نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

مطرة

يا مطرة رخي رخي

كانت بتمطر من خمس دقايق
حسيت فجأة بسرعة جداً بشدة السعادة
و الطفولة
و البلاهة

على قرعة بنت اختي

ومديت إيديا من برة الشباك
و قعدت احاول اخليها تنزل على ايدي
و انا مبسوطة و منشكحة
و فاتحة بقي قوي

..................................
فجأة
اتضايقت قوي
عشان ضايقت امي
ليه دايماً بضايقها لما ببقى مبسوطة
فيقلب الموضوع عندي غم
ربنا يهديني بقة
................
يا رب
امتى هبقى بنت مطيعة و حلوة
امتى هبقى كويسة وهادية
امتى هخلي امي مبسوطة اني بنتها
امتى هحس إني لما بفرح بفضل فرحانة
انا مكنتش فرحنة بحاجة حرام
انا كنت فرحانة عشان فجأة حسيت ان الخير جة
بس انا وحشة
هف
................................
في يوم سابق :
ماما .. ممكن أحضر ندوة عاملاها الكلية جايبة فيها احمد فؤاد نجم
هتروحي مع مين
معرفش حد رايح ... هروح لوحدي
انتى يا بنتي شاردة كدة ... مفيش حد من صحابك هيروح معاكي
لأ ... صحابي ملهمش في الادب و الحاجات دية ( في نفسي : و بعدين انا مش طايقة اكلم اى واحدة فيهم و اتحايل عليها تيجي معايا)
يا بنتي الانسان كائن اجتماعي
هوه انا انعزلت عن الناس ... وبعدين انا كدة بحب اعمل حاجات معينة لوحدي
لا مش هتروحي
طيب
.....................
نطلع من دة بإية
1- انا مش انسان خالص الانسانية تماما ... لإن مش دايماً بحب الاجتماعية
2- مبقاش عندي طاقة .. و مبقتش افضل اجادل عشان اعمل الحاجة اللى عاوزة اعملها
3- زهقت من البوست دة
مفيش بنات تيجي تقولي أنا آجي معاكي
عشان الست الوالدةمش معترفة أصلاً بالنت
وبتكره أى حد من طرفه
اللي عاوز يروح .. ياخد صحابة و يروح معاهم
الندوات في الكلية .. طب عين شمس .. ابتداء من يوم السبت لحديوم 5 نوفمبر

سلام

7 قالوا رأيهم في العك اللي تحت ؟؟؟:

بوست مليان كئابة .. اللهم احفظنا

اللى عاوز يخنق نفسه بيعرف ..
انتى مش لاقية مشاكل فى حياتك فعاوزة تعملى اى اكشن فالحياة؟؟

هى الحاجات البسيطة - مكنتش عاوز اقول هايفة عشان ماتزعليش- بتسميها مشاكل؟

يه اللى مديت ايدى من الشباك.. ماما مش عاوزانى احضر ندوة

وطلعنا بالكلام ده انك مش انسانة .. يا سلاااااااحف

والله الى يشوف بلاوى الناس تهون عليه بلوته

انا اعرف واحد سايب بيته من شهرين مع اتهامه بحاجات وحشة جدا

مشكلتك ولا مشكلته؟

الناهردة جمعة..
روحى اقرى الكهف
ربنا يهديكى

 

انا كمان اتنكدت مع انى بعشق المطر
يلا حصل خير

 

ده كلامك؟

:)

المهم الضحكة دى تكون موجودة على وشك.. مش فالمدونة


انا قاسي شوية فالنقد .. بس بقول اللى فعقلى على طول

 

لأ أصلي قعدت اضحك كتير

فقولت منظري
مع اني مفروض ابقى متضايقة يعني

>>>>>>>>>

معلش

عندي اعاقة
يعني ممكن اضحك وانا متضايقة عادي

الفكرة ان الموضوع محتاج توضييح
وانا مش قادرة اوضح

انا كتبت اى حاجة جت على راسي يعني

...........
وبعدين حضرتك انقد عادي يعني

براحة
راحة
راحة
راحتك يا فندم
............

mona

نعتذر عن هذا الامر :D

>

سلام عليكما

 

2l pc dah mafihosh 3araby fa sorry 3ala 2l francoarab dah
3azem 2l post dah bey7asesni 2eni 3ady fe nass zay mesh lazem yeb2o ektem3yen fa etament 3ala nafsy we etameny enty kaman :)
so......netl3 men dah kolo en ya rab 2l 7agat ely tedaye2na teb2a keda men 2l no3 dah 3ashan 7elwa
bass fer7t gedan lama edonya shetyt)3ashan ana eskandarani)
we 2olt a7'eran 2l sheta geh we 7a7es bel nadafa any way

comment dah 3oba=ra 3n sha7'bata
salam

 

blind sniper

الفكرة مش انا اتطمن على نفسي
اينعم ساعات بحب اتطمن عليها
بس انا نفسي حد يطمن اهلي انه عادي يعني

هيا مش كلها كدة صراحة
والموقف مضايقنيش على قد ما هو علم معايا في بعض الحاجات

انا اصل مش عارفة اية اللى مضايقني
حاسة اني بخلق لنفسي اني اتضيق

ربنا يهدي

اانا روحت القليوبية امبارح
كانت معجنة صراحة
لأ بجد كنت مبسوطة انها سقعت
:D

شخبط يا عزيزي شخبط
الشخبطة حلوة للي يقدرها

انا بعز الشخبطة جدا
:D

سلام عليك