نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

أنا بشر

البتاعة دية كتبتها عني ( صحيح هيا اسمها إية شعر لا مش ماشية علي بحور ومش خواطر لاني ماشية علي أوزان اومال اية؟؟؟)
يا ريت تنقدوا البتاعة اللي تحت
تقولوا مواطن الجمال ( كل واحد ليه وجهة نظر في اللي بيقراه)
ومواطن الضعف( هتلاقوا منها كتير)
كان مفروض توزينيها كدة
انتي كدة مش صح عدلي من نفسك في كذا
بلاش" حلوة و مع السلامة "
قشطة
اسمها أنا بشر

أنا بشر

مليانة عيوب

بخطيء و اتوب

و اروح لربي

علي قلبي ذنوب

و اسجد و اقول اغفرهالي

.

انا بشر

لو يوم عليت لحد السحاب

او يوم قدرت امسك شهاب

وبعيني شوفت وسط الضباب

ارجع و اقول

انا من ترااااااب

.

أنا بشر لما بغضب غضبي جامح

وبتتبدل كل الملامح

وعيني بتطلع شرار

بس في الآخر بسامح

(طب بعد اية)

.

أنا بشر

كتير قالولي: متكبرة

وإني كمان مبذرة

أصرخ و أقول لأ، مش أنا

مع إن جوايا متحيرة

.

أنا بشر

مجنونة آه لكن بفكر

عقلي صغير

شكلي مبعجر

والناس كلها حاساهم سكر

.

أنا بشرساعات كتير لوحدي ابكي

من غير مناسبة و افضل اشكي

يا شيخة روحي اتنيلي

آل كتبالي قصيدة عنكِ

أنـــــــا بــــــشـــــــــــر

.

حكوك الطبع و النشل محفوسة لنعكوشة

26 قالوا رأيهم في العك اللي تحت ؟؟؟:

هع هع هع اول تعليق ليا
جامدة كيك

 

السلام عليكم
الاخت الكريمة
تحياتي لنعكشتك الجميلة عن نفسك وعن مشاعرك وميولك
طريقة ف الكتابة برغم ما فيها من آثار النعكشة إلا انها تنبيء عن موهبة فطرية تتملك منك .. فأحسني استخدامها واصقليها بالقراءة وبالحرية في التعبير وباستخدام اقرب الالفاظ وابسطها
تحياتي لك وتمنياتي بنعكشات سعيدة وحياة منعكشة ع الآخر
سلامي

 

ايه يا نعكشة ده خلاص عرفنا انك بشر وحد قال انك بتنونوى او من فصيله تانيه وبعدين ايه يا شيخة روحى اتنيله دى...كده بردوا دى الفاظ يا نعكوشة ولا القافيه حكمت......هههههههههه لا بس جامده
بس انا زعلانه كده مابقاش من مدونات الناس اللى بتحبيهم ومش حطانه على ضفحتك ماشى

 

مواطن مصري

طيب حضرتك شايفها جامدة ليه؟؟؟
وكيك ليه؟؟
طيب مش شايف فيها حاجة مش كويسة؟؟؟
يعني حته فيها مش عاجباك؟؟
اي حاجة؟؟

دمت سالم

..........

الاخ حسام المتيم

تسلم علي الكلمتين الحلوين دول
هيا الفكرة في الإثقال بالقراءة مش فظيعة قوي عندي مع اني بحب اقرا بس مش الحاجات الطويلة
نحاول نقرا منقراش ليه .

طيب حضرتك بتقول
الافضل اني اخلي فيه حرية في التعبير ( فين الحتة اللي حسيت فيها إني مقيد ؟؟؟)

و بتقول استخدم اقرب الالفاظ و ابسطها ؟؟ زي اية ؟؟ يعني المفروض استخدم اية بدل إية ؟؟؟
ارجو الإفادة ؟؟

تسلم يا رب
و دمت سالم

سلامون عليكم

 

شفقة هانم و احسان بيك
نورتيني يا قمر

والله النونوه حلو مفيدة للبشرة
هوه يا شيخي روحي اتنيلي عشان بالظبط الكلمة اللي انتي قولتيها في الاول دية
ما خلاص عرفنا إنك بشر
وعرفنا إنك موجودة
بتألفي عن نفسك ليه ( باس كان نفسي أألف عن نفسي فألفت)

بالنسبة للقايمة اللي حاطاها هناك دية مش حاطة فيها كل اللي بتابعهم انا حاطة شوية في ال favorait بتاعت ال browser و كل حبة كدة بضيف شوية

والله انا بحب كل الناس و بحاول حتى لو احساسي يغلب عليا في اني اتضايق من حد أرجع و أقول كلنا بشر يعني كلنا من طينة واحدة
لبعض و نحب بعض

تسلمي عالزيارة يا قمر

بس مقولتيليش ؟؟؟ إية عاجبك ف ياللي انا كاتباة و إية مش عاجبك في خاطرة او شعر انا بشر

دمتم سالمين

سلامون عليكم

 

تعرف ان كان فى حملة على النت اسمها انا بشر لتوعية الاشخاص اللى بيقوموا بنشر صور البنات واى حاجه عموما تمس سمعه او شرف الناس
احييك طبعا على اختيارك للكلمات لانها مكتملة كل مواطن الجمال
تحياتى

 

جميلة و فيها معاني عميقة
بس لو كنتي حافظتي على الموسيقى اللي فيها ممكن تكون احسن و احسن

خصوصا اخر جزء

شكرا ليكي
يامنكعشه

يامنعكششششه

يامنعــ ... طيب طيب خلاص هاسكت انتي هتبرقيلي ليه
ياااامّا هو الواحد ميعرفش يتفك بكلمتن ابدا

 

اي حاجة منك حلوة يا نعكوشة
نعكشة

 

حلوة والله بس دى انا كدة تفضحينى وتقولى على اسرارى؟
حلو اوى الكلام ما حستش انه منعكش يا نعكوشة
اول زيارة بس مش الاخيرة ان شاء الله

 

حلو اوى انك قولتى(طب بعد ايه؟؟ )

ناس مين الى حاساهم سكر دول ؟؟
بصى هوا الكلام جميل بس محتاج شوية وزن يا نعكووش

 

بصى زى ما انتى قتلى كده .. ساعات الشخبطة والنعكشة بتحتوى على افكار .. المهم ان شخابيطك دى تكونى انى حاسه معانيها .. وكنتى تقصدى كل كلمة فيها لما كتبتيها


طلعت ازاى بقى ,.. منعشكة .. بالمشقلب .. واقفة على قفاها .. مش مهم .. المهم هو لحظة استمتاعك بكتابه كل كلمة فيها


انا رايي برضة انك ممكن تكونى محتاجة تقري شوية .. او ترتبي افكارك اكتر ... او ممكن تخليكي زى ما انتى وتبقى رسمتيلك خط لوحدك

ولمؤاخذة ماحدش ليه عندك حاجة :)

تحييياتى

 

قطة الصحراء

اول مرة اسمع عن الحملة دية صراحة
بس شوفت برنامج عن كدة في التلفوز

تسلمي علي التعليق

.....

كاتشب

جيت عالوجيعة
مش عارفة لية دايماً و دائماً آخر حتة عندي بتبقي معوقة
لأ بجد
أصلي بزهق بقة :D
يادي النيشة عالزهق اللي هيجيبنا ورا
امو هند

هحاول إني اخد بالي في المرات القادمة من آخر حتة ... عالله الحتة الاولانية متبوظش بقة

دمت سالم
........

مواطن مصري

يا سلام يا سلام

.......

انجي

زي ما قولت ان الناس كلها متشابهة بس كل واحد ليه الميزة بتاعتو او العيوب المختص بيها
كلنا عندنا عنين ومناخير و بق و مخ بس فيه لمسة كدة بتاعت كل واحد منا

تنوريني يا قمر وقت ما تيجي

دمتي سالمة
........

وفاء

اكيد طب بعد إيه
مشكلتي اني مبعرفش امسك نفسي عند الغضب
و زي م قال الرسول عليه افضل الصلاة و السلام فيما معناه "ليس الشديد بالصرعة ، إنما الشديد من يملك نفسه عند الغضب" .
الواحد بيحاول
وربنا يعينا

هحاول اظبط ف يالوزن بس
قوليلي الحتة اللي وزنها مش عاجبك
يعني انهي منطقة
وكان مفروض احط كلمة إية بدل كلمة إية
لو تسمحي يعني

دمتي سالمة
.....

بنوتة من وسط البلد

والله انتي سكر
لأ بجد

من جهة حاساها
فأنا عشان اكتب اي حاجة
بتقمص الشخصية لحد ما اكتب اللي بحسو
وبيقفوا علي مناخيرهم بقة :D

بس البتاعة دية انا كاتباها عني انا

هحاول اقرا
انا جبت كتاب صلاح جاهين ولاقيتو عسول
و كان ليا اصدقاء بيجبولي اشعار امل دنقل .. وبرضو لن تخلو من لمساتي النعكوشية
لووووووول
تسلمي يا قمر

دمتي سالمة
.........

سلامون عليكم

 

حاسس بالبراءة في كل حرف بتكتبيه

بس مكنش لازم في الاخر تبوظي الوزن يعني انتي ماشية كويس جدا من البداية الحتة اللي في الاخر دي بتفصل القارئ عن الجو اللي انتي بدأتيه من الاول

بس في المجمل حافظتي علي الوزن والمعني

8 من 10 علشان خرجتي عن الوزن في الاخر

 

تامر صلاح

براءة ممممممم تفتكر ؟؟؟!!

مش عارف
مش حاساني كدة

اموهند

عايزة اقولك اني حاولت دلوقتي اني اغيرها مش لاقية كلام
يعني مش عارفة اعدلها صراحة
لو حد عندي تعديل ممكن نحطوا
وتبقي مشاركة وجدانية قصدي مشاركة قصائدية ( لو حُسِبَت هذة قصيدة)

تسلم عالدرجة بس انا مستاهلش والله 8/10

دمت سالم

سلامون عليك

 

انا مش حشخبط
بس دي خواطر يامنعكشه

وحلوه جدا

 

حلوة اوى اوى بجد وفعلا احنا بشر مش ملايكة ولسنا معصومين زيارة اولى اتمنى تنورينى

 

ههههههههه
أول زيارة ليكى
مدونتك جمييييله جدا
وشعرك تحفه
ودمك زى العسل
والذ حاجه أسم مدونتك
بجد جذاب جدا
بس أكيد وراه قصه؟؟؟؟

 

ز ف ت ة

نورتيني يا قمر

سؤال في عقلي
بنعرف منين ان دية خواطر ولا شعر؟؟؟

علي فكرة كلنا بنشخبط
بصي علي نفسك لو ماسكة التليفون و معاكي قلم
هتشخبطي ( علي فكرة الشخبطة دية ليها معاني و مدلولات)

كل الناس بتشخبط إلا لو ممسكوش قلم

همسة بس ليكي ليه يا قمر مسمية نفسك كدة .. احنا كدة بنرتكب ذنوب غصب عنا
دة المفروض ننادي بعض باحب الاسماء علي قلوبنا
قوليلنا اسمك او اسم تاني و سيبي للناس حريتها اللي عايز ذنوب يناديكي بالاسم الوحش واللي مش عايز يناديكي بالاسم الحلو نورتيني

...............

الاميرة بيري

حقيقي احنا بشر مهما عملنا برضو شوية تراب
جميل انها عجبتك

نورتيني ( انا زرت مدونتك بس انا مش دايماً بعلق )
.......


سوسة

بحب قوي الاغنية دية سوسة كف عروسة

يا رب ما تكون الاخيرة

تسلمي ربنا يخليكي

ولا قصة ولا حاجة
انا انسانة مبهدلة في حياتي
مهملة جداً
ومنعكشة
وقرفانة من نفسي في كدة
فمسمية مدونتي نعكشة لحين اعدل من نفسي

نورتيني يا قمراية

......

دمتن سالمات

سلامون عليكن

 

كاتب مصري

اصلا اصلا حضرتك عندي في المدونات اللي لما بتكتب جديد بقرأها

انا فية مدونات لسة مقريتهاش وناوية اقراها و فيه بقرأو و مبعلقش

و فيه بقرا و بنسي

فمش عارفة صراحة

عامتاً

تسلم علي دعوة حضرتك
ويشرفني اني اروح مدونة حضرتك

....

بس مقولتش إية رأيك ف يالعك اللي كنت كاتباه ( أنا بشر)

...
دمت سالم

سلامون عليك

 

ايه يانونا هو انا اختفى شوية اجى الاقى الدنيا متنعكشة خالص لالالالالالا ميصحش كدة مش تستنينى
بس بجد يانونا حلوة خالصة ههههههههه
عارفة جايبة فيها حجات كتير مش عارفة حسيتك لمستى فيا حجات انا كمان اقولك فى ايه
مثلا فى انى ببكى ومش عارفة ليه فى ان الناس بتقول عليا طاقة ومجنونة ملوحوظة مش كل الناس اللى يعرفونى بس سلام يانونا اشوفك تانى وياريت لو نزلتى حاجة ابعتى قليلى علشان انا مشغولة خالص الايام دة ما انت عارفة انى اتخرجت وورايا الدنيا كلها هههههههه

 

ده اسمه جرأة فى الاعتراف والصراحة

بحييكى عليه

 

همس الحياة

نورتيني بجد و مبصوطة جامض جامض انك نورتيني تاني

عارفة يابنتي الاشغال ربنا يعينك :D

و يكرمك و تنوريني دايما يا رب

.....

مدحت محمد

الصراحة حلوة بس المهم التنفيذ
ماشي انا عارفة انا وحشة في اية
بس لازم اغير من نفسي
ودة اللي مش عارفة اعملوا

حاولت بس الموضوع اكبر من إرادتي ( علي راي مش عارفة مين ف يفيلم مش عارفة اية)

امو هند
نورتني

سلامون عليكم

 

جميلة اوى يا نعكوشة

بجد كلامك و طريقتك تخلى الواحد يخس انه عايز يمسكك من خدودك و يفضل يقرصك منهم زى ما بنعمل مع الأطفال الصغيرين الحلوين المقطقطين دول

بجد عسولة و سكرة و كلماتك كلها جميلة
حتى التحرر اللى فيها حلو اوى
ما عدا الوجيعة زى ما قلتى
اخر حتة كانت عايزة تظبيط شوية
بس فى المجمل القصيدة جميلة
و حلو اوى الولد اللى بيصوت ده و بيقول انا بشر ...

سلاموز بالموز يا سكرة

 

احلى نعكشة شفتها فى حياتى
استمرى وربنا يوفقك

 

شخبطنا اهه
بصراحه انت تجننى ..مبسوطه قوى ان دخلت فى النعكشه دى
اسلوبك مميز
ساتابعك دائما ان شاء الله

 

ورود و أشواك

يا ربي عالعسل

لأ دة مش ليا أنا اكيد

يا بنتي انا مش كدة والله

هتنصدموا بقة

يمكن قلبي قلب طفل

أوك انا هعتبرني كدة

تسلميلي يا قمراية

بالنوسبة للقصيدة

هوه انا مش عارفة اظبطها مش عارفة لية

لو تعرفي تضيفي او اي حاجة او تساعدي يا ريت
اصل مخي جة لحد عن البتاعة دية و إيييييييء و قال ستوب

دسلميلي يا قمر

دمتي سالمة

.............


سبهلله

ربنا يخليكي يا رب

شهادة اعتز بيها

برغم من عدم حبي للنعكشة
بس حبيتها

دمتي سالمة

............

أم البنات



تسلميلي يا رب يا رب يا رب

و ربنا يخليكي يا قمراية

دمتي سالمة

............

سلامون عليكن