نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

زي القمر


عرفت ليه بيقولوا عالبنت الحلوة زي القمر
عشان بتبقى زي القمر في وسط الليل ... منورة وسط السواد
عشان بتبقى مُلفتة .. حتى و هيه زي الهلال
حتى و هيا صغننة
ولما تغيب في يوم - يوم المحاق - نشتاق لها


عارف .. رغم انك في الحلاوة مش زي القمر ومش هوهمك انك قمر
بس انت فعلاً في حياتي قمر بتلصص عليه أول ما الاقي نورة مشعشع في السما
كُنت حاجة مُلفتة ... منورة .. شدتني ليها زي الفراشة لما بتجري على النور
أنا مش مغرورة عشان أقولك إني شكلي زي الفراشة بس يمكن عقلي زيها بيحب النور
ممكن كمان تقول إنك كنت زي القمر وسط السواد من العوام
كلهم زي بعض .. وانت اختلفت
مكنتش بتتكلم زيهم
وعمري ما حسيت انك اتكلفت
بس كنت طول عمري أحس إنك بعيــــــــــــــــد قوي
زي القمر


زي النجوم يوم المحاق في ليلة من ليالي السويس لما كنت ببقى قاعدة على المرجيحة الجلد على الشاطئ و الكابوريا بتجري تحتي على الرملة و البحر اسود قوي
ساعات كنت بسمع صوت ناس جوة البحر في الوقت دة
كنت بخاف عليهم قوي مش عارفة ليه
زي مانا خايفة عليك دلوقتي مش عارفة ليه


انا من وانا صغنتوتة وانا بعشق المورجيحة الجلد بتاعت السويس دية و زعلت قوي لما سيبنا الشالية بتاعنا هناك و المورجيحة معادتش موجودة... و حسيت إنه بقة وحش قوي يوم ما زرته و لاقيته مدهون بلون تاني مش فاكراه غير اللون الاخضر في لبني اللي كان محفور في زاكرتي
زي ما زعلت يوم ما لاقيتك مش مكمل في الطريق اللي كنت راسمه لنفسك زمان... فاكره؟؟


فين طموحك؟
فين مبادئك اللي علمتني دايماً إني اثق في نفسي حتى لو العالم كله ضدي طول مانا مؤمن بهدفي و محدش برهنلي إنه خطأ؟
راحو فين؟
أقولك... اعتقد انهم راحو زي ما القمر بيروح يوم 28 و هيرجع تاني بعد يومين
أنا مستنياهم وواثقة
إن القمر مش هيغيب
...................................

حكوك لتبع و النشل محفوسة لنعكوشة

8 قالوا رأيهم في العك اللي تحت ؟؟؟:

على قد ما انا فرحانة بحالة التوهج اللى انتى فيها الأيام دى
على قد ما انا خايفة تقلب بغم
ربنا يستررررررر
يا وجه القمر المنير
حتى يوم 28

 

نعكشة

أقولك إيه

مش عارف

إذا كان ما كتب نص أدبى

فهوا عجبنى ومش تسألى عجبنى ليه لكن إحساسه وصلنى أوى

فى نقطة واحدة عايز أنبه عليها

هى إن الشاب دايما بيكون عنده مبادىء بيكون متمسك بيها وكله تمام

لحد ما بييجى لحظه يخسر حاجات مش ينفع يخسرها

ساعتها بس بييأس وبيزعل وبيندم وبيتراجع عن مبادؤه
بطل القصة بيتهيألى حصله كدا

تحياتى ليكى
يانعكشة زى القمر (( على حد وصفك للقمر ))

شاب فقرى

 

والله انتي اللي قمر انا كمان بسأل زيك هي الناس اللي بتشجعنا وبتدعمنا وبتقف جنبنا بيجلها ساعات كده بتتغير بتتلخبط بتوه طيب هما مش مؤمنين بكلامهم لينا ولا مش قادرين ينفذوه :(

 

السلام عليكم
انا قريت كله
بس للاسف
مش فاهم اى منكش
هل ده عيب منى.؟
ولا انتى غامضة؟

 

ممممممممم

مش عارف ...

كل اللي حسيته اني زعلانة و عايزة اعيط .. :(

بس تصدقي تعريفك للقمر بينطبق عليكي

يعني اليوم اللي مكنتيش بتيجي فيه ... بنحس ان القمر غايب

 

امممممم..هما كتيير موجودين فى حياة كل واحد بيبقوا زى القمر ..مش فى جمالهم بس فى انهم مميزين عن مليون واحد غيرهم ..فى اللى بيغيب شوية و يرجع و فيه اللى بيتغير و مبيجيرجعش.

جميلة ..و تعبيرك فيها حلو اوى..

دمتى بخير.. سلام

صحيح كفارة عالاجازة.. جبتى oliver twist انا بدرسها دلوقتى جميلة جدا و حزينة مووووت ..يلا سلام

 

انا جيت تاني :)

قرائت بوستات كتيرة في البلوج انتي جميلة اوي يا نعكوشة يا حلوة

عجبتني رسوماتك :) وعاجبني البوست لما روحتي تشتري القماش

البلوجية حلوة وعيزاكي تكوني مبسوطة ع طول بلاش حالات الزعل دي :)

 

جمييل جدا تعبيرك و تشبيهك بغياب الطموح بالقمر, تحياتى سيدتى