نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

يوميات دكتورة مستقبلية 4 Back to school

توضيح صغنون:
انا مش في أولي ولا تانية طب ولا حتى تالتة ولا رابعة دية يوميات كتبتها زمان بس لسة بعاني منها
....................
نظراً لأن الناس دخلت المدرسة يوم 21 سبتمبر ( مش زينا ) دخلنا الكلية 1 سبتمبر ... مش حقد ولا حاجة..... بس يعني الموضوع معمول للناس اللي داخلة المدرسة قريب مش لينا
سلسلة ارجوك لا تفعصني
4
back to school

أخيراً – بنفس طبعاً و كل حب و اشتياق لكليتي المحبوبة :S -
اعلانات العودة للمدارس تجتاح التلفاز و الشارع و كل مكان ( شنطة ماتيجو المدرسية ... مكتبة كتاكيتو للأدوات المكتبية .... إلخ إلخ ).
ضاع اليوم في البكاء و الاتصال بالاصدقاء و هتلبسي ايه و هتعملي ايه و هتبقي فين وحشتيني هنتقابل بلا بلا بلا .. من هذا الكلام الذي يقال في اليوم الذي يسبق اليوم الاول الدراسي .
استيقظت صباحاً . أهلاااااا اماني حبيبتي ( ولا حبيبتي ولا بطيخ بس لزوم الشغل بقة كلنا فرحانين ) كل سنة وانتي طيبة يا قمر . و اتجهنا إلي المحطة لنركب النفاثات التي حدثتكم عنها من قبل . عسية عسية( هما بيقولوها كدة او دية بواقي كلمة عباسية يعني ) : كلية طب يا عم ... ايوة ... طب خدني معاك ..
و في المدرج وجدت مكاني فاضي كالعادة ( دفست نفسي بين اتنين اصلاً ) و بعد ان ضمنت موقعي وضعت حقيبتي و انطلقت اسلم علي كل من بالمدرج .. و دخل دكتور شيكوريل دكتور الفاصولوجوي .. أوبس فسيولوجي ( علم وظائف الاعضاء physiology) . و كانت محاضرة عقيمة مثل أي محاضرة في اول السنة ثم دكتورة رابحة رئيس قسم البيو كيمستري ( الكيمياء الحيوية Bio chemistry ) و اخيراً جائت كيريمان بالخبر الأكثر روعة مفيش اناتومي (علم التشريح anatomy ) اول اسبوع يا ولاااااااااااااااااااااااد ... لا استطيع ان اخبركم كم التصفيق و الهتاف و الزغرطة ( لولوولولولوولولوليييي ) هذا غير الصفيربهذا الخبر السار ( عالم دحيحة بقة :D ) ... ....
بذكائي الاصطناعي قررت ان انتهز الفرصة لأستخرج الكارنية ... و بدأت رحلتي بإنطلاقي إلي مكان ما لأستخرج ورقة لإثبات انني لست معاقة ومعافاة تماما..ً و ذلك طبعاً بدون فلوس ( عشرة جنية يعني ) و الغريب انهم اكتشفوا ذلك دون ان يتم الكشف علي - صادقة ياختي صادقة - و اخذت الورقة بعد طابور طويل و انطلقت إلي شئون الطلبة ووقفت تحت الشمس المشرقة الجميلة ( الغير حارقة تماماً ) و بدأ الوقت يمر طويـــــــــــــــــــــلاً و كنت بين زميلاتي و زملائي :S متفاعصين كالعادة . لا اعلم ألا يستطيعون ان يقوموا بعمل نافذتين واحدة للبنين و اخري للبنات فهذا الوضع غير لائق البتة والمشكلة اننا كنا ننتظر ورقة بيضاء مقطوعة بعشوائية من ظهر كراسة مكتوب فيها اسم الطالب و مطلوب 30 جنيهاً ( يا ستي انا هكتبهم بنفسي ) لأأأأأأ .. لية متعرفش .. المهم .. في هذه المحمصة الطبيعية اللاارادية ظللنا واقفين – نعم واقفين فلم نكن نتحرك إلا ان كل منا كان يدفع الآخر( هل كنا سنخترق الجدار مثلا) .. ربما
ثم تقول احداهن للأخرى: يابنتي بتزقيني ليه؟ ألّه!! .. نظرت حولي ... باحثة عن تلك المقصودة بكلمات تلك الانسة أوبس اقصد الدكتورة تلك .. و بعد ان استسلمت للأمر و سلمت بانني انا المقصودة حبست في نفسي فلن تزيد صرخاتي علي وعلي من حولي سوى احساس اكبر بالالم و الصداع و الحر و العرق و الرائحة و .. (كفاية يابنتي قرفتينا)اعمل ايه منا كنت مفلوقة.... المهم... ولانني اصلا لم اكن سوى رد فعل للدفع من خلفي فكبست كل ذلك بمكبس هيدروليكي متحرر من سيارة مكسحة تمضي في طرقات القاهرة ( خلاص يا ماما ارجعي للموضوع) .. ظللت منتظرة -النعكشة- اعني الطابور ان ينتهي و يأتي دوري ولكن هيهات فكل نص ساعة مثلاً تمن علينا الموظفة بكتابة ورقة جديدة لطالب جديد ( ربنا يخليلنا موظفين الحكومة) - هل كتابة ورقة طالب سنة 2 ولنفرض نجوي احمد محمود ستأخذ منها كل هذا الوقت ؟؟؟؟!!!! .. حتي انني لا ادفع أي نقود كي تسجلها .. ( يا جماعة دحنا اللي هنديكوا الفلوس مش هناخد منكوا حاجة ) .........!!!!!
وبعد وقت ليس بقليل وصلت للشباك كدت ان ارقص فرحاً – عيب يا بنتي انتي في الشارع ( اقصد الكلية) – احمدك يا رب و اخذت الورقة المنشودة و انطلقت جرياً إلي الخزينة لأدفع .. ولكنها كانت قد تعدت الواحدة و قد اغلقت الابواب و رحلت محملة بالخيبة علي عاتقي ... أن أن أااااااااااااااااااااااان . تششش.........
انتظروا
لسه اليومية دية مخلصتش :D
وجاء اليوم التالي .. و دخل الدكاترة واحداً تلو الاخر ثم انتهت اول محاضرة و نزلت إلي الخزينة و معي الورقة و انتظرت في طابور اخر و يفوت موعد المحاضرة التي تليها ووصلت اخيراً إلي الشباك( احمدك يا رب ): ثم اجد جملة لم افهم معناها إلا عندما اغلق الموظف في وجهي الشباك : الساعة واحدة يا دكتورة ... لاااااااااااااااااا ... و تكررت المحاولات والايام و الفعص حتي دفعتلهم الفلوس و ريحت ضميري و ......
إلي لقاء اخر في يوميات دكتورة مستقبلية
سلسلة ارجوك لا تفعصني

الفسيولوجي : علم وظائف الاعضاء physiology

البيو كيمستري : الكيمياء الحيوية bio chemistry

الأناتومي : علم التشريح anatomy

حكوك الطبع و النشل محفوسة لنعكوشة

27 قالوا رأيهم في العك اللي تحت ؟؟؟:

مرحب ومنورة
وانا معجبة باليوميات
عشان اسمها ارجوك لا تفعصني
بصراحة عنوان جامد ومعبر اوي
استكملي علي بركة الله

تحياتي

 

اهلا باجمل نعكشه
انتى كده وصفتى مصر حته حته
بالرغم اننا فى اكتوبر
يعنى زى مابيقولوا
روح اكتوبر
كل سنه وانتى طيبه

 

يااااااااااااااه احمدك ياااااارب اخيرا رجعتى حمد الله على السلامة...
المهم بقى الموضوع شئون الطلبة دول يا لهويييييييييي ناس فزيعة فزيعة مايصدقوا يلاقوا طالب عشان يذلوه ويبهدلوه يللا ربنا يكرمهم

 

على العموم هنيئا بالعام الجديد
مع انى لم افهم شيئا من هذا التخرفط فى اول المقال عن البسيولجى وغيره من الاشياء التى تظل احتكارا على اهل الطب لكى يذكرونا دائما اننا لا نفقه شيئا
اتمنى عام دراسى عادى
تحياتى

 

كوشيا

تسلميلي يا قمر

ربنا يخليكي
نورتي

.........

romansy

اهلا بحضرتك
:D ربنا يكرمنا بقة
كل سنة و حضرتك طيب

........

enjy

الله يسلمك يا قمر
مش عارفة بيعملوا فينا كدة لية
و طول النهار مكشرين
يلا ربنا يفرجها عليهم
آمين


نورتي
..........


احمد بدر الدين

لية يعني

نترجمها يعني احنا ورانا حاجة
لا والله مش دة هدفي خالص من العك اللي كتبته

ربنا يوفقنا جميعاً في دراستنا
آمين

نورت

........
سلام عليكم

 

أزيك يا نعكشة
والله فكرتيني بأيام الفسيولوجي والبايو ومدرج المحلاوي والطابور بتاع الخزنة اللي عمره ما بيفضي .. أيام ما كان الواحد لسه بيضحك
بس تصدقي اسامي الدكاترة اتغيرت أنا ما عرفش من اللي ذكرتيهم غير كاريمان بتاعه الاناتومي بس
علس فكرة احلي سنتين في الكلية اولي وتانيه حاولي تستمتعي بيهم قبل ما تدخلي علي التقيل
تحياتي

 

انا كنت فاكر طوابير الكليه وموظفين الكليه دول حاجه لا تطاق

الا ان ذهبت للمرور والتعامل مع احدي قطاعات وزارة الداخليه

ولحد هنا وستوب مش هقدر اتكلم

كل دراسه وانتي طيبه و(دحيحه) باذن الله

ليكوريكا

 

صديقتى العزيزة

اول زيارة لى لمدونتك

ولا اعلم هيىء لى انك تتكلمين عن اماكن اعرفها ورأيتها ولكن لا اتذكر اين
ولكننى بالفعل قابلت هذه الامور الا انها لندرتها الشديدة لا يتذكرها الانسان بسهولة

تحياتى
ولن تكون الزيارة الاخيرة

 

فارس بلا جواد

هوه انا دخلت في التقيل فعلاً
و ربنا يصبرني بقة
انا بكتب حاجات كنت كاتباها من زماااااااااااان

متعرفش دكتور شكري فسيولوجي ولا صابحة بيو كيمستري
دول علم من اعلام المواد

شكري رئيس القسم اللي قبلية رفعت
الاتنين بيكرهو بعض
و صابحة

لا لا لا

حلوة ايام ما الواحد كان لسة بيضحك :D

طمنتني

نورت
..........


ليكوريكا

ربنا يبشرك بالخير
:D


يعني انا في نعمة كدة

كل سنة و حضرتك طيب

آل دحاحة آل

نورت
.............


أزهري

مش عارفة فين برضو
أصل انا بسجل افكاري اول باول فمنسيتهاش بقة
بس مش فاكرة الموقف بالظبط

يمكن هناك

نورت

..........

سلام عليكم

 

كل سنه وانتى طيبه يا دكتره

عندنا قسموها ايام
اولى يوم السبت وتانيه الحد وكده

بسبرضه زاحمه مووووووووووووووووووووت

لنا الله بقى

 

المشكلة ان السعادة بلقاء الاصحاب بعد وحشة طويلة لاتدوم اكتر من يومين تلاتة ..

بعدها تبدأ المقررات تطل ومعها المذاكرة والامتحانات فتضيع تلك السعادة .. لو كانت الكلية تقدم مجتمعا ثقافيا فيه الفنون والادب والانشطة الاجتماعية المختلفة الى جانب حشر العلوم كنا بالتأكيد حبيناها اكتر
وماكناش نحب نروح من جمالها
صح؟

 

بطوط حبوب

وحضرتك طيب

طيب والله كويس
منا بقول يخلوا الطلاب يشاركوا في الموضوع

عامتا ربنا يسهل

نورت

........

sherif


عندك حق

والله انا مش هقدر انكر ان الكلية بتقدم الفنون لان فية مسرح تبع الكلية و تعلم الرسم و الخط و حاجات كدة
وفية ثقافة لانهم بيعملوا ندوات و بتاع
وفية انشطة اجتماعية زي الرحلات

بس انا بكسل اشترك في الحاجات دية
وكنت عايزة اشترك في المسرح ( التمثيل يعني) بس لقيت الوسط معجبنيش

فمشتركتش

بس الحق يقال
هما قدموا الحاجات دية
العيب من بنتنا
قصدي العيب فينا احنا معشر الطلاب

احنا عالم بتحب وجع القلب

:d

نورتني
.......

سلام عليكما

 

هههههههههههه
أيوة كده وضحي
شيكوريل يبقي شكري وكيم
ورابحة تبقي صابحة هدهد
ههههههههه
لا طبعا أعرفهم هو في حد ما يعرفهمش
وربنا يعينك طالما دخلتي علي التقيل .. عايز البوست الجاي بقي عن علاء فارما وعبد العليم باثولوجي
تحياتي

 

جميلة اليوميات بتاعتك يانعكوشة

الروتين فى بلدنا بقى شئ يخنق أصلا..مش فى الكليات وشئون الطلبة بس ، ده أصبح شئ أساسى فى كل الهيئات والمصالح الحكومية

بس أنا عايز أعرف إنتوا ليه بدأتوا بدرى قبل المدارس حتى؟؟

على حسب علمى طب إسكندرية هو إللى بيبدأها بدرى بس

قال يعنى الطلبة فى شوق ولهفة إلى الدراسة والكلية

يللا ربنا معاكى ومعايا ومع كل الغلبانين إللى إسمهم طلبة طب

دمتى بكل خير..تحياتى

 

عام دراسي سعيد.. واهنيكي علي اليوميات.. وهفضل اهنيكي الي ان تصبحي دكتورة مش مستقبلية

 

فينك من زماااااااااااان

مبروك عليكي دخلت الكلية وربنا يوفقك وينجحك قادر يا كريم

ممممممموااااااه

مها ميهوووو

 

فارس بلا جواد

عديتهم دول برضو :D
دخلنا في الأثقل
هوه انا في سنة 5

بس لا مانع من الحديث عن علاء و عبد العليم
من باب النم عالعباد
:D

ههههههههه

نورت

...........


د/ رامي شهاب الدين


تسلم ربنا يكرمك

اة و الله الروتين دة فوزيع
بس بدأ يتضائل من ساعت ما دخلوا الكمبيوتر بس لسة برضو الشخص اللي قاعد عالكمبيوتر محمل بكم رهيب من الروتين
ربنا يحفظنا


والله انا نفسي اعرف برضو

يعني سنة 1 و 2 و 3 و 4 طب عين شمس داخليين الكليات زي الناس الطبيعية 21-9
لية احنا يتحكم علينا ( إلا عمرها ما حصلت في خمسة دية خالص) بس تقول إية

المنحوس منحوس

انا فانوس بعيد عنك

والله انا بالنسبالي بلاها دراسة خالص لو هتيجي علي كدة
بس بقول و برضو بروح
يلا القط بيحب خناقة

ربنا يعينا جميعاً
آمين

نورتني

.........

اسلام و صاحبة

لية بس من غير صاحبه دية
مش عاجبني الاسم
ربنا يخليكوا لبعض يا رب دايماً دايماً
آمين

كل سنة و حضرتك بصحة و خير و سلامة
و ربنا يكرمك يا رب و يخليك

نورت

..........


احسن تستاهل

يااااااااااااااه ازيك يا قمراية

عاملة اية

تسلمي يا قمر

انا هنا اهوه

ربنا يوفقنا جميعاً في الدراسة

نورتينييييييي
.........


سلام عليكم

 

اولا كل سنه وانتى طيبه.....معلش متأخره شويه بس مش كتير يعنى لاننا لسه فى شوال.....ثانيا لما اللى بتقولى عليه ده بيحصل فى كلية طب ومن واقع خبرتى بيخصل افظع منه حبتين فى كلية هندسه امال فى الكليات اللى عدد الطلبه كتير فيها تلات حبات زى التجاره او الاداب بيحصل ايه؟ ده اكيد بيسقط شهداء اثناء دفع المصاريف. حقيقى الدوله لازم تحسس الطلبه قد ايه العلم صعب وانهم لازم يطلبوا العلم حتى ولو على شبابيك الموظفين.....خالص تحياتى وشكرا

 

محمد داوود

وحضرتك طيب :D

هما بيدفعوا المصارييف اصلا
هههههههه
بهرج

ربنا يعينهم يا رب من شاف هموم غيرة تهون عليه همومه


سبحان الله بقة


نورت

سلام عليك

 

السلام عليكم ورحمة الله وبركاته
حبيبتى نحن المفعصون قبلك
وسيأتى من سيفعس بعدنا
هى فعصة ودايرة على الناس
شدى حيلك واجمدى كده امال!!!
عارفةمازلت الى الان اتذكر فعصة
الاتوبيس 888 لعنة الله عليه
وكمان اتوبيس 800الله ولا بلاش!!
كل سنة وانتى بالف صحة واكمل عافية
(ملاوووووووووحظة صغيرة :خلى بالك من الفسيولوجى اوى :علم لطيف وظررريف!! اوى بس ابوخ حاجة فيه اننا بنمتحن فيه هههههههههه شفتى ازاى؟؟؟)
دعواتى بالنجاح دايما

 

لست بمنأى تماما عن العودة للمدارس
و بالمعنى الحرفي للكلمة
فأنا مدرس و اعاني نفس ما يعانيه الطلاب حين يشعرون ان الاجازة قد انتهت
حتى و ان ظن الجميع انني لا اعاني شيئا
.
.
المهم
احنا مشتركين في حاجة اكيد
و هي اننا بنحب جاك سبارو
لاني اكيد مش هسمي نفسي جاك و انا بكرهه
( ايه يعني هغيظ نفسي مثلا ؟ )
مع اني مجنون و اعملها والله
.
.
سعيد بمرورك يا دكتور
و ان كنت زعلان منك
عشان ما اخدتيش بالك ان اللي مات في اخر القصة
هو بطلها مش ابوه
:(
.
.
و اسمحيلي اقولك في نهاية كلامي
الصفحة دي من مذكراتك خفيفة حفيفة يعني
مش خفيفة يعني تتبلع بسهولة
لاء خفيفة الظل
P:

 

معلش ياحبيبتى كلنا لها
بس تعرفى عشان الزحمة والطوابير دى كنت بدفع بعد الهوجة دى يا اما كنت بروح قبل ما الشباك يفتح
شوية كده وهتاخدى على الوضع ماتقلقيش

 

انا داخلة اقولك كل سنة وانتى طيبة يا دكتورة
تقبل الله منك صيامك وقيامك وقرانك
وجعله فى ميزان حسناتك وجعلك من عتقائه فى رمضان

 

هههههههههههههههههههههههه والله نفس النظام بس انا لحقت نفسى قبل ماتقلى الساعة 12 يا دكتورة

تقريبا والله نفس النظام

ربنا يرحمنا بقى من هذا القرف والتعفيص على رايك

ده حتى الاناتومى لذيذ احسن مليون مرة من الزفت الفسيولوجى والزفتة البيو

ههههههههههههه كنتم مع ناشرة الزفت

تحياتى

ايمى

 

norahaty

عليكي السلام و رحمة الله و بركاتة
هههههههه


متخافيش هتكلم عن الاتوبيسات في يومية من اليوميات

محستش انه لذيذ صراحة
بس يلا

الحمد لله

نورتي

..........


جاك سبارو



ربنا يكون في عون تلاميذك :D

تسلم

نورت

..................

موناليزا

مبعرفش اصبر لحد ما ادفع بعدين
بحس ان عليا هم و حمل
معرفش لية

اعرف ناس كتير بيعملوا كدة

عامتاً
انا بتكلم عن وضع كل الناس ماهو مش كل الناس هتروح بعد الهوجة


كل سنة و حضرتك طيبة
نورتي

...........

سبهللة

اللهم آمين

كل سنة و حضرتك طيبة

نورتي

..............

emmy baby

ههههههههههههه شكلك من الناس المحضوضين
ربنا يكرمك يا رب
اصل بعيد عنك انا نحس بكل المقاييس

انا بكرة البايو دة كرة

يلا خير

خلص الحمد لله

نورتيني

..........

سلام عليكم

 

ههههههههههههههههههههههههههههههه
صباحك زي الفل
ايه يا بنتي
حتى الدكاترة بيتبهدلوا؟؟
دحنا كنا في رحمة
كليتي كانت الدفعه كلها اقل من 200 بني آدم
والموظفين قاعدين بيهشوا طول النهار
ومابيصدقوا ان حد فينا ييجي يطلب يدفع حاجه
انا بقول يعني الاحسن انك تحولي وتيجي كليتنا
مالها حاسبات ومعلومات؟؟
مالها هه؟
:))

 

ojg
مالها حاسبات

دية من الكليات اللي اعتقد انها ممتعة جداً
احساس داخلي عندي

يابنتي الدكاترة همالمعذبون في الارض في المجتمع دلوقتي بكل فخر

يلا نحمد الله و لنا الله ومن لنا سواه

نورتيني

سلام عليكم