرها بذلك و لكن ربما هذا ما أحست به و هي مسافرة إلى الأسكندرية
أعلم أنه خطأ .. و أعلم أني لأني أمها أشعر بالضيق
ولكني أشعر و كأني أنا من يتحرر في جسدها هي..
لا يمكنني أن أثني عليها فعلتها ... ولا يمكنني أيضاً أن أثني فعلتها على نفسي..
شيء ما يدفعني لأرفض ذلك ..
و شيء ما يحثني لأحتضنها بعد اكتشافاتها..
ربما في جلستنا المقبلة تخبرني عما فعلت هناك..
أخشى عليها من مواجهة الحياة .. و أريدها أن تواجهها و بقوة..
حائرة بين شعوري بالتمرد و شعور الأمومة بداخلي..
أشفق علي و عليها..
و أشفق على زوجي أيضاَ فيبدو أن حب التمرد و الانطلاق قد ورثته عني ....

..............................

حكوك الطبع و النشل محفوسة لنعكوشة

من وحي اللحظة



ربما يبدو هذا المساء كغيره من المساءات التي مرت عليّ
ربما أبدو في حالة يرثي لها بسبب مرضي .. احمرار انفي و احتقان ثغري
ربما يبدو هذا الآذان كغيره
ولكني أشعر شعورا مختلفا
هذا المساء مختلف فقد بدأت أول خطوة فيما أردت أن أفعله .. متأخرة نعم .. ولكني بدأت..
مرضي لم يعيقني عن تبديل نظام غرفتي و ترتيبها رغم آهاتي المتكررة وكحتي المؤلمة وهني
أما عن الآذان فاليوم يدعوني - أنا- للصلاة .. يدعوني لعقد صفقة جديدة مع نفسي.. لا عليها...

أشعر بمزيج من الأمل و الطمئنينة ..
أن تغمض عينيك في سلام و على وجهك ابتسامة لا تهتم ما هو مصدرها .. ابتسامة لا تعبر إلا عما يجول بصدرك..
لا ... لم أنس الألم الذي في صدري ولكنه لا يعيقني عن شيء..

شيء غريب ... عندما أكون مريضة أشعر و كأني أريد أن اساعد الكثيرون .. أريد أن أعمل .. و أفعلها ...
الشيء الذي لا يحدث عندما أكون بكامل قوتي..

ربما أنا لا أشعر بالخوف الذي يُكَوِّنُ هالة حول مشاعري..
ربما لا أشعر بالقلق ...
ربما لا أشعر بالألم الداخلي الذي يهيمن علي في حالتي المعتادة ...
ربما ألم صدري يغطي على كل هذا
لا أعلم
ولكني مختلفة الآن
لست مختلفة في شيء سوي شعوري الآن بالاختلاف..

الشيء الذي يؤرقني دائماً هو الرياء
أخشى أن أكتب أو أقول لأحد أني أفعل شيء ما كي لا أكون مُرائية
ربما حينما اشعر أني أريد أن أقولها لا أفكر في أن أظهر أني فتاة ذات خلق بل لأني بطبعي ثرثارة.
ولكن مع هذه الاشياء التي تتعلق بعلاقة الفرد بربه - حتى و إن دخل فيها الناس كالعطف عالصغير و اماطة الاذى عن الطريق و مثل هذه الاشياء - دائماً أشعر بالرياء يغلف أفعالي.
لا أريد أن أكون مرائية
ولكن يبدو أنني كذلك
هكذا قيل لي
لم أقصد أن أكون
أخشى أنني قد أكون قد قصدت ذلك و لم أدري أنني أحب الرياء.


ويحي

لقد خرجت من حالة الطمئنينة إلي الخوف مرة أخرى

ربما علي أن أذهب
يجب أن أنام فعندي دراسة في الغد ( بعد ساعتين)

سلام



حبيبي كرهتك



حبيبي كرهتك... كرهتك كتير
كرهتك لأنك .. زي الحمير
بتمشي تنهق
كلامك يزهق
وحتى إن قلت كلمة.. حلوة في حقي
بتقلب أكنك.. جناب الوزير

حبيبي كرهتك و كرهت الغرور
غرورك جرحني و خلاني أثور
أثور عالمشاعر.. و قلبي اللي شاعر
و حتى كلامي ... ميفرقش عنك
حبيبي كرهتك ... كرهتك كتير
كرهتك كتير

كرهت الحقيقة... في إني بحبك
و كلام الناس .. دول زي بعض

الله عليهم .. عصافير كناريا
شوف السعادة .. يا عيني عالوعد

متقولش بحبك.. مبقتشي تأثر
خلاص مش هينفع .. تقولي أي رد

فراقنا لازم ... دة درس في حياتنا
أنا و إنت حاولنا ... وضيعنا كل عهد

الحب قطة...نربيها إحنا...ندللها إحنا
و يوم ما نهينها...هتخربش أي حد

مش إنت بس الغلطان.. أنا كمان غلطانة
سامحني و سيبني .. عشاني بحبك
لأ قصدي كرهتك
كرهتك كتير

كرهتك كتير

حبيبي كرهتك .. كرهتك كتير
كرهتك لأنك .. زي الحمير
بتمشي تنهق
كلامك يزهق
وحتى إن قلت كلمة .. حلوة في حقي
بتقلب أكنك ... جناب الوزير

كرهتك كتير

...............
البتاعة دية لاقيتها وانا بقلب في الكعبروتر بتاعي
المقطع الأول منها اللي هوه لحد كلامي ميفرقش عنك اتسجل في فبراير
و الجزء التاني منها لاقيته متسجل في مايو
كلو سنة 2008
بس
هناك اعتراض عندي بس على البتاعة اللي فوق دية .. لإني بحس الحمير دول مخلوقات طيبة و مطيعة
ولا يليق بيها الغرور و الخيانة

.............
حكوك التبع و النشل محفوسة لنعكوشة

اللي هيجي على بالي هكتبه

هههههههههههههه
انا قولت هنقي أي صورة و اللي تتطلع و خلاص

حاسة إني مشوشة
بس مبسوطة
مش مبسوطة قوي
بس يعني حاسة بسعادة
مع اني حاسة باضطراب
حاسة إني خلاص مش هقدر ألحق
وحاسة إني لو بدأت كلو هيتظبط
كل يوم بقول هبدأ انهاردة
end up in reading one of the books i've bought lately
هيا جت كدة
حاسة إني عايزة أصرخ

عايزة اقول
freeeeeeeeeeeeeeeeeeeeeeeeee dom
زي ما قالها ميل جيبسون في الفيلم

الدنيا برد قوي في اوضتي وانا مبسوطة جداً إنها رجعت برد
رجليا متلجين
و ايديا كمان

زوري بيحرق حرقة البرد :D

مظمظ ( مامتي ) بتقولي: هنروح الساحل آخر الاسبوع
معنديش اجازة يا عالم يوم السبت( دة أنا)

مانتي بتغيبي كل شوية من الكلية .. حبكت المرة دي .. اكنك صحيتي متأخر
لأ يا مظموظتي مش هينفع

يعني هتقعدي لوحدك
اللي جة في بالي ( مانا بقعد لوحدي عادي ) بس محبيتش اقول كلمة وحشة( تزعلها يعني)
لأول مرة أفكر قبل ما أقول حاجة لحد
قولتلها :هفكر يا حبيبتي ( انا مبقولش كلمة حبيبتي لمظمظ عادة فحسيتها حلوة و هيا طالعة مني)

قبل شوية انهاردة قعدت ابوس فيها و اقولها الكلمة اللي بحب اقولهالها كل ما أبوسها ( كميلة مامي) هي: أيوة اضحكي عليا.. أنا : أحلى مامي

يخربيت كدة
البرد دة عيشة تانية
أحب البرد و اموت في البرد يا سلام عالبرد

مضطربة
مقلقة
مشوشة
مبسوطة
مرتاحة
موسوسة

فتحت البتاع و بصيت بصة و مشيت .. مكنتش هخل بالاتفاق بس بحب كدة كل فترة أبص

سمعت البتاعة من كام يوم و كنت بقرأ أيامي الحلوة لعبد الرحمن الأبنودي .. قعدت أعيط
فكرت: هوه انا ليه معنديش زكريات زيه كدة؟؟
تخيلت : المخدة بتحكيلي و بصيتلها و قولتلها تفتكري لما أكبر المدونة دية هفتكرها كذكرياتي
مردتش عليا مش عارفة ليه
قولتلها: تصبحي على خير

الراجل دة تحفة ( ربنا يكرمه) >>> الأبنودي

كدة يا حراجي
فكرني بيها إبن الإيه و هوه بيتكلم عن الكرم اللي كان في بيتهم اللي في القرية
..............

ناوية على نية و ربنا ييسر و يوفقني فيها

أنا حاسة إنو مبقاش عندي إرادة

بس برضو ربنا ييسر و أعملها

ياااااااااااااااااااااااااااااااااااااااااا رب

...........

مكملتش كوباية الماية مع إني بحب الماية و بشرب منها كتير

تفتكري يا نعكشة في يوم هيبقى عندي واحدة أقولها إنتي صحبتي؟؟؟
مش عارفة
تفتكري لو عيشت من غير ما أقابل واحدة أقولها إنتي صحبتي .. هخسر كتير؟؟؟
تفتكري لو قابلت واحدة قولتلها إنتي صحبتي .. و دوقت معاها طعم الصحوبية .. و لظرف ما ( و ظروف الحياة كتيرة) سيبنا بعض .. تفتكري هزعل زي مانا زعلانة إني معنديش واحدة أقولها إنتي صحبتي
لأ
هبقى زي الفرق بين اللي بيعيط عشان مدخلش الجنة
و اللي بيعيط عشان دخل الجنة و طردوه منها

أكيد صحبتي مش الجنة يعني...
بس تصدقي ممكن تكون الجنة( وش بيفكر)

لو انا و هيا أعانا بعض عالطاعة
جيت اغير كلمة الطاعة بالخير بس قولت انا هكتب اللي يجي في بالي.. مليش دعوة

تفتكري هلاقي واحدة تعيني عالخير... تفتكري أصلاً إني هسمح لواحدة تقرب مني و تعيني عالخير؟؟
تفتكري أصلاً إني استحق واحدة تعيني عالخير؟؟؟

يابنتي طول ما الزفت دة قدامك، بايظة انتي خالص .. قومي!!

دية مظمظ

يلا هقوم سلام


قلبي لسه بيوجعني يا دكتور (2)


آه ياني يا شلبي
اثبتي يا دوك
مش شايفة حاجة يا شلبي
معلش يا دوك .. هما كل المشاهير ابتدوا كدة
عيني باظط يا شلبي
مش تبقى تركزي بعد كدة يا دوك .. لما تلاقي طوبة بتتحدف توطي بسرعة
ماشي يا شلبي .. هتبقى انت و الزمن عليا
يلا يا دوك عشان هنبدأ
عيني باينه يا شلبي
بنفسجي و زي العسل يا دوك
طيب يا شلبي... خد بيدي يابني وصلني لحد الكرسي
يلا يا دوك
اجهزي يا دوك
حاضر ياخويا
أكششششششششششششن

سلام عليكم

اعظائي المشاهدين .. عظيظاتي المشاهدات
سباح الخير لو كنتوا بليل و مصاء الخير لو قريتوا البوست الصبح

قبل ما تقروا موضوع حلقة النهاردة لازم تكونوا قريتوا الموضوع الاول قلبي بيوجعني يا دكتور .. مش رخامة لأ عشان الموضوع الاول مبسط و بيمهد للموضوع بتاع حلكة انهاردة لإن الحلكة انهاردة تقيلة شوية ....يلا روحوا اقروا الموضوع الاول قلبي بيوجعني يا دكتور 1
افعص اللينك اللي فوق عشان تروح هناك بسرعة
احم احم

نظراً للإقبال الرهيب على البوست اللي فات .. و ردود فعل المشاهدين العظام من جمهور المدونين فقررت ادارة العيادة المنعكشة
انها
تتنحي
ايوة منا لازم اتنحى في عز مجدي اومال
بهزهز .. ولا هتنحى ولا بطيخ أنا قاعدة على قلبكم

كنت وعدتكوا اني هجيبلكوا صور و حركات .. حكم انا بموت في الصور
و نظراً لإن كلمتي زي السيف فانا مجبتلكوش حاجة ههههههههه بمزح بمزح ( بمزح البلاط ) هع هع هع ( يا دوك إحنا عالهوا)
اة اقطعها دية يا شلبي



كنا اتكلمنا في الحلكة اللي فاتت عن الأمراض اللي بتصيب القلب و الحاجات دية
طيب إيه هوه ال بري كارديم اصلاً دية صورة بتوضح إيه هوه
زي مانتو شايفين هوه غشاء بيحوط القلب
ولما بيلتهب بيبقى اكيد بيوجع و بيعيق القلب عن الضخ
زي مانتو شايفين في الصورة
inflammed pericardium
يعني ملتهب

طيب كنا اتكلمنا برضو عن ال بيري كارديال افيوجن
و زي ماحنا شايفين على اليمين اللون الازرق دة هوه الماية اللي موجودة جوة الغشاء المحيط بالقلب
و زي ما قولنا برضو بتعيق القلب عن أداء و ظيفته
ألا و هي توصيل الدم إلى اجزاء الجسم

اتكلمنا كمان عن ال كونستركتف بيري كارديتس و قولنا إنها تليف في الغشاء دة و انها بتلزق فيها و في الحاجات اللي محوطاها و بتخنق عليها زي مانتو شايفين البتاع البرتقاني اللي محوط القلب دة في الرسمة اللي على لاشمال

كلمتكوا كمان عن الشرايين التاجية
و مقولتلكوش ليه اسمها تاجية .. تاجية او
coronary
يعني شبة التاج محوط القلب
و هما عبارة عن اتنين واحد يمين وواحد شمال
و الشمال بيتقسم اتنين واحد قدام وواحد بيدور لورا
و اسمهم
right coronary , left coronary which divides into anterior and circumflex
يعني هما بيتعاملوا معاملة 3 شرايين
طيب

ومكلمتكوش عن الصمامات و الكونجينيتال هارت ديزيز ..

موضوع الحلكة انهاردة هوه


الدورة الدموية و الدورة القلبية و أمراض الصمامات




حابة إني اكلمكوا عن ال
cardiac cycle & cardiovascular circulation
كارديك سايكل و كارديوفاسكولار سيركيوليشن .. كارديك = قلب ... سايكل = دورة .. كارديو = قلب .. فاسكولار = اوعية دموية .. سيركيوليشن = دورة
دورة القلب و دورة الدم في الجسم
طيب قبل كدة لازم اصلا تعرفوا منظر القلب عامل ازاي من جوة
القلب عبارة عن 4 اوض مجوفة بينقسموا لأوض يمين و إوض شمال
الغرف اللي فوق اسمها أذين أو
atrium إتريم
و الغرف اللي تحت اسمها بطين او
ventricle فنتركل
الأذين أو الإتريم وظيفتوا إنه يستقبل الدم سواء الدم اللي جاي من الرئة أو الدم اللي جاي من الجسم عشان يبعته للبطين او الفينتريكل عشان لما الفينريكل او البطين ينقبض يودي الدم اللي جاي من الجسم للرئة عشان يتأكسد و يودي الدم اللي جاي من الرئة لباقي الجسم عشان يتغذى

استني بس يا دوكتورة إيه اللي بيحصل؟؟؟

الاذين بيستقبل الدم ...... ينزل الدم منه للبطين ( وقت انبساط القلب) عشان البطين ينقبض فيخرج الدم للرئة و الجسم ( وقت انقباض القلب).

طيب
الأوعية الدموية اللي داخلة في الاذين تسمي ( أوردة) وارد يعني جاي
و الأوعية الدموية اللي خارجة من البطين تسمي ( شرايين)
الأذين الشمال ( اللي هوه يمين الصورة.. لإن إحنا باصيين على الجسم من قدام زي بالظبط لما تبص على حد من قدام إيدك اليمين بتواجه إيده الشمال))
جايلة 4 أوردة ( كنا قولنا إن الوريد يحتوي على الدم غير المؤكسد بس هنا الاوردة فيها دم مؤكسد اللي جاي من الرئة .. طيب قولنا عليها أوردة ليه لإنها داخلة في الاذين)
يبقى
الاذين الشمال.. جايلة 4 اوردة رئوية من الرئة فيها دم مؤكسد
ينزل الدم من الاذين للبطين ساعة الانبساط او الدايستول عشان
البطين الشمال لما ينقبض يدفع الدم لباقي اجزاء الجسم عن طريق الشريان الأورطي
خلاص

و الاذين اليمين جايلة 2 وريد اللي هما الأجوف العلوي و الأجوف السفلي
inferior vena cava & superior vena cave
إنفيريور فينا كيفا و سوبيريور فينا كيفا
إنفيريور يعني سفلي
و سوبيريور يعني علوي
و فينا يعني وريد
كيفا يعني أجوف
و الإنفيريور( السفلي) بيجيب دم من تحت يعني الرجلين و البطن
و السوبيريور ( العلوي) بيجيب دم من فوق يعني الايدين و الراس

طيب المهم

الاذين اليمين جايلة 2 وريد اللي هما الإنفيريور و السوبيريور فينا كيفا بيجيبوا دم غير مؤكسد من الجسم بينزل من الاذين للبطين ساعة الانبساط
و البطين الايمن يدفع الدم دة ساعة الانقباض
يودية في الشريان الرئوي
pulmonary artery بلموناري أرتري
و بلموناري يعني رئة
و أرتري يعني شريان

يودية للرئة عشان يحصله أكسدة
يعني الاذين الايمن ياخد الدم من ال الاجوف العلوي و السفلي يودية للبطين الايمين يطلعة على الشريان الرئوي
الشريان الرئوي هيودية للرئة

و طبعا الرئة هترجع الدم دة تاني للقلب عن طريق الاوردة الرئوية للاذين الشمال للبطين الشمال يدفعها للشريان الأورطي تلف في الجسم ترجع عن طريق الوريد الاجوف العلوي و السفلي للأذين اليمين ينزلها ساعة الانبساط للبطين اليمين اللي هيدفعها ساعة الانقباض في الشريان الرئوي للرئة
وتتكرر العملية

زي مااحنا شايفين في الرسمة المطولة على الشمال هنلاقي الدم بيخرج زي ما قولنا يروح لكذا منطقة في الجسم
حابه إني اكلمكم على كذا منطقة منهم
أول منطقة فوق اللي هيا المخ ( ملناش دعوة بيها دلوقتي )
و بعدين الرئة ( بيحصل فيها أكسدة للدم)
و بعدين الأمعاء و الكبد ( بيحصل فيهم إن الدم بيتملي بالجلوكوز و الدهون اللي كلها الانسان مع العلم إن الدم دة مش مؤكسد بس مليان بالخيرات الغذائية بيروح للقلب عن طريق الوريد الاجوف السفلي اللي هيوديه للرئة عشان يبقى الدم مؤكسد و كمان مليان خيرات عشان ينزل الدم من الرئة مليان اكسجين و جلوكوز يروح لباقي اجزاء الجسم لما ينزل للاذين الشمال منه للبطين الشمال عشان يضخة لكل الجسم
الكلي ( بيعدي عليها الدم عشان يتنقى من المخلفات بتاعت الخلايا )
و الرجلين

و دية رسمة متحركة توضح العك اللي قولته فوق
للأسف الرسمة فيها عيب خلقي ( ضيق في الصمام الرئوي) هنتغاضى عنه دلوقتي لإني نسيت انزل الرسمة التانية ولو نزلتها دلوقتي الموضوع هيبوظ ( كدة يا شلبي تفضحني علناً ) معلش يا دوك علينا المرة دي
المهم يعني

زي مانتوا شايفين ساعة انبساط القلب ( و هوه رفيع) بينزل الدم من فوق- الاذينين- لتحت
و لما بينقبض القلب بيمشي الدم من البطينين للشريان الأورطي و الشريان الرئوي
الاورطي هيودي الدم للجسم و الرئوي هيودي الدم للرئة

طيب
ملخص العك اللي فوق

إن ساعة انبساط القلب بينزل الدم اللي اتجمع في الأذينين.. الشمال ( دم مؤكسد من الرئة) و اليمين ( دم غير مؤكسد من الجسم) ينزلوا للبطينين
و ساعة الانقباض بتاعة القلب يندفع الدم اللي اتجمع فيه ساعه انبساطه... الشمال ( دم مؤكسد و مليء بالخيرات يروح للجسم كله ) و اليمين ( دم غير مؤكسد يروح للرئه)

طيب بعد ما فهمنا الدورة بتاعة الدم في الجسم

لازم نفهم فين الصمامات
و إيه حركة الصمامات

عشان لما صمام يبوظ نعرف إيه اللي هيحصل في القلب

الصمامات Valves
يعني إيه صمام أصلا
لو انتو في ميكانيكا و هندسة و الحركات دية هتعرفوا أكتر مني يعني إيه صمام
و لو إنتو زي حالاتي مش عارفين يعني إيه صمام اقولكوا وجهة نظري في الصمام

الصمام دة زي غطا الفتحة بتاعة الإزازة بتتفتح وتتقفل حسب اللي انا محتاجاة
وأهم حاجة
إنها لما تتقفل ميخرجش منها ولا نقطة مية او دم
ولما تتفتح تبقى واسعة عشان متعيقش الدم و ميتكعبلش وهوه ماشي من خلالها

طيب
يعني عرفنا إن الصمام دة هوه الغطا بتاع فوهة الازازة

طيب عندنا كام صمام؟؟؟

عندنا 4 صمامات

صمامات بين الاذين و البطين
و صمامات بين البطين و الشرايين اللي خارجة منه

كل صمام ليه شكل معين ربنا خلقه بيه عشان يتوائم مع وظيفته ( سبحان الله) و دة مش مجالنا في الشرح بس انا بفتح مجال للي حابب يبحث
المهم يعني
قولنا إن عندنا أربع صمامات

الصمام الميرترالي
ميترال فالف mitral valve
و دة موجود بين الأذين الشمال و البطين الشمال .. يعني موجود فين في الصورة؟؟ّّّ ( صح موجود في يمين الصورة )

الصمام ثلاثي الابواب
تراي كاسبت فالف tricuspid valve
ودة موجود بين الأذين اليمين و البطين اليمين

الصمام الأورطي
Aortic Valve أورطك فالف
ودة موجود بين البطين الشمال والشريان الأورطى

الصمام الرئوي
Pulmonary Valve بالموناري فالف
و دة موجود بين البطين اليمين و الشريان الرئوي

طيب
لازم نعرف ان الصمام متكون من إيه؟

متكون من اربع حاجات

دايرة اللي هياالاطار اللي محوط فتحة الازازة واسمها
ring حلقة
و باب بيقفل و يفتح اللي هوه الحتة اللي مغطية الفتحة و اسمها
cusp كاسب
و الفتحة بين الأبواب
commissure كومّيشر
و الاستك اللي بيربط الابواب بالأزازة عشان متقعش لما تفتح و تقفل و اسمها
chorda tendinae & papillary muscle
كوردا تنديني و بابيلاري ماصل و المصل يعني عضلة و الكوردا تنديني هيا الألياف اللي بتبقى في نهاية العضلة ( مش مجال شرح دلوقتي ) عامة هيا الاستك اللي بيربط عضلة القلب بفتحات الصمام

بعد ما عرفنا إن الصمام فيه حلقة و باب و فتحة و استك (عضلة) او
ring , cusp , commissure and papillary muscle
رنج ... كاسب ... كومّيشر و بابلري ماسل


سيبكوا من العك اللي فوق دة

بصوا كدة على الشمال ( الصورة للأسف برضو فيها عيب خلقي بس ملكوش دعوة بيه)

الصورة لقطاع طولي في القلب
بصو هتلاقوا بتاعة بيضا زي الغشاء كدة هوه دة الصمام
و الخيوط اللي نازلة منه هيا ال عضلات اللي قولتلكوا عليها
دول الصمام المترالي ( يمين الصورة ) اللي هوه بين الاذين الشمال و البطين الشمال و الصمام ثلاثي الابواب ( شمال الصورة ) بين الاذين اليمين و البطين اليمين.






طيب لو قطعنا القلب زي البرتقانة بتاعة العصير قطاع عرضي هنشوف منظر الصمام كدهو
واضح قدامنا الاربع صمامات فوق خالص البالموناري ( الرئوي ) و الأورطي
اللي هما الدايرة البنفسجي ( بالمونري) و الدايرة الحمرا( الاورطي)

و تحت هنلاقي أبو تلات أبواب ( تراي كاسبد ) و ابو بابين ( الميترالي)
اللي هما الدايرتين اللي جمب بعض البيض دول
و هنلاقي المترالي يمن الصورة و التراي كاسبد شمال الصورة


طيب


إيه بقة الامراض اللي بتصييب الصمامات؟؟؟؟؟؟

لااااااااااا
قبل ما تعرفوا إيه هيا لاامراض دية لازم اشلكوا قصدي لازم افهمكوا الصمامات بتفتح امتي و بتقفل امتى
ماهو كل حاجة محسوبة في القلب و في كل الجسم و في الكون ( سبحان الله)

طيب
قولنا إن الصمام الاورطي و الصمام الرئوي ( بالمونري) بيعدي الدم من البطين فيهم عشان يروح الجسم أو الرئة بالترتيب.... إمتى؟؟؟
ساعة انقباض القلب
يعني مفروض يبقوا مفتوحين إمتى؟؟؟
ساعة إنقباض القلب
زي ما هوه واضح في الرسمة المتحركة لما القلب بينقبض بيتفتح الصمام الاورطي و الرئوي اللي هما على فتحة الشريان الاورطي و الرئوي في نص الرسمة بتاعة القلب

طيب
قولنا كمان إن الصمام الميترالي ( بتاع الاذين الشمال) و الصمام ثلاثي الابواب ( التراي كاسبد) ( بتاع الاذين الايمين) بينزل منهم الدم من الاذين للبطين.... إمتى؟؟؟
ساعة انبساط القلب أو الدايستول
يعني مفتوحين امتى؟؟؟
ساعة انبساط القلب
زي ما هوه واضح في الرسمة المتحركة على الشمال لما القلب بينقبض الخطين الحُمر اللي بيمثلوا الصمام الميترالي و ثلاثي الابواب بيتقفلوا ساعة انقباض القلب ( لما بيبقي الجدار بتاعة سميك) و لصمام الميترالي و ثلاثي الابواب هما اللي على الطرف في الرسمة

طيب إيه هيا بقة الامراض اللي بتصيب الصمامات:

الأمراض دية يا إما عضوية أو وظيفية
Organic or functional
أورجانك أو فانكشنل

هتكلم أنا عن العضوية و اللي عايز يبحث أكتر ممكن يدور عن الوظيفيه

طيب يا ستي كلمينا عن العضوية

تخيلوا معايا إن الصمام دة زي باب قاعة مؤتمر أبو ضرفتين

لو الضرفتين إتفتحوا تماما - في الوقت المظبوط- الناس هتعدي منه و هيا مستريحة و بنظام لإن دة معاد الخروج
طيب لو فتحنا ضرفة واحدة بس؟؟
الناس هتتزحم على الباب و هتزق في بعض

طيب لو اتفتح الباب في غير معاد فتح القاعة يعني فضل مفتوح عمال على بطال؟؟
الناس هتدخل و تخرج وقت ما هيا عايزة و الراجل اللي بيشرح في القاعة مش هيعرف يقوم بوظيفته
و احتمال كمان ناس كتير تدخل القاعة اكتر من مساحتها و دة يبقى عبء على القاعة

يعني إيه يا حجة؟؟
اقصد يا دوكتورة

يعني مثلا و لنفرض الصمام الاورطي مثلا

الطبيعي بتاعة إنه يفتح ساعة انقباض البطين الشمال عشان يضخ فيه الدم
و يقفل باحكام ساعة انبساط القلب عشان الدم ميرجعش منه و يكمل طريقة تمام.
طيب لو الصمام دة كان زي ما قولنا فوق باب منه مقفول يعني يبقى ضيق إيه اللي يحصل... يحصل ضيق الصمام زي الرسمة اللي على اليمين أو
stenosis ستينوزس
طيب إيه اللي يحصل يعني لما يحصل ستينوزس دة؟؟؟

تخيل معايا كدة
القلب بينقبض جامد بعزم ما فيه عشان يضخ الدم لكل الجسم و لما انقبض جامد لقى الصمام الاورطي مقفول ؟!!!
يلهوي ... تخيل إنك جيت بتشوط الكورة مثلا بعزم ما فيك قمت لاقيت الكورة حديد او قلبت حيطة؟؟!!!
صدمة طبعا بالنسبة للقلب
و طبعاً القلب في الاول مش هيستسلم و هيفضل يقوي في عضلته و يتضخم عشان يقاوم الضيق دة و يخرج الدم منه
بس بعد فترة مش هيقدر
و هيحصل فشل في القلب
heart failure هارت فالير و فاليور يعني فشل

طيب
لو الصمام دة مفتوح عمال على بطال؟؟؟
incompetence or regurgitation
انكومبيتنس او ريجرجيتيشن ( الجيم التانية متعطشة)

يعني مثلا مفتوح ساعة انبساط القلب؟؟؟
ساعة انبساط القلب قولنا إن الدم فيها بينزل من الاذين للبطين عشان البطين يستعد إنه يضخ الدم دة للجسم
طيب الصمام الاورطي كمان مفتوح
الدم هيجي من الاذين الشمال و ينزل البطين ولكنن
الاورطي كمان هيرجع منه دم للقلب ساعة الانبساط
زي بالظبط القاعة اللي الباب فيها مفتوح عمال على بطال الناس هتدخل فيها من غير حساب ولا تحكم.
او إنك مثلا مليت بلونة الماية بمية زيادة
القلب في الاول هيحاول يوسع نفسه عشان يقدر يستوعب الكم دة
بس من كتر ما بيوسع نفسة بيوصل لدرجة إنه خلاص مش قادر يوسع تاني
و يحصل
فشل في القلب
او فشل في وظيفة القلب
heart failure هارت فاليور

دة اللي هيحصل في القلب
طيب اللي هيحصل في الجسم إيه؟؟؟؟؟؟؟؟؟؟

دة اللي هتعرفة في الحلكات القادمة

اتمنى تكونوا استفادتوا
و نلتكي في الحلكات القادمة باذن الله مع توضيح اثر ضيق و وسع الصمامت
و الكونجينيتال هارت ديزيز

اعتقد والله أعلم إني هعمل الحلكات دية بعد فترة طويلة يمكن شهور لإن الحلكات بتاخد وقت طويل جداً عقبال ما بتتعمل
و الوضع غير مستقر
دعواتكم

متنسوش تصوتوا إذا كانت البتاعة مفيدة ولا مفهمتوش منها حاجة في مكان التصويت الصحيح
مش تبع الموضوع الاول ( قلبي بيوجعني يا دكتور 1)
ولكن تبع الموضوع التاني ( قلبي لسة بيوجعني يا دكتور 2)


كانت معكم
دكتورة نعكوشة
من وراء الكورسي
في العيادة المنعكشة

......................
الالفاظ اللاتينية
inflammed pericardium: يعني الغشاء المحيط بالقلب ملتهب
coronary artery : الشريان التاجي
cardiac cycle: دورة القلب
cardiovascular circulation : دورة الدم في الجسم
inferior vena cava : الوريد الاجوف السفلي
superior vena cava: الوريد الاجوف العلوي
pulmonary artery : الوريد الرئوي
valve :صمام
cusp : بوابة الصمام
commissure : الفتحة بين بوابات الصمام
ring :الحلقة المحيطة بالصمام
papillary muscle : العضلة المتصلة بالصمام و تربطه بالقلب
mitral valve : الصمام الميترالي .. بين الاذين لاشمال و البطين الشمال
tricuspid valve : الصمام ثلاثي الابواب بين الاذين اليمين و البطين اليمين
pulmonary valve : الصمام الرئوي .. بين البطين اليمين و الشريان الرئوي
aortic valve : الصمام الاورطي .. بين البطين لاشمال و الشريان لااورطي
stenosis : ضيق
incompetence : بينفد منه
regurgitation : ارتجاع

.......................
لو فيه معلومات غير صحيحة دة عيب مني اكيد لإني لسة طالبة و مش دكتورة و الكمال لله وحده


كتب الحلكة نعكشة
حكوك الطبع وا لنشل محفوسة لنعكوشة


قبل ما تقروا موضوع حلقة انهاردة لازم تكونوا قريتوا الموضوع الأول قلبي بيوجعني يا دكتور 1 عشان فيه كلام مبسط و الموضوع التاني كلامه صعب شوية
و قد اعذر من انذر
روحوا اقروا الموضوع الاول يلا