نـعـكـشـة

شوية كلام والسلام..مليش دعوةلوبعدما قريته قلت انك ضيعت وقتك..اقرأعلى مسؤليتك الخاصة

اللهم وفق كل المسلمين و المسلمات في كل الامتحانات

اللي في الثانوية: اي جي او معادلة او حتي حكومي ولا لغات

واللي في الجامعة العملية و النظرية و بتوع الألوانات

وكل الشهادات

واكرمهم يا رب و نجحهم وانا منهم

آمين
..............

لية دايماً بكتشف ان عليا موزاكرة كتيـــــــــــــــــــــــر في الايام الاخيرة

مع اني كل سنة بدخلها وانا مونفرجة الاسارير




لأ لأ مش كدة ^^ ( تؤ تؤ تؤ)

كدة vv





المهم الواحد بيبقة داخل و هذاكر و هبقي متابع بقة و حاجات كتير كدة من اللي بيقولوا عليه اسمو حماس


وبعدين سبحان الله إية اللي بيحصل و تجري السنة بسرعة غريبة


و تيجي ايام كدة بتمشي بسرعة بس بطيء إزاي معرفش


(ايام الامتحانات )

تاتاتاتاتتااااااااااااااااااااااااااا
(تش)

و هنا بكتشف الكارثة


اطنان من الورق ( ملازم) و كتب و موذكرات

وحاجات كدة ( جم منين ياخويا معرفش )


و المشكلة إني معرفش عنهم حاجة

بتعملي اية يا عنبة طول السنة بروح الكلية و الدروس

رايحة فين يا عنبة ... رايحة الكلية
جاية منين يا عنبة ..... راجعة من الدرس


و مين اللي بيدفع >>>>> السيد المبجل والد حظراتنا

و هات عشرين يا بابا و هات خمسين يا بابتي و هات مية يا بابي


و طبعاً مونتظر إية >>>>>>>>>> الامتوياز

(ال امتياز ال ) ربنا يستر

و البنت بتتعب
البنت بترجع بليل
البنت بتنزل من الصبح بدري
البنت البنت


ربنا يعينا جميعاً


و تمر الايام و تفر الاوقات كالمش عارف اية في المش عارف اية ( بسرعة يعني)


و اديني انهاردة في حالة من البؤس بعد ما حسبت الحسابات و عملت الجداول و حطيت النظريات


الفكرة بقة انا ليه وانا بزاكر بيبقي شكلي كدة

او حتي كدة VV

ليه مبيبقاش كدة VV


مش عارفة
يلا ربنا يستر
لو حد عدى من الجهة دي ولا الجهة دي ولا شاف البتاع دة
يدعيلي و يدعي لكل المسلمين
ربنا ينصرنا جميعا و ينصر المسلمين في كل مكان
آمين آمين آمين
سلاح

14 قالوا رأيهم في العك اللي تحت ؟؟؟:

السلام عليكم

ربنا يوفقني ان شاء الله
وكالعادة موضوع (جيد جدا)لم يصل الى الامتياز لانه مافيهوش الجديد

جزاكي الله خيرا على الراجل اللي بيغني نحية الشمال ده

عشان كنت عايز انشاسد اجنبي من غير ميوزيك

تحياتي
ادم

 

عليكم السلام و رحمة الله و بركاتة

اية الحلاوة دية جيد جداً من غير موزاكرة اومال لو زاكرت :D

جزانا و إياك إن شاء الله

ربنا يوفقك يا رب و يوفقنا جميعاً آمين

ربنا يستر

سلاموزة

 

اول مرة ازورك يا قمر اجدك مزنوقة في المذاكرة يلا بقي معلش مقدرة حالت ك ربنا ينجحط بامتياز يارب عشان خاطرك و عشان خاطر حظرة الوالد :))

 

يا رب اكرم الجميع .. اللهم انت اعلم بحالنا منا .. فافرجها يا اكرم الاكرمين ..
ربنا يسترها معاكى يا عنبه .. ويكرمك ..انتى وكل الفواكه اللى بتمتحن
مع انى عارف انك من العالم اللى بيفطعوا الكتب ويحطوها فى الخلاط ويشربوها على الريق .. بس هو القلق ده مطلوب عشان الابداع ..
هناك نظرية اطلفتها انا وبعض اصدقائى الفشله .. تنص على
( احنا بتوع اللحظات الاخيره )
يعنى لو الواحد منناذاكر من اول السنه وعمل ربع اللى بيعمله ايام الامتحانات .. هايجيب ممتاز جدا على الاقل .. لكن تقولى لمين ..
يلا شدى حيلك وان شاء الله امتياز مش جدا وبس .. لا امتياز جدا قوى بقه ...

 

سلامون عليكم

معلش يا أم احمد هنعمل اية بقة قدر ومكتوب علينا كلنا :(
اللهم امين
ربنا يخليكي يا قمر
و يعز بيكي الاسلام و المسلمين امين

......

اللهم امين
الله يكرمك هوه انا عاملة البوست عشان الناس تقر ولا عشان يدعولي :D
والله غلبانة و متبهدلة :(
ابداع مين يا سيد هما كلمتين بحفظهم عشان ..... ارصهم في الورقة و اقولهم للراجل اللي بيمتحنا شفوي و بعدين كلو بيروح في ابو نكلة
مع اني حاسة والله ان الطب دة ممكن يكون مومتع بس يلا مسيري في يوم هلاقية ممتع

ادعوا بقة جامد عشان شكلها كدة ولا امتياز و لا بطيخ و مش هاجي بعد الامتحانات لظروف قهرية ( والدي هيبقي فرحان حبتين ) :D

ربنا معانا كلنا يا رب
آمين

 

امين يا رب
ربنا ينجحك و يوفقك


تحياتي

 

اللهم امين انا و كل المسلمين

تسلمي يا قمراية

نورتي يا جميل

سلاموزة

 

ازيك ايا نعكشة بجد بجد بلوجك حلو
الهم خفف الجنة على نعكشة و اجعلها سهل و اجعل الامتحان ساهل
الهم اجعل المراقبين رفقاء بيها


على ايامي في الثانوي كانو جايبين امتحان في الرياضة

ميتحلش اساسا

 

عزيزي المواطن
اسعدنا تشريفك للمدونة
نتمني ان تنول اعجاب سيادتكم دائماً

مش عايزة لجنة خفيفة ولا مراقبين خفاف ولا اي حاجة

انا عايزة بس ان الامتحان يبقي خفيف
وفي متناول الطالب المعوق اللي زي حالاتي

وربنا يستر

تسلم عالمرور

 

السلام عليكم

ربنا معانا كلنا فى امتحاتنا وربنا يوفقنا جميعا وعلى فكرة الحالة دى مش عندك انت بس دى عند كل الطلبة وبعدين واضح ان انتى حالة عادية يعنى الموضوع مش بيقلب تهييس وضحك وسيرك فى دماغك وربنا معاااااااااانا كلنا


بالتوفيق

 

و الله يا نعكشة
معدتش فارقة سيناء من سونيا و اهو كلو بيتجمع في
الكليات الخاصة
وي هيقعد في نفس القهوة

 

ايه ده انتي حسستيني بمأساتي بس انا بقي متفوقه عنك

انا حتي الكليه مش بروحها مع ان فعلآ كل سنه في البدايه بنوي و النيه لله اني اصحي بدري و اروح الكليه و احضر و اذاكر

و بعدين معرفش ايه الي بيحصل بس اسمع خير اللهم اجعله خير ان فاضل 10 ايام علي الامتحانات

فتبتدي حرب الاوراق و لم المنهج

ربنا يوفقك

تحياتي

 

كلمة الحق
بالمناسبة اسم حضرتك رائع

ربنا يوفقنا جميعا يا رب دايما
مش بس في الامتحان دة
في الامتحان اللي من غير ميعاد بيسحبوا الورقة

ربنا يستر
تسلمي عالدعوات

....

مواطن مصري

هوه من جهة قهوات فاحنا هنقضيها قهوات بس لازم نتشحور الاول
ويبهدلونا
عشان نقعد بإحترامنا
وكل واحد حاطتت الشهادة تحت المشاريب D:


>>>

إيمي

ربنا يعينك يا رب و يعينا و يعين كل الناس

الفكرة إن كدة مش حلو

نفسي كدة اعمل زي الناس المجتهدة و ازاكر من أول السنة

بس تقول في مين
علم ف يالمتبلم

ربنا يسترها علينا

.......

سلامون عليكم

 

كنت بمر كدة علي حاجاتك القديمة
وعجبني البوست ده اوي
جميل ومتفائل
واهو السنة الدراسية مقربة لاني طبعا بعلق اخر يوم في شهر 8

بس حبيت اسجل اعجابي بيه
تحياتي لك