نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

كلام ملهوش ملامح


مِلَحْوَظَة ( بكسر الميم و فتح اللام و تسكين الحاء و فتح الواو و الظاء) ـ
مفيش اي فائدة ستعود عليك ايها القارئ من قراءة هذا البوست
مجرد مشاعر بائسة
ادعيلي و خلاص
انا بريئة من اي حد يقرا و يرجع يقول يا ريتني ما قريت
......................

امبارح فضلت اعيط لحد ما دماغي اتفرتكت و ظهري وجعني قوي
هوه الغريب اني انسى سنين بعد اقل من  شهور ولا اني كل م افتكر اعيط اكن كان لسة امبارح
طب الغريب اني مبقاش قادرة اسامحني ولا اني اسامحني بقة لإني مش هقدر أغير حاجة في اللي حصل

احساس ان حد ظلم حد وحش قوي
بشع
بيجيب صداع
و ينزل دموع لحد ما تحس ان عينك  مبتعملش اي حاجة غير انها بتحرقك
كنت بقولي اني الدموع بتطهرني
بس ولا بتطهر ولا بطيخ

امبارح مكنتش طايقة اشوف وشي في المراية
كل اما ابص فيها بقي يرتعش و ابدأ اعيط من جديد

سبحان الله
زمان كنت بليل قوي ببذل جهد  اني اكتم الضحكة لحسن حد يسمعني
بقالي كتير قوي ببذل جهد اكتم صوت بكايا لحسن حد يسمعني

.......

اختي سألتني امبارح قاعدة في الصالة لوحدك ليه في الضلمة
ابتسمت
قالتلي رغم ابتسامة بقك إلا ان وشك شكله حزين
عيني الشمال اللي ناحية الكنبة دمعت
ضحكت و قولتلها  مش فاكرة قولتلها اية
..........

خدت ابن اختي و شيلته و روحت بيه الصالة
مقدرتش اقعد بيه عالكرسي
ولا أفرجة على العربيات من البلكونة
نزلت دموعي و خوفت حد يشوفها
ومسحتها و اديتهولها تاني

..........
نمت في الصالة من غير بطانية رغم ان ظهري كان واجعني
كنت عاوزة اعذب نفسي بدنياً يمكن الألم النفسي يخف
مستحملتش و قبل الفجر بحبة كدة نمت تحت البطانية
...........

صاحية الصبح دماغي بتنقح عليا و لما جيت اصحي اختي عشان تصلي قبل الشروق  مقدرتش اتكلم
كنت هنزل اتمشى و مازال الاحتمال قائم بس  قفا رجلي متعور
.........

أنا مش قادرة انبسط
كل ما اقرر اني هنبسط بقلب تاني
فيه رحلة طالعة لسيوة
كان نفسي اطلعها عشان ابقى في الصحرا
بس الرد عليا كان : سيوة مفيهاش حاجة هتروحي تعملي اية؟؟
آه صحيح هروح اعمل اية
ههههههه
كنت عاوزة اروح اسكندرية في الشتا
بس كان الرد عليا : اسكندرية بتبقى ساقعة في الشتا و ممكن تمطر
آه صحيح ممكن تمطر مينفعش اروح
كان نفسي اروح لقرايبي في البلد.. مش عشان  الحب متأجج بينا ولا حاجة بس كنت نفسي عمل اي حاجة مختلفة
وكنت عاوزة اعمل حاجة معينة كدة في بالي
وكان الرد عليا : مش انتي مكونتيش طايقة تروحي الفرح و اتحايلنا عليكي عشان تروحي
آه صحيح انا فعلاً مش عاوزة اروح

اخويا بطريقة عفوية قالي : طب ماتتجوزي عشان جوزك يفسحك !!! ـ
سألته هوه انت لاقي وقت تفسح زوجتك؟؟ قالي لأ
بس أنا استغرابي مش ان الازواج بيفسحوا زوجاتهم أو لأ
انا استغربي هما ليه عاوزيني اعتمد على حد عشان يفسحني او يفرحني
ليه لازم ابقة معتمدة على غيري عشان انبسط!!!  انا بعرف اتعامل
انا بعرف ابسطني
انا بعرف افسحني
انا مش محتاجة جوز عشان يفسحني
انا محتاجة نفسي و بس
عامة انا مش لاقياها
.........
هوه أنا ليه كائن مقزز قوي كدة
مليانة ذنوب ببشاعة
قعدت مع نفسي اكتب مميزاتي و عيوبي
ملاقتش  اي ميزة

انا لية دايماً بسبب الألم للي حواليا
............

الغريب كان اني ءأذي الناس اللي بتعاملني كويس و اظلمهم معايا
مش اني ابكي دلوقتي على اللي عملتهولهم

...........

سامحني يا رب
وخليني اقدر اسامح نفسي
لإني مش هقدر اطل من اللي اذيتهم يسامحوني

سلام عليكم

4 قالوا رأيهم في العك اللي تحت ؟؟؟:

بالعكس كلامك دة لية ملامح قوية وهايريحك, بس انتى لية مترددة وبتسمعى للناس حتى لو اهلك مدام شىء انتى عايزاة ومحتجاة ومش غلط اعملية وهاتلاقى فى اللى يخرجك من اى شىء, على فكرة الاسكندرية متعة جداااا حتى لو بتمطر, تحياتى

 

النس دول هما أهلى
يعني مينفعش عمل حاجة من غير ما يرضو
ماهو انا لو اعرف عمله او اعرف اقنعهم كنت عملتها

عارفة ان اسكندرية حلوة في الشتا
ونفسي اصلا لو رحت هناك تمطر عليا
بس لا يمكنني للأسف

وعارفة اني لو روحت سيوة في الصحرا هرتاح


الفكرة اني بنت
وغلط ان البنت تعمل اي حاجة لوحدها
هذا ما قيل لي
......

بالنسبة للكلام
مريحنيش
لازال الصداع قائم
ولازالت الدموع تتسرب من عيني لتحرق وجنتي
ولازلت لم اسامح نفسي
حتى وانا بضحك

.........

تسلم

سلامٌ عليك

 

سلام عليكي يا نعكشة
"هوه أنا ليه كائن مقزز قوي كدة"
ليه يا حببتي تقولي علي نفسك كده
لما حد يبقي تعبان زي تعبك انا فاهمة الدرجة اللي بتوصلي نفسك ليها
باختصار و عن تجربة اني كارهه نفسك
مفهوم ده لكن المشكلة لما بتكرههي نفسك انك بتعذبيها
انتي كنتي تحت ظلم "علي حسب كلامك" بس مش الغلطان في النقطة دي انتي بس .. اكيد فيه طرف تاني شترك بالظلم .. و اي كان مين الظالم و المظلوم فالنتيجة هي التعب اللي انتي عايشة فيه
..
انا مش معاكي في نقطة ان العياط مش بيريح
العياط يا نعكشة بيهدي اللي جوانا .. اه هو مش حل بس علي الالقل بتقدري تخرجي طاقة جواكي لو مطلعتش هتحسي انك مخنوقه اكتر ..
..
عارفة .. ساعات بنتظلم و نزعل و ننكسر و بيكون كل ده تهيئ من ربنا لمرحلة في حياتنا احنا مش هننجح فيها الا لو كنا اتبنينا صح من الظروف اللي زمان حصلت لينا .. يمكن تقري كلامي و تقولي عليه اهو كلام .. بس بجد بعد فترة هتلاقي انه صح .. لما كن بيتقالي كنت بقول .. " محدش حاسس و لا فاهم حاجة " بس بعد كده لاقيت ان جزء كبير منه صح
..
يا رب يريح قلبك يا نعكشة ..
يا رب
سلام
مها

 

عليكِ السلام يا مها

عشان هي الحقيقة حتى لو مغطية نفسي بمليون شكل برئ

ممكن اكون فعلاً كارهاها رغم اني بحبها
وعشان بحبها فانا قرفانة منها

هوه انا اللي كنت الطرف الظالم

هيا النتجة واحدة فعلا البكا مش هيفيد ولا هيرجع حاجة
و بيضيع الوقت و الجهد
بس يعني اهو
الواحد بيحاول يتماسك

بالعكس بحس العياط بيخنقني زيادة

دة لما بنتظلم عشان بنبقى مفيش علينا حاجة لحد
بالعكس احنا اللي لينا
بس لما يكون الواحد ظالم
شعور مختلف
مقرف قوي

للهم آمين

تسلمي

عليكِ السلام