نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

صحيح... عرفتي تنسيني؟؟


بليل هقول للقمر ميطلعش ليك
و أخلي النجوم كمان تغمض و يبقى ليلك اسود كحيل
هرقص و اغني لوحدي ومش هفكر فيك
ولا ثانية و هفضل أضحك طول الليل
هطلع كمان للشهاب و اقعد احكي معاه و مش هجيب في سيرتك
و اقفل  موبايلي و اسيبك قاعد كدة في حيرتك
هنام عالهوا و اسند راسي عالسحاب
و اضرب برجلي الخوا تبرق 
 و لما انفخ فيه تقلب ضباب
هنساك على فكرة عادي
منا بنسى كل الناس
ومش هعتب عليك
و هعزق في ارضي بفاس
و ازرع زرعة جديدة 
غيرك يا زرع شيطاني
وهقلع جزورك مني
ومش هرويك بحناني
لأ .. مش هدوس على قلبي
هوه اللي هيدوس عليك
وهفضل أحلف بحبي
ماهو  أصلاً مكانش ليك


بس ابقى قولي إزاي  أول ما اشوفك 
ميرتجفش جسمي 
ولا دمعي يجري عليك
ولا تثبت عيني في عينك
ولا احس إني مشتاقة ليك
ولا يهرب كلامي مني 
اول ما تقول وحشتيني
وتسألني والبسمة على وشك
صحيح... عرفتي تنسيني؟ـ 
.....................
حكوك التبع و النشل محفوسة لنعكوشة
photo is painted by : Paul Robertson

18 قالوا رأيهم في العك اللي تحت ؟؟؟:

الله
صافية قوى يا نعكوشتى
قوى

 

حقيقى كلمات جميلة قوى وتدخل القلب على طوول, احسنتى

 

عايزة اسقف عايزة اغني عايزة ابوسك معرفش ليه :)
بجد حلوة اوي بسيطه اوي وحلوة مش هدوس ع قلبي هو اللي هيدوس عليك :)

تسلم ايديك يا نعكوشتي

 

مش عايز اقول حلوة عشان بكره الكلمة دى

بس لما يتسأل السؤال دا هيكون ردى الطبيعى


أيوا عادى نسيتك
ولو دمعى ملى عينى
ولو الحزن عشش فى سنينى
بس هنساك
حتى لو جيتنى مش عايزاك
لا عايزة أكون حبك
ولا عشمانة أملك قلبك وهواك
ولا بتمنى من الدنيا يوم لقاك


شفتى بقى

الرد سهل إزاى

صباح الورد عالكلمات الصافية

بس مش عارف ليه حسيت فوق بمنتهى القوة

ولما نزلت للجزء التانى حسيت بالحب الصافى وألام الفراق ؟

حسيت ان القوة اللى فوق قوة طفولية خالص

اه والله

بتختبىء خلف قناع طفولى فى الحب

فهى قوية ولكن فى نفس الوقت ضعيفة جدا امام من تحب

مش ضعف ولكنه حب

ودا عيب الحب منقدرش نقول عليه ضعف ولا قوة

تحياتى عالحاجات الحلوة دى :)

الفقرى مر من هنا فى تمام الرابعة عصرا

شاب فقرى

 

حاسس ان اللى كتبته مليان سقطات

مش زى كلامك

نعكوشة واحدة بس :D

:)

صبح

 

بطلتك يصدق عليها المثل اسمع كلامك اصدقك اشوف امورك استعجب الدي يقرأ اول الكلام يعتقد انها خلاص قررت البعد وستنساه وانها قوية نجي للسطور الاخيرة نكتشف انها لاقوية ولا حاجة وان كل ماكانت تقوله مجرد كلام من وراء القلب على رأي نزار قباني :من قال اني لن أعود اليه

 

جميل الكلام دا
كان ناقص بس تقوله هااديك بالشوز
ههههههههههههههه
بجد حلوه

 

فاتيما

حقاً

.....
karim

تسلم

......
أميرة على كوكب مهجور

خدي راحتك خالص يا فندم
الله يسلمك

......

شاب فقري

الكدب ملهوش رجلين.. وكله بيبان
ساعات الواحد كدة بيفضل يقول هيعمل و هيعمل و بعدين يكتشف انه مش عارف

المهم ان يكون الكلام محسوس و خلاص

..........

خواطر شابة

اسعدني تعليقك :)
حقاً

......

sookra

هههه.. بس اهم حاجة ماركة اية؟؟
.....

سلامٌ عليكم

 

جميل يا نعكوشه
الا صحيح
ايه اصل التسميه؟؟

 

قمة التحدي

مع جمال الكلمات

النسيان يبدو صعب في اول المطاف ويبدو ولا شئ في اخره لانه حينها لايكون ولا شئ يذكر في داخل الانسان بل شئ منسي ومهمل ومكروه عادة


تسلم يمناك نعكشه ..\

 

اللى بيقول هينسى حبيبه كداااااااااااااب
صدقينى مش بالسهوله دى تماما

اخر كوبليه هو يؤكد كده لان دا هو الصح

 

انا كاتب بوست سارق فيه كومنتك ابقى شوفيه :D

 

عذبة انتي .. وكفى !

 

موضوع الماركه دا لسه فيه كلام
ممكن ابو ورده
ههههههههههههههههه

 

I'm the crazy one

ok

.............

sweet angel

عشان هذه هي حياتي ( منعكشة)

...............

Ghorbty

هوه بيبقى في الاول صعب فعلاً لإننا بنفضل نفكر في الشئ في محاولة لنسيانة بس مع التعود و ترك الامر بيبقى ولا شئ
بس مش شرط يكون مكروه

............

بطوط حبوب

مش كداب قوي يعني
الزمن كفيل بجعله مجرد ذكرى

شوفته

......

وحبي لك لن يموت

ربما الكلمات و ليست أنا

.......

Sokkra

:)))))

...........

سلامٌ عليكم

 

جميلة كلماتك

تلقائية وشفافة

بتوصل للقلب لانها من القلب


تحية لعيونك

 

venus

تسلمي يا جميلة

سلامٌ عليكِ