نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

أنا مريضة

تحديث:

أولاً أنا لا أناقش هل أنا كويسة ولا مش كويسة .. كل انسان فيه عيوب و مميزات.. و محدش شاف أفعالى فى العلن و الخفاء عشان يقيم هل أنا كويسة او لأ
ثانياً انا مش ببعد اى شخص عنى .. انا ببعد الناس اللى بحسهم قريبين من قلبى
ثالثاً انا افعالى فى ابعادهم عنى فى البداية غير منفره .. فقط أبتعد .. فلو لاقيتهم متمسكين بيا ببدأ ءأذيهم عشان يبعدوا
رابعاً انا كنت فعلاً طول عمرى بكبر و مبتفرقش معايا بس أكتشفت إنى بخسر .. لإنى اعيش وحدى رغم كمية المعارف و الصحاب ( الطيارى) المهولة ( اللهم لا حسد فى ديه كمان عشان تبقى كملت قلبا و قالبا) اللى عندى ..

..................................................

انا مريضة بداء ابعاد الناس عنى
او ان شئت تسميته بأذية المقربين إلى قلبى بهددف اقصائهم عنى .. دة لو مبعدوش عنى بالذوق ببعدهم بالعافية جتى لو اذيتهم او عملت حاجات تقرفهم منى...ـ

مش من حقى أبداً إنى ءأذى حد لا لشئ إلا لأنه حاول يقرب منى
لا لشئ إلا انه حاول يكون جمبى
لا لشئ إلا انه حاول يساعدنى و يخلينى افضل
إنه حاول يسمعنى من جواه
إنه فهمنى
إنه عاوزلى الخير
إنه بيحبنى

مش عارفة أنا بعمل كدة ليه .. و مش معنى الكلمة دى إنى ببرر لنفسى إنى أعمل كدة
أو إنى أحاول أطلع نفسى يا حرام ضحية المرض اللى عندى إن شئت أن اسميه مرض

أحب أقول لكل اللى اذيتهم
متخافوش إنتوا مش خسرانين حاجة أنا انسانة من جوايا مش كويس فاتكوا كسبتوا انكوا بعدتوا عنى
متخافوش ربنا هيعوضكوا عنى بحد أحسن منى خمسين مليون مرة
متخافوش ربنا هينتقملكم منى
متخافوش أنا بتوجع إنى ألمتكم أو وجعتكم برضو

بتوجع قوى لإنى مكانش نفسى أى حد ياذيكوا بس صدمتى إن أنا اللى اذيتكوا
بتوجع لإنى كنت محتاجالكوا .. قوى
بتوجع لإنى هفضل لوحدى .. بتجرع الألم..
هتوجع لإن فيه ناس تانية برضو بتقربلى و كل ما بيقربوا بفتكركوا..
و بقول هعمل فيهم كدة لما يقربوا منى برضو
بحاول ابعدهم برضو

متخافوش ربنا هيحاسبنى بالجامد لإن منكوا ناس ربنا بيحبهم قوى ..
عارفة انكوا مش هتقروا الكلام دة
بس حبيت اقوله يمكن حد يوصلهولكوا
لو حد عارف اصلا انتوا مين

انا مريضة و نفسى اعالج نفسى
مش عارفة اللى فيا دة اية؟
هل حب اذية الناس؟؟
بس انا مبحبش ااذى حد معرفهوش .. و مبنبسطش لما بأذى حد أعرفه
تقريبا انا بأذى نفسى باذيتى للناس المقربين منى


طب عند؟؟
طب انا بعند على مين؟؟
يعنى انا مش فاهمة
لما حد ينصحنى بحاجة عشان مصلحتى و اعند فيها
اية الغباء دة؟؟
ليه بعمل كدة
ليه لما بحاول اقول لا مش هعند
وهبقى حلوة
وهبقى مطيعة
وهبقى متواضعة
بلقينى اكتر قرفا و كبراً و غباءً و عنداً
ليه ؟؟؟؟؟؟؟؟
لية بعمل كدة فى الناس و فى نفسي؟؟

يمكن انا معنديش وفاء؟؟
طب هل الوفاء دة طبع؟؟
ولا شئ مكتسب؟؟
طب لو كان طبع ينفع اتطبع بيه؟؟
ولو شئ مكتسب ازاى اكتسبة؟؟

يمكن انا متكبرة فعلاً زى ما بيقولوا ؟؟
والله يمكن
رغم انى مش فاهمة فين بالظبط التكبر بس اكيد موجود مادام هما شايفينه
طب انا اعالج دة ازاى؟؟
هل ينفع اعالجة بنفسى ولا محتاجة طبيب نفسى؟

طب اللى اذيتهم دول
فيه ناس منهم انا مش فاكراهم
ماهو انا زاكرتى نيلة
المفروض اروح اقولهم ايه؟
انا اسفة؟؟
ططب اسفة دى هتفيدهم باية؟؟


ما كان قد كان
طب اقولهم اسفة ايه؟
اسفة انا بعدتكوا عنى عشان لاقيتكوا قربتوا بزيادة؟؟
عشان لاقيتكوا بتحبونى و تخافوا عليا؟

مش عارفة
اة صحيح
انا عارفة انى عيلة إنى فتحت المخروبة بتاعتى
بس انا فعلاً محتاجالها
انا فعلاً محتاجة اتكلم مع اى حد
فعلاً محتاجة افضفض
فعلاً حاسة انى بائسة و منعدمة
ومليش لازمة فى اى شئ

انا اسفة إنى فتحتها
بس خلاص بقة
يفيد باية الاسف
ملهوش لازمة

ربنا يرحمنى و يهدينى
و يستر

آه صحيح .. محدش يقولى تصالحى مع نفسك و يسكت لإنى مش عارفة اتصالح معاها ازاى؟؟
وعارفة إنى لو تصالحت معاها كله هيتعدل بس انا مش عارفة ازاى اتصالح معاها أصلاً..

ومحدش يقولى أقعدى مع نفسك و يسكت برضو .. لإنى قررت كتير اعمل وقفات مع النفس بس مبطلعش منها بأى شيء
ببقى مش شايفة غير اسود .. يمكن حتى مبشوفش حاجة .. بحس إنى قاعدة فى اوضة ضلمة .. يا ريت تقولولى اناقش ايه مع نفسى بالظبط لما اقعد معاها؟؟

اعتبرونى عيلة ..
اعتبرونى طفلة...
اعتبرونى فى جزء من الاعاقة الذهنية...
اعتبرونى معنديش خبرات....
محدش يعتبرنى انى بميز ولا حاجة .. يا ريت توضيح للحلول ..
ودمتم سالمين


42 قالوا رأيهم في العك اللي تحت ؟؟؟:

انا بس اللي بتعجب له مين قال لك اساسا انك انسانة وحشة؟
صحيتي من النوم قررتي انك وحشة وعلي اني اعاملك بنظرتك "المريبة" عن نفسك
طيب عندا فيكي انا بتعجبني آرائك اللي دايما عكس الناس
انتي مش مصنوعة علشان توافقي وتجاملي الناس
بالعكس دايما بتكتشفي حاجات خافية ومحدش خد باله منها
وبعدين اما انك غريبة هو يعني نتيجة لكل تعليمك وثقافتك تعرفي ان فيه مخلوق على وجه الأرض وحش بيعترف انه وحش
بذمتك لو انتي عبارة عن مجموعة من الفظائع والكوارث تمشي على الأرض مش كان زمانك في جمعية شباب المستقبل ولا مؤهلة لمنصب وزيرة
اظنك موصلتيش لحاجة من دول وعليه انت انسانة عادية جدا و"تون" النفس اللوامة عالي شوية وكل عام وانتم بخير

ولن يزول عجبي من عدم حبك لنعكشة
ياربي ده انا بحب ستيتة حب لو تعرفيه يمكن تحبيني بدل نعكشة :) ويمكن تغيري وتقولي لأ نعكشة دي فلة دي ستيتة دي مغرورة ومقرفة

مش ها انصحك خالص
انا بعبعت معاكي بكلمتين ولما اشوف أخرتها

فرحانة انك فتحتي المدونة واني دخلت لقيتها منورة تاني

 

يافندم الفكرة فيما أفعله

اعتقد ان حضرتك مشوفتيش اللى بعمله

وانا مش هجاهر بالمعصية علنا و اقول عملت كذا و كذا

بس مظاهر الناس خداعة حتى لو كنت شكلى طيبة من برة

انا بس بحاول اصلح ولو جزء بسيط من عيوب بالهبل: - لا يراها سواى و المقربين
-ولا يتأذى منها سوى المقربين منى و أنا
................
جزاكِ الله خيراً على أى حال
كل سنة و حضرتك طيبة
سلامٌ عليكِ

 

يا خراااااااااابى
اخيرا يا نعكوشتى
و بعد عمر طوييييييل فتحتى صفحة التعليقات للعالم الغلابة اللى بتحبك و نفسها تقولك سنتوفة كلمة على رأى يوسف ؟
لأ انا موافقة على كل كلمة ف البوست د
إنتى بتعملى كدا معانا برضو
بتبعدينا
لما كنتى عاوزة تقفلى المدونة و تشطبى ..صح ؟!!
يعنى انا من المتضررين درجة أولى مميز
يا حبيبتى كل كلامك على راسنا و على راس كل احبابك من فوق
و اوعى تكونى فاكرة
إنهم زعلانين منك
هما جايز يكونوا زعلانين عليكى بس
حاسين إن قربهم منك اكتر ممكن يخفف عنك و يريح قلبك
اختك فاتيما نفس حالتك تقريباً
بس انا متصالحة مع نفسى قوى
هتقوليلى إزاى ؟؟؟
و غششينى الطريقة يمكن أعرف انفذها
هقولك إن بقالى كام اسبوع عاوزة اكتب بوست مشابه لبتاعك دا و ترددت لأنى مش عارفة هصيغه ازاى من غير ما ازعل ناس و يتفهم غلط ..بس إنتى سبقتى بالشجاعة و المصارحة مع النفس
يا حبيبتى تاكدى إنك لو مكنتيش مرتاحة مع نفسك
مش هتبقى مرتاحة و إنتى بتتعاملى مع غيرك
و لو ضغطتى على روحك مرة
اتنين
عشرة
عشان المقربين
هتلاقى روحك بتنفجرى فيهم
بعد مدة
انا حصلى كدا مع امى
و مؤخرا مع صديقة مقربة منى جدا
و زماااان حصلى مع طليقى
و ناس كتيييير
كنت باجى على نفسى و أتعلم أتأقلم
إكتشفت إن دى مش أنا
مبحبش حد يقرب منى قوى كدا
بياخد من روحى و يستهلكنى
انانية يمكن
خوف يمكن
حذر بقى واجب يمكن
عشان كدا لما دخلت التدوين قررت مبوظش العلاقة الحلوة دى و اقرب الناس قوى منى لأنى القرب الشديد بيعمل مشاكل منى أنا على الأقل
انا مبسترش و بحبط اللى قصادى
و وحدتى بقت صديقة عمرى اللى مش هتسبنى أبدا و لا هسيبها
و الحمدلله الجميع تقريبا مقدر دا و محدش بيزعل منى
و لو حد زعل مبقدرش اعمله حاجة
غير إنى اقول معلش سامحنى
آخرى كدا
لازم اسيب لروحى مساحة كافية فيها شوية من الهدوء و الرضا و النفسى عشان اعرف اتحمل كل الباقى
و مش هتك على نفسى عشان حد
اللى مستغرباله بقى يا نعكوشتى إنى وصلت للمرحلة دى بعد 37 سنة منهم عشر سنين نكد و مشاكل و قرف و هروب و و بعدين فراق عن إبنى و .....و ...
لكن إنتى يا حيبيبتى
إنتى لسه صغننة على كل دا
جبتى منين كم الالم و الخوف دا
اللى مخليكى عاوزة تحمى نفسك و تبعدى و حاسة بالذنب تجاه غيرك بالشكل المؤلم دا كله ؟!!!!
انا قريت رسالتك عند خيخة و ربنا ما يحرمنى منك و فرحانة إنى و يوسف كنا ف بالك لما كتبتيها
و إنتى لسه عندك كتير تقوليه
فخصيمك النبى ما تقفلى المدونة بقى
سيبها و سيبينا نقولك أى حاجة ف بالنا
و مترديش يا ستى
مش هنضغط عليكى
و نقولك ردى ع التعليقات
بس نحس حتى إنك بتقريها و سمعانا
ماشى ؟؟؟
طيب
أنا بحبااااااااااااك
و بوسة و حضونة

 

عارفه :)

انا كل يوم بدخل مدونتك والله
كل يوم بلا استثناء

عايزة اقولك

احنا كلنا مش كاملين وكلنا بنغلط وبنغلط كتير اوي كمان وربنا بيسامح وبيغفر
بس اللي عايزاكي تعرفيه ان التشاؤم من الكفر
وربنا قال ولا تقنتوا من رحمة الله
انا نفسي بغلط وأكيد غلطات اكبر منك
بس تعرفي الحل ايه ؟
وصدقيني انا مجربه
واحده واحده قربي من ربنا وابعدي عن اي ذنب يغضبه
وخلي بالك انا مش شيخة ولا حاجه بس واحدة مجربة
ابعدي عن اي حد يبعدك عن ربنا وخليكي مع نفسك وصدقيني ربنا هيقف معاكي
وهتحسي انك قويه اوي طول ماربنا معاكي
بس بلاش يـأس ولو معرفتيش تبعدي عن الذنب حاولي تاني وتالت
صدقيني هترتاحي كتير بس اوعي تقولي خلصت ومعتش ينفع ابقي كويسه
لا اوعي تفكري في كده وخلي عندك أمل دايما
صلي وحافظي علي الفروض وصدقيني هترتاحي
انا مكنتش بصلي وكنت حاسة ان الدنيا وحشه اوي
بس دلوقتي بقيت بحس ان الدنيا جميله اوي
حاولي وبلاش يأس
الدنيا حلوه والاحلي كمان انك تقربي من ربنا
غيري كل حاجه فيكي واحده واحده
وصدقيني هتوصلي وهتبقي اجمل واحده
طول ما جواكي مفيش حاجه وحشه
وطول ما انتي عارفه عيوبك
يبقى انتي فعلا انسانة جميلة وحلوة
وزي القمر كمان
يالهوي اصوت يابت :@
استني متمشيش عشان هكمل :)

 

مهما كنتي وحشه زي مابتقولي اكيد فيكي حاجه حلوه
ودي اللي هتاخدك للطريق الصح وتبقي تمام
مش معقول انتي اتخلقتي علي حالتك دي ..
أكيد كنتي كويسه
واكيد في ايدك ترجعي تاني
صدقيني واسمعي كلامي
ابعدي عن اي حاجه تفكرك بماضيكي اذا كان وحش ومضايقك
بس فكري في الي جاي ولما تموتي وانتي بتصلي احسن ماتموتي وانتي علي حالتك دي
حاولي تصلي كتير وعوضي ايامك اللي انتي شايفه انها وحشه
الدنيا حلوه والله والاحلي انك ترتاحي ومتتعبيش نفسك بالطريقه دي
ابعدي عن اي حد يفكرك بحاجه وابعدي عن اي حد موديكي لطريق غلط
بصي لنفسك وابدأي تتغيري وصدقيني ربنا هيقف معاكي
علي فكره انا مبحبش اشوف حد مضايق خالص والله
ونفسي اعمل اي حاجه واحل اي مشكله لأي حد
اتكلمي مع حد بتحبيه وارتاحي
صاحبتك او اي حاجه
اشكي لنفسك وابكي كتير علي اللي فات
كل الناس بتقول العكس وبتقول متبكيش علي اللي راح
بس انا بقولك ابكي لحد ماترتاحي
ولو فضلت تبكي طول عمرك صدقيني هيجي عليكي وقت تحسي انك خلاص دموعك بقت غاليه
وتقولي انا ببكي علي اللي فات ليه ماخلاص انا بقيت كويسه
انا نفسي اعملك اي حاجه والله
لو هتدخلي كل يوم تقولي اللي فيكي والي تاعبك صدقيني هتلاقيني وهتلاقي كل الي بيحب يحل مشاكل الناس معاكي
صلي وابعدي عن اللي يخليكي ماشيه غلط
حبي الدنيا وعيشيها
ومتقفليش علي نفسك وتبقي في حته لوحدك
خليكي مع الناس الكويسه
وخلي بالك من نفسك واوعي تفكري في حاجه تغضب ربنا
الماضي اللي فاتك ده انتي أكبر منه وهتقدري عليه والله
اهدي وفكري بالراحه
وصدقيني هتلاقيكي مرتاحه اوي

انا شكلي بعيد وازايد ف الكلام كتير
وانا عارفه انك عايزة حاجة عملية
مش عارفه انا كده افدتك بحاجة ولا لا

ربنا يعينك
ويهديكي للخير ديما
:)

 

اولا ازيك
ووحشتيني اوي
وكل سنة وانتي بالف خير

والبوست بتاعك النهاردة انا موافقة علي كتير فيه

انك فيكي وحش .. ويمكن كتير..
مين فينا مفهوش حاجة وحشة .. ووحشة اوي
او حاجات كتير وحشة

مين فينا مش بيبص كتير في المراية وعاوز يمسك الشخص اللي قدامه يضربه ويبوبخه ويهينه لكن برودة الشخص الاخر مستفزة اكتر لانه مش بيتالم من خلال المرآة ولا بيندم

لكن اي انسان بيمر بازمات وبيتغير ساعات علي طول وساعات لمدة صغيرة .. ايه يعني لما تتغيري انتي كمان وتبقي وحشة شوية وترجعي حلوة تاني

مهو انتي اكيد في يوم كنتي حلوة .. وحلوة اوي كمان .. والدليل زعلك دلوقتي .. والدليل ان الوحش ده طارئ عليكي

عاوزة رايى
استرخي
زي ما بتسترخي وانت بتعومي كدة
سيبي التيار يحدفك من غير ما تقاومي كتير
هتلاقي نفسك وصلتي للبر

ازاي
اقبلي الوحش اللى فيكي
متعاقبيش ولا تلومي نفسك عليه
وهو هيروح لوحده وبالتدريج

عارفة ليه
عشان كل حاجة بتعوز تربة مناسبة تنمو فيها
وانت شخصيتك مش تربة مناسبة لكل الوحش اللي فيكي

اما بقي للوحش اللي فيكي من زمان ومش قادرة عليه
هيجي وقته
ومتحاربيش نفسك في اكتر من جبهة
اختاري حاجة واحدة بس تحاربيها وتقاوميها

وجربي
الدنيا تجارب
ومتبخليش علي نفسك ابدا بانك تطلبي مساعدة حد .. حتي لو مش هتنفذي النصيحة .. اسمعيها وخزنيها .. يمكن تنفع في يوم

وللحديث بقية ...

متقفليش التعليقات تاني بليز

 

يا الله ..

لسه مش قريت البوست بس ماصدقتش نفسي لما لقيتك كتابه موضوع جديد وكمان التعليقات مفتوحه

والله في البال دائما يا مريومـ ويعلمـ ربي اني كان نفسي اقول كل عامـ وانت بخير بس مش كنت عارفه ازاي والحمد لله اني عرفت اوصلك باي طريقه ..

بجد انت من الناس اللي بحبها في الله جدااا وبعدك عن التدوين اثر فيا جدا ومدونتك عنوانه متسجل علي المتصفح عندي كنت بدخل مباشر واتفرج علي رسوماتك واقول ماشاء الله عليها حتي كنت بفكر فيك امبارح وتخيلتك لو عملتي معرض ههههه هتبقي فنانه عالميه

رغيت كتير اصلي ما صدقت لقيتك وحشاني والله ويارب تكوني بخير .

ها اقرءالموضوع وبعدين ارجع اكمل رغي ..

 

وحشتينى قوى قوى
يمكن مش هتصدقى فرحت قد ايه انى لقيتك رجعتى تدونى تانى
بس برضه مش هتصدقى فرحتى قد ايه انك فتحتى التعليقات
انا هاقولك زى ستيته انت بتكتبى بشكل مختلف عن الناس التانيه بما فيهم أنا..بتقرأى ما وراء الكلمات
وده هو اللى تعبك انت دايما ماشيه بعيون فيها الترا ساوند
معلهش انا أدبى بس يعنى عارفه الجهاز
انا عارفه انك عايزة تكونى الاحسن وبتحولى تتخلصى من عيوبك واجمل شئ انى ابقى عارفه عيوبى بس الاجمل انى اشوفها صح..مش ابالغ فيها
يا نعكشه انت بتبعدى الناس خايفه منهم مش خايفه عليهم..خايفه حد يجرحك ..لانك حساسه
بس مش هتجمدى الا لما تنجرحى كتيير وتتخمى اكتر
على فكرة انا اهوه كبيره عندى 45 سنه الا سنه علشان الرقم بايخ يعنى
ولسه واخده قلم محترم معلم على قلبى لغاية دلوقت بس عادى يعنى..ربنا برضه بيعوض
اتعاملى مع الناس بطريقتك لانهم بيحبوك زى مانت
على فكرة انا بستنى تعليقاتك عندى ..علشان ااقول لما اشوف البت حبيبتى اللمضه دى هتقولى ايه محدش قاله

من فضلك بما انك وسطينا فى التدوين ..مش من حقك تقفلى التعليقات إلا بعد استفتاء
ومش من حقك تلمى ورقك وتقفلى المدونه
ومش من حقك تحرمينا نعبر عن مشاعرنا تجاهك
عايزة ااقولك انى أنا وماما نور ( مدونة كلمات من نور ) بنحبك قوى وننتظر تعليقاتك سوا
نعكوشه اجمل شئ انك تبقى انت...ومش مهم اى شئ تانى
لانك جميله كده
والعيوب كلنا مليانين عيوب
ادعى ربنا بس انه يخلصك من الشئ اللى بيضايقك فى نفسك
وهو هيستجيب وهيعدك ان شاء الله برضاه علشان عاوزة تكونى الافضل
ام البنات بتحبك قوىىىىىىىىىى

 

اعتقد انك بحاجة لطبيب نفسى ، اولا حتى تستطيعين البوح بما يعتمل فى قلبك بدون خجل او تحفظ وهذا نصف الطريق
وثانيا حتى يصف لكى العلاج الامثل وهذا للوصول الى اخر الطريق
وقد يساعدك ما ساعد الكثيرين وهو العمل اليدوى ( او لعب الرياضة ) لدرجة انهاك الجسد ثم النوم العميق

 

بسمـ الله ..

من غير زعل انا حاسه انكـ كدا فعلا مش وحشه لا حاسه انك انطوائيه ومش عايزه حد يقرب منك ويصاحبك عن قرب والعيب هنا مش في الناس اللي حواليك اد ما هو ربما خوف جواكـ من شئ انا مش فاهمه بس اكيد انت عارفه وحاسه كويس اوي

بصي يا نعكشه اولا لازم يكون عندك ثقه في نفسك مش كبر زي ما بيقولوا هما ممكن واخدين الفكره ديهع عنك علشان مش بتتكلمي معاهم مثلا او طريقه معاملتك معاهم بيتكون بحذر نتيجه كل التخيلاات اللي انت حطاها في دماغك عن نفسك اللي كتبها في البروفيل محدش ابدا بيعيب في نفسه ويفضل يقول انا وحش لان الفكره ديه هتترصخ جوا دماغه ولو اي موقف حصل هيفتكر انه هو المسئول في حين ممكن اللي قدامه يكون هو الغلطان ..

هوني علي نفسك ولازم اقولك اقعدي مع نفسك شويتين بس مش هتقعدي تفكري لا هتقعدي تسمعي الشريط دا

http://audio.islamweb.net/audio/index.php?page=audioinfo&audioid=117130

دا مواقف من حياه الرسول عليه الصلاة والسلامـ وازي كان بيتعامل مع الناس مع اختلاف نفسيتهمـ ودا فيه نصائح لنا لاننا شئنا او ابينا مش هنعيش لوحدنا ..

ولو عايزه شئ عملي ياريت تفكري تحضري محاضرات تنميه بشريه في مهارات الاتصال مفيده جدا وبجد بتفرق مع الواحد كتير

ولو مش حابه اشتري كتاب اسمه استمتع بحياتك للشيخ محمد العريفي مفيد لابعد حددددد ...

واخر حاجه هقولهالك

((((((((( حبي نفسك )))))) علشان تعرفي تدي الحب دا لغيرك وتعرفي تتعايشي في الدنيا ديه


وكلي امرك لله والجي اليه وناجيه وان شاء الله هيشرح لك صدرك ويسر لك امرك ..
انسي اللي فات وما تفكريش فيه وافتحي صفحه جديده في حياتك نيتك فيها حياتي ومعاملاتي لله واكيد طريقتك وحياتك كلها هتتغير وهترتاحي ..

ربنا يرزقك هدوء النفس وراحه البال ويبارك فيك انت حد كويس والله يكفي انك مسلمه وموحده ..

يا رب ما تقطعيش حبل الوصال بيننا وهو باب هذه المدونه ..

السلامـ عليكمـ

 

yaa benty 2l mawdo3 msh be7elwa w we7sha kol 2l mawdo3 mar7ala bet3adi 3alekii maho 2l aza da liih shofi da liih ya2ema msh 3arfa tetala3 2li gowaki fa beyet7awel lenarfaza
ya2ema masalan 7agat ketiir so3'ayara meday2aki men 2l 3alam da
sa3at 2l wa7ed men kotr mahowa 7aziin beykon ka2eno 3edwani masalan aw sha3noun da msh 3ashan howa aslan keda laken 3awamel

ana ma3andish 5ebra awi bas ana aka2edlek 2no mawdo3 wa2t 7aweli teshofi nas bet7ebihom 7awli te3meli 7aga gedida tesafri maslan 3'ayari gaw w isa 2l donia terga3 7elwa tany

srry 3ala 2l franco ma3andish 3arabi 3ala 2l lap
bas 7aset 2ni lazem akteblek 7aga
wadini katabt showayet 3ak malosh lazma bas 7aset 2ni 3amalt wagbi :D :D

ta7eyaty ya amar

 

ايه العك ده بقه
مين قال ان نعكشة وحشة بقه
بس انتى عارفه
انا اساسا مصدقتش انى بعلق عندك
فينك من زمان
واشمعنا قرار انك تقفلى صفحة التعليقات ده
تانى حاجة
كل انسان بيجيلو وقت بيحس انو وحش
لو حسيتى كدة
اجرى بسرعه اعملى اى حاجة لله خير يعنى
وصدقينى الاحساس هيختلف

 

اولا انا مش متخيلة انى بعلق عند نعكشة هانم بحالها
شوفى انا عارفاكي وعارفة مدونتك وبقرألك اد ايه
وده اول تعليق ليا فى مدونتك
حاجة عجيبة اوى

ثاني حاجة هقولك عليها
بس هيبقي سر بيننا
انى انا كمان زيك
ببعد الناس القريبة مني
بس انا مختلفة عنك فى حاجة صغنتوتة اوى
وهو انى مش متضايقة من كدة
لان فى بعض منهم خنقنى بزيادة
فهو يستاهل كدة واكتر
ولازم ابعده
شوفتى بقي انك مش انتى اللى طلعتى الوحشة
اعتقد انا اللى طلعت وحشة :(
مش هعرف اديكي حل لأنى محاولتش افكر فى حل

 

انا لسه ماقريتش حاجه
بس فرحت لما شفت الريدر عندى ظهر فيه موضوعك الجديد
حمدالله على السلامه
اروح اقرا وارجع تانى


تحيه لاسعه

 

لا اله الا الله
اخيرا فتحتى التعليقات يانعكوشة
اخبارك اناعرفتها من البوست مش حسألك عنها
الاول كل سنة و انتى طيبة و بخير
بصي يا ستى انتى علاجك بسيط جداااا جدااااا
انتى تيجي لاختك مفروسة يومين كده
تفرسك فيهم و انتى تلاقى نفسك خفيتي و جريتى انتى تتقربي من اي حد غير مفروسة
هههههههههههههههه
بصي يا نعكوشة
اولا اولا لازم تحبي نعكوشة
هل انتى بتحبيها؟
يعنى بتدلعيها؟
يعنى لو بتحب ترقص بتفتحيلها كاسيت و بترقصيها
ولا لو بتحب الايس كريم بتخرجيها تأكليها ايس كريم
لو بتحب تعمل مقالب فى اصحابها بتسبيها تعمل فيهم مقلب و تضحكهم و تضحك؟
نعكوشة اعتبريها زي عروستك او بنتك
و دلعيها و حبيها
و لما تحبي نعكوشة و تتقربي منها اصلا
و تخليها تحبك
حتلاقى الدنيا لونها اختلف و اي حاجة تانية اختلفت معاها بالتبعية
لكن مش حنصحك انك تعملى ده و ما تعمليش ده
و مش حنصحك تتعاملى مع الناس ازاي
و لا حنصحك مش تعملى الغلط ده
لا لا خااالص
و مش مفروض لان الممنوع مرغوب
و لعلمك انا كنت بفرس اللى حواليه لما يقولولى بلاش تعملى كذا و تلاقيني بعمله عند
فى مين بقا الله اعلم بس كانو بيتفرسوا منى الصراحة
و لما يا اوختى كان يجيلي عريس الكل يوافق عليه و انا شايفاه كويس و عند فيهم اقول لأ
هههههههههه
يالهوي كانو بيتفرسوا منى و بسمع كلام يا اوختى ههههههههههههههه
و الله يا نعكوشة فكرتيني باللذى مضى
و لا لما الكل يقول لأ على حد و انا اعند و اقول اه
هههههههههههه و بعدين اقول لأ بمزاجي
هههههههههههه
لألأ انا افرس بجد
المهم يا ستى عملت زيك كده
و قلت انا حدلع نفسي
يعنى كل اللى تحبة اختك اللى ورا مفروسة حعمله
دلع نفسك يا عطوة
بقيت احبنى و اطبطب عليا
هههههههههههه
و اقول لنفسي نكت و حكايات
هههههههههههههه
و بعدين بعد مرور الوقت لاقيتنى بقيت غير مع انى مش عملت حاجة غير انى دلعت نفسي
يعنى لو طقت فى دماغي انى انزل من البيت الساعة 11 علشان آكل فول و طعمية كنت بعملها
ههههههههههههههه
ده طبعا قبل الجواز
هههههههههههههه
بس
بعد الجواز ربنا بيعاقبنى يا اوختى و بقيت انا اللى اتفرس
هههههههههههههه
اما اللى بعدوا عنك ما تخافيش حيرجعوا من نفسهم لما بس يحسوا انك اتغيرتي
و لو مش رجعوا ما تزعليش
مشوارهم معاكي خلص لحد هنا
اه ما هو لو ركزتي حتلاقيكي بتقابلى ناس بعدد شعر راسك و كل واحد بياخد وقته و بيمشي عادى ديه سنة الحياة
المهم
انتى بس امشي على نصيحة اختك مفروسة
و لو نعكوشة بتحب الايس كريم و الفشار ابقى افتكري اختك مفروسة معاكي
سلام
اه بالحق
ما تيجي التجمع الحريمي اللى عاملاه خيخةيوم السبت
لو حتيجي قوليلي و انا اروح
لو مش حتيجي قوليلي برضه علشان مش اروح
و لو بتشاوري عقلك قوليلي برضه
ههههههههههههههههههه
انتى مش مريضة مرض معدى على فكرة

 

هههههههه ملاحظة انى ما صدقت انك فتحتى التعليقات
كتبت بوست
ههههههههههههه
يالهوى ده انتى كنتى حابسة دمنا يا شيخة
روحي منك لنعكوشة تطلعه عليكي
هههههههههههههه

 

اولا حمدلله على السلامة

ثانيا
بلاش تكونى جلادة لنفسك اوى كده
ربنا بيسامح الانسان و بيغفر له
انتى كمان حاولى تسامحى نفسك لو كانت غلطت فى حد
و علشان ده يحصل لازم تتعبى شوية
تحاول انتى اللى تقربى من الناس
تحاولى تفهميهم انك بتعملى حاجة مش مقصودة مع انك بتحبيهم
قولى للناس حواليكى انك بتحبيهم

انا مش عارفة اقولك ايه
لو اقدر اتكلم معاكى
لو تقدرى فعلا تيجى يوم التجمع الحريمى
انا حاسة انك ظالمة نفسك

ربنا معاكى

 

فاتيما


جبتى منين كم الالم و الخوف دا
اللى مخليكى عاوزة تحمى نفسك و تبعدى و حاسة بالذنب تجاه غيرك بالشكل المؤلم دا كله ؟!!!!

مش عارفة مع ان معنديش خبرات اصلا
هفكر فى اللى حضرتك قولتيه

............

وحبى لك لن يموت

من جهة العياط فانا شغالة على ودنه ههههههههههههههه
بس انسانة جميلة او وحشة دى لا يعلمها إلا انا
هعمل اللى حضرتك قولتيه باذن ربى
بالمناسبة مدونتك عجبتنى

..............

كوشيا
وحضرتك طيبة
تسلمى على توضيحك للرأى و باذن الله هفكر فيه

............

غربتى

بتكسفينى على فكرة.. وانتى طيبة يا جميل
هسمع الشريط باذن ربى مش دلوقتى اما اخلص امتحانات
تسلمى و ربنا يعزك وي باركلك

.............

ام البنات

بس مش هتجمدى الا لما تنجرحى كتيير وتتخمى اكتر

ههههههه الله يكرمك

ربنا يخليكى يا رب
وكل عام و حضرتك بخير
..........

راجى

اتفق مع راى حضرتك
و ان شاء الله هبحث عن حد بعد امتحاناتى

................
i am the crazy one

tnx , i appreciate ur efforts really
just pray 4 me

............

بت مشمشية

ان شاء الله احاول

تسلمى

...........

لاسع افندى

شكرا

..........

مفروسة

والله ربنا يعزك انتى سكر بجد ضحكتينى من قلبى

هههههههههه

بالنسبة للتجمع مش هقدر للأسف لإنى عندى امتحانات

بس روحى انتِ سيبك منى

و ربنا يخليكى و هحاول ادلع نعكوشة حاضر

تسلمى
................

قوس قزح

الفكرة يا فندم انى عاوزة حل للموضوع عشان تعبت من تأنيب نفسى
وتعبت من فكرة انى ببعد الناس عنى
مش اكتر
ماهو لو انا عارفة اقرب للناس يا فندم كنت عملتها
هههههههههه
ربنا يكرمك
ومش هقدر اجى التجمع عشان عندى امتحانات

تسلمى على الدعوة

...........

سلام عليكم

 

نعكشة انا فضلت بعد ما قفلتي مدونتك اسبوع بحاله و انا مكتئبة اعتقد عمري ما هكتأب عشان واحدة وحشة اوي كدا

و اعتقد اني مش هقول
اكتر من اللي اتقال

متغبيش كتير

 

كل سنة وانتي طيبة
يا نعكوشة

 

اممم

ذكرتيني بنفسي

في مرحله سابقه من مراحل حياتي

وللان احيانا

احس ان اي شخص يتقرب مني

ويكون عزيز جدا علي

لازم اجرحه جرح ما ينسى طول العمر

جرح في القلب

مع اني والله ما اقصد وما اتعمد

بس للاسف

غالبا ما تنتهي الامور معانا بهالطريقه

ما اعرف ليش:(

 

مش عارفة حساكى مضخمة الموضوع شوية

يمكن عشان انتى طهقانة من نفسك فبتقولى كدة

اقوللك راي انا

لازم غصبن عنك تعدى مع نفسك مش تقوليلى مش عارفة وبلاقى الدنيا ضلمة

اعقدى اعرفى عيوبك شوفى انتى بتعملى دة لية

عالجى نفسك بنفسك مش تقولى مش عارفة

يعنى مثلا بتردى على الناس وحش ممكن تصلحى دة من نفسك مش هيجى مرة واحدة يعنى تحولى تتحكمى فى لسانك دة تضبطية شوية واحدة واحدة هتتعودى

فكرى فى الكلام قبل ماتقولية عدية على عقللك قبل مايطلع

خطوة كويسة اوى انك عملتى البوست عشان تاخدى شوية نصايح

مش عارفة اقوللك اية او انصحك بجد عوزة افيدك ومش عارفة

والله انا بحبك فى الله متبعاكى من زمااااان

دة كفاية الواحد يقرى اسمك ويشوفك صورتك الا ويحبك

بس انا لما بجرح وابعد الناس اللى حوالية بعمل كدة عشان بكون فى الوقت دة مش طايقة اكلم حد ببقى نفسى اعد لوحدى


طب حاولى الناس اللى جرحتيهم تقوليلهم الكلام اللى انتى قولتة فى البوست دة ناقشيهم وشوفى هيقوللك اية مش تتكسفى منهم

مش عارفة والله يانعكشة فهمتى حاجة من اللى قولته ولا لا



ربنا يهديكى يارب ويشرح صدرك

مع تحياتى ويلا

 

الغريبه اني لسه شايل المدونه بتاعتك من الريدر بالضبط من 3 ايام لما اصابني اليأس من انك تكتبي تاني زي ما وعدتي
لكن الحقيقه فوجئت بأن فيه موضوع ليكي موجود وانا بقرأ مدونة دعاء مواجهات
قلت ادخل يمكن يكون فيه حد تاني اسمه نعكشه وانا لا ادري
ولقيت ان نعكشه ليس لها نسختين بل هي نسخه واحده

......................

نرجع للموضوع
غريب اوي الكلام المكتوب ولا ادري سببا لكتابته
من بيننا بلا عيوب؟
نحن جميعا نحتوي على كوارث
او عيوب مهما شاهدناها بسيطه ولكنها في نظر الناس كبيره والسبب ببساطه انها عيوب
كلامك جامد على روحك اوي
حتى لو كنتي محقه في كل كلمه مما كتبت، لكن من الصعب على انسان انه يحكم على نفسه بالاحكام دي
وليه ده كله أصلا؟
يا ستي اللي عارفك من اصحابك واصدقائك المقربين انتي عجباهم على كده
واللي مش عاجبه يتوكل على الله يشوف حد تاني يصاحبه
مفيش حاجه اسمها حد طارد للبني آدمين
صحيح انا شفت شخصيات كده منهم واحد عندي في الشغل منفر من كل الناس اللي حوله لكن من الصعب بل من المستحيل اقارنك به طبعا
فوجود معارف لك على الانترنت بهذا الشكل بدون رؤيه او سابق معرفه لا يمكن ان يوحي ابدا بأنك شخصيه من الشخصيات المريضه
وبالمناسبه كلمة شخصيه مريضه دي كبيره جدا
ممكن يكون كل واحد فينا عنده مرض ما في شخصيته او بمعنى ادق عيب من عيوبه
لكن الشخصيات المريضه معلش يعني انا شفتهم بعيني ولا اعتقد انك منهم
على ما يبدو انك بتمري بأزمه - فمهما كان الامر لا داعي من القسوه على النفس
أصل العمليه مش ناقصه

 

شفالك الله وعفاكى

أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيكأسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك

 
This comment has been removed by the author.
 

شفالك الله وعفاكى

أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك

 

نعكشة : اولا بقالى فترة محلمتش حلم واتحقق لكن دة اتحقق..انا قلتلك انى حلمت انك فتحتى المدونة..صح؟؟؟

امممممممم...حاسة ان البوست مرتبط بشكل ما بالبوست بتاعى وردك عليا هناك..


مش عارفة ...مفيش كلام ممكن اقوله مع ان جوايا كلام كتير عن الموضوع بس النت كان بيرخم عليا اوى وفاصل وانا مش عارفة اجى اتكلم خالص..

بصى...انتى عندك مشكلة..اعتقد انك فعلا حاسة انك اقل من انك تستحقى حب وود واحترام غير مسبب..بيسموها النفس اللوامة بس انتى اعتقد الموضوع واخد معاكى كرف عصابى شوية..

انتى مش محتاجة حد يقولك انتى حلوة وانتى كويسة لان ببساطة محدش يعرفنى اكتر من نفسى دة اللى انتى هتقوليه وهيكون عندك حق طبعا..بس انتى محتاجة حد يفند معاكى حقائق مفاهيم الكويس والوحش..

انا متعودة انى بكبر المواضيع بس انتى فعلا كدة هتخسرى..انا بس هقولك حاجة واحدة..كل المفاهيم مطاطة..الصح والغلط..الحلو والوحش..الطيب والشرير..كلها مفاهيم مطاطة


حاجة اخيرة..البنى ادم اللى بيحس بمعنى الفقد..دة بنى ادم مش وحش..دة يستاهل انى ارجع له مرة واتنين وتلاتة لحد ما يعرف قيمة نفسه..لكن فى بشر بيجرحوا وخلاص..مش بيفتكروكى اصلا بعد ما يوجعوكى..


فى بشر بيوعدوكى انكوا هتفضلوا اصحاب كتير ويفضلوا يحلموا معاكى ويخططوا..وفجاة يكتفوا من وجودك لما نفسياتهم ترتاح..فبيخرجوكى من حياتهم..وانتى المفروض تعاملى مع الفقد بمنتهى الواقعية وتتفهمى انه..انا متغيرتش من ناحيتك انا زى منا..وانتى عارفة انه مش زى ما انتوا ولا حاجة..


انك تكونى عارفة انك جرحتى حد دة احسن مليون مرة من انك تكونى بتصيفى وحد تانى بيبكى من القهر بسببك وانتى ولا على بالك..

وحاجات تانية كتير اوى تثبت انك فى الجانب الايجابى...

هو التعليق الانجليزى عندى دة اغنية وللا انتى اللى كاتباه؟؟

اصل لو انتى تبقى عبقرية الصراحة

سلام عليك

 

انا مش مصدقة
نعكوشة فتحتلنا بابها
يالهوي
ياخبر
والله انا فيا حاجة لله
انا غايبة عن التدوين ومازلت ربنا يرجعني بالسلامة
لكن من يومين كنت بافكر اني لما ارجع بالسلامة اكتب بوست على شرف نعكوشة
لانك شاغلة تفكيري من فترة
ونفسي اتكلم معاكي
وكنت زعلانة جدا لما الباب قفل وشطبتي
مش هانصحك ولا هاديلك دروس
بس عايزة اقولك انك احسن من كتيييييييييير اوي مننا
لاننا بشر خطائين
وقليل منا من يرى اخطاؤه ويعترف بها
شفتي بقى انتي حلوة ازاي
تحياتي وفرحانة اوي بتعليقي هنا ورجوعك
ولو قفلتي تاني بجد هاتبقي وحشة

 

عاشقة الحب
انا مبناقشش هل انا كويسة ولا لأ.. انا بتكلم ازاى محاولش ابعد الناس عنى

تسلمى و كل سنة وانتى طيبة

................

اقصوصة
واصح ان حضرتك موصلتيش لحل برضو

..............

wella

الفكرة مش ازاى مبعدش الناس
ماهو انا اسلوبى مش منفر والحمد لله
الفكرة انا مش عارفة انا ببعدهم ليه
الموضوع بيحصل لا ارادياً

اما فكرة انىا روح وا قولهم
مش عارفة حاساها فى مراحل متقدمة مش دلوقتى خالص
مش هيستفادوا حاجة بالعكس ممكن يحاولوا يقربوا اكتر

عامة تسلمى
........

لورانس العرب

واللي مش عاجبه يتوكل على الله يشوف حد تاني يصاحبه

هى الفكرة مش فى حاجة اكتر من انهم برغم انهم متقبليننى و مش بيمشوا من نفسهم

بيستغربوا انا ليه بعمل كدة
ليه فجأة مشيت كده!!!! و سابتنا و احنما معملنلهاش اى مكروه

و لو حاولوا يتمسكوا بيا بتبدأ مرحلة العند و التصرفات الخبيثة تظهر

اعلم ان كل واحد ليه عيوب
انا مبقولش انى مش عاوزة اكون با عيوب

انا بحاول اصلح اكثرها فداحة و تأثيراً فى

شكراً

............


معرف 1 & 2

جزاك الله خيراً
كدتُ أن أبكِ
.............

انجى
كنت مستنية 2 بالتحديد يقروا الموضوع دة و يقولولى رأيهم انتى شخص منهم

عندك حق .. فيه بوست عند بت خيخة و اى كلام شبة بتاعك برضو

(انك فعلا حاسة انك اقل من انك تستحقى حب وود واحترام غير مسبب)

تقريباً انا مبصدقش ان ممكن حد يحبنى للدرجة اللى اتمناها
وبخاف أحمل على حد كمان

(انتى فعلا كدة هتخسرى)

دة اللى اكتشفته -مؤخراً- فعلاً إنى بخسر

(دة يستاهل انى ارجع له مرة واتنين وتلاتة لحد ما يعرف قيمة نفسه.)
1- معمريش ببين للناس إنى حاسة بالفقد فببان اكنى واحد بصيف عادى
2- مين هيستحمل واحدة عندية بتزقه و بتبعده عنه و ممكن تعمل حاجات شريرة شريرة فعلاً و اكتشفت انى ممكن اوصل لدرجة بشعة
محدش
وانا اولهم
هقول كبرىىىىىى سيبك
هيقولوا :من باعك بيعه و لو كنت شارى
وانا عمرى ما ببين لحد إنى شاريه
ومبعرفش
وبتكسف
ومتقوليليش جربى فى ديه بالذات

اة الزنجليعى انا اللى كاتباه
ولا عبقريه ولا بطيخ
الفكرة انى اشعر بالموضوع فكتبت عنه

تسلمى

..........

فكرة من الزمن دة

(بس عايزة اقولك انك احسن من كتيييييييييير اوي مننا)


يا فندم انا مش بناقش انا احسن ولا اوحش
دة غير ان حضرتك مبتشوفيش افعالى عشان تقولى ان كنت كويسة ولا لأ

القول غير الفعل

تسلمى

..............

سلام عليكم

 

سلام عليكم
انا مش عارفه اقولك ايه بجد بس انا عيطت لما قريت البوست بتاعك
و مش عارفه ارد اقولك ايه
انا بحبك قوى يا نعكشه مع انى معرفكيش
بصى انا كنت فى يوم برده بقول انى مش كويسه مع الناس كلها كانت بتقول انى طيبه جدا بس كنت بقول هم بيقولوا كده ليه و انا عارفه ان فى ناس بتكرهنى و قالوا قدامى انهم بيكرهونى و لاسباب متخصنيش وقتها كرهت نفسى و كرهت الدنيا كلها كنت ببعد عن الناس كلها كان كل ما حد يقربلى ببعده عنى لدرجة انى بعدت احب الناس لقلبى
بس ما لقيتش غير حل واحد
انى اقرب من ربنا اكتر
حسيت لما بسهر الليل أصلى قيام الليل و اصلى الفجر و اول حاجه بعملها لما اصحى أقرأ قران حسيت بجد انى مرتاحه يمكن وقتها كان عندها احساس شديد بالانتقام من ناس كتير بس الحمد لله الاحساس ده راح بسبب قربى من ربنا
صلى اعملى زيى و اشكى همك لربنا هتلاقى دموعك بتنزل فى الصلاه و بترتاحى
و لو حاسه انك محتاجه دكتور نفسى روحى و الله انا كنت هروح لواحد بس معرفتش يمكن علشان محدش متفاهم معايا فى الموضوع ده

ربنا يهديكِ يا نعكوشه و تبقى احسن نعكوشه
بحبك قوى يا نعكوشه الجميله
رونه

 

اه صح
انا عارفه ان كلامى ممكن ميكونش كويس
بس انا مبعرفش اخرج اللى جوايا قوى
و يمكن علشان انا كمان بمر بظروف عصيبه
فرحت قوى لما شفت انك فتحتى البلوج و التعليقات

 

عااااااااااااااااااااااااا
عاااااااااااااااااااااااا
فتحتى التعليقات امتى مش مصدقة!!!
اخيرا حنيتى انتى ايه جبل؟؟
المهم بقى ثوانى عشان اطلع كل الى جوايا اقولك حاجة ومتضحكيش عليه مممممممممم لا مش هقول المهم انا بجد مش عارفة لية بحبك بنجذب لشخصيتك رغم ان فيها بلاوى دة لحد تعبيرك عن نفسك!! بتفكرينى بشخصيى ليزا سمسون عارفها كل ما اشوفها افتكرها مش عارفة فيها حته منك تحسيها مثقفة وتحب تتحشر وتثبت ثقافتها لكنها منطوية ع نفسها اوى لمة ساعات حد يقولها كلمة اطراء فى حقها مش بتصدق خصوصا من الجانب التانى مش عشان هى وحشة فى الشكل لا بس عدم ثقة فى نفسها تحسيها برضة هشة من جواها اقصد ضعيفة رغم ان ممكن تكون شرسة فى نفس الوقت
انتى بتتفنى فى عذاب نفسك بتدورى على ايه لسة ماذتيش نفسك وبتعملى ع قد مانتى بتبعدى الناس عنك ع قد مانتى ما حتاجة الناس دى زى دمك
لانهم علاج الوحيد!!!!!!
مينفعش تكونى فى جزيرة لوحدك
مينفعش تشوفى اللون الاسود ع طول
مينفعش تشترى معنويات لنفسك دورى عليها بنفسك انتى بس دفنهم برواثب ملهاش اى لزمة
بطلى تكرررررررررررررررررررررررهى نفسك
حبى نفسك يا نعكشة لانها محتاجة انها تتحب محتاجة ايد طيبة نقية تطبط عليها محتاجة حضن ينسيها المها محتاجة قبله حياه تعيدك للحياه محتاجة بسان يقول
انا هتغير باذن الله
كيكى
عوووووووووو

 

نعكشة
انتي فعلا مريضة
بتحسسيني بالناس في الغرب
بيكون عندهمفلوس كتير
وعندهم كل حاجة
الا الراحة و السعادة وبيكون اكبر نسبة للانتحار عندهم
عارفة ليه
لان ملهمش هدف في الحياة
مش عارفين هما عوزين ايه
مفيش حاكم بيحكم سلوكهم
اهو انتي ذيهم
عارفة مشكلتك ايه

بجد

مشكلتك انك بعيد عن ربنا
و ما تتخيليش انك لو لبستي محترم او اقامتي بعض الطاعات انك كده قربتي
لا يا بنتي

مشكلتك انك مش هدفك ارضاءالله
ايوة
عوزة اقولك حاجة

انتي لو عرفتي انك لا يجوز اصلا انك تكوني انسانة متشائمة و لا كارهه الحياة لان رسولنا صلي الله عليه وسلم منعنا من التشاؤم واوصانا بحسن الظن بالله
و الصبر علي البلاء
امرنا دينا بحسن الخلق
و معاملة الناس بخلق حسن
امرنا بالدعوة لله
يعني احنا بنعرف الناس عشان ندعوهم لله
امرنا بالوفاء
امرنا باننا منعملش مخالفات شرعية تخلينا نندم عليها و نرجع نحزن و نأنب نفسنا

امرنا باننا نجتهد
نجتهد اوي عشان نوصل لربنا و نقرب
الشىء الوحيد اللى عمره ما بينتهي ابدا
ابدا
هو طلب العلم و العمل بيه

عندكفراغ ليه كده
فاضية ليه كده
قلبك فاضي ليه كده لوساوس الشيطان و التشاؤم

بتعملي ليه كده
مستحلية العيشة كارهه نفسك وكارهه الناس ليه كده

صدقيني عدم الرضا و تعب النفس من غضب ربنا عل الانسان و من ذنوب بيعملها الانسان و هو فاكر نفسه شغال و يجي منه

انتي يا بنتي
نصيحة مني ليكي في الله بلا محاباه و لا مجاملة
اطلبي علم شرعي
اعرفي دينك صح
استغلي قدراتك لنصرة دينك و عشان تقربي من ربنا

ادعي الناس للخير عشان تحسي بالرضا

متضيعيش عمرك في كلام بائس و حزن و كراهية لنفسك
استغلي عمرك اللى هتتسألى عليه يوم الدين ده
لما ربنا يسألك عمرك فيما افنتيه و تردي تقولي فى التشاؤم و سوء الظن بالله

خلي رقيبك ربنا وقبل ما تشعري بأى شعور و لا تتخذي اي قرار شوفيه يجوز دينيا ولا لا


_________________________



قسيت عليكي
بس والله لاني بحبك في الله

متزعليش مني

ربنا يهديكي

اعرفي ان عدم الرضا و عدم الراحة من ذنوبالانسان وعقاب من الله
او ابتلاء و اختبار و ربنا بيختبر قوة ايمانك
متسقطيش في الاختبار
بالله عليكي اتجهي لربك
و بدل ما تشكي للبشر اصطبري و اشكي لله

لان كلامنا ده كله ولا ليه لزمة وو مجرد كلام مدونات و تعليقات عمرها ماا هتغير فيكي
يمكن تقريها و تفكري فيها
لكن انها تغيرك ابدا
انتي اللى في ايدك تغير نفسك لما يبقه رقيبك ربنا

 

love spirit
عليكِ السلام
اللهم امين
ههحاول اعمل اللى قولتى عليه باذن ربى

لا عادى خدى راحتك

تسلمى
...........

كيكي

مع انى معرفش مين الاخت ليزا
بس اما اخلص امتحانات باذن الله هدور عليها
عشان انا متشتمش واسكت آه
ههههههههههههه
بهرج
تسلمى
هفكر فى اللى قولتى عليه رغم انه محتاج اكبر من مجرد تفكير

تسلمى
...........

maha zain

اعتقد انى كنت محتاجة حد يقولى الكلمتين دول رغم انى عارفاهم
بس انك تبقى عارف شئ وان حد يأكدلك انك فعلاً محتاجهم شئ اخر
فكرة العلم الشرعى معتقدش فى الفترة الحالية خاااااااااااالص عشان الكلية اللى انا فيها

الفكرة يا جميل ان الصحبة الصالحة هى اللى بتمد الانسان بالطاقة انه يقرب اكترو يعمل طاعات اكتر
انا مبعرفش اقرب من الصحبة الصالحة
واما بحس انى قربت لا اراديا ببعد
ليه معرفش
بحاول مبقائاش متشائمة و بقول لنفسى حاجات كتير حلوة عشان مبقاش متشائمة
بس الموضوع فيه همزات الشياطين اتفق

(لان ملهمش هدف في الحياة
مش عارفين هما عوزين ايه)

لفترة قريبة كنت فاكرة انى عندى هدف
ولو عاوزانى اعددهملك هتلاقيهم كتير
و كنت بقول لنفسى ان هدفى الاكبر هو ارضاء الله و دخول الجنة
ولكن
ان توهم نفسك بوجود الهدف
غيييييييير انه يبقى فعلاً نبراسك
الفكرة مش فى عدم وجود الهدف
الفكرة فى عدم السعى إليه
يمكن همتى مخسعة
يمكن و يمكن و يمكن
ويمكن فعلا انا بعيد قوى عن ربنا

(واوصانا بحسن الظن بالله)
لسة فاهمة معنى الحديث دة من قريب

(و الصبر علي البلاء)
الحمد لله احسب انى عندى صبر

(امرنا دينا بحسن الخلق)
بحاول بس متنيلة على عينى مش عارفة اثبت حسن الخلق دة
وخصوصا مع اهلى

(و معاملة الناس بخلق حسن)
شرحه

(امرنا بالدعوة لله)
بتكسف
وبحس إنها رياء
و إنى مش أهل لذلك
أنا اسفة انى بقول كدة بس مبعرفش

(يعني احنا بنعرف الناس عشان ندعوهم لله)
لما بلاقى حاجة صغنتوتة بقولها بس انى اقول حاجة حسيتها او شعرت بيها قوى
بحس انه رياء
شعور الرياء بيسيطر عليا جداً
معلش اعذرينى

(امرنا بالوفاء)
مبعرفش اجيبه منين دة
ماشى ماهو امرنا بعدم عمل ذنوب بالهبل
هل انا مبعملهاش
بحاول و بقول مش هعملها حضرتك
ولكن بعملها
و ارجع اقول خلاص انا اسفة يا رب انى عملتها
مش هكررها تانى
وارجع و اعملها

عارفة ان التوبة متكررة
و الذنب قد يكون متكرر
مادام الروح فى الجسد

بس فيه حاجات مبعرفش اعملها خالص
رغم محاولاتى

(امرنا باننا منعملش مخالفات شرعية تخلينا نندم عليها و نرجع نحزن و نأنب نفسنا)
ماهو المقصد من مخالفات شرعيه عشان ابقى فاهمة؟؟؟

(عندكفراغ ليه كده)
فراغ !!!! ( لا تعليق )
(فاضية ليه كده)
مش عارفة
قلبك فاضي ليه كده لوساوس الشيطان و التشاؤم
( مش عارفة برضو )

(صدقيني عدم الرضا و تعب النفس من غضب ربنا عل الانسان و من ذنوب بيعملها الانسان و هو فاكر نفسه شغال و يجي منه)

معمريش قولت على نفسى انى شغاله و يجى منى خاااااااااالص

(خلي رقيبك ربنا وقبل ما تشعري بأى شعور و لا تتخذي اي قرار شوفيه يجوز دينيا ولا لا)
بحاول
مش هتصدقى ولا انا صدقت الكلمة لما كتبتها
بس انا فعلاً بحاول
ومبعرفش كتير
مش هقول غير ربنا يهدينى عشان لو قولت حاجة يبقى جهر بالمعصية

ربنا يهدينى

ولا قسوة ولا حاجة
مش سهل إنى ازعل من حد( نادراً ما بزعل أصلاً.. ربما اغضب بس مبزعلش متخافيش.. لو عايزة تخشى جامد اتفضلى طبعاً )

(و بدل ما تشكي للبشر اصطبري و اشكي لله)

اتجهت لذلك مؤخراً ولكن
اة منا عندى ولكنات كتير
المهم يعنى
الفكرة انه مش نافع
مش معنى كدة انى شاكه او حاجة
بس بقول يمكن انا متجهة ليه غلط
محتاجة توجيه
ربنا ييسر

(عمرها ماا هتغير فيكي
يمكن تقريها و تفكري فيها)

بداية التغيير هى التفكير

الكلمة ممكن تثبت فى دماغك و تطلع فى وقت زنقة
لسة مكتشفة الموضوع دة امبارح

الكلام مش مجرد كلام مدونات يا فندم
هذا يلغى فكرتك عن الدعوة خالص

الفكرة ان الكلام بيتقال بس المهم اللى ينفذه

و انا بإذن الله هحاول انفذ

فكرة التقرب من ربنا موجوده بس انا مش عارفة اعملها صح

اللى حضرتك مش فاهماه يمكن
إن عندى مجموعة صحاب ماشاء الله عليهم ربنا يبارك فيهم يعنى
بيحثوا بعض على الطاعة وبتاع

كنت معاهم و فل
لما حسيت انهم قربوا منى بعدت

متقوليليش دى وسوسة شياطين ماشى ممكن بس عيب فيا برضو
لإنى كان عندى مجموعة صحاب عاديين مافيش طاعاتولا اى بتاع و برضو لما حسيت انهم قربوا منى بعدت

اى حد بيقرب و احس انه حس بيا
ببعد عنه
وبعنف
وبكبر
و بغباء

عارفة الكبر وحش
و ان العنفد دة ممكن يكون فيه ذنوب و معاصى بعملها
وى وى اعلم ذلك
بس فيه شئ فى نفسى غلط

محتاجة اصلحه

حضرتك فاهمانى؟؟؟

تسلمى
................

سلام عليكم

 

فى الحقيقة الكلام بتاعك عايز تحليل كبير لا اريد أن ازعجك بهذا الامر
لكن صدقينى ليس الامر سيء إلى هذه الدرجة أحيانا يرى الانسان فى نفسه ذاك الشيطان الذى يسكن كل منا وكنوع من الانتقام من نفسه يؤنبه الخير الذى بداخله تماما كما فعلت أنت عندما كتبتِ بقالك هذا كأنك تقفين أمام المرءاة تنظرين كل ما ترينه سيئا
وفى هذا الصراع ينتج مثل ما فعلتى فنبعد أقرب الناس إلينا فى لحظة يأس من اننا قد نصبح أفضل ونفعل هذا بشكل إنتقامى من انفسنا لكن مع الوقت ومكث الذين يحبوننا بجوارنا يتحول الشعور العدوانى إلى شعور بالرضا
كلماتك لا تنم عن شخص سيء ولا مريض نفسيا وبحكم تخصصى صدقينى اتحدث
ليس الامر سوى محاولة للتخلص من ألم داخلى قطعا لا اعرف سببه تحولت إلى عدوان على ذاتك ممثلا فى تنفير أقرب المقربين منك
..
اعتذر إن كنت أطلت وإن كنت فى الحقيقة لا زلت أحمل الكثير
...
كل تحية ومودة
.................
نورالدين محمود

 

أنا أبعد الناس الذين يحبونني فقط عندما أشعر أن نهاية هذا الحب هو الوقوع في الخطأ و الندم .
و لكن أن فعلك لذلك دون سبب أستغربه كثيرا .
أعط لنفسك فرصة وجربي حب الناس و قربهم منك لعلك تشفين ان كان هذا مرضا .
وهل ستعيشين طول حياتك دون حب؟

 

دى شخصية كارتونية فى سمسون

 

السلام عليكم

مش مصدقه عينى نعكشه رجعت تكتب تانى و كمان فاتحة صفحة التعليقات
و حشتينا يا قمر

مش عارفة ليه يا نعكشة انتى دايما قاسية جدا على نفسك
أنا كمان عندى الداء ده إلى حد ما
ممكن تكونى بتحاولى تبعدى الناس القريبة منك كنوع من الحماية لنفسك
بتخافى ان الناس دى لما تقرب قوى و تحبيهم و ترتبطى بيهم قوى ممكن يوم ما يبعدوا أو يجرحوكى انتى تتكسرى قوى
علشان كده بتحاولى تبعديهم من البداية
لما كانت بتيجى ليا الحالة دى كنت أحب جدا انى اسمع قصص عن علاقات النبى عليه الصلاة و السلام بالصحابة و علاقتهم ببعضهم بحس بجد ازاى الناس دول كانوا اخوه و بتشحن عزيمة كده انى عايزه يكونوا صحباتى هما اخواتى فى الله بنحب بعض و بنخاف على بعض و قريبين من بعض زى الصحابة كده

كويس انك ما تكونيش راضية عن نفسك تماما لو ده هيكون حافز ليكى انك تكونى احسن انما لو هيخليكى تحسى باليأس من نفسك يبقى ده حاجة وحشه جدا
فيه ناس كتير بيحبوكى و رأيهم فيكى انك انسانه كويسه كفايه انك لسه عندك ضمير و انك بتسمعى له
حاولى انتى كمان تحبى نفسك شوية

ربنا معاكى يفرج كربك و يزيل همك و يهديكى يا نعكشة يا اختى يا رب
يللا كفايه عليكى كده

فى حفظ الله
السلام عليكم

 

سلام عليك ..

مبدئيا مبروك اعادة فتح المدونة..

ثانيا ..بعد اذنك طبعا انا عايزة اعلق على الموضوع ..

انا مش عارفة ابتدى ازاى ولا منين ..انتى قلتى كلام كتيير اوى ..و انا حاسة انى جواية مسورة كلام محبوسة كلام كتييييير اوى عايزة اقولهولك بس مش عارفة اظبطها ازاى ..على اى حال انا هقولك رأى و خلاص..صدعتك انا مش كدة ..

بصى مبدئيا انتى قلتى انك بتبعدى عن الناس اللى قريبين من قلبك ..او بتبعديهم انتى عنك ..و سألتى ليه بتعملى كدة..طيب انا عندى تخمينات انتى ليه ممكن تكونى بتعملى كدة ..انتى ممكن تكونى مبتفرقش معاكى انك تبقى مع ناس مش قريبين منك اوى عشان عادى.. لو ضايقوكى فى حاجة مش هتزعلى منهم جامد ..و لو فرحوكى بتفرحى, لكن مع الناس اللى قريبين معاكى كل حاجة بتحصل معاهم بتفرق معاكى جدا ..يعنى لو زعلوكى فى حاجة بتزعلى جامد و بتتأثرى منهم جامد و كل حاجة منهم بتخديها على نفسيتك.. فا نوع من انواع الحماية اللى بتعمليها لمشاعرك انك تبعدى عنهم رغم انك بتحبيهم..ايه التخمين الغريب ده ..بس ممكن ..

او ممكن تخمين جديد.. انك مثلا بتحبى تبعدى شوية عن الناس و كدة.. و تحبى تعدى لوحدك حبتين.. فا الناس اللى هما صحابك طيارى مش هيحاسبوكى على ده اوى.. لأن مش من حقهم ده..مين بقى اللى هيحاسبك؟؟؟ ..اللى هيحاسبك على كدة الناس اللى هى قريبة منك و عايزة تقتحم حياتك و تعيش حياتها معاكى لأنها بتحبك.. فأنتى عشان تعرفى تنعزلى شوية مع نفسك بتضطرى انك تبعديهم عنك و تحسيسيهم ان مفيش منك رجا و يزهقوا و يبعدو من نفسهم ..بصى عايزة اقولك حاجة لو تخميناتى غلط كبرى منها..

هقولك كدة غلط ..مقولتش انا حاجة جديدة :) بس هو فعلا اذى ليكى و ليهم.. هما بيحبوكى و انتى كمان اكيد بتحبيهم و قريبين من قلبك زى مبتقولى ..دول فى حياتك زى كنز..بجد مش بهزر ..مش فيه مثل بيقول معرفة الناس كنوز..فيه ناس بتقوله على اساس معرفة الناس كنوز فى تقضية المصالح و كدة.. بس هى كنوز حتى من غير تقضية اى مصالح..يعنى ما شاء الله بتقولى عندك اصحاب و معارف كتير..اكيد كل واحدة (من القريبين فى حياتك ) اثرت فى حياتك تأثير معين ..علمتك حاجة..غيرت فيكى حاجة ..اشتريتلك شيكولاتة يوم من الأيام :) ..لأ بجد اكيد ليها دور و اثرت فى حياتك ..
انتى كمان ..حتى لو بعدتى عنهم مش هتقدرى تلغى اوبشن وجودك فى حياتهم ..انتى موجودة فى حياة كل واحدة فيهم غصب عنك..اكيد اثرتى فيهم.. اكيد ساعدتيهم.. اكيد اتعلمو منك حاجة حتى لو اتعلموها منك من غير متقصدى تعلميهلهم..اثرتى فى حياتهم..
غلط جدااا رد فعلك لصداقة او ود و معزة مبينكو يكون كدة ..تبعديهم و تقولى هما مش خسرانين حاجة لو بعدوا عنى ..لأ خسرانين و اكيد بيزعلو لما بيحسوا انك بعيدة عنهم ..و نفسهم تكونى معاهم فى حياتهم ..

بصى و الله انا اسفة جدا لو كلامى مش لطيف او جامد او بيضايقك ..انا والله اسفة لو ضايقتك فى حاجة قلتاها بليييز تقبلى كلامى..بس اللى انتى متعرفيهوش انى بقول لنفسى الكلام ده بردو لأن اوقات بحس بكدة..

قلتى كمان انك عايزة تعتذرى ليهم و تقولى انك اسفة..بس هقولك ..كبديل لأعتذارك ممكن تعملى حاجة احسن من كدة بكتير و هى انك تحسيسيهم انك مهتمة بيهم فى حياتك و انك بتحتاجيهم زى ما هما محتاجينلك و حسيسيهم بحبك ليهم على قد مقدرتك ..متتغطيش عليها ..يعنى بحاجات بسيطة ..يعنى ابدأى مثلا كلمى فلانة مكالمة فى التليفون ..متستنيش ان هى اللى تبدأ ..و هتفرق معاهم جدا اى محاولة بتعمليها تقربك منهم حتى لو صغنتوتة ..عشان هما عرفين انك مثلا بتبعدى مثلا عنهم شوية و كدة فا لما هيحسوا انك قربتى حبة والله هينبسطو جدااا..

باقى اللت بتاعى تحت

 

بصى حلى المشكلة على قد مقدرتك و بمعايير اللى تريحك ..بحيس ان ميكونش فى ضغط عليكى ..و فى نفس الوقت حرام متخسريش الناس اللى بتحبيهم ..يعنى قربى حبة و ابعدى حبة صغيرة ..خدى مساحتك ومع نفسك حبة كدة ..و ارجعى تانى اسألى عليهم و قربى و كدة.. هتلاقى علاقتك معاهم اتحسنت للأحسن انشاء الله ..و مش هتخسريهم ولا حاجة..بأذن الله

حاجة كمان عايزة اقولها ..انتى بتقولى محدش يعتبرنى انى بميز ولا حاجة ..غلط تانى ..بتغلطى انتى كتير على فكرة :) ..بصى يا ستى اوكاى معاكى اننا منعرفش بعض فى الحقيقة و مقدرش اقول ده كويسة ولا لأ ..ولا فيها ميزات و لا لأ و هكذا.. بس هقولك مفيش حد مفيهوش ميز..ازاى بقى تلغى البند ده عندك ..غلططططططط.. كل واحد فينا عنده ميزات و عيوب برضو ماهو احنا مش ملايكة بأجنحة ..بس اكيد اكيييييد فيكى ميزات مش فى فلانة و فلانة و فلانة ..مثلا انا شفت فيكى ميزة و ممكن احسدك عليها كمان (ما شاء الله يعنى) ان انتى شايفة الحاجات الوحشة اللى فيكى و معندكيش مانع تعترفى بيها حتى لو بينك و بين نفسك ..انا معنديش الحتة دى ..مش زيك فيها ..ده ميزة فيكى ..و عارفة ليه ميزة عشان لما تعترفى ان فيكى عيب كذا هتعرفى انشاء الله تعالجيه ..انما لو انكرتيه ..انسىىى مش هتتخلصى منه..حتى دكتور ابراهيم الفيقى عارفاه؟! الرجل اللى كل كلامه حلو و بيكتب كتب و برامج و بيكلم بسرعة ..كان قال مرة حاجة مبنسهاش و لما قريت كلامك افتكرتها و هى ركزى كدة ايوة :(ادراك المشكلة يعتبر 50% من حلها)..خدتى بالك؟! فاهماها!!..يعنى انتى مدركة بالعيوب دى فا انشاء الله ادام ادركتىها ..لا اراديا هتبدأى تفكرى فى حلول ليها ..انما لو مش مدركة ان فيه مشكلة اصلا يبقى مش هتحاولى تحلى حاجة ..لأن انتى مش معترفة بوجدها اساسا ..فاهمة قصدى؟!

فيه حاجة تانية كنت عايزة اعلق عليها ..غلطططط جدا ..مش بقولك بتغلطى كتير..غلط جدا جدا جدا انك تبقى شايفة نفسك بالوحش و بس..يعنى شايفة كل العيوب و شطبا على كل الميزات ..غلط موت ..انا لما قريت الملف التعريف بتاعك و لقيتك كاتبة كل عيوبك ..قلت فى نفسى انا ممكن تكون فيا كا العيوب اللى هى قايلة عليها بس عمرى معترفت بيها مثلا او اقتنعت بوجودها فيا رغم انى بحس اوقات كتير انها فيا ..حسيت انك شجاعة فى انك تعترفى بكل ده ..بذات انى بحس ان معظم الناس بتعمل العكس بتظهر كل مميزاتها و تخبى عيوبها..بس انتى ليه مش شايفة الحاجات الحلوة ..ليه مش شايفة الميزات..اكيد فيه..اعترفى بيهم برضو حتى يكفى انك تعترفى بيهم جواكى مش لازم بالعلن بس حسى بيهم و متقهريهمش..من الأخر حبى نفسك..امى ديما بتقولى كدة والله..حبى نفسك شوية..كان فى كتاب مش فاكرة اسمه لأنى مقريتهوش بس كانت اوبرا اتكلمت عنه فى برنامجها ..كان عبارة عن كتاب بيقدملك خطوات عشان تحسنى حياتك و كدة كان من ضمنها انك لازم ..تبدأى بحب نفسك (مش بمعنى الأنانية) لأ بمعنى انك تتقبليها كدة زى مهيا (اه فيها عيوب بس انتى اهو بتحاولى تحسنى من عيوبك و نفسك فى كدة و مين فينا معندوش عيوب) ..و انك تتصالحى معاها و كدة.. عشان تقدرى انك تحبى اللى حوليكى و كدة ده اللى الكتاب كان بيكلم عنه على قد ما ذاكرتى ما جابت يعنى ..

منسبة للعند..ففى نوعين من العند ..عند من اجل العند و خلاص و ده وحش اكيييد..و فى عند بس كويس و هو العند اللى بتواجهى بيه مطبات فى حياتك و تعديها و تعندى قصادها ..

انا فضيت مسورة الكلام اللى عندى و يا ريت متزعليش من اى كلمة قلتها ممكن تضايق ..و ربنا يو فق للأحسن انشاء الله ..

يا رب اكون متقلتش اوى فى زيارتى عليكى

 

نور الدين

لكن مع الوقت ومكث الذين يحبوننا بجوارنا يتحول الشعور العدوانى إلى شعور بالرضا

اسئل حضرتك سؤال
لو واحد صاحبك
حدفك بالطوبة
ولما سألته ليه بتعمل كدة
قالك هوه كدة
هتفضل قاعد جمبة؟؟؟
لأ
هتقول دة مبيحبنيش
ولما سالته
ماعتزرليش
ومبررليش

هكذا افعل ان.. اقذف من احب بالطوب

تسلم

..............

غير معرف

مش عارفة
دعوات

..............

كيكي

مممممممم

اوك خلاص سماح

..................
شهد الكلمات

تقريبا احتمال بحاول اعمل كدة
بإذن الله ههحاول اسمع فى الموضوع اللى قولتى عليه

تسلمى

................

mariam

تحليلك محتاج رغى
ممكن ارغى بعدين
معلش
انتى مننا و علينا برضو

تسلمى

............

سلام عليكم

 

mariam

".انتى ممكن تكونى مبتفرقش معاكى انك تبقى مع ناس مش قريبين منك اوى عشان عادى.. لو ضايقوكى فى حاجة مش هتزعلى منهم جامد"

اتفق

" فا نوع من انواع الحماية اللى بتعمليها لمشاعرك انك تبعدى عنهم رغم انك بتحبيهم"

احتمال


"فأنتى عشان تعرفى تنعزلى شوية مع نفسك بتضطرى انك تبعديهم عنك و تحسيسيهم ان مفيش منك رجا و يزهقوا و يبعدو من نفسهم ."

احتمال كبير برضو


............
على فكرة ضمايقتنيش ولا اى حاجة
عيشى حياتك خالص
اللى بيتقال بيتقال
باخد من الكلام
واحطة فى الانفوخى
و الباقى عادى
مش بتضايق انا سهل كدة يا مريوم

..............
"تحسيسيهم انك مهتمة بيهم فى حياتك و انك بتحتاجيهم زى ما هما محتاجينلك و حسيسيهم بحبك ليهم على قد مقدرتك"

الحل دة حلو فعلاً نظراً لإن حكاية الاعتذار دية مش مستسغاها
وبعدين اللى بيعتذر عن حاجة مبيكررهاش
انما بعتذر عن حاجة ممكن اكررها
فملوش لزمة الاعتذار ساعتها

...........


"..انتى بتقولى محدش يعتبرنى انى بميز ولا حاجة"

لأ انا اقصد من الجملة دية ان اللى يقول حاجة يشرحها
عشان لما حاجة مبفهمهاش و بتسائل عنها
محدش بيرجع تانى و يرد على تسائلاتى

..............

بالنوسبة للعيوب
فاستعنا عالشقا بالله
ربنا يسهل بس و نعرف نصلحها
...............

".حبى نفسك شوية"
والله ساعات بحبها
وساعات بحس انها مؤرفة قوى ومتستاهلش حد يحبها
بس اهو احنا الاتنين لازقين فى بعض
هنعمل اية

لو عرفتى اسم الكتاب ابقى قوليهولي

...........

"عند من اجل العند و خلاص و ده وحش اكيييد..و فى عند بس كويس و هو العند اللى بتواجهى بيه مطبات فى حياتك و تعديها و تعندى قصادها ."

تقدرى تقولى ان ساعات بيبقى عندى دة
وساعات دة

عارفة انه شئ وحش
حاولت اتخلص منه صراحة بس معرفتش لحد دلوقتى
ادينا بنحاول

تسلمى ربنا يخليكى

مواسيرك نورتنا صراحة

سلم عليكِ