نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

نعكوشة

سلام عليكم
المفروض يعني ان دية مسرحية معمولة للأطفال
مع العلم إني اول مرة اكتب مسرحية

الفصل الاول، المشهد الاول

المكان : غرفة نوم مهرجلة . هدوم علي الارض . الكتب تحت السرير . هدوم خارجة من الدولاب

بنت منكوشة نايمة علي السرير و علي وشها اسود و مش نظيفة

صوت الام من بعيد : يا نعكووووووووووشة . يا بنتي تعبتيني قومي لساعة بقت 7

لا استجابة من نعكوشة


بعد فترة و قد دخلت الام غرفتها : يا بنت يا نعكوشة الساعة بقت 7 و نص قومي المدرسة يلا
نعكوشة بتمطع : يووه يا ماما هو انا قدرة .. سيبيني كمان خمسة
الام : يلا يا بنت
نعكوشة : طيب حاضر
تقوم بتكاسل من علي السرير متجهة للحمام و هي تهرش
تعود و هي متسربعة

نعكوشة : ماما فين الكشكول
ماما فين هدوم المدرسة
ماما القميص زرارة مقطوع
ماما............
الام : ايوة ايوة ايوة
يا نعكوشة يا حبيبتي مش انا قلتلك كذا مرة تديني الحاجات المش نظيفة بليل
و قولتلك ترتبي شنطبك
شربتي اللبن؟؟؟


نعكوشة و هي تبحث عن شيء ما : هوه فين يا ماماااااااااااااااا
الام : هوه اية دة؟؟؟؟؟؟
نعكوشة : الشراااااااب يا ماما
الام : ميت مرة اقولك يا نعكوشة حطيهم في درج الشرابات
نعكوشة : فين الجزمـــــــــــــــــــــــــــــــــــــــــــة

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

مشهد 2 فصل 1

نعكوشة في الفصل

المدرسة : يلا يا أولاد وروني الواجب بتاعكوا
نعكوشة تهمس لصاحبتها : هاتي انقل الواجب منك بسرعة
صاحبتها : ازاي بس المدرسة هتشوفنا
المدرسة توقفت امام نعكوشة : فين الواجب يا نعكوشة
نعكوشة : ماهو أصل...........
المدرسة : انتي محليتيش الواجب ليه ... و فين الكراسة بتاعت المادة
نعكوشة: مش عارفة
دخلت الطبيبة إلي الفصل للتفتيش علي الفتيات
وصلت إلي نعكوشة
الطبيبة: وريني ضوافرك يا نعكوشة
نعكوشة واضعة يدها خلف ظهرها : لية بس يا دكتورة
الطبيبة : يلا يا بنت
نعكوشة تمد يدها إلي الدكتورة
تنظر الدكتورة و عليها علامات الغضب : إيـــــــه دة ... ضوافرك طويلة قوي .. مش قولنا الضوافر الطويلة بيبقي تحتها اسود و بتجيب امراض دة غير ان شكلها وحشششششش
نعكوشة في خجل : ماهو أصل
الطبيبة : مفيش أصل .. يلا وريني شعرك
الطبيبة : لا لا لا يا نعكوشة ........ لازم تحافظي علي نظافتك .. مينفعش كدة ... كدة ممكن تعدي زوملاتك
نعكوشة و هي مُحرجة : حاضر يا دكتورة

..................................................................

مشهد 3 فصل 1

أطفال يلعبون في لشارع ومن بينهم نعكوشة و قد كانت تلعب في التراب هي و اصدقائها

نعكوشة : بصوا يا ولاد لقيت اية ؟؟؟؟؟؟؟؟؟؟
الأول : لقيتي اية؟؟؟
نعكوشة : لاقيت توووووووووووووت
الثاني : ورينا كدة
نعكوشة : اهوه ... يلا نجمعوا بسرعة و نروح ناكلة

ظل الاطفال يجمعون التوت من علي شجرة ليست شجرة توت من الأصل ثم بعد ان انتهو
قالت نعكوشة بسعادة : يلااااااا ا انا هعزمكوا علي توت انهاردة
الاول : لازم نغسلو الاول يا نعكوشة
نعكوشة : دة يابني كان علي الشجرة يعني نضيييييييف

الثاني : مش هاكل منه لو مغسلناهوش
نعكوشة : براحتكوا ... انتو الخسرانييييين

و راحت نعكوشة تلتهم التوت الذي هو ليس بتوت

.............................................................................

مشهد 4 فصل 1

نعكوشة في غرفتها غير المرتبة و هي تتألم : مااااااااااامااااااااااااااااااا
الام تجري علي بنتها : فيكي اية يا نعكوشة
نعكوشة : أأأأأأاة يا بطنييييييييي .. بطني بتوجعني يا مامااااااااااااااا
الام : لية يا حبيبتي
نعكوشة : مش عارفةةةةةةةةةةةة
آآآآآآه يا ماما
الام : انتي كلتي حاجة من الشارع؟؟
نعكوشة و علي وجهها علامات البلاهة : أيـــة ؟؟؟
الام : يعني كلتي من الشارع
نعكوشة : دة هوه توت يا ماما
الام : هو فين التوت دة
نعكوشة اشارت الي جيب فستانها قائلة : هناك يا ماما في جيب الفستان
الام :أنا مش قلتلك تعلقي الفستان علي الشماعة لما ترجعي
نعكوشة و هي تبكي : آآآآآآآآآة يا بطنييييييي
الام : يلهوي .. دة مش توت أصلا .. يا نعكوشة ميييت مرة اقولك متاكليش من الشارع و حتى لو بتاكلي حاجة عارفاها لازم تغسليها
اية يا نعكوشة دة

نعكوشة : آآآآآآآآآآآآآآآآآآآآه

........................................................

مشهد 1 الفصل الثاني

بينما يلعب الاطفال في الشارع لمحت نعكوشة طفل نظيف لطيف يلعب مع اصدقاءه

و بينما هم يلعبون بالكرة اتجهت الكرة ناحية نعكوشة
فاقترب منها – مهندم- و قال بذوق : لو سمحتي ممكن الكورة
قالت نعكوشة : آه طبعاً اتفضل
قال مهندم : انتي ممكن تيجي تلعبي معانا علي فكرة
قالت نعكوشة بفرحة : بجددددد ... طيب

بينما هي تخلع شبشبها لتبدأ في اللعب
اسرع مهندم قائلاً :إيه دة .. البسية تاني و إلا هيدخل في رجلك حاجة و بعدين الارض مش نظيفة
قالت نعكوشة : بس اصل
قال مهندم : يا نعكوشة الارض دية عليها حاجات كتير مش نظيفة و لو دخلت لرجل و عورتها تعملك امراض وحشة
فلازم تلبسي الشبشب
نعكوشة : ماااااااشي

بينما هم يلعبون وجدت نعكوشة بائع جائل فأسرعت إليه لتشتري بعض الاكل

ثم عادت

قال مهندم بدهشة : ياااااااااااااه مينفعش تاكلي الاكل دة .. الناس دية مش نظيفة .. متاكليش منهم

قالت نعكوشة : بس أصل

قال مهندم : يا نعكوشة الذباب بيقف علي حاجات كتير مش كويسة و بيرجع يقف علي الاكل بتاع البياع
وحتى لو احنا مش مغطيين الاكل في البيت الذباب هيقف عليه
لازم نغطي اكل بيتنا و مناكلش من البياعين دول
قالت نعكوشة : طيب

ألقت بالسندوتش علي الأرض

فصرخ مهندم : لاااااااااااااااااااا ... مترميش حاجة علي الأرض
قالت نعكوشة : لية بقة يا سيدي ، ماهي الارض اصلا مش نظيفة
فقال مهندم : يا نعكوشة عامل النظافة اللي بينظف كل يوم بيتعب عشان ينظف الارض .. لية احنا منساعدوش باقل حاجة و منرميش القاذورات عالارض مفروض نرميها في الباسكت عشان نحافظ علي النظافة و ميزيدش الذباب و منتعبش عامل النظافة
قالت نعكوشة : طيييييييييب
و اخذت الساندوتش و القته في سلة القمامة

،،،،،،،،،،،،،،،،،،،،،،،،،،،،،،،،،،،،،،،،،،،،

مشهد 2 فصل 2

مهندم في غرفة نظيفة مرتبه

جرس المنبه يدق

الام تقول : مهندم قوم الساعة بقت 7

قام مهندم سريعاً متجها إلي الحمام : صباح الخير يا ماما
قالت الام : صباح النور يا حبيبي ... يلا بعد ما تخلص الحمام اطلع عملتلك اللبن
مهندم : شكرا يا ماما
قالت الام : ها عايزني اساعدك في حاجة
قال مهندم : مانتي عارفة يا ماما اني مجهزهم من بليل .. شكرا يا ماما
الام: طيب يلا الحق البس و انزل المدرسة
مهندم بعد ان شرب اللبن ... نزل في معاده

.............................................................

مشهد 3 فصل 2

مهندم في الفصل

المدرسة : عاملين الواجب يا أولاد
مهندم رافعاً رأسه : ايوة يا أبلة
المدرسة : شاطرين
يلا يا أولاد عشان الامتحان
مهندم مستعد و بدأ يحل في ورقته
احد اصدقاءه يطلب منه أن يغش قائلاً : قولي يا مهندم اجابة السؤال 4 عشان مش عارفة
قال مهندم : لا الرسول عليه افضل الصلاة و السلام قال " من غشنا فليس منا"
قالت المدرسة : يلا يا أولاد الوقت خلص
قدم مهندم الورقة و هو سعيد
دخلت الطبيبة الفصل للتفتيش علي الأولاد
وريني ضوافرك يا مهندم
مد إليها يديه فقالت الطبيبة : جميييييل ... شاطر يا مهند
.....................................

مشهد 4 فصل 2

مهندم يلتقي بنعكوشة مرة أخرى و هي منكوشة الرأس

فقال لها مهندم : هو انتي ليه يا نعكوشة مش بتربطي شعرك بتوكة عشان ميلمش تراب و يتبهدل
فقالت نعكوشة : منا بكسل بقة
قال مهندم : بس الكسل دة صفة وحشة يا نعكوشة .. و انتي شكلك بنت طيبة
وبعدين البنات الحلوين بيبقي شعرهم متسرح
قالت نعكوشة : ماشي
قال مهندم بعد أن لعبا قليلا : أنا هطلع بقة عشان الحق احضر شنطتي و اكوي هدومي و ارتب اوضتي و انام بدري عشان اصحى بدري
قالت نعكوشة :يااااااااااة كل دة
قال مهندم : وانتي مش هتطلعي
قلت نعكوشة : هاه؟؟؟؟؟؟؟؟
قال مهندم : عشان تجهزي شنطتك ...انتي عاملة الواجب بتاعك صح ؟؟؟
نظرت نعكوشة لأعلي و هيا تهرش في شعرها : هاه
قال مهندم : لا يا نعكوشة البنات الحلويين لازم يعملو الواجب و يحضروا شنطتهم بدري
قالت نعكوشة : ممممممممم طيب

عادت نعكوشة إلي البيت
و تذكرت قول مهندم : رتبي اوضتك
مممممممممم
صعبة دية ؟؟؟؟
صرخت نعكوشة : ماماااااااااااا
تتجة الام ناحيتها
تقول نعكوشة : ممكن تساعديني اروق الاوضة
قالت الام بفرحة: طبعا يا حبيبتي
رتبت نعكوشة غرفتها
ثم انهت عمل الواجب و حضرت حقيبتها

ثم في الصباح قامت بالصحيان بدري لإنها نامت بدري
و احضرت لها امها اللبن
و ارتدت ملابسها التي كانت قد حضرتها نعكوشة مسبقاً
وقالت لأمها: ماما سرحيلي شعري عشان ابقى زي البنات الحلوين
ابتسمت لها امها و سرحت لها
و اتجهت نعكوشة إلي المدرسة
استغربت المدرسة و التلاميذ من نعكوشة
فأطلقت المدرسة عليها بدلاً من==اسم فرفوشة

و من هنا نعرف ان الصديق قبل الرفيق( ديه حته من عندي كدة)


تمت
..................................................




حكوك الطبع و النشل محفوسة لنعكوشة

34 قالوا رأيهم في العك اللي تحت ؟؟؟:

تحفة تحفة تحفة

ياسلام عليك يامهندم هو ده فتى احلامى ههههههه

لا وهى طول المسرحية مهو اصل وتهرش فى شعرها ههههههههههههههههه فكرتنى بالبت سوكا العبيطة

لا بجد والله تتغير علشان خاطر مهندم كنت فينك يابنى من زمان بدل التشرد ده

لا بجد روعة يانعكشة لما كدة واول مرة اومال تانى مرة هتعملى فينا ايه :))

تسلم ايدك
تحياتى

ايمى

 

Emmy baby

:D
ماهو لازم تهرش :D
مين سوكا العبيطة دية؟؟؟

كل شخص بيبقي ليه وقته في حيات الشخص الاخر

يابنتي كدة هاخد مقلب في نفسي
لووووووووووول

نورتيني

سلام عليكي

 

تصدقى؟
هتصدقى ان شاء الله
المسرحية فعلا جميلة وفعلا الاطفال بتاثر عل بعض بشكل كبير فى سلوكهم وكمان طريقة تفكيرهم
بس انتى مش شايفة انك كان لازم تطوليها شوية؟
يعني بيتهيألى كانت المواقف بين نعكوشة ومهندم تطول شوية خاصة ان الاطفال دلوقتى مش سهل التأثير عليهم؟؟؟
بس فعلا ممتعة وجميلة وياريت تكمليها وتعمليلها فصول تانية يعني توسعى الهدف منها وتزودى الشخصيات زي مثلا بوجى وطمطم
رائعة يا نعكوشة ويارب دايما كده معانا وموجودة
متغيبيش علينا تاني
عودا حميييييييييدا

 

د/موني

عندك حق
بس انا الظروف اللي كتبتها فيها كنت متسربعة
دة غير اني مبطيقش اكتب حاجات طويلة
مليش خُلق يعني

فهي المشكلة في كدة

حلقات تانية من المسرحية مش عارفة
انا اصلا كنت كاتباها عشان هدف معين و اتعمل
يمكن ربنا يسهل

معرفش

فعلاً عندك حق هما مش بيتأثروا بالسرعة دية
بس انا حاولت اختصر في الوقت يعني

ربنا يسهل

محدش ضامن بكرة هيحصل اية

عوداً قصباً :D

ان شاء الله هحاول مغيبش
مع ان الدراسة هتبدأ يوم الاتنين
و السنة الجاية سنة خامسة
ومش فاهمة حاجةف ي الراوندات صراحة

عامتاً ربنا يسهل

دمتي سالمة

سلام عليكي

 

اول حاجة انا مبسوط جدا انك رجعتنى تانى
بعد فترة انقاطع
حمد لله على السلامة يانعكشة
بالنسبة للمسرحية
حلوة جدا للاطفال
بس حسيتاه انا ممكن تبقة قصة احسن
يعنى تبقة قصة تنطبع وكده
ويبقة معها رسومات وكده
وممكن تبقة سلسلة نعكشة
كل مرة الاطفال يتعلمو حاجة
بجد يرافو عليكى يا نعكشة

 

لا بجد

الله ينور


ممكن تشتركى فى مسابقة أدب الأطفال


صدقينى



و الله بأتكلم جد


أيوا فعلا


مالك مش مصدقة كده ليه ؟


الإ ذا كانت القصة حقيقية بقى دى تبقى حاجة تانية

(::

 

Seven سبعة

ربنا يزيد انبساطك يا رب
الله يسلمك

والله هوه انا مبعرفش اعمل قصص ملونة صغيرة
و البنت اللي طلبت مني الموضوع كانت طالبة مني مسرحية
فعملتلها مسرحية
بس مش أكتر

سلسلة مين :D
ربنا يعزك يا رب

تسلم

نورتني
............

جمعاوي روش طحن

مين مسابقة أدب الاطفال دية؟؟؟
وبعدين مسابقة مين
انتو خدتوا عني فكرة وحشة كدة
آل جد آل

بص مش هكدب عليك
بس انا استشهدت ببعض تصرفات نعكوشة مني أنا شخصياً
انا كنت بغلب والدتي في الصحيان
ومكنتش بحب اللبن
و كنت بلعب في الشارع كتير
وكان زراير المريلة بتاعتي معرفش بتروح فين لإني كنت متشردة
و شعري دايمة مفكوك لإني كنت شقية قوي

بس الحمد لله كنت نظيفة
ومكنتش برمي حاجة عالارض
عشان الواحد ميبقاش كداب يعني

نورتني

.........
سلام عليكما

 

ههههههههههههههه
مش عارفة ليه البت نعكوشة دى بتفكرنى بنفسى وأنا صغيرة .. يااااااااه أيام الطفولة المشردة

الواد مهنم ده واد خنيق .. بيفكرنى ببكار .. أنا بحب الأطفال المتشردة مش الأطفال المثالية دى
ههههههههههههههههههه
بس والله جميلة وفكرتها جميلة كمان .. وتنفيذها هيبقى حلو جدا
أنا ممكن أمثل دور نعكوشة
هههههههههههههههههه

تسلم إيديكى

 

أولا حمد لله على السلامة بعد الغيبة الطويلة قوي دي؟
ثانيا انا عجبني البوست الاخير اللي كتبتيه قبل اختفائك المفاجي ده وحبيت أعلق عليه بس مش كان فيه مجال للتعليق

ثالثا بقى بخصوص المسرحية دي اسمحيلي أقولك انها مش مسرحية، هي تنفع تكون سيناريو لمسلسل أطفال يعلمهم بعض السلوكيات لكنها مش مسرحية، لان المسرحية غالبا بتكون كوميدية، أو حتى لو كانت تراجيدي فهي مش بتتكتب الاسلوب ده

عودا أحمد مرة تانية
تحياتي

 

هههههههه
ح أضطر أصغر خمسبعتاشر سنة وأقولك حلوة أوي يا طنط ممكن تحكيهالي تاني.
بعدين أكبر خمسبعتاشر سنة تاني وأقولك"إيه شغل العيال دة"

بس بجد حلوة أوي وتنفع تتنشر كقصة للأطفال ونرجع أيام المرحومين كيلاني والسحار.
برجاء تقبل مروري المتواضع
تحياتي

 

انت كلك مواهب كدة
هنلاحق علي القصص ولا المسرحيات ولا الرسم

بس بجد مسرحية حلوة وهادفة جدا
وكل واحد مننا عاوز واحد مهندم يرتب له شوية حاجات كدة عشان العملية تمشي

فعلا التشجيع مفيد جدا

والحتة اللي من عندك مفيدة جدا جدا

تحياتي

 

ميوشة

ابقي خديني معاكي مساعد في دور نعكوشة
هههههههههههه
مش دايما المثاليين خنيقين

تسلمي ي قمر
نورتي

.............

في حب مصر

لله يسلم حضرتك
ثانيا: جميل بس نا حبيت يكون مع نفسي كدة
ثالثاً: معلش هوه انا فاشلة في المواضييع دية
بس صحبتي طلبتني و قالتلي اعمليلي مسرحية
فانا عملتلها مسرحية
وهيا قالتلي انهم عملوها مسرحية
انما انا معرفش ازاي المسرحيات بتتعملي
بس هيا اتعملت مسرحية عامتاً

تسلم مرة تانية

نورتني

...........

The Führer

هوه انا مش عارفة اكتب اسمك ل انجليزي ولا عربي فخدتوا كوبي بيست
فمعلش عايزة ترجمة حرفية لو سمحت

لما تصغر هقولك امشي العب بعيد يا حبيبي معندناش اولاد صغيرين يسمعوا قصص
ههههههههه
رخمة انا
لأ
حاضر ممكن ترجع تاني تقراها بنفسك
اهو منها تتعلم القراية

ولما تكبر بقة هقولك امشي العب بعيد برضو لإن انا عيلة فمش هيطلع مني غير شغل عيال فالافضل ليك تلعب بعيد
هههههه
بهرج برضو
عادي يعني حبت معيلة متضرش

يلهوي بتقارني بكيلاني و السحار
مين كيلاني و السحار دول؟؟؟

معلش انا اصلاً جاهلة


نورتني يا فندم

............

كوشياااااااااااااا

وحشتيني حقاً
ومنورة يا جميلة

ولا مواهب ولا بطيخ


فعلاً عندك حق
التشجيع وخصوصا من حد قدك او صديقك
غير

يلا خيراً
نورتيني يا فندم

.........

سلام عليكم

 

الواد مهندم ده شكله مسهوك كده ويعجبش
ههههههههههههه

انا شاكك ان الواد ده بيرسم
----
المسرحيات دى بتكون جميله بجد .. بس الاطفال لسه بتتأثروا بيها؟؟

 

عسسسسسسسسسسسسسسسسسسسسسسسسسسسل
تحفه بجد
انا رايحه اقراها تاني يا منعكشه

ههههههههههههههههههههههه

 

بداية موفقة جدا
وتسجيل انبهار

 

أنا بقى ليا وجهة نظر مختلفة نعكوشة فى الأساس عندها استعداد للتغير بس كانت منتظرة ضربة البداية أو زى ما بيقولو بالإنجليزى الإنيشيشن ومهندم لما قالها كدا أثار فيها معانى كثيرة دفعتها للتغير والأطفال كبار بطبيعة الحال فبكاء طفل قد يوصل إليك ما قد يعجز الكبار عن توصيلة اليك ولعب طفل وحوارك مع الطفل قد ينمى عندك من الافكار التى عجز الكبار أن يوصولوها اليك فللأطفال فلسفتهم الخاصة فهم بحق أزاهير الرياض

شكرا يا نعكشة على المسرحية ياريت ترسميها بقى كوميكس وتحاولى معاها

 

بطوط حبوب

ههههههههههههههه

عشان كدة أنا قولت المسرحية للأطفال :D
عشان متجيش في بال حد افكار كدة
ههههههههه

والله اعتقد حسب حبكة الدور
وطريقة العرض بيتأثروا
هما لسة اطفال برضو
مع ان برائتهم اتبهدلت
بس لسة بيتفرجوا علي كارتون و حاجات من دية
لو المسرحية معمولة حلوة و بألوان جميلة و الممثلين كويسين
بيتأثروا

نورتني

...........

coca

الله يعسلك

اتفضلي يا فندم

نورتيني
...........

شملولي بن سحلولي

اسم حضرتك حلو بالمناسبة
و تسلم علي التسجيل

نورتني

...........

فتى مصر EgyBoy

اعتقد ان نعكوشة زي باقي الاطفال
عبارة عن تربة خصبة ممكن تزرع فيها اي حاجة
سواء حلوة او وحشة
والاطفال عامتاً بيبقي عندهم استعداد للتقبل
ومادام الحاجة التانية افضل
بتبقي سرعة الاستجابة اعلى

نا بحب ارغي مع الاطفال صراحة
بس مبحبش حتة البكاء دية
ههههههههه
ببقى عايزة ارميهم من اقرب شبك
(صبورة انا)

يل خير

مبعرفش ارسم كوميكس صراحة

ارسمها انت بقة :D

نورتني

.........

سلام عليكم

 

:)
:)
:)
لطيفة جدا .. جدا..
بلغنا الله رمضان..

 

بس مهندم دا طفل فضائي ؟؟
دا مفهوش غلطة..
انا عارف انها مسرحية للاطفال فمباشرة وواضحة ومبسطة..
بس بصراحة انا بقول اللي كان في بالي ..
و كان فاضل يقولها تتجوزيني ؟؟

معلش متزعليش..المسرحية جميلة جدا جدا جدا..بجد
خاصة المشهد الاول خالص .. حسيت برغبة في الابوة..
متزعليش .. :(
سلام

 

جااااااااااااااااااااااااامدة

بج ياافكاررررررك ويادماغك

هايلة وعجبتنى

دا غير انك وحشانى ورمضان كريمممممممممم

 

تصدقى بالله خلتينى اتمنى انى اكون نعكوشةعلشان اقبل مهندم
دة!
!
والله والله
ياااااااااااااااااة
عارفة انها قصة لاطفال
بس انتى رسمة مهندم بطريقة بجد مش ممكنة انة بيخاف عليه وبينصحها علشان تلبس الشبشب ومترميش حاجة فى الارض وتسرح شعرها
الا قوليلى
هى من قبل ما تقبل مهندم عمرها ما سرحتوا ابداااااااااااااا
هو اتسرح ازاى اصلا
!
!
مهندم ظهر فى الوقت المناسب
بس هى بعنى ملقتش اى حد فى الفصل ينصحها...
امممممممممممممممممممممممممم
ولا هى مدرسة بنات بس
امممممممممممممممممممممممممم
سيبك انتى المهم
هيجوزا امتى
!
!
بجدرغم انها قصة شوية تقليدية..بس حاسة انى اول مرة اشوف حاجة زى كدة
خلتينى اسرح يابنت الاية واتمنى انى اكون منكوشة علشان اقابل مهندم
بجد تسلمى يا غالية

...................
ام الاواحظ
ملحوظة
نعكوشتى..
اية اخبار نفسك هدتيتيها ولا لسة
اوعى تخليها تهدك..
قولى وراي
هاهدك يلا ورتينى الويل
يلا كرهتينى فى عشتى
يلا ياستينى من رحمت ربى
هاهدك واستعيذ بالله منك
ومن شرك
الهم اهدينى وتوب على
هاهدك
هاهدك
هاهدك
بااااااااااااااى
يا نعكوشتى
ياحبيبتى بجد
كل سنة وانتى طيبة
عووووووووووووووووووووووو

 

يخرب عقلك يا نعكوشة
انتى بتجيبى الكلام ده منين
لا و تصويراتك رهيبة
بس بجد تنفع مسرحية حلوة اوى للأطفال و دمها خفيف و مضحكة كمان
ياريت تبعتيها لحد و تحاولى تنشريها و الله بتكلم جد
علشان اسلوبها حلو اوى اوى و مقنع للأطفال

بس سؤال بقى غتت
هل ياترى نعكوشة حتتجوز مهندم فى الاخر و لا لأ ؟؟ ههههههه


فينك بقى ...؟؟؟ بقالى فترة بدخل المسنجر و مش بلاقيكى

كل سنة و انتى طيبة يا جميل

 

mero

اللهم آمين

.........

mero تاني

أنا كان ليا اصحاب ليا تقريباً فضائيين كدة
بالنسبة ليا يعني
لإني كنت منعكشة جداً في حياتي
النظام و الترتيب و الادب
حاجات كدة متعرفش اهلهم عملولهم إيه

عشان كدة تعمدت إنها تكون مسرحية للأطفال
الاطفال فكرهم مش كدة
عشان تقرا القصة و تحس بيها لازم تصغر سنك عشان تحسها

ادعوك لقرائتها مرة اخرى وانت في السادسة او السابعة من عمرك
و قولي رأيك

والله انا مش زعلانة خالص

رغبتك في الابوة دية دليل اكيد انك قريت القصة كشخص كبير
وهيا مسرحية للأطفال

أكرر دعوتي لك لقرائتها وانت في سن السادسة

دع لخيالك العنان
تخيل انك في السادسة
تخيل الفتاة و الطفل اللي طولهم تقريباً لحد ركبتك او اطول شوية

وقولي رأيك

طيب أزعل من اية

قولي ازعل من إية عشان ازعل بعد كدة
:D

صراحة ملاقتش حاجة في تعليقك تزعلني

نورتني

............

زي الهوا

الفكرة فكرة اخويا و التنفيذ أنا
كان بيتريق عليا يعني

ما وحشك غالي

الله اكرم

نورتيني

...........

كيكي

ههههههههههههههه

خلاص هجوزهولك متزعليش قوي كدة :D

بصي هوه من تجربة واقعية
كنت بنزل دايما من بيتنا شعري مربوط ديل حصان
وبرجع و هوه منكوش
بس ماما كانت كل شوية تسرحلي شعري يعني لما كنت برجع من المدرسة مكانتش بتسيبني كدة

والله انتي سكر

.......

باقي التعليق

ربنا يخليكي
انا تقريبا دلوقتي افضل
و ربنا يعينا جميعاً علي انفسنا
و إن شاء الله ربنا هيعيني و يعينك
تسلمي بجد بجد بجد

وانتي بالصحة و السلامة

رمضان كريم
نورتيني
.............

ورود و اشواك

اسكتي مش رحت اسكندرية
بس قولت انتي ف سينا بقة مش هقدر اكلمك
وبعدين مكانش معايا نمرة الموبايل بتاعك
دة غير اني رحتها الساعة 10 ولا حاجة و خلصنا الساعة 2

المهم
رداً بقة علي تعليقك

بجيبه من الواقع


ابعتها فين و لمين و ازاي و لية
:D


لأ مش هيتجوزوا
مهندم هيعزل
ههههههههههههههه



كانت شوة مواضييع عائلية كدة
خيراً خيراً
ان شاء الله هبقي موجودة

تسلمي عالسؤال يا قمراية

نورتيني

..............

سلام عليكم

 

برافو عليكى يا نعكشة انتى بتكتبى حلو اوى وشكلك كده كانك دارسة اعلام ولا بيتهيالى؟؟

 

الاهم انك جيتي
حمد الله على سلامتك
كل عام وانتم الى الرحمن اقرب
راجعة علشان اقرا
تحياتي

 

طب والله انا مبسوط انك مزعلتيش ولا حاجة..
مش هتلكك عشان ازعلك ..كويس انك ملقتيش حاجة..
هقرا ان شاء الله المسرحية تاني وهحاول ابقى عندي 7 سنين..
:D

بس احلى حاجة في التعليق : "دليل أكيد "
ههههههههههههههههههه

رعاك الله..

 

انا داخلة اقولك
كل سنة وانتى طيبة
رمضان كريم
معلش اعذرينى مش هاقدر اقرا المسرحية دلوقتى بس ان شاء الله اقراها واقولك رايى

 

ازيك يا نعكوشتى
اية اخبارتك
ونفسيتك عاملة كويسة
اية بتسلم علية
طب الله يسلمها ياستى ويهديها
كل سنة وانتى دايما منكوشة يااااارب
ام لاواحظ
(ملحوظة)
انا بجر ناعم علشان تدينى رقم تليفون

مهندم
ممكن
؟
عوووووووووووووووووووو

 

نعكشة

كل سنة انتى طيبة رمضان كريم

واكيد هتلعبى كتير بالفوانيس فى رمضان بس ياريت متلعبيش فى التراب وتحافظى على نضافتك علشان كل البنات الحلوين بيعملوا كدة ولا ايه

مش ده كلامك بردو

بصى يا ستى بالنسبة لأنها أول مسرحية لأنها للاطفال ولأنها من نعكوشة الفرفوشة

فدى مسرحية بجد هايلة جدااااا واطمنى مش بجامبلك علشان انا استاذ النقد اليومين دول

ياريت تفضلى تكتبى مسرحيات للاطفال على طول

انا لوو سمحتى هطبعهم واديهم لأولاد اختى واولاد اخويا الصغنين علشان يتعلموا

ومتخافيش هحافظ على حكوك النشل بتاعتك هكتب اسمك عليها

تحياتى

 

و بتقولي اول مرة تكتبي مسرحية !!!
بجد تحححححححححححفة ما شاء الله عليكي بجد
عجباني جداااااا
و فكرتها و قصتها تححححححفة و لو اتعملت فعلا بجد للاطفال اكيد هتأثر فيهم و هيستفيدوا منها اويييييييييي

انتي بجد مبدعة
تسلم ايديكي يا قمر

 

عروسة ننوسة

تسلمي يا قمر
لأ
انا بدرس ( طب)

نورتيني

................

عاشقة النقاب


ربنا يخليكي يا جميلة
مستنية رأيك

نورتيني
رمضان كريم

................


ميرو

:D

شكلو تاه
ماهو صغر بقة

نورتني

.................

سبهللة

كفاية انك نورتيني

ك سنة وانتي طيبة
و ربنا يبلغنا رمضان
رمضان كريم

نورتي

...........


كيكي

انا الحمد لله بخير دلوقتي
تسلمي يا رب علي سؤالك

لأ مهندم انا حاجزاة ليا
هههههههههههههههه

نورتيني

..............

المحارب المتيم


وحضرتك طيب
و رمضان كريم

لسة امبارح كنت بلعب كورة ووقعت كذا مرة في التراب و اتشلفط صراحة :D

هههههههههههه

ربنا يكرمك و يعزك يا رب


هوه مش بإيدي يعني الفكرة إني بكتب زي ما الوضع بيحبُك

بس انا مبسوطة من رأي حضرتك بجد


يا رب بس الاولاد ميملوش منها :D

يا فندم اطبعهم دة حقك

بس أنا اسمي مريم مش نعكشة عشان حكوك الطبع و النشل :D

بس ممكن تكتب نعكشة مفيش مانع برضو
يعني براحتك
آل يعني هيطبعهم و يوزعهم في قصص مصورة للجيب

خلاص خلاص
معلش انا لم بخد في نفسي مقلب بعمل كدة
متاخدش علي كلامي
ههههههههههههه


نورتني

..................


اسراء حامد


تسلمي يا رب
ربنا يعزك
رفعتي معنويناتي

نورتيني
وانتي بالصحة و السلامة
رمضان كريم

.............


سلام عليكم

 

السلام عليكم ورحمة الله وبركاته

رمضان كريم عليكي

وان شاء الله يسيب اثر فيكي بالايجاب طوال حياتك

باين طبعا اني ماقرتش المسرحية

 

نعكوشة حبيبتى
وحشتينى وواضح ان فاتنى كتير

كل عام وانتم الى الله أقرب
وعلى طاعته أقدر
وكل عام وأنتم بخير
رزقنا الله العفو والمغفرة ودعوات لا ترد
لا تنسونى من صالح دعائكم
أدامكم الله لى صحبة طيبة
تحياتى

 

vague

عليكم السلام و رحمة الله و بركاتة

رمضان كريم علينا و عليك

ربنا يجعلنا من عُتقاء الشهر
آمين

...................

جنة


ولا فاتك كتير ولا حاجة
ميوحشكيش غالي يا قمراية


اللهم آمين انا وانتي يا رب

رمضان كريم

نورتيني والله

...........

سلام عليكما