نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

خليك شوية ( تحليل لطلب افتراضي) ـ





بم اني قاعدة فاضية فأنا عملت تحليل  لحالة ان يطلب احد من آخرشئ استناداً على العشم
هو تحليل نعكوشي لطلب افترضي ألا و هو خليك شوية!! ـ
محلوظة جانبية .. اللي عاوز يقرا يكون مركز و مصحصح و اللي مش عاوز عادي يعني هوه الموضوع مش هيضيف
نبدأ بقة
الطلب هوه خليك شوية   
هل لما الطالب يطلب من المطلوب منه هذا الطلب هينفذه؟؟
وهل أصلاً الطالب هيطلب الطلب؟؟
وقد إيه ممكن تطول الشوية؟؟


بالنسبة للطالب : احتمال ميطلبش الطلب .. إما خوفاً من إن المطلوب منه مينفذوش فتهتز الصورة الجميلة من العلاقة العشمية جاية من العشم - اللي كونها و تنجرح مشاعره  
أو لإنه عارف أصلاً إن المطلوب منه مش هينفذ الطلب فمش عاوز يحرج نفسه


وهنا المطلوب منه : الارجح إنه مش هيعرف إن الطالب عاوز الطلب - انه يخليه شوية - فهيمشي و مش هينفذ الطلب .. وكدة خلاص فركش
و احتمال يشعر بطلبه من غير ما يطلبه و هنا فيه احتمالين  الأول إنه ينفذ الطلب مستنداً على شعورة و هيلاقي اي حجة عشان يخليه شوية  و هنا محتاجين نعرف هيقعد شوية قد اية
الثاني إنه هيخاف لحسن شعوره يكون خطأ رغم إنه حاسس إن اللي قدامة نفسه يقوله خليه شوية  فمش هينفذ الطلب و هنا هيبقى فركش


و احتمال يطلب الطالب الطلب
و  هنا  المطلوب منه: احتمال ينفذ الطلب .. و يبقى ناقص بس نعرف هيخليه شوية قد اية
واحتمال يرفض تنفيذه.. إما  بوضع مبررات للرفض
او بدون مبررات


الطالب هنا بقة ممكن  يكون شعوره أحد الاحتمالات الجاية : في حالة الموافقة  خلاص  قشدة هيشعر بالامتنان وإن عشمه كان في محلة و يزداد توثق العلاقة


و في حالة الرفض هناك احتمالات :الاولى في حالة عدم وجود مبررات فلو كان راسم الصورة العشمية دية اللي اشرت ليها فوق نابعة من العشم  إما إنه يحس بالانكسار و بكدة الصورة العشمية هتتشوه سواء مع هذا الشخص او مع الاخرين
أو انه يحس إنه اتعلم حاجة و برضو الصورة العشمية  بينه و بين هذا الشخص فقط هيا اللي هتتشوه إنما العشم في آخرين قد لايزال موجود


ممكن بقة ميكونش لسة رسم الصورة العشمية دية و يكون طلبه هذا و ليكن - خليك شوية - مجرد سؤال اختباري هيعتمد عليه في بداية رسمه للصورة العشمية 
وهنا الطالب بيكون متوقع نسبة للنجاح  و نسبة للفشل  و سيرتاح للنتيجة في كلتا الحالتين لإنه  بيحب  الاشياء تكون  على اسس في حياته. ولكن قد تكون هناك مشكلة  ساذكرها بعد قليل 


أما في  حالة وجود مبررات للرفض من قبل المطلوب منه فهناك ثلاث احتمالات: الاحتمال الاول  هو انه الطالب يصدق  هذه المبررات - بدون تحليل - و دة غالباً هيكون  شبة الشخص اللي رسم الصورة العشمية و مش عاوز انها تتشوه او تتكسر


الاحتمال الثاني  هو إنه يكذب المبررات دية او ان التبريرات ديه لا تعني اي شئ و تفكيره كله هينصب على رفض الطلب و بكدة يكسر الصورة العشمية و يدور على شخص آخر غيره


أما الاحتمال الثالث  فهو أن يقوم الطالب بتحليل المبررات و يصنفها هل  كانت حقاً ضرورة قصوى وملحة هي التي منعته من اجابة الطلب ومن ثم سيلتمس له العذر و لكن ستصاحبة الريبة في حالة توجية طلب آخر له و هيكون حاطط خلفية مسبقة انه ممكن المطلوب منه يرفضطلب آخر و يحط مبررات
أو يجدها مجرد مبررات واهية و بهذا سيزيل  الصورة العشمية  للمطلوب منه إن كان قد وضعها أو لن يرسمها من الاصل إن كان السؤال اختباري


تبقى هنا عدة احتمالات :  إن المطلوب منه قد ينفذ الطلب  ليس بحب أن ينفذ الطلب - خليك شوي -و لكن لأن هناك مصلحة ليه عند الطالب  
او خشية أن يؤذي مشاعر الطالب


وهنا نتذكر ذلك الطالب الذي قد طلب الطلب كسؤال اختباري   فهنا ستتأثر افتراضاته 


و ربما أيضاً المطلوب منه لا ينفذ الطلب خشية أن يتقرب من الاخرين رغم حبه لهم 


المهم


لو منفذش الطلب كان بها 
أما بقة في حالة تنفيذ الطلب - خليك شوية- السؤال هنا


هيخليه شوية قد إيه؟؟؟
إما إلى أن يستكفي الطالب
أو أن يمل
و إما  أن يتعب المطلوب منه
أو أن يمل


أو تحصل ظروف تنهيها زي الموت أو أي شئ عَرَضي


حد هنا ممكن يطلعلي حد و يقولي طيب لو مستكفاش الطالب و متعبش المطلوب منه
هقوله بكل بساطة مفيش شئ مطلق في هذه الحياة و حتماً هيبقى فيه نهاية للشوية 
زي الظروف مثلاً


كدة انا خلصت


ملخص الاحداث بقة 
الطالب : 1- يطلب الطلب ليختبر المطلوب منه 
2- يطلب الطلب لإنه راسم الصورة العشمية 
3- مش هيطلب الطلب أصلاً


المطلوب منه : 1- ينفذ الطلب .. إما لإنه عاوز فعلاً أو عوز مصلحة
2- مينفذش الطلب إما لإنه مش عاوز أو لوجود مبررات




الشوية : قد تطول او تكثر على حسب الطالب و المطلوب و الظروف و الملابسات


حد فهم حاجة؟؟
مش عارفة انا عملت النظرة التحليلية دية ليه


بس هيا طقت في دماغي بعد ما رسمت الرسمة اللي فوق دية الصبح قمت عملتها
بس


سلامٌ عليكم
.................
بالمناسبة الصورة اللي فوق أنا اللي راسماها
the photo is drawn by me

19 قالوا رأيهم في العك اللي تحت ؟؟؟:

انا فهمت والحمد لله
بس لاتعليق
ليكى شطحات كدا بس فى الجون
وكمان عم عشم مات من زمن
اوعى تتخيلى ان عشم موجود
دا مات يابنتى ولاعزاء للسيدات
مساكى شيكولاته

 

انا كنت اول تعليق بس سكرورتي خطفته يالا مش اشكال اروح اكمل بقى الاغنية خليك شوية قدام عنيا ملحقتش اشبع حب فيك

 

نعكوشة
وحشتيني اوي
وكلامك صح الصح جدا اوي خالص

لكن لما قريت الجملة دي حسيت اني عايزةاقولك يا مملة بطلي خنقة وملل

(و هنا محتاجين نعرف هيقعد شوية قد اية)
يعني ايه يفضل قد ايه لمهم بفضل وخلاص
متزعليش مني بس

..

انتي سالتي السؤال اوافترضتيه
لكن هو مش مطلق
يعني ممكن تقولي لحد خليك شوية
والوشية دي تبقى معناها شوية
وممكن تكون معانا طوووول العمر


واعتقد ان اللي بتبقى شوية مش طول العمر ممكن ينطبق عليها الحالات اللي قلتيها كلها
لاني ممكن كصديقة اكون فاضية افضل معاكي
وممكن لا وممكن اتحجج وممكناقعد لاني محتاجةافضل معاكي
وممكن في مرة تانية بدافع الصداقة احس انك محتاجالي افضل معاكي فابدي احتياجك على التزامات قد تكون غير ملحة عندي وهكذا
لكنوتحتها خطوطكتير

السؤال بتاعك
واضح انه من انثى لرجل
وفي الحالة دي هيكون معناه طوووول العمر في اغلب الظن يعني مش اكيد


ففي الحالة دي لوهو كان نفسسه يفضل ومستني الاشارة فهتبقى الرد معرفو
اما اذا تحجج فاكيد ده ليه احتمال واحد فقط
انه بالسلامة ومن غير تفكير
ده تحليلي انا بقى للبوست بتاعك مش ليكي انتي طبعا

تحياتي

 

ههههههههههههههههههههه
فرستينييييييييييييييييي
الله يخرب بيت اللى يزعلك على الصبح يا شيخة
ما اللى عاوز يعزم و يمسك فى الناس ما يمسك فيهم
و اللى مش عاوز بلاش
و اللى عاوز يقعد يقعد و اللى مش عاوز يمشي
عشم ايه يا شيخة انتى خليتي فيها عشم
و الشوية بقا حتكون على حسب معزة الطالب للمطلوب
هههههههههههههههههه
تصدقى انا بعد البوست بتاعك و التحليل بتاعك ده
حسيت انا مش عارفة انا مين اصلا



الرسم تحفة الصراحة علشان تبقى عارفة

اه صحيح انتى نبطشيتك اليومين دول فى معمل التحاليل؟؟؟؟؟؟؟

ها
انا قاعدة مستنية تقوليلي خليكي يا مفروسة شوية مونسانى و منورة مدونتى
ياخيبة املك يا مفروسة عشمك مش فى محله
هههههههههههههه
سلام

 

أنا أزعم
إنى فهمت يا نعكوشتى
على فكرة
انتى المفروض تكتبى بالمنظر دا كتير
لأن بتفكرى بشكل عقلانى
فلسفى منطقى تحليلى بجد ..
انا إستمعت بفك الألغاز و ترتيب الفرضيات وصولاً للنتايج
المترتبة عليها
انتى ستفتيلى الحاجات
و اللى انا عمالة أطنشها
و مش عاوزة أرتبها عشان موصلش للنتيجة النهائية الا و هى
1- أنى طالبة و هناك مطلوب منه
2- انا للأسف فهمى بطىء حبتين
و باخد وقت عقبال ما أفهم
ليه هوه مخلهوش شوية
و ليه بيبعد بشياكة
3- إن عندى حالة عشمية مستعصية و بحاول أتفادى كسرها قدر ما أستطيع
4- رغم محاولاتى إلا إنه
مع ذلك .... قلبى انكسر
5- لا زلت أتعشم ف الناس
رغم كل شىء
6- بحبك يا إم دماغ ملهاش حل
7- خلاص كدا مفيش تانى

 

sookra

يرحمكم الله
الفكرة مش عشم او يمكن تكون هوه
الفكرة في احتمالات قبول و رفض اي طلب

مساكي بمبون

........

فكرة من الزمن دة

انا سمعت الكلام دة قبل كدة مش فاكرة فين

ما يوحشكيش وحش :D

هههههه
لأ ماهو انا حبيت اناقش كل حاجة عشان ميتبقاش أي فرضية
بس أكيد في حاجات وقعت مني

لأ هوه مطلق
مش شرط يكون السؤال خليك شوية بس
ي سؤل تاني قد يحتمل

بس ولنفترض انه مش مطلق
(وممكن في مرة تانية بدافع الصداقة احس انك محتاجالي افضل معاكي فابدي احتياجك على التزامات قد تكون غير ملحة عند)

ايوة سعتها انتي هتبقى قاعدة وانتي مش عاوزة تقعدي فهيجي عليكي فترة و تملي او تتعبي و هيبقى هنا انتي نفذتي الطلب زي ما ذكر في البند اللي تحت خشية ان مشاعري انا تتأذي
مش عشان انتي عاوزة تقعدي

فهمانة؟

ماهو عمرها هيخلص او عمره هيخلص او هتيجي ظروف تفرقهم وبكذة مفيش اي حاجة مطلقة
ومفيش حاجة اسمها طول العمر

إلا لوماتو هما الاتنين مع بعض

بس مش شرط يكون القصد طولالعمر او احتمال
كل شئ جايز

تسلم يا باشا عالتحليل
بجد بجد

......

واحدة مفروسة

دنا ما صدقت قولتي من شوية انك ماتفرستيش

ههههههه ماهو لازم نحلل وبعد ما نحلل بقة نرمي التحاليل في الباسكت و نسيبها على الله

الله يكرمك
انا لسة أجازة و لسة طالبة مبقتش نباتشي ولا بطيخ

خليكي يا مفروسة
بجد بجد خليكي
مانتي قاعدةشوية
مصممة
طب فين الجاتوة
مفيشولا كيلو موز حتى

خلاص بقة
ههههه
مكنش العشم
هههه

.......

فاتيما

قيل لي ذلك بس دة مش التفكير العادي بتاعي
انا الطبيعي بتاعي اني بتصرف جهجهوني كدا من يغر ما افكر في حاجة اللي بينط في دماغي بعمله
فقولت نجرب نبقى عقلاء شوية

لأ من جهة الفهم البطء فعادي

بس اقولك حاجة ساعات الواحد اللي بيبقى فهمة بطئ و بيبذل جهد عقبال ما بيفهم
ما بينساش التجربة او الفكرة
زي واحد لماح بيفهمها و هيا طايرة
وتروح منه على طول

عادي يعني

وش باصص لفوقو بيصفر
ربنا يا رب يا فاتيما يسعد قلبك دايماً
و يجي الحد اللي عشمك فيه يبقى في محله
ربنا يباركلك دايماً يا فطمطم و يطمن قلبك و يريح بالك

وش مكثوف :$

نورت يا جميل

.......

سلامٌ عليكن

 

هههههههههههه

شوفى هو انا قريت البوست وفى عندى 3 احتمالات

يا انا فهمت االبوست

يا انا بيتهيألى انى فهمت ومفهمتش

يا انا مفهمتش اصلا

ههههههههههه

بس بجد عجبنى جدا التسلسل المنطقى اللى انتى حللتى بيه طلب عم عشم

جميلة انتى وجميل قلمك وفكرك

لعيونك احلى وردة

 

هو أنا صراحةً مش عارف الصداع اللي جالي ده بسبب البوست بالكلية
ولا كانت شوية مؤثرات ورا بعض و كان ختامها البوست ده
أعتقد إن قرصين بنادول اكسترا ممكن يقوموا بالواجب في الحالة دي
تسلم إيديكِ
:)

يلا سلام

 

انا مافهمتش حاجة خالص

او بالاحرى مكسله اقرء الكلام شكله بيلخبط

قلت اعدى عليكى واقوللك كل سنة وانتى طااهيبة موااااااااااا

 

مش فاهمة بجد ههههههههههههه

 

هوة مال مخى النهاردة

هههههههههههههههههههههه

 

تصوري لو هنعيش حياتنا كلها بالطريقة دي ونحلل كل تصرفاتنا بالشكل ده كان زمان الحياة توقفت ومستشفيات الامراض النفسية مش ملاحقة علينا الحمد لله ان حياتنا ماشية بالبركة وبنلجأ للتحليل بس لو كنا عند الدكتور غير كده متلاقيش ههه
كل سنة وانت طيبة وبخير

 

يا خبر ابيض
!! انا خايف اكتب حاجه

الا تحلليها

انا ماشى
بس الرسمه
جنااااااااااان

 

انا عن نفسي أعرف كذا طالب بيطلبوا الطلب من اللي مطلوب منه باستمرار
وإذا حصل ومرة واحده بس المطلوب منه عجز عن تلبية الطلب بيتقى مصيبه سودا

 

طيب اشطة

بصى بقى انا فهمت جدا جدا ومعنديش اعتراض بس فى اجزاء كدة وجعتلى قلبى اوى

ايه بقى تفسير سيادتك ان واحد يتعشم فى واحد تانى ويكون العشم دة فى غير محله وهو عااااااااارف ومتاكد انه فى غير محله؟؟؟

يعنى انا ابقى عارف انك مش هتنفذلى طلبى ومع ذلك برضو اطلبه...يبقى دة هبل وللا عبط؟؟؟

وازعل بقى واتقهر انه ما اشتراش خاطرى...طب ما انا عاااااارف ان دة هيحصل يبقى احرق دمى ليه؟؟؟ اهو كدة وخلاص هبل فى الجبل بقى

عموما ابقى قوليلى رايك فى حالة الهبل المزمن دة يا نوشة

 

aaaaaaaaaaaaah saba7 2l la5bata

2nty katabtii 2l kalam da be5ariita


bas weslet e7l :D :D

 

Ms venus

واحتمال فهمتي وانتي فاكرة انك مفهمتيش

:D

تسلمي

........

nigro

والله .. الامر يحتمل
مفيش شئ مؤكد
.......

wella

مكانش هيضيف أي جديد يا جميلة
فمتاخديش باك :D

.........

خواطر شابة

بالعكس على الرغم اني في حياتي الطبيعيه لا اعتمد على التفكير المنطقي و التحليلي للأمور
وبتصرف كدهو من غير تفكير

إلأا اني شايفة ان اللي بيحسبوها بيبقوا عايشين حياة اكثر استقرارا و بيبقوا حاطيين في دماغههم الاحتمالات الوحشة زي ما حاطين الاحتمالات الكويسة

عامة
وجهات نظر برضو

وانتي بالصحة و السلامة

.........

amen

شكراً

......

لورانس العرب

مممممممممم
بتفكرني بحكاية يكفرن العشير
ان الست يبقى طول العمر جوزها بيسعدها
وساعة لما في مرة يزعلها
تقوله فيما معناه يعني ماشوفتش منك يوم حلو في حياتك

:D

ربنا يعافينا

........

انجي

احتمال يكون احد اتنين
يا اما بيطلب الطلب كسؤال اختباري و تاكيدي لشئ بس مشكلة الطالب هنا انه عوز النتايج تبقى دايماً ناجحة
او يكون حزء من الطالب راسم صورة العشم و نفسة اللي قدامه يصدق عليها


ولا هبل ولا حاجة
هوه محتاج بس يحط احتمال ان المطلوب منه يرفض و يعود نفسه ميزعلش على شئ عارفة مسبقاً

و لو المطلوب منه نفذ الطلب يبقى خير

بث

......

I'm the crazy one

ههههه

منا عملت الكلمات بالاحمر عشان تبقى رشادات الخريطة

:D

........

سلام عليكم

 

انتي ما دخلتيش هندسة ليه؟...فكرتيني بالكلية و الله، تحليل تحليل تحليل لكل حاجة، حتى الحاجات اللي ممكن الواحد لأول وهلة يحسها مش مستاهلة.
مدونة ظريفة

 

anonymous

صراحة كان نفسي ادخل هندسة
و المادة الوحيدة اللي جبت فيها الدرجة النهائية في ثانوي كانت الرياضة

كان نفسي كمان في فنون جميلة


بس جبت مجموع كويس
وانا اصلا كان نفسي في طب

فدخلت طب
:D

سلامٌ عليك