نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

سؤال و تاج



نظراً لإني مش فاكرة كام تاج جالي ووديتهم فين بعد ما جولي ونظراً لإني عاوزة أرغي و فيه خمستلاف موضوع في مخي و مش قادرة ابلورهم لحاجات تتكتب
فأنا هكتب سؤال بس طرح نفسة عليا امبارح
و هكمل الموضوع تاج
فاللي عاوز يفيدني في السؤال براحته

واللي عاوز يقرا التاج براحته
كله مشاع

...............
سؤال يطرح نفسه


اللي اتعلمته ولازلت يعني موقنه بيه
إن لما حد بيعلي صوته و يصرخ بيعبر عن ضعف موقفه
أنا نفسي لما تنرفز و اعلي صوتي بعرف إني حاسة إني مش قادرة أعمل حاجة فبزعق
السؤال بقة
ليه بعض الدعاة اللي في شرايط الكاسيت بيعلوا صوتهم
و يزعقوا
المايك مثلاً مش جمب بقهم
ولا عارفين ان الكاسيتات صوتها واطي
أصل إزاي داعيه .. في موقف قوة لإن الدين في صفه و بيدافع عن شئ معروف اصلاً إنه صح
يبقى بيزعق
أنا عن نفسي لما اللي قدامي بيزعق بحس إن مش كل الكلام بيدخل مخي
فيها إيه لو اتكلم براحة و رزانة كدة

مش عارفة صراحة
لو حد عارف يقول



كدة البوست خلص لو حد نفسه يقرا التاج براحته
...............

التاج بقة
هوه تاج من Yusuf
صاحب مدونة إيديا في جيوبي( افعص اسم المدونة كي تصل إلى هناك)ـ

اسمك؟
مريم


سنك؟
21
لحد آخر يوم في السنة بإذن ربي
يااااه .. العمر بيجري يا لواحظ.. يلا خير
اسم مدونتك ؟
بص فوق
بس عشان برضو منكسفش السائل نعكشة

مجال دراستك؟
التب هههههه
مرة كنت بحضر مؤتمر كدة عن الطب النفسي .. المهم عند الريسبشن كدة كان فيه شوية بنات ماشاء الله زي القمر  فبقول  لصحبتي أكيد دول مش تبعنا يا بنتي .. قالتلي تصدقي أيوة 
المهم
رحت بسأل البنت على حاجة قالتلي مش انتو بتوع المرتمر بتاع التب النفسي
آه و الله التب .. أنا ازبهليت اصلاً لما لاقيتها بتتكلم كدة 
المهم بعد ما خلصت معاها قولت لصحبتي .. دول أكيد مش تبعنا

هل فكرت في إغلاق مدونتك؟ والسبب؟
آه .. و قفلت مدونتين ليا بالفعل
واحدة اسمها 
Swing
والتانية
انسحبت من اشتراكي فيها اللي هيا المرسم
و كنت بفكر أقفل نعكشة
ليه بقة؟
لشئ في نفس يعقوب

ا

ايه رد فعلك لو حد قل ادبه عليك ف المدونة؟
همسح تعليقه
عادي يعني اصل الواحد مش هيحكم الناس
وبعدين هوه او هيا طبيعته كدة فأنا مش هدخل في طبايع الناس
ومش هلوم عليه
بس همسح تعليقه
عشان محدش يتأذي لما يقراه
بس



اسوأ مدونة دخلتها؟
مش فاكرة صراحة 
حاولت اعصر دماغي معرفتش
سوري

هيحصل إيه لايميلك بعد ماتموت؟
معرفش يعني بس لو اوبشن ان الايميل يروح لما حد ميستخدموش 30 يوم لسة موجود
فهيروح
عادي يعني

اديت الباسوورد لحد قبل كده؟
آه

 عشان كنت عاوزة لما أموت حد يقفل المدونة عشان لو كنت قلت حاجة غلط مفضل اتحاسب عليها
او يقول إني مُت يمكن حد يدعيلي  يعني
السفر بالنسبة لك؟
يااااااااااااااااه... نفسي قوي اسافر 
دة حلم .. يعني انا بموت في مصر اصلاً و مهما سافرت و عجبتني دول عارفة اني هرجعلها
بس فكرة اني الف العالم دية حلم يرودني في لحظات سعادتي يعني
حلوة يراودني ديه 
السفر بالنسبالي استجماااااام .. هروب بس هروب شييك.. فترة صلح مع النفس
السفر بالنسبالي حاجات جديدة بشوفها وانا بحب قوي استكشف
السفر بالنسبالي تجربة جديدة نفسي اعيشها
السفر تعايش مع ناس و طبايع متعاملتش معاها
السفر بالنسبالي طيارة هبص منها على السحاب و هسرح في الملكوت
السفر بالنسبالي  سفينة هبقى فيها وسط البحر  و اهيم بالليل سواداً
السفر بالنسبالي صحرا على الجمبين او ارض زراعية عالجمبين وانا راكبة العربية و مخرجة راسيو ساندة على  إيديا و سرحانة و بفكر
السفر بالنسبالي دراسة بفكر اعملها
حاجات كتير بس عشان محدش يزهق


المود بتاعك إيه؟
متقلبة بغباء
كل كام دقيقة بحال
بس في الطبيعي متقلبة بس مش قوي كدة يعني كل كام يوم


بتعمل إيه وقت فراغك؟
على حسب المتاح
يعني لو انا مثلاً ساعة وقت الفراغ دة كنت في الشارع فانا هسرح في الشارع.. بحب قوي السرحان( يعني افضل امشى كدةوانا مش عارفة رايحة فين و كل لحظة و التانية اسئل انا في شارع إيه)ـ
لو كان وقت الفراغ دة في بيتي  فهناك الكعبروتر  و الكتب و ترويق البيت( بكرهه بس اهو يعتبر من وقت الفراغ) و تلاقيني كدة برقص باليه مع نفسي ( متعلمتش بالية اصلاً  مجرد حركات ارتجاليه يعني )ـ بسرح مع نفسي في اوضتي و النور مطفي او مولع مش فرخة كتير... بهتم بنفسي بقة يعني احط كريم اسمنتكوا او احط ميكياج ( فاشلة انا في الاهتمام بالنفس ولما بحط ميكياج ببقى عاملة زي امنا الغولة او شبة سعاد حسني في فيلم الزواج عالطريقة الحديثة لما جالها عريس و حبت تطفشة  بإيديا دول .. اشرب اشرب ) بس اهو بحط من باب التغيير و بروح اغسل وشي على طول .. احط منيكير بس انا مبستحملوش على صوابعي فتلاقيني حاطة الاسيتون جمبية على طول ابص بصة على صوابعيني و امسحه.. أي حاجة متاح اني اعملها بحب اعملها
بث


الأكلات المفضلة؟
هوه انا معنديش اكله مفضلة .. المهم انا حالتي اية وانا باكل و مين بياكل معايا
بس انا بحب لبطاطا المقلية و البيتزا مثلاً ممكن الكشري
و الفول و الطعمية السخنة  و المسكعة
وماكرونة اسباجيتي بالكاتشب


الصفات اللي أخدتها عن والدك؟
هي مش صفات لاني مش عارفة اصلا
بس انا عندي في ايدي عرق بينبض بشكل واضح ووالدي كمان
انما صفات .. فانا اصلا مش عارف عشان افيد


الصفات اللي أخدتها عن والدتك؟
ممممم ... يعني ممكن تقول العند و تنشيف الدماغ
بس مش عارفة 
يعني انا مش اقدر افيدكوا


أكتر 6 حاجات بتحبها؟
بعيداً عن ربنا و الرسول و الصحابة و ماما و بابا و عيلتي و أهلي
بحب مصر
بحب الخروج لوحدي
بحب الضحك العالي
بحب المياة بتاعت الشرب
بحب نظارتي ( هوه حب انا مجبره عليه يعني بس من غيرها معرفش اعيش ) ـ
بحب الكمبيوتر



أكتر 6 حاجات بتكرهها؟
عدم النظافة ( سواء في الاخلاق او في المنظر ) رغم اني ساعات بيبقى منظر اوضتي مؤرف فساعتها انا بكرهني
الصوت العالي .. رغم اني صوتي عالي 
الغباء.. رغم اني ساعات ببقى غبية 
الصرصار .. دة بخاف منه جداً
  التوقيع بين الناس و بعضها
الجزء الخبيث مني( الأنا الخبيثة

شخصيتك نوعها إيه؟
Bipolar
or 
Boarderline
مش متأكدة

لماذا دخلت عالم التدوين من الأساس؟
واحد قالي نظرا لإنك بتعرفي تمتبي فسيبك من الشات و الهبل دة و روحي اكتبي كلام عدل
حد كويس يسمعه او يقراه يعني
مهند صاحب مدونة الباحث عن الحقيقة ( افعص اسم المدونة للوصول لهناك


أهمية التعليقات بالنسبة لك؟
يا سلام .. التعليقات .. متعة 
آه والله 
بعيداً عن إني بكره التعليقات من نوع تحفة و رائع و رهيب لإني مبصدقهاش
بس لما حد يوصفلي احساس وصله من اللي انا كتبته بحس بشعور بالانتشاء كدة
لما حد بيناقشني في اللي كتبته بحس إني شخص بيفهم 
لما حد بيكتب اي حاجة أي حاجة بعيداً عن كلمات الاطراء و الكلام دة بسعد بيها جداً


أفضل مدونة قريتها؟
مقدرش احدد مدونة معينة عجباني قوي
انا من النوع اللي بيلقّط 
يعني مثلاً بتعجبني بوستات بوستات في عدة مدونات
بث


اهمية الانترنت بالنسبة لك؟
قوقعتي التي لم استطع الخروج منها بعد


إهداء التاج؟
مصر كلها عملت التاج دة
اللي عاوز يعمله 
هو متاح للجميع
اتفظل عزيزي القارئ




في النهاية سوري لو طولت في الحوار 
معلش اصلي رغاية

9 قالوا رأيهم في العك اللي تحت ؟؟؟:

معظم الشرايط بيبقى مسجلة من جوامع فصوت السماعات بيظهر فى التسجيل رنين وصوت عالى اوى و كلام متاخر شوية مش عارف ليه

 

ممممممم

آها .. بس سؤال برضو
ماهو لما حد بيتكلم في مايك ليه بيعلي صوته
إذا كان هوه معاه مايك

وبعدين الفكرة في اللهجة كمان و الاسلوب .. بتحس إنه زعيق

يمكن فعلاً التسجيل بتاع الجوامع بيعمل كدة

بجد تسلم على ايضاح هذا الموضوع

سلامٌ عليك

 

بصي هو أنا مش مقتنع اساسا بقصة ان علو الصوت دليل على ضعف الموقف دي اصلا
بس بالنسبة لموضوع الشرايط الدعوية فأنا وجهة نظري في المشايخ اللي صوتهم بيعلى في مواضع معينة في حوارهم ان ده بيكون زي مثلا لما تيجي تكلمي واحد في حاجة من الثوابت و البديهيات و تلاقيه مش بيعملها مثلا أو مش مقتنع بيها فبتلاقي نفسك - في محاولة اقناعه - صوتك غصب عنك بيعلى لإستفزاز رد فعله ليكي
انما لو قصدك على المشايخ اللي بيقضوا الشريط من أوله لآخره زعيق و صوت عالي
ده بيبقى يا هما مش فاهمين دعوة كويس يا ضعف في شخصيتهم فالصوت العالي ده بيبقى زي سند ليهم كده
و ده برضه من وجهة نظري

بالنسبة للتاج
مش بأحب أعلق على تاجات
بس بأحب بوستات التاجات جدا
لأنها بتعرف الواحد أكتر بالشخصية اللي بيقرألها لها
ده لو كانت اجاباته بدون تجميل أو تجمُّل


يلا سلام

 

أنا مش قصدي بضعف الموقف إنه مش صح
بس مفروض واحد زي الداعية يبقى واثق و متبت ومحنك كدة و هادي

يعني انا لما بتحط في موقف مش قادرة ادافع عنموقفي رغم اني حاسة اني صح بزعق و بحس اني في موقف ضعف
هوه دة مقصدي

.......


ممكن حتة الاستفزاز دية اوك
بس
اصل نا كنت راكبة الميكروباص و طفل صغير بيقول خطبة و من اول الخطبة لآخرة بيصرخ
و الميكروباص اللي قبله كان الشيخ كبير في السن و بيزعق
فقولت هوه دة سمت بقة ولا إيه

.....

تسلم برضو على توضيح وجهة نظر مختلفة

......
بالنسبة للتاجات .. مببقاش عارفة برضو ارد عليها بس بحب اقراها

اما من ناحية التجمل فمش عارفة بحس إن أي حد هيبقى بيحاول يتجمل شوية لما بيعرض نفسه على الملأ
بس بالنوسبالي يعني بحاول اقول اللي يجي على بالي ساعتها
وبحاول ممسحش حاجة قولتها
عشان لما أنا نفسي اقرا لنفسي بعدين
وبعدين يعني لو الناس شافتني كويسة مش هيفيدوني بحاجة
ولا حد هيديني ربع جنية حتى :D

عليك السلام

 

ان ححكيلك حكابة حصلت لي مع شريط لاحد الدعاة المهم انا كنت اقود السيارة واستمع للدرس كان عن التحدير من جهنم ومن عداب القبر وكان الشريط برتم عادي وانامنسجمة معه وصلت الى اشارة للضوء الاحمر وتوقفت بجانبي سيارات تنتظر الضوء الاخضر وبجانبي شرطي المرور وفجأة يصرخ هدا الشيخ لاقفز انا واجد كل من كان متوقفا في الاشارة يلتفت الي احسست بحرج شديد
دائما كلما تدكرت هدا الموقف اضحك

 


مساء الفل يا نعكشة ..

الجواب عل السؤال الذي يطرح نفسه عليكي الوحش ده
فأنا مش عارفه بس بيقولولك عشان العظة والرهبة في الكلام مع أني معتقدش كده خاااااااالص
وعامله زيك كده ومش فاهمة السبب وراء علو الصوت ده
..........
نيجي بقى للتاج اللي يوسف دبسني فيه انا كمان ..

أنا شدني 3 حاجات
1 اسمك حلو اوي بجد
2 سنك عشان زيي تمام (:
3 العرق اللي بينبض في ايدك ههههه
اصلي انا كده كمان والله بس مش عارفه السبب ومش وراثة كان ظهر في ايدي الشمال وبعدها ظهر كمان في ايدي اليمين
تكونيش اختي اللي تاهت من 70 سنة
ههههههه أنا بهزر طبعاً

سعيدة بوجودي عندك بجد
دمت بكل خير يا جميل

Angel love

 

لولوولىىىىىىىىى
***دى زغروطة مخصوصة للتمبل الجديد ع فكرة بحس ان كل الاشكال الى بتختريها نفس الاستيل مابتحبيش الاصفر يع ولا انا بس هو فاتح مش باين اصلا**
سؤالك
*******
ع ما اظن من وجه نظرهم انهم كدة بيوصلوا المعلومة احسن امام الحشد الى قاصدهم وخصوصا لمة يكلموا ع الناااااار والعذاب الى هنشوفوا!!!!
انا نفسى تيجئ عندنا يوم الجمعة وتصتبحى ع خطبة امام الجامع الى عندنا يااااااااااااااااه هتنشكحى انشكاح!!! انا بحس انهم بيتخانقوا تحسى ولا مؤاخذة انك فى سوق خضار مش اسلوب امام جامع او دعاه مممممممممممممم يلا ربنا يهدينا كلنا
*******************
التاج
********
اخيرا شفتلك تاج قبل ما اموت!!!
والله ماصدقتش جيت جرى اكتر جاحة شبه منى فى اوقات فراغك مممممم للاسف انا بروق دلوقتى انا الماده الخام للكسل اة والله بعمل الحاجة ع سنين المهم بقى غير موضوع المونكير انا بقى بحب اعمل عرض ازياء الحاله دى بتجيلى بليل خاالص اقوم لابسة كل لبسى واولع نور الصاله وابص فى المراية رايحة جايه واحط مكياج لحد ما اهدء كدة نفسينا اعيط شوية وياااااااااه بعد كدة احس براحة وانام**بعمل دة فى اسوء حالتى**
وزيك برضة انا بكرهنى اوى فى موضوع النضافة الاوضة وكدة **
والكريم والحاجات دى اكتشفتها مؤخرا ان الواحد لازم يهتم ببشرته وكدة بس بعمل بقى كدة فى العيد تفريح لبشرتى
بحب ضحكت ولمة العيله اووووووووووووى
ايه تانى مش فاكرة!11
***مش عارفة ليه اتعملت ارغى هناا!!!
عوووووووووو

 

الشيوخ اللى بتعمل كدة فاكرة انها بتتبع اسلوب الترغيب و الترهيب هو فعلا اسلوب متبع بس مش زى كدة خالص مش بعلو الصوت انما بالاحاديث و القراءان وقصص القراءان, ربنا يعفى عنا

 

خواطر شابة

:)

.........

Angel

هوه كما قيل فوق هناك 2 احتما 1- عشان الحاجات دية بتتسجل في جوامع ( مع اني مش عارفة اية المشكلة اما تبقى خطبة في جامع من غير ما يزعقوا)
2- عشان هما تم استفزازهم من قبل الناس اللي مبتعملش الحاجات الاساسية في الدين ( مع اني شايفة انه الاولى انهم مفروض يتكلموا معاهم بالذوق عشان الدين مش بالعنف)

عامة ربنا يهدينا و يهديهم للي فيه الصالح للأمة كلها

الله يكرمك
انتي اختيييي :| وانا اللي كنت بدور عليكي
اختي
اختي مين؟؟؟

.......

كيكي

أي خدمة ي باشا انت تؤمر بس
ممممم هوه مش بس لما بيتكلموا عن النار للأسف .. بس احتمال برضو !!!

انا عملت تاج قبل كدة على فكرة

ساعات بعمل كدة انا كمان
ونا كمان بحب اللمة
ارغي يا اوختشي ارغي محدش ليه عندنا حاجة

.........

karim

ممممم
وجهة نظر برضو
جزاك الله خيراً

اللهم آمين

.......

سلامٌ عليكم