نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

الأطفال هتجيبلى شلل


عندى امتحان اطفال يوم الخميس 1- اكتوبر دة
اشعر بالشلل
مش شلل فى الاطراف
لأ شلل فى الدماغ.. المخ يعنى
يعنى انا لما ببقى فى الايام العادية
ومبنجزش
بخلص مثلاً قول 20-30 صفحة و اكون فاهماهم
انما اقعد فى ايام الامتحانات
يوم كاااااااااااااااااامل
فى 7 صفح
لأ!! إية الحلاوة دية
لأ و اية
حاسة انى مش فاهمة منهم حاجة
المادة 600 صفحة باين
مش عارفة فيه اية
انا بدعى ربنا
و بشغل قرآن وانا بذاكر
وبصلى ركعتين
وبرضو حاسة بالغباء
الاطفال دى مادة جابتلى السل صراحة
يلا
كان الله فى العون
المشكلة
ان امتحان العملى بتاعها
و الراوند كمان
كان اسوء راوند و امتحان مر عليا فى حياتى
وجبت فيه درجة ما يعلم بيها إلا الله
حاسة بالتشحلل صراحة
وش مقروف من عيشتة و بقة معووج
و عينة فيها نظرة شلل
ربنا ييسر
.........................
اللهم إنك تعلم بحالى
وأنتَ غنى عن سؤالى
فارأف يا إلهى بعبدتك
و أعنها كيما تعين المسلمين يوما

9 قالوا رأيهم في العك اللي تحت ؟؟؟:

هو انتي في سنه خامسه طب عين شمس ؟؟

 

ربنا معاكي يا نعكوشه ويوفقك يارب ويسهلك كل صعب وييسرلك امورك ويهون عليكي ويشرح صدرك يارب

وان شاء الله كله يعدي على كل خير

ربنا يكرمك يااااااااااااااااااااارب


بالتوفيق ان شاء الله ..

 

دة الاطفال احباب الله
بس مش عارف مادة "الاطفال" موقفها ايه؟

 

ان شاء الله هتعدى على خير

 

600 صفحة !! ربنا معاكى

مع ان الواحد شايف نفسه خبرة فى طب الاطفال من كتر ما راح للدكاترة بهم
بس اكيد خبرتى دى هى ال 7 صفحات بس من ال 600 :)

 

ربنا معاكي ويوفقك يارب .. :)

 

اللهم لا سهل الا ما جعلته سهلا
وانت سبحانك تجعل الحزن سهلا

فات الكتييييييييييييييير
مبقاش غير الأطفال

ربنا معاك

 

عملتى ايه فى الامتحان يا نعكوشة؟؟؟؟

يارب خير يارب

انتى قلتى هتيجى بعد الامتحان ومجيتيش فانا قلقت تكونى زعلانة من الامتحان او متضايقة فجيت اسال

ها عملتى ايه بقى طمنينى