نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

رغي ملهوش أي لازمة بالنسبة لحد غيري

اوك ... كلام ملهوش لازمة

أشعر بالتخلف و التفاهة
نفسي ابقى شخص بيفهم
عامة هذا  مجرد رغي
نصيحة أخوية بجد ... بلاش تضيع الوقت في القراية عشان كلها حاجات تافهة و ادعيلي ربنا يهديني و خلاص

.........

الموبايل بتاعي جابلي السُل
اختي بتقولي هاتي موبايل تاني
انا مش من النوع اللي بيحتفظ بالحاجة ولا يرتبط بيها
بس الموبايل اللي انا عاوزاة ب 2500 و صراحة انا مش هدفع 2500 في موبايل
فمستنياة يرخص شوية .. المهم الموبايل وديتة للمرة الخمستلف للراجل عشان يصلح الكاميرا .. و هروح اشتريلة بطارية اصلي من التوكيل ان شاء الله .. عشان موايلي مش طايق البطارية التقليد .. طالع تنك  مش عارفة لمين
المهم

...........
اشتريت مثبت لأ مش مثبت شعر .. مثبت ألوان لأ مش صبغة .. أنا أصلاً ماليش في العك دة
دة مثت ألوان بتاع اللوح
عشان القلم الرصاص بيبهب و بيبوظ شكل الرسمة بعد فترة.. فهذا السبراي يحفظ لها رونقها
المهم يعني .. اتدبست في 75 جنية .. اختي بتقولي : آل يعني دافنشي بيرسم

وبهذه المناسبة أحب أقول إني بقيت أرسم على اسكتش 35 * 50 بدل من 25* 35
و رسمت عليه أول رسمة .. لما موبايلي يرجع من عند الحلاق هصورها و  اصور اخواتها الصغننين و اعرضهم باذن ربي
الرسمة برضو متعرفلهاش معنى محدد
و صراحة مبقتش بركز بقة انا برسم إيه
المهم إني بطلع مشاعري
و اللي يترسم يترسم

...........

نفسي أتعلم أرسم رسم تشكيلي بالألوان .. بجد بجد
ونفسي جداً عالآخر آدرس فنون جميلة .. دراسة حرة
محتاجة انظم وقتي

............

حاسة إني مكبوسة .. لأ مش حد كبسني المتعارف عليها دية
لأ مضغوطة .. اللي هيا .. لما تحس إن حد واقف و حاطط إيده على كتفك وبيدوس على راسك و مش عارف ترفع نفسك
حاسة إني عندي طاقة الهبل ومُهدرة

حاسة إني هتسئل يوم القيامة عنها
بجد محتاجة حد يشعل فتيلتي  و يسيبني  انطلق
حاسة ان جوايا قدرات اني اعمل حاجات بس مش قادرة
.............
بقيت بسمع أغاني  تاني .. الموضوع دة مضايقني قوي
حاسة بالقرف
انا حتى مبقتش سمع موسيقى
هبطلها في يوم ما  .. معتقدش إنه هيكون اليوم دة بعيد
لإني مش عاجبني منظري كدة
..........
مبقتش بطيق التلفوز ( قشدة جداً ) مبقتش مدمنة زي زمان
وحتى مبقتش أكمل أي برنامج أو فيلم .. نص ساعة و بقوم
شئ جيد
............

مبقتش أحب أي نوع من المشروبات
ومبقتش اشرب في كوبايتي المج اللي بحبها
و بقيت آكل الشيبسي كدهو و خلاص
بقيت أحب رفايلو و فريرو روشية  بس مبحبش ازود منهم عشان انا مليش في الحاجات المسكرة
بقيت بحب اتمشى انتقاماً من نفسي
وكل ما أحس إني تعبانة أمد زيادة
و كل ما رجلي توجعني اسرع و ادوس عليها اكتر
لما بلاقي حد بيمد قدامي بمد و احاول اسبقة

..............
جبت كتب كتير و كنت مستعدة إني اقراهم كلهم
وكنت تقريباً في الفترة اللي فاتت مبعملش حاجة غير القراية
مبقتش قادرة اقرا دلوقتي

مبقتش قادرة اعلق عند حد
بروح و الف عالمدونات و اقرا و مبقتش حتى بدوس كلمت التعليقات
ولما بعلق بيبقى عند مع نفسي عشان اثبت لنفسي اني لسة بعرف اعلق و لسة بعرف احس بلكلام و افهمه

............

انهاردة  مكنتش عارفة اقول للراجل بتاع الميكرو باس على المكان اللي كنت رايحاه
وغلطت في النطق كتير قوي
ونزلت وانا حاسة بالعجز

............

روحت ميترو و اشتريت بحاجة و ستين جنية حلويات ( بسكويت و شوكولاتة و ... )ـ .. للعلم .. دة بالنسبالي أنا مبلغ كبير

............
عاوزة أروح أفصل فساتين
لأ مش فساتين فرح .. فساتين كدة حاجة شبة العبايات و بيتلبس عليها جاكت.. عندي القماش بس عاوزة لسة انزل الازهر اشتريله بطانة
عاوزة آخد من مها ( إنها الحياة) نمرة الخياطة .. بس مش عارفة أوصل لمها أصلاً
...............
عاوزة اروح لدكتور نفساني بجد عشان اكتشفت إني فعلاً مش زي الناس الطبيعيين.. هوه الموضوع مش مضايقني شخصياً ..بالعكس انا أصلاً مبحبش أكون زي الناس .. عندى الداء دة للأسف .. مرة لاقيت ايشارب كنت لابساه واحدة تانية لابساه .. بطلت ألبسه .. مش عارفة ليه .. المهم يعني .. إن موضوع الناس .. زهقت
..........
بس زهقت
او مزهقتش بس مش لاقية كلام
يعني أهو
آه صحيح بالمناسبة
إنتي يا بنت ياللي عارفة نفسك
أيوة انتي
آه آه انتي انتي
بجد ربنا يخليكي عشان مستحملاني  رغم  كل اللي قولتهولك
.........
بث
مفيش كلام تاني .. مع إني لسة نفسي أرغي .. المهم بقة خلاص

آه صحيح
بقالي كام يوم عاوزة اعيط
بس مش بعيط عشان سبب بسيط جداً إني مش عارفة هعيط على إيه و إن العياط مش هيفيد بأي شئ خالص
ومش هيحل أي حاجة
بس بقة عشان قرفت

سلامٌ عليكم

8 قالوا رأيهم في العك اللي تحت ؟؟؟:

انا زيك كده فى كذا جزء برضه

+ البوست اللى مقفول عنه التعليقات اللى فوق برضه

 

ايييييييييييييييييييه كل ده...؟
لخبطتيني..!!

 

safa7_karmooz

لو كنت حاسس زيي فعلاً يبقى
لا حول ولا قوة إلا بالله
ربنا يوسعها عليك يااااا رب

آمين

.....

Timo

حقاً !!!

.....

سلامٌ عليكما

 

تفائلوا بالخير تجدوه

وأحسنوا الظن بالظن وستحسنوا حينها العمل

 

عفواً : أحسنوا الظن بالله وستحسنوا العمل وليس أحسنوا الظن بالظن

 

بسم الله الرحمن الرحيم

اولا اعذريني على اني سأرد ردا طويلا .... و حاولي ان تتقبلي كلامي ...

اولا حضرتك حد بيفهم .... دي الحقيقة !!
سواء حضرتك اقتنعتي بدا او ان الدواير اللي انتي بتلفي فيها خلت عندك اقتناع بحاجة تانية غير كدا ...

موضوع التخلف والتفاهه ..... صدقيني الحالة النفسية لها مفعول السحر في هذا ... وانا مجرب دا كتير والله ...

بتديني شوية قناعات اني شخص مش عارف يقول كلمتين على بعض اني في وسط اناس مش طبيعي ... اني مع نفسي مش عارف اعمل حاجه ...

مشكلتك ... انك سبتي نفسك تخشي اوي في المود دا وبدأتي تقتنعي بيه ....

انا كنت مهما اكتئب ومهما كانت الدنيا تضلم في وشي اوي اوي ... كنت بدور على الامل ...

حتى لو كنت بوهم نفسي ... وكنت بحب نفسي .. حتى لو كنت حاسس اني عدو نفسي ..

مهو اصل دا السر ودا الحل ...

ارجوكي افتكري نفسك زمان ... وافتكري حاجة حلوة عملتيها ...
وانا عارف دا اد ايه صعب ... مش عشان انتي معملتيش ... بالعكس ..
بس انتي وسط مود صعب جدا .... مش هيديكي الطلب دا بسهوله ...

لكن عافري لحد ما تفتكري لنفسك حاجات حلوة ... وارجوكي ما تستسلميش ...

ومن الحاجة الحلوة دي .... ابدأي حبي نفسك ... عشان انا بعمل حاجه حلوة ... وكرريها ... واقتنعي بانك لسه قادرة تعملي حاجه حلوة ...

وصدقيني هتحسي انك احسن ... بالتدريج ....

بجد حبي نفسك .... الاغرب من دا ... حبي المود دا ...

انتي ما تتخيليش المود دا بعد خرجت منه اداني خبرة عاملة ازاي ... وبقيت بفهم الناس ازاي ...

وصدقيني هتخرجي منه ... انا واثق من دا .... باذن الله تعالى ....

نكمل ..

 

مبروووووووووك على النقله في الرسم ... واحمدي ربنا سبحانه وتعالى انك بتقدري تعبري عن اللي جواكي ...

وما تتخيليش الرسم ممكن يعبر عن احاسيس ناي مش قادرة تعبر لانها معندهاش الموهبة الجميلة اللي عندك ...

انتي ممكن برسوماتك تساعدي ناس كتير كتير ....

انا حسيت دا لاني والحمد لله بعرف اكتب شوية ... وشفت اد اية ان كتاباتي المعبرة عني تماما اد ايه ولله الحمد قدرت تساعد ناس كتير بشكل او بآخر ...

ارجوكي مهما حصل ... ارسمي ارسمي ارسمي ...

انا اغبطك على نعمة الرسم ... افرحي لانك قادرة ترسمي :)

ليه ما تحطيش خطة انك ان شاء الله على بداية الدراسة تكوني خرجتي من المود دا تماما وبقى عندك القدرة تماما انك تبدأي تدرسي فنون جميله ... قدامك فرصة كويسة جدا ... ووقت مناسب ...

في نقطة مهمه ...

ربنا سبحانه وتعالى اداكي طاقات عظيمة ... ما شاء الله ... صدقيني هتستغليها ... وما تخافيش ... ربنا حاسس بيكي اوي .... وعارف انتي بتعاني اد ايه ....

خليكي مؤمنه انك جواكي المقدرة انك تتخطي دا ....

عارفه ... تخيلي كدا عيشي بخيالك .... انك دلوقتي كويسه .... والحياة رجعلها الطعم ...

صدقيني قبل ما تنامي اعدي فكري اوي انك بقيتي كويسه وحققي احلامك كلها في خيالك ... تواصلي مع عقلك الباطن بهذه الطريقه لكي يساعدك على ان تتخطيها ... دا كلام حقيقي والله ...

 

بالنسبة لموضوع الاغاني ...

انا مش هقولك انها مثلا حلال ... او انها حرام ....مش قصتنا ...

بالنسبة لي ... انا مريض نفسي ....

فعلا ... دي حقيقة ... والهروب منها خسارة كبيرة عليا ....

قدري انك ليكي متطلبات مختلفه عن الطبيعي ....

وممكن تكون دي من متطلباتك الفترة دي على الاقل ....

انا مثلا ... من غير ام بي ثري في ودني وانا ماشي في الشارع ممكن اكتئب !!!

تخيلي ...

انا مش طبيعي ... عشان يمشي عليا الطبيعي ....

وانا مش بقولك كدا عشان تسمعي ...

بس قدري انك مش في الطبيعي دلوقتي ...

انا برده ليا قواعدي ... لكن ... انا مش طبيعي دلوقتي عشان امشي على كل حاجه بالحذافير .. فالاقي قواعد ديني بتضغط عليا اوي ...

انا كدا يبقى المشكلة عندي انا ...
فكل طلبي حاجتين ...

اول حاجه ما تفكريش في موضوع فرعي زي الاغاني دلوقتي ... حتى لو كنتي مش مقتنعه بيها دلوقتي ... مش عشانها ... عشان تبقى انتي كويسه الاول دا الاهم ...

ثاني طلب ....وهو حضن من ربنا سبحانه وتعالى لي ... وانا اظن انه هيفرق معاكي جدا جدا جدا ....

انا كنت في مكتبة الاسكندرية ... وقريت كتاب فوق الرائع ... اسمه المرض النفسي طريق الى السعاده ...

والله قالي كلام لا الدكتور اللي انا ماشي معاه ولا حد من اصحابي قالهولي مهما قرب مني ....

الكتاب موجود في اسفل دور في المكتبة ... كتب علم النفس ... رقمه 158.1

روحي يوم اسكندرية وارجعي بليل .... لوحدك ....

المكتبة بتفتح الساعه 11 وبتقفل 7

انا اخر مرة اتمشيت عالبحر من الشاطبي ادام المكتبة لحد كوبري ستانلي ... في عز الهوا ...

بس استمتعت جدا ... وحلمت جدا ....

وكان بليل كمان ......

فكري في الفكرة دي وانا قريت انك نفسك تروحي اسكندرية ...

اكسري مودك .... وعافري وحاولي مع نفسك كتير بكل الطرق ... ودا انتي كاتباه ...

حققيه اذن :)

انا الهوت شوكليت بيعلي مودي جدا مهما كنت مضايق ....

جربي كدا :)

لو كنت قريتي كتب المدونات ... عايزة اتجوز وارز باللبن لشخصين و اما هذه فرقصتي انا ....

اقريهم تاني ....

ولو مكنتيش قرتيهم ... هتلاقيهم في مكتبة الشروق ... في سيتي ستارز مثلا ....

هتلاقي نفسك مندمجة في القراية فيهم ان شاء الله ....

ما تفكريش في موضوع الميكروباص دا كتير ... دا طبيعي ...

وحالة وهتعدي باذن الله لو مفكرناش فيها كتير ... و لا عيشناها كتير ...

على فكرة انا عملت نفس موضوع ميترو اكتر من مرة ...

وباشكال متعدده ... وبرده الستين جنيه بالنسبة لي مبلغ كبير ....

بس حاولي تنبسطي بيهم ....

ومتفكريس في الفلوس خالص ...

انا كل ما احس اني مودي بينزل ... اروح شاري شيكولاتة كادبري .... وبحسس نفسي اني مودي بيظبط :)

انا كنت قريت في الكتاب " المرض النفسي طريق الى السعاده "

اختبار يحدد انا مريض نفسي ولا لأ ...

هحطة عندي المدونة دلوقتي ... حاولي تعمليه الاول ...

وعلى فكرة زي ما انتي قايله مفيش مشكله اننا نبقى مرضى نفسيين ....

هنعيش وهنبدع ... الابداع اللي ناس كتير طبيعيين ما يعرفوش يعملوه ...

انا الدكتور اللي انا ماشي معاه ... والحمد لله اداني ادوية خلت حالتي كويسة جدا دلوقتي ومتوازن جدا جدا الحمد لله ...

وتقدري تحسي دا من كلامي ... ولله الحمد ..

الدكتور اللي انا ماشي معاه .... اسمه احمد شوقي العقباوي .... في المهندسين ... اخر شارع محي الدين ابو العز في تقاطعة مع جامعة الدول ....

كشفه في النص ساعه 150 جنيه !!!

غالي انا عارف ... بس انا مش هغامر بدماغي ...

وبرده حدديله من الاول لو هيديكي علاج الحد اللي انتي تقدري تدفعيه في دوا ...

وهو متفهم جدا لدا ...

ومرة اخرى انا واثق من انك هتبقى كويسه جدا ...

بس ساعدي نفسك ارجوكي ... وما تستسلميش للمود دا ....

ربنا سبحانه وتعالى ان انا مكتبتش الكلام دا كله الا عشان انا حاسس بالمعاناه دي ....

وبصراحة مشفتش حد قال الكلام دا ...

فياريت تتفهمي اللي كنت اقصده ...

ولو في اي مشكله .... ممكن جدا تمسحي ردي دا ...

وانا هتفهم جدا والله دا ...

بس والله العظيم انا كل نيتي اني اساعدك لحد ما تقدري تتوازني ان شاء الله ...

انا اعتذر مرة اخرى على الاطاله ... وربما اني تطاولت في الحديث ....

ان شاء الله خير