نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

Le manteau rouge


painted by A. T. Whim
اليوم- وبعد جدال نفسي طويل - سولت لي نفسي أن أرتدي معطفاً أحمراً
شعور بالخجل اعتراني مسح على خدي بفرشاة الخجل حمرة 
وألجم لساني - زيادة - أكثر من تلعثمهِ ليمنعني من اكمال جملة واحدة مفيدة
نادتني صديقتي اليوم بذات الرداء الاحمر
.........
محدش يعتقد اني مبلبسش أحمر 
بس فكرة إني البس  مونتو احمر - ساطع-  طويل
فدة امر  معمريش عملته قبل كدة
واعتقد اني مش هعمله تاني
هيا مرة من نفسي عشان المونتو صعب عليا
..........
آه صحيح رغم الريجيم اللي كنت عاملاة روحت سـبـارو وكلت بيتزا
وزاكرت هناك نسا 
.........
آه صحيح برضو دكتور النسا اللي بيشرحلنا - رغم التجاوزات  المنطقية  المربكة - بجد حسسني إني بحب الطب
انا اصلاً كنت داخلة طب عشان بحبه
كرهته على مدار ال 5 سنوات المنسحقة 
وبدأت أحبه مرة أخرى السنة دي
.........
أنا بحب الأسود قوي
قوي بجد
.........
آه صحيح ربما سأكون مقلة (شحيحة يعني ) - سواء في التعليقات عند الناس ( رغم اني بتابع المدونات ) أو في المدونة هنا - أو لا في الفترة القادمة 
عشان أنا فعلاً جسدي أصبح لا يستطيع تحمل ما أفعله به - حاسة إن جسمي عجز - دة غير  إن عندي حساسية  مدمرة صدري
فبرجع مهدودة و بنام إلا في بعض الايام بقرا فيها المدونات و بعك شوية عالنت
الحق يقال : مليش مزاج اعلق عند حد
ولا حتى هنا
.......
كنت عاوزة اقول إيه تاني؟؟؟؟؟
آه .. أنا بحب أبقى في الشارع قوي 
لما ببقى في الشارع بقى فرحانة وخصوصاً لو لوحدي
.......
انا اكتشفت فيا حاجة .. ممكن نقول مبحسش
يعني لو حد داس على رجلي مش بتضايق
ولما خبطتني عربية مزعقتش للراجل
ولو واحدة زقتني مبدقش
بس انا فعلاً كتير بتنرفز وخصوصاً على أهل بيتي
دي مشكلة فوزيعة
..........
مش عارفة أظبط مواعييد الدروس 
وخصوصاً دروس الجراحة
( وش مقروف ومخنوق من نفسه )
.......
عاوزة اعمل نظارة جديدة 
وعاوزة اشتري موبايل جديد
وعوزة اشتري بطارية اورجنال للموبايل القديم
..........
فيه شوية دكاترة بيدخلولنا في الجراحة ربنا يباركلهم بجد
عندي مشكلة بقة صحيح
دلوقتي المحاضرات الصبح من 8-9
وبعدين الراوند9-12 ومن 12-2
ومواعييد الدروس متداخلة مع المحاضرات
وانا عاوزة احضر المحاضرات 
اصل بقالي 3 سنين محضرتش محاضرات
فنفسي احضر محاضرات قبل ما اتخرج بقة
ودكتور سيد رشاد عامل مواعيدة من 7-8 الصبح كل يوم
يعني  الوضع سيسوء
فات اهوه  اسبوعين و نص وانا مش عارفة أتأقلم عالوضع الجديد
سواء جسمانياً او مواعيدياً
مش عارفة
ربنا ييسر
.......
آه صحيح 
ربنا يعينك و يفتح عليك و يوفقك ويباركلك في الامتحانات
ويوفق كل حد بيمتحن 
ويباركله ويعينه
.....
كنت عاوزة اقول إيه تاني
آه
زوري بيحرق
وصدري اكن فيه حاجات بتنغبش جواه
و مناخيري مصرصرة بترشح يعني
و دماغي مصدعة
وعنيا مبقلظة وحاسة انها هتقع
.......
ترايدنت نزل أخيراً في مصر بالبطيخ
أصل كان البطيخ دة مش موجود إلا في أمريكا
ولود اللذينا خلوه ب 2 جنية بدل جنية و نص
و الكانز البيبسي ب اتنين و ربع وفي الكلية باتنين ونص
..........
أنا بحب أركب الميكروباس الصبح أو الظهر
وبليل الميني باص
ولو بليل قوي  ساعات بتطق في دماغي أركب الاتوبيس العام دة اللي بيلف حواليين نفسه عقبال ما يوصل للهدف المنشود
.........
البنت مها صاحبة مدونة ملامح قالتلي على الاتوبيس النهري أبو نص جنية دة
نفسي اجربه
بس فعلاً مش لاقية وقت
السنة دي
بجد
بجد
busy
 المصيبة إيه بقة
إن كان كل ما حد يقولي طب زحمة و مرهقة ومتعبة و مفيش وقت وبتلاقي وقت  امتى ترسمي وتكتبي وبتاع
اقوله دة طب دية
مليانة وقت فراغ بالهبل
تقريبا قريت
وحسدت
واديتني عين
انما اية
مظبطاني
........
واحد زُمُل عندنا في الدفعة عرض موضوع كدة بس متعمقتش فيه اني اتعلم رسم بالالوان
وابيع.... مش عارفة ازاي!!! ـ
بس  متعمقتش في الموضوع


واحد  برضو ربنا يباركله  عرض عيا إني ارسم بهدف
أو ارسم شئ ايجابي
وانا وافقت  رغم اني مبعرفش ارسم لهدف او بهدف
لا لشئ إلا لإني  عاوزة اتحدى قدراتي 
حلوة اتحدى قدراتي دية
بتحسسك بالثقة وبتاع
المهم يعني
من ساعة ما قاللي عالموضوع
وانا مش لاقية وقت اعمل حاجة
برجع اقعد متنحة عالجهاز
واتدلق وانام من كتر الانهاك


آه صحيح  عاوزة اتصل بالأخ الاكبر لأسرة فكرة بقة عشان اعرض اللوح في المعرض السنوي تبع الكلية
عععععع بقالي اسبوع معايا نمرته ومتصلتش
.............
بس بقة لو جة في دوماغي فكرة جديدة هقولها
........
محدش ينتظر مني تعليق كرد إلا لو سئل سؤال
او محتاج توضيح لأمر ما
فوتكوا بعافية
سلامٌ عليكم
........
the pic is painted by A. T. Whim

22 قالوا رأيهم في العك اللي تحت ؟؟؟:

و الله يا نعكوشتى انا حاسه انى تهت
بس انا اؤيدك فى ارتفاع سعر الكانز اللى من غير مناسبه
خصوصا للمدمنين اللى زيى
و سلامتك يا جميله من الحساسيه و الرشح
اه كنت حانسى
انبسطت قوى اما كلمتك يوم التجمع
ربنا معاكى و موفقه ان شاء الله

 

انا مش هعلق غير بكلمتين

وحشتينى


و ربنا يعينك

 

ياةةةةة بئالى مثلا من تانية ابتدائى مسمعتش كلمة مونتو .....بتفكرنى بأيام المدرسة
الف سلامة عليكى
انا رأى انك ترسمى وبس ترسمى من أجل الهواية ...حتبقى أحلى ....انا مش مصدق انى اتجوزت loool
salut

 

هههههههههههه
والله ربنا يعينك وسلامتك يا حبيبتى
والله معك بقى
خلى بالك منك
وحشتينى يبنتى والله

 

مساؤك سعيد يا نعكوشة


سلامتك من البرد


سلام لكِ

 

ايه النعكشه دي كلها
(:
طب ارد على ايه ولا ايه
عندي امتحان بكرة
(:
ولو قعدت ارد هسقط
يرضيكي (:!!
تحيتي

 

الاتوبيس النهري

سبق ان ركبته في زيارتي الاخيره لمصر

بصراحه حلو وعجبني

بس لو ركبتي لوحدك بتحسي انك مخالفه

لان كل اللي فيه اثنين اثنين

لووووووووووول

 

ربنا يوفقك يا نعكشه

ويبارك في وقتك

ويسعدك دوما

يارب

دعواتك :)

 

انت تعرفي ان في الولايات المتحدة جملة ذات الرداء الاحمر دي تعتبر شتيمة
لان ذات الرداء الاحمر هي المرأة اللي خانت جون دلينجر رجل العصابات الاشهر في امريكا بعد الكابون وتسببت في قتله

المهم الف سلامة عليكي

 

نعكشه
سلامتك الف سلامه
ربنا معاكى ويوفقك
وبعدين انا بعشق الاسود ونفسى اجرب البس احمر بس عومرى عومرى ماهاعملها
هههههههههههههههههههه

 

المدونة دى بقالى كتيييييييييييير ما دخهلتهاش
هلف لفة بقى كدا فى جنابتها دا لو يا دكتورة مافيش مانع يعنى
انا رجعت ادون تانى على فكرة

 

نداء الى نعكشة

افتحى الموبايل الله يباركلك

 

مزمازيل نعكشه
بغض النظر عن روشتهالسواد اللي كاتباها عن صفاتك الشخصيه
و بغض النظر عن السوبر ماركت اللي في فتحاه في اهتماماتك احب اواجهك بالحقيقه الميمرمره إنتي السبب يا نعكشه إنتي السبب اني اتهبب واعرف يعني ايه تدوين انا كنت قاعد لا بيا ولا عليا جالي هاجس اني ادور عن تعليقات عن مسرحية قهوة ساده وفضلت أدور و أدور ,,, و أدور ,,, و بلاش كفايه كده لحد ما اتكعبلت فيكي وقريت كلامك البسيط جدا جدا جدا عن سفريتك الميمنونه وترحالك للمسرحيه وعنها والحاره اتقلبت اقصد دماغي قالت اشمعني انا فبجلالة قدري عملت مدونة لاء اتنين لاء لاء خمسه عشان الحسد المهم يعني عشان مبداء رد الجميل مع اني مش عارف ادعيلك واللي ادعي لك عموما انا اتعرض عليا عروض كتير من مونات كتير انها تيجي تشرف فنجان قهوة ساده عندي بس انا اللي مطنش بس دي دعوه خاصه متعطره بماء المخلل عشان تيجي تشرفيني في مدونتي اه ما اصل انا بقيت صاحب ملك هتلاقي عندك وحده اسمها خماسياتي وانتي داخله علي ايدك اليمين وتاني حاره هتلاقي شخابيط فجر صحيح نسيت اقولك انك حد عميق جدا يااااه كل ده انا كتبته سلام بئي دنتي رغايه

 

مزمازيل نعكشه
بغض النظر عن روشتهالسواد اللي كاتباها عن صفاتك الشخصيه
و بغض النظر عن السوبر ماركت اللي في فتحاه في اهتماماتك احب اواجهك بالحقيقه الميمرمره إنتي السبب يا نعكشه إنتي السبب اني اتهبب واعرف يعني ايه تدوين انا كنت قاعد لا بيا ولا عليا جالي هاجس اني ادور عن تعليقات عن مسرحية قهوة ساده وفضلت أدور و أدور ,,, و أدور ,,, و بلاش كفايه كده لحد ما اتكعبلت فيكي وقريت كلامك البسيط جدا جدا جدا عن سفريتك الميمنونه وترحالك للمسرحيه وعنها والحاره اتقلبت اقصد دماغي قالت اشمعني انا فبجلالة قدري عملت مدونة لاء اتنين لاء لاء خمسه عشان الحسد

 

مزمازيل نعكشه
بغض النظر عن روشتهالسواد اللي كاتباها عن صفاتك الشخصيه
و بغض النظر عن السوبر ماركت اللي في فتحاه في اهتماماتك احب اواجهك بالحقيقه الميمرمره إنتي السبب يا نعكشه إنتي السبب اني اتهبب واعرف يعني ايه تدوين انا كنت قاعد لا بيا ولا عليا جالي هاجس اني ادور عن تعليقات عن مسرحية قهوة ساده وفضلت أدور و أدور ,,, و أدور ,,, و بلاش كفايه كده لحد ما اتكعبلت فيكي وقريت كلامك البسيط جدا جدا جدا عن سفريتك الميمنونه وترحالك للمسرحيه

 

وعنها والحاره اتقلبت والخالة زكيه ريحتها اتكشفت اقصد دماغي اتشقلبت كده اهوه و قالت اشمعني انا فبجلالة قدري عملت مدونة لاء اتنين لاء لاء خمسه عشان الحسد
المهم يعني عشان مبداء رد الجميل مع اني مش عارف ادعيلك واللي ادعي لك عموما انا اتعرض عليا عروض كتير من مونات كتير انها تيجي تشرف فنجان قهوة ساده عندي بس انا اللي مطنش بس دي دعوه خاصه متعطره بماء المخلل عشان تيجي تشرفيني في مدونتي اه ما اصل انا بقيت صاحب ملك هتلاقي عندك وحده اسمها خماسياتي وانتي داخله علي ايدك اليمين وتاني حاره هتلاقي شخابيط فجر صحيح نسيت اقولك انك حد عميق جدا يااااه كل ده انا كتبته
سلام بئي كفايه رغي صدعنا

 

ههههههههههه
لسه واخد بالي
يا عيني زمانك اتهريتي اعادة للكلام
ههههههههههههه
طب وحده جكمان عشان المزز
ههههههه

 

مزمازيل نعكشه
بغض النظر عن روشتهالسواد اللي كاتباها عن صفاتك الشخصيه
و بغض النظر عن السوبر ماركت اللي في فتحاه في اهتماماتك احب اواجهك بالحقيقه الميمرمره إنتي السبب يا نعكشه إنتي السبب اني اتهبب واعرف يعني ايه تدوين انا كنت قاعد لا بيا ولا عليا جالي هاجس اني ادور عن تعليقات عن مسرحية قهوة ساده وفضلت أدور و أدور ,,, و أدور ,,, و بلاش كفايه كده لحد ما اتكعبلت فيكي وقريت كلامك البسيط جدا جدا جدا عن سفريتك الميمنونه وترحالك للمسرحيه
وعنها والحاره اتقلبت والخالة زكيه ريحتها اتكشفت اقصد دماغي اتشقلبت كده اهوه و قالت اشمعني انا فبجلالة قدري عملت مدونة لاء اتنين لاء لاء خمسه عشان الحسد
المهم يعني عشان مبداء رد الجميل مع اني مش عارف ادعيلك واللي ادعي لك عموما انا اتعرض عليا عروض كتير من مونات كتير انها تيجي تشرف فنجان قهوة ساده عندي بس انا اللي مطنش بس دي دعوه خاصه متعطره بماء المخلل عشان تيجي تشرفيني في مدونتي اه ما اصل انا بقيت صاحب ملك هتلاقي عندك وحده اسمها خماسياتي وانتي داخله علي ايدك اليمين وتاني حاره هتلاقي شخابيط فجر صحيح نسيت اقولك انك حد عميق جدا يااااه كل ده انا كتبته
سلام بئي كفايه رغي صدعنا

 

حلو المونتو ده

بيبقى ليه موود خاص

معتقدش عملوا للولاد منه

بس انا بصبغ هدومى بعد اى عملية تخلص من اى ضحية بهذا اللون الممتع

رجعتينى لايام زمان

اييييييييييه

دنيا

 

انا جاى اسلم بس


تحياتى

 

ربنا معاكى فى الكليه وفى القلق اللى انتى فيه ده ويعينك
والف سلامه عليكى من الرشح