نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

كلام ملهوش لازمة

نصيحة أخوية .. بلاش تضيع وقتك في قراءة هذا العك


تقريبا مليش نفس انشر اي حاجة كتبتها
ومليش نفس ءألف أي حاجة
ومليش نفس أنبسط
ومليش نفس أعيط

كلت ايس كريم ......عادي
كلت درة ........ طعمه نشا
كلت بيتزا ....... شوية عجين

خرجت مع والدتي ..... متضايقة ان حد بيوجهني
خرجت لوحدي ...... منبسطتش

قعدت أهبل عالانترنت ....... حسيت بالاعاقة
قولت أتعلم حاجة وانا قاعدة على النت ....... زهقت

سمعت أغاني ....... قرفت من نفسي
سمعت أناشيد دينية ........ مليت و مكملتش

روقت بيتنا و نضفته ...... بقيت  و اتضايقت ان محدش بيساعد
بقوا يساعدوا و انا بطلت اشتغل في البيت ........ قرفت من منظر البيت و مني عشان انا فاضية

جبت شوكولا و بسكوي و ميرندا تفاح .......... كلتهم و خلاص
مجبتش .......... حاسة إن فيه حاجة ناقصة

استحميت .......  كسلت أسرح شعري و زهقت
مستحمتش ....... قرفت من نفسي

جبت كتب كتير و بقيت  اقرا....... فرحت في الاول بنفسي و بعدين مليت ( انا اصلا بكره القراءة)ـ
مبقتش أقرا ........ حاسة إني جاهلة

دعيت ربنا كتير ...... حسيت إني مقصرة و مستحقش إني أدعي
بطلت أدعي ....... حاسة إني  منيلة بستين بتاع و بعيدة عن ربنا

مفروض أعمل حاجة  مهمة نفسي جداً اعملها بقالي كتير قوي
وآخر ميعاد ليها بعد اسبوع و كام يوم
بدأت فيها و زهقت
احتمال كبير يكون شيطان
بس انا فعلا مش عارفة ليه مش قادرة اواصل
حاسة إني بطاريتي فاضية

محتاجة اعادة شحن
واعادة هيكلة
واعادة روحانيات
واعادة حاجات كتير قوي

نفسي اموت خميس و جمعة و سبت و حد و اصحى التلات

يييييييييه افتكرت
مفرض اني اركب الوش البلاستك
واعمل نفسي مبسوطة وانا بسلم على الناس في العيد
عارفة ان مفروض ان الناس تفرح في العيد
وتتلاقى و كدة
بس
انا فعلاً بحس إنه فرض
وإني بنافق
اهلا يا حبيبتي
وحشتيني
وانا نفسي اسيبهم كلهم
مفروض اني مدورش وشي ومعملش نفسي مش شايفاهم زي ما بعمل في الطبيعي
مفروض ودة اللي بعمله في العيد
إني اروح ناحيتهم
وابوس و احضن

احلى حاجة في العيد صراحة هيا صلاة العيد نفسها
مليش انا صراحة في اللحمة
ولا في التهاني و التسليم و البوس و الاحضان

يلا
ربنا يهديني بقة
يمكن تحل عليا رحمة منه و افرح يومها و اسلم على الناس بحب داخلي و ليس نفاقاً

آه صحيح
كل سنة و أي حد طيب و مبسوط و سعيد و ربنا يرضى عنا جميعاً و ينزل السكينة و الرحمة و الرضا و السعادة و الحب و المودة في قلوبنا كلنا
آمين

10 قالوا رأيهم في العك اللي تحت ؟؟؟:

كل سنة وانتى طيبة

عيد سعيد


انا مدون جديد

عايز ترحيب وتشجيع

تحياتى

 

اول تعيق انا

عايز عدية بقى ههه

 

مساء الخير
و كل سنة و انت بخير
احببت الهذيان الذي تعانينه في مقالك
كلنا نعاني من نوع من أنواعه
احببت مواضيعك و أسلوبك الممتزج بطبيعة شخصيتك
اتمنى لك التوفيق

 

ازيك يا مريم يارب تكوني بخير
عارفه انا حاسه بايه عايزة اقعد متنحه كده وبس اسمع و مردش مش عايزة افكر ولا افتكر حاجة ولا احس اي شعور اتجاه اي حاجة عايزة ابقا تلاجه متنحه اه والله تلاجه متنحه

كل سنه وانتي طيبه يا قمر وعيد حلو عليكي يارب

 

كل سنة و انتى طيبة يا نعكوشة
يا منعكشانى معاكي و فارساني
تصدقى بقا انتى دون عن المدونين كلهم نفسي اشوفك
هههههههههه
عطبق على زمارة رقابتك و افضل اصفر فيها لغاية لما انا اهدى من الفرسة و ارتاح
ههههههههههه
و انتى حترتاحي أكيد

بلاش تفرسيني و خلى التعليقات دايما مفتوحة

اقولك على حاجة تفرحك فى العيد؟؟
اضربي بومب و صواريخ
ههههههههه

كل سنة و انتى طيبة يا قمرة يا منعكشة

 

كل عام وانتم بخير ... اضحي مبارك

هدية العيد علي المدونه برجاء استلامها :)

http://hmasat-elqlm.blogspot.com/

 

عيد سعيد
كل سنه والجميع بخير



تحيه لاسعه

 

كل سنه وانتى طيبه وعيد سعيد
انا من متابعى مدونتك بس دى اول رة اعلق عندك ..فى احيان كتيرة مش بلاقى حاجه اقولها ..تحياتى ولى الامام دائما
ميجو وزوجته مشمش
من مدونه البلكونه

 

تعرفي يا نعكوشة انا كمان زيك مليش نفس لاي حاجة وحسه اني عندي مود عكننة وخناق يظهر في حاجة في الجو بتشيع الاكتئاب ولا يكون ايه الموضوع شايفة الدنيا من منطلق مظلم ومتضايقه قوي مش عارفة اعمل ايه

 

نعكوشة وحشتيني وقافلة التعلقات وعاملة مودريشن يعن كأبة
وحشتني كأبتك تصدقي
بس برضو بحبك في الله والله
يارب يبعت الفرج
تحياتي

وعيد سعيد عليكي يارب وكل سنة وانتي بالف خير