نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

حبة هلاوس قبل النوم

عندي صداع فظيع في عيني الشمال
اكيد من قعدتك عالجهاز .. احسن تستاهلي
ماشي شكرا بس انا مكنتش بقولك عشان تبكتيني
المهم
انا نفسي دلوقتي العب بالمورجيحة و اتمرجح جامددددددددددددددددددددددددددددددددددددددددددددددددددددددددددددددد
وافضل باصة فوق للنجوم وانا بشعري و يجي علي عيني و ابقي مش عارفة اعمل اية اكمل مرجحة ولا اشيلة من علي وشي
و افضلة قالبة راسي لورا عشان احس انني في السما
زي ما كنت بعمل زمان وانا صغيرة
انا لسة لحد دلوقتي بركب المورجيحة
بس انا اللي بعوم و الكتاكيت الصغننين بيصوتوا من الضحك
نفسي ارجع العب مع الولاد بتوع العمارة لإن البنات مكانوش بيحبوا الجري و التنطيط كانو بيحبوا يتمشوا و خلاص انما الولاد بيفضلوا يجروا لحد ما نفسهم يتقطع
عمر ما نفسي اتقطع
انا بموت في اللعب
عايزة اتنطط علي السرير اللي بسوست القديم دة
وماما تقولي انزلي يا بنت
و انا اضحك منها و اجري
و تمسكني
و اجري منها وانا بضحك
نفسي اعدي الشارع زي زمان وانا مش باصة للعربيات وماما تخاف عليا و تقولي خلي بالك علي نفسك
نفسي ماما تعملي الشاي بلبن كل يوم الصبح ( اللي عمرك ما شربتية)
و تعملي السندوتشات بتاعت المدرسة ( اللي كنتي بترميها جمب سور المدرسة)
ماما زعلت قوي لما عرفت اني برميها
بحبك قوي يا ماما
بس للأسف دايما مقصرة معاكي مع اني بحاول و هفضل احاول
انتي هتقلبيها نكد يا حجة ... امسحي دموعك يا امال

فضلت ازن علي ودن بابتي عشان يخليني ابيض اوضتي اسود
بس هوه مش راضي
وفضلت ازن علي ودنه عشان اعمل نجوم في السقف
انا جبت النجوم
شكلها عسول قوي
بس مبلحقش استمتع بيها لأني بنام علي طول
غريبة مع اني كنت طول عمري اقعد بالساعات عقبال ما انام
اكيد كنت محتاجة ساعتها نجوم
نفسي اقعد علي الشباك و ادلدل رجليا لبرة
في يوم هعملها
بس هوه انا لو وقعت ابقى كدة ميتة منتحرة؟؟؟؟؟؟
ياخوفي لو قعدت القاعدة دية وانا فرحانة و فجأة كالعادة نفسي قلبت عليا و زعلت فجأة
لأ انا مش هقعد علي الشباك و ادلدل رجليا
بس نفسي اعملهااا قوي
زمان كنت بخاف من الظلمة
وكنت بسيب باب اوضتي مفتوح عشان يدخل النور من برة
مع ان اختي كانت بتبقي معايا في الاوضة
دلوقتي بقفل باب اوضتي وانا بنام
مع ان اختي مبقتش معايا في الاوضة
غريبة!
محتاجة انام عشان الحق اعمل حاجات مفروض اعملها و قاعدة قدام الجهاز عشان اكتب مع ان عيني وجعاني و قافلاها كدهو
انا عايزة اجري
باقصى سرعة عندي
من غير ما حد يبص عليا وانا بجري في الشارع
و يقول في عقل باله او بصوت
البنت دية مش كويسة عشان بتجري في الشارع
نفسي اقلع الشراب مرة واحدة بس و ألاقية نظيف بعد اي خروجة من خروجاتي
بحب قوي لما اغمض عيني و ابتسم جامد قوي و تشعلق في نافوخي فكرة مجنونة
عايزة انزل اشتري شيبسي
مع اني مش جعانة
ومنفسيش في الشيبسي
بس عايزة امسكة كدة
و اقعد تحت نجوم اوضتي
و آكل واحدة واحدة
براحة
و افكر في اللي هيحصل بعد سنتين
نفسي ابقى شجاعة
وميهمنيش كلام أي حد

انا محتاجة - دكتورة - نفسية
ان شاء الله لما يجي راوند ال psychatry هيا بتتكتب ازاي مش مهم
لما يجي الراوند هوريها رسوماتي
و هشوف انا عندي اية
يا رب ابقى شجاعة

انا رجلي و صوابعي متلجين و راسي بتوجعني و محتاجة انام
يلا من نفسي

شوية هلوسة

23 قالوا رأيهم في العك اللي تحت ؟؟؟:

عادي يا ستي والله كلها احلام لذيذة وواقعية اوي
ما فصلتيش لسه
يعني مش فاكرة ان فيه عالم تاني غير العالم اللي احنا عايشينه بس محدش يعرفه

 

واضح واضح يا نعكوشة
انك عاوزة تنامي اولا
وانك عاوزة دكتور نفساني ثانيا
ههههههههههههههههه
ساعات الواحد بيمر ياللحظات ديه و بيفكر الافكار ديه
و بيبقى نفسهالايام ترجع بيه لايام الطفولة و يعمل حاجات من اللى كان بيعملها
انا بقا كان نفسي اعمل سقف الاوضه بلون السما و فيها سحاب
علشان احس على كول انى باصه للسما
احاسيس جمبلة يا بنوتة
هههههههههههههههههه
بس برضة محتاجة دكتور نفساني

اقولك لما تجربيه
ابقى ادينى عنوانه
هههههههههههههههه

 

على فكره دى فضفضه مش هلوسه

لانى حسيت بيكى قوى وكتير ببقى زيك كده و اكتر بس اول ما ابص للسما بالاقى الباشا الصغير هو و اخته السوسه المقروضه ناطين عليا و قايلين بتبصى على ايه اروح داخله و قافله البلكونه و ناطه فى السرير عدل

 

اكيد فعلا عندك صداع بس اقولك حاجه ساعات المريض وهو فى حاله البنج بيقول مشاعره بجد بدون تزيف
انتى صادقه فى مشاعر الط
طفوله ونفسك تعيشها
انتى عارفه رجعتينى عشرين سنه
بكلامك

 

انتى عاملة زى الاطفال يا نعكوشة
ايه مش كبرنا على الحاجات دى
وبعدين ايه الغش ده انا كمان عندى اوضة مدهونة اسود وفى السقف فيها نجوم
كنت فاكرة انى انا لوحى اللى مجنونة ومطرقعة

 

واضح فعلا إنها هلوسة هههههههههههههه
جميل قوى لما بنسرح فى كل حاجة حولينا أو نستعيد ذكريات معينة
تحياتى

 

والله يااسمك ايه انت اعسل من العسل
رجعتينى لذكريات كتير اوى كانت تايهة ومش لاقياها


بس على فكرة كل الحاجات اللى نفسك فيها دى ممكن تعمليها


انا وصحابى روحنا مرة معرض الكتاب
عارفة الحتة الكبيرة اللى مبلطة وليها سلم تنزلى قصاد الباب؟؟

معرفش هتعرفيها ولا لاء
قعدنا نجرى ونتنطط
وكنا بليل وبصينا فى النجوم وكان معانا عيال صغيرة واتسابقنا معاهم والناس شافتنا واحنا بنجرى وقالوا علينا عبطة .. يولعوا بصراحة يعنى


حتة الشباك دى لسه عاوزة اعملها

وفى نفس الوقت مش بعرف ارسم

بس برده مبسوطة وبعمل كل اللى نفسي فيه

متخليش نفسك فى حاجة
ولما تخافى تعملى حاجة .. تعاليلى وقوليلى تعالى يا حدوتة نقعد على الشباك سوا

هههههههه


تحياتى يا جميل

 

على فكرة انتو جيل مطرقع وما لكوش حل
بنتى بتيجى من الكلية بعد اكتر من 12 ساعة اقول حتخش تنام مباشرة الاقيها سهرانة على النت للفجر
وبعدين معاكو بقى؟
ده انتو تعقدوا فرويد نفسه

 

ماشى اهو كلوا بيتنسى
اه انا الهدف من زيارتى
هو الاطمئنان على كاتبتنا الرائعه
افتقدناك دكتوره
وايضا تعليقاتك الجميلة
لعلة خير
تحياتى

 

نعكشة ازيك

انتى عارفة أنا كنت زمان وأنا صغير باجى جرى من المدرسة ومن الجامع للبيت والناس كانوا بيشوفونى ومفيش حاجة بس دلوقت لو ماشى بمد خطوتى بس الناس تسأل هو فى ايه ؟ ايه اللى حصل .؟ خير ؟ وكأن فى مصيبة حصلت

ياااااااااه عيشتينا الجو الجميل ده

فيكى الخير

بس بلاش تدلى رجليكى من البلكونة دى

تحياتى

 

يااااااااااااااة يا نعكشة خلتى عينى تدمع
وافكر انا كمان فى حالى
لية مينفعش اروح اكل على عربية فول
لية مينفعش ارجع يوم واحد بس لمدرستى الى كنت بحبها وانا شاحطة كدة اة فيها اية
لية مينفعش اكل ايس كريم فى الشتا واروح السينما بليل زى باقى الخلق لية لازم اروح حفلة الضهر ليةمينفعش لمة الدنيا تمطر اجرى اانزل فى الشارع ليةمكلش مصاصة وارن على جرس الجيران واجرى ههههه لية مينفعش اتحول سمكة واعيش فى البحر
شوفتى فكرتنى بقد اية حاجات نفسى فيها ومش عارفة اعملها زى زمان حاجات ايوة عارفة انها ملخبطة بس انا حاسها اوى وحاسة كلامك
مش عارفة اقول اية تانى؟
غير كلنا عندنا الحاجات دى الملخبطة والى محرومين منها بسسب ان احنا كبرنا
عوووووووووووووووووووووووووو

 

ألتدوينة دي عجبتني جدا جدا ..

كنت عاوز أعلق على كل موقف :D

بس لما قريت الطبيب النفسي غيرت رأيي :P

بس هتقمص دور الطبيب النفسي وأقول لك:

يا أبنتي! عليكِ بفعل ما تحبينه مادمتِ قادرة على ذلك ومدام لا ضير فيه، وأن الناس لا يرضون على شيء وطلب اجتماعهم من المحال

:D
--

وبعين اغلب امنياتك ممكن توفرها من غير صعوبة :D


امتعتني مرة تانية هذه التدوينة ^_^

 

مع انها هلاوس منها حاجات مشروعة جدا
لكن

تصبحي علي خير

 

الحمد لله ان ربنا خلق لنا الخيال. نعيش فيه لما شوقنا يشتد لحاجات افتقدناها فى حياتنا. وندارى فيه من همومنا. ونفضفض له عن نفسياتنا. اعملى كل اللى نفسك فيه يا نعكشه. فى خيالك. وممكن تمزجى الخيال بشوية واقعيه متمثله فى كيس شيبسى مثلا. صدقينى الدكتور خيال تأثيره احسن من الدكتور النفساوى....تحياتى

 

ههههههه
سكر يا نعكشة
على فكرة الابداع مش بيجي غير قبل النوم
طاقة اليوم كله بتبتدي تخرج ويتم مسرحتها في عقلنا بقدرة عجيبة
نصيحتي
ابعدي عن الدكاترة النفساويين
تصبحي على خير

 

ولا يهمك
ربنا يحققلك كل احلامك

 

دي مش هلاوس
دي لحظة صفاء مع النفس
وحنين لشوية حاجات كدة بتفضل مرسومة جوانا
يااارب تتحقق احلامك

 

انا على ما اعتقد ان دة

كبوتات مكبوتة كبتا كواكى

يلا سلااااااااااام

 

بجد ذكريات جميله اوى

والى جاى هيكون اجمل باذن الله

وربنا يخليلك مامتك

والنجوم والشيبسى كمان:d

 

كلام حسام

أنا لسة مفصلتش دية هلاوس و ليس تهييس

نورت

.........

واحدة مفروسة

منورة يا قمر

معملتيهوش ليه بلون السما يا مفروسة؟؟؟

لو جربتها و لاقيتهخا دكتورة كويسة هبقي اقولك علي عنوانه من عنيا

نورتي

.........


صيدلانية ظالعة نازلة

ربنا يخليهملك يا ربب دايما

نورتي

..........


romansy

ياما انا خايفة تيجيلي حرارة ولا اتحط تحت البنج دة لحسن هقول فضايح

نورت

..........

شفقة هانم و احسان بك

انا لسة مكبرتش او كبرت بس عاملة مش واحخدة بالي

الله شكلها هيبقى تحفة
متخافيش مش لوحدك

نورتيني

.........

mohamed ghalia

عند حضرتك حق

نورت

................

حدوتة

نفسي في صاحبة تكون شبهك
ربنا يكرمك يا رب و يعزك دايما

نورتي

...........

راجي

يا سلام وانتو اللي كنتوا جيل بريء
ههههههههه

ربنا يخليهالك يا رب دايماً
وتكبر و تشوفها عروسة يا رب

نورتني

.............


احمد نور الدين


معلش حقك عليا :(

نورت

...........


المحارب المتيم


قول الزمان ارجع يا زمان

مالها دلدلة الرجلين
دية حتى صحية عشان متكمكمش

نورت

..............


كيكي

فضفضي يا اوختشي فضفضي

ملناش غير الفضفضة

وحشتيني
ووحشتني العو بتاعتك

نورتيني

...........

أحمد

هحاول يا دكتور

اسعدني تعليق حضرتك

نورت

...........


kochia


وانتي من اهلة

نورتي

.............


mohamed dawod

ممممممم

نظرية تستحق التقدير
بس انا محتاجة افهم نفسي
محتاجة حد ياخد بايدي و يقولي انتي كذا
معلش انا مقصرة
و كسولة و مبحبش ابذل مجهود في الحتة دية
هههههههه
اومال اية فايدة الدكاترة

نورتني

...........


شهرزاد

عندك حق
و ساعات الحزن الشديد و الفرح الشديد و القلق الشديد بيزود الابداع برضو

لية ابعد عنهم .......

نورتيني

............

واد غلبان


اللهم امين

نورت

............

سنووايت

احتمال برضو
تسلميلي

نورتي

............

ايام العمر

يمكن

عليكم السلام و رحمة الله
نورت

..........

ebsamet 7yah

اللهم امين
تسلمي

نورتي

..........

سلام عليكم

 

السلام عليكم
ههههههههههههههههههههههههههههههههههه

كتبت السلام عليكم .. وبعدين سرحت .. فى شوية حاجات كده .. وبعدين نسيت ..انا كنت هاقول ايه ...
بس تعرفى الحاجات اللى انتى كاتباها هى اللى خلتنى سرحت ..

تعرفى بتبقى لحظات حلوه اوى اللى قبل النوم دى ..
كل يوم اقول هاحط جمبى ورقه وقلم .. عشان اكتب اللى بافكر فيه .. بس ما بحطش .. مره قومت جبت ورقه وقلم .. وبعدين ما عرفتش اكتب عشان الدنيا كانت ضلمه .. نمت بقه وخلاص ..

على فكره .. انتى مش محتاجه دكتور نفساوى .. انتى محتاجه واحده بدويه من بتوع .. اوشوش الودع .. ( ابين زين ابااااااااايااااان).. عشان تعرفك اللى هايحصل كمان سنتين ..

السلام عليكم

 

2ragooz

D:

ههههههههههه
كل يوم؟؟!!!

ممكن الاقيها بسهولة.. بس مجربتهمش قبل كدة و مش ناوية اجربهم... منا لو عرفت مش هقعد تحت نجومي و اكل شيبسي و افكر...

لازلت مصممة على الدكتورة النفشاوية


ربنا يستر

نورت

 

اة صحيح
وعليكم السلام و رحمة الله