نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

فاكر

ساعات كتير بيبقى نفسي أكلمك .
الصبح بدري.. الظهر عادي ... ساعة العصاري .. عالمغربية .. حتى كمان بعد العشا
بيبقى نفسي أقولك أنا حالي إيه
مبوسطة قوي .. اهوه عادية ... ولا حتى منرفزة
و أقف قدام صورتك و أتخيلك
و إنت بتطبطب عليا هنا و هنا

كتير كمان لما بلبس لبس و يعجبني أقول لما آجي أروحله هلبسه..ـ
ومبلبسوش .. بنكسف
فاكر زمان لما كنت ألبس جديد تقعد تقولي حلو دة و دة لأة ... مبحبش أبقى مُلفتة..

عارف كمان.. كنت بقف قدام المراية و أقلع نظارتي و أقول هروحله كدة .. و مبعملهاش
كنت بحس إني بكدة هشيل كل الحواجز اللي بينا .. اللى كانت بتداريني وانا قدامك ... كنت بخاف تشوف افكاري المتشتتة..

كان نفسي أعرف هوه انت ليه لما جيت عندنا أول مرة كنت قاعد كدة و مبلم
كنت مش مبسوط و مضلم
كنت خايف ولا إيه؟؟

فاكر ما والدي كلمك عالعفش و السيراميك و زعلته جامد و زعلتني
مش كنت قايلي إنك محوش وديعة في البنك و هتفكها
ولا كنت خايف تصرف عليا كل الفلوس اللي حوشتها

فاكر يا عادل لما والدي دخل علينا في الصالون و كنت موطي بتربط رباط جزمتك
وقالك بصوت عالي: بتعمل إيه حضرتك؟؟
اتخضيت انت و اتلخبطت.. خبطت راسك في الترابيزة ووقع العصير على بدلتك
سخسخت أنا

كل أما حاجة كانت تزعلنى منك ارجع و افتكر اليوم دة و كل المواقف اللى بينا ضحكتني و احس اني عايشة في اليوم زي ما حصل

طيب فاكر لما كنا بنتمشى بليل قوي في شهر العسل
وكنا بنتطوح من التعب و احنا راجعين من المحل
و الظابط وقفنا و فتشك و مكانش معانا حاجة تثبت اننا متجوزين
و قعدنا نقول إيه العمل
لحد ما بابا جاب الورقة من المأذون بعد ما طمنا لما اتصل
والله كان يوم عسل
يومها زعقت بصوت عالي و قولت : والله دي مراتي
مش عارفة ليه ساعتها حسيت إنك بطل

عارف .. كتير لما بقعد لوحدي بقول ياااااااااه كأنه لسة امبارح
انا فاكرة كل تفصيلة من حياتنا كل المحازن والمفارح
زي شريط السينما كل أما أغمض عيني يشتغل
و كل أما أبص في الشقة على أي مطرح من المطارح

ابنك دلوقتي كبر و بقة عندة ست سنين
ياختي جميلة لما تشوفه و هوه رايح المدرسة
زي العسل
هبقى أوريك شهادته.. كل درجاته كويسة
طالع لأبوه
وسأل عليك كمان .. و قالي : فين بابي يا مامي؟
حضنته جامد وقلتله وانا بصة فوق : بابي فوووووق هناك عند ربنا
آآآآه يا عادل ربنا يحرسه
بصلي بعنيه اللي شبه عيونك بالتمام و قالي : و هوه مش هينزلنا
ابتسمت و قولت لأة .. هوه مستنينا عشان بعد عمر طويل يا حبيبي إحنا اللي نطلعله.. و نعيش في سعادة و هنا

وحشتني .. قوي
لازم أمشي انا بس وانا رايحة اجيب خالد من مدرسته طلعت في دماغي أشأر عليك
مش هغيب عليك
واحتمال كمان اجيب ابننا معايا و اخليه من فلوسه يدفع صدقة ليك
متخافش
أما يكبر شوية هخليه يدعيلك - كل يوم - زي مانا بدعي ليك
سلامٌ عليك
......................................

حكوك التبع و النشل محفوسة لنعكوشة
..............................................
على جمب :الامتحان كان إى حد ما كويس ..
انا كنت متخيلة إنى مش هنطق ولا كلمة مع الدكاترة
أينعم لبخت
بس الحمد لله على كل حال
بس اهو سبحان الله
ربنا بيستر

19 قالوا رأيهم في العك اللي تحت ؟؟؟:

سلام عليكم
رائعه رائعه رائعه رائعه رائعه رائعه

عشت القصه بكل كلمه فيها
بجد احساس جميل قوى
ربنا يوفقك دايما

 

نعكوشة
انتى حتفرسيني ولا حتنعكشي افكاري
ديه قصة صح؟؟؟؟
و قصة من وحي خيالك المنعكش صح؟؟؟؟؟
اصل اختك مفروسة بتصدق كل اللى يتقال
اومال هيه بتتفرس بسرعة لييييييه؟
تحياتي

 

بحبك يا ربي قلبي شدا

عليكِ السلام
تسلمي
..........

واحدة مفروسة

قصة آه
مادام مكتبتش تحت انها كلام عنى
وكتبت حكوك التبع و النشل اذن فهى مجرد بتاعة من وحي الخيال
او من وحي التقمص

......

سلام عليكما

 

انتي متأكده ان ده خيال؟

 

مفيش كلامـ يتقال غير انك موهوبه بجد وعندك حس فني قووووي

ربنا يبارك فيك اختي وحبيبتي في الله

:

 

يا بنت الايه
انتي خلتيني اعيط
انا اتأثرت اوي
اد ايه ابدعتي
و خاصة الحتة الاخيرة
انا حسيتها ملهاش حد خالص
انا لحد الان بعيط
هي ناقصة يعني يا ست انتي
طب كنتي خلتيه اتجوز عليها طيب عشان اتغاظ منه و ابقه عوزة ادعي عليه
مش تخليني اعيط و انا متأثرة كده
روحي كده ده انتي طلعتي سوسة

 

bgd toooooooooooo7fa wahmeya bgd bgd teslam 2idek w gamda gidan masha2alah

ta7eyatii

 

وش شفايفه اتجاهها لتحت وعنيه متنحة

بصى يا نوشة...انا كنت مبسوطة فى الاول..وجسمى بيقشعر كدة مع كل جملة..ودماغى عمالة تفكر..ياترى هى بتقوله كدة عشان هو اتغير من ناحيتها؟؟؟طيب مبقوش زى الاول؟؟؟ طيب غلطت وبتصالحة؟؟؟

بس اتصدمت خالص لما عرفت انه مااااات...

الموت يختار الجياد...الجملة دى انا مقتنعة بيها بغباء معرفش ليه..فعلا الموت يختار الناس الكويسين المؤثرين اللى بيعرفوا يحبوا..وبيسيبوا الناس التانيين الوحشين..

بس تفتكرى ليييييييه انا بحب الاحاسيس اللى فيها حزن دى؟؟ دة نوع من انواع النكد وللا انا فعلا بنبسط لما احس انى حسيسة وبفهم فى المشاعير الانسانية؟؟

على فكرة انا عندى قناعة انى هفقد حد بالطريقة دى...حد هحبه اوى وهيموت...تعرفى انى شايفة انه فعلا الناس بتعرف تعبر لبعض عن الحب بعد الموت؟؟ يعنى بيبان اوى حبك ليا عن طريق تصرفاتك بعد ما اموت...انا اى نعم مش هعرف انتى عملتى ايه تعبيرا عن حبك اللى كان ليا..بس انا حاسة بكدة..

عموما انتى وصلتى الاحساس صح...الله ينور عليكى..

الحمد لله انا والله فرحت من خبر الامتحان دة...برافو الله ينور عقبال الباقى يارب

يارب يعديلك فترة الامتحان دى على خير ويعملك اللى فيه الخير ليكى يارب

سلام عليك

 

رايءء أن البوست تحفه هند أختي اصرت عليا أني اقراءمدونتك علشان كانت عجباها أول بوست فعلا حلووووووو أويييييييييي أوييييييييييييي


تحياتي مبتسمةدائماااا

 

قلمك امتعني حتى النخاع وابكاني حتى الشنهفة
تحياتي

 

لورانس العرب

أجل .. تماما

.........

البت المشمشية

شكرا

.........

ghorbety

تسلمى
الله يكرمك

.............

maha zain

هههههههه

معلش .. المرة الجاية نجيب الراجل شرير
هههههههه

..........

iam the crazy one

tnx

...........

enjy

الموت بياخد كل حد
بس انتى مبتحسيش بفداحته إلا مع الناس الحلوين اللى بتحبيهم
افتحى صفحة الوفيات عشان تتأكدى

مش عارفة
انا برضو بحب الحاجات المأساوية
بس مش دايما

بالمناسبة ( إنتى فعلاً من نظرتى المتواضعة البلهاء السطحية ليكي ) فعلاً حسيسة( الكلمة دي سمعتها مرتين مرة فى مسلسل امرأة من زمن الحب عبلة كامل كانت بتقولها و مرة دلوقتى منك).. و بتفهمى كمان

عاوزة اقولك انى لما بدعى ربنا
دايما بدعي
يارب خدنى قبل ما تاخد اى حد قريب منى
مش متخيلة حالتى هتبقى عاملة ازاي

مش عارفة
اعتقد اة
اتفق
بس اقولك حاجة
بيبان برضو وانتى عايشة
بس الطرف الاخر فى معظم الوقت
بيبقى مش موجود عشان يشوف اللى بتعمليه
ولما بيبقى موجود بتتكسفى تعملي الحاجة اللى بتدل على حبك دة ليه
دة بالنسبالي

يرحمكم الله
يارب يا اوختى يا رب

عليكِ السلام

.........
RANIM

مع انى مش عارفة مين هند
بس تسلمى انتى و هيا
بالمناسبة
سواء اول تعليق او آخر تعليق
انا بسعد بالتعليق انشالة لو كان بعد ما البوست اتعرض بقرن
مبتفرقش معايا مين جة الاول
المهم الكلام اللى جوة التعليق
وخصوصا لو هيورينى حاجة مشوفتهاش
........

فكرة من الزمن دة

معتقدش انى استحق هذا الكلام

بس تسلمي

...........

سلام عليكم

 

بجد عيطت غصب عني المني الكلام قوي وحسيت قدايه انت شاطرة انك تعبري عن المشاعر دي ببساطة كده برافو عليك

 

بسم الله

أول تعليق هنا فى المدونة

بجد عجبنى أوى القصة دى

مشفتش تقمص ولا إحساس فى القصص اللى قريتها فى الفترة الأخيرة

بجد عجبتنى

تحياتى لكى على القصة الرائعة

قلبى بيقولى مش قصة لانها واقعيه اوى

واقعيه بشكل فقرى

وانا متعودتش اشوف واقعيه فقرية غير فى مدونتى

تحياتى مرة اخرى

شاب فقرى

 

أحلام جوليا

لم أقصد أن القصة تبقى بهذا القدر من الحزن
اكتر من الوفاء الذى افتقده فى نفسى تجاه الاخرين فبعوض دة فى القصص

نورتِ

........

شاب فقري

هى فعلاً من محض الخيال
انا ولا اتجوزت ولا شوفت اى ملابسات للحاجات اللى بتحصل قبل الجواز
غير فى الافلام

ومشوفتش اى واحدة جوزها مات و سابلها ابنها

محض تقمص
بيطلع فجأة كدة و خلاص

عامة

نورت

........

سلام عليكما

 

جميلة جدا و بسيطة ساعات ببقى عايز اكتب كلام كدة بس مش بيطلع كويس انك بتعرفى تتحكمى فى الكلام و القلم ....و المهم و الأهم متكمليش فى سكة عقاب الذات عشان دة هسهس عند البشر كلها بس المهم اننا الى نتحكم فية و الهسهس دة انا دورت علية كتير وبحاول ابطلة انا كمان و لية اسم علمى
سلام :)

 

شكرا
بس انا مبتحكمش فى لقلم
القلم هو اللى بيتحكم
انا لما ببقى عاوزة اكتب حاجة تعبر عن اللى حاساة فعلا بجد
مبعرفش
للأسف

بالنسبة للهسهس اة
انا عندي مشكلة تعذيب النفس دية
ومش عارفة اتخلص منها
ربنا يعافينا بقة

سلام عليك

 

الله ..
بالله كيف فعلتيها :)

سمعت انكِ لا تحبي كلمآت الشكر أو الثنآء

وانا لآ أفقه حقا في لغة الكلام والنقد كثيرا ً

الا انني رايت هنا من الجمال الكثير

عزيزتي

اراك ِ دوما ً مشرقة

زهوري ..

 

وحبي لك لن يموت

مش عارفة
هيا بتيجي كدة

يعني مبتعمدش
ولما بحاول اتعمد
ممبتطلعش ليه معني


الله يكرمك
تسلمي

نورتي

سلام عليكِ