نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

أبحث عن وظيفة

هوه ممكن لواحدة معاها ثانوية عامة
لسة طالبة فى سنة 5 كلية طب
على دراية بسيطة بالكمبيوتر
بتفهم انجليزي بس مش ضليعة فيه
بتحب تكتب بس مش كاتبة
بتحب ترسم بس مش رسامة فظيعة
تحب تصور بس اقصى كاميرا صورت بيها كانت 12 ميجا بكسل ديجيتل مش الكاميرا بتاعت المحترفين
تشتغل إيه؟؟؟

فكرت في بيبي سيتر او جليسة أطفال .. بس مينفعش عشان في بيوت ناس
وطبعاً مينفعش خدامة لإنى بشتغل فى بيتنا بالعافية و ظهري مكسر
مش عاوزة سكرتيرة
ومينفعش بيع درة او بطاطا او فشار عشان اهلى معارضين دة
فكرت اقف بيع فى محل بس انا لو حد قالي كلمة مش لطيفة مبسكتش و مش ههتم انه زبون يعني و هطفشه من المحل
مينفعش اشتغل ميكانيكي عشان اولا مبفهمش فى العربيات ثانياً اهلى مش هيوفقوا
ماذا يمكنني أن أعمل؟؟؟

ما هي الوظائف المتاحة لحين ميسرة؟

12 قالوا رأيهم في العك اللي تحت ؟؟؟:

نعكوشة
انا رديت عليكي في البوست اللي فات
لكن هاقرا وارجع لك

 

شوفي ياستي
اولا ربنا يزيح همك وانا متاكدة انها فترةوتعدي

الاحتكاك بين الشخص وبين اهله
لان قبل كده المذاكرة كانت واخداكي
ومفيش وقت تناكفو في بعض
لكن صدقيني هتعدي وهترجعو حبايب تاني


ثانيا
انا اول حاجة جات في بالي
انك تشتغلي في مستشفى
بما انك فاضل لك سنة في طب وامتياز سنة
تشتغلي ايه مش عارفة
انت ممكن تعرفي
انا بس بافتح لك افكار
وممكن شركات الدعاية والاعلان
ممكن تشتغلي ممكن تشتغلي ايه ايه
اصلك مضيقة الاوبشنز بتاعتك وشكلك عايزة تشتغلي رئيس مجلس ادارة
لكن انا عندي فكرة هاتي جرنان الوسيط واقري الوظايف

ممكن تفتح لك افق للتفكير حتى لو ما اشتغلتي
حاجة من اللي مكتوب
يعني فيه مكاتب بتبقى محتاجة خطط افكار شباب كده يعني انا باكتب لك بسرعة ولما
افكر ممكن ارجع لك تاني
تحياتي

 

ومينفعش بيع درة او بطاطا او فشار عشان اهلى معارضين دة
:d

هو مجال السكرتاريه ممكن يبقا مناسب عشان مافهوش شحططه وكمان مش محتاج مؤهلات كتيره
الاداره والتسويق والدعايه والاعلان والذي منه دي كلها مجالات مش متعبه وفنفس الوقت ممتعه يعني مش هاتزهقي من الشغل

 

ممدوح عبد الحميد ده يبقا انا على فكره بس كنت داخل باكاونت تاني على جووجل بتاع اليوتيوب
يالا ما علينا

 

بصي يا نعكوشة
من حسن حظى انى حطاكي على الريدر
يعنى اللى كتبتيه ظهر لى
الاحساس د عادى معلش يمكن انتى بيادة شوية، و ديه بتكون عن طبيعة البنى آدم يعنى
بس معلش اغلطى و اعتذري و اتأسفى و لو مس نفسك
حيجيلك يوم و حتهدى و حتتغيري لأنك عاوزة تتغير
(انك لن تهدى من احببت و لكن الله يهدى من يشاء)
اما بقا بالنسبة للشغل
ممكن تشتغلى منجوبة فى شركة ادوية فترة الأجازة
مش ممكن برضه و لا ايه؟

 

نعكشة

طبعا الوظيفة المتاحة مندوب مبيعات لشركة ادويه

او لشركة مستحضرات طبية

انا كانت جاتلى الوظيفة دى من كام يوم ورفضتها

والدكتور حماده ابن خالتى كان عايز يروح

هوا متخرج

وبيقولى اهوه نقضى وقت لطيف ونلف فى البلد ويبقى لينا علاقات مع الشركات والناس

فى شركة فى المعادى

لو موافقة اجيب لك البيانات

وبالنسبة للأهل فهما على طول زى الشريط المخالف هما شايفين حاجة واحنا شايفين حاجة تانية

فى حاجات كتير بتكون السبب

التربية والنشأة والظروف المحيطة اللى اتربى فيها كل جيل + الحب اللى بيحبوه لبنتهم او ابنهم

ربنا يخليكم لبعض

صدقينى الواحد بيزعل اوى لما يفارق أهله أكتر من زعله على أى حاجة تانية فى الدنيا


تحياتى وربنا معاكى

فقرى قطاع خاص :$

 

و تشتغلي ليه أصلا
ده إيه الهم ده يا ربي
يعني واحدة بتدرس طب يعني السنة عندهم بسنة و ربع
و بيطلع ...... ولا مؤاخذة في المذاكرة و العملي و المعامل و أبصر إيه و مدرك إيه
و هما ممكن يدوب اسبوعين تلاتة و ترجع للعك تاني
تشتغل ليييييييييه ؟
ده إيه البنت دي يا ربي

اقولك
اشتغلي مستهلكة للزمن البسيط ده اللي هو فترة الأجازة
بس خليكي مستهلكة غير مسئولة



يلا سلام

 

لو شغل شغل .. انا رأيي انك تدرسي حاجه من الحاجات اللي انتي ليكي فيها ولو شوي بسيطة ....

التصوير مثلا والرسم ... دا ممكن يخليكي ديزاينر فوق الوصف ...

ومتتخيليش اد ايه الموضوع ممتع ... ممكن تبتدي كورسات ....

ورأيي طالما بتحبي التصوير والرسم متقتليش مواهبك ....

و متظنيش ان انتي متنفعيش في حاجه ....

لأ كلنا بيجيلنا الاحساس دا ... بس الفكرة اننا كلنا كدا ... والحكاية انك لسة في الاول ...

والدنيا بتمشي واحده واحده ....

وحتى لو اشتغلتي شغلانه زي منمدوبة ادوية ... ارجوك متسيبيش الكتابه او الرسم او التصوير او اي حاجه بتعبر عنك ..

الوظيفة لو كدا ليها حدودها انما متخليناش مسخ ...

ممسوح منا الهوية .. وعايشين وخلاص ...

شوفي الامكانيات والمواهب اللي ربنا حطها فيكي ... وشوفي خبراتك اللي اكتسبتيها ....

ربنا خلقك لحتة معينه محدشيقدر يعملها غيرك ...

دوري عاحتة دي ... ولو لقيتيها اوعي تسيبيها ...

مهما حصل ...

و أنا آسف لو كنت تطاولت في الكلام ...

بس انا ويعلم الله ... اني كنت اتكلم بصدق ونيتي هي فقط بقعة ضوء تنير الطريق ...
و أكرر أسفي,,,

 

على فكرة انا زيك تقريبا ... بس قررت اكمل الكلية ..

وخلال الكلية بحاول اظبط نفسي نفسيا واحاول اتعلم حاجه تفيدني في المجال اللي هشتغل فيه ....

اللي هو غير مجال الكلية تماما ...

كملي الكلية وبعدها اعملي اللي انتي عايزاه ...

و استغلي الفرصة والوقت بتاع الكلية انك تحددي انتي عايزه ايه وتنفعي في ايه

 

ممكن تشتغلي متدربه براتب بسيط في اي عياده
اذا كنتي تريدين العمل لشغل وقت الفراغ
ممكن تعملي لوح جميله ومفرحه وتهديها لدار الايتام
او ممكن حتى تعمليلهم وجبات او كيك
او للاطفال في المستشفيات
او توزعي عليهم قصص اطفال
وفيه افكار كتيره
لكن اذا كنتي عائد مادي
ممكن تعملي مندوبه لشركة تجميل على النت او عالواقع
او مندوبة لشركات التكنولوجيا كمان عالنت او عالواقع
اذا كنتي ماهره بالاشغال اليدويه تتعاقدي مع محلات بيع الهدايا وتعملي لهم بعض الاعمال ولكي نسبه من الربح
اممممممممممم
سامحيني طولت وهببت الدنيا بافكاري الجهنميه
اسال الله لك التوفيق والنجاح

 

السؤال هو

عاوزة تشتغلى ليه؟

 

بصي ...

انا كمان نفسي اشتغل

حاسة اني في قوقعة مقفولة ... :(

و يا ريت تبقى حاجة ليها علاقة بالتصوير ..
بصي على دي كدة

http://alfrasha.maktoob.com/archive/index.php/t-995809.html