نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

هل حقاً لسنا إلا للطبخ و تربية الابناء؟!!!

سبحان الله لما الواحد يحب يكتب في مواضوع خمستلاف موضوع يطقو في دماغه ... كتبت موضوع و بعدين الجهاز ربنا يمسية بالخير مسحه فقولت اكيد ملكوش نصيب و بعدين جيت اكتب قصيدة حسيت ااني مش عايزة اكتبها فقولت خلاص مليش نصيب اسمع رأيكوا و بعدين دلوقتي بكتب في موضوع اهوه و مش عارفة هيحصل إيه هيكمل ولا لأ المهم . ملكوش دعوة باللغة و الادب ولا البتاع دة دة مجرد موضوع للنقاش مش قطعة ادبية.....


هل حقاً لسنا إلا للطبخ و تربية الابناء؟!!!


سئمت هؤلاء الرجال حقاً . لماذا إذا ما أخطأت المرأة قالو لها " إنتي إية اللي خرجك من المطبخ , يعني مبتفهموش و بتزاحمونا كمان" بينما إذا ما أخطأ الرجل اتخذوا له ألف عذر قائلين " ياعيني شوف الراجل من كتر المسئوليات مش مركز الله يعينه "
بينما كنت في سيارة إحدى صديقاتي متجهين إلي درس من الدروس فإذا بعدة سيارات علي مواقف متفرقة يخطيء قائدوها أخطاءً فادحة . علي سبيل المثال و ليس الحصر ((رجل ينتظر بسيارته عند منعطف من المنعطفات ولا يريد ان يتحرك من مكانه و بعد ان قرر علي مضض ان يتحرك حركة بسيطة لتمر صديقتي بسيارتها إذا به يقول " متروحوا بلدكوا بقة !!! " )) عجبتُ لكَ يا رجل . رجلٌ آخرٌ وجدته أوقف سيارته عند ال ( u Turn) الخاصة بالطريق الجانبي ... قمة الذكاء الذكوري !!!! .
في حين أنه إذا ما أخطأت مرأة في السواقة قالوا لها " ماهو عشان ست " ... عذراً للغة العربية " يعني إية عشان ست دية .. ناقصيين إيد ولا رجل ؟؟؟؟؟؟؟؟؟؟! " .
عندما وصلنا إلي الدرس إذا بالدكتور الذي اكننت له الاحترام يقول " أنا أصلاً مبتعبش نفسي في الشرح غير عشان الولاد هما دول اللي هيبقوا دكاترة إنما إنتو آخركوا المطبخ " قال هذا في يوم سابق
أما اليوم فبينما يشرح شيئاً ما عن عمليات القلب المفتوح فقال " انا مش عارف ياخويا إية البنات اللي بتروح العمليات دية عشان تتفرج .. هوه إنتي متوقعة إنك هتشتغلي كدة . إنتو آخركوا تشيلوا العيل.."

أعترف .. و بشدة إن دور المرأة الرئيسي منصب علي تربية النشأ و لكن أهو عيبٌ أن يكون لها دوراً في المجتمع؟!!!
اعتقد أن الله حباني بعينان و أذنان و يدان و عقل لأفكر لا لأبتكر في فن الطبخ فقط .
لماذا هذه المحدودية في التفكير؟؟؟
ألا يمكنني أن اعمل كطبيبة ناجحة بجانب كوني ام صالحة ؟!!!
و ماذا إن لم يرزقني الله بالزوج والذرية الصالحة ..
ءأكون عالة علي المجتمع؟؟؟؟ كلا و ألف كلا.....

كم أحب نفسي الآن و فقط الآن كوني امرأة كي أثبت لأمثال هؤلاء الرجال أن لي عقل قد يفوق عقول البعض منهم " وليس الكل"
لن أعمل كي أثبت لهم و لكن سأعمل لنفسي و لنصرة ديني و من ثم مجتمعي.
كثيراً ما كنت اتمنى أن اكون رجلاً ولكن ليس الآن و ليس بعد مقالتي هذه و أقوال هؤلاء الرجال.
إنهم يهينون عقليتي .. لكني لن ألتفت .. أجل لن ألتفت...

44 قالوا رأيهم في العك اللي تحت ؟؟؟:

عبقرية المرأة تكمن في قلبها
وقلبها هو نقطة ضعفها
مفيش حد بينعكش قصدى بيهمش دور المراه
دى بالعكس لها دور كبير طول تاريخنا
بس اكيد هتنجى فى اى مجال مدام انتى عندك الاصرار دا

 

نعكشة بجد احييك بشدة بس مش كل الناس رايها كدة فى كتير اوى بيحترموا عقلية المراءة

غير ان معظم الاوائل فى اى مكان بيكون بنات

سبحان الله حسيت ان بوستك ليه علاقة ببوستى بس من زواية تانية هههههههههههههههه

واحلى حاجة بجد فيكى ان الكلام ده خلاكى تبقى حب اكتر كونك امراءة

طبعا اتضامن معاكى كلية قلبا وقالبا

تحياتى

ايمى

 

ناس كتير كدة في الدنيا
بس مش الكل
اعتقد ان اللي بيقول كدة فعلا عنده مشكلة
دعيهم يهمهمون وامضي في طريقك علي بركة الله

 

بالعكس الدكتور اللى قال كده نسى حاجه مهمة جدا هى الغسيل والمكوه..لكن الحقيقة هى أن من السيدات من هن أكثر مهارة وقدرة من الرجال والدنيا حولنا مليئة بالأمثلة لكن يحلو لبعض الناس التقليل من دور حواء للغيظ المتبادل والمستمر بين الطرفين وقد قال عمنا جاهين
البنت زى الولد
ماهيش كمالة عدد
فى الاحتمال والجلد
كم ليهم من معجزات
فعلى الراس والعين ياكل حواء

 

romansy

اعتقد مش قلبها بس يعني هوه مزيج من القلب و العقل
لأ فيه ناس بتهمشة و هما دول اللي بتكلم عنهم هيا الفكرة مش تهميش اكتر منها عدم اعتراف
بس عامتاً ربنا يسهل

بالنسبة للنجاح ( الله المستعان)

نورت

........

emmy baby

اكيد مش كل الناس

اة صحيح انا مستغربالها دية ليية الاوائل بيبقوا بنات؟؟؟

لاحظت حكاية تشابه البوستات دية :D

هذا هو قدري فلأحبه

( يلا نعمل حزب المرأة المتنعكشة
ههههههههههههههههههه )


نورتيني
...........

kochia

الله المستعان

و ربنا يهديهم

نورتي

..............

maxbeta3zaman

تصدق معندوش حق ... المرة الجاية هنبهه :D

لأ مش اكثر مهارة بس هيا عندها امكانيات و هوه عندة امكانيات

فليعمل كل واحد منهم في موقعه

قولهم بقة


يلا ربنا يقوينا

نورت

..........

سلام عليكم

 

ok el regala 3andodhom mazed men el 7oreya bas da la yamna3 enek tet3aleme tab 2fred ya zake gozha sabha eah elle hya estafadeto ya3ne wala felos wala beet tab 2keed ykon 3andaha 3elm fa da ghalat meno enno y22alel men keemat el sayeda

 

we ba3deen ana msh ma3 elle y2alel men el gens el25ar da daleel enno 3ando na2s we ghel da5ele bas rabena yhde elkol we ma2azonesh en kolhom keda we akeed bardo fe setat me3a2ada fa rabena yhde elgamee3

 

momocaution911

منور يا باشا بتعليقاتك

هوه دة اللي بقوله
ولنفرض انها متجوزتش يعني تبقي ملهاش شغلة ولا مشغلة ومتلاقيش حاجة تعملها
ناس مخها عجيب صراحة
ربنا يهديني أنا قبلهم بس يهدينا جميعا
الستات المعقدة كتييييييير
ربنا يعافينا

نورتيني يا قمراية

سلام عليكي

 

ممممممم ربنا يعينك ع التعليق الطويل دا..
بيتهيالي لو جبنا طفل وطفلة وقارنا ذكاءهم ببعض ممكن المعدل يبقى متساوي وممكن كمان البنت تتفوق .. اكيد.. لكن بعدها بعشرين سنة الطفل في رايي هيكون "بقى" أذكى من البنت .. لأن مجتمعنا بيسمح وممكن يكون بيفرض على الراجل يكون أذكى من الست..
الراجل العادي بيسافر اكتر من الست العادية ..بيسهر في الشارع والشارع مكان فيه خبرات كتير..بيتبهدل اكتر في كل مكان والبهدلة برضه بتدي خبرة وتنمي العقل والشخصية..اعتماد الاسرة على الراجل اكتر وبالتالي برضه بيحل مشاكل وبيكون ملزم يفكر ويحتك بالناس ويمر بمواقف هيا اللي بتصقل شخصيته في حين الست وان كانت بتمر بنفس الحاجات دي لكن معدل اقل يعني عمر ما البنت هتسهر وتلعب وتجري وتتخانق زي الولد والحاجات دي هيا اللي بتنمي العقل والشخصية لان فيها تجارب ومواقف كتير وخبرات لا محدودة..وبالتالي الراجل كل ما وقت يمر بالوضع دا بيتفوق على المرأة ... غلط مين ؟؟؟ غلط المجتمع اللي بيمنع الست انها تتطور بنفس المعدل..وغلط البنت لانها بصراحة لو كملت كدا ولا هتنافس الراجل ولا هتعدي من جنبه..
لكن كذكاء فطري ..كتير احنا الرجالة بنتكلم ان البنات اذكى مننا في مجالات كتير ولهم طريقة تفكير مميزة..لكن المجموع قطعا الراجل "ظروفه" بتخليه احسن..
البنات بره ظروفهم مش منعاهم من حاجة وعشان كدا بالاحتكاك معاهم محدش بيقولهم انتوا مكانكم المطبخ....

اما بقى المطبخ وتربية الولاد .. فاحنا "مبنعرفش " نعملهم لتقصيرنا وجهلنا فلما الست تعملهم تبقى نعمة من الله لاهل الارض لانقاذنا من عجزنا في المجال دا.. اللي يحقر من حاجة زي كدا قوليله انت مش راجل ...
معلش طولت بس انتي قلتي موضوع للنقاش :) :)
ممكن ابقى اعدي ازود كمان

سلام

 

وهل تربية الأبناء شيء سهل؟
للمرأه الفخر في أنها تصلح لتربية الأبناء
....
نرجع للمقوله اللي هي رأس الموضوع، انك تلاحظي بعض السخريه من الناس أو الرجال- بمعنى أدق- عند رؤية عمل ليس على ما يرام من جانب المرأه او تصرف خاطيء
السبب في هذه المقوله سبب تاريخي
و هو أن المرأه أرادت اقتحام مجالات لا تخصها
يعني مثلا تلائي بنت دخلت كلية هندسه قسم ميكانيكا- أو بتدرس جراحه في كلية الطب- أو عندي مثلا في المصنع مرة تقدمت لوظيفة مدير انتاج بنت وحضرت للمصنع وكانت تريد الشغل والحقيقه شرحنا لها طبيعة العمل وانها ستتعامل مع عمال من طبقة ما يعلم بها إلا ربنا ولكنها كانت مصممه وعلى الرغم من هذا رفضت الاداره تعيينها وده طبعا لأن انا نفسي مش سالك معاهم- فما بالك بها هي هتعمل مع الاشكال دي ايه
ولما بدأت المرأه في اقتحام مجالات غريبة عليها فشلت فيها بحكم طبيعتها
فظهرت هذه المقوله
ليس هذا معناه أن المرأه لا تصلح إلا للجلوس في البيت كما تريد المقوله أن توضح لنا
لكن هي الفكره أن فيه مجالات المرأه دخلت فيها وكانت صعبه عليها وأصرت إلى الدخول فيها بالعافيه
.....
تربية الابناء شيء ليس بالسهل
خاصة في ظل الظروف الاخلاقية التي نعيش فيها
وأي بنت تستطيع أن تربي اولادها تربية سليمه تكون حققت انجاز فعله مثلها أناس معدودين على الاصابع
....
لا يوجد رجل يهين عقلية المرأه كما تعتقدي
فكل ما تسمعيه كلام
فلا يوجد رجل يستغنى عن المرأه
حتى لو سخر منها ومن عقليتها

 

التالى هو جزء من مقال قديم لى .. اعتبريه اعتذار متحضر لك


" دائما ما يخضع الرجل أموره وقضاياه للمنطق والتحليل، فإذا ما اقتنع يقبل الأمر وإذا لم يقتنع لم يقبله.

على عكس المرأة فى كثير من الأحوال.. فإنها تخضع معظم قضاياها لإحساسها ومثلا.. فإن الموضة تزداد غرابة وتتعقد ألوانها وتتشابك وبينما تتردد الموضة بين الشعر الطويل والقصير بهذه السرعة نجد أن المرأة أسرع تجاوبا من الرجل فى هذا.. فهذا البائس يتجاوب أيضا.. وهو قد انتهى فى وقت إلى الملابس المزركشة الملونة وكان قد استخدمها فى عصر قديم.. ثم أطلق شعره بعد ذلك ولكن متى؟
بعد أن أخضع ذلك لميكروسكوب المنطق والتحليل والتفسير وأقنع نفسه – وربما بلا مبرر - بأنه وفقا للمذهب الهيبى والرجوع إلى الحياة البدائية البسيطة ألغى موضوع الحلاقة وترك شعره مسترسلا، وحتى شباب الأصوليين يتحججون بأن القدامى كانوا مسترسلى الشعر.

إذا فقد أوجد لهذا حتى مذهبا وعقيدة، و قد عاد الآن إلى الشعر القصير وربما أزاله كله من باب النظافة مثلا ..
ما أريد أن أقوله بهذا العرض هوأن المرأة مخلوق مزاجى ..

فإذا عدنا للمرأة وجدناها تنظف طفلها بوازع من إحساسها المطلق به.. رغم أن هذا الموضوع لو عرض على عقل رجل لتقزز منه .. وهو منطقيا شئ غير لطيف.

لكن الحقيقة تستوجب أن يوجد من ينظف الطفل.. وإلا لم تستمر حياته.. فإذا كانت المرأة هى التى تتطوع بذلك.. فلابد أنها تزيد عن الرجل بإمكانية تمكنها من هذه الرسالة.

كذلك فى أصعب الأمور وأعقدها نجد أن المرأة دائما هى الدفء الكامل.. والحنان الكامل.. تعطيه بلا حدود.. وقد لانستطيع أن نفسر هذا السلوك إذا وجّهته هى إلى إنسان فاشل مثلا.

فالمرأة إذا معدة دائما لرسالة أدق من الرجل.. فهى تأتى على الفنان فينطبع إحساسها وقلبها برسمه مباشرة فتشجعه.. وربما لاتعرف مقاييس عدته التى يستخدمها فى الألوان ولا كيف كوّنها.. بعكس الناقد الذى يتأمل ويدقق ويدرس التركيبات والتداخلات وربما أظهر الرسم فى النهاية سيئ .. رغم أنه حلو.

هذه هى الحقيقة الرائعة فى المرأة ... أننى لا أهاجم عقل المرأة وفكرها.. بل بالعكس أريد أن أظهر هذا الركن فيها الذى ينقص الرجل ولا نملك أن نعيش بدونه و الأمثلة كثيرة ..

سق لى رجل تزوج من ضريرة فربما لاتجد.. وأنا أسوق لك العديد من النساء اللاتى تزوجن من مصابى حرب وغيرهم. وهكذا يقال "وراء كل رجل عظيم امرأة" ولم يقال رجل.. فهو بإمكانياته لايصلح لمثل هذه الرسالة.

فإذا اتفقنا بأنها مخلوق مزاجى سريالى يتحرك بالإحساس وأن الله خلقها أعقد تركيبا من الناحية السيكولوجية والبيولوجية فلابد أن نتوقع انصياعها الطبيعى لذلك الإحساس..

لرجلها.. لطفلها..لأبيها وبلا حدود.. فذلك ركن مطلوب من أركان الوجود الإنسانى.. وهكذا فهى تتحرك من أرض الحقيقة.

فالحقيقة تقول يجب أن يكون الطفل نظيفا.. ويجب أن يدعم الفنان بطاقة روحية ويجب أن يقف الفاشل على قدميه مرة أخرى .. ويجب أن تظهر نواحى عظمة الإنسان فيكون عظيما.

إذا فرغم فكر المرأة .. تتحرك وعلى طول الطريق عصاها هى قلبها وإحساسها.. فإذا كان المذهب السريالى هو ما وصل إليه الرجل فى وقت من الأوقات فإن المرأة قد سبقته فى هذا المضمار منذ خلق البشرية .. ولابد أن هذا المذهب حقيقة .. ورغم أنها قد تبدو عسيرة التحقيق إلا أنها تحرك الإنسان دائما..

وبعد أن تناولنا هذا المثال ..لابد أن ننقاد إلى نتيجة رائعة .. وهى أن قمة العاطفة والارتباط هى فى أن نحس بجوهر من حولنا.. بلا تفاصيل .. بمعنى أنك حين تنظر إلى أمك أو بلدك أو إبنك فأنك تحبه دون أن تسأل نفسك عن أية تفاصيل فيه .. وأنت لاترى إن كان جميلا أو قبيحا ، ناجحا أو فاشلا ، ذو قيمة عالية أو حتى بلا قيمة .. لأنك فى هذه الحالة لاتراه بعينك .. ولا تسمعه بأذنك .. ولاتشمه بأنفك .. وإنما تراه وتسمعه وتحسه بقلبك فقط.

وإذن فإننا لا نستطيع أن نلوم من يزور أباه ولو فى السجن .. أو يقف إلى جانب إبنه وابنته مهما كان موقفها .. ذلك بأن الحب هو دائما إيمان حقيقى لايرى إلا كل شئ جميل فيمن ترتبط به ..

إن هذا الطريق هو الذى يقودنا فى النهاية الى الحب المجرد لله .. لأننا لانراه ولانسمعه .. لكنه دوما نحسه بداخلنا.

 

mero

يمكن انا معرفتش اوصل وجهة نظري

انا مبقولش الراجل اذكي ولا الست اذكي

دية ربنا حاباها بصفات و هوه حباة بصفات

اية المشكلة لما الست تسوق يعني؟؟؟ ولا انها تشتغل دكتورة
بجانب دورها الاساسي في تربية الاولاد

انا معترضة علي النظرة المحدودة ان الست مش من حقها إنها تشتغل

يعني إية المشكلة لما الست تركب المواصلات بدل ما تتبهدل في المواصلات وتتلزق في الرجالة

و لما يتلزقوا في الرجالة في ااتوبيسات يتضايقوا
مانتو مكانكوا المطبخ

انا لا اقلل من شأن الرجل
"الرجال قوامون علي النساء بما فضل الله بعضهم علي بعض"

طيب مثلا إفرض انا متجوزتش
اعيش بلا دور ف يالمجتمع

و بعدين ليه بتسمحوا لنفسكوا انكوا تشتغلوا في الطبيخ و كمربيين للأولاد و دة مزاحمة لأعمال السيدات

ومحدش اعترض

هيا دية رؤيتي
ولا طولت ولا حاجة

منتظريين باقي الرد في مرة اخري

نورت

........



لورانس العرب


طيب سؤال
هوه مش هندسة قسم ميكانيكا دة ممكن تشتغل في خدمة ما بعد البيع للسيارات او ممكن تشتغل اي حاجة تانية
هيا هتبقى مهندسة اية المشكلة؟؟؟

مادام مش هتسيب بيتها و جوزها يطقوا في البيت و هتراعية فوق كل شيء

مالها الجراحة : مش فيه ستات محتاجيين يعملوا عمليات
انت عايز راجل يكشف عليها و يشوف جسدها؟؟؟؟؟؟؟؟؟

انا اعرف واحدة كان عندها ورم مرضيتش تشيلة إلا بعد كام سنة عقبال ما لقت دكتورة ست تعملها العملية و الstaff كلة كان نساء في غرفة العمليات
مين اللي هيعمل عمليات سرطان الثدي و غيرها من العمليات في الجراحة
رجالةةةةةةةةة؟؟؟؟؟؟؟؟؟
ليةةةةةةة؟؟؟؟

مين هيعمل عمليات القلب للستات .... رجالة؟؟؟

ليية؟؟؟

لا اتفق ان البنت تبقى مسترجلة او تدخل في مجال مش هيفيد غيرها من النساء او المجتمع لو هتختلط جامد مع الرجال

بالنسبة إن الرجل مايستغناش علي المرأة

طيب لية بتسممونا بمقولات بتجرح و تألم و تضايق الانسان

زي ما ايمي بيبي قالت في موضوعها اللي في مدونتها إن عندنا المشاعر عالية شوية

اعتقد ان الكلام اللي بيتقال بيأثر فينا

فلا داعي للمزاح بالطريقة دية يعني


بالنسبة لتربية الابناء
اكيد مش شيء سهل
وكتير من العيال اتربوا من غير امهات
بس انا والدتي اشتغلت
وبرغم انها كانت بتشتغل كانت بتراعينا
و بتربينا و علمتنا وفضلت ورانا
انا مش شايفة مشكلة صرلااحة

نورتني حقاً

.........




sherif

هممممممممممممممم

مش عارفة صراحة اقول إية
يعني هيا الفكرة تكمن في إني لا انكر كون المرأة عالية الحس ولا ان للرجل مقومات أخرى غير المرأة

انا بعترض إنهم معترضين إنها ممكن تعمل من اجل مجتمع افضل بجانب تربيتها للأبناء و مراعاتها لزوجها و تنظيم بيتها

يعني مين هيبقى دكتورة للأطفال و دكتورة نسا و دكتورة جراحة للسيدات و دكتورة للسيدات عامتاً ي جميع المجالات جلدية و نفسية و غيرها

مين هيبقي مدرسة للأطفال وللبنات

مين هيبقى بائعة للملابس في محلات ملابس السيدات

مين و مين

مش دول لازم برضو يدخلوا كليات عشان يشتغلوا الشغلانات دية


انا متضايقة انهم شايفينا كائن للبيت فقط
و عيب قوي إننا خرجنا من بيوتنا نتعلم و نشتغل و نفيد المجتمع

انا لا أطالب بالمزاحمة في اعمال الرجال ولكن أطالب ألا نُلاقى في خروجنا من بيتنا بالإهانات التي لا يعلم اصحابها إنا تؤثر علينا

بس

نورت

...........


سلام عليكم

 

المشكلة اللى بيقول ربو العيال ده
اصلا فاكر الموضوع سهل يعنى
وكان التربية ده موضع بسيط يعنى
انا فى اعتقادى ان التربية اصعب بكتيير
من الكتيير من الوظايف اللى الرجالة بتشتغلها فلو الراجل عرف صعوبة الموضوع
كان عرف ان المرأة تعرف تشتغل اللى هوه
بيشتغله

 

برافو عليكى يا نعكشة ايوا كده انصفينا
المراه نصف المجتمع واكتر من كده كمان وابقى تعالى عندى هتلاقى كلامى بيكمل كلامك
شفقة

 

بصي يا نعكوشة
ملكيش دعوة بكلام اي حد لان ده مجرد نقص مش اكتر

الناس دي لو كانت فاهمة الدين صح و لو قرأت في سيرة الرسول عليه الصلاة و السلام لوجددوا ان الاسلام قد عزز المرأة كثيرا

طب اللي بيقول الست لبيتها و جوزها بس ياتري ميعرفش ان معلمة الامام الشافعي كانت امرأة
و ميعرفش ان السيدة خديجة كانت بتعمل في التجارة و كانت من انجح السيدات في مجتمعها يعني بلغتنا ممكن نقول عليها سيدة اعمال
ميعرفوش ان كتير من الصحابة اتعلموا علي ايد السيدة عائشة


و في امثلة كتير تانية و اللي حابب يعرف ممكن بسهولة يلاقي

طب في حاجة كمان بيعتبروها من الاعجاز الرقمي في القرآن الكريم و هي ان كلمة رجل ذكرت في القرآن 24 مرة و كلمة امرأة ذكرت بردو 24 مرة دليلا علي المساواة

طب الاية اللي بتقول "الرجال قوامون علي النساء بما فضل الله بعضهم علي بعض"
و اللي كتييييييييير من الجهلة زي ما بحب اسميهم دايما فيهموها علي مزاجهم و ان الرجال افضل و الحقيقة انهم لو قرأوا في التفسير لوجدوا جملة "بما فضل الله بعضهم علي بعض " يعني لكل منهم مزايا عن الاخر
لا النساء افضل و لا الرجال افضل و فوق كده كمان الرجال هما اللي مسئولين انهم يكفوا احتياجات المرأة من مسكن وملبس و غيره

عايزة اقول لكل اللي بيقلل من شأن المرأة
" أتأمنون ببعض الكتاب و تكفرون ببعض "



تحياتي ليكي يا قمر

 

ما بلااااااااااااااااش انا رايي فى الموضوع دة...اممممممم مصرة يعنى؟؟؟؟
طيب يا ستى اسمعى: اولا الستات والرجالة بنى ادمين زى بعض لهم نفس الحقوق وعليهم نفس الواجبات بس تقولى اييييييييييييييييه فى المخ التخين؟؟؟
ثانيا حكاية الرباية والطبيخ دة تهجيص الناس اللى عايشين هنا بس شوفى فى اى بلد تانى هتلاقى دة خيال علمى اساسا...
ثالثا كل واحد فيهم يقوللك دة شرع ربنا قال يعنى هو فقيه وفاهم كل حاجة واساسا شرع ربنا ان الست كانت طبيبة وتاجرة وبتشارك فى الحرب كمان...
يبقى نكبر دماغنا وتحطى مجهودك وتعبك ونجاحك فى عين اتخن تخين فى البلد

 

كل ما اجى عندك ابقى موش عاوز امشى
ربنا يخليكى وتسعدينى كمان وكمان

 

بسم الله الرحمن الرحيم وبه نستعين والصلاة والسلام على خير المرسلين سيدنا محمد صلى الله عليه وسلم فى الاول كل سنة وانتى طيبة نبدا بقى ونقول بس فى البداية هو هيكون تعليق كبير اول حاجة مفيش حد يقدر ينكر دور المراة لانى اصلا الاسلام كرم المراة وجود سورة فى القران اسمها النساء تانى حاجة الرسول صلى الله عليه وسلم قال استوصوا بالنساء خير بعد كل دة مفيش حد يقدر يهمش او ينكر دو المراة اما موضوع بقى التربية ليه الناس مستهونة بموضوع التربية لما الام تكرس حياتها كلها للاولادها وتربيتهم تربية سليمة بتساوى او بتكون اعلى من الراجل فى عملة لذلك مش ينفع انى اى حد يهمش دور المراة بس بردة فى حاجة عايز اقولها بردة مش ينفع اننا نقول انى البنت ممكن تشتغل اى حاجة زى الراجل لاطبعا فى فرق وبعدين احسن حاجة للبنت تربية الاولاد دة دور كبير جدااااااااااااا نفسى الناس تحس بية انا اسف جداااااااااااااااااااا على الاطالة

 

عزيزتى نعكشة

الذى يقول ان المرأة لا دور لها سوى المنزل لا يفقه شيئا سواء مجتمعيا او دينيا
لان نصف الدين ان مع السيدة عائشة فقد قال صلى الله عليه وسلم
خذوا نصف دينكم عن هذه الحميراء

كما ان هناك من الوظائف ما يفضل الناس ان تكون الممارسة له سيدة
مثل التخصصات التى تتعلق بهن فى الطب وايضا التدريس لهن وغيرها

لان المرأة هى الاقدر على فهم الاخرى اكثر بكثير من الذكر مهما كان علمه
وبالطبع الدور الاعظم للمرأة وهو تربية الابناء ليكونوا اعضاءا فاعلين فى المجتمع

اما ما أدى الى خلق المشكلة فهو اصرار بعض النساء على الخوض فى مجالات لا تتناسب الوضع العام لهن مدفوعات بحب التقليد للغرب الذى بالمناسبة بدأت المرأة تعود فيه الى المنزل مفضلة اياه على العمل

ولكن ماذا نفعل فيمن عندنا واصرارهم الذى يصل الى العناد


تحياتى على طرح الموضوع
ومنتظرك عندى والا

 

فما التانيث لاسم الشمس عيب .. وما التذكير فخر للهلال .

ايتها الفاضله

لا تلتفتى لهذا الكلام بكن قامت حضارتنا وبمن ربيتن علا مجدنا ورفرفت رايتنا

ومستقبلا لن تقوم لهذه الامه قائمه الا بكن فعملن لامتكن انتن مع الرجال سواء بسواء

انها سياده الرجل طغت على هذا الدكتور والله لو املك ان اقابله لكان لى معه شأن اخر

تحياتى لك ولكل انسانه مثلك ارادت ان تنفع امتها

 

seven

كل مصير لما خلق له
بس تقول إية بقة
ربنا يهدي

نورت

...........

شفقة هانم و احسان بيك

قريت موضوعك من قبل ما حضرتك تقولي عليه بس ملاقتش عندي اضافة اقدر اضيفها لحضرتك

نورتيني

............


اسراء حامد

انا مكنتش عارفة المعلومة دية " معلمة الامام الشافعي كانت امرأة"

تسلمي عليها


"يعني لكل منهم مزايا عن الاخر
لا النساء افضل و لا الرجال افضل"

عايزة اقول لكل اللي بيقلل من شأن المرأة
" أتأمنون ببعض الكتاب و تكفرون ببعض "


يعني مش عارفة اقولك اية
رفعتشي من معنوياتشي :D

نورتيني حقيقي

...........


enjy

مكنتش مصرة صراحة
:P

بهرج
اكيد مصرة


هوه انا متفقة معاكي بس مفهمتش الجملة دية

" ثانيا حكاية الرباية والطبيخ دة تهجيص الناس اللى عايشين هنا بس شوفى فى اى بلد تانى هتلاقى دة خيال علمى اساسا..."

اريد توضيحاً


عندك حق .. و ربنا يقوينا

استعنا علي الشقا بالله

نورتيني

...........


راجي

:D
آمين

نورتني

................



geo amr


عليه افضل الصلاة و اتم التسليم

طيب هوه انا بس عايزة اوضح توضيح بسيط
هوه انا مقولتش خالص ان تربية الابناء حاجة ملهاش لازمة
اومال مين اللي هيصنع القادة
ماهو احنا

حضرتك انا بتكلم عن اعتراضهم علي اخطاء عادية و تهويلها و تكبيرها
بينما هما بيخطئوا و محدش بيقولهم حاجة

انا معترضة انهم مش عايزين النساء يدخلوا في صنع التاريخ مع انهم مش هيعرفوا

كلامهم دة اهانة حتى لو مأثرتش فيا

بس

حضرتك مطولتش ولا حاجة

نورتني

............


الأزهري

وهوه دة اللي بقولة النساء ليهم لازمة في حاجات كتير

ومتفقة جداً جداً في حكاية تربية الابناء


ممكن هوه دة السبب
بس ميبقاش النظرة دية سواء للي بتخوض في مجالات مينفعش ليها او اللي بتخوض في اي مجال
ماحنا بنفكر برضو


هوه انا روحت عند حضرتك كذا مرة من قبل ان تنتظرني
مش لازم اكون بعلق بس انا بروح

نورتني

..............


احمد بدر الدين

عجبني قوي بيت الشعر

توضيح بس انا مش فاضلة ولا حاجة عشان ماخدش في نفسيتي مقلب كل واحد عالم بعيوبة

ايوةةةةةةة كلوا لازم يشتغل سواء تربية اولاد دةش غل سواء دكتورة مدرسة بياعة شغل و للرجل برضو شغل

ربنا يقوينا

و تسلم علي دفعة الحماس دية

بالنسبة للدكتور الصلح خير :D


تسلم ربنا يخليك

نورتني

........

سلام عليكم

 

أنا قابلت من البنات ما كنت أتمنى أن يصبح أسلوب تفكيري مثلها

على فكره ركن السياره باللغه العربيه أي أوقفها .. والله أعلم

أول مرة أزور المدونة وأعجبنتي كثيرا

بالتوفيق

 

فوضى منظمة.... sheshany


ممممممم ... شيء جيد .. ربنا يوفقك

تسلم علي الكلمة مش عارفة كانت تايهة عني ازاي

تسلم علي رأي حضرتك


نورتني

...

سلام عليك

 

لالالالالالا
احنا زينا زيهم لا أكتر ولا أقل
أتمنى تزوري مدونتي عشان لسة جديدة ومحتاجة تشجيع

 

بصى يا دكتوره نعكشه. محدش يقدر يهمش دور البنت فى الحياه وبالذات فى الحياه التعليميه لان اللى بياخدوا الولاد هما بياخدوه بالظبط. بس خللينى احكيلك شوية حاجات كده شفتها وانا فى الجامعه واحكمى انتى. فضلت طول سنوات الدراسه الخمسه فى منافسه مع بنت على المركز الأول اللى ربنا وفقها واخدته واتعينت فى الكليه. حاليا هى مش فاضيه جدا مع بناتها وتربيتهم وبالعافيه اهو بتحاول تخلص الدكتوره علشان تستريح شويه وتبقى دكتوره زى ما سمعت منها. زوجتى اللى كانت فى تخصص تانى وطلعت الاولى برضه على كل الولاد فى دفعتها واتعينت برضه فضلت مشكوره علشان خاطرى انها تأجل الدكتوراه شويه وتسافر معايا. انسه فى تخصص تالت من نفس الكليه الحقيقه وهبت حياتها للعلم واجلت كل مشاريع الارتباط. الحقيقه هى خلاص حتناقش الدكتوراه بس زى ما عرفت من الناس اللى حواليها انها حاسه بالوحده جدا.محدش يقدر ينكر ان البنت فى مذاكرتها وفى حياتها كلها تركيزها احسن من الولد مية مره. بس فى النهايه الأولويه المطلقه للمرأه بيتها واولادها الا اذا كان ليها اختيار اخر من البدايه.....صح ولا ايه؟

 

بنوتة

كل واحد لية مميزاته
احنا مش زيهم ولا هما زينا بالظبط
هذا رأيي

نورتيني
وان شاء الله اروح مدونتك يا قمر


............


محمد داوود


دة يقارب اللي بقولة من وجهة نظر أخري

انا مشكلتي ان الرجال مبيشوفوش كدة

وبعدين افرض مصيري اصبح زي الدكتورة التالتة مش بإرادتي
يعني محدش اتقدملي
او مثلا اللي اتقدمولي ميناسبونيش
اتجوز و خلاص؟؟؟؟؟؟؟؟؟؟
لأ طبعاً
اكيد هحس بالوحدة بس مش ظل راجل ولا ضل حيطة

يعني لو عنست افضل قاعدة في البيت بلا اي فايدة لأ
هشتغل يعني

المهم نورتني حضرتك

.؟....

سلام عليكما

 

بالنسبة للهندسه- فيه أقسام أخرى ممكن تشتغل فيها مش لازم ميكانيكا
وقلت لك الموقف اللي حصل عندي في المصنع
أما بالنسبة للجراحه فده لمصلحتها- لأن مهما كان لن تجدي من يطمئن إلى أن مرأه تعمل له عمليه قلب مفتوح أو حتى لوز - وصدقيني دي حقيقه-
لكن الاطباء البنات منتشرين في كل التخصصات، ولكن في الآخر لاحظت موضوع الجراحه وقاله لي اصدقائي في القصر العيني وهي ملاحظه عن اقتحام البنت لمجال غريب عليها، هي كويسه في مجالاتها وحلوه في العيون والانف و الاذن والنساء والتوليد- ليه عاوزه تعمل عمليات وايه الجديد اللي هاينضاف لها؟
...
بالنسبة للمقالات اللي تسم البدن، انا لا أصدق أي شيء فيها لأن كله بيقول كلام وبس عشان الناس تضحك وخلاص، زي اللي بيقولي نصيحه مني يابني اوعى تتجوز لأن الجواز وحش ودي اسوأ خطوه انا عملتها في حياتي -وانا عارف انه كذاب ولا يقول الحقيقه- لأنه لما بيبعد عن البيت كام يوم بيتجنن،وهذا حقه لأنه لن يسير ضد طبيعة البشر،لكن دي طبيعة الناس، مفيش حد هيقولك انه مرتاح خوفا من الحسد، فكل ما تسمعيه من كلام يسم البدن من أن النساء كذا وفيهم وفيهم كلام مستهلك لا يعبر عن حقيقة الصادر منه هذا الكلام

 

سلام عليكم.....
ازيك يا نعكووشة وحشاني يا بنت والله
بصي بالنسبة للموضوع ده
انا من كام يوم كنت باتكلم مع ابن خالتي واستغربت انه بيقولي اصل انتم لو قعدتوا فالبيت هاتوفروا فرص عمل لينا لان احنا الاهم واحنا اللي بنفتح البيوت!!!!!!!!
بصي انا ليا وجهة نظر فالموضوع ده في مهن معينة لازم اللي تقوم بيها تكون ست مش راجل زي الطبيبة مثلا
اعتقد ان الراجل لما يودي زوجته او اخته او امه هايبقي مطمن اكتر

بس طبعا دور الست الاساسي هوا بيتها
يعني لو اتحطينا في موقف اننا نختار بين الشغل والبيت اكيد هنختار البيت
لاني لو اختارت الشغل
ممكن ابقي دكتورة شاطرة وناجخة
بس لو ربيت ولادي صح ممكن اطلع 3 دكاترة او 3 شخصيات نافعين للمجتمع

موضوع جميل واسلوب اجمل
الي الامام يا روووووميل

 

رأيك صحيح بالفعل وكما تقولين انت تفعلين ليس انتقام انما تنفيذ ما امر الله به


ابو فاطمة

 

من اجل هذا انشئت المدونة التي اراسلك منها..
وأعلم ايها الاخت الكريمة ان هذا الفهم الخاطئ من قبل بعض الرجال و النساء ايضا هو ضرب من الخطاء في الفهم. شئ اخر يثبت صحة ما اقول ان تربية الاولاد كما يزعمون ليست يالشئ السهل كما فأن من ربت من يقول هي سيدة ومن تزوجها هي سيدة.



حياتنا

 

27na mabnotlobsh almosawah l2an el mar2a 3omraha mahatkon zay elragel bas 2l23teraf be7a2ha 2naha momken tenga7 fe magalha we tefeed el mogtama3 we hya betrabe weladha we te7afez 3ala betha kaman we dah by2olak 2n momken 2naha tkon betrabe we totbo5 we kaman nag7a fe magalha we leeha 2sar 2ktar fa3alya.l

 

قوة المراة في ضعفها

مش الضعف الي في بالك انا بتكلم انها تكون كما خلقت لة

ولو اننا خيرنا اغلب نساء العالم علي ما جبلت علية لاختارتة وهي راضية

يمكن الاحساس بالظلم بيخليها تنسي

 

اظن ان تربيه الاولاد ورعايتهم حمل ميقدرش عليه انجح راجل فالدنيا

ربنا سبحانه وتعالى خلق لكل واحد دور وكل ميسر لما خلق له

ودا ميمنعش ابدا انك تكونى ناجحه فالاتنين دا حقك المهم متقصريش فى دورك الاساسى

 

الرجالة الاغبيا كتير اوي
اوي اوي اوي

بشكل مستفز للرجالة الاخرين نفسهم

انتي بتحققي نفسك عشان دي حياتك ولازم تعيشيها صح وانتي بتنجزي وبتعملي الحاجات اللي بتحبيها واللي تحسسك بمعنى وجودك مش عشان تثبتي لحد حاجة

:)

 

لورانس العرب

هوه حضرتك متضايق لية ان البنات تدخل ميكانيكا
هوه مفيش ميكانيكا من غير عمال يعني مافي انتاج و سارات و طيران و الخ الخ
ماشي متقحمش نفسها وسط العمال و تسترجل بس

بالنسبة للجراحة انا لو هروح لدكتور عشان يعملي عملية افضل يكون واحدة ست عشان اللي يكشف عن جسدي تبقى ست و ميبقاش رجل
يعني فية جراحات كتيرة الافضل الستات هيا اللي تعملها

بالنسبة للمقالات : لنا الله


نورت

...........

رومي

عليكم السلام و رحمة الله وب ركاتة
بخير احمد ربي
انتي عاملة اية و فينك من زماااااااان
وحشاني يعني

اتفق مع رأيك مع اضافة بسيطة لو مش لازم تختار يا دة يا دة
اعتقد من حقها انها تشتغل عادي مادام هتراعي بيتها

بس

نورتيني

........


هوه كدة

ربنا المعين
تسلم

نورت

...........

حياتنا الزوجية

هوه التربية مش شيء سهل إذن .... .؟...

ينفع تشتغل ولا مش لازم تشتغل ولا اذن اية؟؟؟؟


نورتني

..........


momo

اتفق مع رأيك تماما

نورتي

...........


كراكيب عادل

انا مبتكلمش عن مفاضلة دلوقتي

انا بتكلم عن اعتراض في اني اشتغل
بجانب بيتي
وماذا ان لم يكن لي بيت و اولاد
هربي مين يعني؟؟؟
يبقى اشتغل افضل
طيب لو مكنتش بشتغل قبلها
لسة هبدأ اشتغل بعد سن ال 35

دة وجهة نظري
بس الزوج و الاولاد اكيد هما الشيء الاساسي بس

نورتني

...........


انا حرة

سبحان الله بقة

هوه دة اللي قصدي علية
بس هما يظهر مش فاهمين وجهة نظري

عامتاً

نورتي

........


مُزمُز


اة والله لس انهاردة واحد مستفز استفز سواق ميكروباس و عينك ماتشوف إلا النور



عندك حق ... ربنا يوفقنا و ييسرلنا

نورت

..........



سلام عليكم

 

مُزمُز
آة صحيح
حاولت ادخل علي مدونة حضرتك من كام يوم
و باء الموضوع بالفشل

سلام

 

يا رب يا هادى ..
والله هو فى الحقيقه .. انا كان نفسى ارد على الموضوع ده من زمان .. بس كان عندى مشكله انى افضيله وقت .. لانه بصراحه موضوع مش بسيط واحب اهنيكى على فتح باب المناقشه فى مثل هذا الباب ..
بصوا يا جماعه ..
اولا انا مختلف مع الدكتور فى اسلوبه .. ما يصحش طبعا انه يتكلم باسلوب زى ده
ثانيا الطبيعه اللى ربنا خلقنا عليها تحتم ان الست تبقى مكانها ووظيفتها الاولى البيت
ثالثا هو من حلاوة شغل الرجاله اوى عاوزين تبقوا رجاله .. بلا نيله
رابعا لو عندكوا استعداد جربوا كده عيشوا رجاله لمدة تلات سنين مثلا .. اركبوا الاتوبيس ولو لقيتوا راجل واقف قعدوه واقفوا انتوا اتفعصوا فى الطرقه .. اتخانقوا مع السمكرى بتاع العربيه واديله بونيه فى وشه .. ادخلوا الجيش .. ربوا ذقنكم وتدينوا ..:)
وبعدين مين قال ان البيت حاجه مهينه .. او حاجه قليله .. ومين قال برضو ان فى ست فى الدنيا تعرف توازن بين بيتها وعيالها وجوزها ..وبين شغلها .. استحاله .. لازم فى حد هايتظلم ..
وبعدين ما حدش سال نفسه ليه السيده خديجه ما كانتش بتطلع ترعى الغنم مع الرسول صلى الله عليه وسلم ... ؟؟؟؟

يعنى انا مش هاقدراقول كل اللى عاوز اقوله هنا عشان ما اطولش .. بس ان شاء الله هاكتب موضوع مخصوص للرد على الموضوع ده ...
سلامو عليكم

 

2ragooz

الله يهنيك

اولاً :اتفق

ثانياً : محدش قال حاجة غير كدة زي مثلاً انا اهوه شغالة ان شاء الله في الطب الاسم طبيبة بس دة لا يمنع اني ممكن اكتب قصص شعر اغني ارسم اي حاجة بس الحاجة اللي ليها الاولوية الطب ولا اية؟؟؟؟؟؟


ثالثاً : ملهاش علاقة .. المجتمع محتاج دكتورة ست عشان تعالج الستات .. انت تحب زوجتك يكشف عليها دكتور راجل ...
المجتمع محتاج مدرسة تعلم البنات ... محتاج و محتاج

وبعدين مين قال ان الرجالة في الزمن دة بيقوموا للستات
انا اللي اعرفوا إن البنات الصغيرة بتقوم للسيدات كبيرات السن مشوفتش رجالة بتقوم للبنات إلا واحد او اتنين طول حياتي المتمرمطة في المواصلات

انا عن نفسي لو الجيش يديني فرصة اني ادخلة كطبيبة هبقى مبسوطة جداً

مين قال انه مهين
حكاية الموازنة دية اعتقد ان الواحد يقدر يعملها
زي بالظبط الراجل اللي بيتجوز اتنين ولا اربعة ماشي هيحب واحدة اكثر بس هيحاول يعدل بينهم
هوه دة اللي هنحاول نعمله هنحب بيتنا اكتر بس هنوازن بين الشغل و البيت
و طبعاً لو البيت محتاج نوفي حقة الاول

السيدة نسيبة بنت كعب ( كانت بتدافع عن الرسول عليه افضل الصلاة و السلام في الحرب)

كان فيه ارملة في عهد سيدنا عمر عملت بالتجارة بس مش متذكرة اسمها
و كان فية قصة بتاعت اليهود اللي دخلوا علي بيت النساء لما كان معاهم سيدنا حسان بن ثابت و امرأة هيا اللي دافعت عنهم

مستنين موضوع حضرتك

سلام عليكم

 

to7fa awy
da film ya benty bgd enty hayl awy fe el e5raaag :)

 

oma

ربنا يكرمك يا قمر

مع ان مكان التعليق مش مفروض هنا
بس يلا

نورتيني

سلام عليكي

 

ههههههههههه

والله بحمد ربنا على اني ولد

انا مش متخيل كنت هعمل فنفسي ايه لو كنت بنت

بس دي نعمة بحمد ربنا عليها كتير بجد والله مش استفزاز

البس اللى عاوزه واخرج وارجع متأخر عادي

وكم اكره النساء اللى عاوزين ياخدو وظائف مش بتاعتهم من دافع تحرير المرأة والكلام الهبطان ده

زي المحاماة و القضاء

بل مطلوب منها ان يكون في دكتورة لتعالج النساء
وداعية تدعو المسلمات

بصراحة انا لسه مش عارف دور المرأة في الاسلام ..وكم تأثيره؟
معلش لو بقول حاجة زي كده

 

من تجربتي الخاصة اعتقد انها مسالة قدرات
فيه ست تقدر تشتغل وتدرس وتربي الولاد وتقوم بحق بيتها وزوجها
وفيه اتقدرش فبتحصل نسبة 50 % من كل حاجة
وفية ملبتقدرش فبترمي حاجة على حساب حاجة
واللي يقدر يشيل يشيل

 

ولا تزعلى نفسك عجبنى تفكيرك جدا
للاسف كل الرجاله اللى بيقولوا ان كل مهمة المرأة الطبيخ وتربية الاولاد دى اكبر واهم مهمة لولا الام اللى ربتهم واكلتهم ماكانوش بقوا كده
يشوفوا الاطفال اللى اتربوا بلا ام ويشوفوا هما امهاتمهم وزوجاتهم علملولهم ايه
حتى لو كل مهمتى انى اربى ولادى واطبخلهم دى مهمة كبيرة مافيش راجل يقدر عليها
فى زوجات ناجحات فى بيتهم وعملهم بس مافيش يقدر يجمع المهمتين
ربنا يوفقك يادكتورة

 

vague Adam

الحمد لله علي كل حال

بس كويس ان حضرتك معترف باهمية دورها كطبيبة يعني

لما حضرتك تقرا في الموضوع ابقى قول D:

نورتني

.........

سها السباعي

اتفق

ولو مقدرتش تشيل حاجتين

تخليها في حاجة واحدة لو متوفرة ألا و هي بيتها و أولادها
ولو مش متوفرة الحاجة الوحدة هتبقى عملها

نورتيني

..........

ايمان العرفاوي

اتفق معاكي في اهمية دور الام وانهم قبل كلامهم مبصوش للي عملته عشانهم


بس انا اعرف ناس قدروا يجمعوا بين المهمتين

نورتنيني

...........

سلام عليكم